[走在刀鋒上 – “Senna”]

Medium: https://link.medium.com/hulJwTV2f6

//

2020 年 5 月，武漢肺炎喺歐洲嘅疫情有見頂回落嘅跡象。一級方程式 (F1) 賽會宣布，計劃七月開始喺歐洲恢復賽事，一眾車迷餓咗半年，終於見到隧道盡頭嘅光線。

喺冇睇賽車嘅時候， F1 車迷不至於完全冇選擇，鍾意睇 F1 車手打機鍊車嘅有 Virtual Grand Prix ，懷舊嘅有經典賽事重溫。想了解車手內心世界嘅， “Netflix” 有 “Drive to Survive” 。

而喺 5 月 1 日，紀錄片 “Senna” 可能係最適合嘅選擇。

- - -

正如後生嘅籃球迷可能要睇 “Last Dance” 先至知道 Michael Jordan 有幾勁，如果大家冇機會睇返上世紀八、九十年代嘅 F1 賽事， Ayrton Senna 點解被喻為一代車神，可能都係一個謎。

來自巴西一個富裕家庭嘅冼拿，曾經三度奪得 F1 總冠軍。企喺 2020 年回望，冼拿嘅成就絕非前無古人、後無可者： 1993 年，綽號嘅「教授」普魯斯 (Alain Prost) 喺暫別賽事一年後回歸，跳出最後探戈而成為四屆世界冠軍。 2004 年，德國車神舒麥加 (Michael Schmacher) 第七次登頂。 2019 年，英國車手咸美頓 (Lewis Hamilton) 第六次封王。

如果三屆世界冠軍並非咁罕有，咁點解冼拿嘅地位咁崇高呢？

喺習慣以成敗論英雄嘅體育世界，江山代有人才出。喺可以量化嘅成績以外，一啲難以量化嘅元素，就成為「傳奇」同「好手」嘅分野。英超「紅魔鬼」曼聯出名在青訓人才輩出，而且有「魔性」； NBA 嘅 “Black Memba” 高比拜仁刻苦修鍊、不屈不撓；網球界嘅瑞士球王費達拿，風格優雅，老而彌堅。

至於冼拿，我會形容佢係激情無限，將自己同戰車能力發揮至極限。

1980 年代嘅 Formula 1 賽車，冇今時今日咁多電子嘢 (例如防滑嘅 traction control ，就要到 90 年代先至應用喺 F1 ，及至 2008 年被禁) ，對車手駕駛技術要求極高。

1984 年，初出道嘅冼拿喺摩納哥站大放異彩，佢冒住滂沱大雨，將中游份子、戰力有限嘅 Toleman 車隊座駕性能發揮得淋漓盡致，幾乎逢車過車，直迫領放嘅普魯斯。不過，「教授」揮手示意雨勢太大、要求中止賽事 (而賽會又同意) ，將冼拿首先分站冠軍推遲咗一年，咁大把。儘管如此，冼拿手車嘅快、勇、狠，已經足以令佢嶄露頭角。

其後，冼拿經過喺 Lotus (蓮花車隊) 嘅三個賽季，徘徊喺總排名第三、四，成績驟眼睇落好似唔夠亮麗，但其實主要原因係正式賽事表現唔夠穩定，論排位賽，佢喺 1985 同 1986 年分別七次及八次排頭位。當年一季先得 16 場賽事。

- - -

紀錄片對於冼拿自 1988 年起，加入麥拿倫 (McLaren) 車隊，同普魯斯一時瑜亮嘅競爭對手關係著墨較多。無他，冼拿 1988 年首度成為總冠軍，正面衝擊普魯斯嘅地位，一個冒起、一個守成，衝突實屬必然。

片中描繪普魯斯老謀深算、收放自如，同冼拿拼命三郎、不惜一切嘅作風南轅北轍。加上時任 F1 賽會主席、同普魯斯份屬同鄉嘅 Jean-Marie Balestre 有意無意作出對普魯斯有利、對冼拿不利嘅判決或干預，普魯斯無形中喺呢套 docu 入面扮演咗一個反派角色。

即使係年輕嘅車迷，透過 Instagram 都可能睇過 1989 年，冼拿同普魯斯鬥到最後一個分站，喺日本鈴鹿賽車場 (Suzuka) 各不相讓而攬炒嘅一幕。當時必須勝出嘅冼拿迫逼場邊工作人員幫佢推返郁架車，再花時間換埋頭翼而後上勝出，剛好夠分壓過普魯斯而成功衛冕。但係賽會主席 Balestre 向裁判施壓，迫佢哋搬龍門而判冼拿犯規兼取消資格及停賽。

喺政治同金錢遊戲背後，冼拿嘅反抗無疑更凸顯佢對純粹速度上較勁嘅熱愛。當然，喺鏡頭以外，冼拿對於勝利嘅執著，亦導致佢會向阻佢發達嘅車手出言不遜甚至揮拳相向。一個銀仔有兩邊，英雄總有陰暗面。

- - -

1994 年，冼拿離開效力六年嘅麥拿倫，轉投配置更頂尖嘅威廉士車隊 (Williams) 。此舉原意係追求事業更上一層樓，畢竟佢喺 1990 年及 1991 年摘冠，成為三屆世界冠軍之後，已經連續兩年陪跑，屈居於威廉士車隊嘅文素 (Nigel Mansell) 及普魯斯之後。

奈何 F1 賽會喺 94 年賽季禁止一啲電子技術，令威廉士嘅戰車表現冇咁穩定。即使冼拿技術超凡，喺場上嘅表現都難免受到拖累。隨住後起之秀舒麥加步步進迫，唔輸得嘅冼拿變得更加焦躁。

喺季初連續兩場賽事食白果之後，冼拿矢志喺聖馬力諾站嘅 Imola 賽道爭勝。不過，由練習到排位賽都事故頻生，其中喺 1994 年 4 月 30 日，新晉車手 Roland Ratzenberger 喺排位賽中失事身亡，更加令賽場一片愁雲慘霧。

新聞寫作有一句老說話： “If in doubt, leave it out.” 如果冇信心，就唔好上陣。但係冼拿對於勝利嘅渴求蓋過咗對於戰車嘅信心不足，佢排頭位出賽而賽至第七圈 – – 一隻高速左彎，冼拿座駕失控，以時速二百幾公里直撼石屎牆。

一代戰神，最終戰死沙場。係性格使然，亦可能係一種解脫。

- - -

冼拿曾經接受 F1 名宿 Jackie Stewart 訪問。

話說 1990 年佢 (又係) 喺日本站同普魯斯鬥到最後一站，同 89 年相似嘅係，賽會安排排頭位嘅冼拿喺不利嘅線道 (dirty line) 起跑。今次冼拿第一隻彎就踩到盡，同普魯斯再次攬炒，而唔同嘅係，今次冼拿夠分做總冠軍。

Jackie Stewart 質疑冼拿危險駕駛，對佢同其他車手都構成危險。冼拿嘅回應係：

“If there is a gap you have to go for it, and if you don’t then you are not a great driver.”

(賴叔中譯：「無孔不入，車神也。」)

1994 年 5 月 1 日，賽車界痛失冼拿，巴西全國視之為國殤。對於喺不足一年前失去 Beyond 主音黃家駒嘅香港人嚟講，冼拿行走江湖，喺刀鋒上搵食，同樣係自由奔放嘅圖騰。 26 年後藉 “Senna” 紀錄片緬懷傳奇人物之餘，亦不禁撫心自問，無懼千鈞一髮、勇往直前嘅初心，至今安在？

Credit: https://flic.kr/p/jY7gu

- - -

想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai

#hk #hongkong #patreon #blogger

“Drive to Survive” - Season 1 (之三：透明嘅中游份子)

寫劇始終唔係我強項，多得大家包容。不過我都覺得有啲局限遲早需要打破，例如話未寫完一個 season 之前，其實係咪都可以開下一季嚟睇呢？自己間返開啲內容咪算囉。

下次再考慮下。呢篇應該係 DtS 系列第一季嘅最後一篇。十集，近三小時嘅內容，可以煮埋一烋然後分三碗上，算係咁啦。又唔係完全獨立成章嘅單元劇，唔同玩法嘅。

- - -

隨住 "Drive to Survive" 進入第一季尾聲，當屆賽事成績逐漸明朗化。威廉士車隊積弱敬排末席，平治及法拉利領放前列，紅牛嘅「三哥」地位無人挑戰到。

剩低要爭嘅，係「梗頸四」，即係俗稱嘅 “Best of the Rest”。首先講下有啲咩車隊冇得競逐呢項「殊榮」⋯⋯都真係幾特殊。

印度力量變成老豆力量 (見辷一篇) ，半季成績分開計算 (否則有力爭第四名) ；麥拿倫單靠西班牙戰神阿朗素力有不逮；沙巴 (Sauber) 車隊嘅艾歷臣表現不濟，新星陸克萊獨力難支；「細牛」 (Torro Roso ，紅牛二隊) 受累於本田引擎不穩、加上澳洲車手赫特利表現連史杜爾都不如 (乜嘢形容詞？) ，全季只得四分，車隊只能排行尾二。

值得一提，撇除冇參與製作嘅平治及法拉利車隊，赫特利同威廉士另一位車手史洛堅，以及麥拿倫嘅二號車手雲當，係少數冇喺 “Drive to Survive” Season 1 入面接受訪問嘅車手。無獨有偶，呢三位車手喺 2019 年賽季都冇得留低。

- - -

換句話講，剩低嘅雷諾 (Renault) 同哈斯 (Haas) 車隊就係去到季尾仍然可以爭第四嘅對手。其實都唔係，哈斯去到最尾幾場都只剩下數字上嘅可能去追趕雷諾 (例如話包辦頭兩名就得，但大家都知實際上冇可能) 。

嗱，公道啲講， “Drive to Survive” 始終要滲雜戲劇元素，如果一切太早塵埃落定，我都唔知佢點樣拍埋最尾兩集佢。所以呢，難免地要從數字上有可能嘅層面，去製造 Haas 有機會挑戰雷諾嘅地位。
Haas 嘅其中一位車手哥桑上次已經略略介紹過，而另一位，來自丹麥嘅麥奴臣 (Kevin Magnussen) ，年紀比哥桑細六年。當哥桑以莫名其妙嘅炒車方式而名聞遐邇，麥奴臣為人熟悉嘅，係佢手車相當之辣。唔係話入彎劈彎過人嗰種辣，而係頂撚住你，唔畀你過嘅時候，嗰種橫蠻，簡單直接啲講，係嗱喳。

最出名嘅一幕，要數到 2017 年匈牙利站，當雷諾車手侯根保 (Nico Hulkenberg) 想喺一隻左彎，沿外檔爬頭嘅時候，麥奴臣自左至右咁壓埋去，基本上冇留低空間畀侯根保，後者唯有鏟上草皮然後重返賽道，但係麥奴臣同其他隨後嘅車手就輕舟已過萬重山。
賽後侯根保向麥奴臣直豎拇指揶揄對方「好撚嘢」，更直斥對方係賽界中最冇體育精神嘅車手。正接受採訪嘅麥奴臣回應時只拋下一句 “Suck my balls” 。麥奴臣事後接受訪問嘅時候，亦不諱言「友誼第二，比賽第一」，「我又不是來交朋友的」⋯⋯之類。

- - -

咁受害者侯根保又係咩人呢？佢同哥桑算係同輩， 2009 年初次出戰 Formula 2 就已經成為總冠軍，成就與六屆 F1 總冠軍咸美頓、一屆 F1 總冠軍羅斯保、新星陸克萊等睇齊。不過，天才橫溢亦唔保證成就非凡。喺 F1 征戰九年，出賽 177 次，侯根保取得 511 分 (註： F1 自 2010 年起賽分改制，排第七、八、九、十嘅都可以分別取得 6、 4、 2 及1分) ，一次排頭位 (早喺 2010 年嘅事) 。

但係，但係，侯根保從來冇試過企上頒獎台，即係永遠地不入三甲。「出戰次數最多而未曾開過香檳嘅車手」呢個不名譽紀錄 (又係另一種殊榮) ，正正由佢保持。

“Drive to Survive” 入面有一幕，影住侯根保代表雷諾車隊出席車隊贊助商微軟嘅宣傳活動，席間被童言無忌嘅小朋友問到佢 F1 方涯贏過幾多次賽事，侯根保只能夠一臉尷尬地話冇，但佢會努力，之類。呢種置身中游，高不成、低不就嘅感覺，對於曾經被寄予厚望嘅「小時了了」嚟講，應該唔多好受。

- - -

至於雷諾，呢個品牌喺香港駕駛人士之間可能並非特別顯赫，但其實紅牛喺 2010 年至 2013 年期間連贏四屆 F1 車隊總冠軍，當時所用嘅引擎正正係雷諾出產。雷諾廠隊亦曾經喺 2005 至 2006 年成為總冠軍，其時領銜車手就係阿朗素。再數遠啲，威廉士 1992 至 1997 年間連贏六屆，都係用雷諾引擎。

雷諾作為 F1 史上贏得第二多總冠軍嘅引擎生產商，地位其實僅次於法拉利。不過雷諾自從 2016 年起以廠隊姿態回歸之後，表現一直都係麻麻地。 2018 年嘅第四名，已經係至今最好嘅成績。

雷諾喺 2018 年尾亦失去紅牛車隊呢個客戶，事關紅牛轉投本田嘅懷抱。客觀效果係，紅牛流失車手列卡度畀雷諾，但雷諾引擎就失去雷諾呢個客戶。邊個大鑊啲？「四萬哥」大幅加薪，薪酬係韋斯塔本嘅兩倍幾，而雷諾喺 2020 年獲得 DP World (來自杜拜嘅物流公司) 贊助，有多一條大水喉射住，要留喺一級方程式賽場又容易咗。

講到尾， F1 同救火一樣，「冇水搞唔掂」。 “Drive to Survive” 以眾人來季去向作結，陸克萊升上法拉利、來自 F2 嘅三位新秀諾利斯 (Lando Norris) 、羅素 (George Russell) 同阿邦 (Alexendar Albon) 分別加盟麥拿倫、威廉士及細牛，為 2019 年賽季增添更多青春氣息。

- - -

想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai

#hk #hongkong #patreon #blogger

Raiden Racing - SpeedPug GO

【麥拿倫車隊 - 電競車手最後召集】
自問手車唔錯，又有用PS4打F1®2019嘅你，就有機會免費飛新加坡兼開展電競選手之路，加入麥拿倫車隊🏎！
🔥 報名詳情: http://racetosingapore.com 🔥

McLaren Shadow Project 推出Race To Singapore比賽，港澳台賽區勝出者可以免費飛去新加坡參加F1®2019比賽，競逐去英國參加總決賽，成為McLaren F1電競隊嘅選手！
唔止呀，你仲可以喺同一個週末，親眼睇住賽車手Lando Norris同Carlos Sainz駕駛遊戲同款嘅McLaren MCL34參與一級方程式賽車新加坡大獎賽，簡直就係賽車遊戲愛好者嘅終極夢想！
海選開放到下星期一咋，夢想唔等人，快啲打開你部PS4啦！

參加方法好簡單
①喺屋企開Game，揀返指定賽道及選項
②用盡奶力跑出最佳時間
③Send返個截圖去報名網站就可以啦！

#McLarenShadowProject
#RaceToSingapore
#PS4 #F1 #F12019
#賽車game #RacingGame