【全民媒體】中海油股價快過油價見底（米小寶）

近個幾禮拜花旗公布0既經濟數據表現麻麻地，憂慮經濟增長放緩升溫，拖累花旗魚缸表現反覆，商品價格亦喺低位徘徊，只有金價同白銀價格因為歐元大幅貶值走勢較強。

有大淡友話油價仲有排跌，有機會再跌一半，講真小寶冇睇得咁淡，油價唔排除仲有機會下試每桶38-40美元，即係現價計仲有一至兩成下跌空間，但係石油股股價似乎已先見底，皆因股票價格永遠走喺商品價格或經濟實際狀況之前。

睇番英國BP上周股價已較之前低位回升近兩成，中石油(00857)價格亦較之前低位反彈逾一成。至於另一重量級石油股中海油(00883)股價走勢亦大有改善，上周五重返10日及20日平均線之上，料反彈未完，短期仍有機會挑戰11.3元，回報去年11月份0既下跌裂口。

雖然石油股去年及今年份成績表肯定冇眼睇，但以中海油現價往績市盈率唔夠7倍，去年預期市盈率只有11倍左右，明年則回落至只有8.4倍，以同樣級數石油股計算，中海油估值偏低。超人0既赫斯基石油明年PE將見20倍，而埃克森亦達15倍，中海石平足一半有突。再睇中海油股價較52周高位大跌逾三成，埃克森較高位僅下跌一成左右，睇嚟中海油有些少跌過籠。

以2014年第三季度計算，中海油未經審計油氣銷售收入約535.7億元人仔，按年下跌4.6%，由於去年第四季油價急跌，預期第四季度收入進一步縮水。不過紐約期油價格近日於45-49美元區間橫行，似乎正在築底，有望於稍後時間反彈，油價反彈目標約55美元。一旦油價反彈，中海油股價定必絕地反擊，依家上定車等食胡，反彈目標價12元，跌穿10元先止蝕。



米小寶