［DSE 相關系數］英文嘅嘢，重考生兩年成績，相關系數90%以上。極少係唔好彩。中文就唔同啦！

TL:DR –　中文通識中西史分數失望嘅，不妨考多次。因為可能只係唔好彩。理科嘅就算吧啦。英文其實都係冇乜翻身機會，但好多人都係一定要試，明白嘅。

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家

1. 幫考試局蔡熾昌（我知唔係考試局，亦唔係蔡熾昌好耐，但我到而都係講旺角火車站）平反下。考試局拎咗咁多錢呢，至少在年度報告，都係有啲貢獻。你咪話，真係詳細過唔少上市公司或者NGO。至少詳細過海洋公園

2. 考試局居然有出，每一科，係每一科，重考生嗰年成績，同上年成績，嘅相關系數（correlation coefficient）。真偉大。但唔知點解，去到2017年後就冇咗。

3. 唔係教數學，但相關系數不能理解：相關系數高嘅，即係舊年高分嘅好多今年都高分，反之亦然。相關系數低嘅，即係好似關係唔太大。負數？即係多數人舊年高今年低，呢度就唔會嘅。方便起見，原本係百份比，我全部倍大100倍。100分為之完美正相關，個個同舊年一樣分。

4. 實務上代表乜？如果嗰科嘅相關系數高，即係你舊年同今年都會咁上下分數。可能代表好難進步或退步，或者係個考試好能夠分辨出邊啲人得邊啲唔得。相關系數低呢？代表一年間可以好唔同，或者代表個考試好陽春，同擲公字差不多，舊年高分嘅今年可以走晒樣。

5. 之前講DSE重考，都係用英文做例子。一來英文緊要，二來多人考，亦多人重考。咁嗰時結論係好少可會升呢，亦都好多讀者指出，正常，因為英文浸十幾年，未必一年之間可以改變乜。雖然我有啲保留：「英文水平」未必可以好快改進，但「英文考試分數」係可以的。

6. 睇表啦喎，每一年之中，相關系數高嘅，紅色。相關系數低嘅，綠色。咁以下就係以所有重考生數字（＊）出嘅結論：

7. 首先，你見相關系數，普遍都幾高。好多都八十幾九十，極少會低過七十。

8. 另外，我啲紅綠色，係一年一年咁做，但你發現年年都差不多。紅嘅年年紅，綠嘅年年綠。即係基本上同考生無關，同年份亦無關，同嗰年份卷深唔深都冇乜關。係嗰科嘅性質，同埋份卷嘅本質。

9. 好啦，英文。眾望所歸，你見到英文科，紅過韓紅，紅過秦虹，紅過喬紅。九成幾嘅相關系數，差不多每一年都係最高。證實咗讀者嘅假設：英文嘅嘢，其實好難一年間改善。即使唔講英文水平，講英文成績，都係好難有乜大改。其實考多次最冇so就係呢科。但當然明白，偏偏呢科係好多人要考多次。正面啲睇，你可以話英文卷嘅甄別能力好好，冇死錯人，你係唔掂嘅，下年嚟多次都係唔掂。但你係進步咗嘅，應該有回報。

10. 但另一個極端，就過癮啦。中文呢？中文科年年綠色，相關系數極低。即係老老實實，分數唔滿意嘅，記住考多次。可能只係運氣，改卷嘅唔妥你。同樣係語言，點解分別咁大？我估係因為兩樣嘢：第一中文係母語英文唔係，唔少人都認為考中文會話或聆聽十分反智。低分嗰啲，咁平時點生存嘅？啞嘅？講法文定手語定手指指send message？考會話其實你考佢演講技巧，考聆聽其實你考佢專注力，同語言能力per se冇乜關。第二，當然係啲卷嘅設計。其實我冇教書多年，但而家中文應該都仲係冇MC玩？英文有下話？咁中文卷就變咗比較主觀。主觀唔一定差，但你重考嘅，下年唔同人，可能你同一份嘢佢畀高分你呢？

11. 另外仲有幾科綠色，相關系數低嘅，差不多全部係文科，「主觀」。亦即係你下年玩過係比較大機會翻身嘅。中史西史，中國文學，仲有惡名昭彰嘅通識都係咁。而啲友明明話通識卷有個指引唔會好主觀喎。數字唔係咁講咯。

12. 當然，仲有表上最低系數，最綠，唯一低過50嘅，視覺藝術（即係美術啦？）。原因同上。藝術嘅嘢，你識條鐵咩。畢加索去考應該拎個U（講笑，唔好咁天真，你估愛恩斯坦真係考試好低分咩）

13. 紅色，相關系數高嘅，除咗英文，就係Phy Chem Bio IT，簡單易明啦。啱就啱錯就錯，大腸就大腸架啦。易乾都係，可以問下呢度讀者，有人教易乾。但我記得都係有MC題？而家咁大鑊飯民粹嘅社會，MC題其實好東西，啱就啱錯就錯，又慳改卷時間。相反，你教文學嗰啲，分分鐘畀個學生老母（甚至學生本人）大返你轉頭。我老母年年睇莎劇喎，你邊位？

14. 仲有乜大科未講？梗係留到最後，數學。理所當然地，數學compul嗰部份，好紅，同英文有得比，相關系數好高。得就得，唔得就唔得架啦。雖然我覺得數學升呢不難的，我私人補習嘅重考生，全部都升呢。「因為U嘅我會叫醒佢去考試，F嘅會教下佢做啲初中甚至小學數」

15. 但奇怪係，分拆開兩部份嘅，唔知點解就綠，相關系數幾低。可能因為人太少？

16. 呀係啦，你見有啲科目NA嘅。如果日校學生唔夠30個人重考，就唔會出現。但好可能全體重考生係仲有幾百友嘅。例如IT在2017 NA咗，只代表唔夠30個日校重考生，但全體應該一定唔止

17. 最左邊，你可以見到2017年，全體重考生，有幾多人考各科。亦見到有啲科係邊緣化咗—其實會考年代已經係咁，只係DSE又吊多次命。

18. 你見到中國文學嗰啲，早幾年上榜，而家已變NA，Visual Arts亦係。仲在榜上嘅，你見中西史地理呢啲，都相當少人重考—固然少人重考唔等於少人考，我懶搵，但個大方向應一樣。

19. 另外小小技術嘢，我見BAFS（企會財），我見2013 2014係冇分類的，但2016就有。一拆二？無論如何，啲系數轉變不大，亦係偏高嘅

20. 最後弱弱一問，而家英國文學係咪冇人讀架啦？至少應該冇乜人重考，咁多年都唔見有上榜（咁可能因為日校不足30件重考）。不過傳說中都係巴閉名校啲女先讀咁話，呢班友唔重考亦好正路。但話說回頭，當年埃汾間屋村學校，學校普通都幾草根（我學生嘅創舉：踢完波買麥當勞新地筒一杯成隊人食！唔知佢踢五人定十一人呢）。但老校都堅持開英國文學，哈。可以話扮嘢，但又可以話堅持。邊個話草根唔可以欣賞文學先？富豪落難都要優雅嘛。

21. 正文完全講完。但忽然間感概，仲有篇後記在後面（其實我係寫咗後記先）。鍾意就睇，唔鍾意唔睇亦冇乜影響正題。

————————————————————————————
甲、 李天命講過個故事，講「命中注定」呢個字嘅含糊。羅素命中注定有四個太太，他實現了自己的命運。李天命命中注定有四個太太。可惜他沒有實現了自己的命運。

乙、 而我，都係「命中注定」教書嘅。但正如友人話齋，我冇做傳媒，係傳媒嘅損失。但做咗，就係我嘅損失。相信教書都係。我冇教書，係香港新一代嘅損失。但我教書，就係我自己嘅損失。咁我都係鍾意自己多啲。

丙、 真的，我係「命中注定」教書。你應該聽過有啲分析員或者散戶，興趣係「睇年報」。冇乜特別。你知唔知我十八廿二時有個興趣係乜？都係睇年報。但我睇考試局年報！當然我最鍾意睇啲考生錯處之類。但亦好鍾意睇啲數字

丁、 一套古惑仔收得，就有成個universe（勁過DC或Marvel），有前傳少年激鬥篇，有外傳洪興十三妹，有山雞故事，仲有reboot嘅江湖新秩序。有紅燈區，有龍虎砵蘭街，甚至有crossover開心鬼大戰古惑仔，真係勁過正義聯盟Capcom vs SNK。

戊、 亦都係好似以前香港啲殭屍片咁，一套鬼打鬼收得，就有人嚇人，人嚇鬼，鬼咬鬼，人鬼神。一套殭屍先生後，就有殭屍翻生，殭屍家族，殭屍叔叔，殭屍至尊—爭在冇殭屍超級至尊或者殭屍華堡

己、 一套收得，繼續拍，玩到爛為止，一路係香港精神。所以我今篇又講DSE重考。但轉個角度，冇魚缸溫度計了

庚、 你諗下，如果我仲教緊中學，加埋當年本人係呢個「教務組」（＊＊），若搞啲咁嘅嘢，老校家長應該都幾歡喜。一個唔該仲可以包裝做乜柒大數據分析添（都話個Excel放埋上Dropbox就雲端計算，加個密碼再track changes 就係區塊鏈技術，整個regression就係人工智能了）。但即係，What for ？讚我兩句又點？即時有女同事投懷送抱（係冇嘅，因為老校其實成日讚我）？定升我做附加數學科科主任？（＊＊＊）。

辛、 掉轉頭，我在呢度寫，即係「這雙手雖然少」，但每個like都自己呃返嚟，睇住自己成長，遇然仲搵到啲錢，唔係更好咩？

壬、 有機會再講，同樣道理，有啲金融文，其實真係我在星展年代做嘅嘢都差不多。只不過係轉做中文。但，肯定我轉做收費文（亦有試過），收到嘅錢，多過佢地畀我嘅人工。唔係話乜，願打願捱，但我覺得係值得諗下的。邊個食咗我嘅錢？點解我要經你接客？

（＊）我呢個表係所有重考生，但亦都有只係日校重考生數字。兩組有啲唔同，但我下唔到咩有意義結論，所以唔節外生枝。「或者遲下嚟多篇」

（＊＊）老師一樣有社團，基本上係強制，好多時冇得揀，負責啲非教學工作。「教務組」負責非教學嘅教務嘢，例如編成績表，編考試時間表之類。聽聞想上位，搏升SGM（所謂嘅主任）或副校或校長，做「教務組」就啱。另外仲有大家都知係乜嘅「輔導組」同「訓導組」。有啲學校（敝校）有「資訊科技組」，俗稱就唔方便講。仲有「課外活動組」。不過最堪玩味都係「教師發展組」，實不相瞞，我都唔知佢地係做乜春的。Hea人必做，守水塘守證物房咁，但就唔使諗升職。

（＊＊＊）附加數學科科主任呢單嘢，簡直係教書生涯中嘅高潮。詳見　我的辭職記　第一回（https://bit.ly/32QpCHN）

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145

［DSE大數據系列］越嚟越少人重考，但勝算反而係大咗

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TL：DR – 市場好有效率，即使計及總考生人數跌，重考人數目都係跌得好快。可能係知道搵笨實，或者早早過外國。亦可能啲自知唔多掂嘅，睇完數字都知機會不大，早早放棄，剩低啲真係有能力嘅。又，其實元祖文用2017，咁啱嗰年就係升呢率近年新低。而家好啲的。

1. 工作有點忙，繼續出呢啲DSE大數據呃下收視。其實OK，夠入屋。懶係好似有啲科學分析咁（其實唔係），好過潮文吹水。但又唔好學究到玩咩Statistical Test （埃汾讀精算添喎，雖則讀得屎，但都畢業丫）。玩到嗰啲變咗就小眾玩意，咁我又唔係出論文交功課，把托咩。

2. 即係恕我仙力地講句，喂，本城（其實全世界都係）啲讀者水平，算吧啦。林超英用log scale都一大班人話佢做乜改刻度唔科學。狀元講句　竊鉤者誅，竊國者侯　居然唔少人話好深，仲話要Google點計。呀大佬，我年代真係小學都識，睇成語動畫廊　熊貓博士同YY嘛。而家聽講上網啲人乜都識。哦。

3. 同樣地，所以我見有啲人，在咩明報信報經濟（我係睇呢幾份），寫文，出埋啲咩Durbin–Watson statistic。我心諗，get a life啦。讀者唔係睇呢啲。當然啲學者鍾意將啲Paper一拆幾整個友善版就另一玩法，即係當年《黑太陽731》都出二級版，八掛雜誌話不如整個兒童版，《小太陽731》

4. 話說回頭，有唔少人真係就咁將呢啲表拆做好多份Paper出，唔知而家仲有冇呢類問題。

5. 好，廢話講完，我嘅literature review （又一浪費生命嘅東西）亦不過係self-reference．第一篇（https://fbook.cc/3Cqq）以2017 DSE重考英文為例，見到八成人冇升呢（七成不變一成跌）（Li, 23rd July 2020）。第二篇（https://fbook.cc/3Cqr），同一年同一科data，但分開日校同全體比，見到日校重考生，升呢機會係高啲嘅。但當然可能根本兩班人就唔同質地，有唔少人係想搵日校都搵唔到人收（Li, 24th July 2020）。

6. 好啦，今次做時間研究。都係用返英文科，但唔用2017。因為想拉遠啲。最新係去到2019。最舊呢？DSE好似2012已有，2013有人重考。但因為我懷疑第一年啲數據冇咁靚，所以我用2014年

7. 以下係結論

8. 首先，右邊，粗體黑字。2014年，有13000人重考（計晒日校同自修），但去到2019年，得6000人。固然，總考生都係少咗（人口結構，仲有可能多去咗外國/考IB），2014年近8萬，2019年萬6。但重考生收縮嘅幅度都係高過總考生好多，2014年每6個考生有一個係重考，2019年10個先有一個

9. 原因？可能係大家已經睇到重考實在冇乜勝算，不如算數。亦可能富貴咗，或者政治原因，香咗咪去外國。

10. 好，睇返個顏色表，英文科。中間個表，紅色框線。有趣咯。2019年，其實超過三成考生，都係重考有升呢！六成二就冇變。一個包裝係「七成都冇升呢」，但另一個講法就係「三成有得升」，「跌呢嘅機會得7%」。真係半杯水。

11. 你會話語言偽術，其實都係。但有樣嘢真係見到：記唔記得元祖篇文，講2017年，係八成人都冇升呢？即係兩成升。但去到2019年呢，係三成有得升。其實都多咗好多。呢個就唔係語言偽術了

12. 原因係乜？可能亦係越嚟越多數據出咗（其實呢堆嘢幾年前已有人寫），發現重考勝算不大，就嚇走咗啲諗多兩諗都知自己真係唔掂嘅人，可能剩返嘅都真係失準，或者有信心進步嘅人。事後係咁解

13. （Turn out 2017 年原來幾極端。2017年嘅 升/不變/跌 係 19/70/11，2014年係28/66/6，2019就31/62/7。你見2017係最少人升呢，最多人跌呢嘅。咁啱我地第一篇文就係用2017，唔知好彩定唔好彩）

14. 講埋啲細節。都講過，重考嘅人，以1-4級佔絶大多數，佔咗96%嘅重考生（顏色表同魚缸溫度計中間），兩年都係。你會話廢話，根本就係大多數人，重考or not，都係呢四級。啱一半。留意在所有考生中（最左邊嘅表，留意係2013 2018），1-4級嘅學生，當然都係絶大多數，但只係八成左右，冇96%

15. 好啦，去返右邊嘅紅色字。1-4級嘅，你見重考降級率真係不太高，1-3都低過10%，4級就去到12%左右。留意去到5級就勁降，證明嗰啲友係不自量力的，5分仲要搏上去，好多考多年就跌，證明原本5級係好彩

16. 最後，睇下魚缸溫度計左邊。粗體黑字，重考嘅人之中，1-4級。固然兩年加埋都係96%，但入面的組成唔多同。2019年嘅，3級嘅一成人，2014年有三成。同樣地，2019年1級嘅兩成人，2014年得14%。幾明顯2019啲重考生，級數係低啲嘅

17. 但係咪2018（留意係早一年）份卷特別深過2014？又好似唔係。睇返最左邊，2018 3或4級嘅人，其實多過2014。

18. 結論？其實冇乜新意。但元祖篇文用2017，講重考成功機會好低，其實有點偏頗。而今次篇文見到嘅，即使計及總考生少咗，重考嘅人都係跌得好快。可能真係搵笨實，或者人人去外國吧。睇下幾時呢個機制都摺埋（但應該好難，有幾百人你都要玩，但可能得返某啲科。況且，又唔使咩特別安排）

19. 係冇乜新意，但放心，”仲有兩篇起碼”。可能講下其他科。

-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145

［DSE大數據分析］我放埋上Dropbox，直頭係雲端運算。唔好講笑，啲友仔去分析報紙呀Facebook啲字，又話大數據啦。又可以搞Startup去科學園昆水啦。呵。

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TL：DR - 即係最好唔好搞到要射十二碼啦，但真係要嘅，都有啲策略提高勝算。唔好睇少呢樣嘢。呢度好多文都講嘅核心價值，順境時我贏多你少少，逆境時我輸少過你啲啲，幾個周期後，就拉開晒了。

1. 上篇文講過，重考升呢嘅機會低。但當然每年仲有幾千人重考（以前成萬人！）。咁如果真係事必要重考嘅，似乎就應該搵間日校，而唔好玩自修。當然可能有啲離地，照計有啲人係想搵日校而搵唔到，被迫自修嘅。但我指如果你有得揀。揀日校應該冇得輸。好彩你咪撞到個好似我咁嘅好老師。唔好彩遇著個衰嘅？咁你咪變返自修mode！冇損失架喎，係嘥錢，但九成都唔係你自己嘅錢啦。

2. 之前三篇DSE文，反應都好好。第一篇係DSE開考時寫，叫大家考好佢（https://fbook.cc/3CiD）。第二篇係放榜後寫（https://fbook.cc/3CoD），話畀你知考得差，等於你場波落後咗，唔係冇得翻身，但唔好自欺欺人，唔檢討，你之後會輸得仲慘。呢兩篇你鍾意睇多次，但唔影響今篇

3. 然後第三篇文，就係今篇嘅前傳（https://fbook.cc/3CoH）。蒙友人啟發，偷咗佢個圖同結論（咁我仲有乜做？都有的），寫咗篇文。好簡單嘅統計事實：DSE重考英文嘅，八成人都冇升呢。有一成仲要係跌。證明個考試幾公平，亦證明冇咁多大意／失手。

4. 亦可能正如呢度讀者講，英文嘅嘢，一年未必幫到乜。但我覺得唔係，難係心態。當然你可以話，如果心態好嘅就唔會搞到重考。各有前因。但亦真係有人忽然發奮，亦有人忽然冇力（例如我讀大學時）。遲下我會睇下其他科，睇下同英文分別大唔大

5. 言歸正傳，呢篇文想睇嘅，係日校重考生，同所有重考生，重考升呢機會嘅分別。考評局畀嘅數。（其實我玩到一半先諗起我應該將兩者相減，搵日校生同自修生，但算了。最後都有整到，但唔貼圖出嚟）

6. 所有數我自己入過晒，係冇朋友原本個圖咁靚架啦，將就下。

7. 個圖下半截，就係上次篇文你睇到嘅（https://fbook.cc/3CoH）。所有考生嚟講，重考英文，八成人都冇升呢。上半截？係日校重考生，同一年，同一科英文

8. 咁日校重考生，同自修生，有冇分別？答案係有的。都似乎明顯。畀定個結論你，似乎日校重考生，升呢機會係高啲嘅。所以又似乎，如果你事必要重考嘅，似乎搵間日校會好啲。但當然呢個結論有啲輕率，兩班人可能根本質地就唔同，有日校收嘅，應該唔會十分非常差。有啲人唔係唔想讀日校，係冇人收（或者冇錢）。但你問我呢，如果我有仔女要重考，我估我都係的佢去日校（利申：其實我教過一年嘅repeaters，會考高考都有，我都係覺得搵間日校好啲的，原因好多人都知：自制能力。個個話自己有自制能力，唔係廢只係懶，但如果真係好有自制能力，就最初唔使repeat啦）

9. 嚟啦喎，上半圖日校重考，下半圖所有人（即係日校重考＋自修）。首先第一樣嘢見到：日校重考嘅人，其實唔多，400個，佔所有重考生剛好10%

10. 第二，有啲奇怪，我唔知有冇曲解。但留意下，日校重考生，本身嘅成績，好似係差過整體嘅。證據？望下上半截，拎5分或以上嘅，近乎冇（有4條友，其實剛好加埋1%）。整體呢？有4%。你睇低位，都係，日校重考生，U或1嘅，18%，整體呢？16%。

11. 搵人補充下。但明顯嗰啲5**重考嘅友，全部係計自修的？你睇5分或以上重考嘅，141人，得兩4係日校嘅

12. 不過，最重要嘅部份啦：睇中間個魚缸溫度計表。日校重考生，同全體重考生，重考分數不變嘅，都大約係七成，分別不大。但講升呢嘅，日校重考生有24.4%可以，四份一喎。全體重考生得19%，五份一。

13. 如果係分日校重考生，同自修重考生，分別就仲大。日校重考生，七成不變，24.4%升呢。自修生呢？都係七成不變，但升呢嘅得18%。

14. 最後，右上角，粗體。原本1-4級嘅人，亦係日校重考佔最大多數嘅人，都係大約七成不變，兩成升呢。留意原本分數越低，升呢機會就越高。都合符常識，即係U嗰啲就根本冇得再跌的。同樣地，由1分變U，都係好難嘅。

15. 但樓上呢段講日校重考。你計所有重考生呢，就好騎呢嘅都有，3分變U嘅都有。仲有兩位奇人5變2。當然正面啲睇，亦有人1變5。所有重考生人數多嘛。

16. 結論？其實都唔係好科學。但日校重考生，似乎真係升呢機會大啲。我係老豆老母都會踢個仔返學，自乜鬼修丫。一個唔該你撞到個好似我咁嘅好老師，咪行運咯。「咁如果撞到個廢嘅呢？」，咁咪變返自修mode咯！其實係冇得輸的！

17. 節目預告：正如文初講，我會研究埋其他科，睇下情況同英文相比如何。因為有個講法話語文水平好難一年間突飛猛進。我初步同意，但，「邊個話考試係考語文水平」？當然個相關性都強。但我意思係，即使你語文水平冇乜好大進步，其實可以練其他嘢嘅。

18. 另外，我仲會做個歷史研究。會考高考冇可比性啦，但，最初嘅DSE重考生，同而家比，情況又點？幾明顯見到係，少咗好多人重考。最初幾年，係成萬人重考嘅。而家得6000。當然總考生都少咗，但冇少得咁快。「可能發現咗係騙局」
-------------------------------------------------------------------------
香港聯匯何去何從？新收費片已出，講足一個鐘，單次買200

想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ　
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145