電影分享 黑白魔后 Cruella/ #movieloverptyy 每年六月十三號，我同屋企人都會一齊去睇套電影，由2007年到今年2021年，眨眼就過咗十幾年。今年我地睇咗Cruella，其實我本來冇諗過要睇呢套，但見啲人對嘅評價都幾高，就即管一戰。睇完之後，我覺得套戲係好睇嘅，佢唔係我平時最鍾意嗰種平淡自然裡面有好多反思嘅電影；而係一套好華麗，唔駛諗咁多野，又可以令人剩係投入同享受其中嘅電影。 長氣電影分享可以睇返最後兩張相/下面（有劇透！！！！）～雖然睇呢套戲嗰陣我冇乜用腦，但睇完又忍唔住諗咗少少野😂 以下有劇透，同我喺本簿寫嘅有啲唔同😂 本來對呢套戲冇期望，因為覺得迪士尼嗰啲乜乜魔后都係差唔多，不過見有朋友睇咗話好睇，就去咗睇。睇完我覺得套戲都幾有娛樂性，劇情發展有驚喜，畫面同視覺上都好豐富，加埋Emma Stone做得好好。另外，就算我唔係對時裝設計有好大興趣，見到Cruella每次出場嘅形式同衣着咁大膽創新，加埋配樂同報刊版面嘅畫面都覺得幾吸引。 至於劇情方面，當女主角知道自己係伯爵夫人嘅親生女之後，佢話終於明白自己點解咁似一個psycho，就係因為似佢親生阿媽。中間特意想營造女主角因為想報仇，而變得愈來愈黑暗、不近人情、無禮、自我：佢好似將jasper同肥仔朋友嘅幫忙視作必然，唔再識表達感謝；佢喺攝政公園搞嗰個fashion show着住斑點狗紋嘅外套，呼應前面佢講過用啲狗嘅皮來整衫嘅諗法；佢嘅復仇計劃好似係想殺咗伯爵夫人，特別係影住佢攞住支針嗰幕⋯ 當佢被仇恨蒙蔽，當佢得知自己正正係佢最憎恨嘅人嘅親生女兒，佢似乎都堅信自己都只會係另一個psycho，就好似遺傳咗佢媽咪嘅設計天賦之外，亦同時遺傳咗佢無情無義殘酷嘅性情。但即使佢表面好似變得愈來愈似伯爵夫人，故事都係想帶出由Cruella主導思想嘅女主角都唔係咁壞：即使佢好似對佢唯一嘅「家人」都好無禮，甚至將佢地嘅幫助視作必然，但佢完成喺攝政公園嘅fashion show之後，佢即刻去買咗野食想返去同佢嘅家人慶祝，睇到佢都係有重視佢地，有感恩嘅心；即使佢好似好殘忍，竟然想用斑點狗嘅皮做衫，但最後佢其實都冇咁樣做；即使佢喺慈善晚會攞起髮針，似乎有所企圖，但最後佢都只係用針輕輕拮佢一下來偷走哨子，而唔係想要殘暴地傷害佢，冇好似伯爵夫人點樣對佢嘅養母一樣報仇。 我諗女主角即使遭遇各種不幸而變得黑暗，仍然保留咗有人情味、有愛嘅內心，除咗因為佢唔想成為好似佢所憎恨嘅人一樣嘅人，最重要都係佢成長嘅過程有佢養母用愛去教養佢呢個有少少難教嘅小孩。所以我自己覺得先天因素固然對一個人嘅脾性有決定性嘅影響，但後天嘅成長環境、遇到嘅人都有份塑造一個人成為點樣嘅模樣。即使象徵善良嘅Stella、佢嘅養母都離世，好似留得返帶點邪惡嘅Cruella繼續生存；但我相信佢曾經接收過嘅愛同善良都會繼續保存喺佢內心💛希望我都可以戰勝啲負面基因，種多啲花喺我個心入面🥀（雖然我今日先負面完～）#staycutedraw #staycuteprocreate