我諗咗好耐，就係諗唔到點形容條片。

點知徐緣兄一講"ETV"，一點就明晒，高手。

開 FB Page 冇問題，但開 FB Page 第一件事，就 Post 一條 ETV Feel 嘅片拍自己學用 FB，就有啲騎呢。

要話俾人知自己學識揸車，係瀟灑開 80 km/h 兼掟兩個靚彎，唔係拍條片影住四個李健師傅教妳點拉手掣。

要話俾人知自己學識 Photoshop，係執一張靚相 Post 出嚟，唔係拍條片影住四個人陪妳伴讀《Photoshop for Dummies》。

要話俾人知自己學識煮餸，係整番個四餸一湯白飯任裝出嚟，唔係拍條片影住肥媽李錦聯安德尊李家鼎教妳乜嘢叫做生抽。

林鄭想証明自己學識玩 FB，但 Post 呢條片，反而更証明自己唔識玩 FB。

我有啲懷疑，佢背後嘅團隊係咪有人想跣佢。

呢個橋段，我諗到好多套用嘅畫面：

【年青人 X Carrie X 高登】

年青女人：咁如果妳想睇啲網民點諗，咁就呢個吹水台。
年青女人：跟住呢，呢度見到 Hi Auntie、向左走向右走呢啲字。
林鄭：Hi Auntie、向左走向右走。
年青男人：呢個即係網民講嘅「粗口 Filter」啦。
林鄭：啊，係啊。有人寫「支持」我啊。Yeah！
年青女人：支持，係高登粗口 Filter 之一，用嚟過濾粗口「Fuck」及其任何相關嘅詞彙嫁。
林鄭：原來唔係好難啫。
大家：哈哈哈哈哈哈哈哈。
－ 對 高登 的期望 －
林鄭：我希望呢，我地能夠加強同所有人嘅溝通。特別係青年人，好似你地咁。

【年青人 X Carrie X 譚仔】

年青女人：咁如果妳想㨂三個餸呢，就喺個 Menu 度㨂。
年青女人：跟住呢，可以㨂湯底同辣度。例如勿演、畜牲、之潤、麻喇實小喇。
林鄭：勿演、畜牲、之潤、麻喇實小喇。
年青男人：呢個即係網民講嘅「譚仔口音」啦。
林鄭：啊，係啊。我仲想走膠牙。
年青女人：最尾呢，加個土匪雞翼，咁大家就會食得好飽嫁喇。
林鄭：原來唔係好難啫。
大家：哈哈哈哈哈哈哈哈。
－ 對 譚仔 的期望 －
林鄭：我希望呢，我地能夠加強同所有人嘅溝通。特別係青年人，好似你地咁。

【年青人 X Carrie X Selfie】

年青女人：咁如果妳想自拍呢，咁就呢個掣。
年青女人：跟住呢，可以拎側啲個頭。
林鄭：拎側啲個頭。
年青男人：呢個即係網民講嘅「照騙」啦。
林鄭：啊，係啊。瘦咗好多。
年青女人：最尾呢，㩒中間圓型個掣，咁就影咗張 Selfie 嫁喇。
林鄭：原來唔係好難啫。
大家：哈哈哈哈哈哈哈哈。
－ 對 Selfie 的期望 －
林鄭：我希望呢，我地能夠加強同所有人嘅溝通。特別係青年人，好似你地咁。

原片：https://www.facebook.com/carrielam2017/videos/160775087757778/

＃林鄭ETV #我想睇年青人XCarrieX買廁紙 ＃林鄭唔好咁上心其實有啲嬲嬲係俾西環嘅不過妳走得CY路線就要硬食