看完《大MK日》，是好撚激動的。 也想起我的MK歲月。 我的MK，盡在信和。 一篇好幾年前的舊文，寫90年代的信和。經撚過刪改。 ————————————————————— 【香港冇咗信和？你不如一刀捅死我】 借問聲，如果我第時死咗，骨灰可否撒在信和？ 1.如果骨灰真的承載著所謂靈魂，與其永遠屈在那些好悶（而且好貴）的骨灰龕場，不如撒在信和，讓我留守信和直到永遠好了。 2.第一次踏足信和，90年代初。當時我好迷高橋由美子，但不知道哪裡可以找到高橋由美子（的Product），好心同學專誠在某個放學後，帶我去一個我從未去過的商場。 3.WOW，當我一聞到朕除就好肯定咁同自己講：這將會是我餘生都Keep住行的好地方。 4.正如食Buffet有既定步驟，我行信和，一樣有。咁多年來，都是先落地庫——90年代的我，習慣先巡視日本Idol的CD和雜誌，當時有三四間舖頭專售這類產品，我買開的是《Bomb!》（貪佢夠平，又細本，易收藏），但真正鍾意睇的是《Up To Boy》，顧名思義，就是一本內容專為男孩而設、既健康（Idol們都穿上健康水著）又有益（青春期）身心的雜誌。而真真正正最想睇的其實是《Video Boy》，一本網羅大量一手「愛情動作片」資訊的高級成人影視雜誌，可惜，唔夠膽買囉（不過又真係有買過噃）……這時候，為平息充塞著內心的澎湃鹹意，我會去Comic Box睇美國漫畫。90年代，香港突然興起睇美漫，我唔執輸睇埋一份，但主要睇公仔，啲美式英語太深。 5.然後上三樓（嚴格來說是二樓，因其中一層是閣樓）——我的頭立即擰向右邊——上到三樓第一間舖頭的櫥窗永恆地展示大批寫真集的火辣封面！天真無邪（就奇）的我從來只敢隔住玻璃，望實那性感迷人風景，始終不敢行入去買番本嚟睇……望夠了望到連自己都覺得唔好意思了，就去中間條巷第二間舖頭，一間叫做「漫畫之森」的舖頭；在這間舖頭，你不會搵到《龍珠》和《叮噹》，而只會搵到花輪和一及丸尾末廣——我第一本（也是最後一本）丸尾末廣漫畫，便在這裡入手。我記得店主（抑或是店員？）是一名文質彬彬四眼青年，幾Nice。 6.然後落一層去漫畫市場。那是日本翻譯漫畫最興旺的年代，我當時合共追緊十五套漫畫，同時又不停發掘新書，每次入漫畫市場，都必定跌錢……偶然心血來潮，會去賣明星相的舖頭，選購心愛的蘇慧倫靚相。至於一樓（即閣樓），好少行，記憶中，去親，都是為了Book度假屋。90年代過暑假，梗係（男男女女一齊）去Camp啦。 7.有幾年我少去咗（所謂少去，是一星期才捨得去一次）——翻版碟最盛行那幾年。就算去，三樓有一大忽我都專登不行過去——成大忽都賣三和四仔。Yes，我鹹，但冇呃你，咁多年來我只在其中一間光顧過一次，而且是陪朋友買（朋友找我壯膽），實在難以置信（到講出來都冇人信）。當後來嚴厲打擊翻版，那一大忽舖頭經常落閘，成個Area猶如死城，卻依然殘留著一大朕煙味，散不去。 8.有人總是說，90年代才是信和最好的時光，如今風光不再；我卻認為，信和根本從來沒所謂風光不風光，而只是一直緊隨潮流，一直是潮流反映和縮影——出面興乜，便自然在信和出現：明星相、翻版碟、格仔舖、Game舖……就連地庫那間專賣日本Idol產品的，現在也因應潮流兼售大量韓星Product。難得是，在被潮流Keep住支配下，場內又總有些比較特立獨行的舖頭能夠繼續開門營業。 9.如果你跟我一樣蒲信和多年，其實已參與了一段發生在香港、但範圍覆蓋日本台灣韓國、時間幅度接近三十年的流行文化史。成個香港，唯獨信和，體現了這段歷史。 10.唉原來已有兩星期冇去信和。信和或許不需要我，但我需要信和，過去的信和煉成了今天的我，這是構成我生命的重要場所。如果香港冇咗信和，你不如一刀捅死我。

【動漫】芥見下下身體不適 《咒術迴戰》休刊一個月 早前就同大家提過人氣漫畫 《咒術迴戰》似乎用草稿就直接上刊，引起動漫迷關注作者芥見下下身體狀況。今日芥見老師就透過《週刊少年Jump》Twitte宣布，由於身體不適，《咒術迴戰》將會休刊一個月，而下周推出嘅第152話只有9頁內容，敬請各位原諒。芥見老師亦表示自己並唔係患上大病，只係需要休息一下，粉絲們唔使太過擔心。希望芥見老師盡早康復，繼續為大家帶嚟精彩故事。 （圖3） 早前《亂馬1/2》、《犬夜叉》作者高橋留美子就開咗Twitter帳號，並分享佢每日嘅作息行程。從佢嘅時間表可以見到，身為漫畫家除咗食飯同做家務之外，差唔多其他時間都係畫緊漫畫，可想然之需要每周一更嘅芥見老師承受幾大壓力，仲要處埋今年年底嘅劇場版電影，必定非常操勞，希望芥見老師可以透過今次休養好好調理返身體。 人氣漫畫《咒術迴戰》由日本漫畫家芥見下下所創作，2018年3月5日於《週刊少年Jump》開始連載，上年開始翻拍成電視動畫，無論日本當地抑或係華語世界都大受歡迎。漫畫單行本累積銷量已經突破5,000萬本，成為「Oricon 排行榜」2021上半年漫畫銷量第二位，緊貼人氣大作《鬼滅之刃》。而改編自前傳《東京都立咒術高等專門學校》嘅動畫電影《劇場版 咒術迴戰 0》亦將於今年冬季正式上映。 資料來源：Twitter@少年ジャンプ編集部、5ch #咒術迴戰 #芥見下下

認識麥Sir，應該是1990年的事。 三十年前，讀緊中三，超鍾意睇香港漫畫，得知馬榮成曾在旺角山月畫室學畫，便跟同樣熱愛香港漫畫的同學豬Wing，報名，學畫。 由素描學起。由正方體圓柱體三角椎體以至球體的素描學起。 當年最興奮，肯定是欣賞麥Sir在自己的「畫」上補幾筆，嗰幾筆，是絕對能夠起到Add Value的妙用。 當年的我，一心諗住練好手畫，加入漫畫行業（真的去天下見過工，不過是見漫畫編輯，又不過冇請我）。 三十年後，已經絕少睇漫畫——香港漫畫完全冇，日本漫畫只間中睇伊藤潤二（但最近有睇番高橋留美子，好佩服佢），英文奇渣的我反而最經常睇得是美國漫畫。 幫麥Sir做這次分享會主持（麥Sir大把嘢講，其實唔使我都得），有點感觸，一來可以見到青春期便仰慕的封面 / 插畫大師昌哥，二來可以見到一直只在FB交流但連樣都未見過的志傑——他跟我一樣，因愛香港漫畫而去山月學畫（會考美術仲攞A）。 還有麥Sir，看見他近幾年一直熱情地有毅力地獨自去畫，而我對漫畫已經沒有了昔日的感情。 好怕聽見人講「港漫不死」，要經常強調不死，其實已代表死死哋。 抱歉的是，當日心情奇差（其實冇日好，但當日明顯勁差），但又要全程佯裝冇嘢。 事後想起，第一次踏足藝術中心，就是中二那年，去睇馬榮成畫展。 圖片來源：撻自今日出版Karson FB #崑崙異說