【龔成問答信箱】（Q21561-Q21580）

Q21561：

龔成老師，我想請問：例如我買入一隻股票，佢$400，假設兩年後佢升到$600，如果佢一直跌價只係跌到$580咁上下，那我應該幾時再入貨？

因為當初我入係$400，由於企業質素好，佢一直升，那我再買的時候，由當初$400， 會拉高購入價？謝謝

龔成老師︰

我地制定入市策略架時候，必定係用當時平貴，去作指標。

首先，我地要睇下當時個股價，是否在合理區內。如果已經係偏貴，就唔會再加注。

若在合理水平，你就要睇你資金多寡、持貨是在什麼水平買入，去作決定。

每個股價水平，都有一定入貨比例，越接近合理區頂，動用資金會越小。若越接近平宜區，動用資金入貨比重，就會越高。

以你個例子作解釋，若你資金係好充裕，可以分多注。$400為合理區中下部，$580算合理區頂。係而個情況，你都仲可以在$580加1小注。

但若你資金不多，只能分2,3注。因為注數少，那就應該等跌到接近平宜區，一個明顯平的水平，才出手入第2注。

------------------------------------------------

Q21562：

阿SIR 你好，我正在計緊股價合理區，但吾肯定有冇計錯

2382舜宇光學

5年每股盈利：
2016(1.3), 2017(3.2), 2018(2.6), 2019(4.08), 2020(5.31)
平均: 3.3

10年市盈率:
10.85/ 18.18/ 18.52/ 24.88/ 31.53/ 32.89/36.05/37.06/ 39.38/ 54.23
RANGE: 24.88-36.05

如果假設增長有20%，即3.96

即股價合理區: 98.5-142.76

咁現在股價198.6 咪好貴…..我有冇計錯…..?謝謝

另外，我想小米股價合理區….但得3年市盈率，係咪計吾到呢?

龔成老師︰

由於智能手機近年快速發展，對高質手機鏡需求大增，預期長線都會維持較高需求水平。

因此，我地係計算時候，用較近年數據，才會更有效反映實際情況。

每股盈利，我會用2017-20年的4年平均值，再用+25%增長去計算，大約係$4.75。

至於市盈率區間，係正確。故用市盈率去推算的合理估值，大約為$118 - 171。

但你要記住，這只是其中一個估值的角度。投資者在進行估值時，要同時用多個估值方法去進行估值，才可以得出更立體的結果。預佢現時估值為略貴，回多2,3成合較合理。

至於小米(1810)，由於上市唔太耐，參考數據會較少。我地可以找相類似企業，用佢地市盈率，去作參考。

小米收入以手機為主，舜宇光學(2382)和比亞迪電子(0285)雖然業務上係不同，但同時間係直接受智能手機發展所影響，都有一定參考價格。

你預合理市盈率，大約為22-30倍。再用上市3年的每股盈利平均數計，再做少少調整，會得出估值為$15 - 24。

但始終參考數據較少，加上企業在急速發展，所以以上估值，只係一個較粗略估算。未來，你要再就其發展情況，作進一步調整。

------------------------------------------------

Q21563：

你好啊 龔成老師，本人是新手上路，希望你能指點一下小弟:

1)想問下 9618 京東集團 你有咩睇法啊？有冇長線持有價值？

2)睇你fb Q20570 解答，你建議可以做月供1810小米，想問下月供跟每月小注手數買入有無分別？

3)另外想問下美股Tesla而家還值得長遠投資嗎？

4)睇你fb主要都係分析港股，想問下美股是否適合新手投資者？

希望得到老師的解答，謝謝。

龔成老師︰

1) 京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，可小注，這股是可以長線投資的。

2) 我在這條所講的分別是「月供」和「小注」，2個是不同的入貨模式。

「小注」意思是，只可以先用你預設投資在小米(1810)的資金，其中「一小部份」。例如你預備總共會買5手小米，那小注，就代表你可先入1手。

因為，現時價格只係合理區頂部，價格值博率不高。但由於若果無貨，而我地估唔倒佢將來升，定跌。如果一直升，我地就會錯失入貨機會。

所以，係平衡2者利弊後，先買入小注，會係較好做法。

而月供，則是你每月用一個固定「金額」去買入股票。股價高時，買入股數會少D。股價低時，能買到股數就會多D。

透過長線去做，令個買入價拉平均。

「月供」模式會較適合初學者，因為佢地定平貴能力較弱。用月供，可以減少佢地買貴貨的風險。

3) Tesla(TSLA)不差，增長快，近年當業務由虧轉盈時，股價向上好勁。不過穩健度不足，股價上落好大。

例如在資金上，要不斷在市場各途徑集資，以維持營運及研發，未能憑以戰養戰的模式，去穩健地發展新項目，資金鏈斷裂風險存在。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。

如果你長線睇好，預佢股價上落一定好大，唔好理中短期股價，只要你投入注碼不過多，可長線，等更大收成。

4) 預期未來一段時間，中國和美國都會係全球最重要的經濟體系。因此港股和美股，都係有投資價值。

作為新手，如果你想投資美股，但又對美股唔係好認識，你可以先投資相關的ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21564：

175吉利，股價高時買入兩首$31.2。現在雖然有純電動車的發展，但遇上原材料缺乏及成本問題未見有上升趨勢。

請問龔sir，需要繼續長線持有？係咪較難上返買入價的水平？謝謝！

龔成老師︰

短期可能會有不利因素，影響集團盈利能力。但我地分析時候，應以長線作為考慮目標。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

你現時主要問題，係買入價偏貴，令帳面出現虧損。

但吉利係有質素，長遠價值總會上升，從而帶動股價上升。相信長遠佢會上返你買入價，這股票值得你長線持有。

------------------------------------------------

Q21565：

龔成老師，我是一名老師，沒投資經驗，受你指導開始月供股票。因遲些會同仔女去英國讀書，要停月供和賣出股票。

到英國後要找工，靠saving 先生活，找到工後可怎樣繼續投資致富？

龔成老師︰

其實做財富增值的策略，在香港，定英國，都唔會有太大分別。

同樣都是根據你年紀、投資取態、經驗等，去建立一個長期、優質、平衡、又適合你的組合。

當你到達英國，開始有穏定收入，而每月又有閒錢可以動用時，你就可以月供一些優質股，去做財富增值。

在開始投資計劃前，你最好留有半年開支，作應急之用。

如果你在英國都可以投資港股，你可以用以下股票。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

由於你無投資經驗，而潛力股有一定波動性風險，你可以先集中係平穏增長股，甚至盈富(2800)。

此期間你要努力學好投資知識，到你有一定投資經驗﹐可以加大潛力股比重。

另外，你要留意，如果你是在短期內離開香港(少於1年)，你就要開始，慢慢將手頭上的股票，分段沽出。

唔好等到走前一刻，才去一次過沽貨，因為咁樣個價格波動性風險，會太大。

------------------------------------------------

Q21566：

老師你好！最近幾個月先開始睇你嘅書，發現自己已經太遲起步，加上從未投資。

小弟今年已36歲，扣除開支，打算做月供股票，每月$3000，知道我呢個年紀應該做啲平穩增長股，例如2800。

但希望可以先增值，所以諗住投資一啲增值類，以下幾隻係自己心水

2800 盈富基金
0388 港交所
0066 港鐵
1810 小米

請問老師認為只有$3000應該如何分配月供？還是有其他更適合？

感謝老師

龔成老師︰

你現在才36歲，尚算年青。只要你認真學習，學好投資知識，用正確方法去增值，都可以有不錯的效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，投資應以增值為主，建議你用「平穏增長股」 + 「潛力股」作增值組合。

你每月先用$3000做月供，係可以。但現時大市只在合理區，除了月供那$3000，每月都要一定額外儲蓄，等出現大跌市時，可以出手掃貨。

你上述4隻股票﹐都係適合的選擇。但由於你每月供款不多，加上你未有投資經驗，你最好同時留有現金，不能無資金在手，你可以先集中係盈富(2800)$1500，另外3隻各供$500，不過這個組合會出現一個情況，就是你供$500，每月能買到的股數會較少，你要好長時間先能有一定的數目。

你可以自行決定，是否長遠進行這計劃，又或將計劃改成盈富（2800）$2000，再加上其中一隻股。

------------------------------------------------

Q21567：

老師，我現倉輸緊17萬，請問我有咩股係需要減或者唔揸，定可 繼續長揸？
跌到我心慌

916 21000 股@11.828
1801 500股 @95
6969 1000股 @71.1
9666 800 股 @78.6
9995 1000股@136.25

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

你現有股票，係有長線投資價值，但佢地都係波動性偏高架類別。

好似信達生物（1801）和榮昌生物（9995）佢業務上，係有潛力架地方。但由於佢一直無有盈利，故不確定較高。

唔係話佢地無質素，但由於佢地架價值都係估估下，所以當市況轉弱，佢地自然就會較波動。

因此，這兩股唔建議持有太多。

金科服務（9666）上市不久，新股好多時都要過一段時間才見真章，現時要準確估值，會較難。

至於餘下兩隻，質素會較好。

這些股票可持有，但不宜佔組合太多，以免風險過高。

------------------------------------------------

Q21568：

不好意思，想請問教陽光能源，廣匯保信，日照廣裕廊，還是思捷環球，這些都持手，看能否走出來。

恒騰這股我從16買了，現在只有9元多，還值得溝貨離場嗎？

龔成老師︰

陽光能源(0757)多年出現虧損，加上負債沉重，建議你沽出。

廣匯寶信（1293）和日照港裕廊 (6117)投資價值好一般，建議你每有反彈，就慢慢沽出，換至其他優質股會較好。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。

因此，若你持資貨較多，建議沽出部份，去平衡風險。餘下的小注，可以守。

我發現你手上的持股，都有長期不止肯蝕的情況，相信你有些投資概念有核心問題，你要小心，最好之後改正翻這個概念，記住，我地不是睇賺蝕，而是睇質素，質素不好就是賣出。

另外，你在加注概念上，同樣有問題。記住，我地決定加注與否，要睇幾個因素。但絕對不會是因為「拉低平均買入價」而去做。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

------------------------------------------------

Q21569：

hi 龔sir，想問埋3808中國重汽值唔值得投資？見佢2020年營收同純利都好唔錯，分別升左56同89%，純利有成74億，但估值得5百幾億。

值唔值得中長線投資？打算17-18蚊建倉。感謝

雖然依家集中賣重型卡車，唔知將來有冇機會發展新能源技術

龔成老師︰

中國重汽（3808）這股都有質素的，佢主要業務為專營研發及製造重型卡車及有關主要總成及零部件。總部及主要生產基地位於中國山東濟南。

佢連同母公司按銷量是中國最大的重型卡車生產企業。長遠來說，其實是有質素的。

睇翻佢資料，佢重型卡車產品品種包括貨車及貨車底盤（總重超過14噸）、半掛牽引車（准拖掛總質量超過12噸）、自卸車及各類專用車底盤等，是國內驅動形式最全和噸位品種最多的重型卡車生產企業之一。

重型卡車產品廣泛服務於基礎設施、建築、集裝箱運輸、物流、礦山、鋼鐵及化工等行業的客戶群。

過往的生意與盈利理想，有長線投資價值。

將來會否全面投入新源市場，都係未知之數。

而現時質素而言，此股有投資價值。17-18蚊算係合理區中至上部，可分注，並長線持有。

------------------------------------------------

Q21570：

早晨龔sir！我之前已經有留意你既堂，不過因為小朋友剛出生不久，呢兩年夜晚都要早早回家，所以一直無報讀，我都有曾經諗過，問問你會否用zoom或teams搞網課，不過因為可能會被人偷錄，我都不好意思問出口

至於打算加注的資金，我最近拜閱緊你的50潛力及50值博兩書，當中50值博真的好厲害！

龔sir你於18年尾出書，到現在21年首季，約2年半的時間，超過一半公司已經超額完成倍增成果；另有部份即使面對疫情逆境，都沒有遭受毀滅性打擊，公司非常優質，證明龔sir你分享既理論同埋眼光都非常正確！

龔成老師：

對呀，因為股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

至於《50股》一書，我寫的方向，是從企業長期發展去寫的，中短期股價可能波動，但長遠這些都是有質素的企業，因此都有長期投資的價值。

------------------------------------------------

Q21571：

龔sir你好，四年前受你啟發，開始月供股票、工作跳出舒適區，人工由當時14k變為現時$30k，生活質素大大改變了。

最近一年，我更踏入一生令一階段，並有想在這一年置業的打算。

本人33歲月入$30k，月儲$20000。

太太29歲，月入$23k，每年跳point，月儲$14k。

現在只有我月供股票：12 $2000，66$2000，1177$2000

我們有130萬現金，股票80萬（其中是月供1211@$50.687 1883股，謝謝老師）

1. 我們打算買6.5m的樓，應該要借9成定8成好? 借9成還可以有現金投資，借8成不用還太多利息

2.買樓後，月供應該要停供還是繼續月供?

3.股票組合中有12、66、823、1177、1211、1810、1448、9988、2628，新經濟股跟舊經濟股佔5050，未來應該要轉換股票組合嗎?

謝謝老師回覆!

龔成老師︰

1) 現時利率較低，盡借9成，令自己可以空出較多資金，來進行投資增值，咁會較好。

但都要留意，成數愈高，按揭保費會愈高，你要自己計算一下，而我相信8成半或9成都可考慮的。

2) 月供是一個長線策略，盡量維持月供。

而且，係你買入一間物業後，個財富組合會較左係物業個邊。因此，你必需去加大翻股票比重，維持月供，係較理想的做法。

當然，買樓前就不用太進取投資股票，等完成買樓過程後，先慢慢加強股票部分都得。

3) 以你33歲計，係可以。但新經濟股會較波動，你要明白這個風險。

另外，你持股中有不少地產股(0012、0823、0066算半隻)。緊記個別行業，佔組合比重不能高於30%，否則會有過度集中性風險。

你現時每月月供$6000，以你們每月儲蓄水平計，係偏少﹐最好可以做到一半儲蓄，用於月供股票。

持股中，中國人壽(2628)近年增長力弱左，質素只係中等，不宜持有太多。

其餘股票都有質素，你長線持有就可以。

由於你未來一年會置業，時間太短，你要先扣起這部份支出，不可用作投資。

現時大市只在合理區，扣除置業開支後的現金，可以先儲起，等大市有明顯回調才出手。

------------------------------------------------

Q21572：

老師，開始遇到樽頸，已有物業及股票，不知點行下一步。

只有車位及細價工廈選擇，唔知老師新作千萬富翁有冇教?

龔成老師︰

首先，我地要從成個資產配置去考慮。你現時組合中，己持有物業及股票，但當中比例是否平衡?

如果係明顯偏重係物業，而一刻，你要做的事，就是加大股票比重，令個組合平衡翻。

若果組合平衡性無問題，你就可以考慮其他資產，好似車位及工廈。但留意這類物業，比較適合較專業和有經驗的投資者。

近年車位和工廈的回報率不高，投資價值只屬中等。 但如果你找到租金回報率較高，有潛力的項目，都可考慮。

我本新書《80後千萬富翁》﹐都有講述一些有關車位和工商廈等的投資技巧和注意點，你可以參考下。

------------------------------------------------

Q21573：

你好呀，睇左你facebook都有一段時間, 有跟你教入左1211,靠佢令到整個組合不至蝕，因之前有原本高價入落的 0002/0011/0303/939，現有持貨市值720k+。

補充小小個人資料，48歲，現每月淨大約35000，其中5000會多供個人MPF, 有11000會去月供股票。

而加想加大月供去到20000, 打算供以下股票，而1177/1810/9988 是打算新增加的，希望個組合唔止著重收息。

呢個組合會否太散，有需要減數目或換其它股？同埋現市況，會否太大比重放左落月供？ 唔該哂！！！

0002 2500
0011 1500
2638 2000
2800 6000

6823 2500
1177 2000
1810 1500
9988 2000

龔成老師︰

你現時中電(0002)、恆生(0011)、偉易達(0303)和建行(0939)雖然帳面有虧損，但這些股票都係有質素。

而且佢地都係收息股，持有目的主要係收息。以你48歲，你組合中係需要有一定收息股，故你可以不理股價波動，照持有就可以。

而比亞迪(1211)質素，但以你的年齡，其實要開始慢慢為退休做準備。

比亞迪(1211)、中生(1177)、小米(1810)、阿里(9988)這類潛力股，增長潛力係高，但波動性都大，現時最多佔組合約2成好了。

你現時月供組合，基本上都可以，唔會係太散。

但大市只在合理區，如果$20000就係你每月可投資資金總數，你就要按比例減少少個月供供款。令到可以每月留有一定現金，用來等大跌市時掃貨。

最後，你要緊記隨著年紀漸長，潛力股比例要慢慢下降，將佢平均地轉入其餘「平穩增值股」(2800)和「收息股」(0002, 0011, 2638, 6823)中，去平衡風險。

------------------------------------------------

Q21574：

你好，龔成先生！我係一個普通男仔，24歲，大學商科畢業，與家人同住已供滿嘅居屋。

面對香港不斷通脹嘅社會，好多人食飯買樓都成問題。我唔想有一日冇選擇而要住劏房、食冇營養嘅食物、冇好嘅醫療保障、請唔到工人照顧父母。

所以我想學投資，利用資產保障自己同家人嘅未來生活質素。

以目前情況，投資股票係現階段我能夠做到嘅嘢。然後下階段就諗自住物業(2019年抽中居屋前5個號碼，不過應該唔輪到我揀樓)，我會 Keep 住抽居屋。

希望可以請教到龔生喺投資方面嘅睇法！多謝！

工作背景：
合約工作，月薪$17,000，應該續約至2022年
(打算完約後投考ACO)

銀行儲蓄：
$100,000
(每月可儲蓄$10,000)

持有股票：
3067安碩恒生科技 / 100股 / 16.70
1810小米集團 / 200股 / 24.80
0270粵海投資 / 2000股 / 12.24
2628中國人壽 / 1000股 / 16.02

5月份開始月供
0388 香港交易所 / 1000元
0700 騰訊控股 / 1000元

心儀股票
0823 領展房產
1177 中國生物製藥
1448 福壽園
3110 GX恒生高股息率
0066 港鐵公司
1928 金沙中國

龔成老師︰

正確，當不滿現時生活，就要作出行動，去改變。

你現時想法和策略，都係正確。係我地資金不多時，應先用優質股去增值。

到有一定資金，我地就加入其他優質資產，好似物業。令到成個財富組合，更完整和平衡。

你現時係24歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

在你持股名單中，中國人壽(2628)近年增長力弱左，質素只算中等，現貨可持有，但不要加注。

而心儀股票中，GX恒生高股息率基金(3110)主要係收息，增長力好弱，不適合你。

月供策略上，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

除了你所選的2隻月供股票外，可以加入以下這些股票。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

由於潛力股有一定風險，你現時無太多投資經驗，除了月供0388和0700各$1000外，其餘$3000應先集中係平穏增長股，甚至盈富(2800)。到你學到一定投資知識和經驗後﹐才慢慢加大潛力股比重。

現時大市只是合理區，你現有10萬資金可以先投入3,4萬，用"分注"形式，慢慢買入平穏增長股。餘下資和每月所儲倒的資金，就等大市出現一定程度的下跌，才大力度掃貨，然後長線投資。

學習方面，你要去多讀投資相關書本、年報，新聞和報相關課程。

書本上，你可以睇我寫架"80後百萬富翁"、"財務自由行"和"股票勝經"，都適合你這類初學者。

------------------------------------------------

Q21575：

龔老師，我朋友有買保險公司的每月派息基金，10萬元在一年裡增至11萬，另利息共$7,200。但要限年期5年，若中途要取出，就會有些罰款。

她鼓勵我要唔要也考慮買，幫忙我的財富能增值。

請問若購買這樣的基金，與自行購買ETF / 優質的收息股比較，我比較適合哪一項？

這類基金當中有無一些魔鬼細節
是不太建議的地方？

龔成老師：

你要問清楚，在那些情況會增加到$11萬，然他派$7200，是一定？還是在某些投資環境先有？要問清楚。

另外，$7200是怎樣派？這是指每年？還是甚麼？佢會以怎樣形式派比你？是投入在基金，選是派現金到你手？要問到好清楚。

另外，問清楚5年內賣出，會有甚麼後果。

如果各方面都無問題，這類基金都可以成為財富配置的其中一部分，不過，增長力未必強，你要同時投資其他項目。

------------------------------------------------

Q21576：

龔sir，你好呀～～我係你而家基礎班既學生，首先好多謝你，因為你令我對股票有新認識，由初初讀你本「80後百萬富翁」、到like你FB、到而家直頭報埋你既股票班，我自覺獲益良多。

雖然仲未好掌握選股學問，但從我聽你上堂同睇你既post，都考慮緊自己應該要買咩股票，黎緊我諗住少少地月供買呢幾隻股票，不竟而家隻隻都好似唔係平入價，希望你可以指點下我。

（2382）舜宇光學：月供$1000
（0027）銀娛：月供$1000
（0669）創科：月供$1000
（1448）福壽園：月供$1500
（3918）金界：月供$1500

另外，如果供埋呢隻美股有冇得諗呢？我記得阿sir上堂你話呢隻係水桶1（QQQ 納斯達克）謝謝～

Sir，餘下幾堂我會俾心記聽書

龔成老師︰

以上提及股票，都係有質素，當中金界(3918)、舜宇(2382)、福壽園(1448)波動性會較大。

現時你經驗不多，如果你對這些股票，未算好認識，最好先較集中點係水桶2。到你有較多經驗，才加大水桶1，就會較安全。

至於美股，都有投資價值。如果你對美股股票，唔係太識。你可以用QQQ或VOO ETF，前者係水桶1(追蹤納斯達克100指數)，後者係水桶2(追蹤標普500指數)。

其實月供係一個長線策略，我建議你唔好急於一時，可以等上完堂，對投資有較全面的理解，才去慢慢做配置，咁會更好。

------------------------------------------------

Q21577：

你好， 老師。 我見你之前話太古地產比大古A好。 但太古a既價格不斷上升。

好快可以上番疫情前的水平，而且太古地產的成交量亦比太古a低很多

第日疫情好的話，太古a入邊既國泰都應該會慢慢好番。

龔成老師︰

我地投資一隻股票與否，唔好用成交量作參，要睇翻佢本身質素。

太古地產（1972）有質素的。佢太古地產是香港及中國的綜合地產發展商、業主及營運商。簡單來說分做三個部分：物業投資、物業買賣、酒店投資。

持有優質的物業組合，加上定位於中高檔次，當中的租金回報亦理想，加上物業組合有相當價值，長遠計的租金會保持上升，當然中短期一定有上落。

另外，由於太古地產有發展大型綜合項目的技術與經驗，這是獨有優勢，無論是發展中國又或是外國的項目，都能為太古地產帶來理想的回報，亦會令往後的總租金收入長遠能向上。

因此，太古地產有相當的質素，是不錯的優質股，長遠投資有一定回報。

不過，疫情因素對這企業都有一定的影響，但只是中短期不利，長遠會好轉。

另外，在家工作及網上購物，都會對這企業造成影響，但長遠而言，市民對實體購物，以及實體寫字樓，都有一定的需求，因此長遠仍不差，但增長力可能略有影響，令增長力不會太高。

現價合理中至上部，對追求收息及平穩增值的投資者，這股適合，但就不是高增長類別。

太古股份公司Ａ（0019）佢是綜合企業，佢都正面，但整體質素上算係中等。

但佢業務已經好大，長線增長力會不及1972高。現價算是合理區中上部，你可以分注投資。

而國泰（0293）質素只是一般，航空業對經濟週期較敏感，收入不穩，同時唔算係一個好賺錢的行業，因此這股的質素只是一般（國泰會影響太古A的）。

過左疫情，佢會好翻D，但始終賺錢能力都係弱左，唔好對佢有太大期望。

------------------------------------------------

Q21578：

龔老師：弱弱一問，2823安碩A50 ，3煤氣 及 2828 恆生中國企業，係屬於平穩增值股嗎？

因想改下水桶123的持股比例，唔好意思，打攪哂

龔成老師︰

其實煤氣（0003）有質素，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

安碩Ａ５０（2823）資目標為追蹤富時中國Ａ５０指數之表現，即是當國內股票升，佢都會上升，是一個中國股票的組合。

相信長遠仍有增長力，不過國內股股價一向較波動，令到這基金都會較為波動，如投資，最好用分注或月供的模式進行。可長線。

恒生中國企業ETF（2828）有投資價值。

這基金的投資目標，是追蹤恒生中國企業指數之表現，即是中國的企業，當中不少都有一定的質素。只要中國經濟長遠增長，而這些企業合理增長，就能帶動價格保持上升。

由於這些國企的股價較為波動，你最好以長期的模式去進行月供，每次供的金額不用太大，以較長時期去平均價格，自然能減少風險。

以上3隻股票，煤氣（0003）係平穏增值股，而安碩Ａ５０（2823）和恒生中國企業ETF（2828）係平穏增長股，至潛力股之間。

增長潛力較煤氣高，同時風險都略高。但相比煤氣，這2隻ETF係一籃子股票，故分散風險能力會較好。

------------------------------------------------

Q21579：

明白, 謝謝老師. 其實我一直考慮一個問題就是, 價值投資是好好, 我在想如果它可以制造現金流會更加好, 因為價值投資需要時間累積.

我亦明白你既投資理念. 先儲蓄後增值. 當增值到一個大數後就可以利用收息策息來賺取穩定收益.

我從2018年開始就想擺脫打工仔既生涯, 我睇左你本千萬富翁, 思維篇的內容可以話就係我而家做緊既野, 不斷去嘗試. 搵機會。不斷明確自己欲望和目標. 我亦相信最後我一定做到.

我而家背景是已婚人仕, 有一女, 準備再添一男. 收入是穩定, 兩公婆加埋有大約10萬收入。

我而家每日都同自己講, 我出年會實現搵到每個月被動收入6萬蚊. 講左一排後發現自己真係會係咁唸點樣先可以達成尼個目標。

我出年係公司做夠15年, 可以攞到七成退休金, 再加埋其他資產, 大約有3-400萬現金, 所以我就係度唸, 我點樣可以運用尼筆資金黎制造現金流, 令到我可以達成尼個每月6萬元穩定被動收入既目標.

感謝老師回覆

龔成老師︰

將資金變成製造現流工具，方法好簡單，就係有策略地，分注買有優質收息資產(如收息股、年金、定息產品、債券等)。

透過佢地派息，從而獲得現金流收入。

如但要做到每月有6萬蚊現金流，以股息率6%計，你需要本金1200萬本金。

以你現時情況，你退休金+其資資產總金額，跟目標1200萬尚有一定落差。建議先用優質股，再進行一定程度的增值，才實行財務自由計劃，咁會較好。

除了你每月可以做月供股票外，這筆退休金，都可以投入以下股票，進行財富增值。

以你36歲計，投資目標可以用「平穏增長股」 + 「潛力股」，你每月先用5成儲蓄，其餘先儲起，用一邊月供一邊儲蓄的策略。

但潛力股有一定風險，如果你覺得自己都有一定投資經驗，最多比重可以去到5成。否則，大約佔3成好了。到你有經驗時，才慢慢提升潛力股比例。

退休金，到時可以因應市況，分注入貨。餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21580：

阿Sir我想問你，我啱啱賣咗自己層樓，想轉三房。因為而家兩個小朋友，要多點空間。

我想問你認唔認識麗城嗰邊？如果喺嗰邊買樓20幾年樓細屋苑得兩三座或者單幢樓，你覺得投資價值係咪相對麻麻。

但因為荃灣西三房新屋苑閑閑哋都過千萬，真係頂唔順。

龔成老師︰

荃灣本身算是不錯的地點，這是市區與新界西的重要連結位，交通方便，區內配套齊，算唔錯。

作為自住樓，除了睇投資價值，都要考慮埋本身財務狀況和生活需要。

你所講地方，我相信係蔚景花園、韻濤居。這些屋苑較細，甚至只有單幢。樓齡剛過20年，唔算係好舊。

而且交通算係可以，步行10-15分鐘，可以到荃灣西站。初步睇，都算方便。

如果佢尺寸、位置等，配合到你生活，同時做到"供得起"，我覺得可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21101-Q21120）

Q21101：

龔成老師你好, 我是你股票班學生, 有些投資配置問題

本人一直採用7(水桶1):3(水桶2) 的投資比例係低位分注買入不同的優質股，特別是華虹半導體（1347),平均買入價14.47, 現價雖然下跌但仍有+200%的升幅，亦佔了我整個組合25.07% 問題就是：

1.我應否減持部分股票，轉入比較便宜的水桶1

2.我應轉入中國平安（2318) or 信義光能（968), 比較適合

3. 信義光能（968) 雖然潛力比較高，但估值上仍在較貴的水平，應等到合理價以下才開始減持華虹半導體（1347)?謝謝

龔成老師：

1）我地衡量水桶123佔組合比例的方法，是根據過往一段時間的股價的，以你持股的市值去衡量。

其實好多時都會出現這現象，就是水桶1的增長好快，令組合比例較多，由於我地配置是長期的，因此著眼點不是短期的股價令比例超過，但如果長期開始超過，就要配置翻。

另外，如果一隻股票去到貴，都可調整。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，如果投資，我會建議你由25%減至15%-20%。

2）可以，因為可以令組合更加平衡鄧

3）信義光能（0968）近期股價比高位都回落翻，近期大多時間處合理區頂水平，其實都可以開始小注。

------------------------------------------------

Q21102：

成哥:真係好好笑，尋晚發夢竟然你黎咗我屋企玩，同你一齊傾計食飯打下機...講堅的!!依家諗返起真係笑死我!

首先多謝你成哥，我用你在書本及課堂上教導嘅理財知識已經存到第一桶金。準備置業當中，有問題想請教成哥你.

我白表居屋抽到第一個波，屬於排名好前既核心家庭（不是家有長者類別)，黎緊下個月會揀樓，我一家3口，最驚係揀唔到心儀單位。

今期2020居屋有鑽石山，大水坑，火炭同粉嶺。鑽石山同大水坑地點最好，最近地鐵站，火炭同粉嶺地點偏遠。

以上居屋除了火炭可以今年尾入住外，其他的都要等多 1.5-2 年後先入伙。想請教你意見:

1. 因我有住屋需求，現時還在租樓住，但我屋企人有層樓可以俾我可以先暫住（住10年都得), 就算我抽到偏遠地區居屋，係唔係都應該照買呢？

居屋市價65折真係好吸引，如果買出面私樓每月要供多好多錢，雖然我能力還能夠應該 700萬以下樓價。

2. 如果揀到細單位例如 1房，應唔應該間 2 房，先上車等以後再換大單位呢？

龔成老師︰

哈哈，好榮幸，竟然可以參與你夢中的活動~~~

1. 大炭的彩禾苑和旭禾苑，其實10-20分鐘步程，就會到港鐵站，唔算話好唔方便。但附近工業大廈較多，生活配套可能會弱少少。

至於，粉嶺山麗苑，地理位置和交通會較弱。

至於年尾入住和等1-2年，唔算好重點，因為你始終有屋可以暫住，所以考慮時唔洗放太大比重，係而個因素。

由於你這個是自住房，你應該較集中，在自己生活方向出發，去考慮這些樓盤是否適合。講緊唔係而一刻，而係5年、10年、以至20年後，佢配唔配會倒你生活所需。

如果係可以，而你有"供得起"，咁就無問題。

居屋雖然投資價值私樓較弱，但勝在價錢較平。你可以令自己有較多閒錢，作投資增值。而且當你資金唔算好充裕的時候，居屋會係較好選擇。

因為，我地財富增值會講求組合平衡性，如果你將資金去晒樓市，咁就會太偏重物業類，令組合風險太高。

最理想係，你買完樓之後，都要有一定資金，去維持用優質股增值，才算較好。

2. 如果你現時生活，1房係無問題，只係長遠才有2房需要。你1房都可以要住先，用以資產追資產模式操作。

另一邊，就用優質股增值，到有一定資金，又有適合的2房物業出現時，才去細屋換大屋，咁會較好。

------------------------------------------------

Q21103：

龔成老師 第一次send message 給你 希望你在百忙中給我一點建議

我現時25歲 每個月收入約25000，2019年開始有月供股票 現時每個月我都會用6000$月供股票
現時為止有
1
2
5 （已停供）
11 （已停供）
823 （已停供）
939

我現時資產有25萬，每個月都儲到1.2萬，希望5年可以有100萬資產，所以而家想供一d增長股

諗住加供2318/1928/2382
請問老師覺得是否適合 定係有其他增長股更好? 感謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應用"平穏增長股" + "潛力股"的組合，去累積財富。現時每月$6000儲蓄做月供，另外$6000儲起架策略正確。

但選股上，建行（0939）和中電（0002）主要係收息，增長力唔高，唔係咁適合。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以回報10%計（連股息再投資），你每月投資$12000 + 25萬股票，5年後大約會增值至120萬，故這樣安排相信很大機會達至你的財務目標。

------------------------------------------------

Q21104：

龔老師你好，我一向有追蹤此專頁，以及拜讀你的幾本著作，實在獲益良多，謝謝。

有以下幾個問題想請教一下你，謝謝解答：

1, 請問老師你如何看中石化（386.hk ）這企業及前景？現價合理嗎？是否適合長線持有？

2,中國現時處於疫情後經濟復甦期，屬舊經濟的企業，業務應該開始慢慢pick up, 請問這個設定正確嗎？

3,我和丈夫共同持有一何文田的單位（已供完），本來作自住用，所以沒有特意留意投資回報。

現在由於為了小朋友學校，一年多前搬了港島區租屋住，於可見將來也應不會搬回九龍住。

本想放租此單位，因它屬於名校網，本以為容易出租，但疫情一整年都沒有租客，加上同區

大量新樓盤落成，樓價自2014年買入後都沒有升幅，而此單位另一缺點是管理費貴

加上每月攤分差餉地租等成本，每月的支出也不少。
我們打算放賣此單位，換一港島區的物業

會選擇比較容易出租的大屋苑。這個策略正確嗎？因以我們的預算，買不到近小朋友學校
的單位。

謝謝你的寶貴意見及時間。

龔成老師︰

1） 中石化（0386），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

佢上年的股息理想，但翻查之前的幾年，股息都不是好高，佢由2014年-2019年的每股股息：0.25/0.18/0.28/0.60/0.5/0.39

個別年度計，股息是吸引的，但如果佢之後的業務，無之前度咁樣，股息就會下跌，而佢過往的股息亦唔算太高。加上佢的股息不太穩定。

此股算係收息股類別，但質素屬中等。現價合理，可以分注，但不宜佔太多。

2） 現時大多數舊經濟股，估值上算係合理區。相比起好多有輕微過熱架新經濟股，此刻舊經濟股值博率會較高。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

3） 何文田有不錯學校網，港鐵發展優化了該區的交通，再加上啟德發展區，都會為何文田區帶來機遇。

雖然有唔少新盤，但長線此區都有一定需求。唔好太過因為短期疫情影響左分析，我地要從長線回報和發展潛力架角度去考慮。

整體而言，你這個物業係有持有價值。

建議你找多幾間地產代理行放租，以及減少少租去放，我相信一定有市場的。

------------------------------------------------

Q21105：

龔sir你好,這是我本人的情況,希望你為我提供意見

家庭狀況: 30多歲,已婚,未有子女（但有計劃過）
收入: 二人月入$80000左右,工作穩定,扣除供樓,家用,雜項後每月可剩餘$1.5-3萬 （視乎情況）
物業: 一年前自置物業,月供$25500
股票: 以分注買入形式投資$53萬 （幾多手@平均價）

舊經濟股
0002 中電（[email protected]）,0003 煤氣（[email protected]）, 0005 匯豐（[email protected]）, 0012 恆基（4@34）, 0178 莎莎（[email protected]）,
0823 領展（[email protected]）, 1038 長建（[email protected]）, 1928 金沙（[email protected]）, 6601 朝雲（[email protected]）, 6993 藍月亮（[email protected]）

科技股
1137 港視（[email protected]）, 1810 小米（[email protected]）, 2158 醫渡（[email protected]）, 2382 舜宇（2@145, 6060 眾安（4@57）, 6618
京東健康（2@134）, 6988 樂享（[email protected]）, 9618 京東（[email protected]）, 9991 寶尊（[email protected]）

ETF
2800 盈富（1@23）, 3033 南方科指（[email protected]）, 3067 安碩科指（[email protected]）, 3088 華夏科指（[email protected]）,
3086 BMO納指（[email protected]）, 3140 領航標普（[email protected]）

另加:
實體股票（沒有存倉）
0823 領展（5@10）, 3988 中銀 （[email protected]）
港幣存款: $15-20萬
外幣存款: （GBP,USD）約$40萬 （作旅行,應急之用）

目標: 3-5年內資產多一倍

狀況:
這個投資組合在一年前才剛開始,舊經濟股大部分在疫情初期買入,現時在憧憬重啟各地經濟的前提下才稍為有少許增值

科技股在下半年才開始買入,受惠於熱潮帶動,起初增值不錯,然而在今年初債息問題開始後一直滑落,
抵消了所有增幅,部份虧蝕相對大,令整個配置大致上沒有增長

問題:
1. 組合中的選股有沒有很大問題嗎?
2. 有哪些股份未來時間可以加注,有哪些應該盡早換走?抑或暫時維持多一段時間?
3. 不少銀行劵商都會對同一隻股票發表報告,列出目標價,但部份相距頗大,應如何看待?

謝謝

龔成老師︰

1） + 2） 記住，唔好因為大市氣氛高漲，而跟風去買股票，咁係好危險。因為同一時間好多人去入貨，好大機會個已經係貴晒。

過去一段時間，新經濟股被熱炒，好多都去到貴架水平。而在回調，只係令佢地慢慢變翻合理少少，但好多都仲係略貴。

現時你股票數量太多太亂，以你金額計，建議你組合維持10隻以內好了。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。中電（0002）、匯控（0005）、中銀（3988）都係收息股，增長力欠奉，唔適合你。

其他股票都有質素，可以長線去持有。

但留意朝雲集團（6601）、樂享互動（6988）這類新股，好多時都要2年倒，先見真章，唔建議持有太多。

另外，港視（1137）、醫渡（2158）、眾安（6060）、京東健康（6618）有潛力，但不確定性好高，同樣不宜持有太多。

南方科指（3033）、安碩科指（3067）, 華夏科指（3088）同樣都係追蹤科技指數，當中3067費用率較低，長線用佢會較好。

長線計，建議你用月供"平穏增長股" + "潛力股"，去創造一個增值組合。現在你每月5成儲蓄，去做月供，其餘先儲起，用一邊月供一邊儲蓄的策略。

至於餘下的現金和現有存款，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

3） 這些目標價，建議你只用作參考好了。

------------------------------------------------

Q21106：

龔成老師你好，請問你點睇心動公司2400及心通醫療2160呢兩隻股票?

之前我在差不多最高位時入了心動2手及心通1手，現已蝕差不多3分1，請問

你認為此兩隻股票值得長線嗎？還是應現在止蝕?
謝謝你

龔成老師︰

心動公司（2400）集團主要於中國、亞洲、北美洲、南美洲及澳大利亞開發和營運網上遊戲，網絡遊戲都為免費，收入主要來自銷售遊戲內的虛擬物品所產生。

集團同時也開發及營運付費遊戲，以及與第三方遊戲開發商合作發行及營運授權遊戲。

業務上，有吸引地方。不過，我一向都新股半新股都無興趣，因為真實面要慢慢先見到，所以估值困難。只建議小注，同時你要明白當中的風險。

如果持貨不過多，都可以守。

微創心通醫療科技（2160）有潛力的。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業有一定獨特性，同時長遠發展不差，不過估值方面就十分難，因為這刻仍未有似樣的盈利。若佢佔你組合唔多，可長線持有，等佢更大收成。

------------------------------------------------

Q21107：

老師你好，我今年38歲，想好好設計自己長期投資組合，如果改善同部署

1）883 5000股 $8
2）909 8000股$55.35
3）941 2500股$55
4）981 5000股$26.7
5）9988 1300股245.3

另外上個月開始月供股兩隻
1）2388 500股 $28.2
2）3067 300 股$18
Thankyou

龔成老師︰

我地做投資選項時，會因應自已年紀和取態去決定。以你年紀，重點應放係累積財富上面。

中國移動（0941）只係收息股，增長力弱，不宜有太多。

中海油（0883）和中芯（0981）雖有增長力，但質素只屬中等，不宜持有太多。

明源雲（0909）較新，這些新股好多時要2年見真章，暫時唔可入太多，咁會較穏當。

月供方面，無問題。但留意，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21108：

你好龔sir, 想請你比下意見我

本人現在28歲, 股票本金$30萬, 現金$10萬, $3500月供緊一份基金債券（供左3年, 帳面蝕緊 $2萬）

以下是我現在持有的股票:
3手3067 @ 17.5
1手 1810 @$27
1手 883 @$7.9
1手 762 @$4.86
2手 728 @$2.3
1手 1833 @$138.1
1手 2333 @$26.45
2手 6618 @$114.75
2手 9633 @$58
1手 1789 @$12.5
1手 175 @$35.95
2手 9988 @$248.1
3手 6993@$14.46
1手 981 @$24.5

請問以上組合可以怎樣改善才有更好的回報呢? 想資產有所增長但股票和基金都蝕緊錢

龔成老師︰

你要知道就算再優質架股票，中短期都會有波動。只要係優質，長線持有就可以。

中海油（0883）、中芯（0981）質素只係中等，唔好佔組合比重太多。而愛康醫療（1789）、京東健康（6618）不確定性較高，只宜小注。

其餘股票都可以，現時大市只在合理區，餘下10萬就等大跌市，才出手。

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21109：

您好啊，我是新手，因為之前傻傻地買左01612永勝醫療，2.3入手

依加跌到1.66，我想問下我係未放左佢就算了，買左成幾個月

本身想等佢派股息，點知仲跌得仲加多，所以想問下你意見，謝謝你。

龔成老師：

永勝醫療（1612） 業務為製造各種醫療產品，主要包括呼吸產品、造影劑壓力注射器一次性產品以及骨科支護具康復器具。

佢過往幾年收入都好波動，加上賺錢能力唔算太強，質素一般。

雖然佢盈利有增長，但股價近一年都上升了不少，你預上落都大。

這股唔適合持有太多，你如果小注就守，太多就要減。

------------------------------------------------

Q21110：

老師你好，我其實早幾年都開始接觸股票，但近一年認識了你之後先懂得買入股票作長線投資，希望財富增值，現在亦正拜讀你本「股票勝經」

希望可以真正認識股票更多。我想問下有甚麼股票可以類似比亞迪咁，有好大潛力可以長揸？謝謝你。

龔成老師：

現時好多潛力股都升晒，強行追入反而會有風險。

你可以留意下中生（1177）、褔壽園（1448）、小米1810）、必瘦站（1830），都有潛力，但現時在合理區頂至略貴，回翻D先買入會較好。

當然，要好似比亞迪（1211）升咁多就未必得，但長遠都有質素的。

------------------------------------------------

Q21111：

老師你好 我想問下你意見。我一路都唔識投資，而且保守。年過四十有個小朋友，想幫佢儲多d錢。手頭上股票全部都仲坐係艇。

5、728、857、9988

有大概15萬現金可以再做投資. 請問有咩好選擇? 我應該賣哂手頭上蝕本貨嗎?

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你持有的股票，都是有質素的，你可以持有。

如果你目標想增值，就可考慮將0005、0728、0857，上翻較多時，轉其他股。

只要你未有把握時機及企業估值能力，令你在貴的價位投資。

建議你之後，應該用月供或分注的模式投資，可減少你一次過在高位買入的風險。

你之後可投資一些ETF，我相信會比例較合你，例如盈富（2800）+恆生科指ETF（3067），比例上前者可較多。

------------------------------------------------

Q21112：

龔sir，最近本人有想法投資香港的小型物業用於放租。請問現時物業是否值得投資？

有些中介推薦了奧運的新樓利奧芳給我，我留意了那邊一房單位198尺，尺價在26000左右，總價500-550。

同樣的預算可以在康城買大一些的單位。請問是面積大一些投資價值高還是地理位置好一些投資價值更高？謝

龔成老師：

奧運利奧坊有質素，但的確有點貴，不過我地投資，會以質素行先，如果要上述2選1，會考慮利奧坊。

當然，更好的選擇是一些舊少少的樓，如10年-20年，大翻少少，市區，會更有投資價值。

------------------------------------------------

Q21113：

龔sir, 我是新手，一直有關注你的分享，也認同價值投資理念，想請教三個問題

1.若是用了較高價格買入了一間質素不錯的公司，股價升了應該先止賺等回到合理價再買入？還是持有並等回調加注？

2.本人36歲，是否可更多投資水桶一作短期獲利來滾大本金，然後再放入水桶二，三作長期持有？

3.若所買的股票升到了較貴水平，該在什麼時候加注，等待時間回到合理區再加？
謝謝抽空回答！

龔成老師：

1）要睇持貨情況，如果持貨較多，應該減部分。

理論上，當股價處貴的時候，部分減持是正確，但這都會面對一個風險，就是股價一直唔跌。有些優質股增長力強，今天的貴，過一年後由於企業價值增長，會變為合理。

因此，如果該股好優質，賣出後就有機會買唔翻，這是最大的風險。

2）36歲，可投資水桶1，但不可短炒。

好多人以為短炒能更快滾大資金，但根據我過往多年做銀行及證券行，統計客戶投資成績的情況，短炒反而會輸錢，你這樣只會令本金減少。

3）到合理價先加注。最多進行月供。

------------------------------------------------

Q21114：

龔成老師你好。我30歲，剛開始學投資。十幾萬儲蓄，15K，每月儲5000-6000，過多一兩年會結婚但唔會使大錢。

好後悔禁遲先學，儲蓄同人工都好有限，所以都有D 心急。初步打算長供，如果我只儲到呢個數應唔應該成份儲蓄去供股？

如果正如老師所講最好要留一半現金等市跌，只供3000又似乎太少，但供曬又擔心無現金揸手唔穩陣。可以請你比一下意見嗎？

定調返轉，郁儲蓄，直接入幾手2800定都係用月供既方法好？

最近開始睇你專頁，睇你答問題都學到好多野，多謝你無私分享禁多知識。謝謝！！

龔成老師：

由於你準備在1、2年內結婚，而我地投資，要長期先有回報，同時中短期可以因市況上落而有不確定性，無人知道你要結婚同錢一刻，市況如何。

因此，你要先計算結婚所需的支出，留這筆現金，餘下才投資。

除非出現大跌市，否則，你應該考慮左結婚的現金先。

餘下部分，可以進行長線投資，月供ETF相信好適合你，你可以考慮盈富（2800）+恆生科指ETF（3067），長期儲貨。

------------------------------------------------

Q21115：

你好，成哥,我一直都有睇你fb,我覺得你教人投資好叻，我知道自己好衰心急，忍唔到，都無賺過。

我有個問題想請教你，我前排高位買左1177，9.45一手，你話人口老化咁我要溝嗎？仲有2013買左1手52.5又係好高位，現在38都見到，都溝嗎？

3號買左1手13.62,滙豐57蚊買入3手，以上是我的投資組合。我有分析銀行股買386，3328，3988長揸有息收就算，但我之前輸左好多錢唔敢亂買

想聽下你意見先，見到好多隻都跌左好多好多心想買呢隻想買個隻，但資金又唔夠，愈想搵返失去嘅錢就愈心急行錯路。

請問1177，2013溝邊隻好？

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區頂至略貴，你有貨可持有，如果要加注，$8以下小小注好了，$7以下會更有值博率。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，你持有小注好了，暫時都唔好加。

至於另外幾隻，其實不是無質素，可持有，只是部分較入價有少少貴但可以守，不過就反映你投資時機把握力不足。往後投資，宜用月供，又或分注投資，減少一次過在高位買入的風險。

中生及微盟，如果加注，就中生。

------------------------------------------------

Q21116：

老師 想請教你一個無關股票的投資。我同我男朋友最近睇左個江門既溫泉度假別墅項目，150萬人仔一棟別墅，之後可以裝修成為民宿放租比遊客住，視乎裝修設計，可以租到1000-3000一晚。

我地諗法係，可以當半個投資項目，因為唔可以保證一定會有好高回報，但係即使冇回報，都可以以後退休用。

我地會加按層樓去做哩個投資，借貸利率大概2.05%，都算好低。剩餘既一部分錢 可以放入股市或者基金，當係分散投資。

我個人黎講都幾睇好哩個項目，因為依家普遍消費能力高左，大家旅遊都會租別墅黎玩，之後如果順利的話，可以有現金流，如果利益不達預期，可以當係以後自己住。

我相信5-10年大彎區有所發展，都難以哩個價錢買到別墅。想請教你意見，哩個項目值得投資嗎？感謝

龔成老師：

我都相信大灣區有發展，但你地要找更多資料先。

例如經營這類民宿的要求，自己是否有興趣營運，成本、風險因素等等，最重要是了解清楚。

另外，你要了解市場需求，現時有多少類似的民宿，同時在該溫泉度區，本身是否有足夠的酒店，以及該項目的交通配置，周邊情況如何，這都要分析的。

由於退休自用是多年後的事，因此，這刻要集中從「是否值得投資」的角度去了解。

------------------------------------------------

Q21117：

老師你好，想請問唔知你點睇港交所388前景？我喺$452買約咗100股，唔知可以keep住先嗎？謝謝你

請問呢一隻股票算唔算質素高？因為佢應該係壟斷行業，只此一家，如果從老師你講價值投資佢長遠都一定會超越呢個價？咁呢一啲資產係唔係可以keep 10年一世都唔沽？

龔成老師：

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。

你買入價略貴，不過佢始終有質素，無問題，長線持有就得。

------------------------------------------------

Q21118：

龔sir，吉利應否繼續持有？

大行報告同業績都好似講到好差，我喺$22.75入咗一萬股的，我媽媽亦都跟咗我買，之前上到$36都無放，想長線持有，但當股價向下

我媽媽就話有錢唔識放，我話長線持有叫佢唔好理我，要放佢自己放，但佢又跟我唔放，之後不停ee哦哦，情況係咪有啲似你嗰陣買比亜迪，升到$80你唔放，倒跌之後身邊就有人會俾説話你聽？

今日跌穿咗我買入價，我有啲迷失方向，係咪真係吉利電動車唔得....又有可能回唔到A，信心唔夠堅定....

咁吉利係咪屬於虛？前景點睇呀龔sir?

龔成老師：

這類說話，我聽左不知幾多年，當年隻比亞迪（1211）由低位上到$88，之後又落翻$12，係跌9成！你可以想象我聽到幾多說話，要10年後先上到現時的價位。

你要有超強的心理質素，否則，唔好再比意見，唔好再幫人投資。

佢地永遠事後孔明，講一d連股神都唔會做到的野。

你要做到「唔好理人」。

我係一個超級我行我素的人。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

------------------------------------------------

Q21119：

老師，之前我9988,300元入左 ，我可以點樣佢有冇息收， 已經傷及本金一半左右
真係搞唔掂

加上近期科技股回調完全走都走唔到位
我應該換股定係繼續等

同埋我想講依家我完全唔敢同女朋友或者屋企人講呢件事，我驚講咗之後分手， 我應該依家點樣處理日常？

加上我自己做乜嘢事都好唔開心， 完全影響咗我日常， 因為我冇一個 宣洩嘅渠道

我知道自己唔係一個賭徒但係當股票落到去咁低嘅時候我就開始不斷焦慮咁樣我係咪應該換一個倍升股

龔成老師：

第一，由於你在貴的價位買入，因此要更耐心，先有機會上翻去。這股有質素，但都要長線先上得翻。

第二，如果你只集中一股，問題就較大，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

第三，我地買股票，一定要長線投資，起碼持有3年以上。

第四，買股票不能影響生活及情緒的。

第五，財不入急門，你太急去轉另一隻股，反而有問題。

如果這股佔你組合比例太多，可以考慮部分轉其他，建立更平衡的配置。

------------------------------------------------

Q21120：

老師點睇贛鋒鋰業？ 仲有信義光能同信義玻璃。有咩分別？現價貴？

仲有福萊特玻璃，上述股票係咪全部都係電動車概念

龔成老師︰

贛鋒鋰業（1772）金屬鋰及鋰電池等鋰資源生產商，生產包括供新能車用的電池。

此股上市時間唔算長，這類企業數據較少，好難分析。現時市盈率近290倍，點都係貴，現時入貨風險會高。

信義光能（0968）和福萊特玻璃（6865）都係生產太陽能玻璃產品，本質不差，業務保持有一定的增長力。

信義光能（0968）算係合理區頂至略貴，可小注。而福萊特玻璃（6865）現價略貴，要回最少一半，才算較合理。但由於有一定波動性，故不宜大注。

信義玻璃（0868）係信義光能（0968）母公司，佢主要生產汽車、建築，浮法玻璃。近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

現時估值偏貴，投資值博率一般，回翻1、2成才算較合理。同時，你預佢中短期會比較波動，要長期先見到收成。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。