【公廁真係好污糟，特別女生要小心！】⁣ 如廁前一個動作免招病菌👇👇⁣ ⁣ 自從新冠肺炎疫情爆發後，更多人注意如廁衞生。對女性嚟講，就算無疫情，外出時人有三急要去公共廁所，更要十分小心，否則有機會患上婦科疾病，手尾就長。⁣⁣ ⁣⁣ ⁣⁣ ⁣⁣ 公廁易感染婦女病⁣⁣ ⁣⁣ 公共廁所衞生問題多多，撇除清潔不足或不當，唔排除部分問題來自使用者缺乏公德心和自律。尿液和糞便有好多細菌如金黃葡萄球菌或大腸桿菌等，容易令女士感染尿道炎、陰道炎或膀胱炎等婦科病症。細菌除集中在廁板、馬桶上，亦可能沾在廁所有其他物件，當我哋唔小心觸摸到就有機會受感染或傳播。⁣⁣ ⁣⁣ ⁣⁣ ⁣⁣ 長坐「無影凳」易尿滲⁣⁣ ⁣⁣ 當人有三急，唔去廁所唔得，又忍唔到返屋企，迫住去公共廁所時，有女生唔想踩廁板咁無公德，於是無耐出動「無影凳」，凌空去廁所。「無影凳」除咗令人唔舒服外，亦可能令腹部太用力，令骨盆底肌肉鬆弛，易出現尿滲。如果坐得「無影凳」太多，年老時或會有膀胱無力症，影響如廁。⁣⁣ ⁣⁣ ⁣⁣ ⁣⁣ 投紙巾入馬桶減水花濺⁣⁣ ⁣⁣ 無人想為解三急而令自己健康受損，因此女生外出時，建議隨身帶備消毒噴劑和濕紙巾，必要時用來抹廁板。如果想如廁坐得輕鬆安心啲，市面上有售即棄式馬桶墊紙，隨身帶備幾張，有備無患。另外，自新冠肺炎爆發以來，大家應該習慣帶住酒精搓手液出街，抹或接觸廁板後，記住潔手，以保衞生。此外，建議如廁前投入一張紙巾落座廁，可防止廁水濺起而令女性私密受感染。如廁後，要有手尾，蓋上廁板先沖廁，以免沖廁時所濺起水花，細菌和病毒隨空氣飄散，污染自己衣物及廁所其他地方。廁所內每個你觸摸嘅地方如沖水掣、門把、水龍頭等，都可能沾有細菌，建議用紙巾隔住先好掂。如廁後洗手，非常基本公眾衞生常識，要用梘液捽手7個部位至少20秒。洗手後仲要記住抹乾手，因為濕潤雙手好易沾菌，洗手嘅工夫就白費喇！