聽聞都有30年前了，兒時回憶，其實我唔識㗎，我都係聽朋友講架咋，咁有趣嘅玩意，唔知而家仲有無得玩呢？

打豹虎［老督最勁］！

五十幾年前，細路仔嗰陣嘅一種玩意［豹虎］，又叫做［金絲貓］，其實係一種［蠅虎科蜘蛛］嘅俗稱。喺嗰陣時，唔係好多嘢玩，一班人聚埋，啲大人就走去［鬥蟋蟀］，而細路仔梗係去［打豹虎］喇！

香港以前好多學校對出嘅士多，都有得賣［豹虎］，佢哋一直都係好受學生歓迎嘅玩意，好多時都會帯埋返課室度玩、記得當時重有好多特別覇氣嘅名添，例如：雷老虎、紅孩兒、方世玉、孫悟空、皇上皇、金花、老督等等，吾知大家以前有冇玩過呢？

補充：
聽啲專家講，全世界嘅［蠅虎科蜘蛛］約有 5,000 種，而大陸地區都有 300 種以上。一般豹虎喺出世之後，就各走各路，各自獨立生活，而同性係唔會同居嘅。豹虎成形前可以係公又可以係乸，喺未到最後一次脫殼，都好難評定係公［篤］定係乸［撲］。

＊＊

版友再補充：［歡迎修正］

豹虎［金絲貓］嘅品種有好多，喺香港玩開嘅都有幾十種，大致分為：王上王、老篤、紅孩兒、黑撲、黃撲、紅撲，常見嘅有：金花，大金花，金花篤等等。

金　花：乸［撲］，體型細，冇乜戰鬥力，通常俾［紅牙兒］當係點心。
金花篤：公［篤］，係由［金花撲］蛻變出來嘅。

紅牙兒：乸［撲］，品種同顏色有好多，而品種就係以顏色同體型而定。
　　　　不過主要顏色離唔開［紅撲］、［黑撲］、［黃撲］三種色。

紅　撲：一般玩嘅就分３種：［青紅撲］、［朱砂紅］、［血紅頭］。
青紅撲：以兇狠見稱，但係耐力持久戰唔係佢嘅專長。
朱砂紅：紅撲之中比較好嘅品種，兇狠快速，戰鬥時就要置對方於死地。
血紅頭：戰鬥法極為險惡，一見對手就撲埋亂咬，要咬到對手支體不全。
　　　　個性要速戰速決，但係冇乜耐力，擅攻唔擅守。

紅撲黑螯：個性係攻守兼備，擅長打持久戰，遇越。
　　　　　哩個品種比較多見，但係要分區域捉先至好打。

黑　撲：哩個品種到處都有，要分地區捉先會有得打。
黑黃撲：前身黑色，八肢粗長，尾係鮮黃色而尖幼為之好嘢。
　　　　屬優良品種，特徵係頭特別大，鬥志，耐力夠，絕唔欺場。
全黑撲：身形同雙螯粗長，頭四方，尾尖長，身披金線，毛色閃為佳品。
　　　　哩個品種擅打持久戰，唔怕對手咬，屬於死纏難打一類。
黃　撲：頭大身粗尾尖，戰鬥力普通。

老　篤：公［篤］，係由［紅牙兒］蛻變出來。
　　　　一般分４種：［藍篤］、［黑篤］、［白花篤］同［紅篤］。
　　　　當［老篤］變身之後，就會即刻去搵［紅牙兒］交戰［配］。
　　　　因為［老篤］嘅生長期唔長，所以會主動覓偶。
藍　篤：［老篤］之中最佳品種，耐力夠。
　　　　螫長粗、頭大、身長、尾長、腳長，顏色鮮，就係上等貨。
白花篤：又叫［飛撲篤］、［飛撲篤］，比較少見。
　　　　個性凶猛，打法怪異，一見對手就飛撲攻擊，無論大細都照打。
黃尾篤：戰鬥力普通嘅貨色。

＊＊
所有嘅［豹虎］、［金絲貓］、［跳蛛］；
不論係螯短、頭圓、身短、尾圓、腳幼，全部都屬劣質貨。

譯：蕭南仁。2017年06月23日

無聊通識科。廣東話資料館