【 睇波先啦！／傑志 ╳ 理文決戰旺角】
_
香港運動員繼「東京奧運」奪得一金、兩銀、三銅的歷史佳績後，又在隨後舉行的「東京帕奧」（又名東京殘奧）勇奪兩銀三銅，總計兩項大賽，合共獲得11面獎牌，為本地體壇寫下光輝一頁，全港觀眾親眼見證運動員博到盡，在此興奮情緒帶動下，很自然會覺得「身痕」，加上快將揭幕的「全運會」，以及2022年舉行的「世界盃」和「亞運會」，相信這股近年難得一見的「全民做運動」熱潮會持續一段時間 ── ViuTV覷準時機製作大型運動綜藝節目《力圖打排球》（節目已於9月4日播出）、梁朝偉因電影《尚氣與十環幫傳奇》（Shang-Chi and the Legend of the Ten Rings）接受「Do姐」鄭裕玲訪問時提到自己「每天都做兩小時運動」引起網民討論，已足證上述見解。運動項目跟電視節目一樣有好多種，這邊廂觀眾為「劍擊F4」、「鄧謝配」打氣尖叫，照道理，當下是推廣港足的最佳時機，何解球壇仍然「靜過太空」？
_
參考「香港足球總會」網站公開的「香港超級聯賽」（港超）數據，2018年至2020年賽季（2020至2021年暫沒數據），除了部份較矚目的賽事，例如2018/2019賽季，傑志對東方龍獅，吸引幾千人入場，但更多情況是冷清得只有二、三百人買飛睇波，埋單計數，平均每場大概只有700至900名觀眾，每月門票收入總額只得40至50多萬（港幣，下同）。以小學程度的乘除數去平均計算，8支港超球隊，即每隊每月能夠帶來約５萬至6.3萬門票收入（未扣除成本和開支）。
_
但原來未算最殘酷。「足總」數據顯示，2019年9月10日香港大球場舉行了「世界盃外圍賽 ─ 香港對伊朗」賽事（伊朗世界排名26，香港排名147)，當日的總入場人數有13,942人，淨門票收入總共有198萬多，相當於大約4至5個月「港超」賽事門票銷售的總收入。
_
「世界盃嘛，梗係要支持啦！」「輸梗㗎喎！」「輸都要踢，呢啲咪體育精神囉！」
_
結果，當天有接近1.4萬人親身入場睇波，由於香港佔主場之利，粗略估計觀眾席上逾八成都是現身撐「港隊」（斷估唔係支持伊朗啩？）。
_
同年11月19日，「世界盃外圍賽 ─ 香港對柬埔寨」在香港大球場上演（柬埔寨世界排名：179），當天約6500名觀眾入場，結果港隊以2:0擊敗柬埔寨，球迷情緒高漲，下半場84分鐘，中場球員羅拔圖（Roberto Orlando Affonso Júnior）在禁區頂起腳射入奠定勝利的第二個入球掀起了全場高潮，與在上半場較早時間入球的夏志明雙雙成為香港隊取得勝利的功臣。

由於世紀疫情關係，這一屆的世界盃外圍賽由2019年踢到今年，除了上文提及，兩場於大球場舉行的「香港對伊朗」和「香港對柬埔寨」之外，2021年6月3日另外有一場外圍賽在巴林上演，香港再一次對戰伊朗，港隊雖於半場落後一球，但港隊前鋒安永佳沒有放棄，終於在85分鐘以頭鎚破蛋建功。
_
回到「東京奧運」期間，若商場有直播賽事的話，都會迫滿人，就連平日不怎運動的三姑六婆，都忽然暫時放棄追劇，變成游泳、劍擊等賽事的小粉絲，約齊三五知己見證歷史時刻，就算單人匹馬走到商場睇直播也不會覺得尷尬，與陌生人分享喜悅，或互相安慰，因為「港隊」二字抵萬金。
_
「何詩蓓吖嘛，好叻女！係香港人嘅驕傲！」
_
但何詩蓓成為「香港人的驕傲」之前，只是「港隊游泳選手」；
_
夏志明和羅拔圖成為代表港隊，於國際賽事入球功臣之前，只是分別效力港超聯球會「冠忠南區」（擔任前鋒）和「R&F富力」（已於2021年加入「傑志」）；至於安永佳，現時跟羅拔圖一樣都是效力「傑志」，擔任前鋒。冇錯，是過往幾年，每個月大約只帶來「幾皮嘢」門票收入的香港本地足球球會；他們都是有能力在國際賽事為港爭光的香港足球員，但普羅大眾對他們的了解其實一般。
_
換句話講，其實香港人極之撐「港隊」，只是那股力量不是用來撐「港足」。「足球」是一項非常講求團隊合作的運動，「香港隊」的成就亦倚仗本地足球的發展。兜咗咁大個圈，只係想講，要撐香港運動員，就要身體力行，唔好得個講字！今個星期六（9月11日），旺角大球場將會上演傑志（2020-2021年度港超冠軍）對理文（2020-2021年度港超季軍）戲碼，承接「東京奧運」的「撐港隊」餘溫，大家別只做「節慶球迷」或「勝利球迷」了，除了「英超」、「西甲」，「港超」更需要自己友支持。喂喂喂，畀啲「體育精神」，由撐本地波做起，球場見啦大家！
_
《Nike呈獻：傑志90週年挑戰盃 ─ 傑志對理文》
日期：2021年9月11日
時間：下午5點半
地點：旺角大球場
票價：$120（成人）#、$50（特惠票）#
網上直播收費：$50（on.cc直播）
*挑戰賽收入扣除成本後將全數撥捐「傑志慈善」用作舉辦公益活動
購票連結：https://bit.ly/2X6k1fZ
_
【 延伸閱讀 】
許賢 ╳ 劉榮業 ╳ 梁能仁 ── 足球自救企劃：
https://bit.ly/2WBuFLe
「橫睇掂睇」 ── 開電視直播奧運食糊之後：
https://bit.ly/3gny07k
「橫睇掂睇」 ── 無綫直播奧運以綜藝凌駕專業：
https://bit.ly/3itG5sX
開電視直播女單羽毛球決賽創開台收視新高：
https://bit.ly/3iiGhuM
開電視最大弱點變成直播奧運最強賣點
https://bit.ly/3zRKvzy
香港運動員IG足本名單跟住Follow ：
https://bit.ly/3iLEs8F
_
緊貼「游大東影視筆記」最新資訊：
▇ facebook專頁： 游大東【鴻鵠志－影視筆記】
▇ instagram： instagram.com/yautaitung
▇ MeWe專頁： mewe.com/p/yautaitung
▇ Telegram：https://t.me/yautaitung
▇ Medium：https://yautaitung.medium.com
_
（09092021）
_
#游大東 #游大東影視筆記 #傑志 #KITCHEE #香港足球 #港足 #KITCHEE90ANNIVERSARY #旺角大球場 #理文足球 傑志 Kitchee #安永佳 #何振廷 #賓紀文 香港本地足球專區 足球周刊 香港版 Football Weekly 01體育 體路 Sportsroad 體壹 仙道彬手記 丹尼爾 vs 陳恩能 足球•看世界 Football Vision

［英超重開睇呢啲］就梗係，睇錢啦。今季收入大跌，但下季就反彈啦。

TL：DR—閉門唔緊要，最緊要有睇電視嘅你。而識買梗係買客隊

1. 大師冇點你，我4月15號寫嘅 : 「你話送球員去死都好（但，屌，你自己咪又係星期六去長洲去西貢），但我估復賽，六七月快手搞掂埋佢，閉門又好，去新加坡又好，點都踢晒佢。電視廣播肯找數，贊助商肯找數，球星減少少人工（唔會太多），會方食少少，大家好做。」—時間都中埋。

2. 今晚英超重開，埃汾當然就…..唔會睇。實情連now 台都冇。並非矮化英超或乜，而家其實以前會睇嘅德甲都少睇，頂多星期六日未訓嘅就睇。週中啲夜波就不了，例如拜仁拎冠軍一場我都冇睇。倒係歐聯我都仲會睇嘅。至於世界盃歐洲國家盃（已死）都會。

3. 講返，上次寫過一篇（https://bit.ly/2Bgbw6G），「英超停擺，球會輸幾錢？」。反應並非特別好，所以續集亦冇下文。不過篇文算寫得不錯，最重要係，而家咩都講錢架啦。唔了解足球商業生態嘅，可以睇下。

4. 而亦都認下叻。篇文4月15號寫，當時仲係不少人覺得「疫情未見頂，日日死人，點重開？」。但本人已話你知，正路地，真係不能腰斬。事實你而家見到啦，德甲重開，西甲英超都接住，歐聯亦都應該會照去馬。原因？亦係錢作怪。錢緊要過人命？Sorry，唔好咁港女。你M痛但廚房水滾條仔去熄咗火先，就唔代表煲水緊要過你，或者間屋（燒著？）緊要過你。係取捨，係幾多錢同幾多人命嘅取捨。一句，腰斬係好大鑊的，好多好多錢，所以老死都要踢埋佢。

5. 岔開少少，寫文時好似已經有聯賽腰斬，但當時我都估五大聯賽點都照去。原因？正係本斥但大（https://bit.ly/2UPUwek），太多錢了。但結果法甲係腰斬咗，我都估唔到—然後而家又話踢附加賽（https://bit.ly/37CI8n8），亂嚟得很。法國佬係咁架啦，好彩四大冇腰斬，否則彈出彈入咁都幾煩。

6. 講返英超復賽，只係睇兩樣嘢。第一樣係錢，第二樣陣間講，主要都係錢。

7. 首先，我唔太熟，但就我理解，之前討論過唔少方案，腰斬呀，計每場得分呀，用電腦模擬呀，去大陸（！）去新加坡去香港踢埋佢呀，又有話中立場但又有啲細球會話唔制要攬炒呀咁。講到尾都係錢，而家亦傾掂數，全部都係錢。有潔癖嘅，我建議你都係去睇英乙英丙之類。英甲都唔好睇。

8. 鍾意講咩英式體育傳統嘅，不妨諗下係咪閣下出糧係咪你賠錢，而傳統上就肯定唔係你班Crazy Rich Asian去買貴飛睇波，藍領玩意嘛。但，咩年代呀？咪玩啦。現代足球籃球都幾得意，成班億萬富豪嚟娛樂你班窮撚，等你地入場或睇電視有得發泄。我懷疑其實韓國成日拍埋啲逆權乜乜都係咁嘅作用，明明又係啲財閥拍，就係拍嚟等你有得宣泄。以前就宗教，而家就睇波睇戲做精神鴉片。

9. Economist 篇文有講，（https://econ.st/37Jhb1h）但其實我都有寫過下。電視轉播，係最為重要嘅東西！真係唔好再飛機啲咩現場球迷。你見德甲重開一樣係閉門，西甲都好似係。門票收入都緊要，但冇電視咁緊要！其實有數得計，我畀你係魯營都好，坐到幾多人？十萬？但電視可以reach 幾多人？而且現場人數仲要係大家互相爭，我睇咗魯營，就不能同一日去班拿貝（咁一場朝早一場晚都得嘅）。但我在屋企食住雪糕睇波，鍾意兩邊一齊睇都得，一邊睇英超一邊睇德甲都仲得。

10. 如果冇記錯，咁多聯賽之中，英超球會，係最倚賴電視轉播嘅。因為受歡迎，同埋賣得貴。特別係中小型球會，因為英超相對地分得平均啲，細球會同大球會分嘅錢冇其他聯賽爭咁遠。上一季，講緊電視轉播，佔6成收入！超過一半。中小型會當然更多，般尼茅夫之類，佔九成。迫悉匙以外嘅其實都佔七成以上。冇得播，就執笠都似。唔係講笑

11. 睇到呢度，你都知，個玩法一定係閉門。有轉播，就可以吊住鹽水先。腰斬？就當然要回水畀電視台之類，實際幾多唔知，但大約就係斷場計，29場收皮，咪退返9場錢，大約成季嘅廣播收入四份一。都會死人的，更唔好講下季會點。而英超球會嘅財政健康，只係麻麻地，蝕錢嘅多，賺錢嘅少，雖然唔係蝕得好勁（某程度上多得FFP，財政公平競技，防止啲富豪不停洗錢蝕住當玩具）

12. 但當然啦，唔復賽就死得人，復賽都唔代表冇事。你閉門嘅，啲match day 收入就會跌到近乎零，而分分鐘真係全季都要閉門，一個唔該下一季開始時都仲要。呢度係打擊。贊助商亦當然會縮皮，全世界都經濟不景。仲有，理論上，廣播權好似一簽三季，就「合約精神」。但，「不可抗力」嘛，唔知入面有乜clause，似乎轉播費都係可以要你回返啲。就算真係「合約精神」都好，到下一次續，點都冇咁爽手了。

13. 當然仲有，轉會收入。咁環境，啲球員身價點都會跌。但，你可以話零和遊戲啫，球員身價跌，咁買嘅球會，咪又畀少啲。例如拜仁似乎可以平價買到唔少好東西，包括利萊桑尼，我估漢尼斯晚晚發夢都偷笑，原本講緊億幾歐羅買，而家可能一半就得，真係幫拜仁慳唔少錢。

14. 咁而，又係懶查（趕住食飯），但我理解，英超啲大會，係net buyer多。所以球員身價跌，反而對佢地有利添。咩會仆街？咪啲net seller嘅會，亦有人叫feeder club。我諗到，咪可能修咸頓，波圖，馬體會，阿積士之類，就多得呢個疫情唔少了。

15. 係喎，即係，明顯地，同其他行業一樣，肺炎，又係加深貧富懸殊的。大會可以平價買人，細會就被壓價。我甚至未計話咩一場出5個後備之類，一定係對大會有利，車輪戰慢慢玩你。

16. 但，又唔好睇死英超，或歐洲球會唔同。亦同股市一樣，啲友去話，喂，「股價脫離實體經濟」，講今年啲盈利冇晒。係，咁但，你一間公司嘅估值，唔係睇一年嘛。請睇圖，正路地，下一季嘅盈利，就已經反彈返去肺炎前嘅水平啦。

17. 原文作者有講返，過去30年，英超壓倒歐洲其他聯賽成為全球最富有，唔係靠好波（使唔使講下意甲小世界盃嘅年代？或者當年仲有外援限制時（好似），巴塞外援三寶係羅馬利奧史岱哲哥夫同赫傑），係靠商業頭腦—咁到有錢自然吸到球員返嚟。

18. 英超球會嘅收入，超過西甲同意甲加埋。而地位亦都唔會因為德甲西甲早少少重開而受影響。至於入場觀眾嘅嘢，一路話呢舊嘢佔比一路跌緊。

19. 所以好簡單，命根就係睇電視嘅觀眾，即係今晚睇波嘅你。記住第時畀人串你冇入場睇波，都可以講自己先係真老闆。

20. 呀，都唔記得講二樣。趕食飯，快講。明顯地見到，德甲重開後呢，主場優勢係少咗好多嘅。似乎證明球迷入場打氣真係有用。咁照計英超都係咁。咁即係點？咁你可以留意下啲賠率，睇下個「市場」係咪已經price in．我嘅直覺覺得，應該係有啲水位，應該客隊嘅勝算係被低估的。

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。

請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。

“Sunderland ’til I die” (Season 1) — 至死不渝

Medium: link.medium.com/gPA41CT8G5

//

Netflix 嘅紀錄片 (我更加覺得係紀實連續劇，英文字 “Docuseries” 大概都係咁解) 相當之多元化而且製作認真，作為一個體育迷，賴叔喺 “Drive to Survive” 之後，搵到以英格蘭球會新特蘭為主角嘅 docuseries “Sunderland ’til I die” (以下簡稱 “STID” ，我好懶) 為觀看。

STID 目前拍咗兩季，第一季有八集，第二季有六集，分別紀錄咗 2017–18 及 2018–19 兩個球季嘅故事。如果對英格蘭球壇唔太熟悉嘅朋友，我建議就咁直踩 14 集，唔好手多多走去摷最新嘅新聞嚟睇。原理，就同入戲院之前唔好睇劇透影評差唔多。一旦知道現狀， STID 眾多畫面及懸疑鏡頭就失去咗意義架喇。

至於本身跟貼球壇消息嘅朋友，我覺得 STID 觀賞價值係一般般嘅，畢竟入面講嘅嘢唔算特別深入，喺每集 30 分鐘嘅空間入面，能夠交代嘅事情亦都有限。如果你係東北部球會紐卡素或米杜士堡嘅球迷，鍾意喺宿敵嘅傷口上灑鹽，咁呢套 docuseries 對你哋嚟講又有另一番風味。

- - -

喺劇透之前，或者都簡單交代下我對新特蘭嘅認識 (即係冇經過 Google / Wiki / research 之下就咁講) 。呢支綽號「黑貓」嘅球會，係著名嘅「升降機」，過去廿幾年以來，反覆來回頂級嘅英超同次級嘅英冠都好幾次。 1990 年代末佢哋有高矮雙煞 Niall Quinn 同 Kevin Philips 孖寶在陣，守門員係丹麥國腳蘇連遜，以中小型球會嚟講都總算曾經光輝過。

新特蘭嘅主場 “Stadium of Light” 中文直譯「光明球場」，容量達 49,000 人，喺英格蘭球壇嚟講絕對唔失禮，另一支老牌球會愛華頓嘅主場葛迪遜公園 (Goodison Park) 爆棚都唔到四萬人，同樣來自東北嘅紐卡素主場聖占士公園 (St. James’ Park) 容量亦都係 52,000 左右。可想而知，新特蘭呢間球會嘅規模，或者比上不足，但比下，絕對有餘。

不過 STID 第一季嘅背景，就係講緊新特蘭剛剛喺英超降班，行政總裁 Martin Bain 著手重建球會，爭取盡快重返英超行列。背後嘅壓力，主要都係一個字：錢。英超 (English Premier League) 作為歐洲四大聯賽之一，商業價值龐大，電視轉播權嘅收益相當可觀。降班之後，雖然有所謂嘅 “parachute payment” (合共 9,100 萬英鎊，喺球會降班後三年分批發放) 補助，確保球會財政上「軟著陸」，但係開源節流嘅功夫都係必不可少。

喺一般嘅情況之下，公司縮皮，裁員就係最容易嘅方法。但係足球球會嘅世界有少少唔同。由於球員一般都係用有年期嘅合約同球會簽約，除非有條款訂明，否則球會降班之後都冇得夾硬將球員嘅工資下調。相反，球員如果有其他球會青睞，大可以要求轉會他投。喺僱傭關係嘅天秤上，降班後嘅新特蘭明顯地處於弱勢。

接掌球隊帥印嘅教練 Simon Grayson 手頭上就係有一大班唔多願意陪新特蘭降落次級聯賽但係又人工豐厚嘅球員。點樣鼓動佢哋同舟共濟？點樣配合會方削減開支嘅要求，而限米煮限飯？呢啲問題，喺班主 Ellis Short 入主近十年之後決定拒絕再泵水施救嘅情況下，變得更加嚴重。 (值得一提， Ellis Short 曾經係私募基金 Lone Star 嘅副主席)

- - -

球會風雨飄搖，最受傷嘅，其實係球迷。

新特蘭位處英格蘭東北部，昔日係造船業嘅重鎮，但隨住英國經濟轉營，區內經濟好景不再，居民嘅收入自然係好極有限公司。作為市內唯一一支職業球隊，新特蘭成為咗眾人嘅精神寄託。由星期日返教會嘅信眾，到凍肉店嘅員工，無不對球會成敗榮辱牽腸掛肚。

STID 一直追訪幾個新特蘭老牌球迷，個個都買咗十幾廿年 (或更長時間) 嘅季票。睇住佢哋由英冠球季開鑼滿有信心，到球會成績疲弱不振而時有挫敗、氣餒但對「黑貓」始終不離不棄，喺香港嘅各位觀眾可會諗返，香港人有啲咩嘢球隊可以撐？或者都係香港足球代表隊同埋一眾為港爭光嘅運動員啩⋯⋯

除咗球迷， STID 亦花唔少時間追訪球會嘅工作人員。喺體育行業，球員同教練固然係焦點。但係球會營運嘅部份，其實都有好多員工喺幕後幫手，例如話掌管廚房嘅 Joyce 、負責門票、管理嘅團隊等等。對於佢哋嚟講，能夠盡可能幫助球員以最好嘅狀態迎戰每場比賽，能夠為球會賣出最多嘅門票，已經係盡咗佢哋嘅本份。至於球隊嘅成績、升班降班，佢哋只能夠甘苦與共 — — 如果球會冇因為節省成本而裁員嘅話。

- - -

某程度上，我覺得 “STID” 搵新特蘭作為 Docuseries 嘅主題算係神來之筆。因為「黑貓」喺 2017–18 球季嘅進展，絕對講得上係 dramatic 。由第一集睇到第八集，大家會清楚見到眾人嘅精神面貌如何變化，當初嘅信誓旦旦或信心滿滿，到最後如何變成肉隨砧板上，不得不逆來順受。

新特蘭嘅興衰背後，固然有不幸嘅地方，但更多嘅係球會承受昔日自己大花筒、藥石亂投嘅惡果。但凡球員並非同心同德，而係各懷鬼胎，打算大難臨頭各自飛，喺狗咬狗、腳踢腳嘅英冠聯賽，球隊實在難以生存。即使球隊換上有來頭、有魅力嘅教練 Chris Coleman 都好，球隊唔能夠保住勝果，後防又漏晒水咁，就只可以換來一班至死不渝嘅忠心球迷嘅一泡眼淚。

Credit: https://flic.kr/p/cUdU45 by Ronnie Macdonald

- - -

想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai

#hk #hongkong #patreon #blogger