【 賣文時間／橫睇掂睇第四篇 】 _ 睇劇耗費心神和時間，「投資」極大，假若追看至中途才發現有「爛尾」可能，又不能乾脆「棄劇」，確實內心交煎。近年「教訓最大」的經典例子莫過於「HBO神劇」《權力遊戲》（Game of Thrones），為了追趕進度，讓自己能夠在第八季（2019年4月首播）播出時同步收看。提前一年多從第一季追看至第七季，結果發現最終季的故事發展水過鴨背，第三集「人魔大戰」（The Long Night）之後的劇情更是完全暴走，當下除了瘋狂爆粗外（鬧到而家），就只有幻想自己「𠝹櫈」，畢竟痴心錯付如撥出去的水，怎也收不回，為免再度「受傷」浪費光陰，「開劇」與否的其中兩個標準是：時間短、集數少，剛於Netflix上架，並迅速登上點播排行榜（9月15日排名第九）的日劇《激辛道》（ゲキカラドウ），就是近日的成功例子，全季12集，每集大約30分鐘左右，結果看完頭兩集後便決定追看到底。 _ 《激辛道》並非「本季新番」，而是今年1月在東京電視網（TV Tokyo Network，簡稱TXN）「Drama Holic!」（ドラマホリック!）時段，即周三深夜12時過後播出的「2021年冬季深宵劇」，演出陣容不算吸引，男主角是現年32歲的「Johnny's WEST」成員桐山照史，《激辛道》是他入行接近20年以來首度擔正，雖然由2002年出道開始已走偶像路線（2002年跟Johnny’s事務所簽約後，翌年加入B.A.D，2014年再以「Johnny’s WEST」成員身份繼續演藝事業），幕前演出不少，奈何外貌平實，是那種很難一下子就能夠讓人記住的演員，直接點說，就是觀眾緣一般，拍劇時遇不上一些很吃重的角色，倒是劇場界發展不錯，已多次做主角，但難以衝出本土，說不定劇中飾演上司的資深演員平田滿，香港讀者認識他的機會，較桐山照史還要高。事實上，平田滿絕對是全劇「人氣最高者」，另外幾位主要演員，包括泉里香、中村嶺亞、森田甘和前川泰之統統「生面口」，正因欠缺卡士，追劇反而變得純粹：就睇下你個劇本寫成點！ _ 故事講述主角猿川健太（桐山照史飾），是大型飲品公司的白領，負責業務推廣，有天突然獲通知要由大阪總部調往東京分部上班，結果遇上一班「騎呢同事」，悉數皆嗜辣，而且不是「十小辣」的淺嚐程度，是「辣到反艇」的博命級數，初來埗到的猿太為了加快融入團隊，明明不習慣吃辣，也要頂硬上，結果從中有所領悟，對工作和對人生都有全新看法。誠如上司谷岡和彥（平田滿飾）話齋：「辛辣的『辛』，可以讀作辛苦的『辛』，但『辛』字再加上一筆，就會變成幸福的『幸』！」嘩～～人生啊，天天也有甜酸苦辣，只是辣度（困難與障礙）有高低而已，乍聽又是日劇那種充滿正能量的慣常設定，但今次透過連環吃辣來包裝，感覺不會過份老套，加上每集都有大約三分一時間，透過影像和旁白，呈現爆辣菜式的烹調和進食過程，部份更是超級近鏡，令人食慾大增，當飲食節目來看也可以，對於一眾喜愛日本的香港人來說，《激辛道》可以視為世紀疫情下無法「返鄉下」的一種心靈慰藉。 _ 此外，《激辛道》雖然是《孤獨的美食家》（孤独のグルメ）系列的姊妹作，但前者群戲多（那些用來表達「太愛吃辣」的誇張舉動，加上廚師瘋狂加辣的過程，令人更覺好笑），有劇情推進（先有困難，再有解難），能呼應主題，而且桐山照史喜感頗強，突顯角色天真而充滿幹勁的性格，使得故事變得「易入口」，反而後者並不屬「類型劇」（即沒有劇情），看過一兩集，發現來來去去只有松重豐一個人自說自話，食飽後再得到心靈滿足，這種獨腳戲著實悶到爆，決定放棄，心諗怎能夠拍足九季？唯一解釋得到的理由是，成本極低，口碑不俗，才會長拍長有。 _ 原文刊於《am730》 標題：激辛道 —— 辣辣辣辣辣辣到觀眾有得著（2021年9月15日刊登） _ （18092021） _ #游大東 #游大東影視筆記 #日劇 #激辛道 #ゲキカラドウ #桐山照史 #泉里香 #中村嶺亜 #森田甘 #前川泰之 #平田満 #netflix #am730 @am730 #18092021 @everydaylifestylist @foodandtravelhk @bon_jpchannel #孤獨的美食家 #松重豊

【 《冲天救兵》爺爺Carl配音演員逝世 - 回顧戲中爺爺經典對白致敬！ 】 如果要大家揀一套最鍾意嘅Pixar動畫，相信唔少人都會揀《Toy Story》；但如果提到一套你睇親都喊到豬頭嘅Pixar動畫，咁可能有一半人都會揀《冲天救兵》，小編仲記得當年喺戲院睇，套戲頭嗰15分鐘，已經用爺爺Carl同婆婆Ellie由後生拍拖到一齊變老嘅回憶，搞到小編男人老狗，喺當年仲係曖昧對象嘅女朋友面前流晒馬尿（咁真係好感動啊嘛！） . 而有個遺憾嘅消息就係，喺電影中為爺爺配音嘅資深演員Ed Asner，經屋企人喺Twitter上證實，已經於近日離開咗我哋，終年91歲。Pixar亦都有發文悼念，形容演員Edward就好似現實中嘅Carl爺爺咁，外表cool cool地，但就係一個非常有愛心、善良嘅人。雖然Edward已經好似電影中嘅Carl爺爺咁，真正搭住佢間氣球屋抵達仙境瀑布，同佢愛嘅人重聚。但連日黎依然有好多網民湧到佢嘅Twitter留言表達不捨，亦不乏影迷retweet返《冲天救兵》嘅一啲電影橋段悼念佢。今日就等小編都趁呢個機會，同大家一齊回顧一下戲中經典對白，重新帶你認識愛情嘅模樣。 . 「幸福可以很簡單，當你想吃的時候有得吃，想被愛的時候有人來愛你」 爺爺Carl喺妻子Ellie過身之後一直都好後悔，覺得自己無兌現到後生嘅承諾，帶佢去睇仙境瀑布。有時現實就係咁，好似你plan咗帶另一半去旅行，最後因為公司臨時有事要改期，點知一改就變得遙遙無期。因為咁，爺爺每次睇親Ellie生前嘅日記，睇到「Stuff I'm going to do」，就無勇氣睇埋落去... 直到有次爺爺終於鼓起勇氣揭開下一頁，先發覺原來之後幾頁貼滿嘅，都係自己同老婆咁耐以黎嘅生活合照，而最後一張就係佢哋成頭白髮，一齊坐喺梳化微笑嘅合照。原來婆婆Ellie所謂「想做嘅事」，會令佢覺得幸福嘅事，只係簡簡單單，同爺爺一齊生活，一齊變老。幸福可以係追求，亦都可以係珍惜而家擁有嘅。 最後婆婆仲喺下面寫咗行細字「Thanks for the adventure, now go have a new one!」我同你嘅冒險結束咗，但我希望你可以繼續一趟無我嘅新旅程！ . 「 過去的眼淚，總是會讓人想笑；但過去的笑容，有時卻讓人流淚 」 翻睇你腦海入面嘅舊相簿，你估係開心嘅回憶令人眼濕濕多啲，定唔開心嘅回憶令人想喊多啲？小朋友應該會答唔開心嘅，但大人應該9成都會答開心嘅。因為到你真係大個仔，過去嘅唔開心睇返可以係好小事，但當過去嘅一啲開心已經追唔返，先真正令你意識到，原來無嘢係永遠，唔開心嘅嘢如是，開心嘅嘢如是。好似肥仔小童軍同爺爺分開以前同爸爸相處嘅點滴，講下講下就笑唔出；又好似爺爺睇返同婆婆嘅舊相簿，笑下笑下就眼濕濕... 有人話成世人最大嘅課題，就係學識點去失去。好在係，我哋喺失去嘅同時，仍然可以期待未來更好嘅回憶～ . 最後希望爺爺嘅演員Ed Asner一路好走，亦都多謝爺爺同Pixar帶畀我哋咁多回憶同感動～好幾次入戲院睇Pixar，啲大人仲多過啲小朋友，笑就笑得細聲過人，但喊又喊得大聲過人，一到啲喊位，開紙巾聲就此起彼落（咁當然小編都有份啦）... 或者有時大人入戲院睇卡通片，都係想揾返一啲畀歲月沖淡晒嘅簡單同善良。 . #好多人以為幸福係要同另一半做啲咩大單嘢 #但其實幸福都可以係拖下手仔 #一齊變老 #黎緊冲天救兵仲會有外傳動畫 #將會係演員Edward最後一次為爺爺獻聲 #大家記得唔好錯過 #情侶 #愛 #愛情 #語錄 #拍拖 #香港 #電影 #pixar #沖天救兵 #金句 #影評 #卡通 #動畫 . 睇咗笑完就算？不如科勞埋我哋啦！ 即Follow @hkstylecouple 收聽更多港式愛情趣事、一齊學識點樣愛❤️ 歡迎DM投稿戀愛趣事/愛情煩惱，我哋等緊你㗎😙！

【 賣文時間／「橫睇掂睇」第二篇 】 _ 東京奧運結束後兩星期，周二（24/8）又迎來東京殘奧開幕 ── 個人其實不喜歡這個稱呼，建議傳媒可以改稱為「帕奧」或「帕運會」（Paralympic Games的譯音）── 之後13天，香港開電視77台屆時將會安排兩小時直播（16:00至18:00），以及黃金時段播放一小時精華（22:30至23:30），再一次與無綫電視財經．資訊台（85台）、ViuTVsix（96台）以及新加入的港台電視32台競爭。 _ 因為直播東京奧運憑專業評述，以及長時間直播，而大獲好評，香港開電視決定在「帕奧」直播再接再厲，邀得資深體育節目主持陳尚來出山，與有份擔任奧運直播的 Lily Lee 李莉 一起擔任評述，加上早前港隊表現超班，兩大因素能否令觀眾再一次願意主動收看77台？不過就算怎樣成功，奧運和「帕運」總會過去，一間電視台，或者說，一條電視頻道，怎也不能叫觀眾幾年後下屆奧運舉行期間「再返轉頭幫襯」，持續製作有品牌個性的節目才是關鍵，不過觀乎「後奧運」的黃金時段節目排陣和收視，似乎距離「成功」兩個字還有很遠很遠的路。 ＊＊＊＊＊＊＊＊ _ 東京奧運曲終人散，擁有接近47萬粉絲的「King Jer娛樂台」於閉幕禮舉行當晚（8/8）在facebook專頁邀請網民投票：「77台、81台同99台，大家覺得邊台做得最好？」結果截至周三（11/8）凌晨四時，撐無綫的只有172人，ViuTV獲得8,000票，香港開電視則有20,000人支持。作為一個在香港人心目中「長期隱形」的香港開電視，啟播四年之後，總算憑今次奧運直播盡顯專業而獲得觀眾頒發的「民意金牌」，就企業形象而言，絕對可喜可賀。 _ 不過作為電視節目導賞員，有責任將醜話說在前面 ── 就算今時今日人氣爆燈、母公司業績報告表明有「望於在不久將來取得盈利」的ViuTV，開台至今不停製作叫好叫座的自製節目，也要蝕錢蝕足五年，才有望「見家鄉」，至今仍未能做到百分百覆蓋全港的香港開電視，單憑16天的奧運直播就能夠逆轉命運財源滾滾？咪玩啦。經營免費電視業務，從來都是燒錢，想繼續有得做，Sustainability要極高，簡單說，是然後還有然後，能夠長時間吸引觀眾留意，繼而收看，引發討論，最終吸引客戶花錢落廣告，乍聽「阿媽係女人」，實踐時就知「難到爆燈」，且看奧運結束之後，77台的黃金時段有甚麼節目？ _ 19:00《開在新聞最前線》 19:50《每日樓市》 20:00《小梅醫生》 20:25《娛樂頭條》 20:30《30分鐘大放餸》 21:00《Fit開有條路》 21:25《日日有頭條》 21:30《大唐女法醫》 22:30《你得我得大家得》 23:00《街頭美食攻略》 _ 是咪「好吸引」呢？是咪「好想睇」呢？奧運之前，周一至周五晚上九點半是81台與99台的重要戰場，傳媒焦點都落在《刑偵日記》硬撼《大叔的愛》之上，但77台選擇播放內地優酷製作的《大唐女法醫》，此舉跟直接認輸無異。再看看《大唐女法醫》的陣容：女主角是周潔瓊，男主角是李程彬，不懂他們是誰？請自行Google，問題是，全劇沒有香港演員，就算「孖屐亭」和經營社交網絡的人曉飛，也不知怎樣推廣。以為日劇好一點？更弊！《小梅醫生》緊接《夏空》播出，同樣是NHK晨間劇，但都不是新貨，《夏》好一點，2019年出品，比TVB購入的《大滿腹》（2018）更新。現時播放的《小》就大件事，2012年出品，九年前舊劇當新劇首播，點搞？當然，一切都是同錢有關，「新番日劇」的香港播放權，多數落在myTV SUPER、黃Viu煲劇平台和hmvod手裏，有線與開電視要競爭，就要看有多少「筆直」，如今答案反應現實，也不用多說了。 _ 沒有自製劇、沒有自製綜藝，自家藝人欠知名度，可以點做？其中一個方向，是加強體育節目製作。現時恆常報道本地體壇訊息的，有港台電視31的《體壇無極限》、無綫財經．資訊台（85台）的《體育新世界》，以及77台的《愛．體育》（現時播放《有種精神叫殘奧》)，如果77台趁今次港隊成績超卓，將節目調往周末黃金時段播放，以專業角度介紹體壇情報、運動員及團隊深度訪問，甚至邀請不同運動員參加幕前比試（類似《體路》的《體路大挑戰》系列），再而轉播學界賽事（以前now SPORTS有試過直播），培養新一代評述員，配合貼地的社交媒體推廣，邀請不同KOL、YouTuber、媒體，甚至經理人公司合作，擴闊「對外邦交」，將「好睇嘅體育節目」變成77台其中一個焦點，強攻無綫弱點，說不定能夠另闢蹊徑，畢竟一條頻道要「飛甩老土」，令受眾改觀，不是一兩日即可成事。 _ 原文刊於《am730》 _ （22082021） _ #游大東 #游大東影視筆記 #香港開電視 #有線電視 #東京奧運 #am730 #香港運動員 @am730 @leeleelily1224 @todui9atvshow @what2watch2nitehk #東京帕運 #東京殘奧 @sportsroad.hk @01sports @sportsone.hk @sportsoho #22082021