［十大票房港片，我睇咗八套，你呢？］又再講下戲，之前（http://bit.ly/2F2cRi9）貼過全球十大票房，我睇咗四套。照計係五套，因為佢當時未計水行俠。而我唔係自豪，係有啲慚愧。我呢啲應該玩小眾口味嘛，唔係入去睇　pop corn movie。畢竟過咗成班朋友圍威喂睇戲嘅年代，又過埋拍拖溝女睇戲嘅年代，但我又冇小朋友唔使同佢地去睇戲。

今次就只係香港票房。十套港片，十套非港片。香港票房有限公司，自己睇佢點定義，唔使同我拗點解紅海行動係港片。

好，作為長期支持港片嘅人（我個人FB長期打卡都係打「支持港片」，不過只有優先場先貼上嚟Page），歡迎你同我鬥多。之前十大爛片（http://bit.ly/2F3HqEk）　我都睇咗五套啦。

咁呢十大票房港片，我係睇咗八套嘅。即管畀你估下邊兩套我冇睇，轉頭開估。又，我是老派人，梗係講入場睇。唔計任何咩出碟呀飛機睇呀屋企電視睇呀之類。更加唔會BT（其實仲有冇呢樣嘢？）

答案係：我冇睇　捉妖記　同　西遊記女兒國。你會話，兩套都十分大陸喎。係，但可能都只係巧合。紅海行動咁飛機我都照睇啦。戰狼兩集我睇晒添，第二集特登返深圳睇添。

如果我冇記錯，其實兩套都唔係因為唔在香港冇睇。即係擺明有得睇都唔睇。留意下話晒十大票房，啲映期都長的。捉妖記一我都仲有睇，都未算覺得十分差，但二就冇興趣了。（其實可能再爛啲就有，例如宇宙最強套「冰封俠」相當爛，結果我好興奮咁去睇續集，不負眾望，係更加爛嘅！十大爛片（http://bit.ly/2F3HqEk）都有佢）。女兒國，差不多。其實有冇第一集的？原本鄭保瑞我應該鍾意睇，但實在提不起勁

另一觀察（其實人人都知），就係檔期好大好大影響。楝篤特工票房拋離咁多，就係賀歲檔，片本身都不錯嘅。我的情敵女婿都係。而往年王晶賭城風雲系列（我三套睇晒），黃百鳴啲乜乜喜事系列，曾志偉嘅我愛香港乜乜乜乜系列，我都睇晒。都係入票房十大的。掉轉講，唔係黃金檔期嘅「無雙」都收三千幾萬，真係堅。特別係呢套係合拍片。而冇人再出嚟講合拍片冇味道冇特色實仆直。只因有周潤發（但其實我睇張靜初）（舊文，不含劇透版http://bit.ly/2F1woP0），（含劇透版　http://bit.ly/2F1r665）。

逆流大叔算係真係賣劇本，賣本土情懷（同埋賣余香凝），小製作，證明都有啲市場。又估唔到黃金兄弟咁收得，古惑仔食老本都有排食。套戲係片商請我睇，但反正落咗畫唔怕講，實在麻麻地。志在睇下黑山（但我去過）福岡熊本（我又去過）咁咯。感覺上就係劇組同演員拎老細啲錢自己去旅行過癮，去黑山海灘，去福岡開靚車，去熊本飲清酒，去匈牙利食Goulash咁咯。

晏少少貼埋非港片。