【龔成問答信箱】（Q22721-Q22740）

Q22721：

老師，上完你的堂，現在看報表，有些問題想請教

1）1310香港寛頻為什麼沒有銷售成本？

2）派息比率由141%至1054%，是否不太正常？有什麼implication on their business direction?

謝謝你

3) 另外偉易達303，初步指標同5年財務數據也好合格，現價是否合理價呢？謝謝你

龔成老師︰

1) 唔係每一間企業年報，都會列出銷售成本。因為有些企業係提供非實體產品，或者以服務為主，其實佢地好難去準備計算一個銷貨成本，所以在年報會見唔到這個項目。

其實除左香港寛頻(1310)，福壽園(1448)由於佢賣地以外收入日漸增，佢係近幾年都開始唔出銷貨成本，都是這個原因。

2) 你要記翻到底派息比率係點計，佢係由"派出股息" / "純利"。而"純利"當中，係會扣除一些非實質支出，好以"拆舊和攤銷"就係其中一種。

以佢2020年純利9700萬計，但"拆舊和攤銷"就足足有成15億，如果加回這部份，你就會發現，其實佢只係派緊本身架純利，無任何不正常狀況。

出現大於100%派息比率，另一個可能性，就係佢用以往賺架錢，拿出來派。

當然，唔係每隻股票派息比率高於100%，都一定係這2個原因。你要每隻去深入分析，才好下結論。

3) 偉易達（0303）佢財務數據係合格，此股可以作為收息及平穩增長股，雖增長力就不算強，但適合你年紀。

本質正面，長遠投資價值有的。

以佢過往正常的經營環境來講，佢派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

此股係收息，再加些平穏增長力。現價合理，可投資，但不能太過大注。

------------------------------------------------

Q22722：

老師你好

一萬股941
一萬股66
一萬股17
二十萬股 3988

10萬股 386
1000股 1113
500股 9988

現在總金額負50萬。不知道應該繼續收息抑或再轉組合?

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票，全部都係有質素，長線持有係無問題。

有無需要轉換組合，就要因應你年紀和投資經驗，再作出調整。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」(0066, 0017, 1113)+「潛力股」(9988)。中年人士，可以較集中翻係「平穏增長股」。當你已近退休之年，就應集中在「收息股」(0941, 3988, 386)，去創造平穏現金流。你可以睇翻自已年紀，去作出配置。

另外，你唔好太集中係幾隻股票身上，你要配置一個平衡性高組合。當中包含不同行業，同時個別企業和行業，不要佔組合15%和30%以上。

以下係一些優質股票，你可以參考下，將適合你的股票，加入組合當中。

潛力股︰安碩恒生科技(3067)、比亞迪(1211)、中生(1177)、福壽園(1448)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增值股︰指數基金、港鐵（0066）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如果有投資美股，可投資VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

但你要留意翻，平穏增長股和收息股，現價都合理。但部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)、QQQ勉強算在合理區頂部，可分注入貨，其餘要等等。

你咁大負數，相信係你買入價過高所致。如果你對估值定平貴，唔係太了解。我建議你先用月供去儲股票，以減低買貴貨風險，相信對你會較有利。

------------------------------------------------

Q22723：

龔成老師你好！本人27歲月入3萬政府工，儲蓄大約有70萬，之前都有月供開1211同823，

想問依家想轉981或1347其中一樣。同1928加405。

可以比些少意見點睇981同1347嗎

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，應以增值為主，建議你用「平穏增長股」 + 「潛力股」作組合，去創造一個增值平台。

先前月供的比亞迪(1211)和領展(0823)，都是合適的。但由於比亞迪(1211)現價偏貴，暫時不宜月供，就回到$180才好再考慮。

越秀房產信託基金（0405）只係收息股，增長力唔高，唔係太適合你。

中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

月供都可以，但不宜太多，小注好了。

華虹半導體（1347）有質素，發展不差。

佢主要從事半導體產品的生產及貿易，開發及提供晶圓工藝技術組合，包括嵌入式非易失性存儲器及功率器件，以及ＲＦＣＭＯＳ（射頻互補式金屬氧化物半導體）、模擬及混合訊號、ＣＭＯＳ圖像傳感器、電源管理及ＭＥＭＳ（微機電系統）等多種其他技術。

佢客戶主要為集成器件製造商與系統及無廠半導體公司。中國因為想發展這方面的技術，政策在長遠會對這公司有利，增長正面。

這股長線持有無問題，但現時估值有少少貴，而且都比較波動。做月供的話，小注好了。

我地唔好成個組合，只集中係3,4隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22724：

你好,我32歲，現時持有股票

3690 200股 406.6平均價
0003 3150股 16.82平均價
3319 1250股 37.6平均價
9618 100股 392平均價

想問下應該如何調整投資策略

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你32歲年紀計，應先以增值為主。你現時持有股票，都係質素和適合你。但美團(3690)不確定性會較高，長線不宜持有過多。

但我發現你手上不少股票的買入價，跟現價都有相當距離，雖然可以守，但你要預起碼等一段較長時間。

其實你的情況，都是不少投資新手會犯的錯。其實很多人都是這樣，亦是投資新手必然經過的階段。

投資新手通常都有兩個主要錯誤，第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

未來時間，你唔好只集中係上述3,4隻股票，要加入更多不同行業，令組合更多元化和平衡。

由於你過往經常買貴貨，我建議你先集中利用月供模式，去建立一個股票組合，以減低買貴貨風險。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22725：

龔Sir你好，近期留意你嘅資訊買咗你本「大富翁」未開始睇，反而傾向聽你講多啲。

幾年前買入︰

電能（6）2000股平均價$56.25
匯豐800股平均價$66.89
瑞聲（2018）500股平均價$121.44

全部都好似2018年買入就係你講中晒嘅聽人講無分析胡亂唔睇價。以上股票值得長線持有嗎？

至於配置方面，買咗一筆過投資債券派息基金。

本人52歲，希望幫自己儲錢退休，想請問月供股票/基金分別？邊個相對穩陣？

樓按仲有$280萬左右，每月前夫會俾生活費連供樓$53000都用盡。09年後已經無工作照顧家人，而家仔女大晒結埋婚畢埋業有工作，現時負擔係雙親同自己。

可唔可以俾啲方向，人生交叉點。我已有醫保、儲蓄人壽（1份供完，1份舊式供到死不過固定保費$320）$50萬危疾$200萬定額壽險就係死雙親都要錢。

但人要正面睇如果仲係到生活都要錢靠MPF一定唔夠，醫療又年年加，感謝。

龔成老師︰

書本你都要睇，特別係初學者，最好睇左《80後百萬富翁》、《財務自由行》和《股票勝經》先。雖然平時睇我Q&A都可以，但書本上概念較完整，對你分析和解讀我Q&A或者POST架內容，係有幫助。

你以上股票，都係有質素和適合你，可長線持有。但問題係，你買入價有點貴，才會出現帳面虧損。

月供股票/基金，其實你現睇翻佢投資項目，才知有無投資價值。但我一般會較建議買優質股，因為基金都會有一定費用，長線係蠶食緊你回報。

你現時保險都係保障型多，這些可保留。而儲蓄保險，其實增值能力唔算高，現在一份可以保留，但唔建議加大投入。

以你52歲年齡，其實要開始為退休做準備，但同時，財富仍有增長力（但不是進取）。若單靠MPF，其實真的很難足夠應付退休生活，所以你要累積優質股，去加大退休生活支援。

選股上，你可以投資「平穩增值股」+「收息股」，作為增值目標。

由於你過往都成日買貴貨，相信你對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

策略上，你每月5成儲蓄做月供。其餘先儲起，用一邊月供一邊儲蓄的策略。

若你想進取些，可集中「平穩增值股」，相反你想保守少少，可以集中在「收息股」上。但比重要隨著年齡增加調整，慢慢增加收息股的比例。到退休時，你收息股比例，應提升至100%。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22726：

龔sir 您好，我係澳門既Fans~因為疫情的關係您應該需要一段長時間才能夠在澳門辦課程，但因為我和其他幾位朋友都一直很有興趣上您的堂

未知開辦網上課程我和朋友包堂未知這個方法您是否願意和行得通？

龔成老師︰

抱歉，由於擔心出現盜錄問題，所以我以往一直都唔會開辦網上課程。

而且，我都較希望可以親身，跟學員互動溝通，所以網上課程暫時不會開。

至於包堂這個方法，暫時都未能安排。因為要配合本身課程和工作時間安排，所以偏向一次教一大班學員會較。

你們放心，只要疫情一穏定，我就會盡快重開澳門班，到時就可以見到大家。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

此期間，你可以先睇我架《80後百萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》，對你課堂上掌握，會有幫助。

------------------------------------------------

Q22727：

龔sir 你好！ 我上左你進階班，呢排摸索緊你教的估值方法。請問如果用你教的方法方析的話，比亞迪、信義玻璃、信義光能現價是否ok?

希望龔sir 你可以呢3間公司作用示範！ 感謝

龔成老師︰

比亞迪(1211)貴。信義玻璃(0868)合理區頂至略貴。信義光能(0968)合理區頂至略貴。

係估值方面，你建議你主力用市盈率比較法，去先做一個估值。

但比亞迪(1211)佢潛力較高，其實較難分析。佢現時市盈率去到200倍以上，我地可以參考佢預測市盈率，現時大約140倍。

以佢增長力，去到50-70倍左右，其實都可以。所以，你預佢回幾成，才算較合理區較頂位置。當然，佢業務不斷增長，因此企業價值正向上。

信義光能(0968)你可以睇翻佢行業市盈率，大約係11-24倍。而佢係行內有一定質素和優質勢，故你可以給予較近上部位置，作其合理市盈率。

之後，你再用我教的方法，找出一個有代表性的每股盈利。由於2021年受疫情影響，參考2020年會較好。以信義光能(0968)計，你預HKD0.65左右。

計算出來的合理區約HKD11-14，當然，企業增長中，有可能有少少調整。

信義玻璃(0868)同樣可以先我上堂教的方法，找出合理市盈率區間和代表性的每股盈利。但由於佢同信義光能(0968)一樣，近年增長力高左，所以都要自行上調。

緊記，近期中央政策都出較利好綠色能源股份，故計算信義光能(0968)和信義玻璃(0868)時，用較近期數據，會較能反映實況。

------------------------------------------------

Q22728：

龔Sir你好，本人40歲公務員，已婚，有一小朋友，月入$45,000 ，可以每月用一萬蚊投資。

2019年6月以4,400,000萬購入一個220尺單位深水埗、6年樓放租，現在每月放租一萬蚊。但同年出咗林鄭Plan，令到細單位吸引力大減。請問：

1. 當夠三年的時候我應該繼續持有放租定還是出售？

2. 我每個月有一萬蚊可以用嚟投資，暫時月供股票盈富基金、中銀香港、港鐵，有咩其他建議？

謝謝龔Sir

龔成老師︰

1) 我偏向建議你出售，因為你這個單位太細，連一個基本家庭需要的呎大小都無，投資價值係會大打折扣。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時40歲去計，可以投資「平穏增長股」和「潛力股」。你現時選擇股票，屬於「平穏增長股」，都係適合你。

你每月5成儲蓄，即是用$5000做月供。其餘先儲起，用一邊月供一邊儲蓄的策略。

但我建議你都加少少「潛力股」，去提升組合增長潛力。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多佔組合2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你現時投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22729：

你好，龔sir。9988 269均價 / 9618 330均價，係咪要沽好d

9988 1000股
9618 750股
1339 3.02 5000股
1398 5.8 10000股

1086 1.83 10000股
175 22 4000股
2127 2.56 10000股
806 5.89 10000股

有3分2是股票，有3分1是cash。

輸左10幾萬了，中美咁，係咪清倉好。謝謝龔sir

龔成老師︰

國際關係風險，近1,2年的確係高左，但我地分析一隻股票時，最主要都考慮翻佢本身質素。如果無對佢長線本質造成影響，咁就無問題。

阿里(9988)和京東(9618)最近受國家政策和相關風險影響，質素係弱左，但又未算好嚴重，估值會有少少調整。但由於核心價值無大變，從質素上計，依然值得長線持有。

但問題係，佢佔你組合比重好高。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

現時這2隻股票，從個股和行業(科技類)計，都係超左標，故你要沽出部份，換至其他優質股，咁會較好。

而且這2隻都係潛力型股票，若你偏年青，持有係可以。但如果你係中年至退休人士，就不宜太大注。

至於你虧損咁多，主要唔係股票質素出問題，而係你買貴左。如果你不太懂得估值，定平貴，我建議你未來時間，轉用月供或分注模式去儲貨，來減低買貴貨風險。

另外，中國人民保險（1339）、匯森家居（2127）、惠理基金(0806)和好孩子國際（1086）質素唔算好強，長期的投資價值只算中等，不宜持有太多。

現時大市在合理區，你現時股票和現金比例，係合適的。餘下1/3現金，你就等大跌市出現，才加大力度掃貨。

------------------------------------------------

Q22730：

請問龔成老師，若想定期買入股票，而自己又有時間可跟進的話，是否就非必要設定月供，自己定期買入即可？

主要是因月供有費用的支出，自己買入是否可節省這方面的成本？

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市(如保持住每月定額買一手)就可以。

2個方法都可以，正如你所講，一手手買更可以節省月供費用成本，但你必需確保自已可以有自律性地進行﹐咁就無問題。

------------------------------------------------

Q22731：

龔sir，想問你對美股PDD點睇，有乜建議

龔成老師︰

由於之前估值貴，加上監管因素，令股價向下，中短期仍有一定的風險，但長線不差。不過，這刻只建議小注好婺。

拼多多(PDD)本質不差的，佢將娛樂與分享的理念融入電商運營中，由用戶發起邀請，與他人等拼單成功後，能以更低的價格買到所有商品。

同時也通過拼單了解消費者，通過機器算法進行精準推薦商品，這個商業模式不差，長遠其實有發展，只是行業的賺錢能力，存有不確定性。

------------------------------------------------

Q22732：

30萬本而加得番吾夠20萬

持有：
港股：京東，中海油，平安，網易，理想。
美股：360數科，ARKX，樂信，好未來。

龔Sir，想問而加應該點算好？由2020年all in投資至現在-30%

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持股，大部份都係有質素，雖然你帳面有虧損。但有質素企業，長線會慢慢成長，令股價回升。

持股當中，中海油(0883)只係商品類股份，價格自主能力弱，投資價值只係中等。而京東(9618)、網易(9999)、理想汽車(2015)、ARKX這類股票，不確定性都較大，不宜持有太多。

TAL Education Group 好未來(TAL)業務主要為內地中小學生提供課後輔導課程。該公司主要為幼兒園至十二年級（K-12）的學生提供輔導服務。

其業務正正是近期中央打擊對象，雖然長線會否再次放寬相關要求，我地唔知。但中短期一定好弱，因為政策影響到其核心部份。

若你持貨不多，可以守，博佢之後政策重新放寬對校外課程的限制。但持貨較多，最好沽出部份，換至其他股票去減低風險。

另外，我地投資係會因應大市平貴，去定策略。現時大市只係合理區，其實不宜資金盡用。所以，你再有新資金，最好先儲起，等大跌市機會。

如果你投資經驗不多，擔心好似之前咁買貴貨，你可以考慮用月供股票去做投資，透過平均價格買入法，去平衡買貴貨風險。

------------------------------------------------

Q22733：

老師你好，我29歲月入1萬5，每月可存4千左右。想問問我持有以下股票應該止蝕嗎？要放部分還是全放好？最近見到係咁跌，心好慌。

6618京東健康 109.3有1800股
3888金山軟件 49.6有1400股

謝謝老師

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

其實金山軟件（3888）和京東健康(6618)唔係無質素，但佢地不確定性都較高。特別係現時都未有盈利的京東健康(6618)，波動性就更高，你預佢地會大上大落。

以你年29歲年紀，持有這類潛力股，係無問題。但若果佢地佔你組合比重，係比較高，我就建議你沽少少，平衡下個風險，咁會比較好。

另外，你可以用每月儲到資金，去做供股票，加快你財富增長速度。

你29歲，可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但由於你現時資金不多，可以先集中盈富(2800)。以你年紀，如果無特別負擔，建議儲蓄比例最好去到收入一半。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22734：

阿sir, 你好呀！我睇了一段時間futu, 近排才試進買了$110，$108，同$118，平均價$110.5，越買越跌，有100股，真係跌到驚，請問跌完未，值唔值得溝，還是忍痛割？

救你比啲指引，謝謝你。

唉，早上又輸晚上又輸，正宗韮菜

龔成老師︰

首先，我想你清晰翻溝貨概念。我地決定加注(即溝貨)與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

因此，我地先有睇這隻股票，到底有無質素。

富途（FUTU）有增長力的。佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。這企業雖然有發展，但現時市盈率好高，股價變化大，要留意風險。

此股你長線持有係可以，但由於不確定性都較高，不宜持有太多。如果你現貨只係佔組合好細比重，可以守。但較多的話，最好沽少少，去平衡風險。

另外，每注最好分開10-15%，會較為理想。

------------------------------------------------

Q22735：

sir早晨，我隻285原本已有20％利潤，依家要倒蝕！

龔成老師：

建議你減少睇股價，多睇企業年報。

你要平常心睇股價，我隻比亞迪（1211）之前都是這樣，$88賺錢跌到$12蝕錢。希望你唔好停留在一般散戶思維「著短期短期股」，你要提高層次「著重將來價值」。

------------------------------------------------

Q22736：

龔sir，我今年38歲，自己做小生意，所收入不穩定（每月3-8萬都有可能），我既資產組合，龔sir可唔可以比下寶貴意見

現金大約50萬（當中37萬係政府低息貸款），另有50萬左右股票

領展 60.5@700股
金沙27.9@4400股
福壽園7.23@15000股
平安好醫生81.6@2000股

阿里228@400股
雅生活服務29@1500股
中生制藥 6.52@10000股

唔該龔sir

龔成老師︰

以你38歲年紀，應以增值為主，你現時組合中的股票，都係有質素，而且係有增長力，你長線持有係無問題。

但留意平安好醫生(1833)雖有質素，但佢現時尚未有盈利，不確定性比較高，不宜持有太多。但佢現時郤佔你組合最大比重，建議你估少少，換至其他股票去平衡風險。

另外，你組合都比較偏向潛力股(1448,1833,9988,1177，未來時間要加翻多少少平穏增長股，以免組合風險太高。

平穏增長股︰指數基金、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

最後，相提多你一點。因為你本身有生意，故餘下現金﹐應優先用來支援你業務。因為一盤生意做得好，其實增長力可以比優質股高好多。

當然，如果出現大跌市情況，你都可以動用這筆資金，去掃平貨。

------------------------------------------------

Q22737：

咁龔sir 可唔可以提議我如果$6000月供比例應該如何？例如領展，比亞迪，3067月供比例幾多，盈富仲供唔供好，thx

龔成老師︰

要睇你年齡、風險度。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

如果你年齡較輕，可供3067及領展（0823）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

比亞迪(1211)就暫時唔建議月供住，因為太貴，回到$180才好考慮。若你好想月供新能車股，可以先用ＧＸ中國電車基金（2845）代替。

安碩恒生科技(3067)由係單一行業，若你投資要控制係組合3成以內，否則會有過度集中性風險。

------------------------------------------------

Q22738：

龔Sir, 小妹有十幾萬積蓄, 現時放銀行定期/活期儲蓄都是沒有利息, 想買些收息股, 及作長線投資, 希望所買的股亦有升值的潛質,

因我從未買過股票, 所以無從入手, 最近有留意到以下幾隻股, 但不知那個獲利較高, 你可給我一些意見嗎?

股號 股名
6823 香港電訊
3988 中國銀行
2388 中銀香港
0939 建設銀行
00386 中石化
1398 工商銀行

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

所以﹐投資那一類股票，要先睇翻你年紀和投資取向。

若你係年青至中年人士，應以增值為主。你上述股票，都係收息股(除了2388)，增長力不高，就不宜持有太多，但質素都有的。

策略上，你可以投資「平穏增長股」和「潛力股」。

大市現處於合理水平，那1X萬資金，你可以先用4-6萬，以"分注"形式慢慢入貨。餘下資金，就等你學到一定投資知識，或者大跌市出現，才大力度掃貨，並長線投資。

------------------------------------------------

Q22739：

2809，2846，3097，3134，3175，9845

最建議買那兩隻，這兩星期炒596和2160上落市

（唔知點解我買股票成日輸）

最後想問1357，如在1.45-1.5水位，是否已很合理價錢，這股是否也可以買

龔成老師︰

我建議你，真係唔好再做短炒。你自己都識講，你之前輸左好多錢。

如果你唔改變你投資方法，就算比你選中好股票﹐長線都可以係輸錢收場。你要記住，真正投資方法，應該係長線去持有優質股。

浪潮國際(0596)投資價值不高，而微創心通醫療科技（2160）雖有投資價值，但就好波動，不宜投資太多。

你講的ETF，都係有投資價值，但大多在合理區頂區。若現價投資，只宜小注或月供。

Global X 標普原油期貨增強型 ER ETF(3097)投資於WTI期貨合約。目標係追蹤標普高盛原油增強額外回報指數(指數)。

Ｆ三星原油期（3175）基金之投資目標為追蹤標普高盛原油額外回報指數之表現。2隻ETF都好類似，表現都係睇油價發展。

但短期油價，好難分析，至於中期，相信會由於全球經濟轉弱，表現只會一般。

這2隻基金唔易玩，因為好難準確捉到個位，就算投資都最多只宜好小注。

美圖公司（1357）佢過左最差時期，但始終業務有風險。算是有危有機類的股票。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q22740：

老師，1299可作穩定增長股嗎？

另外，我想問股票派息揀捽股，那捽股的買入價是如何計算？

龔成老師︰

友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

不過盈利就有少少波動，但這都正常，因為保險公司有投資相關收益，所以這亦會令股價略為波動。

前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力。

這股有長線投資價值，算係平穏增長股類別。現價就處合理區頂，長線持有無問題。

至於"碎股"，其實買入價同一般完整一手，唔會有分別，你都可以用網上投資平台的股價作參考。

主要分別是，你將碎股做買賣時，有機會買賣差價較高。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20161-Q20180）

Q20161：

Hello龔sir 我用緊你課堂派既企業評估表做388分析，有一點想請教。

請問點解佢總債項除股東股益去到715％咁高？
咁高負債係咪會影響佢既優質度？

龔成老師：

你無計錯，的確是700%，在表面上，負債是高，但這其實只是一個表面的指標。

因為公式是總負債÷股東權益，而港交所（0388）的股東權益並不高，因為佢本身資產不多，並不是利用資產去創造財富，同時，佢一直的派息好多，當一間公司不斷派息，加上折舊等因素，就會令股東權益的數字較細。

這就會令除出來的數，負債比率變到好高。

另一方面，佢有足夠的現金流，佢現金流強、穩定，這就可以減少負債方面的風險。其實企業我地都會這樣分析，如果佢本身的現金流較強勁，就有更大條件去承受較高負債。

當然，這始終都會扣分的。

當我地見到總債項除股東權益去到700%，我地就要深入分析，先能確定佢的風險程度。如果你睇翻佢的「資產負債表」，你會見到佢的「流動資產淨值」，多年都都能保持正數。

佢雖然流動負債較大，都有足夠的流動資產，因此，其實不用擔心。而佢長期負債其實是不多的。

這反映佢的風險程度不是過高。

------------------------------------------------

Q20162：

龔Sir，小弟9月才開始炒股，倉內全是購證，小米 比廸 中海油 平e ，但錯過了美團 比電 騰訊等大升幅

（都買過，賺過，都好早放左），但睇返轉頭全倉係贏左30%（都好似覺得自己幾叻，但其實係因為牛市）

而家大市調整，輸返10%。其實想問龔Sir，我想買正股，但得廿萬，做唔到投資組合，只可買三隻

日日見您講買價值，點先知合理價係幾多？可否直接講幾錢以下先可以買，
因為我真係唔識...多謝龔Sir！

龔成老師︰

記住，短炒和這些衍生工具，都唔係一個好架投資方法。短線可能有機會賺少少，但長線多數係輸，這是經驗之談。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係年青至中年人士，應用"平穏增長股" + "潛力股"作組合。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時"平穏增長股"都在合理區，而潛力股只有安碩恒生科技（3067）、阿里（9988）、中生製藥（1177）、福壽園（1448）勉強算在合理區頂部，可分注慢慢入貨，其餘都略貴，想買就要等一等。

但留意，現時大市是合理水平，資金唔建議咁快用盡。要留有部份，等大跌市機會，可以用來掃貨。

------------------------------------------------

Q20163：

另外我想月供40k
應該20k 2800, 20k 3067好

定係40k 3067

因為覺得恆指被大隻科技股（700）壟斷左⋯⋯2800 同3067會唔會重複左？

龔成老師︰

盈富（2800）和安碩恒生科技（3067）的確會有部份持股，出現重覆架情況。但問題不算大。

盈富（2800）係相對架全面架一個ETF組合，當中包括52間不同行業和種類的股票。佢會係一個較平穏架選擇，月供時你可用佢做重心。

至於你者比重，要睇翻你年紀，如果你係較年青，可以盈富6: 安碩恒生科技4。越偏向中年，安碩恒生科技比重就要相對減少。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q20164：

Hello，龔成老師，本人37，上次看了老師建議，我已經開始買左少少股票，亦因資金有限，希望老師幫忙睇睇組合問題，謝謝

9988 15股 每月平均$1000
3067 100股 成本價17.51
1810 250股 成本價28.4
6993 500股 成本價15.52
2158 100股 成本價58.6

1）以上股票暫時只想月供2-3隻，請問哪些較為合適？

2）2158 是暗盤買的，現價跌咗好多，是否等佢上回去才賣出？

3）6993 如放長線，合理價大約幾多？

4）發現組合沒有舊經濟股，請問需要配一些嗎？有哪些推介？

感謝老師回答

龔成老師︰

1） 阿里（9988）、小米（1810）、安碩恒生科技（3067）都可以，但由於佢地都係潛力股，風險較高，只宜佔組合4成左右。

其實部份，你應該供平穏增長股，好似盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

2）醫渡科技（2158）提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據安永報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

佢整體係有質素，但上市不久，很難去估值。只能說投資係可以，但要注意風險，唔好太大注。如果你持貨不多，可守，如太多就可能要減。

3） 你只是小注，可以長線持有。佢上市唔耐，好難有個較準架估值，以佢2019年純利10億計，現時市值達900億，現價絕對唔平。

4） 需要加入一些舊經濟股，我1） 所提及的都可以。

------------------------------------------------

Q20165：

你好，想問問我持有884@$7.04 & 1755@$23.1 可以繼續持有嗎？

可以溝貨嗎？呢幾日跌了好多。。
。謝謝

龔成老師︰

廣泰國際控股（0844），佢係一間功能布料及內衣製造商，提供嬰幼兒以及成人之功能布料及內衣，包括黛安芬、安莉芳、曼妮芬等等。

睇翻佢市值同收入都好細，再加上佢多年出現虧損，暫時睇唔倒有投資價值，建議沽出。

新城悅服務（1755）在內地提供物業管理服務及相關增值服務，當中包括住宅、寫字樓等。

此股質素只算係一般，你可持有，但唔建議過多。

------------------------------------------------

Q20166：

龔sir.您好我今年30歲，以前係月光族，而家先開始想認真儲錢。。

請問如果我有＄3000做月供，以下安排會分得太散嗎？
要減1－2隻？定有其他更好嘅長線股？

1093石藥集團＄500
00941中國移動＄1000
2800盈富＄500
0823領展＄500
0788中國鐵塔＄500

龔成老師︰

你算年青，投資策略應以增值為主。中國移動（0941）主要係收息，無乜增長力，唔適合你。

另外，如果手續費去到本金的1%，就開始高，會對你長遠的回報有一定的影響。

我會建議你集中$2000，只供盈富（2800），由於盈富本身是一個52隻股票的組合，因此有分散風險的作用。所以，就算你只集中在這一隻，都無問題。

餘下$1000就先儲起，等大跌市機會，才動用。

之後，可再慢慢增加翻潛力股。

------------------------------------------------

Q20167：

阿sir, 現時股票 3成， 現金 7成，股票包括有66， 1177， 823， 788， 1928，1810， 2845。

現時想買既1211， 285，388， 700，968都貴，請問係咪等佢地到合理價位先入市比較好？

因為近排都升得太誇張，但佢地又離合理價好遠，如果一直等跌又會唔會miss左入貨機會？定係我地作為價值投資者要耐心等待入市時機先買優質股？

謝謝

龔成老師︰

你現金與股票比例適合，持股可長期持有。

比亞迪（1211）偏貴，要回到$120才較合理。其餘4隻，都要回起碼3,4成，才算合理水平，才可以開始慢慢分注。我建議你月供2845。

其實作為投資者，買入股票除左要優質外，價位都好重要，佢會影響你長線回報。

如果你完全無貨，怕錯失機會。可以考慮係唔算好貴架水平，先入一小注。又或者，現時開始做月供，去慢慢儲貨都得（比亞迪除外，因太貴））。

另外，現時大市在合理水平，現金和股票最好各一半，所以你現時入多少少貨都係可以的。

------------------------------------------------

Q20168：

龔sir, 你好，我是58 歲的退休人士，想用50 萬買一些隠健的收息股，請指教。
謝謝你！

龔成老師︰

作為退休人士，投資目標應以賺取現金流為主。因此，你投資「收息股」係正確的。

現時的$50萬，暫時只能動用$30萬，因為大市唔算平，你要分注投資（慢慢咁入，唔好一次過入晒。）。留下的20萬資金，就等大跌市機會，才大手入貨。

收息股的組合，目標是5%、6%股息率︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

由於你目標係收息，所以佢股價上出現波動，你係唔需要理想（除非係本身長線質素，出左大問題。）。

------------------------------------------------

Q20169：

龔成老師，我今年27歲，最近升職人工約有50K一個月。我想增加月供金額，請問應該供多隻

還是增加現有月供的金額？謝謝。

現時持股:
0066 [email protected]
0823 [email protected]
1211 [email protected]
2800 [email protected]
9988 [email protected]

現時月供:
0066 $2,500
0823 $3,000
1211 $5,00
2800 $3,000

龔成老師︰

現時比亞迪（1211）己經偏貴，月供要停一停。現時你月供中股票，比較少係潛力股類。或考慮：GX中國電車（2845）目標是扣除費用及開支前，與Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

未來你可以加入一些潛力股，去提升組合的增長潛力。但由於佢地比較波動，以你年紀，最多佔4-5成左右會較理想。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時大市只在合理區，每月儲唔好盡用。要留有部份，等大跌市機會出現時，可以用來大力掃貨。

------------------------------------------------

Q20170：

老師 883 可以進場嗎 現價 想入3萬股 7.9

龔成老師︰

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

現價算係合理水平，可分注。但這類商品企業，你可投資，但就要明白不是最高質的企業。

------------------------------------------------

Q20171：

你好～
唔好意思呀 ， 希望可給予少少意見：
現在手持 1800 有10手 ，
同 0005 有5手，
1800 係平均 $8.9入 ，
而0005平均$53入

見1800 不斷有負面新聞出現
我應該繼續手持嗎？
感謝感謝

龔成老師︰

中交建（1800）不是全無質素，但近年賺錢能力有所減少，這股不是高增長股，之後只會平穩增長。

暫時都唔好對股價有太大期望，目標只是收息，你預股價上得較慢，負債較高，因此市場估值都不會太高。

持有係可以，只要唔係佔你組合好多，就無問題。

而匯控（0005）同樣主要係收息，如果你係將近/已退休人士，或者係好保守架投資者，此股適合你。

------------------------------------------------

Q20172：

Sir唔知我嘅策略是否正確呢，2O2O年3月趁個市低入貨，但因為新手所以只敢買地產股1972,405,823銀行股2388收息股548

之後開始入咗1177 ，2382。

但因為資金有限所以今天放咗啲地產股1972,823,405銀行股2388（大概有萬幾元利潤）

因為見它們行得好慢，所以想轉碼去1448,1177,1830等低位入。我這做法正確？謝

龔成老師︰

你投資架股票都係有質素，但策略上唔正確。我地投資股票，係希望買入一些優質企業，透過佢自然增長，達至財富增值目的，所以係要長線持有。

而組合中，我地唔可以只係買晒一些潛力股，好以舜宇光學（2382）、小米（1810）、中生製藥（1177）、福壽園（1448）等。

佢地的確增長力高，但風險同樣大，唔可以持有過多。若你係年輕人，大約佔組合一半都可以，再年長一點，就要調低個比重。

其餘部份，應配置一些平穏增長股（好似盈富（2800）、金沙（1928）、長建（1038）、中銀（2388）），佢地升得無咁快，但相對穏健。用這樣配撘，才會令成個組合有穏中求勝架效果。

而越秀房產（0405）和深圳高速公路（0548）這類收息股，只適合將近或已退休人士，創造穏定現流之用。

------------------------------------------------

Q20173：

龔 SIR，我是你的忠誠讀者, 由第一次接觸理財書時到澳門圖書館排隊借書, 到現在毫不猶豫買你的書學習, 非常多謝你慷慨傳授理財概念! 我一直在等澳門開課, 希望可以深入學習!

我一直想在澳門買樓, 由4年前月入17,000澳門幣及沒有首期的情況下, 我膽大購入買菲律賓賭城區的樓花期房, 因疫情關係未收到樓, 所以未有租金產生現金流

但我沒有後悔, 反而在股票上沒有概念, 用僅有的存款高價$2入了22萬股1383 (太陽城) , 至現在沒有沽出,
此後才接觸到你的FB專頁, 今個月我剛完成房子供款後, 手上只有5萬元現金, 之前以$30.2購入1手 00175 (吉利汽車), 我現在月入37,000澳門幣

扣除所有家庭開銷、健康保險及保險月供基金後, 每月儲得18,000, 請問我應該如何配置股票組合重新出發

因為我並未放棄在澳門置業的心願, 想盡快上車, 謝謝!

龔成老師：

其實我地最重要是做好「財富組合」，當中在物業、有股票，你投資外國樓都是資產項。

至於股票方面，你要選較優質的，長期持有，太陽城（1383）質素不太好，要找機會賣出。而吉利（0175）有質素，可長線。

你現時要開始加大儲蓄，有基本的現金，同時分注投資股票。由於你打算之後置業，因此現時投資股票不能太過進取。

你可以投資「平穩增值股」+「潛力股」，不過，由於潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但就要明白波動性比上述會高左，同時風險大左，你要自己平衡。最好分注慢慢買入。同時只能小注。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20174：

老師你好，本人90後，新手。1.13買入 838，8.6買入1108，1.33買入2038。

共投資十萬，錯過了止蝕位，請問可睇長線嗎？謝謝🙏🏻

龔成老師︰

我係唔會定止蝕位，如果係優質股，下跌反而造就入平貨機會，重點係個企業有無質素。

億和控股（0838）主要從事生產模具和零部件以及自動化組裝服務；以及從事小額貸款業務。

睇翻佢盤數，盈利都幾唔穩定，上落都幾大，加上股本回報率處於低水平。再睇翻企業本質，公司獨特性唔強，同埋規模唔算大。

整體來說，投資的價值只屬一般，不宜太大注。

洛陽玻璃股份（1108）為內地最大的浮法玻璃生產商和經銷商之一。主要從事光電電子和信息顯示超薄基板玻璃的生產和銷售。

佢盈利波動好大，而且負債都唔少。若你想投資都可以，但只宜小注。

富智康集團（2038）質素只屬中等，如果佢佔你組合唔多，可以守住先。

------------------------------------------------

Q20175：

你好 請問你對857中石油有咩睇法？

龔成老師︰

中石油（0857）都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，現價合理，小注持有可以。

------------------------------------------------

Q20176：

龔sir, 你好. 本人現時28, 與父母同住, 月入1.5K.

你說當市場進入大升期的最後階段，亦是遠離市場的時候。若果現時持有以下資產

應該繼續持有/轉投其他產品/離場？可以給我一點意見嗎？ 另外1448同285算是潛力股嗎？
有沒有投入市場的空間？

0002 81.95@500
3988 2.69@1000
2800 26.18@500
6690 25.55@200
31.90@200
3067 20.48@100
1810 29.10@200

從網上平台認識你數個月，你比坊間的分析師好好多, 別的只會說那隻好，可以炒賣

賺多少。你是難得一遇的一位，經常勸喻大家不要炒賣賺差價，要有心理準備接受股價的波動。

很高興認識你，剛看完你的作品「大富翁致富藍圖」，令我明白到自己與富翁的距離是有方法拉近。

現在準備看「股票勝經」，接著就是「選股勝經」真的十分期待。希望將來有機會上你的股票班，
見你真人一面

龔成老師︰

我地投資股票，係希望買入一些優質企業，透過佢自然增長，達至財富增值目的。所以，策略上一定係長線。

現時大市算係合理區，雖然部份新經濟股有輕微過熱，但整體大市未算狂熱水平。你現時持貨，可持有。

中生（1177）和比亞迪電子（0285）都係潛力股。由於你年輕，投資應以增值為主。

持股中，中行（3988）和中電（0002）增長力較一般，唔建議持有太多，主要原因是你年輕，未必最適合你。海爾智家（6690）畢竟係新股，不確定性較大，同樣不宜太大注。

未來時間，你可以用"平穏增長股" + "潛力股"，去創造一個月供組合。用每月5成儲蓄去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q20177：

老師你好，本人睇咗你嘅著作好幾年，30多歲，之前喺樓市賺咗接近200萬，之後係2018年, 接近高位既時候買入左幾隻銀行股，諗住可以收股息幫補吓計劃讀書嘅生活費

之後再分別買入唔同嘅股票，經歷咗上年嘅大跌市之後，都冇重整過，而家想睇下可以點部署。

因為賺咗錢之後，想增值下自己，所以報讀咗一個碩士課程，因為先生係外國人，我亦都移民咗去外地

現時係全職學生，生活簡單，冇乜支出，上年開始每月供2000蚊盈富基金

暫時只有小量既股息同基金收入（大概二萬蚊一年）同埋10萬蚊現金，但係儲到嘅錢唔多，想重整下個組合，發掘下資產增值嘅機會，所以想請教下老師你：

005 x 1200
1398 x 5000
939 x 6000
175 x 1000
006 x 1000
778 x 3000
11 x 200
2800 x 619
1137 x 5000
2869 x 2000
950 x 3500

謝謝解答

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你30歲，其實應著重增值，現時你持有的部分股，只是收息股，例如上述銀行股及電能（0006），你應該等佢地上翻D時賣出，轉較有增長力的股，就算轉盈富（2800）對你地長遠財富都較利好。

至於其餘股票，問題不大。

現時你保持月供盈富，以及餘下部分現金，等入一些優質股。

可考慮：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）。

------------------------------------------------

Q20178：

阿sir你好，屋企人2014同2015年間買左3隻股票，一直都返唔到購入價，應該點處理？謝謝

01668(華南城) : 本金$50,000 00261(中建置地): 本金$10,000 08198(新濠環彩): 本金$15,720

龔成老師：

華南城（1668）不過不失，不過增長力比過往略有減弱，現價合理，但潛力度不足。

這股唔建議持有太多。最好賣部分，餘下守住先，但預佢的增長力不強，要上翻去較難。

ＧＢＡ集團（0261）已經無乜投資價值，賣出較好。

樂透互娛（8198）已經無乜投資價值，賣出較好。

------------------------------------------------

Q20179：

龔成你好睇咗你的page幾年，第一次向你請教意見，想知如何善用手上資金。月入2萬，儲到6成。

手上流動資金：保持住有15萬
長期做定期：90萬 （約2.3%）

股票持有：
（投入成本約35萬，市值約負5萬）
建設銀行（939），買入價$6.5
中國銀行（3988），買入價$3.3
阿里巴巴 （9988），買入價$260

打算1-2年內置業，估算花70-80萬

1）現在做定期的資金該繼續做定期嗎？
還是撥一部分去投資股票好？

2）帳面負數情況下，該繼續持有每年收息好，或是加持減持好？

好感謝你肯睇同比意見大家

龔成老師：

1）因為你打算1、2年內買樓，而買股票，要長線先有回報，中短期則要睇到時市況，所以，建議你保持定期，等買樓。

除非你見到大市有明顯下跌，就投資小部分，到時買一些風險較低的優質股。

如果現時想買股票，只建議動用$10萬。

2）最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20180：

龔sir你好，有問題想請教下。

今年30歲，月入24000，儲蓄20萬，無任何投資經驗及概念，畢業出黎做月光族，最近先開始留意下，希望5年左右存到首期約60萬投資大灣區物業，可以未來收租，退左休有長遠收入。

本金唔多，現時係銀行月供緊RMB，另外每月大約可攞4000出黎作投資用，有2個想法，考慮一部份月供一隻可長線投資的股票，一部份做中風險投資

請問建議可如何分配?網上太多資訊自己都有D混亂，第一步係咪建議可先滚大個本金再作計劃?

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$4000。

你可以考慮盈富（2800）$3000。

安碩恆生科技ETF（3067）$1000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。