《我做外賣仔的日子》

呼，尋日又做左半日外賣仔，比起第一次做，第二次做明顯有好多唔同既感受，就好似愛情咁，第一次約會總係令人感到新鮮，但新鮮過後，就需要面對現實了，同各位報告下感受，去點：

1）是日都係半日，六個小時，地點係尖沙咀區，南至海旁，北至窩打老道，東至尖東，西至柯士甸站

2）總單數，13單，收入，360蚊

3）當晚約左大學同學食飯，消費400……俾錢個一刻，我好想再打開個apps去補多一鐘，令當日收支平衡

4）極度懷疑系統係有新手優惠，派得特別多單，暗示你聽，好好搵啊，記得做多D！

5）上星期因為被退單，有蝦餃、薄餅、雞翼、肉醬意粉食，原來術語係叫福利餐，而今次我已經成長喇，所有派送成功，無任何福利……

6）是日來回柏麗大道三次，短期內我都唔會再想行呢條路……

7）尖沙咀區比起旺角區舒服好多，我指環境，明顯綠化同公園長椅都有唔少，整體無旺角咁壓抑，而且搵廁所係相對輕鬆好多

8）請叫我渡船街小霸王，呢個範圍，我送左五單，雖然每單既等待時間都有五至十分鐘，但送餐距離極短，短到點呢？就係間餐廳係樓下但客戶都唔想落街咁既距離，每單都有25蚊以上，當時我感覺原來賺錢就係咁簡單

9）距離短，錢好似好易搵，但計返數，原來重點係唔停手地做先係搵到錢，今次只有一次同時拎兩份外賣，比起上次連續3次搵住3個外賣比，感覺到付出幾多，收獲幾多

10）是日最遠派送，係尖沙咀I Square去佐敦永安，仲要係4人餐，果斷搭巴士，車費6.8，點知去到佐敦再次陷入漫長等待，早知慢慢行過去……

11）無單既時候，我企左係譚仔門口，希望譚仔可以賜單比我，點知旁邊有個南亞同事都係度等緊單，你無聽錯，自從成為外賣仔之後，我係街上面見到外賣仔都會心諗，又有同事開工，會給予佢地一個加油既微笑！

12）閒來無事同南亞同事吹開水，佢都係步兵，已經做左兩年，比起我呢個做左兩日既，佢絕對係大師兄，佢一日最少做12個鐘，鋼條既身型，比起我呢個行半日就去按腳既廢柴，我諗佢做完12個鐘都仲可以去兼職按腳多幾個鐘！送外賣用腳，手唔攰可以再用埋佢

13）南亞同事月入差唔多三萬，同幾個同鄉夾租，每月2500，佢夢想係搵到錢開間雜貨店！感覺就好似香港人移民硬係想開埋小食店賣雞蛋仔，文青總係夢想開間Cafe咁

14）問佢公餘有咩做，佢話打排球，剛好小弟年輕都係排球校隊打過學界，但我見佢差唔多一米八，壯碩既身型，強勁既臂彎，我婉拒左佢邀請我閒時打友誼波，我怕比佢打死

15）傾傾下系統派單比佢先，佢同我講，因為佢係老鬼，同地點有多過一個人都會派單比佢先，我當時心諗，頂，你唔早講，佢用一個朋友，你返印度食蕉既表情同我講，下次同到佢班南亞兄弟就記得唔好一齊等

16）佢工作好認真，真係當係職業，而我就係玩味性質，原因好簡單，因為佢係巴基斯坦搵幾千蚊都做到成隻狗咁，依家派外賣比起以前搵多成十倍，感覺好似當年我去澳洲工作假期比當地人問我點解咁鍾意返工，當時我答佢，香港做麥記20蚊一個鐘，澳洲做又係20蚊一個鐘，但係澳紙既分別

17）是日太無聊，所以我係七仔特登買d平時唔飲既冷門或者新飲品，林家謙代言既清。麥茶都唔錯，紅茶花傳既檸檬紅茶幾好飲，但原來成15.3g糖……

18）尖沙咀區送The Austin同Grand Austin最花時間，要落隧道來回，荒島黎，但大型屋苑既保安服務真係做得比較全面，拉門既都好有禮貌，同日送窩8，樓下阿姐真係有少少無禮貌，唔係對我，而係一個順豐哥哥佢拉住貨入黎，佢嘈左幾句，但順豐哥哥無理佢就入左lift

19）今次我比上次做多左樣野，想睇下分別，就係我今次拎到外賣，同送到樓下，我都會Msg客人同佢講我出發喇，我差唔多到喇，送到我都會msg佢地用餐愉快，到底呢個行為會唔會令我多左Tips呢！！？？

20）答案係無既，可能我既服務仲未夠好，但我又覺得咁send個msg比客，都係認真對待呢份工作，令客人多左一份安心，自我感覺良好，下次我會再接再厲睇下點先有tips！

21）收到張單係送食材，蕃茄薯仔豬骨，應該係煲湯，平時我自己買只係50蚊左右，但有人用差唔多高一倍既價錢去享受服務

22）外賣呢樣野，真係一種時間同金錢既交換，有人分分鐘幾十萬上落，佢花費幾十蚊去慳返時間搵更多錢，或者休息，一路送我一路覺得係對整體社會發展係好事，因為人可以做更有價值既事

23）感覺到外賣都不斷升級緊，係外賣盒、外賣速度、包裝等等都感到比幾年前好太多，以前你食個麵要分湯？真係叫都未必有！依家分湯好多唔講明都會分比你，感覺外賣自取同埋派送對於一個人食飯都係一種趨勢

24）睇返譚仔上市資料，幾年前堂食外賣比重都係8：2，依家已經差唔多6：4，世界唔同左，仲記得當年沙士打開左網購既潮流，而上年疫情就改變左堂食習慣，有好多野唔迫到埋身真係唔會成長

25）是日趣事，我左手拎住電話，右手拎住外賣，個客開門之後我遞左電話比佢佢呆左；一個上身赤裸既男人拎外賣，我覺得睇到佢身體要加錢囉

26）暫時對我講，送外賣都係有趣既，而我分析過，因為我係兼職，又唔係靠佢養家，收工時我計一計數，360蚊，如果我等佢開飯既，我真係要加多半日做到夠數先可以收工，而唔係收工仲去食餐比今日搵既錢更多既飯，今次已經比起上星期無咁腳痛，唔駛按腳，但起左水泡，

27）興趣同職業，真係兩個層次，將興趣變成職業係一種漫長既過程，唔係人人做到，當你既興趣超過左一定既數量，就會量變引起質變，即時變質，需要一個覺悟！

28）我會唔會繼續做？會啊，下星期六強勢回歸旺角區！每次有人問我都係咁答，依家每個星期有人比錢我做gym，真係唔做就蝕啦！

29）但同時我係送外賣既時候諗，其實全職炒散真係幾適合我，黎緊我會有新動向，試下其他唔同既工作，分享多少少大家平時成日見既職業，當真係做既時候係咩感受，如果你地有咩特別職業想我去破地獄既，歡迎留言！

30）兩次既步兵經驗，我升級喇！步兵將會轉職成騎兵，點樣升級得快d！比個like啦！like數就好似經驗值咁，令我有動力去冒險！！！！

［隨筆］
不要問我從哪裡來

註：睇完電視有感，本身打算打幾十字，點知變咗千字口語嚕囌文，不喜敬請跳過。

睇電視講到亞裔美國人嘅移民歷史，當中嘅掙扎同身分嘅改變，而家用另一個身分黎睇，雖然時間太短仲未真切有咩體驗，但感受已經唔同咗好多。

節目提到有個中國婦女，（又係）靠做洗衣店，養活一家大細，仔女成材，做醫生律師同埋海軍，係一個國家嘅典範人物，結果英文都唔多識句嘅老婦人，國家頒咗個優秀美國人嘅銜頭。嘩，美國真係好聰明，呢個簡直係移民版貞節牌坊，有咗呢個示範單位，話畀所有亞裔移民聽，只要你乖乖地，不要問國家能為你做甚麼，要問問你能為國家做乜，努力讀書同生活，我哋就會加獎你。如果你群埋工會，社會分子之類，就係低等移民。推咗個示範單位出嚟，咁就可以成功叫你班移民做順民，尤其係果個唔公義唔透明嘅年代，有咩事都最好食咗佢，因為你嚟美國，根本就寄人離下，主要為生活比以前好呢個終極目標，點會為果啖氣而強出頭？總之你一定要表現到自己極之認同同積極融入美國主義同價值，努力做美國人，就會少好多麻煩。

以前我都好認同，當去到一個新國家生活，要努力融入當地，最好做到當地人咁，係必然嘅事。但呢一兩年，我開始推翻呢個諗法。因為咁諗實在太理智，理智到違反人情。以前去旅行時，我可以好大大聲話自己係香港人，但以後面對同一個問題，會係一個好複雜嘅答案，因為我好難話自己係澳洲人，但如果我繼續話自己係香港人又好奇怪，畢竟我已經漸漸離脫香港嘅生活。另一方面，係呢度我一樣會睇香港新聞同電視，講廣東話同食茶餐廳，仲有幫襯亞洲超市，你叫我完全淨係食麵包薯仔同飲咖啡，同埋睇埋d無聊到爆嘅當地節目，坦白講要完全融入全新嘅文化真係好難。

更矛盾嘅係，而家香港嘅文化同身分被大力打壓同消磨，愛香港嘅人，會好希望努力保存同強調香港，但最尷尬嘅係，係新地方生活，我仲大力宣揚自己文化同身分，算唔算係不忠誠？到底要點攞到平衡？

好彩年代已經唔同，我唔駛好似以前亞裔移民，摒棄自身背景以獲得認同，不過唔代表唔需要面對呢個窘境，而且作為香港人，呢個問題更為複雜。我之前好天真以為，不如好似猶太人咁，香港就可以不死。但其實，咁會令海外港人生活舉步為艱，違背咗離開初衷，更加對唔住而家身處嘅國家。

寫寫吓，我都唔知點收尾，或者我一路行落去，就會搵到答案卦。我好希望，有日大家互相定義時，唔駛再問你係邊度人，而係以價值觀定義。可惜嘅係，我啱啱先知，原來呢個國家大家最緘默，收得最埋嘅係，正正係自己嘅價值觀，唉。

圖：外地都食到但貴到爆嘅滑蛋叉燒飯

［快意江湖令狐沖，活得瀟灑許冠傑］

1. 其實原本冇諗住寫，即使見到 Yickhong Lam寫咗-反正佢都講咗大部份我想講嘅嘢（https://bit.ly/2JZyZKD）。所以只係在個人Facebook寫咗幾句（即係，幾千字咁）。但今朝 陳祉俊 Christopher ChanPM我話覺得寫得好。嘩，咁就不如整理埋一篇啦（但可能整埋一篇反而失望）

2. 正所謂Don’t make stupid people famous，一大堆目無尊長（我是廢老）嘅小朋友講，反而令我走去睇/聽許冠傑場show。感覺當然係唔掂，雖則歌神都七張嘢，但我見鬼佬嗰啲好似keep得好啲，表演當然係水準之下—但你話我死士都好，正係話你知歌神享福，唔使出嚟R撈，所以唔會係最好狀態。呢啲先係福氣。時時保持住戰鬥格嘅女人，好大壓力的說。有得揀都最好幸福肥

3. 你講歌神唱得唔好，甚至啲歌唔好，詞唔好（呢個都有得挑剔？），通通miss the whole point。歌神係英華仔，港大畢業，中文高材生 -你估而家啲濕鳩副學士毅進仔？然後你啲中文Cret都未有嘅網友出嚟點評人地啲詞，真係茶餐廳阿叔頂住個肚腩教美斯踢波咁有喜感。歌神係無可爭議嘅歌神，從來唔係因為佢作曲填詞演出或者手結他特別叻（雖然填詞我覺得神級），甚至唔係因為佢啲歌極流行（雖然都係，但未必後無來者），或者好多歌迷（同上）。

4. 歌神係神，係因為佢對廣東歌呢樣嘢嘅貢獻，甚至推遠少少，佢對成個所謂「廣東文化」，「香港身份認同」嘅貢獻。新一代講乜柒本土而去批評許冠傑，就真係搞笑。要不是歌神？你聽緊Kpop咋（其實而家都係）。呢啲種種，睇維基百科有，當然而家啲友係維基都唔睇的

5. 但當然，新一代話無感，好合理。首先許冠傑嘅歌唔少係貼近民生，有人話維穩（唔通叫你去殺白皮豬？監躉局長派傳單都坐監呀），咩都好，但佢嘅歌詞係比較貼近社會—所以難免你幾十年後聽返無感。掉返轉，你唱《幻影》唱《Monica》可能幾十年都如一，我換個編曲呃你係新歌都仲得。所以本人話，都係古典音樂好，明明係幾百年前嘅巴哈，因為冇歌詞，中坑可以當Vanessa Mae（https://bit.ly/2wD6tLN），新一代可以當太鼓之達人（https://bit.ly/3cgKBos），有代入感。

6. 所以，其實就係沒有誰比誰高尚。新一代無感，正常。但去批評歌神，就戇鳩。冇人叫你要好有代入感，出嚟吹奏歌神點勁。但點解就不能shut the fuck up？（而你就想叫我唔好批評新一代批評歌神）

7. 但再講一次，其實無感係好正常，甚至唔使講社會變咗乜之類。網友話係阿爺嗰代，的確係。非正式統計，一個人最鍾意嘅，應該係佢十歲八歲，至到出嚟做嘢冇耐嗰期嘅歌。許冠傑退出歌壇係1992年。我就14歲，有幸小學年代都聽佢啲歌。但講緊係三十年前啦大佬。唔好話而家啲中學生。就算三十歲以下，應該係一無所知的。許冠傑個仔都仲老過我喎，咁你話佢係咪新一代嘅阿爺級先？

8. 事實上最鍾意許冠傑嘅，係我老豆。而仲要係佢地讀書年代—亦都合理，家母家父六十出頭，許冠傑大佢地十年，計下係啱晒的。而我老豆老母亦都順利過度到去聽譚詠麟張國榮—去到四大天王就唔係佢地所愛了，生咗仔嘛，正所謂「文藝女青年這種病 生個孩子就好了」。正如四大天王之類，咪大我十年多啲。只係某啲原因，後來呢個咁嘅「流動性」冇咗。你見紅到去陳奕迅容祖兒嗰浸之後，就沒有然後了。拿，佢兩位就四十左右，我教書啲學生就三十幾，吻合的。但佢地一路紅到而家（算係），打後就唔知變乜了。喂，何韻詩都四張幾啦，《天使藍》都廿年啦喎

9. 但又同時， Yickhong Lam提 出一個現象：
會聽歐美60、70年代流行樂或搖滾樂既西方新一代，好似要比香港到今時今日會回溯70、80年代粵語流行音樂既要多。
佢話唔知呢個觀察係咪真，我話係。佢話冇答案，我話答案好簡單：咪就係香港人自己都冇尊重過自己嘅流行產業咯，都話早十幾年，個個上選秀節目都唱英文日文蝗語歌，女文青全部以唔睇港片為榮。係呢幾年有政治理由，先由垃圾桶搵返個凍晒嘅condom，拎返啲變晒透明嘅精液，搽落自己度循環再用之嘛。你計老嘅，Beatles Queen之類仲老啦。但你同鬼妹（或架妹）講你鍾意，絶對冇問題，舊年都仲要拍戲出嚟J（https://bit.ly/2xpP1uo），啲精好暖，仲係白色—但香港你同人講鍾意許冠傑？下？？全世界得返我一個識唱「成條入晒眼淚水都標」？哦。

10. 仲有一點，就真係live fast and die young。香港地，真係老就係罪，當然你可能搵到錢，但一定畀人咒你生仔冇屎忽（所以我唔生仔）。陰功，我見歌神畀人話覺得佢出嚟乞食—雖則佢個look的確比較頹。但，許冠傑應該十層八層（有人話係十層加八層）供滿嘅樓，大佬，你咪撚玩啦。有啲友真係以為自己放無薪假就有錢人都好唔掂。

11. 許冠傑唔知邊度爆出嚟（甚至我估有新一代諗：原來仲未死？），本身亦有趣。許冠傑退出樂壇，1992年。不敢對歌神不敬，但在流行文化中，佢就好似死咗一樣—未必係壞事。佢退出，就好徹底。你冇見佢又出嚟唱下歌咁，亦不見佢去指點江山，冇上《我是歌手》，唔去《流行經典五十年》，冇幫佢個仔做宣傳，甚至戲佢都近乎冇再拍。就真係消失咗。可能真係好事，《急流勇退》，佢就真係做到咗。真係差不多高峰時自我收皮，不拖泥帶水，楢山節考咁。而許冠文都仲拍緊戲喎，就難免畀人覺得廢老阻住地球轉。你睇歌神N咁多年出嚟唱一次都要畀人鬧，證明啲新一代幾咁玻璃心。

12. 真係唔係講笑，你要忘記歷史，歷史唔會忘記你嘛。許冠傑演《笑傲江湖》演令狐沖就演得好，因為真係做到金庸筆下嘅「遁入空門」。而你知，江湖腥風血雨嘛。正係因為許冠傑「死得早」，佢就永遠都係聖潔嘅。所以你見啲新一代出嚟噴一輪口水，主流（本人睇就係主流）意見都係反擊佢地。護航許冠傑嘅多，新一代亦都反正唔識就收聲，亦犯不著拎條老鹹魚出嚟鞭屍。要鞭嘅大把仲生猛有反應嘅可以鞭，鍾意姦屍嘅，可以試下打電話去取消有線。

13. 《笑傲江湖》其實係乜，個名點嚟？有睇書或劇嘅應該記得，係歌嚟的。劉正風曲洋嘛，甚至可以話係成個故事嘅開始。你想退隱，但總有麻煩找上門。亦係無數咁多特工片拍續集嘅故事。

14. 對比係乜？有人就有江湖啦。你講金曲之多，許冠傑其實不及倫伯張國榮，甚至不及張學友陳奕迅李克勤。計受歡迎，都可能只係阿爺級嗰班人，甚至有啲轉投咗倫伯張國榮。但許冠傑叻在，死得早嘛！如果仲在江湖，就好難獨善其身了。你上過高位就知（我冇，唔知），話急流勇退真係咁易？點解要讓個位畀你？錢固然搵夠，但我個仔呢？我個孫呢？另外，退咗落嚟，仲有啲人鍾意指點下江山咁嘛。就當你自己唔會，都有人會借你過橋。你見許冠傑一出嚟都畀人借嚟過橋啦（我相信佢並不特別要做維穩show）

15. 所以，真係接近許冠傑地位嘅，其實係Beyond，黃家駒（我都算係歌迷，但都係唔好就咁叫家駒咁肉麻）。絶無半點不敬，但事後諗，黃家駒死得早真係可能係福氣。你睇Beyond打後咁多年嘅嘢，的確令人反胃。而「假如黃家駒冇死」，係一個幾好嘅自由創作題。但佢會變咗黃耀明？定係劉以達？定係BONO咁？定係劉華？都唔好咁老定。不過我估可能變埋許冠傑，話晒都街坊嘛。而如果佢變埋許冠傑，咁其實如果黃家駒變咗許冠傑，咁黃家強可能就變許懷欣，可能就冇後來嗰啲反大面呀食人血饅頭呀，「永遠高唱我歌，走騙千里」（或曰「走騙，千你」）嘅東西了。

16. 結果都係寫得太長。最後講下，許冠傑嘅歌，的確反映咗當年嘅社會。甚麼《加價熱潮》《半斤八兩》好多人講過。但我更愛係《日本娃娃》（https://bit.ly/3batQeK）

17. MV固然要劃出腸，紫色太陽鏡，就真係整個紫色太陽鏡出嚟。爭在我認唔到佢係咪真係跳上架TOYOTA。父權，自戀（不過係許冠傑就冇咁惡頂嘅），物化女性，仲有我地對日本妹嘅想像。嘻。當然，你係許冠傑咪真係 「1997個陣就無有駛怕，實行住原宿開間SUSHI BAR」，可以搵架妹洗衫煲湯DUM骨鏈背脊遞茶（see？當年已經粵文填詞，但人地係中文高材生）。許冠傑啲日文啦喎，照計好多新一代都好過佢，不過唔緊要，而家你一樣可以去飛田新地的。有錢嘅咪去吉原，貴啲咁咯。

18. 仲有，萬惡嘅，《話之你97》（https://bit.ly/2K24weL）。呢度容許我自引舊文作結（https://bit.ly/2yTpY3f）。其實篇文講阿叻，但許冠傑只係香港另一面相。

唔服？個別例子？咁我講多首歌。早少少，但一樣值得討論，就係歌神，許冠傑嘅《話知你97》，1990年嘅歌。許冠傑嘅地位形象，遠比阿叻為好，但《話知你97》表達嘅心態，同《我至叻》其實相當相似。許冠傑呢位香港之子，講嘅係「我話知你97 其實使乜驚到求神又拜佛」嘅盲目安心；係「已經預冇法走得甩（又冇Short Cut） 移民外國 亦係聽糟質」嘅無奈；係「咪匿响屋企 速速Call機 Call班知己 睇返齣無厘頭攪笑戲 卡拉OK 隊樽拔蘭地 High High地 高聲亂唱 再去旺角打機」嘅消費主義；係「明日懶鬼理 最緊要依家Happy 話知佢死」嘅今朝有酒今朝醉；係「斷估或者到咗97（實刮多筆） 人人暴發 My friend good luck」嘅金錢至上。 你睇呢一切一切，其實同《我至叻》，唔係好大分別，頂多係少咗浮誇惡俗。前途？政治？下一代？歌神冇提過啵。嗱，至少「我至叻」都仲講「示威投訴任你噏 唔係犯法點都得 基本法去昅一昅 肯定唔會俾人屈」。

19. Oh, one more thing。應該冇乜人知，周潤發都演過令狐沖。但又如何？倫伯唱過TVB 《笑傲江湖》（呂頌賢版）主題曲添（https://bit.ly/2K15N5I），幾好聽的。證明都係自己選擇，冇咁多身不由己。

20. 冇法唔分開兩篇，其實下一篇我會寫，許冠傑嘅電影。好似個個只係講佢啲歌。

——————————————————
版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。