【龔成問答信箱】（Q22141-22160）

Q22141：

老師你好，想請教一下。我手上有9股均價$600的騰訊。最近跌到得$4xx。我係咪應該止蝕再係4xx買入月供？咁我個價就可以貼市d。

定應該繼續供？我計過要平均返個價去4字頭都要買入超過一手先得。求指教，謝謝

龔成老師：

騰訊（0700）可以持有，你這樣止蝕再買翻，是無意思的，所謂「個價就可以貼市d」只是一個左手數與右手數的問題，你絕對唔好比「買入價」限制左你的投資策略。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22142：

想請教一下，新手,現持︰

中銀03988,8000股，平均買入2.8蚊
盈富基金2800，一手，買入28.42
越秀服務06626,二手，平均買入4.9

這樣的組合太保守嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，算係一個偏保守的平穏增長組合。若你係中年人，或者投資取態較保守的人，這個組合係可以。

但若你係較年青，應以增值為主。中行(3988)只係收息股，增長力唔高，唔係咁適合。你可以用以下「平穏增長股」 + 「潛力股」，去取締中行。

如果你係偏年青，建議用潛力股，去增大翻個組合增長力。相反，你係近中年，可以用平穏增長股。

未來時間，你新投資都可以參考以下股票，再按你年紀和風險承受能力，去作出配置。

例如潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22143：

龔成老師你好，我同老公三十幾歲, 有2個小朋友。2019年賣樓, 搬番同屋企人一起係九龍住。

賣樓獲利約有300萬, 我地一半放入股票市場, 希望2-3年後可以買市區樓。

暫時買左以下股票, 想請問要唔要調整下? 同埋有咩股票推薦加入組合呢? 唔該哂!

匯控 (0005) @$40.48 有6400股
置富 (0778) @$9.12 有1000股
中銀 (3988) @$2.80 有160,000股
騰訊 (0700) @$610 有200股
潤泥 (1313) @8.66 有10000股

龔成老師︰

由於每個人都有「住」的需要，因此，長遠點都建議你買翻自住樓。

華潤水泥控股(1313)和騰訊 (0700)都有質素，但佢地波動性較大，你距離再買樓只有2-3年，時間唔算長，故不宜持有太多。現貨可持有，但就唔好再加注。

另外，你組合好集中係銀行股，咁會出現過度集中性風險。當銀行業有大問題時，你成個組合就會有重大影響。

因此，你要減持這2隻股票，令佢地比重，只佔組合2-3成。取回資金，可以分注買入以下股票。

若你想增長力高D(但風險都會較高)，可較集中平穏增長股。若你想較保守，可以集中係收息股。

收息股目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

到你置業前半年左右，你就要開始慢慢估貨。唔好等到要買樓一次過沽，因為無人知個陣時會係乜野價位。因此，你要慢慢沽出持貨，去平衡價格波動的風險。

------------------------------------------------

Q22144：

你好，如果扣除家用每月剩$13000（未扣其他日常開支），想開始投資有咩建議？暫時只係抽過ibond 冇其他投資。謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22145：

龔sir 你好,首先,真心好多謝你, 分享小小故事

本人18年創業失敗 , 負債30多萬,當時月入19000,每月還款15000,每日早餐食25元的燒味飯飽肚,中午不吃節省開支,晚餐再燒味飯 ,斷絕娛樂支出,

咬緊牙關渴望用最短的時間還清債務 終於在20年年初還清所有債務

在19年年尾,生活壓力無咁大的時候,購買了你的第一本書, 80後百期富翁 ,當中的心態對我影響好大,讓我確立財務目標,渴望掌控自己的未來 ,

21年年初更成為你倍升股的學生, 對財富之路的了解更多 ,真心再次多謝你

本人今年29歲 , 住公屋, 月入30000 ,現時每月存款18000, 現有資金60萬 ,預計2年內會存到人生第一個一百萬 ,思考未來計劃中

本人與父母同住公屋 , 由於父母年齡已過65歲,短期內不會被房署收回公屋 對未來置業計劃迷茫,未知方向,想你比小小意見

1)買私樓

與父母同住公屋 , 購買私樓出租, 家人作擔保人購買 500-600萬的私樓,做9成按揭 月供21000左右 , 放租大約可收回11000左右租金,

若有租戶的情況下實際每月支出大約一萬左右

2)綠表買居屋

把公屋交回,換購市區居屋 , 每月供款1萬8左右, 但就變成自住物業...雖然有升值空間,它日可出售套現, 但無法出租增加資金收入...

希望龔sir比比意見, 應該如何計畫 , 當有明確目標後,一定將會前進得更快更明確

最後再次祝你 身體健康 , 更早的達成你的目標, 然後開開心心住入你最早的目標

龔成老師︰

你唔需要太急考慮投資物業，現時租金回報率，唔算係好高。投資值博率計，先投資在股市，效益相信會較好。

你可以投資「平穏增長股」和「潛力股」。你每月5成儲蓄，即是用$9000做月供。其餘先儲起，用一邊月供一邊儲蓄的策略。

由於你已經上過股票班，投資上會有一定知識，潛力股可以佔組合約4-5成。但若你覺得，投資知識都未算掌握得太好，或者對這些股票唔係太熟識，可以調低個比重至2-3成。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到了你真係有實際需要，要去購買一間自住樓時候。我會較建議買居屋，雖然佢投資價值不及私樓，但由於佢樓價私樓平。變相你可以空多更多資金，去投資優質股。

當然，因為係自住樓，最重要都係睇你「長線」生活所需，同埋是否可以做到「供得起」。只要做到這2點，基本上就無問題。

而你分享的這個經歷，對很多投資者和創業者，都很有教育意義。好多人都唔識面對失敗，不懂如何走出和面對逆境，你是一個很好的正面教材。

但你要記住，要留住財富，除了「知識」外，「健康」都係好重要。所以，斷絕娛樂和不必要開支係可以，但盡量少做一些會影響健康的事。影響到健康，一切都會變得不值。

加油!

------------------------------------------------

Q22146：

龔sir,你好 今年27歲，現時持股狀況如下，大部分跟龔sir你推薦都升 但自己高位入了其他 變相冇賺冇蝕….請問6919應沽出嗎？

剛忍痛沽出[email protected] 放 出2手 當時買入價是32.5.

以下股票都是一手買入，現想進行月供股票$8000分散風險，$3000小米，$3000金莎，$2000盈富基金 請問組合可以嗎？

No. 數量 平均買入價
386 10手 3.354
590 2手 16.1
2800 3手 24.6
1928 3手 31.4

1972 2手 19.5
788 10手 1.757
1810 2手 1810
6049 1手 35.5
6919 10手 32.5

龔成老師︰

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

此股都有投資價值，但不宜太大注。若你持貨不多，可以守。

新東方在綫（1797）都有質素，但政策風險影響較大，不宜大注。

其實你持有股票，都係有投資價值。但較大問題係，你好多股票都係高位入貨。因此，我建議你暫時維持用月供投資，去減少你買貴貨的風險。

持股中，中石化(0386)增長力弱，以你年紀，不宜持有太多。你可以沽出部份，換至其他較有增長力的股票。

而月供方面，選股係可以，但我建議用指數基金做主力，資金分配轉為指數基金$3000、金沙(1928)和小米(1810)各$2500，咁會較好。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22147：

老師：你好！有問題想請教你，首先自我介紹下，我同先生都是50幾歲，有一個仔和女，我做兼職每月3000元左右收入，先生每月約有18000元收入，

兒女還在讀書，每月交租12000元。現時有300萬現金，眼見資金越耒越少，心情難受，近排同先生開始學投資，

買了銀行安聯收益及增長基金（50萬）、純債卷（50萬）、農業股（50萬），請教我如何運用現有資金投資，目標是想草錢買層600萬左右樓住，

望老師能忙裡偷閑解答，萬分感謝！

龔成老師︰

雖然你地5X歲，但購買$600萬的物業，都可以做到按揭，當然成數未必高，以及年期未必長，因為你地現時月入不算多。

如果要累積多幾年錢先買樓，如5-10年，你地能按揭就更少，但如果現時短期內無法買樓，都無辦法，要慢慢儲錢進行。所以，我就當你地能按揭的金額好低或無按揭，去進行分析。

當然，當你地不斷儲錢時，都可以了解下樓市，不一定儲到足夠的數先開始，中間可以調整。

首先，大方向要累積到較大金額，我先以這個假設作分析。

若果係希望將300萬現金，增值去買600萬的物業，重點應放係增值之上。

但由於你和你先生，已經係50幾歲，都比較接近退休之年，係做銀行按揭上，會較困難。因此你需要累積更多資金，甚至係用全樓價作目標，去作準備。

以你年們年紀，投資選項上要保守少少。我建議你利用平穏增長股，作為增值平台。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只是合理區，你現有可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

若你將來子女畢業，開支無咁多的時候，每月若有空出的資金，建議你用這筆錢，去做月供股票，去加快你增值速度。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半儲蓄，就等出現大跌市時出手。

而你現時基金和股票，可以審視翻佢地增長力和質素，去決定是否持有。債券只係產品，主要係提供穏定現金流，無增長力。用於增值，就唔係咁適合。

我假設投資回報有8-10%（連股息再投資），你現時投資$300萬，10年後大約會增值至650-780萬。

但你唔好因為見已多於600萬，就覺得足夠。因為置業時，還有其他連帶成本(如稅、律師費、裝修等)。

再加上，到時已到你們退休之年，你們係需要額外一筆資金，去投資收息資產，為自己創造現金流，去支援你退休開銷。

假設你希望退休後，想每月有1萬蚊現金流收入，以股息率6%計，你就需要本金200萬。你可以用此作為參考，去計劃你未來10年投資大計。

------------------------------------------------

Q22148：

成哥，其實我真係想上你既股票班，但我又行動不便

坐車點對點我都得既
因為真係好想學點估值
而家蠻中中咁買股
好蠢

係咪上完堂
自己肯學會學識？

龔成老師：

完成課程後，你會掌握：
☆自己設定投資策略
☆掌握資金分配
☆低風險爭取合理回報方法
☆能分辨股票優劣
☆為企業優質度評分
☆懂得自行尋找優質股
☆掌握5種選股方法
☆掌握大市買入及沽出時機
☆能評估現股價處平或貴
☆掌握企業估值
☆懂得閱讀企業年報
☆懂得分析財務報表

如果你決心足夠，我相信你總會方法去到上堂的，我未搞澳門股票班前，每一期都有幾個澳門過去的同學，每次上次，由澳門來回香港，8堂如此，每次來回花的時間要4小時，我相信你花的時間，應該不用這麼多。

唔好比一些小問題，影響左你追求進步的心，加油！

------------------------------------------------

Q22149：

您好 龔老師：我初學投資購買股票 想請教您

有穩定工作 每月收入約$45000，租金$10000，還貸款$3750（尚有12期）、保險每月$1800

單親家庭 有1小孩（9歲）、請問我應如何投資好呢？

先謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，建議你用「平穏增長股」 + 「潛力股」作組合，去創造一個增值平台。

若你偏向較年青，潛力股可佔3-4成。但若你偏向中年，潛力股佔1-2成好了。到你有一定投資經驗，潛力股比重可以調升翻少少。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22150：

老師你好,唔好意思我想問下1177, 9988 & 941邊隻股票投資較好。

另外想問下我本身用左10萬買左銀行投資plan要放15年。

另外股票方面現在941有2手,9988有1手。本身喺Manulife買左每月供基金下年11月到期,嗰份基金現時大約$200,000.想用多10萬投資,

唸緊買股票定係投資喺Manulife有隻收益及增長基金每月派息大約6-7%. Many thanks

龔成老師︰

你上述3隻股票，都係有質素。但以你38歲年紀，投資應以增值為主。

中生(1177)和阿里(9988)係潛力股，適合你，現價合理，可以分注入市。但中移動(0941)只係收息股，增長力欠奉，對你就未必太合適。

至於一隻基金是否值得投資，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

以每月派息7%計，勉強算可以。但你要了解翻個派息是否保證，若非保證﹐長線計投資價質股，相信會較高值博率。

------------------------------------------------

Q22151：

老師我有一個難題唔知點做！我媽媽有一層45年舊樓一向放租，近年疫情長達十年租客唔租，因為多年無維修，現在打算大裝修再放租，其實我咁做啱唔啱，

定係有其他方法，保障我媽媽收入。希望老師能幫我分析一下。謝

龔成老師︰

其實你要考慮翻個物業長線投資價值，因為本身個樓齡都略大，長遠維修成本會增加，會有機會慢慢蠶食租金回報。

除非，係一些大型屋苑(特別係藍籌屋苑)，或者你相信裝修後，租金回報會唔錯，而且可以維持一段較長時間。

否則，你要計劃下將佢轉換成其他資產。個新資產，可以係收租物業、收息股或者其他收息產品，都係可以。

若你不打算再新置收租物業，你可以考慮以下收息資產，大致可將資金分成4部分，平衡去分配就可以。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這些股票唔洗理佢股價波動，只要一直持有收息就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

------------------------------------------------

Q22152：

早晨你好，因為我不太懂投資，所以我想分散風險，打算分三筆錢，買入以有關三個板塊「電動汽車、醫藥、科技」的etf、指數或基金。

應該點買？有推薦嗎，或者哪裏可以找到？

龔成老師︰

若你對個別行業有信心，但又不懂從中選股，ETF會係一個唔錯選擇。

電動車行業，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

醫藥方面，ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

而科技股，你可以考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

以上3隻基金，現價大約在合理區頂，至略貴水平。因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

雖然你現時只有約35歲，算係年青。但畢竟以上都是水桶1股票，風險會較高。緊記，最多只可以佔組合4-5成，否則風險就會偏高。

------------------------------------------------

Q22153：

想問有關月供股票事項

我現時月入3萬、1萬家用、現金儲蓄4000

月供股票
1810 $500
1177 $500
2318 $500
2800 $1000

有1手比亞迪 高位240入左

請問老師我月供組合有無問題？

我想月供金額再加大，另外想供12或16，有無任何建議？

月供股票由今年四月開始

龔成老師︰

你現時月供組合，無問題。至於加大月供，恆基(0012)和新地(0016)都可以，但前者會較有發展潛力。

而你現時25歲，很年青，我反而建議考慮供多隻潛力股，去提升個組合增長力，以下都是一些合適選擇。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

另外，你尚很年青，你應該把握沒有太多財務負擔的時候，努力去做增值。最好係每月投入，可以去到人工一半，就較理想。

------------------------------------------------

Q22154：

老師，想問你意見，我係38歲既孖b媽咪，仔女今年3歲，老公係公務員，老公月供梗941 $2500, 823 $2500 我之前問完你意見，

所以月供梗3067 $2000 6823 $2000, 今日出糧公司加左我大概14-15%人工，所以想利用加左既人工，月供多一隻股票，請問有個提議呢？

還是喺我原有既3067, 6823加大月供金額？

我之前曾經問過你，另外心水既月供股票有1211, 2845, 2382，但最後我揀左3067（因為潛力較大）同6823（因為有息）

求指教一下，謝謝老師！

老師，我最後同老公決定供多隻66港鐵$3000, 941 $2500, 823 $2500, 3067 $2000, 6823 $2000, 一齊每個月供$12000, 希望10年後儲到筆錢俾孖b讀書用

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲計，可以較偏重係增值方面。你現時月供股票，都可以。而新加入的港鐵（0066），都係合適的。

但香港電訊(6823)和中移動(0941)主要係收下息，增長力唔會好高，不宜月供太多。

你可以考慮將佢地月供金額減半，去供多一隻潛力股，增長力會較好。以下是一些合適選擇，供你參考。

潛力股可選阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只在合理區，每月資金唔好盡用。要留有部份，等大跌市出現時，可以用來掃貨。

------------------------------------------------

Q22155：

龔sir 你好呀，我係你澳門fans 呀，有少少關於買樓嘅問題想問下你意見。最近同女朋友睇中左一個半新樓嘅單位，

入伙唔夠4年嘅私人樓（金峰名匯近路環）建築面積大概610呎，實用率7成3嘅開放式單位，管理費要2.7。我地都幾鍾意個單位同屋苑，

因為入面比較寧靜和配套設施都齊。我地計算過如果供25年的話大概每個月19000（我地兩個收入差少少5萬，）

但如果租哩個單位就大概8000租，我見疫情期間澳門租金跌左好多，而樓市就只係D大單位回調幅度比較多。我計完之後發覺租嘅價錢好似化算好多（平供樓一半有多）。

如果你係我地會先租再等樓市跌定係都會覺得哩一個係入市機會，還有如果美國加息樓價下跌空間你覺得多唔多呢，謝謝

龔成老師︰

表面上，你租金支出比供樓少近半。但實際上，你供樓金額當中，有一部份係用來還本金，其實等同於係度儲緊資產。

所以，你首先要睇翻個物業，長線有無投資價值。最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

同時，你再要審視其升值潛力，未來地區上、交通上、生活等等的配套發展，才去下一個結論，咁會較好。

另外，你再從自已長線生活需要，去睇下間物業係唔係適合。若2關都過到，而你長線又供得起，咁你去置業，係無問題。

記住，我地投資股市和買物業，都唔好用估走勢去進行，我地應用而一刻佢平貴和質素，去決定買賣策略，咁就可以。

至於美國加息，理論上係對樓市負面。但有多大影響，你要視乎佢加息的力度、時間、經濟情況、樓市供求等等因素。而一刻，較難有個明確結論。

------------------------------------------------

Q22156：

老師你好 我32歲，剛剛開始起步投資了，目前有30萬現金左右。用76.6 入了1手中電 28.7 入了1手盈富基金，淨24萬左右。

我打算分注入市 2-3個月後打算再去入1手中電 1手盈富基金

然後打算用8-10萬買儲蓄保險 分散投資

淨10萬現金做儲備

請問目前的策略可以嗎? 謝謝老師

龔成老師︰

以你32歲年紀，可以進取少少。中電(0002)增長力唔算太高，主要係收下息。現有1手可持有，就不要再加注。

你每2-3月入一手盈富(2800)，這個策略係可以。另外，我建議你加多隻潛力股，去提升組合增長力。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但現少不少潛力股，都尚在偏貴水平。再加上你剛開始投資，未必太懂得選股，我建議你先用行業ETF做目標，佢地都係一籃子企業，較能分散風險。

安碩恒生科技(3067)、ＧＸ中國電車基金（2845）、三星FANG ETF（2814）現價都在合理區頂，你可以用2-3月入一次的模式，去儲貨。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22157：

龔成老師。 又係我，又打擾你

首先第一樣野要感謝你，就是因為看你的書開始理財，資產增值，最大的改變由以後的日日外食改為盡量自己煮，籍此省錢。

現在每個月如沒額外消費由每月存5000-6000 增加至8000-9000。當然我爸爸近來身體不好，那是另一筆支出。雖然在大家看來是小數目，不過感謝你，讓我定立目標為將來負責。

第二，有關2013微盟，我女朋友之前2月以近30蚊高位買入（約3手，佔股票1x%)。我現在稍為幫她看了2019-2020的報表。

期實他現金流算不錯，不過他現金流主要來自19年約8億及20年約10億的融資或可換股債券，而21年6月也有約3億的融資，

這部份我覺得公司太倚賴融資，現在大家看到這類saas 網上平台、網上商店、網上廣告等的潛力，可能問題不大，不過我是看到隱憂。

另外，雖然他還在消錢階段時，但已有小量的盈利，但他太倚賴騰信，有2x%營收來自與騰信有關的業務。

這兩點是我比較擔心的地方。如果是你，你認為這股在未來5年有能力去到30蚊的價位？你會如何處理這個投資失誤？

但已有小量盈利是指2019年情況

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

營業額其實持續都有增長，2018和2020年較大虧損，主要係一些金融資產公平值變動所致，並唔係業務上出問題。

至於你所講，佢現金流較依賴融資，這個的確會令風險增加左。但由於佢都係一間尚在發展階層企業，需要投入較大研發資金，故要用到融資去支援開發，都係合理。

而騰訊(0700)佔其收入近20%，唔算話好多，過度集中性風險，唔算係好大。

我地分析微盟，主要考慮點會放係企業和行業長遠發展潛力，而唔係而一刻。當然你所講融資較多問題，和發展上的不確定性，會令風險高左。

但整體而言，此股都係有投資價值。但投資時，我地要控制注碼，去平衡翻當中風險。

由於此股有投資價值，雖然買貴左，都可以守。長遠企業發展，會令估值會慢慢上升，從而股價會回升。

但持有3手係比例上，有少少多，你可以考慮減持1手，去平衡風險。如果你唔想沽，你可以用新資金，去慢慢平衡翻個比例，都係可以。

------------------------------------------------

Q22158：

1830幾多才入市

2331可以考慮買嗎

山東黃金可以買入嗎

想重整股票組合。哪些值得投資

美股期權交易是否好大風險

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

但現價偏貴，你要等佢有較大跌幅，才好開始小注入貨。

你組合中，大部份都有質素，可長線持有。

但留意，山東黃金（1787）盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。

這類企業都有一定的投資價值，但就不會太高。現價都合理，可分注入貨，但不宜持有太多。

中糧肉食(1610)、五菱汽車(0305)質素中等，不宜持有太多。

中國黃金國際(2099)無明顯投資價值，建議沽出。

美股，係有投資價值。但期權這類估走勢的工具，我就唔建議。你應該用翻正確投資方法，就去分析一間企業優劣，再用平貴向定買入策略，之後長線持有。

------------------------------------------------

Q22159：

龔sir, 我今年54歲，月供由1月2020年至現在，大約年半時間，股票之前組合︰

盈富基金$4000
港鐵 $2000
長江基建 $2000
金沙 $2000
中電$2000
港燈$2000
香港電訊 $2000

另外，分注買入
粵海 6000股
港交所 200股
煤氣 2000 股
六福3000 股
恆基 5000 股
置富 產業信托5000 股
中國鐵搭 2000股
小米 400 股

現時組合股票共現值HK90幾萬

很多年前月供盈富基金，大約有2100股，之後停咗，到之後認識你再重啟供股的路，現時都有正增長，好感激你，想問

1.現時組合是否太散？

2.我打算改變月供組合為

盈富基金$4000
長江基建 $2000
金沙 $2000
香港電訊 $2000
港燈 $1000
港交所 $1000
港鐵 $2000
中電$2000

希望這組合可以增加增長率，但是適合我否？

3. 另外，現在有現金大約60萬⋯⋯已經留咗20萬現金作急用（不動產），請問現時那隻股票可以值得分注買入呢？希望趁平價買入以上種類股票，麻煩幫幫忙

4. 另外，想問如果每月供$15000，六年後有沒有可能累積倒市值500萬股票？

真的感謝你幫忙，以上咁多問題希望你唔會介意，因為自從認識你之後真的財富增長速度比我之前以儲蓄的速度相差一截，在此多謝晒你

龔成老師︰

1) 唔算太散，都可以。

但緊記，現時大市只在合理區，每月資金唔好用晒去月供。最好留有部份，等大跌市出現時，可以用來掃貨。

2) 你將港燈(2638)月供資金，換成港交所(0388)係可以。

但以你54歲年紀，要開始為退休作出準備。港交所(0388)這類潛力股，唔可以持有太多，最多只可以佔組合1-2成。

而且，你成個股票組合，你按年慢慢向保守方向調整。慢慢加大收息股比重，到退休時，收息股最好係佔組合100%。

3) 以下股票，都在合理區。而且佢地都係較適合你年紀，未來應以這些股票，作增值目標。

但由於你本身已有一定持股，故我建議你現時40萬現金，等大市真係有較明顯回調，才慢慢出手。

平穩增值股︰、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

4) 我假設投資回報有8%（連股息再投資），你每月投資$15000，6年後大約只會增值至130萬。

但若用你實際情況，每月供$16000 + 現有資產130萬(持股90萬和現金40萬)，6年後係會增值至340萬。

如果要做到你6年後有500萬目標，就要將月供加大至$33000。若不相加大投資資金，就要將年期加長至9年，才可以做到。

------------------------------------------------

Q22160：

你好， 好想長期投資，好認同你嘅投資策略

本人背景，27歲 現有36萬 月入2萬，宜家有1801 一手 ，1772 一手，少量美股

請問有咩投資建議可以長期有回報？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主。信達生物（1801）和贛鋒鋰業（1772）都適合你，但信達生物不確定性較高，不要持有太多。

至於美股，你可以睇翻佢有無增長力和質素，去決定是否持有。

未來投資，你可以集中係「平穏增長股」和「潛力股」。你每月用5成儲蓄做月供，其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那36萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18041-Q18060）

Q18041：

成哥你好，小弟有兩個問題想請教你，如獲回應，不勝感激。

1.你喺書內提到，你每年都只買賣一兩支股票。想請問，就算今年咁大跌市，你係唔係都仲keep住呢個原則，定還趁平價掃咗好幾支優質股?

2.我知成哥好有耐心，一路都堅信價值投資。書內提到果d，大部份都係成功嘅案例。

但係我好有興趣知道，成哥你建立呢個哲學之後，做過做錯嘅投資係咩，同埋當時嘅時空背景係點?

龔成老師：

1）今年買左幾隻股票，比過往多，我記得2019年，只有買入中生（1177），到2020年，3月大跌市，我買入左比亞迪（1211）、小米（1810）等幾隻股票。

因為當時處於平的狀態，可買較多股票，同時動我當時用的資金，應該是2017年-2019年，3年資金的總和以上。

2）都有的，我久不久都會犯錯，但成功的投資者，最重要是面對錯誤，理性分析，止蝕是重要的一步。

例如十多年前買入一隻股票叫嘉利國際（1050），財務數據不差，業務穩定，由不少大品牌的容戶在手，而佢是做電腦代工的。

之後，中國的成本不少上升，佢的成本也增加，但卻無法將成本轉嫁比客戶，因為佢規模唔大，容易取代，大客戶可以有好多選擇。

於是，當成本增加令佢無法加價比大客，成本無法轉嫁，最後自己的盈利受損，令股價下跌，當年要止蝕。

這反映企業的經營模式，最好有價格自主能力，有成本轉嫁能力。

------------------------------------------------

Q18042：

龔老師，本人也是80後，但後生嘅時候儲錢唔多，常花在吃喝玩樂，旅行。。。婚後才懂理財的重要，尤其是有小朋友後。4年前和先生差不多用晒所有儲蓄買樓，自住。手上有收息嘅基金和有以下股票，
175/788/1177/1211/1448/1810/3993/9988/7299。

1/ 請問手持嘅股票有沒有問題？會唔會太多太散呢？

2/ 幾年前高價買入的2000股175@$26.5和3000股3993@$4.65.... 應該怎樣部署?

3/ 有大約20萬現金，想入66/12/14/1972, 現價入小注可以嗎？還是應該留有備用現金等大跌時入市？

4/另外，什麼時機賣出或換馬才是最好呢？我之前有700@$38x, 一直等了兩年都沒有太大升幅，還反跌，其後升到$41x就放，因為覺得等咗兩年都沒有升，後來就一路直升機咁升。雖然放咗之後入咗1211同788，但放棄咗一隻爆升股都有感失落。

最後希望龔老師可以考慮開平日下午課程，謝謝。

龔成老師：

1）大致都是優質股，亦未算散。洛陽鉬業（3993）的質素較一般，另外，ＦＬ二南方黃金（7299）是杆槓類產品，唔建議投資太多，同時要注意價格上落風險。

2）吉利（0175）可以持有，這股有長線持有價值。至於洛陽鉬業，賣出較好。

3）都是有質素的股票，現價可分注投資，但要留意你組合的股票隻數開始多，管理會較難。

4）如果企業太貴，都可以賣出。不過如果好優質，就只建議賣部分。

因為你無企業價值的概念，所以只比較過往股價，比較之下就賣，這就同一般散戶一樣，升少少就放，無法賺到大錢。

------------------------------------------------

Q18043：

你好，睇左你個page之後慢慢開始認識股票，2年前開始左月供，近排想調整一下個股票組合，想再買多啲股票，但係唔係好知應該揀邊隻好

近排都有留意03662,02013,01686,06823
如果月供增加，應該加邊啲股票會比較好？

我而家28歲，以下係我既股票組合
月供：盈富＠$2,000 領展＠$2,000

4手 太古地產
2手 港燈
1手 金沙

另外，額外想問下關於比亞迪，佢而家個價位係咪高於合理價？如果想買，月供係咪暫時比較好既選擇？謝謝

龔成老師：

現時你持有及月供的，基本上都是有質素，不過增長力唔強，以你的年齡，應該加翻D較有增長力的股票。

奧園健康（3662）有質素及增長力的，都可以留意。微盟集團（2013）雖然是潛力股，但現價貴。

新意網集團（1686）潛力股，現價合理區中上部。至於香港電訊（6823）未必適合你。

比亞迪（1211）現價合理區頂，小注或月供較好。

------------------------------------------------

Q18044：

龔成老師 您好！ 我23歲 想開始學習投資 有儲蓄 大概12萬 應該設立什麼投資組合才適合？謝謝！

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮將其中的$6萬，分注投資優質股，餘下就持有現金等機會。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18045：

老師好 係朋友介紹我睇你 因為我係初哥 玩股票2個月，成日短炒蝕錢 哈哈。

以加手上只keep住6066 $11.8，都渣左個幾月，呢隻可以渣住先？

龔成老師：

中信建投証券（6066）是之前熱炒其中之一，質素不過不失，但增長力唔算強，如果你投入注碼唔多，都可守住先。

記住，投資不是短炒，我做銀行同證券行10年，見短炒客是輸最多的。

第一，你要增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

另外，你將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

------------------------------------------------

Q18046：

龔成老師您好！本人29歲，現時月入$17800，月儲5000-10000，銀行儲蓄大概$15萬（間中做短時間定期）。現時持有800股匯控，$47價位買入。因為之前短炒蝕幾萬，所以現在不敢進取入市。

想請教您，如果我想未來4-5年賺取100萬首期置業可能嗎？我應該怎樣分配投資？

抱歉，還想請您推介，我買您的那本書會比較適合我新手，謝謝

龔成老師：

要5年累積$100萬，都有可能的，但你要善用你的資金。

第一，唔好再做短炒，根本無法賺錢。

第二，以你的年齡，匯豐（0005）不適合你，你可以等上翻D後轉其他。

第三，定期唔適合你，你應該建立一個有增長力的投資組合，部分現金是可以的，但不是核心。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

手上的$15萬，可以動用$5萬分注投資，盈富都得。

另外，可以同時做月供股票，每月$6000。

你可以考慮盈富（2800）$3000。

另外再加2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18047：

老師，想請教一下，你如何看06919，算是一種潛力股嗎？先謝謝老師

龔成老師：

人瑞人才（6919）係一間Ｏ２Ｏ招聘平台，專注新經濟、新興行業及中國獨角獸企業。佢提供專業招聘服務，以及其他人力資源解決方案（包括業務流程外包服務、企業培訓服務、勞務派遣服務及其他雜項服務）。

業務雖然增長快，但這刻仍在燒銀紙的狀態，要分析與估值其實好難。只可以話有危有機，前景不差，如果你只是小注，可持有，不過要提翻，佢之後的股價可以好大上落。

------------------------------------------------

Q18048：

龔成大哥，我有自置物業1間供自住，想問問日後真的想靠股息做到財務自由，本人打算從現在全部資產240萬，用多2年時間，用儲蓄方法增至400萬。有甚麼股票組合可建議給我，作為日後收息之用

160萬是想用兩年時間，自己儲。想問問400萬本金，想每年6厘回報，即 24萬大概。有甚麼收息股，龔成大哥可建議？

本人已買你的收息股書籍

同埋本人很想上你堂，但我是sale,只放星期日，平日收好夜，你會開網上課堂嗎？

龔成老師：

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

我有可能在年底，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q18049：

龔成老師你好，最近我先開始學股票投資 都睇左你既片同post 但我始終吾係好夠膽出手 怕自己係場上贏吾到錢
最近見到1999敏華好似幾強勢

最近佢發展智能家居
都升左一段時間 佢依家仲有潛力升上去嘛？

另外，我知0001長和係優質股

我見到佢依家個位係5年低 依個時候入手定等疫情過左先買好？吾該哂老師

龔成老師：

你要增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

敏華（1999）主要以「芝華仕」品牌推廣具有特色的休閒沙發，並於中國及香港從事零售及批發沙發。有一定的品牌及發展，有平穩增長的能力。

不過，近期股價升左較多，現時已在合理區頂，你小注投資好了（另外，唔好信個勢，無根據）。

至於長和（0001）有質素的，現價合理區中下部，都有投資價值，但你預佢增長力唔算好強。現價已可投資，當你等疫情過去，就不是這個價。

------------------------------------------------

Q18050：

老師，我明白複利息既威力，我想問下如果長線持有股票唔放，點樣可以做到將帳面賺左既部分再投入股票到達至複利息既效果？

龔成老師：

我地用開店來說，如果一間企業本身有100間店，賺到的錢可以開20間，下年就是120間，由於店的數目多年，賺的錢都多左，於是下年能開多24間店，所以就是144間。企業價值正以「複息」的模式增長中。而長期股價也會反映企業價值。

------------------------------------------------

Q18051：

老師，請問一下6098碧桂園服務點睇，幾錢是合理價同平價呢？

我見佢系物管龍頭，近年都不停收購唔同既物管公司壯大自己，更加龔固自己龍頭位置

龔成老師：

碧桂園服務（6098）有質素，物業管理是持續性的，擁有一個項目後，就會有持續的現金流，加上中國的物管行業仍增長中，長遠發展正面。

現價合理區頂，小注後是可以的，這股可長線投資。

------------------------------------------------

Q18052：

龔 sir, 我之前都寫過2次信比你㗎、非常感謝你每次嘅回覆、簡直係我嘅金石良言、好感激。

我上年年尾已經辭去咗我之前月入4萬的工作、我呢一年好想做D冇以前咁大壓力嘅工、所以依家係做緊一份 part-time, 比最低工資還要小的工作。每個月得幾千蚊收入。

我40後、就嚟50、冇樓、一直租樓、租金係$18000/月 （依家仍然租緊、未搬）上年離職後我已經全數3.2M買晒股票、
（3/5/16/66/87/175/285/331/386/388/405/778/823/1038/1093/1177/1211/1448/1928/1972/2382/2778/2800/87001）

我有4份已經供完儲蓄保險、我諗住到55歲後先拎、大概70-80萬、我強積金戸口依家有90-100萬。上年離職後我再加碼買多2份儲蓄保險、供多4年。計劃都係55歲後先拎。

龔sir, 我其實好想財務自由、但係你上次回覆我呢一刻應該都未得住、你可唔可以再比D意見我？謝謝你。
迷惘中年人

補充：我依家現金好小、只係夠基本生活。

再補充、沒有任何借貸、按揭

龔成老師：

以你現時的收入情況，其實可以做少少財富的配置，加大翻「收息股」的比例，令你加強翻現金流，你的股票市值應該有$300萬。

如果全數買收息，目標是5%股息，你每月能有$12500，都算是不差的收入。現時你的組合有點亂，你唔應該買得太散，應該要仔細少少分析。因此可集中翻少少，集中10隻都得。

另外，你4X歲，應該仍好有活力，我會建議你做一些你有興趣，壓力較少的工作，令你收入增加翻D，等你累積多少少財富，過幾年就較易做到財務自由。

------------------------------------------------

Q18053：

我供4隻股票

領展（0823)
煤氣（0003)
長和（0001)
中電（0002）

今年表現好差

想請問我是吾應該堅持月供這4隻股份 （目標是3年後可以滾存到$70萬-$85萬）？定是應該換馬 ？ 換一些現在暢旺的電商股份。例如亞理爸爸。 HKTVMALL 等 ～～
感謝

龔成老師：

最重要是睇「你的投資目標」，而不是「賺蝕數」，你要睇翻你的年齡、風險承受程度，想收息還是增值？

你上述的組合會偏向收息，如果你想組合有較多增長力，可考慮轉其中1、2隻。加入一些較有增長力的股票。

但如果你想收息，其實上述股都能做到，你唔需要比短期股價影響，保持長期月供就得。

唔好因中短期市況某一類股熱炒就想加入，你要問翻你自己，最初想建立的組合是怎樣，投資目標等，向翻這方向發展。

------------------------------------------------

Q18054：

師兄，1565呢隻股點睇？

聽聞呢間公司隸屬國家政府文化部門，嚟緊會有新發展，見到呢隻股票keep住派息，可唔可以大手入？同埋1565呢隻股咩價位先係最抵？

龔成老師：

成實外教育（1565）佢主要透過結構性合約，於中國從事民辦教育服務。經營16間學校，佢主要提供學前教育至十二年級及高等教育服務。

睇翻佢的學校，除提供必修英語課程外，亦為具興趣的學生提供第二外語班，包括德語、法語及日語等。

整體來說，業務都不差，但增長力不算強，不過就唔建議大手投資，因為這刻唔算平，加上教育政策有時可以有較大改變，都成為不確定性。現價合理區中上部，分注都可。

------------------------------------------------

Q18055：

龔生，好開心能在這認識你，我非常關注你的帖文和講話，也非常的欣賞你的表現，你對每個网友或者是學生的留言都回覆，加上又這麼忙。

你的課程我早就有留意，只考慮不知道適合我讀嗎？

龔成老師：

你可以睇《股票勝經》，之後再睇其他的作品，我相信你現時已明白正確的投資方法，記住，投資不是炒賣，是買入股票後長期持有。你保持進步就得。

【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q18056：

你好老師，我自己也是新手一名，現用有限嘅知識，多睇唔同文章、新聞、報表去分析有關做SaaS公司 中國有贊（8083）

我見8083 營養額、毛利每一年都增加，而且增加幅度都好快，純利就負數，特別在由18年除稅前溢利 -893,204 到19年 -1,012,351。

我會認為生意係增加了不少，但因為SaaS只是在發展初段（我自己對SaaS未來是有信心）而中國有贊也是在內地市場中 SaaS的龍頭企業之一（還有微盟也是）

對比微盟，有贊市脹率只有6.57 而微盟有 11.109 再加上鈍利係負數，我會解釋為市場對有贊嘅股值低估了，在現今市場環境下，有贊與微盟都是SaaS龍頭企業

而且今後國內市場快遞增長，更會需要全面的電腦系統化管理。

我會比較看到這產業嘅企業，特別是中國有贊，就是一隻被市場低估的潛力股

老師，以上是運用我有限的分析力去分析，如有錯，請指教，謝謝你

我會不斷學習，會多看不同企業年報，不斷去從中分析，加強自己的投資水平。

龔成老師：

中國有贊（8083）業務的確有潛在發展力，但估值是困難的地方，這類公司的盈利負數，要計算就較難，而分析市賬率只是估值其中一個分析方法，加上這類公司，佢的賬面值是否能反映到公司的價值，其實有疑問，因為佢持有的資產，不少都是無形的，根本很難衡量，所以以市賬率去分析，本質上不完整。

另外，雖然行業增長中，但市場已關注這股，即是已經成為了市場焦點，而這類股很有機會估值是高估的。

當然，我未深入研究這股，不能稱佢現時估值一定高估，但這類股的估值困難，如果之後業務、市場出現變化，市場視法改變，都會令股價大上大落。

業務有增長，但股價是否仍有增長，我都唔知，只可以話，這類股不建議大注投資。

------------------------------------------------

Q18057：

你好，龔sir。而架因為疫情關係公司封左，存款得4萬左右，卡數每月大約6,7千蚊(已經聽你講冇再亂用信用卡，只係之前d分期)

另外還有50萬左右既債務(欠屋企人的，但都想盡快清還)，再可以快d財務自由。

如果我預11月左右會重開d娛樂場所可以開工，即係大約會用15000去還9,10月既卡數。如果剩餘既資金，你話我做儲備好定買月供股票好？

龔成老師：

你應該先備多D現金，唔好心急投資，因為你負債較多，同時收入有不確定性，所以要留翻一定的現金先。

我地理財，一定會先想防守，之後先進攻。

你做好防守，留一定的現金先，之後，到你收入正常翻，同時已經有一定的現金，就可以開始做月供股票。

------------------------------------------------

Q18058：

龔老師 你好 想問我暫時入了
2800@1手
1928@1手
1810@2手

我下一步應該要入手邊種類既股比較好？定係要改變手上既股？

1475值得入手嗎？
謝謝

龔成老師：

要睇你的年齡、風險承受程度、投資目標、方向等。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你上述所買入的，都是有質素的股票，都可以長線持有，如果你年齡，就可以增加多D潛力類股，但最好是與持有的不同行業。

如果較年長，就會加翻收息股。

上述股票可長線持有。

日清食品（1475）有質素的，不過現價就唔平，最好回少少先。

------------------------------------------------

Q18059：

本人打算再向銀行貸款70萬，然後利用孖展買入150萬恆生，當利息3%, 股息6%, 有3%息差，而且我覺得恆生防守力很強，到疫情完後一定會有很大潛重上170~200水平， 這股10分優質

我根據自己的分期還款能力來借錢，主要原因是不希望之後疫情轉好錯失資產增值良機

可以評一下我這想法有無盲點未計清楚

龔成老師：

借貸投資，當我地進行時，第一要睇「息差」，例如借的息為「3%」，之後將資金投資收息股，約收「6%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

但現時恆指未算好平，你如何確保不會「賺息蝕價」？

即是說，這些借貸投資不是不能用，而是要過幾關才能用，要較有把握才會用，要股價好平先用。

另外，你集中投資一股，是高風險的行為，要注意風險。

------------------------------------------------

Q18060：

成老師，268金蝶有冇咩睇法，我睇過分析SaaS 業務潛力很好，但近幾個月已升好多，可否作長線買入？

龔成老師：

金蝶國際（0268）主要業務為在中國境內開發、製造及出售軟件產品及提供軟件相關技術服務。業務增長快，同時市場預期佢有一定的發展力，對佢期望唔細。

睇翻財務數據，其實是不錯的股票，生意同盈利都有明顯的增長，而且行業仍處增長階段。

不過，這股的股價太高，現價處貴水平，對這刻投資有所保留。如果真的投資，小注好了。

你長線持有是可以的，但要明白佢股價一定會較波動。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14861-Q14880）

Q14861：

龔成老師你好，其實睇完你d片都有啟發。

其實我今年大學gra，係上星期同一位認識多年既好朋友食飯，佢讀唔成書，而且已投身社會，草左D錢。我地平時就係用你教既價值投資法去搵D股買左佢放係度一排等佢倍升或者升5成以上放。而我地係一星期前當食飯有個idea，就係想搞XXXXXX。

我好記得你係好多既片到話成功同失敗既人，問題不在大家既能力上，兩者分別係前者係唔怕難只會做不斷試，而且後者就只想不做，得個諗字怕呢樣果樣。

我同我朋友都好記得呢段說話，我地果晚食完飯番到屋企即時開始準備。希望可以係6月開始試業，等疫情過左就即刻開波。

本金唔算好多，而且我地都傾好，今次既XXXXXX希望可以run到3年，什至5年。我地目標只求回本唔求賺錢，亦什至最少會蝕錢。

當然你可能會有個問號，但其實我地真正想既係希望而家20出頭，大家未有家庭負擔，亦唔洗交家用既時候。希望可以用小小錢，去換一次搞生意既經驗。呢盤生意一定唔會做一世，亦唔會話可能係5~10年。

想問下你既意見，如果比著係你好似我呢個年紀咁既情況，你建唔建議我咁做。個金額其實唔係好大，如果比著係你，你覺得用黎買一次做生意既經驗，學下野?定係用黎繼續投資係D股票到呢?

我今次做生意既本金，其實係上年係中生製藥倍升所賺到既錢黎。我已經放曬啦，你認為繼續投資股票定係試一次年輕既「賭博」會比較好?謝謝!

龔成老師：

我好鼓勵你地去試，你地的年齡，正正係大膽去做的好時機，因為你有膽，同埋「輸得起」，另外，創業一定會經歷好多困難，呢個係一個好好的學習。

好多人就係唔敢試、唔敢輸，所以一世都做一D唔想做的野。你可能會輸，但輸完再起身，試多幾次，總會贏！

講翻你果度，你地首先要做資料搜集，同區的對手有多少，收費幾多，你要從顧客的身份不斷「參考」別人，那個是較成功的，點解會成功。

即是說，你一定要了解當區，一個區可以有多少間，顧客是甚麼年齡，點樣引佢地來，點樣能要佢地再光顧。

比起市場的對手，你的強項是咩？點解要去你度唔去對手度？你地的財力唔多，要同人鬥強無得鬥，但你地可以鬥「與別不同」，在定位上找到你地的特點。

另外，點樣做宣傳，點樣有客，客戶唔會自己上來，點樣識到你地？具體的方法係點？

同時，除了初期的投資外，每月的成本點？各方都要計清楚，你地而家唔係玩玩下，而係同市場鬥，只要唔小心，就會輸，唔會有人同情，所以一定要做足功課。要做，就要認真做！

另外，你地年輕有優勢，想想有D咩係比人強，有無D咩有創意的方法。我無D咩你地會識而人地唔識，至於學生先有的網絡等等。

記住，成功者失敗者最大的分別，係夠唔夠膽做，你其實已行緊成功者果度路，但當中一定有困難。順境時，個個都做到，但面對困難時，就係真正分辨成功人士同一般人的時候，加油！

------------------------------------------------

Q14862：

龔成老師我想問, 我前排13.18戈陣買左一手吉利,之後都一路升, 我諗住等佢跌返13左右先再買多D, 但前幾日我見佢升到16.26

我諗住其實反正都係要等佢跌返,咁不如宜家放左佢賺返少少先, 咁第時買戈陣咪可以擺多少少錢落去..所以我係16.26戈陣放左佢賺左二千幾左右.

請問咁樣既操作有冇問題? 我記得你成日強調買左股票,公司如果係優質既話其實可以唔洗點理佢

但好似我呢個情況反正都要等佢跌, 咁襯佢升戈陣放左佢黎賺多少少成本係咪合理? 謝謝你

龔成老師︰

你犯上一個很多投資者都會犯的錯誤，就是去"估走勢"。

好多人都會話"隻股票近期升唔少，先放左獲利，等回調再重新吸納。"，但這股一定會再回調? 在你放了之後，佢會不會再創新高，永遠唔會重返$13? 這些都無人知道。

你要明白投資股票就如買入一間企業，就算佢多優質都要時間去成長。中短期波動好難掌握，所以長線持有會對你最有利。

其實吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

但中國車市放緩、外來競爭、行業競爭加劇，都成為不利的因素，相信中短期仍會對佢不利。

股價由高位回落不少，除了反映過往處貴水平，現在回落至合理水平外，同時反映市場預期中國車市的不利情況。相信這股中短期股價仍會不利，但長遠前景仍在的，所以你最好保持持貨狀態，長遠回報一定比你用炒差價形式操作好。

------------------------------------------------

Q14863：

你好老師，本人31歲，最近開始學習投資，想為將來退休鋪路，有2個投資問題想請教老師的。

1.本人上年10月開始月供股票$6000，盈富（2800）$2000、恆基（0012）$2000、港鐵（0066）$2000。

今年1月開始加碼至$10000，盈富（2800）$4000、恆基（0012）$2000、港鐵（0066）$2000 及加入中銀香港（2388）$2000。我希望係50-55歲時退休，到時股票資產可以提供每月不少於$20000被動收入。

請問以上方法正確可行嗎?

2.本人父母剛年過65歲已退休。佢地大約有80-90萬現金及保本保險，我覺得保險的回報率太低，想將保險既資金用來投資收息股。

本人心水有 中行（3988）、工行（1398）、建行（0939）、置富（0778）、港燈（2638）、香港電訊（6823），想從以上選3-4隻建立一個收息股組合。

請問應該選那隻股票較好? 我見老師比較少推介中行（3988），請問係有什麼原因嗎? 另外應該動用全部資金既幾多成用來投資收息股比較合適?

謝謝!

龔成老師︰

1） 如果你希望50-55歲時每月有2萬蚊現金流，以股息率5%計，你需要本金480萬。

以恆指過去年平均回報10%計（連股息再投資），你每月投資$10000，20年後大約會增值至逾680萬。由於時間充裕有20年之多，相信你可以達成目標機很大。

你現時投資組合無問題，你照著現在月供方法去進行就可以了。

2） 資金分配方面，你可以將退休資金分為3份。第一份是現金（$20萬）、第二份是銀行或保險公司的產品（約$20萬-$30萬），你可以到銀行問問，目標是一些保本，低風險，但有持續現金流的產品。第三份是收息股，佔約$50萬。

其實你所講的6隻收息股都有質素，但考慮到配置方面，我會建議你在3隻銀行股中抽一隻 （避免過於集中內銀股），再加上另外3隻收息股，組成一個4隻收息股旳退休組合。

至於中行（3988），作為收息股都可以。只係整體而言，工行和建行會優勝少少，但投資中行也可以。

------------------------------------------------

Q14864：

你好呀，我岩岩睇左你月供股票的片，你話月供最好是長期，供2年，持有5年，持有係咩意思？定係意思是供5年？

月供股票係咪唔洗睇價位 幾時入都得？

如果我想選定一隻股月供 1928 388 27 12 2800 邊隻好？

龔成老師：

意思是最少最少都要供2年，如果可以的話，供5年或以上會更好。至於持有持有，則是由最初供款開始，起碼5年，這會較好。

其實，月供股票的原理就是儲錢，只是所儲的不是現金，而是優質股，現金永遠貶值，優質企業會升值，持有愈耐當然愈好。

月供股票，唔洗點睇價位，保持長供就得，當然，我會建議你一邊月供，一邊同時儲下現金，即是只將每月一部分用作月供，而這部分就不理價不斷入。

上述都是有質素的股票，都適合長期進行月供，你可以以盈富（2800）作核心，再配上金沙（1928）、恆基（0012），長期進行。

------------------------------------------------

Q14865：

老師，2019年尾我個投資組合是包括了不少熱炒版塊（內房/體育用品/物管）及不少新經濟股，可唔可以幫我評論當中股票優素及是否值得長揸，還是只是短炒熱潮？

由於是算是低位時買貨，暫時每隻股價升幅大約有3-25%左右，我想知道你對新經濟股的看法，可否分享一下，謝謝！

我所持貨的組合，當中包括
阿里巴巴（9988）
美團點評（3690）
眾安在線（6060）
平安好醫生（1833）
中國海外發展（0688）

龍光地產（3380）
雅生活服務（3319）
奧園健康（3662）
李寧（2331）
蒙牛乳業（2319）
瑞聲科技 （2018）

另一部分是月供$6000股票，選股質素又可以嗎？
$2500 中國平安（2318）
$2000 友邦保險 （1299）
$1500 華潤置地（1109）

龔成老師：

你上述持有的股票，大致都是不差的，如果是一些新經濟股，潛力會比較大，但同時不確定性會較高。這類股不是不可持有，但在組合中的比例，你要控制，例如：

阿里巴巴（9988）
美團點評（3690）
眾安在線（6060）
平安好醫生（1833）

而這4股當中，眾安（6060）是相對質素相對較一般的。

至於其他的股票，都不差的，但中國地產相關類，不要佔組合比例太多，你要自己平衡翻。物管股我睇好的，業務正面，有發展，現金流強，但就要小心已有少少貴。雅生活服務（3319）正面。

另外，月供部分都是有質素的，可長線，但如果想組合更加平衡，宜加上盈富（2800）去供。

------------------------------------------------

Q14866：

老師你好，想請敎，本人28歲，未婚。過去因享受自由，工作收入唔穩定，現金儲蓄只有35萬。目前月入約43K澳門幣

另手上持有4手工商銀行 （6.5購入） 2手農業銀行 （3.7購入）

儲蓄保每年5000美元，共五年到2024年
危疾保每年25000港幣，共18年到2036年

對股票唔熟悉，曾短炒下股票，亦曾經亂買老千股蝕過幾萬

係朋友介紹下買左儲蓄保險
無首期，所以短期內無買樓打算
家人們都係放定期

本人對投資唔熟悉，想請教老師有咩適合嘅資產增值建議

目前沒有什麼目標，淨係提醒自己要草錢，求老師理財規劃建議
感謝

龔成老師：

我地理財，要做到攻守兼備，如果你已有保險相關產品，即是已做好了防守的部分，以你28歲，應該集中進攻，好好善用餘下的資金，因此，唔應該買太多儲蓄保險，又或做定期。

建議你增加投資知識，然後逐步增加投資金額，現時先小注去投資先。

記住，投資不是炒賣，是長期持有有質素的股票，你現時持有的，都是有質素的，可長線，但唔應該只投資內銀股，應該建立一個平衡的組合。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14867：

龔成老師你好阿，有一個小小問題關於自由現金流既計算方法，我在阿思達克的財經網站看某公司現金流量表。

有經營活動，投資回報，投資活動，融資活動，還有其他現金及等，稅收，利息那些，想請問問一下，有哪些才是用於計算自由現金流？

龔成老師：

自由現金流的計法有點複雜，你除了睇財經網站外，要主動睇年報加減而得出相關的數目，因為財經網站唔會咁樣提供的。

最簡單的公式，就是將經營活動現金流量，減去資本開支，就會得出相關的數目，而數目要在年報的現金流量表自己尋找的。

------------------------------------------------

Q14868：

龔成老師,你好!最近計劃轉換工作, 拜讀了您的作品後, 得知建立財富系統的方法。

我對於投資股票的知識幾乎為零, 故希望找一份可以幫助我學習更多財務知識的工作。但我也不清楚什麼工作才有機會接觸股票相關知識。所以想請教一下老師, 是要找銀行或證券行的工作嗎?

龔成老師：

銀行工、證券行相關的工作，都可以學到股票知識，但具體要睇你的職位，因為不少職位，其實所學有限。

雖然我過往做了多年銀行，不過，我9成以上的股票知識，都是自己睇書、不斷睇年報，去增加的。

因此，如果這方面不是你最想的事業，你不用特登去入行，你只要做一些你有興趣、以及發展的工作，同時，每星期同少少時間，睇書、上堂、睇年報，一年後，你已經比9成股票散戶，有更強的投資實力！

------------------------------------------------

Q14869：

hi 我剛剛睇完《股神的秘密》並對價值投資產生興趣.
想問下老師有無學習分析公司淨值/annual report(p&l, cash flow, financial statement) ge 影片/網/書介紹? 從而學習如何選股thx

龔成老師：

你可以睇《股票勝經》《年報勝經》，又或上我的股票班，都可以學到財務財表、企業估值、選股等技巧的。

另外，巴菲特相關的書有好多，強烈建議你不斷去睇。

------------------------------------------------

Q14870：

老師你好，本人25歲，工作2年多，銀行有50萬港元存款，其中包括約等於20萬港元的美金。最近希望開始學習投資，長遠目標是財務自由。短期目標希望有每月2萬元被動收入。

知道老師推介過一些平穏增值股及潛力股，想問問：

1. 一手手買還是月供比較合適？

2. 如果想用美金存款買一些美股，除了科技股，老師會否建議其他股票？

3. 除了投資股票，老師建議開拓那些收入來源？
非常感謝

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，以你的年齡與這刻的情況，最好是先做好「增值」。

1）對於投資知識未算好強的投資者，月供是最好的，因為買入價得以平均，風險有效減少。我會建議部分資金月供，部分則留現金，等機會投資。

2）一些大品牌、有好強產品、客戶群的股票，都可以。如果未有或不想選股，可以好簡單，買入指數基金，例如在香港上市的領航標普五百（3140），這基金之投資目標為追蹤標普500指數之表現，是一個好簡單，追美股的方法。

3）做生意。

你後生，可以大膽去試好多野，做生意是一個好好的突破，會改變你一生的事業。我建議你試左先，不斷試，不斷學就有機會。

------------------------------------------------

Q14871：

龔成老師，多謝得你指點，早年開始月供股票，總算平穩增值。本人今年40歲，希望10年內退休。現有約420萬股票， 分佈如下：

5% 盈富基金
21%公用服務(煤氣，北京水務)
27% 民生類(領展，國際家居零售)
20% 金融類 (恆生，平保)
26% 科技(騰訊，藥股) － 主要是因為近期升勢較急，至佔比頗高
2% 其他

現時亦有繼續月供上述股票，每月約8萬。

請問：

1. 上述組合需要作出調整嗎？

2. 現剛好有100萬港幣和100萬人民幣定期存款到期，請問我應按兵不動持有現金，還是繼續做定期，還是投資收息股？

3. 另100萬人民幣做定期還是投資滙賢產業信託（87001）會更合適？謝謝你。

龔成老師：

1）以你40歲的年齡，是平穩增值佔較多，潛力股佔部分。上述的分配，沒有一粳別過多的情況，如果去到3成以上，先要開始考慮調整。

由於你現時仍是財富增長的年齡，因此，就算組合中，佔比最多是科技及藥物類，也無問題的，但當你去到5年後，就要開始有少少調整。

2）以現時的大市平貴情況，以及你的組合分配，現金不要動用住，若出現較大的下跌先動用作入市。

3）暫時做定期先。如果這筆錢投入到股票，你現時的比例會去到2成以下，有點少。

------------------------------------------------

Q14872：

36.5入了500股 6919,請問前景點樣?
謝謝!

龔成老師：

人瑞人才（6919）係一間Ｏ２Ｏ招聘平台，專注新經濟、新興行業及中國獨角獸企業。佢提供專業招聘服務，以及其他人力資源解決方案（包括業務流程外包服務、企業培訓服務、勞務派遣服務及其他雜項服務）。

業務雖然增長快，但這刻仍在燒銀紙的狀態，要分析與估值其實好難。只可以話有危有機，前景不差，如果你只是小注，可持有，不過要提翻，佢之後的股價可以好大上落。

------------------------------------------------

Q14873：

請問(1) 我在197.2 入了阿里巴巴, 前景會似騰信嗎?

(2) 160.5 入恒生銀請問以上可上望幾多錢?可持有還是食糊呢?謝謝!

龔成老師：

1）阿里（9988）的長遠增長會比騰訊（0700）好，你可以繼續持有。

2）恆生（0011）是有質素的股票，可以長線持有，不過，佢增長力不算強，是收息型股息，同時有基本的增長力。

------------------------------------------------

Q14874：

Hi! 龔成兄你好，我睇咗你唔少文章， 令我獲益良多 ， 有啲問題想請教，希望解答

1) 我本人現年48歲65歲退休， 想每個月用四千蚊月供兩隻股票 想買收息股收息， 3號中華煤氣每年十送一，雖然股息率只有2.00%

但係因為有十送一送红股， 如果計埋十送一红股，我有17年嘅供款期， 咁樣自己月供買的股數加上每年十送一红股，股數就會有所增加而令到嘅收息亦都會增加， 咁樣買 中華煤氣 係咪一個好嘅選擇？

2) 我睇 匯豐現在都仲有6.6厘息率，但係股價而家已經低了好多， 仲值唔值得買呢 ？ 請問有冇第二隻收息股可以推介畀我？例如2800 盈富基金 ，823領展或者地產股邊隻好呢？

希望得到龔成兄嘅回覆。謝謝

龔成老師：

1）煤氣（0003）可以是其中一個選擇。

當我地進行人生財富累積，會運用「先增值，後現金流」。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你可以投資煤氣（這刻股息不多，但有增長），到退休前，才慢慢將股票轉成現金流較強的股票。

不過要提翻，煤氣10送1不是必然的，同時佢10送1後，股價會除淨，自然地跌1成。

我會建議你供盈富（2800）$2000、煤氣$2000，會是較平衡的作法。

2）如果你這刻好想即刻收息，匯豐（0005）是不錯的選擇，不過，這股增長力不強，只是收息股。

而你這年齡，離退休仍有一段時間，其實會著重增值，收息方面，這刻佔較少比例就得。

------------------------------------------------

Q14875：

老師你好，本人現在39歲，想月供股票，大概3-4千一個月，請問5同2800邊隻好？

龔成老師：

盈富（2800）會比較好，因為這是一個50股的組合，有較好的風險分散能力，在平衡角度較好。

另外，匯豐（0005）只是收息股，而盈富仍有基本的增長力，就你的年齡來說，盈富會較為適合。

因為，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

相信每月集中月供盈富，是最適合你的選擇。

------------------------------------------------

Q14876：

老師，想問一問，一直以來都是學習選股買入價。但從來比較少聽到賣既知識，甚至自己都未賣過，應該幾時放呢?

應該定個目標價還是睇情況?最近肺炎，令我好想先放一部分賺緊錢的股票(小米 9.77買入 6000股)。謝謝你！

龔成老師：

首先你要明白財富系統，現金無限量發行，永遠貶值，而我地進行財富累積，其實是一個「現金轉為真財富的過程」，不斷將現金，轉為優質股等真資產。

當持有優質股，就是擁有真財富，長遠不斷升值，點解要賣出，變為貶值的現金？放棄了財富繼續增值？

因此，只要我地持有優質股，就會以長線為大前題，可以只入不出。

當然，不是永遠都唔賣出的，一般在3個情況：

1）該股的質素改變，由原本優質股變成非優質股。

2）這股到了明顯貴的水平，都可以賣出部分或全部。

3）有其他回報更好的投資項目（要十分明顯地高回報），就可以考慮資產轉換。

而你所講的肺炎，只是中短期情況，如果無對企業造成核心性的影響，就不用賣出。

------------------------------------------------

Q14877：

龔成老師，你好。我今年40歲，女，單身，月入3萬，工作很多年了，沒物業，沒投資亦不懂。

如果本金有 120萬，每月可儲 1萬，可以如何財富增值盡快可以有財務自由和有能力供物業呢？謝謝您。

龔成老師：

你現時持有太多現金，要做好配置。

記住，我地理財投資，不是炒賣，是一個財富配置的過程，要做好持有「都是有質素的項目」，作長期分配，在可承受風險的情況下，為你爭取合理的回報。

如果你未有投資經驗，我會先建議你每月做月供股票，利用月供股票去增加股票資產，同時增加你的投資經驗，另外你亦要在這段時間，好好學投資。

你這個年齡情況，財富仍是增長期，不過，就不是進取，而是平穩增值。你可以集中在平穩增值股先。做月供股票，每月$15000。

你可以考慮盈富（2800）$7500。

另外再加3隻（每隻$2500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$15000。

到你半年後，如果已掌握了基本的投資知識，就可以加大金額，又或開始以一手手模式投資資金。但要記住，現金部分，不能用盡，要取平衡。

你經過一段時間，利用股票將財富增長後，就可以再留意物業市場，到時視乎情況決定是否投資物業，但這一步不用急。我希望就算你日，當投資物業時，不會用盡現金，同時能做到股樓平衡持有。

------------------------------------------------

Q14878：

Hello 成哥，我今年26歲，自從上年睇到你的專欄之後開始理財同月供股票，好多謝你既啟蒙。
現在大概有7萬蚊股票，分佈如下：
電能實業 197股
長江基建 207股
長實 144股
香港電訊 1,677股
越秀房託 579股
港鐵 96股
南方A50 293股
中國平安保險 10股
比亞迪 25股
置富產業信託 1,000股

現在月儲一萬蚊，當中5千用來月供股票。預計年中會升職，到時可以月儲萬八蚊，當中萬二蚊可以用來月供股票。

2021年6月打算辭職去英國讀master，請問到時有冇機會儲蓄+月供股票投資滾存到40萬？月供股票方面以下配置可以嗎？請賜教。

5千蚊月供股票：
長江基建 $1000
長實 $1000
中國平安保險 $1000
比亞迪 $1000
南方A50 $1000

萬二蚊月供股票
長江基建 $2000
長實 $2000
中國平安保險 $2000
比亞迪 $2000
南方A50 $2000
盈富基金 $2000

感激不盡

龔成老師：

以現時的情況，如果你要在2021年中前有$40萬，仍要加大少少儲蓄力度。

不過，如果你打算到時動用現金，而現時距離這日期，只有一年半時間，這是一個中線的時期，而我地投資，應該長線。

因為中期的大市情況，可以較波動，就算優質股股價，都無人知到時的情況，但如果是長期，優質股就會向上。

你上述持有的，都是有質素的股票，但如果你一年半後就要資金，反而這刻要增加翻現金，始終你到時先賣出，股價存有不確定性，你要在這裡取平衡。

另外，你持有的股票隻數開始有點多（現時仍可接受），但唔建增加太多，因為這會造成管理困難，你可以增加盈富（2800）佔比，而質素較一般，又或業務類似的，可以小心分析後，集中選較高質的。

------------------------------------------------

Q14879：

你好！我37歲有5000匯豐，沒有蝕，我是否要走？還有10萬流動資金，我該怎分配？

龔成老師：

我地繼續持有一隻股票與否，最重要是企業的質素、前景，買入價、賺蝕數，只是一個心理因素。

匯豐（0005）本質有質素，但賺錢能力比過往減左，增長力減左。現時佢只是一隻收息股，增長力有限，因此，你要視乎自己的投資目標，分析翻，長期持有一隻收息股，是否適合，當中的比例多少較好？

以你的年齡，我會建議你轉一半以上的匯豐，去其他較有增長力的股票，例如盈富（2800），這會對你長遠財富增長較好。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14880：

hi 老師，我今年22歲，每月收入19k 。 計劃5年之後買樓，打算用月供股票投資，請問有冇咩建議呢？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

建議你做月供股票，要自己每月供$5000-$8000。最起碼供$5000。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。