【龔成問答信箱】（Q22041-Q22060）

Q22041：

Hello 龔sir 我係你股票班初班既舊生 最近睇緊12號恒基既年報 有d問題想問下

請問本年度盈利後面點解仲有一個本年度收益總額？唔係好睇得明 除稅及重新分類後之本年度其他全面收益淨額 即係點？

仲有佢既基礎盈利14899係點計出黎呢？我嘗試將公佈盈利10192 加 "投資物業及發展中投資物業之公允價值（減少） / 增加" 2413 都計唔到 14899

聯營同合營公司既盈利需要剔除嗎？

最後就係buffolio顯示既恒基 PE係用基礎盈利定公佈盈利計算呢？我需唔需要加減其他數字去計算正確既PE?

唔好意思 有好多問題

龔成老師︰

這頁"綜合損益及其他全面收益表"，係分析估值時，我都唔會特別去參考。因為佢主要係一些非營運性變動，無太大參考價值。

至於基礎盈利，主要係扣除左"物業公平值變動"，所造成之影響。

你可以參考翻2020年年報P.226，你用"本公司股東應佔盈利"，再加翻所以公平值數字(因為當年公平值，都是負數。若當年公平值係正數，你就要倒轉，扣除翻佢。)，就會計到14899個答案。

水牛網顯示，會係用用"本公司股東應佔盈利"作計算(即包含公平值之影響)。

------------------------------------------------

Q22042：

龔成老師你好！好想同你分享個好消息！我同丈夫成功買到第2層樓啦！難得睇中啱心水地區尺數既低水單位，所以決定賣哂所有股票同埋加按少少層樓俾首期

首先 我好想多謝老師你強調儲資產呢個概念，雖然我啲股票唔係大賺，不過起碼不經不覺已經儲到一筆可以靈活套現既資產，全靠呢筆錢 今次先有機會入市。

不過宜家手上已經冇哂股票 現金亦唔多，要供2層樓亦都令少左現金流去儲股票

再加上黎緊首要目標係可以儲到筆錢裝修新屋，想請問老師我應該如何分配長線同短線既投資方向？

現階段應該全部保留現金用黎裝修？還是繼續以月供方式儲貨？

謝謝老師建議

龔成老師︰

先恭喜你，又成為業主。

我地財富組合除左要有增長力和質素外，平衡性都好重要。你現時資產明顯係偏重於物業類，長線你應集中加回一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

至於先裝修，定投資，你要從生活所需和財富增值，2者之間去取個平衡。

但我建議，點都要每月做番少少月供，唔好完全係零。因為你現時係零股票，而大市又只係合理水平，這個狀態唔理想。

另外，由於你要供2層樓，令每月可投資金額減少。你最好盡快將另一層樓放租，去提升自已可投資現金流，咁會較好。

當然，你現時現金太少，都要留一定的現金先。

------------------------------------------------

Q22043：

老師你好，我又有問題想問。看完"80後千萬富翁"後，有一個疑惑

假設我辭職後，以全職股票投資者創富，之後希望分散投資，買入一間物業，問題就來了：

1.沒有工作，全職股票投資者，可申請按揭嗎？

2.同時，過到壓力測試？

3.成立空殼公司，買入物業是否更好？

龔成老師︰

1) + 2)你可以利用「資產方式」申請按揭，而非一般有收入人士，所用的「壓力測試方式」。

或者你可以加入擔保人，都有機會可以提升你成功申請按揭機會。

但坦白講，無收入要做按揭，一般都會較難。

所以最好在你有穩定收入時，處理好物業這部分，之後先辭工。

3) 成立空殼公司買入物業，係可以節省不少稅項。但空殼公司本身，都有不少營運和買賣成本，例如要會計師每年核數、買賣時需要律師評估資產等。

加上公司買物業要支付「買家印花稅」15%，因此否則未必值得咁做。

------------------------------------------------

Q22044：

1:假設，本金10萬，每月再投入1萬。如果比自己目標係每年升15%,咁應該點計，因為以年計

1月資金可用12個月，但12月資金只用1個月。咁我應該用22萬乘15%,定應該點計好?

2：老師，想請問下，假設如果雙方同意，我冇任何牌照既情況下，可以幫人做投資嗎

3:老師想請問下，假設現在有1百萬資金，用了5年時間儲錢加投資得來，有買樓需求，可選擇用來買樓首期或繼續用股票滾下去，

但如果買左首期後就變左股票果邊滾落去既速度慢左，面對咁既情況應該點做好

4：老師，想問如果抽到居屋，又比左首期買左之後，可唔可以出租？

龔成老師︰

1) 唔好諗到太複雜，我地唔係要一個好精準架數字，因為投資中間會有好多變數，未必一切如你估算一樣。

但係你要知一個大概數字，係有意思，可以作參考架數字。

以你情況，可以簡單點，當你當年每月資金，係年尾一次過投入。咁樣計算，簡單之餘，出來結果都會相對保守。

第1年回報︰22萬 x (1 + 15%)
第2年回報︰(第一年回報 + 12萬) x (1 + 15%)....如此類推

2) 如果是《證券及期貨條例》規管範圍，基本上就要有牌照。如果你只係幫下屋企人手，當然另計。其實，當中好講有無「利益」在其中。

3) 如果你係有實際需要，去置業的話，你係可以動用這筆資金。其實物業都係一個資產，都算係一種投資。

但最好，係你置業之餘，都有一定資金，用投資優質股，令成個組合唔好偏左係物業個邊，咁就最理想。

4) 根據正常程序，係要補左地價，先至可以成間居屋放租。

而且，投資物業放租，在香港現時法例下，是不能以高成數按揭進行的，金管局定明，如果要投資物業收租，最高的按數不能高於5成，高於5成者，只能自住。

當然，這是政府的規定，但坊間的做法，往往是另一回事。但你要明白佢地的做法是犯法的，因此一定有風險，做與唔做，自行決定。

坊間不少投資者，就算高成數揭揭都會照放租，其實你照去地產經紀同你講你想這樣，佢地就明，會照同你做，當然，細節位不便在這裡講太多，有機會你上堂見到面，我分享坊間的做法。

記住，所有事情都會有風險的，這是一個值博率的問題，我只可以話，坊間不少人都會照做。

------------------------------------------------

Q22045：

龔sir，你好!多謝你一直耐心回覆讀者的提問。我都其中一個支持你的讀者，你的著作特別是年報勝經，寫得很好。我亦因此開始學習睇年報。

最近我投資左百度(9888)，現價大約210蚊左右。投資原因主要是看好雲業務同智能駕駛的前景。我相信這兩個範疇能配合中國未來的大方向。

配合本身網上廣告業務收益穩定，有利百度發展新增長點。

百度最大的擔心是競爭者多，在今日「全民製車」的時期，百度的賣點只是研發時間比同業長，比同業更早開始投入研究。講到這裡，就引伸出另一個憂慮，就是巨大的無人駕駛投資能否變現。

我明白股價反映公司價值，同時亦反映了市場的對於公司的期望值。但在這裡，我唔識判斷「市場期望值」這件事。

不知我的看法是否正確，百度目前的市盈率大約9倍左右，應該是屬於健康水平。 未知老師的看法如何? 現價應否再加注?謝謝!

龔成老師︰

多謝你的支持!

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

雲和無人駕駛，都會係有業務當中較有潛力部份。百度的無人駕駛技術，其實唔錯。雖然越早研發，唔代表一定可以越早市場化。

但百度在無人駕駛技術，無論研發和運作，都累積左一定經驗，有助提升佢成功市場化機率。若無人駕駛技術成功市場化，相信會成為集團盈利的新增長點。

由於無人駕駛市場未算成熟，就算有較多競爭者進場，都未必會造成較大影響。加上集團有一定技術，係競爭上相信會有優勢。

這些部份發展雖有潛力，但都存在很多不確定性，我地好難完全掌握將來發展狀況。因此，係估值時，對這些不確定性較高的分部，要保守少少。

百度現時收入，主要來自在線營銷服務。這部份，集團有一定優勢，預期長線發展正面。

百度在規模和質素上係有，但你預佢中短期會較波動，不宜持有太多。若你資金好充裕，要價加小注係可以，否則等較大回調才加注，會比較好。

------------------------------------------------

Q22046：

龔sir你好，我對於股票買賣只是初哥，之前都是有少少人云亦云既心態作買賣。而我丈夫曾經上過你既堂，從他口中得知你的FB page，最近經常睇你既page增加投資概念。想問下你嘅意見。

本人37歲，已婚未有仔女。月入$58K，丈夫月入$20K多少少，收入算穩定，已購入一層自住物業，仲有17年需要供樓。

之前一路只保守地作儲蓄，大約有流動資金$100萬，扣除供樓，生活費同雜費，每月可儲蓄$24K，想可以好好分配同計劃點樣做好投資理財，為將來有小朋友及退休生活作計劃。

之前買入一些收息股票為主。如下：

0005 匯豐 70.5x1200股+46.2x2000股
1398 工商銀行 6.41x 15000股
2800 盈富基金 28.72 x2000股

1. 睇了你的FB page 後想嚐試月供股票，考慮緊每月用一萬蚊月供0002，2318，6823。這些組合適合嗎？

2. 現在持有既股票組合適合繼續長期持有？定放售？

3. 如果買潛力股，你會建議買邊隻？

期待老師的回覆，非常謝謝！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你37歲，應以增值為主。平安(2318)係可以，但其餘2隻只係收息股，增長力較弱，唔係太適合。我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$12000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但我建議，在你實行以上計劃前，先儲起半年開支(若你預將會有小朋友，都要預留埋這部份開支)，作為應急之用，咁會較穏當。

2) 你持股雖然都有質素，但匯控(0005)和工行(1398)都係收息股，你年紀不宜持有太多。建議沽出部份，慢慢換至上述股票，會較好。

3) 我上述潛力股，都適合你，但你投資經驗較淺，要控制個比重，唔好佔多過組合3成。

另外，大部份潛力股現價都略貴。現時只有安碩恒生科技(3067)、ＧＸ中國電車基金（2845）、比亞迪(1211)、阿里（9988）、中生製藥（1177）、福壽園(1448)勉強算在合理區頂部，可分注入貨，其餘想買就要等一等。

------------------------------------------------

Q22047：

龔成老師，你好，最近睇左幾本理財書，當中都有一個對沖概念，但睇返sir的書，或fb的對答，好似都好少呢方面既資訊，是否同你理念唔一樣？

另外我本人都買左d科技股，例如阿里巴巴和小米，都諗住有排都唔放，但又唔想繼續供落去，想供d其他行業的（你話同一產業不是多過30%)，

睇左眼科藥物公司兆科眼科，或者是德視佳，一個造藥一個行醫，你會點睇？

龔成老師︰

我主要係建議透過創建一個合適、平衡、有質素的財富組合，去做到在合理風險下，爭取最大回報。

跟一般對沖，去平衡風險有所不同。而且對沖唔易玩，唔適合一般投資者去操作。

兆科眼科（6622）係一間眼科製藥公司，致力於療法的研究、開發及商業化。通過自主開發或許可引進已建立起包含25種候選藥物的全面眼科藥物管線，涵蓋影響眼前節及眼後節的多數主要眼科適應症。

集團初步將策略重心放在中國五大眼科適應症上，包括乾眼症(DED)、濕性老年黃斑部病變(wAMD)、糖尿病黃斑水腫 (DME)、近視及青光眼。

佢已建立起由13種創新藥及12種仿製藥（按國家藥監局的《藥品註冊管理辦法》分類）組成的眼科藥物管線。創新藥管線包括8種候選藥物，若獲批准則有潛力成為中國市場領先產品。

仿製藥管線包括6種潛在中國首仿藥。集團擁有8項已頒發的中國專利及一項已頒發的歐盟專利，並提交6份中國專利申請。

佢已於廣州市南沙新區建造的生產設施，根據中國、美國 及歐盟cGMP標準設計及興建以用於生產眼科藥物，其生產能力完備並可用於商業化規模生產。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注，當小注投資下好了，同時要明白當中的風險。但用作月供，就不建議了。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，可小注直接買入，但不宜月供。

另外，我地月供係一個長線計劃，最少供3年，並持有5年，才會有較佳效果。因為月供可以拉平均個買入價，減少買貴貨風險。

若你經常供一陣就轉，會影響到平均價格效果，令最終回報不確定性增加。

------------------------------------------------

Q22048：

我想請教一下，你覺得應該怎樣教育兒童理財？因為看過你的文章/書本，你都提及學校缺乏理財教育！謝謝！

（期待可以在澳門上課的澳門讀者）

我兒子8歲，有時會問我供樓借貸，公司借錢，點解麥當勞可以咁成功等等，我自己本身不是商科，所以都係google咁簡單講俾佢知

龔成老師︰

我建議你同佢玩「大富翁」、「現金流」這些遊戲。

如果佢8歲已經有這些問題，我相信佢對這方面好有興趣，好有潛質，日後可以好有成就，你可以找一些成功的名人、商人傳記之類的兒童書比佢睇。

書本和遊戲，都係教授小朋友理財的理想方法。好似大富翁遊戲，小朋友可以從享受遊戲同時，也會學到不少經濟理論和操作模式。

另外，書本可以令佢從前人身上，學到一些經驗。當然，佢年紀比較細，較難理解我們成年人睇架書籍。

最好先選擇佢年紀水平，和他有興趣的書籍入手。之後才慢慢加入一些，未必是他有興趣，但又對他理財知識有幫助的書籍。

家長在遊戲和閱讀時，要多加讚賞，對佢學習會有激勵作用。

如果你本身無太多理財知識，就係教授小朋友同時，自已都要增進一下，甚至一齊學習。可以作親子活動之餘，都可以提升雙方學習的樂趣。

------------------------------------------------

Q22049：

老師：我在重整現時持有的股票組合，由於未到8月上課時候，唯有再麻煩老師，唔好意思。想請教以下幾隻股票是否優質和他們的合理價範圍。謝謝！

405
939
2822

此外，以上三隻股票是否都屬於平穩增長股呢？謝謝！

龔成老師︰

這3隻股票，都係優質，同時現價都在合理區，可以分注入貨。

越秀房產（0405）和建行(0939)係收息股，增長力較弱，主要係收下息。以你年紀，收息不用佔太多，大約2成左右好了。

南方A50（2822）算係平穩增長股至潛力股之間，有一定波動性。此股適合你年紀，可以考慮。

------------------------------------------------

Q22050：

老師你好！我居住在澳門，今年45歲，自住房屋市值約900萬還欠貸款400萬，每月供17000。

另有一間市值約600萬已供滿收租約9000（澳門租金較低）

因疫情上年失業，現新工作每月薪金只有18000再加上9000租金，每月收入共27000，每月供樓保險加上生活開支剛好月月清，另有60萬積蓄想投資股票市場。

現時手頭沒有揸股票，想問應唔應該賣咗收租樓，還清400萬貸款，剩餘200萬用來買平穩收息股？還是只用60萬積極蓄投放股市？

另外想買老師你的書，我是股票初學者，適合先看那一本？

龔成老師︰

其實物業都係一種資產，除非你收租物業升值潛力真係好弱，或者質素好差，否則持有用作收租，咁會較好。

至於增值，你可以先用這60萬去做。由於你已經有2個物業，故你新資金應先集中係優質股類，以免出現過度集中風險。

以你45歲，可以選擇一些「平穩增值股」+「潛力股」作投資目標。

由於你現時無太多投資經驗，潛力股這類風險較高的股票，你就不要持有過多，最多維持1-2成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-4成，到時要視乎你投資經驗多寡，和了解這些股票程度而定。

大市現處於合理水平，那60萬資金，你可以先用20-30萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22051：

龔成老師你好，剛開始月供股票3個月，其中一隻月供2382 平均價179，佢今個月升左好多

我係想長線持有，但遇著咁大升幅，平均價就會拉高 變貴左。心態上係繼續月供 還是停供一個月先？

龔成老師︰

舜宇光學（2382）係有質素和潛力的潛力股，若你係年青至中年人士，月供這隻股票係可以。

現時此股已經偏貴，但由於未到好貴，我地係唔需要停左個月供。短期成本價，係會有被拉高情況，但係月供係一個長線計劃，長遠個價都會拉平衡。

除非佢再升到一個好貴水平，我地可能要減少股款，甚至停供。但大前題係，你有無定平貴的能力。若果無，我建議你不理價值升跌，一直去供。

因為你自行調整供款，如果時機不對，反而大大影響左你平均價格的效果。所以，若你投資經驗較一般，我建議你選好優質股後，唔好理個價，一直供，反而對你最有利。

------------------------------------------------

Q22052：

龔老師你好，我今年31歲，月入二萬五，月存二萬，手持8份儲蓄保險，有啲五年期，有啲十年期，有啲三十年期（大約150萬左右），

有七十萬流動資金，另外有三十萬買咗股票，但坐緊艇包括:

9988（200)$280買入
175 (2000)$31.5買入
1810 （1200）$29.5買入
0066（2000）$38.9買入
1801 （1000）$90.6買入

龔老師我二年後想買樓，想用呢70萬用二年時間滾到100萬，請問有咩建議。麻煩指點迷津

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有股票，都係有質素，長線持有係無問題。但信達生物（1801）仍處於燒銀紙的狀態，不確定性好大，暫時唔建議加注。

我地投資股票，其實等同投資一間企業。希望透過其自然增長，以達至財富增值的目的。所以，我地投資一定要較長時間。而2年只算係一個短時期，股價好易出現波動，增加回報的不確定性。

因此，你這70萬不宜作太高風險投資。我建議用盈富(2800)，再加收息股作為組合。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那70萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

但這個組合增長力，未必足以2年內由70萬滾到100萬。但佢勝在穏定性較高，在只能投資2年的情況下，這個配置會較為穏當。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時持有儲蓄保險，實在係太多。如果佢了一定時間的，你可以保留。但你還很年青，我建議你長線計，應該取消部份，將資金轉至優質股去做增值，會較好。

------------------------------------------------

Q22053：

龔sir，你好！有幾個投資問題想問。

1. 投資黎講，係咪唔應該買保險，或者唔應該買有儲蓄成份保險？

2. 按回報計算，應該買50年樓齡二手樓，還是一手樓？

3. 未來咩房型或者尺數更適合投資？

龔成老師︰

1) 答案係不一定。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

2) 一手樓，好多時都會有一定溢價，變相令你買貴貨，影響長線回報，所以我一直都唔係好建議買一手樓。

至於50年樓齡二手樓，由於已有一定樓齡，除了本身保養成本會較高外。向銀行貨款也較困難，因此投資價值都較一般。

2個選擇，其實都唔係咁理想。除非50年樓係好平，租金回報率又高，而且係一些大型屋苑，才值得考慮。

3) 房型其實無特定，尺寸最好至少有300呎，可以附合到一個家庭的最低限度需要，投資價值會較好。

其實我地投資一間物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

------------------------------------------------

Q22054：

你好 龔sir，Follow左你嘅post都有一段時間 我亦都睇左你嘅著作「財務自由行」「80後2百萬富翁」「股票聖經」「50隻潛力股」最近4月中更參加左你加「投資陪升股課程」剛剛都畢左業

其實我一直都想理財 覺得你講嘅理論好實用及貼地，好有循序漸進嘅思維。

老師你所教嘅方法都係由你經驗所堆積出黎嘅結論 炒股散戶10個有9個都輸 你教嘅長期持有優質股其實先係最快嘅捷徑！

我雖然開始理財或接觸真正理財只有半年多啲 但思維上我確實改變左 而我起碼已每日記帳已維持左大半年 而每月月尾也會檢討 (先發現原來自己成日駛好多無謂錢 !) 多謝阿SIR!

老師 就我個人情況 我有幾大重點想請教 先講我背境

今年34歲 未婚沒有仔女 每年有年終雙糧及花紅 年薪為一百萬多啲

換左樓 樓價700萬多啲 做按揭9成 月供約24k 每月可儲到16k 左右 當中10K放左係月供股票

1. 現金約有450k 放左係買樓是「高息戶口 」約 1.4% PA – 都係聽阿SIR教導 留番D現金當做BACKUP 及緊急用錢 – 見戶口又有少少息 所以暫時放係度

2. 股票約有 450k 全部都係2-3月入
788 - 10000股
823 - 400股
1177 - 4000股
1448 - 2000股
1833 - 400股
1928 – 2800股
1972 - 5600股
3067 - 6000股
3918 – 2000股

3. 月供股票 每月10k – 由本年3月先開始供
00175 – 2k
00700 – 2k
01211 – 2k
02800 – 2k
09988 – 2k

4. 沒有其他兼職及副業

問題：

1. 目標 40歲前有1000萬 以上咁樣執完條數好似都未有咩FEEL 想請教阿SIR有咩建議可達到我目標?

2. 計過月複利息回報 上堂提到10-15% 已叫做好理想 但依個都係參考% 點可以令自己既增長穩定D？見住自己D投資上上落落 我連唔蝕都無信心 應該點好

3. 調整緊股票係6:4 水桶1 vs 水桶2 - 一直都賣咁D 1972 而放入D水桶1度 但見住D水桶1好似都無咩升 無咩信心做到阿SIR講既每年10-15%增長 想請問應該點調整好?

4. 因為我工作時間都叫自由 亦都放星期六, 日 但我問題係真係無咩特別興趣及嗜好 點樣先可以令自己多D興趣 從已令自己多個機會有個副業或兼職 我依家只有打工一份收入 好似好危險咁

5. 自己打算2022年結婚 係緊急用錢度預算300k黎用做結婚 都打算結完就生小朋友 如結左婚及生小朋友 應該點調整以上所有策略?

6. 年年交稅都10幾20萬 好肉赤 有咩方式可以減少 或更好處理方法

最後想問阿sir你係咪真係有開到糖水鋪？哈哈 我要去幫襯一下 ! 謝謝

龔成老師：

我不會公開你的名，不過問題會放上網，等更多人能學習。

1）你現時的理財不差，配置平衡，同時配合你的年齡情況。但如果要去到$1000萬，就要再加努力，因為你現時每月儲到$16000，一年約20萬，就算計及投資回報，以及你現時持有的資產去增值，要滾存到$1000萬都不易。

除非你之後用一些較進取的方法，例如集中投資潛力股，以及自己發掘潛力股，早市場一步找到，投資並得到數倍計的回報，就有機，但這要你付出較多，你要每星期花大量時間去尋找潛力股。

2）我地最重要睇長期回報，目標一年有10%-15%，但不用每年睇，而是睇長期的平均，你已經方向正確，保持進行就得。

只要你多做功課，全面了解企業，以及其增長力，就會好有信心。

3）你要睇長期，你的思維仍停在短期股價。其實你要睇「企業成長及價值」先得。

4）你要多了解自己。如果唔知自己想發展D乜，就「試」，有時試試下，你就會更了解，例如試下做小生意，找一些你平時不會想過做的兼職，唔好浪費左你的時間。

如果無野做，就花多D時間去研究企業，睇年報。

5）最重要是你預留$30萬以上的現金，餘下先投資，由於2022年與現時已接近，因此這$30萬不宜投資。

只要預算要結婚的資金，準備好。餘下資金就算進取少少，都無問題。

6）如果有需要，就開公司，當然你最好問翻會計師佢地的意見，現時公司頭$200萬的盈利，交約8%稅，比高薪打工仔交的稅仲少，你可以上網了解下。

------------------------------------------------

Q22055：

龔成老師你好，我想问下7522只股，当时听朋友介绍买下7522，平均价为3.75买入8万股，这股现在一直向下，我应该怎樣处理，是否应该溝貨，还是走货？请賜教。

这只股會否會跌倒变费纸的

我不憧买股，这段时间看了你的视频，知我买的股亂七八糟，有909、9888 全部虧損。我有一百万來投资，现在用了一半，我应怎樣重新组合，麻煩晒。

龔成老師︰

你先要緊記一個好重要的概念，我地買入一隻股票，一定要知道佢質素、行業前景、財務狀況等，才去投資。

唔好聽朋友講、或者聽消息，就去買貨。如果你連隻股票背後買什麼、公司如何賺錢、行內有什麼優勢、點解未來有發展和增長潛力，都答唔倒自已，咁就要停一停，唔好投資住。

ＦＩ二華夏納一百(7522)投資目標是提供在扣除費用及支出之前，盡量貼近納斯達克100指數每日兩倍反向表現（-2x）的每日投資業績。

如果納斯達克100指數跌1%，你就會獲利2%(另扣管理費)。但若然納斯達克100指數向上，你就會虧損。

我對這類產品有保留，納斯達克100指數在過去一直反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

明源雲(0909)和百度(9888)都係偏向潛力股類型，都係有長線投資價值。若你係年青至中年人士，只要唔係持有過多，可以守。但若佔你佔合較多，最好沽出部份，去平衡一下風險。

若你對投資知識不多，我建議你先用月供去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，餘下50萬和每月儲蓄，就等大跌市機會出現，才大力度掃貨，並長線投資。

若你現時組合，只係得1,2隻股票，我建議你都將部份股票，換碼至上述優質股，令組合風險可以更分散，整個組合也會較健康。

------------------------------------------------

Q22056：

老師，我近期抽到白居二，想購入沙田愉翠苑，為小孩的校網作準備。

問題1. 三房盤唔多，呢期成交量又高，價錢有的癲，三月至今升了12.3% 有的單位價亦企得好硬，心怕而家唔安排，睇定啲遲下連盤都冇！借問一聲，你有何看法？

問題2. 看新聞明年會加息，我究竟用H息口好，定用P息口好呢？

人生第一次 去選擇買樓 這麼重大的決定，真想跟老師分享

有睇中到盤, 但價錢不到位,預700-720萬, 睇中單位為740萬，在想要不要去馬, 怕錯過左, 之後就冇合心意的盤...

老師...求你指引我...

龔成老師︰

1) 本身三房這類大單位，供應係較少，故價格較敏感都係正常。雖然佢近期升左唔少，但由於白居二始終跟市價，有一定拆讓，故有一定吸引力。

加上這個是你自住房，考慮重要主要係是否配合「你長線生活需要」和能否做到「供得起」。如果係無問題，你都可以考慮入市。

2) 明年是否加息，暫時都係一個問號。以現時狀況計，H息會較好。但政府規定，居屋只能用P按，故你其實無得選擇。

------------------------------------------------

Q22057：

老師你好！我係你股票學生，完最後一課，感受到老師的愛心同努力，一星期兩晚3-4小時站立不停講課，課程內容非常豐富，非常感激, 辛苦你了。

另外，想請問之前不懂股票，自己又想穩健及有利息，買了：

恒生銀行 。3500
匯豐銀行。4400。
領展。$2000。（月供）
盈富基金。$3000 （月供）
小米。200
瞬宇光學。300

其實之前買匯豐恒生作收息，其他是認識你後才購入。我知道要減持銀行股，請指教應該怎樣保留。謝謝

龔成老師：

你現時較大的問題，是銀行股較多，你不要再增持這類，你應該溫翻第2堂的筆記，慢慢調整翻一個適合你年齡及風險承受程度的組合。

我會建議你過1年後，經濟好翻D，匯豐（0005）上翻D，減持部分，餘下就慢慢減，直至去到適合你配合配置的比例。

至於恆生（0011），質素比匯豐好，因此留低的比例不較匯豐多。

至於其他選股，其實無問題的，都是一些有質素的股票，你持有無問題。至於月供部分，你可以長期進行。

------------------------------------------------

Q22058：

老師 我抽中白居二 但而家二手樓市都好貴

但唔利用今次機會又怕再抽唔到
你覺得其實買公屋（eg 華貴邨）有你升值潛力？

樓齡29年 - 但好似有地鐵2026年華富有地鐵。

另外一係買私樓 要承擔有機會租唔出時 要俾供費 ，心目中係天水圍wetland seasons bay.

主要都想升值 搵到錢 可以財務自由！

你點睇呢兩個選擇，我知都幾大分別.....

龔成老師：

從自住的角度，你好好運用白居二會較好，公屋在投資角度的價值不及私樓，但從自住角度，其實可以考慮，因為你能以較少的現金流支出，解決了自住方面的問題，你就可以有較大的餘下現金流，去進行其他方面的投資。

華貴邨在地點不差的，港島區始終近中環，但地鐵相信有排先起好。因為佢要拆左華富邨，安頓好原本的居民，之後先用地鐵一整發展，相信要10年時間先落成。

華貴邨在公屋裡，算是有質素的，但不是大升類，只是平穩增長。如果你從自住的角度考慮，不是不可。

------------------------------------------------

Q22059：

龔 Sir，現時持有：

1000 股 9988 @$213
4000 股 1928 @$36.9
120,000 股 728 @$2.58
2000 股 941 @$48.7
30,000 股 3033 @$7.9

請問對此組合有何意見?建議加入金股，車股到組合?

現時買 7299 定2840 會較好?

龔成老師：

你現時持有的股票，基本上都是有質素的，其實問題不大，你持有就得，部分股雖然略有回落，但長線有得守的。

但你長遠，最好建立一個更平衡的組合，同一股票，最好佔組合比例15%以下。

你可以加入ＳＰＤＲ金ＥＴＦ（2840），這是一隻追蹤黃金價格的交易所買賣基金，當金價上升，佢都會上升，當金價跌，佢都會跌。

睇翻佢過往的價格表現，基本上都追蹤到黃金的價值，因此都可以成為投資黃金的工具。

只要佔組合比例不過多就得。

------------------------------------------------

Q22060：

想問，其實如果我長揸6666，唔會會可以上番去呢？

好驚佢會爆煲啊，到時渣都冇

龔成老師︰

若母公司出事，的確有機會出現，母公司要沽出恒大物業(6666)股權套現還債的情況。如果真係出現，的確會令股價受壓。

但你要記住，我地投資係睇長線，和企業本質。恒大物業(6666)負債情況，無母企咁差，加上物管行業，預期未來會發展得唔錯，因此有投資價值。

不過，集團大部份物業，都係來自母公司。故母公司出問題，令發展減慢，有機會會影響到集團發展。

當然，這些都是未知之數。以現時狀況計，恒大物業(6666)都有投資價值。如果你真係較擔心佢前景，你可以沽出部份，去平衡風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17741-Q17760）

Q17741：

老師 巴菲特選股既時候會留意管理者係咪精明能幹 但係我地平常人消息渠道有限

又冇得好似巴菲特咁同佢地親身接觸 咁點先可以更了解間公司管理人員呢

龔成老師：

我地可以利用年報，得到好多資訊。

例如我會睇企業5年的年報，由過往年份開始睇，到較近期。在年報中，我會睇到管理層面對不同的經營環境，怎樣應對，以及結果如果，我一次過睇5年，就可以知道這些資訊。

另外，當中都會見到好多管理層的質素情況，例如滙源果汁（1886），我在多年前有睇過年報，當時企業業務開始轉差，除了市場環境問題，另一個因素我發現是融資成本，因為利息盈利率，當時已去到少過2的水平，已到了危險狀態，但管理層對問題卻完全不提，沒有講解決方法，我認為管理層有問題，因此對這股的質素打折扣。

------------------------------------------------

Q17742：

龔sir, 純分享。本人是今年5月舊生。我好高興已經感染咗身邊幾位朋友上你股票班！兩個正上9月班，另外還有一個報咗11月班！呢位朋友喺我個年代嘅學霸，Harvard畢業！現在係4名小朋友嘅媽媽。

自從我上完你嘅堂，我都一直將學到嘅跟朋友與家人分享。慢慢、慢慢，佢哋都覺得我講嘅嘢有道理（即係你教我哋嘅知識）！所以佢哋決心去上堂。

我亦有希望我父母重組收息股組合。你成日鼓勵我哋，我都想鼓勵下你！你真係好正面、好值得大家去向你學習！好多人都因為你嘅分享而獲益不少。多謝你！希望你繼續加油！

龔成老師：

多謝你的鼓勵，令我更明白自己所做的是正確！

我希望我所教的知識，可以真正幫到人，因為我平時所講的，都是理財，較正統的投資，並不鼓勵炒賣，都是香港人認為無趣味的。因為香港人喜歡炒炒賣賣。

但見到愈來愈多人，學到正確知識，明白正確理財，要做風險管理，不是炒，不是賭，而是建立財富組合，做好配置，我相信我做的是正確！

大家都加油啦！

------------------------------------------------

Q17743：

老師我成日聽人話金價會升，其實點買金？係米有好多種金?我都想買D,點買架？

龔成老師：

金價中短期的走勢，其實好難估的，不過在長遠來說，一定會向上，因為現金只會不斷貶值，因此金一定升，只是多與少的問題。

不過，金由於無現金流，所以又唔值得持有太多。

所以，你可以在財富組合中，持有小量金，長線持有。你可以買實金、金ETF、紙黃金都得。

------------------------------------------------

Q17744：

本人將繼續月供股票。唔會停
1928
2800
1211
388
1299
1038
2388
700

再等機會，在大跌市買入優質股。

龔老師，我還未有價入，未知現在是買入時機？
月供股票已維持二年了

龔成老師：

你所供的都是有質素的股，保持進行就得，中短期股市唔需要理會。你可以保持，長期。

現時大市處合理區，可以一邊投資一邊留現金，而餘下現金的運用，就是等大跌市時出手。

如果你現時現金多，可以分注入少少貨，只要同時留有現金就得。不少舊經濟股都在合理區中下部，有投資價值，至於新經濟類別，則唔算平，如投資最好等下（或保持月供就得）。

------------------------------------------------

Q17745：

想問下之前睇到你話領展跌10% 係平直區。。打算等佢56 先買入。。但依家氣候商舖減租or好多關門。會唔會影響便宜區下降。。應該幾多度買入先好呢？

另外現有15 萬cash..3年如果想去到50 萬。。有冇可能同提議丫。。唔該晒

龔成老師：

領展（0823）有質素的。我地在分析股票時，會考慮長期情況，相信這股中短期一定弱，因為香港的市道差，但在長遠，例如3年後，情況如何？相信點都唔會好似現時情況，因此，當用長線投資分析，就會見到這企業點都有一定的價值。

這股現時在合理區中下部，可以分注投資，長線持有。你分注買入最好，唔好只集中一次過入。

另外，要3年將$15萬增值成$50萬，並不容易。唯一的方法，就是集中投資潛力股，在市場發現該潛力股之前買入，但太集中潛力股會有風險，同時要有較強的分析技巧，你要自己平衡。

------------------------------------------------

Q17746：

老師，最近疫情空閑所以已經讀完幾本老師的作品，令我對理財觀念有所改變，謝謝你。

最近已入手金沙作長遠投資，另外開始每月少量投股 舜宇和港交所。

（因現量好像太高）另有一手地鐵。

老師之前講過港鐵屬於半地產股，但我覺得1113是有長遠發展的企業，請問如果入手的話，地產股比重會唔會太多？

$4X 估值是否已經在便宜區？

龔成老師：

你上述持有的，都是有質素的，港鐵（0066）是半隻地產股，你在設計股票組合時，要睇翻一個行業，會唔會佔組合比例太多，你預去到30%已是上限。

至於長實（1113）正面的，這股現時在合理區中下部，有長線投資價值，不過你預中短期仍會較一般。長遠會平穩發展（但不是高增長類）。

------------------------------------------------

Q17747：

成哥,我想問下有關保險股的問題:

1.根據經濟通顯示,保誠2019年的EV是541億美元,除26億股數後,每股內涵價值=hkd$161.2,對比起現時股價$115.5相差大約$45,是否呢個EV有水份?還是現時股價被低估?

2. 保誠份年報一直以歐洲內含價值顯示EV,是否有所隱瞞實質?EV還是歐洲保險制度與美國保險制度的分別?

3.你會點樣比保險股合適的multiple?

麻煩你

龔成老師：

1）利用內涵價值等方向去分析，是掌握保險企業價值的方法之一，但並不是唯一的方法，同時，你唔能夠單單比較數字就定義為平與貴，要考慮一些調整因素。

因此，這是方向，但並不單是這樣運用的，這方面要解釋會花較長時間。

2）又唔會特別隱瞞，這只是跟翻制度去公布。坦白講我都唔知具體有咩分別。

3）好難三言兩語講，就算進階班，會講少少，但未必深入，這會用質素與增長有關。

------------------------------------------------

Q17748：

龔SIR你好。本人於2019年開始留意龔SIR你既FACEBOOK，並係2019年7月開始月供股票，內容向下：

盈富基金：$4000 （平均價為：$25.46）
媒氣：$2000 （平均價為：$14.09）
港鐵：$2000 （平均價為：$43.23）
友邦：$2000 （平均價為：$75.45）
共$10000。

另外有兩手領展，分別係$66.4 同$59.8 入（平均價為：$63.1）。

（1）龔SIR我問題主要有兩個大方向，首先係月供股票。
由笫二課筆記提及投資5大方法，月供指數（e.g. 盈富基金） 其實係比較得到的回報應該係以上最少。我是否應該減少月供數量，反而利用恆生指數市盈率作參考，以一手手買入盈富基金？

另外由於現時香港因疫情影響，我所月供之股票中短會比較弱。我是否需要調動一定資金月供現時表現較好之新經濟股（e.g. 阿里爸爸/美團/小米）？考慮到時間成本問題，感覺上中短期內既投資應該唔會冇太大回報甚至係負回報。

又或者龔SIR建議應該維持$10000月供再另外搵水桶1既股票月供？請問有冇咩水桶1既股票建議？

（2）笫二個問題係關於我持倉既領展。

考慮到領展既背景同穩建程度，我笫一手領展於$66.4買入，因為上堂知道呢隻股票就算股價受壓都仍然有得守。當佢股價下跌一成時我於$59.8再入一手，現時平均價為$63.1。

想請問龔SIR如果計算下一次買入時機，應該用平均價$63.1下跌一成：$56.8定係用最後買入價$59.8下跌一成：$53.8為參考指標？

最後仍然要多謝龔SIR既FACEBOOK PAGE，多本著作同埋股票班教到我好多野。雖然現時所有股票都係負回報，但我深信龔SIR所教既價值投資終有一日會開花結果。希望疫情快D過去，好期待再上龔SIR堂。

龔成老師：

1）如果你有選股的能力，的確可以減少少盈富（2800），不過，我仍建議組合中有基本的盈富比例，這可以幫助你組合平衡風險。

至於你所講的中短期，其實好難估的，唔好咁樣去捉中短期的模式，總之所有野都以「長期」為前提。

當然，你上述的持股，在長遠的增長，未必及阿里（9988）等股票，所以你組合加翻少少較高增長是可以的（但這不是建基在短期考慮）。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

2）比較好的策略，就是你第二注買入價計算，再跌10%，即是$53。

你唔需要擔心中短期股價，只要我地長線投資，有企業概念，我地會「期待股價下跌」的。

------------------------------------------------

Q17749：

龔老師你好！近年開始follow你的facebook，發現短期的買買賣賣賺取差價並不是致富的方法。再買了你幾本著作，開始使用你教的方法，每月固定月供2800 1211 1928。

投資優質企業作長線投資，也預留資金等待時機。發現投資的心景也放鬆了很多。改變了心態也改變了回報。謝謝你。

但我有一疑問，2008年金融海嘯，美國實行QE，普遍認為樓價受QE所帶動上升。現金貶值。2020年美國更加實行無限量寛。這樣大量印製銀紙。而美金早早就不是金本位。

在聯邦儲備局負債大幅上升情況下。究竟樓價會像2008年一樣大幅上升，還是會因為大量印製銀紙而使市場對美金失去信心？

假設市場對美金失去信心，資產例如股票和樓房會否大跌？到時是否投資黃金進行避險？

因家人想換樓改善生活環境。但想不通樓市之後的去向。求解答 謝謝

龔成老師：

大量印銀紙，現金只會進一步貶值，無論市場對美元有無信心，「資產項」，如優質股，物業，都只會向下。

就算市場對美元有無信心，只是對「現金」無信心，資產本質的價值不改變，例如一層樓，佢就會有租金收入，現金是報價單位，如果極端D，現金已無人用，物業就會產生「租金」，而租金不是現金，而是其他有價值的野。

所以，物業、優質股，本質從本無變過，但現金價格，就會因為大印銀紙，而報價向上。

------------------------------------------------

Q17750：

龔成老師你好，
睇咗你影片教學，獲益良多！
有個人問題想參考你意見！

我今年30歲，儲左30萬當中有10萬流動資金，想投資股票，想睇吓點投資好，自己有玩過股票但次次都平手走人仲蝕咗手續費

但係而家冇收入，又想財富增值下 ！有冇咩方法可以十萬變廿萬咁增長落去

龔成老師：

我相信你之前是中短線投資，這其實無法賺錢的，應該改變你的方式，轉為長線。

我地理財投資，其實是建立一個「長期的組合」，將現金轉為股票，長線持有，當中要優質股，以及平衡配置。

你現時無收入，在投資上要較為保守，大部分要持有現金。部分就持有股票，你可以考慮一些平穩增長股，長線持有，例如盈富（2800）。

另外再加其他：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

到你日後收入正常，以及更多投資知識，就可以加入潛力股在組合。

------------------------------------------------

Q17751：

老師你好，想請教一下點睇6869長飛光纖前景
謝謝

龔成老師：

長飛光纖光纜（6869）長遠的質素仍在，但增長力比過往略有減弱。

全球光纖光纜市場，仍會保持向上，智能手機、互聯網、大數據等科技，成為了行業的推動力，但由於本身的賺錢能力略減，令長遠增長都受影響。

長飛光纖之前受惠三家國有電訊營運商發展網絡基礎，所以生意算是不差，但這亦令這公司出現風險。市場競爭有所加劇，佢的賺錢能力有可能略有減弱。

整體上，質素仍在，但增長與賺錢能力就有就減弱，現價合理。

------------------------------------------------

Q17752：

龔老師你好，一直有參考龔老師的選股方法，半年前買入1211 BYD 採取長久持有風針，賺了不少，感激不盡。想幫家人問問一些投資問題:

家人已達退休之年，退休前買入匯豐旨在有穩定息派，大概$58-$70都有入，30000股左右，平均價$64. 持有已經數年

一向知道龔老師不建議買入匯豐，現時股價已跌了不少，又沒有息派，究竟應該止蝕賣出換其他股，還是應該繼續持有？希望龔老師可給予一些意見

龔成老師：

比亞迪（1211）你能把握機會，太好了！

匯豐（0005）的賺錢能力有所向下，雖然不是全無質素，但長遠增長力不強。暫時只能當是收息股，唔好對股價有太大期望。

如果佢地持有匯豐的佔比太多，建議轉其他收息股，同樣有收息效果，但組合就能較平衡。

可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

佢地可以現時轉，又或等經濟好翻少少，匯豐上翻少少先轉。

------------------------------------------------

Q17753：

老師，我想問我之前買1717澳優16.76入咗一萬股同埋16.26入咗5000股，仲有7500南方恆指7.44入咗10000

阿里巴巴256.2入咗400股，而家全部扎住咗喺度，咁我應該點樣部署，1717會唔會升返

同埋最近有留意呢啲股票，我係最近先睇你嗰個Facebook，先知道原來長期會增值，咁就想問吓如果月供股票係邊啲好啲
一個月可以用5000

仲有啱啱$366入咗港交所500股

龔成老師：

澳優（1717）雖然有長線持有價值，但之前在合理區頂，最近因盈利比市場預期弱令股價下跌，現時在合理區。這股可以守的，但中短期較弱，要長線，暫時守住先，同時唔好心急加注，單一股唔好持有太多。

至於ＦＩ二南方恒指（7500），這類反向工具，好難玩，唔建議投資。

阿里（9988）有質素的、港交所（0388），可長線。

其實你選股都無問題，但買入價就有問題，好多時在貴的價位買入，同時無用分注等策略去有效將買入價平均。

我會比較建議你用月供股票，作為長期累積財富的方法，每月供$5000。

你可以考慮盈富（2800）$2000。

另外再加2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17754：

龔SIR你好, 有關溝貨同分段入市概念問題, 想問問要定義投資者是溝貨還是分段入市是否要看該投資者之本金金額而決定?

假設投資者A本金$30000, 於股票A $10時投資$30000買入, 其後當股票A跌至$6時再另外投資$30000買入股票A,

就以此例來說, 是否投資者A此舉則為溝貨, 但如果投資者A本金$90000, 分別於股票A三個不同價位各投資$30000, 是否此舉則為分段入市, 謝謝

龔成老師：

對，你的理解正確。

最重要是投資者本身的策略，本金的設定，這會涉及風險。

我地投資，就是建立一個長期的組合，配置是重點，每隻股的比例都不能太多，要有策略，同時明白買入價不是影響的關鍵。

------------------------------------------------

Q17755：

老師你好 我23歲啱啱出黎做野 月入20k 兩年後過30k 而家計畫開始月供

2800： $3000
0066: $1000
823： $1000

請問呢個組合可以嗎？

另外想問吓其實投資組合係咪唔好有太多股票 而係集中幾隻？

個人希望30歲前可以儲到100萬 靠月供股票做唔做到？
感謝老師

龔成老師：

組合可以有5-10隻股票，如果股票隻數太多，每隻比例好少，同時管理及分析困難（因為投資者應該持續分析），如果股票隻數太少，會有集中風險。

你上述的股票，都是有質素的，月供可以進行。

你單靠上述月供，未必能做到30歲$100萬，最好你同時每月儲到現金，$3000較好。並利用這些現金，等機會投資股票，這樣會增加你組合的增長力。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17756：

老師你好，希望得到你嘅意見

本人30歲，兩公婆每月可儲$15000，有自住樓，流動儲蓄40萬，另有股票如下：

1. 939 2200 shares @ $6.42
2. 1337 1000 shares @ $3.88
3. 3396 200 shares @ $43.98
4. 003 2401 shares @ &14.93
5. 66 224 shares @ $44.22
6. 1211 669 shares @ $45.65
7. 2800 1307 shares @ $27.34

#1 好早買落、#4-7 係月供股，因有突發事件暫時停供

1. 我嘅投資組合係咪太雜，請問有無咩建議?

2. 若我繼續月供計劃，以 盈富及聯想集團 (992) 各供$2000 會否太單一?

3. 我地暫時都將錢儲落 mortgage link account, 請問股票與現金嘅分佈應該點分配? 謝謝

龔成老師：

1）唔算雜。不過你30歲，財富應該處於增值階段。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，建行（0939）、煤氣（0003）未必太適合你投資，而聯想控股（3396）增長力也只是一般。

2）你可以供盈富（2800），聯想集團（0992）就只是一般。月供股票單一無問題，但整個組合都要建立得平衡少少。

3）以現時的市況及你的情況，持有3-5成現金可以。

------------------------------------------------

Q17757：

請問您點睇1873呢隻股票?

龔成老師：

維亞生物（1873）主要就臨床前藥物開發提供基於結構的藥物發現服務，服務包括：基因到蛋白質（Ｇ２Ｐ）及基因到結構（Ｇ２Ｓ）、先導化合物發現引擎、靶向膜蛋白發現、藥物化學等。

這些類別，都是有發展力的項目，加上佢的生意與盈利有實質增長，本身質素都有的。不過，估值是最大的問題。

股價上升過多，現價已有點貴，就算有發展，但現價已過度反映，你投資值博率都唔會高。這股要小注風險，等回落先考慮，同時唔建議太大注。

------------------------------------------------

Q17758：

龔sir你好我是你的學生， 我想講下我的情況， 因為我本身都有一些資金加上屋企人的資助本身想買私樓， 但係現在的樓價都差不多五百萬至600萬

我覺得每個月的供樓負擔都很重， 所以想轉投資的士， 因為我屋企人本身都已經有一架供完的， 我諗住如果買到的話都是抽居屋或者白居易

其餘的資金拎嚟投資股票， 你覺得這個方法可行嗎有什麼好的提議thanks so much

龔成老師：

投資物業，自己的負擔情況是重要考慮，要堅守「供得起」原則。

如果你長遠有置業的需要，建議你可以考慮細價樓，只要你能夠負擔，都可以考慮的，例如$400萬。

至於的士牌，都是一個投資工具，但你都要明白當中有風險，例如疫情會令佢可能無法出租，又或租金減少，你就要用自己的資金去供款。

的士牌的投資價值，比過往年代弱左，因為市場多左競爭，不過，在正常的經營情況，可以視為收息類工具，但就唔好對增長方面有好太期望。

如果疫情令牌價下跌，你買到平價位，都可以考慮的。

------------------------------------------------

Q17759：

請教如何將自己既廿萬短時間內翻倍，係咪要借錢炒，如果唔係就有排？

發覺就咁買股票增長太慢
就算投資正確都因為本細賺得唔多

龔成老師：

借錢炒股是高風險的行為，贏會贏多D，但輸都會輸得好盡，除非大恐慌市出現，否則，唔建議用這些方法。

另外，你可以考慮投資潛力股，只要你小心選有質素的，同時市場未發現的，投資就可以有高回報。

明白你想財富有高增長，好多散戶都有這心態，但結果往往是輸返轉頭。所以要理性去投資。

------------------------------------------------

Q17760：

龔老師你好，多謝你之前寶貴的意見

我終於踏出了第一步，買了股票，也在之前三月下跌的時候, 用手頭上的現金入了一些。正如你經常在Facebook所講，股票有跌有升，大部份的都至少能保本，有些甚至倍升。令我初嘗投資的滋味。

現在很流行在英國買樓，我身邊有幾位同事都正在物色物業。

加上現時英國推出500,000英鎊樓下免印花稅，和美元有貶值趨勢，請問你認為這是合適的時候進場嗎？

我自己本身在香港沒有樓宇，但老公有一層收租物業和住在奶奶的自置物業。請你給我一些意見。謝謝你一直以來的指教。

龔成老師：

我無特別研究外國樓，但初步分析，英國樓現價應該唔貴，是可以投資的。英磅現時唔貴，加上英國經濟現時唔好，這都會出現中短期不利，但只要長線，其實又唔需要太擔心，反而提供了投資值博率。

不過，你一定要做足功課，對當地的樓市及租務市場，都要有一定的了解，才可以進行。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16901-Q16920）

Q16901：

老師，欣賞你的包容性，我好介意人哋的惡意批評。明白老師不會理會，超級自信，我要努力學習。有則改之，無則加勉。

龔成老師：

我地做人，最重要是做好自己，你不是為了「討好別人而生存的」，你是為了自己，如果我要不斷遷就別人而改變自己，我會浪費左好多時間。

------------------------------------------------

Q16902：

你好想請教你：我想設立一個3年計月供股票方式去累積小米，中國鐵㙮及盈富基金，每月6000各2000元，執行36期

我預期經濟將會見底回升，香港股巿將會有大量大型國內公司加入而推高恆指，小米及中國鐵㙮在認知中屬於高增長股及本身經營得也不錯

請問這3隻股票適合累積嗎？

三年之後在按情況調整䇿略⋯⋯ 本人47歲，想在65歲時退休，每月可用6000元買股票，希望到65歲時有400萬元作退休之用。多謝指教

龔成老師：

你可以月供盈富（2800）及中國鐵塔（0788），都是有質素的，你月供可以。只要你同時留到一定的現金，金額是無問題的。

不過，無人知經濟之後的情況，現時變數仍多，較難講將會回升。但只要你進行長期月供，就無問題，不過，你預可能供較長時間，會有較好的效果。

至於小米（1810），都是有質素的，可以投資，現價合理。長遠有發展能力。

你47歲，應該平穩增值，你上述所講的策略可以，不過，3年未必有明顯效果，可能定在5年或更長時間，先調整，會比較好。

------------------------------------------------

Q16903：

老師，上完你的堂，真心多謝你的教導，自問自己未能完全掌握，但的確增進不少股票基本知識，這已是達到自己初始所願。

本來只係想增值一點自己，未有雄心要有幾叻投資理財，
但上咗課後令我有興趣再學多啲⋯⋯

Last 一堂尾聲，聽到你分享自己過去點滴，聽到你尌勵年輕人珍惜前輩打拼下來的香港，那一刻我真係好深感受。

多謝你亦希望你繼續努力！

我深信人的一言一行會對他人一生有著不少影響，所以縱使一班近百人，那怕只有半數或更少人聽得入耳， 那一少點若觸動人心，影響深遠⋯⋯

我準備好報進階班，不過相距幾月，怕會忘記今日所學，自問今次只掌握五/六成，擔心到時跟唔到老師節奏

努力
要改口唔叫老師，叫師傅

龔成老師：

我希望課程比大家，唔單止係知識，而是一總力量，這總力量會令你不斷進步，無論是投資方法，還是成功方面。

課程是投資股票最基本要掌握的，每個人的程度不同，所以掌握度不同，你要多溫翻課堂筆記，同時自行分析下股票，同評估表，整個課程可以用成世的，你要好好運用。

希望遲D在進階班見到你，加油！

------------------------------------------------

Q16904：

龔成老師，我長線和短線的投資都會做， 在剛一開始的時候賺錢都很順利， 每次買入完都固定股價上升， 雖然沒有讚到很多錢， 但卻從來沒有蝕過太多， 漸漸地自己開始變得焦急， 碰了釘

慢慢學會看一些長線的美股和港股來投資， 最近的港股又再一次碰了釘， 而買下的長線股票， 亦一次一次地股價下挫， 其實原本我只是想自己多賺一些學費 ， 卻沒想過挫折連連，到底我應該怎樣如何調適自己的心情？

我29歲，欲於幾年內到海外升學

問題2﹕另外, 我曾於約10年前, 聽從AI_基金經理購入一投資基金, 但朋友當時無說明得太詳細, 就大安旨意購入了, 每個月供2000港元左右

後來知道原來要供30年才能完整取走所有資金, 現在想全部取回,需蝕至少六萬元. 我該忍痛離場, 還是真的乖乖供30年？

龔成老師

1）投資要經過學習，但你都要保持進步，你要睇翻，那些投資者，能長期賺大錢，甚至成為全球的有錢人，就是巴菲特，而佢的方法，就是價值投資法，是很值得我地學習的。

你之後要集中長線投資，買優質股，慢慢就會真正賺錢。

你唔好理中短期股價，要著重企業。

其實，你之前無正確的投資知識，出現虧損是正常，只要之後學懂正確的投資知識就得。

2）你不如了解翻，這6年的回報如何，先不要該提早取回會否蝕錢，你要先比較翻，這基金的回報，比起一般的投資市場，港股、美股，回報怎樣，較好還是較差。

如果暇顯比較差，那就未必值得投資，再投入更多資金只是浪費，不如停左佢。

------------------------------------------------

Q16905：

龔先生您好，有問題請教你，本人想離開香港，但資金問題只能移民台灣或馬來西亞！

本人想在這年退休，用多一點時間左啲去管理好我的資產預備我移民！但本人因之前非常辛苦勞碌工作所賺嘅係血汗錢所以不敢亂花錢！

過往投資都是聽收音機買邊隻股票最後結果都係蝕本收場，所以一直以定期為主，現在想請教龔先生，因為近日好多人說港幣脫離掛鉤美元所以好多人轉返美金但美金定期利息係沒有嘅！

而我主要做定係賺取微博嘅利息！若我轉美金就不會有利息！

當然我也留意你嘅介紹買股票....我都有入咗一些股票如823但係好不幸一入就下跌，我是67.5入，及AIA是69入，所以我真係好擔心我是否不適合投資股票！因我決定退休這筆血汗錢不容有失

我若離開香港，我一定要好好管理我的財富增值，產生收入才能給予我收入去移民去另外一個地方。

我現在持有一些真係好垃圾的股票！由於一直冇時間這些股票持有超過10年所以全蝕本因高位都冇放！匯豐更不在話下！但不忍心做唔到換馬

我有5000股匯豐，以下只是兩三手
中海洋石油
823，
2628
中媒能源
中銀香港

港幣6百萬做stupid 定期！
龔成先生可唔可以教我應該點樣理財，真係想令我可安

龔成老師：

我相信你這刻，要建立一個收息的資產組合，當中有不同類別資產，產生平衡作用，同時當中都是穩健，著重現金流的。

當然，你不能期望組合有太大的增長力。

收息股只是其中之一，不是唯一。

你股票部分太過集中在匯豐（0005），這股不要再增持，同時不要加中銀香港（2388），否則銀行股會太過集中。

至於中煤能源（1898）、中人壽（2628），由於你追求股價穩定，因此未必是最好，你等佢股價上翻後賣出。而領展（0823），持有無問題。

至於你之後的策略，會著重現金流，低風險，你可以將這些現金，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）置富（0778）、陽光（0435）、深高速（0548）等，都可以。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q16906：

你好呀 龔成老師 我今年23歲 岩岩出社會做野。月薪萬3，積蓄接近0 ，大概2萬幾$$。 我想問我有冇可能30歲前 儲到100萬呀orz

因為我希望到三十歲既時候儲到一筆資金備用，但我而家每月儲緊5000-6000 好似冇咩可能。我問緊有股票經驗既同事，又睇過你既分析

我好唔好而家拎錢去買 2800盈富？但最近香港變化多端，股價變動大，我唔知落唔落手買好。多謝老師您既指示，辛苦了

龔成老師：

如果要錢搵錢，首先，你要有本金，你無本金之後就唔會有更多錢。

所以，你要盡力儲蓄。在這年齡，盡你最大的努力。

因為你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

如果你想令財富有更明顯增長，就要投資潛力股，但這要求你知識，所以，你要盡力學知識。

我會建議你這刻，集中供盈富（2800）先，長期進行，但同時，要努力學知識，餘下資錢投資潛力股，穩中求勝。現時已可以開始供盈富。

另外，你23歲，要多為自己的長遠事業發展想想，這刻這收入無問題，但長遠，你要想方法提升，唔好永遠只留在這地步。

------------------------------------------------

Q16907：

你本新書，點解無左883，我以前問你883，你都話有投資價值，係唔係他股價好波動，所以剔出在，他係恒子乘份股之一883，謝謝你先

龔成老師：

中海油（0883）的質素仍在，不過，始終只是商品企業，產品沒有差異性，只能賺取合理的利潤，不算是最高質的類別。

這是由於石油是商品，當中沒有差異性，佢要將石油賣出，只能跟國際油價，這令佢地處於被動狀態，沒有價格自主的能力，這令佢的獨特性有限。這類商品企業，都可投資，但就要明白不是最高質的企業。

因此，佢會比較受油價影響，自主能力不強，油價長期仍會向上，而中短期可以較波動。長遠增長力只屬中等。

加上現時很多國家仍投資在新能源，油價長遠的增長力，已不及從前。所以最後在新書中，刪去了這股，但不是無質素。

------------------------------------------------

Q16908：

成哥，我玩學人玩美股又損手，没有了10萬，現只持有15萬現金，我應該等2萬點再入市，定開始月供？恒生月供嗎？

龔成老師：

要睇翻你現時的組合情況，如果你股票較多，現金不多，現金就不要動用。相反，如果已無乜股票，就可入翻D港股，分注投資就得。

我地投資，最緊要是建立一個長期的配置組合，如果你這刻不多貨，現時開始月供已可以，無人知能否見到20000點。

恆生（0011）可以是其中一個值得月得的股票，盈富（2800）都可以。

大市波動，要一邊月供，同時留有現金。

------------------------------------------------

Q16909：

老師，想問下你我疫情前買2018瑞聲@64.4，我好擔心佢番唔到去。

你建唔建議我沽出，然後轉為持有其他股份會比較快小小番家鄉?

例如1717澳優/1810小米/2342京信通信，咁樣好似會快小小.

龔成老師：

瑞聲科技（2018）本質不差的，但全球經濟因疫情出現轉弱，當然會對佢有影響，不過，這企業長遠仍是不差的，你可以守，只要你持貨不過多，守是無問題。

不過，就要耐心點。

如果將部分資金轉，你可以考慮小米（1810），這股發展不差的，有增長力，現價合理。如果你擔心瑞聲，就轉部分去小米。

------------------------------------------------

Q16910：

龔Sir 你好, 你點睇大新銀行 (2356)
另外多謝你呀, 股票班教左我好多野

龔成老師：

大新銀行（2356）賺錢能力有轉弱的情況，不過從整體質素分析，又不是好差，投資價值是有的，但你就預佢無乜增長能力，以收息為主。

如果你投資目標偏向收息，這股都可以考慮，但不能太集中在銀行股。

課程比到你好多投資要識的知識，但部分只是基礎，你仍要保持溫書、睇年報、用評估表，要保持進步及練習，加油！

------------------------------------------------

Q16911：

老師你好，有問題想請教你一下，我現持823平均買入價69.25

我知道要長線投資，但說實話還是有點慌，823佔投資組合約50%，我現應增持還是繼續持有。

現金約有40-50%

龔成老師：

領展（0823）有質素，無問題，中短期事情不用太理會，集中長線的企業價值就得。

不過，你單一股票持有50%，這就有問題，任何股票，都不應持有太多。你要慢慢減持這股，賣出一半以上，將資金投資其他股票，建立一個更平衡的組合。

------------------------------------------------

Q16912：

老師你好！本人三十歲，有穩定職業，月入五萬，除供樓外打算每月用二萬買月供股價，但投資經驗尚淺

打算:
六千2800
四千 823
四千 003
三千 1928
三千 1211

如果時期合適都會另外買入，但想老師你評價下小弟的月供組合，謝謝！

龔成老師：

如果你無乜投資經驗，月供股票是一個很好的做法，適合你。

上連你所選的，都是有質素的股票，分配的金額適合。只要長期進行就得。月供的重點，就是不要理中短期股價，保持長線投資。

但要留意，你每月最好都有現金剩，當大市出現大型的下跌時，可以同時把握機會。

------------------------------------------------

Q16913：

龔老師：

1. 老師我聽從你教導，每月約$24000月供2800、0066、0823、1038、0003、0388，每隻月供$4000。請問現在市場不隱，是否月供金額不變呢？

2. 我另外持有0005，約$58買入。另外0215，約$3.15買入，請問這2隻股票應該怎樣部署？

謝謝

龔成老師：

1）只要你每月能保持一定的現金，即是「一邊月供股票，一邊留有現金」，這樣就無問題。你上述所月供的，都是有優勢及穩健的，可以保持進行。

市況波動，有危有機，因此最重要是有一定的現金。

2）這兩股，賺錢能力都有所減弱，唔好加注，暫時收息先，長期進行，唔好對股價有太大期望。只要你持貨不過多，持有無問題的。

如果你想增長力增強，就要等這兩股升翻D後，轉其他股。

------------------------------------------------

Q16914：

您好龔成老師
我現時有多個錯誤投資
想請教一下老師可以怎樣修補

763 23.3 買入1000股
823 69.3買入300股
5 39.5 買入1600股
175 12.3 買入4000股
2628 15 買入4000股

這些股都很難平手離場
所以想請教下可以怎樣離場或者溝淡

現在是時候趁低吸納嗎
我以上的股票長遠來說是不是沒有什麼希望
謝謝

龔成老師：

唔好因為想「拉低平均價」而溝貨。

最重要是睇翻企業的基本面，有無質素，如果質素一般，就唔好加注，再投入新資金只會拉低你總財富的回報率。

中興通訊（0763）不是無質素，但業務有風險，股價上落較大，不宜太大注。

領展（0823）有質素，可長期持有，你加注都無問題。

匯豐（0005）只是收息股，增長力不強，不宜持有太多，你保持持有的狀態可以。

吉利（0175）有質素，可持有。

中人壽（2628），賺錢能力比過往年代略減，持有都可以，但不要預期增長力好強。

如果你這刻有資金，應該從「總財富回報」去考慮，而不是「過往的賺蝕價」，要分析那些股票將來的發展較強，如無信心選股，就盈富（2800）。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16915：

龔Sir您好！本人最近才開始留意您的頻道和FB，很遺憾咁遲先留意到，因為本人就是把錢放銀行、不會投資分配的那類人。

本人35歲、有2個小孩，月入3萬元，每個月平均約儲到1萬元，現金約30萬。除了人壽、危疾的保險外，本人和2個小孩各有一份儲蓄保險，每年保費約6萬(A保險公司)。

大半年前，本人開始了兩項定存：
1.A保險公司10萬定存，需存放10年或以上才有較合理的回報。

2.銀行50萬定存、並用50萬定存的利息去買了份儲蓄保險計劃（B保險公司），每年需供9千多（每年利息可支付7千），需供10年，約莫12年取出才不致於虧本，但利潤微薄。而最近B保險公司財務屢傳狀況。因此，本人計劃作出以下調整，希望閣下能給予建議：

1. 取消B保險公司的儲蓄計劃（虧損約9千多元）；
2. 調整銀行定存至30萬。用20萬分注買入股票，計劃一手手買，考慮香港電訊/工銀/建行+小米/阿里巴巴+港交所
3. 現金流30萬中，撥10萬分注買盈富+福壽園
4. 每月收入中，撥放部分於上述股票（視價位一手手買入）

感謝龔Sir抽時間閱讀此信，敬期閣下能給予本人意見，謝謝！

龔成老師：

你之前的確太過著重防守。

我地理財，應該攻守兼備，適當的防守性工具，是需要的，但同時，你應該有部分資金進攻，取平衡。

1）暫時睇，唔需要取消，始終這類產品在理財中不是無作用，但之後的策略，會投入較多資金作增值。

2）這方向可以。

至於買入的股票，你可以投資較有增長力的，而不要太多收息股，小米（1810）、阿里巴巴（9988）、盈富（2800）都可以，你可以加翻少少地產股，這刻有投資值博率，只外，港交所（0388）等回落翻多D先加。

3）可以的，但褔壽園（1448）就要控制金額。

4）可以的，但最重要是同時留有現金。現金都是好重要的，太進取一次過用盡，並不是好事。

------------------------------------------------

Q16916：

你好老師，一直follow了你這麼久，真覺得你心態很強。希望你能指點一下。

因為本身係做金融業的，但發覺收入和付出的努力不成正比，而且是做又36，唔做又36，好想衝出呢個情況，我知道跳出comfort zone先可以成功。

所以想轉做金融營銷行業，例如股票，保險等。

老師對這兩個行業有何看法？因為之前都做過銀行客戶經理，可能因為自己心態唔夠強，成日覺得自己做到好cheap,求人買單meet target. 但我知道事實可以唔係咁的，係真正可以帶俾人價值的，我唔想做一個死sales.

龔成老師：

金融這一行，仍是有發展的，但競爭的確大左，同埋未必有過往年代咁好賺。

如果你自問性格外向，鬥心強，這行你可以立足的，只要你有信心就得。

如果你有心發展，除左用傳統的方法，最重要是創造價值，你不是賣產品，而是幫人解決問題，幫人提升財富增長，「你的價值」是關鍵。其實我都是這類情況，我提供書及課程，但我一定要有信心，讀者睇完我的書，知識有幫助，上完我的堂，財富有增長。你有價值，自然有人走向你度。

成唔成功，要睇你有幾大決心。這行並不易，但賺到錢的人，都大有人在。

------------------------------------------------

Q16917：

龔sir你好。想請教你一些問題

本人33歲，我有一層收租樓（銀行估價約700萬，尚欠銀行約320萬），香港而家咁嘅局勢我應該放左佢換美金保障自己嗎？

但現在全世界正在放水印錢，放左之後又應該點樣做法可以穩陣咁令錢不比蠶食呢？煩請指教

龔成老師：

香港的不確定性的確增加左，不過，香港始終有當中的價值所在，因此又唔需要太過擔心。

加上香港物業市場供不應求，美國不斷印銀紙，香港樓長期仍向上。但中短期，有可能由於香港經濟轉弱，而出現下跌，但相信不會太多。

如果你真的擔心，現時都可以賣出物業，轉為外國樓或外國股票，都是可以的。

------------------------------------------------

Q16918：

龔成老師您好，有啲問題想問下您。感謝你抽空回答。

1. 我想問年報可以去邊度申請實體版？因為我比較鍾意實體書可以寫下筆記highlight下咁

2. 我一直唔明例如我投資一隻優質既穩健收息股，本金10萬，然後假設回報率20%，姐係一年佢比返2萬蚊我咁樣？咁我用10萬換2萬一年咪好唔抵？定我邏輯有問題？

3. 對於「先增值，後現金流」呢個概念我都仲係唔太明白，先增值意思係咪即年輕人首先唔好追求可以得到幾多現金先，先追求資產增值，然後到中老年先睇下可以得到幾多咁樣？

4. 想報你既班，唔知新手上邊啲班會好啲呢？
感謝你回答小妹的愚蠢問題

啱啱開始學外匯同股票

龔成老師：

1）如果你要有實體版，你要做股東先得，例如想收長和（0001）年報，就要持有長和股票，然後你要預早同銀行或證券行講，話要收實體年報先有。

另外，你可以到圖書館借，但不比帶走，我20年前都是去銅鑼灣中央圖書館睇的。

2）如果佢每年派20%，這是一個好高回報。

假設佢每年能派出20%，這是一個持續的概念，即是佢每年都會派一定的股息，你有「持續」的收息。

3）例如年輕時，先將$100萬增值至$1000萬，到年長時，就利用$1000萬，建立一個平衡配置，低風險，著重現金流。例如每月有$50000現金流。

其實無論年輕定年長，都會建立平衡組合，投資不同工具但年輕時就會較進取，年長就重「保本」。

4）【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q16919：

龔成你好啊！我係最近follow 你既朋友
你既觀念同“智慧型股票投資者”依本書好似

疑問你點解好似無咩講過航空股？好有興趣想知你睇法 例如南方 東方等等
謝謝

龔成老師：

對，因為我作運用的，就是「價值投資法」，即是巴菲特師父，該書作者作創立的投資方法，而這方法是全球最賺錢的投資方法。

航空企業的賺錢能力唔強，加上風險高，因為好受油價、對沖等因素影響，你可以睇下國泰（0293）就明，盈利上落太大。

至於東航（0670）、南航（1055），同樣有類似情況，企業長期價值增長有限，行業有風險。因此寧願找其他類型股票。

------------------------------------------------

Q16920：

龔成老師你好。想問下只吉利有11手平均19蚊，10元時想溝貨，但最後都無，想問下我現在應該點做好？

龔成老師：

吉利（0175）是有質素的股票，不過，中短期會較一般，要長線先得。

至於是否加注，要睇翻這股佔你組合的比例，以及你持有現金的情況。如果這股已佔了一定的數量，就唔好再加，否則有集中風險。

簡單來講，唔好比過往的買入價限死左自己，要睇翻財富與組合的比例。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。