【龔成問答信箱】（Q21541-Q21560）

Q21541：

阿sir，剛剛重溫你第五堂既野，去計0066企業價值，唔知計得啱啱啱

咁我就用左2012-2020年既數據既 咁由細到大排左市盈率再揀左中間5年既就係13.18-17.56，

咁由於2020年港鐵因為物業估值嘅關係導致佢每股盈利得出負數，咁我就用2019年嘅每估盈利為1.94，

乘返市盈率再俾上下10%緩衝得出就係24.09-37.47。請問方向正確嗎？

謝謝阿sir

龔成老師︰

你成個功課，方向大致都正確。但因為港鐵(0066)較為特別，所以係你答案之上，會有些調整。

首先，每股盈利部份，由於集團收入係包括一些物業重估，所以你見佢過往多年，個數字都唔太穏定，有上有落。因此，我建議你用6年平均去計，會較理想(不計2020年負數)。

另外，市盈率方面，由於每股盈利包含了物業重估部份，令企業價值被高估左，實際PE應該係無咁低(如果你記得計算PE的公式，就會明白我意思，可參考第5堂, SLIDE3)。

因此，PE個合理範圍，我地都會調高少少，去反映這個物業重估，所帶來高估每股盈利的影響。

其實最正統的方法，要每一年的盈利扣除翻物業重估，以這個作基礎調整市盈率數據。

每股盈利︰HKD2.34，合理PE大約上調15%，即15 - 20倍。

合理價格︰HKD35.1 - 46.8

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。你預佢現時估值，是合理區中上位置。

------------------------------------------------

Q21542：

你好，龔Sir。 我剛報了股票班，希望踏出第一步，去增加智識。現想請問 MPF 組合問題。

我現時39歲，睇返MPF滾存至今，只有30萬，以往未有理會，但至從看你的fb, 令我有所改變，MPF也是一種投資，不能輕視。

曾經睇過一片文章，MPF要按年齡去增加債券比列，不知以下改變，是否適合。

我39歲，單身。 MPF經理：銀聯BCT

現有資產基金組合：
4月開始轉了30%環球股票, 40%大中華股票, 30%環球債券

將來供款投資組合：
4月開始轉了 3.49%中國及香港股票, 40.75%大中華股票, 27.88%環球股票, 27.88%環球債券

十分感謝回覆。

龔成老師︰

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

當然，你想分散風險，加入一些大中華股票或環球股票，係可以。

但環球債券增長力不高，除非你投資取態好保守，否則以39歲年紀計，就唔係咁適合。

股票班見!

------------------------------------------------

Q21543：

老師，想問金界合理區正確嘛？另外，老師覺得幾多先算便？值得入？我用上堂教的方法，計到佢合理價為$8-$10。

我而家有現金30萬
10萬1044

仲有一d質素無咁好既股票諗住逐d轉番做有質素既

我心裡面知而家股市未係平宜，老師都叫人留現金等大跌市先掃貨，但成日心郁郁想入市，例如金界，但同時又會諗，如果等大跌市，回報會高好多

內心會爭扎，工作收入唔穩定，所以會好想d資金用得其所，唔想再係有機會但無錢入

如果係你，老師會點做？

龔成老師︰

你做的估值，係合理的，現時金界(3918)算在合理區。如果要到平宜區，你預跌多2成以上。

這股股價較為波動，不過都有長線投資的價值，現價可分注投資。另外由於市場新興，在注碼上不能投資得過多。

另外，我地無人知將來個大市會點走，更加唔會去估佢走勢。只會用當時平貴，去制定入貨策略。唔好比自己心理或者大市氣氛，影響到你計劃。

係價格合理時候，入一部份資金。到平宜區時，我地就大力入貨。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現貨可持有。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多(少於組合之30%)，同一股不能太多(少於組合之15%)。要平衡，建立後長期持有，不是買賣賺差價，而是成為你財富組合一部分。

因此，你未來要加入更多不同行業的優質股，令個組合平衡翻，唔會太偏重個別股票。

你持有股票如果係劣質股，就應馬上沽出。如果係質素較弱，但又未到無質素，可以分段咁慢慢沽。

現時大市只在合理區，現金和股票佔比，最好係各一半。由於你收入不穏，最好額外儲半年開支，作不時之需。

雖然無人知幾時會大跌市，但你都要預留一定資金，去把握這個可能出現的機會。

------------------------------------------------

Q21544：

老師，唔好意思，可能又要麻煩你，我手上持有1257@$3.5 / 三手：(3000股)，今年1月25日入，目前為$3.12。

最近Biden發表減碳目標，同各大基金經理亦看重中國實際參與度，你認為對此股在中長期算是利好消息嗎？

另外，相較之下老師如何看待956, 257 同 1330呢？

多謝老師先，同好多謝你不斷俾正能量同正面思維大眾，默默地，它們對好多人真係有一定程度嘅影響，我自己也是其中一個。

希望大家一齊進步！再次感激老師！

龔成老師︰

中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。

負債與發展持續性，都是這股的風險因素。

你所講的減碳目標，都會係一個利好因素。長遠來說，這股仍是有投資價值。但此股畢竟有一定風險，不建議太過大注，同時可能仍會弱一段時期。

新天綠色能源（0956）和綠色動力環保(1330)本質不差，業規模比較細，整體質素和潛力度，無1257咁高。

光大環境（0257）係中國光大綠色環保（1257）母公司，都係主力環保相關業務，同樣有質素，但由於己有一定規模，故潛力度會較1257為弱。

------------------------------------------------

Q21545：

老師，剛想到一個情況

我在102元時入左一手平安好醫生，早前有一天，記得因為有個女股神定乜知名人物大手購入這1833，令佢股價一日內突然狂升幾十元到140多元

我剛剛突然諗，這個突然炒高的價位是因為某些巿場利好消息，應該超出了1833的合理價，當時我應否先賣出了。

待1833回復合理價位（例如現在經常徘徊在90多元）時再買入來長線持有？

龔成老師︰

我地優質股，永遠都係長線持有，會係最好。好似這類中短期波動，其實唔需要特別做任何動作。

更加唔好去沽走勢，覺得佢$140就一定係貴，我沽左先，平D再買過。這個不是正確做法。

早前佢升到$140係貴，但未算得上十分貴。無人知之後，會唔會更貴，到時你就無機會入翻貨。所以，這個水平的股價上升，我地係唔應該沽貨。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

你現時只有1手，你只要耐心長線持有就可以，等待這企業改變整個行業的情況。

------------------------------------------------

Q21546：

老師你好 啱啱睇完你本股票勝經 𠵱家睇緊50優質潛力股 加上自己睇下其他資料

現打算月供以下股票 希望老師俾少少意見 謝謝。 (之前老師你建議 平穩增長: 潛力為7:3)

盈富+中銀香港+港鐵+領展+中電+金沙

再加安碩恆生+小米/騰訊+港交所

想請問每隻月供係咪1/9咁分? 定某幾隻應該供多啲? 謝謝老師解答。

另外我已經報咗名上你股票班 到時會盡量同同事調時間務求上到老師你嘅堂 (我仲幫埋妹妹報名一齊上堂 會好好努力學習)

龔成老師︰

你現時所選組合，係合適。所選的都是有質素的股票，以及有長線投資價值，無問題。

資金分配上，我建議你簡單點，將月供資金分成10份。盈富(2800)月供2份，其餘全部供1份。

上課前，你先看看我的書，對你課堂吸收會有幫助。你有時間，可以睇埋"財務自由行"，但無都無所謂。

而我會較建議，你這刻可以初步進行上述計劃，但就一定要留有現金，到上堂後，才正式進行整個組合的具體配置。

一齊上堂是一個很好的學習方法，因為可以討論，大家可以更快進步。股票班見！

------------------------------------------------

Q21547：

老師，如果一隻股票我有$10買入，而現時升到$20，如果仍$20仍是合理價，應否加注？

如果加注會拉高我平均買入價。

龔成老師：

你思維錯左，唔好比「過往平均買入價」限制左自己，你要分析，現時我手上有一筆資金，怎樣會對長遠財富有最大回報。

當然，要同時考慮整個組合的配置、現金，持貨比例。

------------------------------------------------

Q21548：

Sir 我見很多收息股股價上落不多，但成交很多，是甚麼原因？

龔成老師：

因為市場對佢合理價的定義較為一致，沒有大大的分歧。

投資者認為企業價值好接近，例如$100億-$105億，如果市值上到$106億，就會有好多投資者認為貴，因而賣出，令股價下跌，所以股價不會太超過一定的範圍。

相反，如果一隻股票股價上落大，代表市場對這企業的睇法及分歧好大。

至於成交大，代表買賣好多，不一定會令股價有好大的變化。

------------------------------------------------

Q21549：

老師，我媽咪成日聽到我講買股票，最近夾硬過咗啲錢俾我，叫我拎去我投資

我會打算將媽咪嘅錢，放落去水桶1-2，買返去我平時睇開嗰啲，可以？

龔成老師：

你媽的風險承受能力，與你並不相同的，你不應投資同你一樣的組合，投資水桶1-2，並不適合佢。

特別是佢對股票無乜認識，當佢面對短期股價波動時，承受壓力的程度與你不一樣。

建議你幫佢投資水桶3類別的股票，再加上水桶2，會較適合佢。

------------------------------------------------

Q21550：

龔sir,你好！我是一個90後雖然我不是你的學生，但我都有留意你出嘅書，也同意你書中大部份的內容！

其實我今次信息你係希望你可以講下一個大部份有錢人都會做的事情「捐款」！

我相信你在成名之前也做了不少的善事導致有今天的你！

例如用自己嘅時間真心去回覆別人嘅問題.....，希望你來緊會出一條影片去陳述關於捐款對自己變得更富有嘅影響！因為我相信普通人變成有錢人離不開第一個步驟，就是幫助別人或捐款！好多謝你去留意我嘅信息！

龔成老師：

我睇左好多成功人士、有錢人的書，佢地都會貢獻社會，而我都在這樣做，原來佢地好明白一個社會法則。

就是你要「先給予社會，你才會得到」，如果我地想有更多財富，更加成功，就要先貢獻更多給社會，這是成功人士、有錢人、我，都明白的。

這個世界好神奇，你貢獻愈多，得到的就愈多，這樣的情況我已經歷了好多。

另外，當我地擁有了一定的資源，自己根本用唔晒，就應該還翻比社會，因為所有資源都是大家的，只是有時我地憑努力分多左少少，而比翻多d社會都是很正常的事。

------------------------------------------------

Q21551：

龔老師：你好,本人有一些股票問題想請教！本人在較早前以$1.64買入1569（民生教育）及以$1 .3買入2233（西部水泥）,2隻股票都有5萬股

而西部水泥過往3年的派息都不錯,但民生教育則比較小,我明白教育股是需要保留資金的道理,故此請問上述2隻股票可否長期持有？

另外本人已55歲,有50萬現金,我想分配到2（中電）、2800（盈富基金）及2822（南方A50),可以嗎？
多謝龔老師提供資料,感激！

龔成老師：

民生教育（1569）主要於中國提供民辦高等學歷教育，包括本科學歷教育及大專教育。該等學校為重慶人文科技學院、重慶工商大學派斯學院、重慶應用技術職業學院及內蒙古豐州職業學院（青城分院）。

過往的業務都有發展的，盈利整體有增長，不過就有少少波動。

企業長遠的發展力屬中等，現時股價合理，預期企業能平穩增長，但預期不是高增長類別。

你有貨可持有的。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

其實兩隻都可以持有，不過，以質素及增長力來說，都不值得持有太多。

至於你資金，可以分配到盈富（2800）、南方A50（2822）、中電（0002），建議加時加入少少收息股，例如香港電訊（6823）、置富（0778），組合會更加平衡。

當然，財富組合都要有一定的現金在手。

------------------------------------------------

Q21552：

請問老師2158現價可入嗎？另外，6886($26入）和2623($0.55入）都是持有很多年，一直都沒有止蝕，這二隻還有希望嗎？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強，現價合理。由於你買入價貴，而這股增長力不強，要上翻去不易，你或者見有較大反彈都可以減持，轉其他對組合長遠增長力較好。

愛德新能源（2623）業務波動，之前年年虧損，近期先好翻少少，是高風險類股，這股長線投資的價值，唔高。賣出較好。

------------------------------------------------

Q21553：

龔老師，我手上有
1211, 2手$270
968, 3手$18.5
2820, 8手$145

你覺得呢幾隻股發展潛力如何？我應繼續中線持有，唔好理中間波動？謝謝

龔成老師：

1211買入價貴，但有潛力，你持有就得，不過要耐心D，同時唔好心急加注。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂。你買入價略貴，不過有得守，只要不持貨過量就得。

ＧＸ中國生科（2820）有潛力，但現價仍貴，你可長線，但唔好再心急加注。

------------------------------------------------

Q21554：

龔sir，想請問下第5課計港交所合理價時，每股盈利你用最近5年，但PE就用10年內的4年，點解PE唔可以同樣拎最近5年？

我諗法係PE係嚟自除以EPS，咁EPS同PE所選取的年份如果唔對應會唔會有問題，同點解冇問題，謝謝你

龔成老師：

因為計算每股盈利時，我地其實是考慮「有代表性的每股盈利」，因此，並不一定用5年平均，這只是一個較簡單的方法，最正統的方法是自行推算。

所以，當用5年數據時，只是找一個較近現時有代表盈利的數去計算，是否5年並不是重點。

至於市盈率，則是運用能反映企業與市場關係的數目，如果10年的大環境無變，就會用10年，但如果大環境改變，就會用較近的年份，其實這都是無絕對的答案。

------------------------------------------------

Q21555：

最近經朋友介紹瀏覽你的網站，十分欣賞你正面的信息。有心真的不怕遲，只要努力，必定可以慢慢達成理想。

我40歲左右，之前因生活問題，放棄了讀博士（這是我一直的夢想)。後來決定以Part Time報讀，終於在2017年畢業。

當初有親友說我不設實際，但完成了自己的夢想，真是很快樂。大家努力~！

龔成老師︰

只要有一個你真正重視的「夢想」，就算再困難，幾無人支持你都好。只要你個「夢想」對你夠重要，你都一定會諗到方法去完成。

當你現在成功完成這個「夢想」，代表你人生又行前了一步，恭喜你。

在完成這個「夢想」之後，我地又係時候要好好規劃之後的人生目標。

好好思考如何去「經營未來的人生」，給自己一個獨處時間，好好想清楚自己的下一個夢想、目標，是什麼。

當你有方向後，你要將自己放到一個「適合你成長的環境」，努力去「成長」，提高自己能力，向下一個新目標和夢想進發。

------------------------------------------------

Q21556：

龔老師，你好，想請教下，N年前十幾年前的買了隻1191,成本12.8，一直跌。

現在一蚊都冇，唔知點，放左單咩都冇，同所淨冇幾。會否升返嗎？由佢放係度？

謝謝老師

龔成老師︰

我地是否持一隻股票，唔係睇佢個股價，而係睇佢有無質素。如果無質素，就算而一刻蝕多少，都應該要沽。

中國中石控股(1191)主要於中國從事物業發展業務，以及金融服務。

這企業規模好細，而且營業額都唔高。睇佢過去多年出現虧損。

加上2019年核數師意見是「不表示意見」，代表盤數有機會係有問題，對這類企業我會好有戒心。

現時由於佢2020年年度業績審核未完成，所以公司暫時停牌，因此你現時係無野可以做到。

此股唔見有明顯的投資價值，到佢復牌後，建議沽出。如果你持貨較多，可以每有出現反彈，就分批沽出。

------------------------------------------------

Q21557：

老師有啲嘢想問你，1858 春立 至從骨科集採，成本下降，而且由高位下跌66%時候已入貨(成本$19）

想問下呢隻值得我作為倍升股持有嗎？

龔成老師︰

集團毛利率由2019年的69.38%上升到2020年的72.60%，主要由於採購議價能力加強和公司量產導致固定成本相對下降所致。

這是一個正面的訊息，但我地分析企業，唔好只睇1,2年情況，而從長線去做考量。

春立醫療（1858）長遠有發展的。

佢主要從事以自有品牌「春立」研發及產銷植入性骨科醫療器械，產品包括：

（１）標準關節假體產品：主要包括髖關節假體產品及膝關節假體產品，用於治療骨關節炎、類風濕性關節炎
及其他疾病。

（２）定制關節假體產品：分為傳統定制關節假體產品及組配式定制關節假體產品，主要用於治療關節骨折及
其他原因所致的關節損傷或骨缺損。

（３）脊柱產品：包括頸椎前後路固定系統、胸椎固定系統及腰椎固定系統，產品適用於退化性疾病、脊柱疾病、畸形、骨折及其他病理原因所致的背痛。

佢係關節醫療器械技術有一定經驗，受惠於未來人口老化對醫療用品需求、醫療器械納入醫療保障等因素下，此股有佢架投資價值。

集團盈利由2015年4000萬，升至2020年2.8億，升近數倍。但主要升幅來自2019年，所以盈利增長唔算係平穏。

現時股價比之前合理翻D，但仍未算平。

此股都有倍升機會，但質素上，未算係最高個類。而且都有一定不確定性，不宜持有過多。若佢只佔你組合小注，你長線持有就可以。

------------------------------------------------

Q21558：

龔sir, 你好...我現在33歲, 有兩個小朋友, 大的5歲, 細的1歲, 目標係草到個首期上左車先。

由於之前都係短炒為主, 真係損手爛腳, 剛好早排有朋友推薦我看你旳facebook, 所以才開始接觸月供股。

有幾個問題唔係好明﹐想問問你,希望你百忙之中抽小小時間回覆...

1. 月供股意思:假設我月供金沙, 每月供$3000, 以而家1手股價係1萬4左右, 咁即係供4-5個月左右才入到一手, 係米咁意思...

2. 金沙而家呢個價位可入嗎?

3. 假如我每月投放$8000, 想月供2-4 隻, 有推介嗎?

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。所以，往後不要再用短炒這模式去投資了。

1) 簡單來說，月供股票就是你每月將現金，買入某一隻或多隻股票，慢慢咁樣儲貨。

形式就是每月投入相同的金額，買入同一隻或多隻股票，並持續進行。

以你例子，每月用相同金額$3,000 買入金沙（1928），假設第一個月股價為$30，就能買入100股；第二個月升至$35，就能買入85股；第三個月跌回$25，就能買入120股。

總結這三個月，投入了的資金為$9,000，累積股票為305股，平均買入價為$29.5。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

當於初學者或者不懂定平貴的投資者，月供可以令佢地買貴貨風險，得以大大減低。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上。

月供最重要的一點，是「選股」，如果你無選股能力，就投資ETF，如盈富(2800)。

2) 金沙（1928）有質素的，有長線投資價值，收息不差，同時有平穩增長力，但不是高增長類。

現價合理，可分注入貨，或月供都可以。

3) 以你33歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。如果每月能儲到的現金為$8000，你可以每月先用$4000儲蓄，另外$4000就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，我建議你先集中在平穩增長類股，至於潛力股，只宜小小注(少於3成)。此期間，你最好是努力提高投資知識，才慢慢增加翻潛力股比例(最多5成)。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21559：

想問下1800 中國交通建設 點解高息, 低淨值, 低市盈率, 高現金流, 有增長, 都可以跌足4年?

市值 (港元) 165.693 億
市場價值指標 (最新)
年度 (貨幣) 2020/12 - 末期 (人民幣)
每股盈利 (人民幣) 92.000 仙
每股派息 (人民幣) 18.088 仙
派息比率 (%) 19.661%
每股現金流 ($) 0.857
每股淨資產值 (人民幣) 15.160 元
市場價值指標 (全年)
市盈率 (倍) 3.4
周息率 (%) 5.712
股價/每股淨資產值 (倍) 0.206

龔成老師︰

你都講都佢一些正面的財務因素，但我地唔會單憑個別年份的指標，去評斷佢投資價值。

我地要好全面，去睇佢過往多年數據變化，企業本身質素和行業發展狀況等，去得出一個綜合性結論。

中國交通建設（1800）本身不是無質素，但又未去到好好，算是中等類別，但增長力不強。市場會擔心企業的可持續發展，擔心生意無過往咁好。

過去幾年收入的確維持增長，但你再仔細去睇佢財務數據。

你會發現，多年收入維持增長的同時，盈利整體係出現倒退的情況，反映佢賺錢能力係弱左。

而且佢本身負債高是扣分的地方，因此估值不會高(所以PE一直偏低，反映出市場對佢評價較一般。)，股價都反映了相關風險。

此股現價算是合理，分注投資都可，但就未必適合太大注。

------------------------------------------------

Q21560：

你好龔sir，本人28歲，投資新手

想請教你對0311 聯泰控股和恒生simplyfund 基金的睇法。

謝謝

龔成老師︰

聯泰控股(0311)主要從事成衣及其飾配件的生產和貿易業務。

此企業規模唔大，盈利都唔算高。賺錢能力唔強，加上有一定負債，都係扣方地方。

現價算係合理區頂，可投資。但由於質素只係一般，而且過往股價都好波動，只宜好小注投資。

至於恒生simplyfund，係一個可提供多種不同基金的投資平台。

你可以衡量翻恆生所提供之基金的投資策略，所投資的資產類別、投資策略、風險程度、市場、費用成本以及過往的表現(可以睇佢過往5-10年，如果回報係比主要投資市場高，你可以考慮投資)。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20521-20540）

Q20521：

龔sir 我用課堂教的方法，最近做左港燈既估值 分別用左
1.企業過往市盈率
2.行業合理市盈率（你上堂notes話公用股大概12-15） 3.DCF（用左近2年可供分派收入 28. 3億作計算）

用3種方法計出黎都有d唔同 請問可唔可以比d意見我？
有冇d數字要調整一下？
邊種方法較好？

其中一種計出$3-$5，點解同現價差咁遠，另外兩種就計到$5-$7。

龔成老師：

以不同的估值方法，會出現不同的答案，這是正常的，就算出面的大行估值報告，都是這樣，然後再自行作主觀的判斷。

當你計出後，就要分析，該股價是否合理，例如第二個方法，$3-$5，你睇翻這股長期的股價，都見唔到這個。而我講過「短期股價只基於買賣供求，長期股價則建基於企業價值，如果長期都無見過$3-$5，即是市場認為這個價偏離了企業價值。

你另外兩個方法，就較接近佢的合理價值。

至於市場點解長期高過你的價，第一，市場在低息環境，過度追求這種穩定收息資產，因此的確現價唔平。第二，市場考慮了佢的增長力。

港燈已表明佢會加大資本開支，目的是提高盈利，即是市場認為這企業的盈利會慢慢提高，如果考慮這因素，估值就會提高。

------------------------------------------------

Q20522：

老師，我現時持股有贏有輸，有d股佔比較多，如果要我平衡返一半嘅比例，我都唔知放邊隻好

唔知應該放啲賺緊少少嘅好，定係蝕緊少少嘅好，因為已經冇乜閑錢再加入舊經濟股度。

另外，我有朋友都報咗你呢班，叫我一齊去㗎，不過我讀書好差，好驚啲文字嘅嘢

所以等我朋友上完睇吓佢消唔消化到先

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你可以定一個指標，如果單一股票超過你股票組合的15%，多出的部分，就要慢慢減持。

我地不是睇賺蝕，是睇質素、長遠、平衡。

【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

其實我建議你同朋友一齊上，因為落堂後可討論，加翻學習，你地的進步都會較大。

------------------------------------------------

Q20523：

龔老師，我是一位bb班投資者，幾年前傻仔跟人買股票，蝕左本金六成 現時仍持有下列蝕本貨，唔知止唔止蝕好？跪求指教

1122 慶鈴氣車股份 1000股 買入價 2.58
1766 中國中車 3000股 買入價15.86
1776 廣發政卷 2000股 買入價26.5

龔成老師：

你最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

慶鈴汽車股份（1122）增長力不強，最好等上翻D轉其他。

中國中車（1766）的本質不過不失，但增長力都是不強。

在2015年，這股曾經熱炒，並處於貴的水平，其實市場發現佢原來只能平穩增值，業務不會高速增長，所以股價回落至合理水平。

其實，這企業的業務一向都是平穩增值，只是市場對佢有過高的期望。

所以，現時所處的是合理水平，但增長力就不會好強，算是平穩增長類，現價合理，你可守住先，上較多可轉其他。

廣發証券（1776）有投資銀行、財富管理等業務。

其實過往業務不是差，但就是無乜增長力，就算投資市場較旺都唔見有明顯增長。反映企業的質素未算強。

這類股收息都可以，但就唔好對股價有太大期望。

如果你想收息可持有這股，如果想增值，就宜轉其他。

------------------------------------------------

Q20524：

龔sir你好，在認識你專頁前總是炒賣，結果也是跟你說的一樣，輸多過蠃。

輸左獲金既之後就再沒有掂股票一排。而家慢慢重新開始，建立組合，手持一手2096（$11.38），及4手9988（$273.85）

2662（早前買入，現已停牌）現在有公告說會重新申請上市復牌，10合1，但維持不變買賣單位2000股，我手上有14000股。

我不太明白佢的公告，10合1，又配股，我都預左呢隻返唔到身，但想問一問，佢公告好似好複雜咁，請問可否講解一下？

另外想問，我係咪得返1400碎股？我應該放任不理？還是復牌後碎股放掉呢？

龔成老師：

阿里（9988），有質素，你可持有。

先聲藥業（2096）主要係中國透過合約安排從事藥品研發、生產和商業化，當中以仿製藥為主。長遠都有質素的，可持有。

但你整體，有集中持股情況，最好在長遠，建立一個更平衡，以及優質的組合，長線。

美好發展（2662）過往持續虧損，投資價值唔高。

佢合股時是你之後持股變成1400股，但股價會上升10倍。然後再發行一些新股比指定人士（我無仔細睇，大約是這個意思），對你最主要的影響，就是持股變成1400股。你的確會變成持有碎股，但碎股都能賣出的，不過就要比市價低先賣出。這股賣出較好。

------------------------------------------------

Q20525：

Hello，請問2158，1473有無潛力
2158 61.06入
1473 1.7入

兩隻近期都插水
唔知大師可否指教

另外新手你推薦先買邊本書黎睇會易上手點？

龔成老師：

你唔好太在意中短期股價，最重要是長期的企業價值。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。如果你小注持有，可守，太多宜減，因為現價仍唔平。

環聯連訊（1473）質素只是一般，不強。

集團主要從事採購及分銷電訊及數據通訊接駁產品，亦提供相關解決方案及應用支授服務。該接駁產品是用電、子或光電、感應器及網絡接駁軟件構建而成的裝置。

該等裝置能夠傳送及接收信號或數據，並主要應用於電訊基礎設施、數據中心、物聯網及網絡接駁產品以及商用激光。

企業無太大獨特性，賺錢能力不強，投資價值只是一般。

環聯連訊質素不及醫渡科技，你最好等佢上翻少少賣出。

------------------------------------------------

Q20526：

你好龑老師，長和001質素如何，比較長實地產1113邊隻好啲？

龔成老師：

兩隻都不差，長和（0001）會較平衡，可選這個。佢有質素的，這股長線持有，唔需要太理會中短期股價上落。

由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。現價合理。

------------------------------------------------

Q20527：

請問龔sir 能源股1799 以及3800 點睇？ 謝

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

保利協鑫能源（3800）質素未算好強。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高。如果真的想投資，小小注好了。

------------------------------------------------

Q20528：

1.運用老師上堂教的，自己嘗試計雷蛇（1337）的估值。1337屬於水桶1，覺得現價合理區頂，打算現價回落5%入1注(2手），每跌5％再1注（2-3手）

共買12手（共12000股），之後長線持有，這樣的分析及投資策略對嗎？

2.由於1337並未有真實每股盈利（都是負數），老師點預測計算佢有代表性既每股盈利？而老師你計既1337合理範圍又是多少呢？

龔成老師：

雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

所以，你上述的估值，都可以參考下，但不能盡信，因為我地為這類企業估值時，太多預期相關因素，不確定性會較大。

我在這類企業估值時，會預測將來的盈利情況，可能預測幾年，現價大約合理區頂至略貴（但坦白講，估值未必太準的）。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

所以，你最重要是總投資金額不能過多，運用你的策略不是不可，但一定要明白當中風險。

------------------------------------------------

Q20529：

您好啊!我48歲，我檢視了股票組合，覺得有的散如下:
平均買入價: 佔%比
水桶1
1177中生=7.02/5%月供中

水桶2
2800盈富=25.2/35%月供中
0012恒基=34/16%月供中
0003煤氣=12.80/11%停供
2388中銀=23.42/7%月供中
1558東陽光藥=13.84/3.9%
6869長飛=14.38/4.1%
1212利福=6.08/5.5%
0880澳搏=8.06/3.3%
0066港鐵=42.5/2.4%月供中

水桶3
0005=2%
0144=4.8%

下月開始改月供組合，哪個組合較好？如下:
一組合
2800盈富2000
0012恒地2500
0066港鐵2500
2388中銀2000
1177中生1500
二組合
2800盈富=3000
0066港鐵=3000
2388中銀=2000
1177中生=2000

1,1558/6869屬於水桶2嗎？可以加倉還是賣出？

2,恒生指數30000樓上，盈富基金月供减至2000元，恒地百份比己超過15%，我打算供多1年再轉供其他，適合嗎？

3，手持16萬現金，大跌市加倉至現有股票66,1177,1212還是潛力股1830,1810,9988?老師有否更好的建議？

Thanks !老師

龔成老師：

1）這兩股的增長力都弱左，但不是劣質，你原有貨可持有，我見你比例%不過多，持有就得。但不要加注了。

2）其實唔需要太多調整，可以等再上多D先變動，只要你每月仍有資金剩就得。

3）以你的年齡速箅可以投資平穩增長類股，小注潛力股。港鐵（0066）、中生（1177）、阿里（9988）都可考慮，當然，平穩增長股宜佔組合比例較多。

至於更改月供組合，的確調整一下較好。

你可以考慮組合（1），會較適合你的情況。

日後如果較多資金，盈富（2800）的比例可增加。

------------------------------------------------

Q20530：

龔sir,您好!感謝你的文章, 教懂我正確的理財概念, 例如以前會很想盡快清還按揭貸款, 現在知道可以有很多可能性…

我現職收入不錯, 但精神及健康已消耗了不少, 很想計劃好快到的退休(或半退休)生活; 拜讀你的文章後, 現有下列計劃:

1. 到2024年10月便到60歲, 尚有3年半時間可有全職收入, 每月支出約$40,000 (包括$20,000 按揭供款), 可剩$35,000作投資, 儲備有$300,000緊急現金

2. 現有投資本金約$2,000,000, 會用2/3 在一年內分注買入下例股票, 1/3留著等大跌市:

1177-中生 (~5%)
3067-iSharesHSTech-ETF (~5%)
--
2800-Tracker Fund (~9%)
0066-MTR (~9%)
00823-Link (~9%)
1038-CK (~9%)
1928-Sands (~9%)

0002-CLP (~5%)
0005-HSBC (~5%)
0435-陽光 (~9%)
0548-SZ Highway (~9%)
1398-ICBC (~5%)
2638-港燈 (~5%)
6823-HKT (~9%)

3. 由2022年開始, 每月會留$14,000作年金儲蓄, 餘下$21,000繼續投資上述股票, 亦會有其他資金到位, 例如到期儲蓄保險及約滿酬金等, 繼續會用2/3 分注, 1/3留著等大跌市

4. 到2025年頭, 應該會有約$500,000可以投入香港年金, 月收$2,000左右
現有兩難題:

1. 自住樓要供至2036年, 應否在60歲後把強積金 (約$1,000,000)慢慢提取作供樓用? 其實也只能足夠供到2030年左右…

2. 以上述的方法, 3年半後, 現金流大約只有$15,000. 可能要找兼職幫補
請問我這個計劃如何? 請多多指教, 感激!

龔成老師：

1）你可善用每月的$35000，方向應該是投資「收息股」，建立收息股組合。

2）方向可以，上述都是有質素的股票。

你就退休，應該集中在平穩增長股+收息股，上述選股基本上都是這類。中生（1177）、3067是潛力股，你投資10%以下好了。同時，要等跌先入，不跌就不要買。

另外，你可以加入收息基金（3110），這樣會令組合更平衡。

到你正式退休時，收息股類別宜佔比較多。因為到時你的風險承受能力更低，同時更著重現金流。

3）方向可以。總之到時要留一定的現金，唔好太快投資，要有一定的防守力。

4）可以買年金。可提取強積金，部分留現金，部分持有收息股。

其實，到了2025，你可以賣出部分平穩增長股及潛力股，然後將資金集中投資收息股。目標是5%、6%的收息股，這樣可增加你的現金流，到時可以重組整個投資組合，目標提高你每月收入，到時每決定是否要兼職去增加收入。

------------------------------------------------

Q20531：

我今年38歲 月入38K
黎緊小朋友會9月出世
因為見建行同中銀 冇起息

建行我覺得可以唔理 因為佢年年有股息
但中銀真係冇咩作為
多謝你既分析

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

而我地投資，要以「先增值，後現金流」作配置，以你的年齡，可以投資平穩增長股+潛力股。

建行（0939）是收息股，未必適合你。

中銀香港（2388）平穩增長型，可成為你組合的一部分，你可持有。

------------------------------------------------

Q20532：

老師，唔好意思又麻煩到你。
最近我爸爸開始學買股票，佢67歲，原先現金大概1百萬

最近跟佢同事買左以下股票
1800中交建 50000股 平均價$3.82
9988 巴巴 600股 平均價 $263
941 中移動 2000股 平均價 $46
981 中芯國際 6000股 平均價 $37
佢喜歡短炒，不喜歡平穩收息，所以我很怕他會輸掉老本，想問佢所買這個組合是否需要放掉？有沒有質素？

另外我自己所累積之股票有如下，
1手 0066
1手 2800
3手 1448
2手 9988
5手 1810
1手 0981
6手 0823

想再加一隻0012作為收息，現價理嗎？
先謝謝老師

龔成老師：

你爸現時的持有，不是無質素，但短炒模式可以同質素無關，始終都是高風險，只是有質素就好D。

阿里（9988）、中移動（0941）無問題，有質素。

中交建（1800）增長力唔強，質素都可以。

中芯國際（0981）風險較高，不宜持有太多。

最好建議佢改為長線投資模式，同時，佢的年齡宜投資收息股。

至於你現時的持股，都是有質素的，可長線。至於是否加上恆基（0012）就要睇你的投資目標，這股是平穩增長類，可長線，但就不是高增長，所以要睇你適合與否。

------------------------------------------------

Q20533：

龔sir, 請問6862配股後一直跌，咩價合理？可長線嗎？63.5有一手。

龔成老師︰

你唔好太著重中短期股價，之前升得多自然會回落

海底撈（6862）係全球領先、快速增長的中式餐飲品牌，主打火鍋品類。按營業額計算，海底撈是中國最大的中式餐飲連鎖品牌。

海底撈擁有及營運的餐廳數量超過460家，當中以中國大陸為主，亦有數十間位於的台灣、香港、新加坡、韓國、日本、美國等地。年服務顧客超過1.6億人次。

簡單來說，海底撈有一定的質素，無論是品牌、規模、財務數據上，都處於理想水平。同時憑大環境及本身的優勢，往後的發展前景正面，這企業有長線投資的價值。

這企業其中一項優勢就是品牌，但若然這企業的食物出現問題，就會對品牌有很大的打擊，對這企業的股價及長遠發展都會有影響。

但整體來說，這企業仍是有質素的，但你要注意，由於市場對當中的期望不少，因此股價現時略貴水平，這點成為風險。

就算近期回調，依然仲係貴。若佢佔組合唔多，可持有，但唔好再加注住。

------------------------------------------------

Q20534：

老師你好，我月入$27k
每月供緊$6500保險基金
另外

月供$2000（388）港交所
$1000 （2800）盈富基金
$1000 （1177）中生製藥

想問下呢個組合既風險會唔會太高？ 另外我想用多$1000黎做月供，我應該供邊隻好？小米又係咪一個適合既選擇？

補充： 我33歲，希望4-5年內賺到100萬

謝謝老師

龔成老師：

上述組合，都是有質素的股票，同時風險度適合你。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

你33歲，月供上述股，可以，保持進行就得。

如果做目標5年內有$100萬，你要加大投入先得。

建議你加大盈富（2800）金額至$2000，另外，加入小米（1810）去進行月供。

當然，你最好一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20535：

老師你好！第一次發問，比較多問題，希望唔好介意！

我今年20歲，喺大學讀緊Year 2，之前有朋友介紹你個page之後留意咗好耐，同埋都睇過你嘅書，開始想買幾隻股票作長線投資，再加月供，所以想請教下你意見。

我手頭上可以調動嘅現金大概有18萬，睇完你嘅介紹初步留意咗以下嘅股票：

3319
285
1177

另外都打算入手教育，綠色能源同建設呢幾個板塊，所以留意咗1797, 968 同 1313 呢幾隻股票。想請教下上面嗰幾隻嘅股票適唔適合做長線投資，同埋咩價位會比較適合入？

另外我遲啲都計劃開始月供，初步打算每個月收入度抽大概$10000嚟供左右，暫時諗住2800, 823, 27 都會供，請問以上呢幾隻股票有冇問題，同埋可唔可以推介多一隻潛力比較高嘅股票去月供？

另外係打算喺大學畢業5年內上到車，你覺得應該去綠表抽居屋，定係揀一個啱嘅私樓物業去做第一個置業？而如果私樓嘅話你覺得西區升值嘅潛力好唔好？

Many thanks!

龔成老師：

上述的選股，基本上都是有質素的，你可以作為長線投資。不過，當中有平貴，你可以考慮左這刻投資值博率較高的股票先。

雅生活服務（3319）、華潤水泥（1313）現價合理，可以分注投資。

中生（1177）合理區頂，小注都得。

至於0285、1797、0968，都有潛力的，但現價相對略貴，因此宜回翻D先考慮。

至於月供股票，可以的，你選的3股都是平穩增長型，你長期月供就得。如果可以的話，就加入3067去月供，只要控制注碼就得（要慢慢收貨，不要急），這基金適合你年齡的。

至於物業方面，如果從投資角度，當然私樓較好，西區正面的，有長線投資價值。如果從自住角度，居屋會較好，因為能減少每月現金流支出，但都可達至解決自住需要的作用。

------------------------------------------------

Q20536：

龔sir 你好！ 我是80後媽媽，兒子3歲，最近本想替兒子買紅利保單，budget每年3.5萬左右，反正想定期每年為小朋友儲一些錢。

（在職公司已cover 丈夫兒子醫療保險了所以正在想應該如何組合）左想右想後，突然想用作長線投資（10-15年）...

請問，這樣的情況我是應該投放在平穩增長還是可以放大部分在潛力股上？

另外，剛剛放晒手頭上的股票，想再重新去睇計劃，手上有20萬元可以動用，應該你意見可以怎樣鋪排？thanks!!

龔成老師：

我地理財，要攻守兼備，保險公司的產品，在理財中有防守性作用，不過增長力就不強。因此，可投資，但比例不用太多（足夠就得）。

餘下的資金，就應該投資增值，進攻。

以你的情況，可以投資平穩增長股，部分就潛力股。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

暫時你可以動用$10萬去投資，分注買入股票，大市波動，不要急，要慢慢分注買入。

平穩增長股：你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20537：

龔sir …請問小弟好辛苦咁儲咗10萬～希望每個月能夠平均賺取一至2萬～請問有邊隻比較平嘅股票適合入手？

龔成老師：

$10萬本金，每月$1萬回報，1年有$12萬回報，這是一個極高的回報！你要承受極高的風險，先有機會爭取到。

而你話辛苦咁儲左$10萬，如果高風險，可能大賺，或大蝕，相信不是你希望你。

因此，建議你調整翻你的投資目標，以「平穩增長股」為主。

暫時只建議你投資$3萬-$5萬，等你有經驗先投資其他股。

你可以考慮盈富（2800）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20538：

老師你好，本人接近30歲，有置業嘅計劃，但筆直有限且要做高成數按揭。想聽下你分析元朗溱柏同九龍灣麗晶花園。

另外補充，本人一直在九龍生活的，感謝老師

龔成老師：

九龍灣麗晶花園會較好。

第一，始終是市區，雖然樓齡較高，但麗晶不是無質素，加上啟德區的發展，長遠對該區利好。以及配置等不差，在投資角度都是正面的。

第二，你本身住九龍，所以從自住角度，麗晶會較適合你。

------------------------------------------------

Q20539：

龔老師你好，自從追踪你FB專頁後，發覺若一出來工作便認識你所教的投資知識便好了！

以前只懂短炒，結果正如老師所言，多年後回顧蝕了很多錢。

雖然現在可能已太遲，但也希望可以繼續增進知識，故早前把股票跟老師建議逐步轉做收息股，並想請教老師。

本人49歲，沒有物業，與家人住不用付租，每月可儲約2萬元，希望可以在55歲達致財務自由並退休(到時希望每月有$15000-20000被動收入)。

不知現時所持有的股票是否足以完成計劃？若不夠，有什麼可以在未來幾年繼續投資以完成計劃？非常感謝！

 1 (5000股)
 3(10000股)
 12(4000股)
 14(1000股)
 778(10000股)
 2638(10000股)
 548(4000股)
 6823(4000股)
 435(5000股)
 823(2000股)
 1113(4000股)
 270(10000股)

龔成老師：

以你現時的年齡，以及想在55歲退休的目標，你應該以投資「平穩增長股」+「收息股」為核心，到你55歲時，可以進一步集中在收息股。

上述的股票，基本上都有質素，同時都是「平穩增長股」+「收息股」，你方向正確，持有無問題。不過，地產類別的比例有少少多，你原有貨可持有，但在之後的資金投入，就最好不要再增加這類。

上述組合，都有質素，你可持有，但仍未足夠你的計劃，最好利用這幾年時間，增加投資「平穩增長股」+「收息股」。可以每月投入$15000，月供或自行分注都得。

你可以考慮高息基金（3110）、港燈（2638）、深高速（0548）、香港電訊（6823）、工行（1398）、恆生（0011）。

另外，再加入盈富（2800）。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20540：

老師你好,本人25歲, 總資產大概三十萬，分佈如下:
25萬股票 (美股港股都有買)
5萬現金

上年二月轉左份新contact銀行Corp ARM，原本去到八月完約，但疫情關係公司大規模lay off，所以六月被迫離開。八月揾到另一間銀行ARM，23k，中資，做到依家，但越做越唔開心。

近排轉左team head，文化差異令我好唔適應。每日只做operational既野，見工時話會做藍籌，結果係有既不過係隔離team,我條team只做大陸中小企。

工作上已經俾人跣左幾次，種種因素都令我好想辭職，有時收工都唔開心到喊。

我係英國Grad, 大學開始已經有間網店主要做代購，去到依家算係當副業咁做，平均月入五千。好清楚自己係鐘意做網店，亦清楚自己唔會想升RM。

目標係盡快財自，屋企人唔等我開飯，同屋企人住，除左家用無乜大開支，每月大概儲到15k。

由於份工真係令到我個人好頹，每日提心吊膽，所以一個月前開始有裸辭創業既念頭，想試下全職認真做網店。

但依家失業率新高，我有份工都唔做好似唔太好，但我又真係好唔開心。短期計劃拎完bonus就遞信，但到時收入少左加唔穩定，好有機會影響我財自計劃。所以想請教下老師你點睇，我應唔應該裸辭呢？

龔成老師：

要睇你個人的風險承受能力，你未有家庭，加上25歲，仍年輕，同時你有$30萬資產，如果你可以承受風險，我會建議你大膽試。

從中短期角度，這的確是一個冒險的決定，因為經驗不算好好，而你這動作一定會影響左長期的財務自由計劃。

但從長期，可能這是你的突破位，因為你現時有副業，你辭職後可以全力發展副業，你當比自己3-6個月去試，你可以全力發展，睇下有無成績。

加上你副業都有收入，而你與家人同住，相信你能夠生活到。

從長遠角度（整個人生），這3-6個月可說是一個突破位，同幾個月時間，去買一個可能性，我相信都是博得過的。

如果到最後唔得，到時再找翻工作，但起碼叫試過。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15401-Q15420）

Q15401：

龔成你好，我今年28歲，有35萬儲蓄，每月可儲8千現金。零投資經驗，亦未有做任何投資。想請教我應該點建立投資組合呢？謝謝

龔成老師︰

如果你零投資經驗，我建議你要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過一段時間後，有知識及少少經驗後，就可以利用你手上的資金，其中一部分，去投資股票。

------------------------------------------------

Q15402：

老師你好，較早前問過你持有932去向，我已經忍痛賣左大概損失20萬。現在還欠卡數大概7萬元。

由於現時除左正職仲做緊生意，大部份資金變為貨品現金流唔足夠去清卡數。

現時有個想法，銀行有個計畫可先批大概8萬元（12月還款期, 0.39%手續費），總手續費為3790元。清卡數後並想計劃供股組合，除了盈富還在尋找潛力陪升股。

希望老師能比點意見好否先集中還清卡數再以供股及還款。還缺點就是又要繼續去供還銀行貸款...

現時收入月入大概 20000-25000

龔成老師︰

你做了理性的決定，這是成功投資者重要的因素。這是學習過程。

其實作決定時，我地最好睇翻D資金的機會成本去考量。

我會建議你先用這8萬的貸款計劃去清理咭數，因為信用咭利息相對較高。之後，你才用每月的收入去還這較低息貸款和做月供。

月供選股方面，除了盈富（2800），以下的股票都適合作長線月供之用︰

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
潛力股︰比亞迪（1211）、中生（1177）或福壽園（1448）。

------------------------------------------------

Q15403：

阿sir，你好，我15年聽銀行經紀介紹買左1186，入左5000股，16.2入，等左5年，我可以等點做呢？

仲有雷蛇均價2.6入，通達均價1.7都入左，全部股票都洩緊一半，我可以點做呢？求指點，謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

中國鐵建（1186）質素算是中等，不算好強，但都不差。如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，你可以守住先，只要佢唔係佔你組合中比重太多就可以。

雷蛇（1337）雖然可以有潛力，但本質好波動，上市2年仍處於虧損狀態，但公司市值已有過百億，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。因此，這股有前景，但風險好大，無人知真正的價值。同樣有貨可以守，但唔好佔組合比重太高。

通達集團（0698）本質又唔算好差，業務近年都有高增加，不過，相信增長已進行了平穩期，因此在估值上不能太高，正正因為這因素，市場由過往的高估值，變成了合理估值，再到近期外圍因素，對佢進一步以較低模式去估值。

你的買入處貴水平，而這股本質算是不過不失，持有守住先，是可以的，中短期仍然不利，你要耐心一點等。同埋不要再加注。唔係太重貨，可以守。

------------------------------------------------

Q15404：

龔sir 你好!本人32歲, 月入約34k. 資產約170萬 （但約4分3為定期, 其餘大部分為股票）. 我想盡快達到財務自由. 想請教你：

1. 我應該月供股票嗎？我可以大概每月用10-15k 供股但擔心好長遠先見成效.

2. 另外想請教 6823 1310 可以現階段再入多啲嗎? 有冇其他穩定收息股可考慮（我亦持有005 011 405 52 1038 006 778, 可以繼續持有或加注嗎?
非常感謝

唔好意思龔sir. 補充一下, 我今年6-7月有約800k 定期到期. 如果將呢舊錢全數作股票投資收息, 資產分布比例上會唔會太risky? 謝謝你!

龔成老師︰

1） 月供其實係一個好好架累積財富方法，佢透過定時定額的供款，去平衡價格波動風險。另外，你要明白一個概念，就是投資股票就如同投資一間企業，就算佢再優質，都要比時間佢去成長。我地月供講最少5-10年，最好係一直咁做，對你財富增值先最有利。

你算年輕，應以增長為主。現在你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2） 其實以你年紀，應著重增長力，當儲到足夠資本或到退休時，才再將佢換碼至收息股，為自己創造穏定現金流。

所以，你的定期我都建議你換碼至上述優質股。但由於現時市況只在合理區，你可以先動用一半資，分注咁慢慢入貨。餘下的現金，就等大市有較大回調，才加大力度掃貨。

------------------------------------------------

Q15405：

最近,我見領展從高位下跌了不少,但同時見到領展進行回購,如果現時進行分注買入,是否可行的策略?

順便想問2778的質素如何?

龔成老師︰

領展（0823）是優質股，有一定規模，坐擁不少優質商場，而餘下仍有一些有條件提升的商場，故仍有一些潛力。加上此股派息穩定，因此無論是收息又或是增值方面，領展都擁有條件，長線甚至永遠持有都可。

再加上早前斥資36.7億元收購悉尼一幢甲級商廈，集團開始在海外尋找有潛力物業，預期由本地化進一步國際化，這都是潛力所在。

近期受大環境所影響，股價回落不少。雖然如此，但股價未算十分吸引。此股最少要求要有4%以上息率，才有投資價值，股息率達5%會更理想。但現時股息率只有3.6%，所以算唔上平宜。

冠君產業信託（2778）現時股息率就不算特別吸引，而佢有少少集中物業情況，以及租戶行業集中的情況（因為佢花園道3號的物業，較多是金融類租戶），因此這刻如果從風險與回報，從值博率角度分析，只屬中等。

------------------------------------------------

Q15406：

想請教一下老師，現在投資物業股例如陽光、希慎等是否不理想？

現在儲蓄有十萬，打算逐步注入資金

龔成老師︰

陽光（0435）是不錯的收息股，佢投資係香港的寫字樓及零售物業。寫字樓分佈於中環、灣仔、上環、尖沙咀等地，而零售物業則位於上水、將軍澳、元朗等。寫字樓與零售的所佔的比例，以估值計大約各半。

從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有投資價值。從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有投資價值。

希慎（0014）有質素，佢係銅鑼灣商舖及寫字樓地區中，係其中一個最大商業大廈業主，投資組合擁有逾4百萬平方呎之樓面面積，希慎廣場、利園等，都是十分優質的商場。

佢過往出租率均多處於95%以上，商場及寫字樓很多時更處98%以上的高水平，係典型的收租股。這股可長線投資，雖然這刻的股息率不算好高，但股價都有平穩增值作用。

2者現價計股息率都高於5%，已有長線投資價值。但由於大市只在合理區，入貨時要分注。

但你要留意翻，這2隻同是地產相關行業。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

------------------------------------------------

Q15407：

成哥你好, 又想請教你
我35 歲, 係一家三口經濟支柱, 每個月可以儲到$23000左右,
我而家keep 住咁月供:

2800 : $5000
823 : $1500
66 : $ 1500
1211 : $1500
003 : $1500
1038 : $1500
1928 : $1500
0027 : $1500
2388 : $1500

以上股票夾埋約市值35萬,
每月出糧供完股票儲到$5000 cash 左右,

請問咁樣會唔會太倚重買股票? 而家經濟下加埋BB就黎半歲要培育佢, 我應該持久供落去定減供 ?

另外依你意見, 一個想維持一個普通3 人（2 大人1 BB） 家庭開支, 大約有幾多錢轉買收息股先可以接近達到財務自由? 多謝指導

龔成老師︰

其實月供股票，最好可以定期定額咁長線供落去，咁樣先至可以最有效平衡價格波動風險。你上述月供的，都是有質素的股票，長供無問題。

但如果你未來真係有生活需要，減供款額也無可口非。但如果係因為市況波動而減額，這個就唔建議。

我地財富組合中應該係優質資產，所以除了股票外、物業、生意等是考慮之列。但由於以值博率計，現時買股票增值會比買物業好，所以現時先稍稍集中在優質股也合理的。

而3人家庭要多少錢才足夠，可視乎個別情況。你可以自已計翻一個女開支大約多少，再用5%股息回報率去計下，到底要多少錢。

例如你每月家庭開支$10000，以股息率5%計，你要240萬才可以達至財務自由。

計法︰（$10000 X 12個月） / 5%

------------------------------------------------

Q15408：

龔成老師，我想問0012恆基地產可否長期投資？

龔成老師︰

恆基（0012）是一隻有質素的股票，前景正面，再加上佢是全港持有最多農地的發展商，長遠的價值一定會慢慢釋放。

此股有質素，適合長線投資之用。由於佢有質素，所以價格一直都唔平。現價處合理區，如果你怕買貴左，你可以月供去平衡個價格波動問題。

如果要等佢平宜價才入，你預佢股價要回調多最少1成，才初步進入平宜區。

------------------------------------------------

Q15409：

老師你好。本人澳門人，一向沒有儲蓄習慣，不過之前有個自住單位（最近已成功放盤）現在手頭上有420萬現金流

最近澳門政府實施新樓宇政策，首次置業800萬以下樓宇最高可借八成（只要我之前單位查屋紙冇我名，都當作首次置業者）

最近我再以720萬買入一單位，問銀行借440萬，自己出280萬，裝修，政府費用等七除八扣下，現在手上有60萬現金流，早排我買左1211 45@5000

想問老師，有浄現金流應該如何運用

龔成老師︰

你現在可用的資金，可以買入一些優質股，為自已創造一個財富增值平台。

你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）。

但由於大市現在只是合理區內，你可先用一半資金，分注買入上述股票。餘下一半現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q15410：

老師你好，本人剛畢業月入15k，另有約十多萬存款，平日洗費不算大，起碼能儲起8千至1萬元。

新手學投資，大概明白要攻要守，一部分用來買儲蓄保，一部分想用來買股票。想問股票新手入門有什麼推介？

新手只適合買月供和長線藍籌嗎？若果想試一下短期的，可以有什麼入門推薦？謝謝！

龔成老師︰

我地買入股票，就如同買入一間企業，就算質素再高，都需要時間去成長。所以，我地財富增值的策略，係長線持有一些優質股，讓其自然增值。

短炒我唔建議，我之前做銀行、證券行多年，見證大量客短炒全部都蝕錢，只有長線才能有錢賺。

另外，保險係防守部份，只需要買足夠"保障"就可以，而唔係用佢去儲錢增值。

你作為年輕新手，我建議你用月供盈富基金（2800）入手，佢是包括50間質素不錯上市公司股票的組合，有效平衡風險。資金分配上，你可以用一半月供、另一半先儲起，到你有一定投資知識時才動用。

同時間，你要去多讀投資相關書本、年報，新聞和課程。本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q15411：

老師你好，我係投資新手，拜讀過老師的作品及文章后，近來一直以供股的形式購入股票，覺得呢個方法非常適合自己

現在本人父母已退休，希望把部份資金用來投資股票，老人家當然希望穩定及有即時收入，所以唸住將資金買入一些4-5厘的股票

例如港燈或工商等等，但有些朋友擔心我賺息蝕價，因為我唸人住長時間，可能5-8年都吾放，所以無問題，但由於自己知識有限，又吾知朋友講的是否正確，因為佢地比較進取，所以想請教一下，謝謝你。

順帶一提，大概100萬

龔成老師︰

我地財富增值的策略，都會因應翻你人生階段。你父母已退休，買入收息股來獲取穏定現金流，做法正確。

由於我地目標係穏定現金流，所以除非企業長線質素大變，否則應該一直持有，所以基本上唔存在"賺息蝕價"問題。

目標是5%、6%的股息率的收息股有港燈（2638）、香港電訊（6823）、工行（1398）、匯豐（0005）、置富（0778）、陽光（0435），都可以選擇。

現時大市只在合理區，買入時必需"分多注"，唔好一次過入貨，以減低價格波動所造成的風險。

------------------------------------------------

Q15412：

老師，本人剛過40歳，月入$15000，最近因為社會環境及疫症事件，令現在任職公司生意轉差，有部份同事需要放無薪假期。

從上年起，已開始留意有關被動收入的重要性。剛在農曆年後跌市動用約$20萬積蓄，買了以下股票：

0004 2000 $57.9
0939 14000 $6.48

另外，保留約$3萬作應急錢，每月能儲$8000作投資用途，目標5年內增值至100資産，想請教老師是否建議注入盈富作平均分配風險呢？

還想問一下老師推薦收息股中好似沒包括滙豐是否有其他原因。謝謝解答。

龔成老師︰

先講你現有持股︰

九龍倉集團（0004）雖然是優質股，但佢之前分柝左九龍倉置業（1997），而較為優質的資產，都去左1997度。這股可持有，但現時不要增持，日後可考慮轉到1997。

但由於24/2九倉開始停牌，可能跟私有化安排有關，但而刻無人知。所以要睇佢最終情況，才可決定下一步行動。

而建行（0939）雖優質，但只是收息股類，唔係咁適合你。

由於你年紀依然有增長潛力，我建議你慢慢將你以上持倉轉去一些較有增長力的優質股中。

盈富（2800）是包括50間質素不錯上市公司股票的組合，我所講架平衡風險係指佢有50間不同性質的優質企業，當某一行業出大問題，都唔會令佢有十分大影響。

匯豐銀行（0005）都在我優質收息股之列，佢雖然增長力大不如前，但平穏收息還是可以的。

你月供和現有資金可以考慮分配在以下股票︰

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
潛力股︰比亞迪（1211）、中生（1177）或福壽園（1448）

以恆指過去年平均回報10%計（連股息再投資），你每月投資$8000 + 本金$20萬，預用6年時間去增值至100萬，會較為可行和合理。

------------------------------------------------

Q15413：

龔sir你好，我每月可以用$3000月供股票（新手），請問而家/未來邊幾隻可以入得過？幾時入好啲？唔該哂!

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
潛力股︰比亞迪（1211）、中生（1177）或福壽園（1448）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）

由於月供股票這個操作，已經可以平衡左價格波動之風險，所以你任何時候開始你架月供計劃都得。只要長期保持"定時定額"咁去供，就可以了。

------------------------------------------------

Q15414：

成哥你好,我今年24歲,睇緊你80後百萬富翁既讀者2,1就剛剛睇完,有以下問題想請你回答我而家呢個組合有沒什麼需要改善呢?,謝謝。

最主要現時有正在月供股票
1:00823領展 月供$1000
2:01211比亞迪 月供$2000
3:02800盈富基金 月供$3000

另外有個銀行戶口 我稱之為B
1.持有$25000既港交所
2.持有$21000既中國鐵塔
3.持有$22000既碧桂園

現金就約有10萬,有兩個問題,
第一,是我呢個部署想早D草到100萬要幾耐先得?
第二係,想請問我B呢個組合需要轉番做現金?
同埋都想你比D建議我,THANKS成哥

龔成老師︰

1） 以你月供和現持有組合股票計，以恆指過去年平均回報10%（連股息再投資），你每月投資$6000，8年多後大約會增值至100萬。

2） 首先，你月供組合無論選股和資金分配比例，都做得很好。而你現有股票，港交所（0388）有質素，可長線持有。

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。由於這股有發展力，你手上有貨可長線持有。

碧桂園（2007），業務都算不差，但負債高，風險略高，雖然都可持有，但不宜持有太多。而一刻你唔需要賣出，但唔好再加注。

------------------------------------------------

Q15415：

老師您好，想了解 08627 同03333 仲有無機會分別升到1.5 及 25?

另外1478同435適唔適宜長揸?

龔成老師︰

旅橙文化（8627）主要在中國提供營銷服務，包括提供活動管理服務，以及設計與製作服務。此股上市不足2年，我一向都新股半新股都無興趣，因為真實面要慢慢先見到。

加上佢股價十分波動，估值困難，只建議小注，同時你要明白當中的風險。

恒大（3333）有賺錢能力，但負債情況不理想，處於極高水平，令這企業存有風險。對經濟好時，佢有賺錢能力。但經濟轉差，物業滯銷，資金鏈出現問題，後果可以好嚴重。

整體來說，這股都有質素，但同時間風險也不少，若投資只能小注。$25應該有機會上翻去，但你預係一個較長架時間。

丘鈦科技（1478）這股之前好波動，其實呢隻股本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

佢雖然有技術，但賺錢能力相當不穩。當環境逆轉，手機市場轉弱，這企業就成為較大影響的企業。整體來說，不過不失，波動是這股最大的風險。如投資這類股，不能太大注。

陽光房產（0435），是不錯的收息股。集團投資於香港的寫字樓及零售物業。寫字樓分佈於中環、灣仔、上環、尖沙咀等地，而零售物業則位於上水、將軍澳、元朗等。寫字樓與零售的所佔的比例，以估值計大約各半。

從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有投資價值。從長遠及超長遠的角度看，香港的寫字樓及零售市場會處於求過於供的格局，故長遠租金仍會平穩上升，因此有長線投資價值。

------------------------------------------------

Q15416：

老師你好，我是投資初哥。月入大約$55000，每月要供物業$18000，另有作月供$6000（金沙、比亞迪、盈富）

最近於較高價短入了兩手HKTVMALL（01137） 及阿里爸爸（09988）但其後股價不斷下跌。

現在不敢再作其他投資，老師認為我應該繼續持有嗎？在投資步處上有更多改善空間嗎？謝謝你

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

阿里爸爸（9988）有質素、有發展，此股可長線投資，你只要一直持有就可以。

香港電視（1137）你要留意翻佢有兩個風險。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。

所以，這股只合小注投資，大手就有少少保留。如果你持貨佔你組合比例唔高，可以守。

你在月供選股上無問題，只要長線進行就可以。但如果你想再直接買現貨，我建議你增加投資知識才再重新行動，會較理想。

學習方法有好多，例如多讀投資相關書本、年報，新聞和參與投資相關課程。本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q15417：

龔成你好，25蚊買入左兩手00763，請問應該繼續渣定放？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。進行財富增值，最理想方法就是"長線持有""優質股"。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，令你要承受這風險，你要明白這點。

此股可長線，只要唔係佔你組合太高比例，否則你可以沽出部份。

------------------------------------------------

Q15418：

大師，我依家所有錢買晒落阿里巴巴同中芯
放唔放好

龔成老師︰

其實進行財富增值，最理想方法就是"長線持有""優質股"。所以放唔放的重點，我應該睇翻這隻股票質素，是否值得你長線持有。

阿里爸爸（9988）有質素、有發展，此股可長線投資，唔建議你沽出。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。你可以考慮轉出部份或全部，至其他更佳的優質股上，長線會對你較有利。

另外，你要留意翻任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。就像你現時全資金放在2隻股票上，明顯係嚴重過度集中。

因此，你要建立一個平衡的投資組合，當中有不同的類別、不同的行業，這是最好的平衡風險方法。

------------------------------------------------

Q15419：

老師你好 舜宇光學2382 發展前景好嗎？ 想知道老師的分析謝謝。

龔成老師︰

舜宇光學科技（2382）有一定的質素，不過之前股價處貴水平，上年手機市場疲弱，佢都回至合理水平。

過往由於手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。

佢近期再被受關注，令佢股價被推高不少，現價已經有點貴，但又未算好貴。

這股可以長線投資，但現時最多只可以小注，你預佢中短期仍然波動。

------------------------------------------------

Q15420：

你好，想問下新世界長遠投資價值如何？
10.28入咗，準備再入

龔成老師︰

新世界發展（0017）不算差，本身有一定的規模，業務廣泛，從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。

但這類綜合企業，一般的增長力都不會太強，佢近年的生意亦只是平穩，你可以持有這股，但不要預佢有好大的增長力。

現時此股股息率達5%以上，已出現長線投資價值。但你$10.27已經入左一注，現在加注其實個價位分別唔大（每注隔離10%左右），你下一注最好等再回調到$9以上一點才再入會較好。

------------------------------------------------

Q15421：

龔成，由上年開始六月開始接觸你第一本書"80後百萬富翁" 之後，突然開發左自己既小宇宙，現年26歲，雖然職業生活穩定

但都處於迷茫年，係思索人生之際，有幸睇到呢本書，非常感謝，餘下兩至三個月睇哂你所有著作，本書對於用錢好省，諗過好多先會去買一樣野，到十月決定上你初班，之後直接上埋進階班

回想起自己，呢大半年，仲勤力過自己讀書，亦都好慶幸，睇到你第一本80後，其實我之後都不斷介紹朋友睇，不斷借呢本書比其他好友。

之前股票班最後一堂，無泥得切親自道謝，但都想你知道，我會覺得你係一個對我好重要既人生教練，你教既野同書中既野，我領悟到 唔單單係財務方面知道，其實放大睇泥，多方面都好岩洗。

非常感謝！
今日我又諗番起自己上年九月生日 為自己定左四年，十年，十五年既目標，正如你80後所講的五點。

有緣再見，祝 身體健康 同
快啲可以買到你既獎勵

如果第時有幸你搞投資團體
我都希望自己日後有足夠實力
可以與你合作。

決心 同 自信
加上自我態度
的確好重要！

龔成老師：

可以幫到你實在太好，這亦是我一直想做的！

我一直都希望，自己在賺錢之餘，可以對社會有正面影響，可以幫到人，我相信，我做到這點！

其實，每個人的力量好強大，我18歲時，完全無實力，有的只有決心，深信自己會成為有錢人，深信自己會好成功。

每個人最初都未有實力，都好普通，但就係有目標，「相信自己能做大事」，之後就真的做到大事！

你要加油！我期待你完成不同的目標，我地之後總會再見到的，到時你可以話翻比我聽，你已經去到有幾成功！加油！

------------------------------------------------

Q15422：

你好！昨天上完你的進階班，得益不少非常感謝。在課堂得知你在南區住，我也是，你對南區啲樓有冇研究?

我正研究投資係邊到，你對在海怡半島附近正起緊的新樓和黃竹坑的新樓有咩睇法？

其實我都有睇下其他地方，例如啟德丶將軍澳丶元朗，但對呢啲地方不太熟，你覺得投資係南區的樓值博率高嗎？

龔成老師：

南區有了地鐵後，投資價值增加了不少，因為南區本身是一個好近中環的地方，這是香港最核心的商業區，因此，海怡半、黃竹坑都有一定的價值。

不過，新樓的呎價太貴，我自己就保留。之前黃竹坑地鐵站上面其中一期，地價都去到約18000一呎（這只是地價），日後落成後，相信建其他成本與基本利潤，點都要28000-30000一呎。

至於海怡半島再入去工業村的位，該發展商投地用左或百億，是當時的地王，我相信佢的定位，如同鴨脷洲另一邊的南灣樓價，相信會好貴。

反而當區一些舊少少的樓，會更好。我相信這區有值博率的。

------------------------------------------------

Q15423：

老師，你好。本人29歲，沒有任何投資經驗。 打算月供股票，一隻股票月供$1000。

計劃開始時月供$3000 （分別是盈富，置富，煤氣），之後增加至$5000 （另外增加　恆基，匯豐 或 恆生） 這個組合可行嗎？ 謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你計劃中的置富（0778）、匯豐（0005） 或 恆生（0011）都只是收息股，增長力欠奉，唔係咁適合你，你可以用下面股票代替。

平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）
潛力股︰比亞迪（1211），中生（1177）或福壽園（1448）。

同時間，你要去多讀投資相關書本、年報，新聞和課程。本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q15424：

早晨成Sir, 想請教2778冠君產業信託, 現價是否合理, 感謝!!

龔成老師︰

冠君產業（2778）有質素，是不錯的房託，不過現時息率就唔算好吸引，如買入不要太大注，分注慢慢入較好。

佢擁有及投資於提供租金收入的寫字樓及零售物業，主要投資位於甲級商用物業，房託定明要將可分派收入的9成以上作派息。現時擁有花園道三號（前稱花旗銀行廣場），以及朗豪坊兩幢地標級物業，分別座落於中環區及旺角，總樓面面積達293萬平方呎。

佢所持有的兩個物業都有相當的質素，但花園道三號過往租金有不穩情況，至於朗豪坊，過往雖然呎租不斷上升，但在香港零售市道比過往較弱的情況下，往後上升幅度將不及過往。

花園道三號有行業集中風險，以及香港商業區轉移的問題，物業地點優越，這在往後都不會動搖，但在企業節省成本，以及香港其他商業區發展前提下，租金升幅將出現跑輸大市情況。本身雖然優質，但過往租金都太高，市場壓力令其調整，到市場適應後，長遠才會趨向平穩。

綜合而言，這房託有少少風險，當香港零售市道不景，又或金融業受衝擊，都對其收入有影響，最終令股息有所波動，但從長遠及兩物業亙補的角度而言，當中的波動只會在中短期出現，而且不算大。

反之，到時股價的波動會更大，因為投資市場是一個敏感的地方，任何與企業有關連的因素，就算不會造成核心影響，也會令股價出現明顯的波動。

所以，這股可投資，但現時值博率未到最吸引，分注小注可以。

------------------------------------------------

Q15425：

龔SIR你好，我36歲，1每月薪24K唔多，現在面臨一個人生交义點，因為有小朋友，決定搬大D換樓，而家猶豫緊到底按揭128萬定係按228萬，前者可以減輕每月供樓壓力

如果選擇按228萬，我就可以有100萬流動資金，再可以清還到另外28萬既銀行現金分期，咁我每月扣除供樓及其他開支後

就可以儲到7000蚊左右，因為我投資真係零經驗，我家人建議我將100萬流動資金攞去做定期每月賺2000息。

但我想請教一下，以我既情況，有冇方法喺而家呢個經濟環境可以更有效率去將呢100萬流動資金錢搵錢呢？唔該哂龔SIR

龔成老師︰

做按揭128萬定係按228萬，個考慮重點應該係個100萬的機會成本。一按一般利率都唔會太高，你可以用這100萬先還清較高息貸款，再用來買優質股增值，長線會較有利。

現在你每月儲到的$7000，可以5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

由於現時大市只在合理區，你現有100萬資金（扣除還款後）可以先投入一半。餘下一半和每月所儲倒的資金，就等大市出現一定程度的下跌，才大力度掃貨。

相信這個安排對你最有利，但提翻你用較大金額按揭，的確會令你負債風險增加，你要明白這一點。

------------------------------------------------

Q15426：

龔老師，你好！近日我購買了你的作品 ，在閱讀中看中了1972大古地產這一優質股，但想請問現時的社會情況下，如我想買入的話，你可否給我一些建議，謝謝。

另外，有一好消息和你分享，由於前之前因肺炎的不利消息，令股市出現大跌市，我趁此機會購入了1448福壽園作長線投資。

龔成老師：

太古地產（1972）是優質股，可以作長線投資，佢持有的商場等資產，基本上是好強的資產項，只是由於中短期香港情況較弱，令佢這方面的賺錢能力較弱。

只要我地長線投資，就明白這是好機會，現時是合理區，已經可以分注投資，但最好同時留有一定的現金，不要用盡。

至於福壽園（1448）是有潛力的企業，你可以長線持有，但這股不建議太過大注。

------------------------------------------------

Q15427：

老師，好耐之前我已經想開網店，等待你回覆的期間，我決定左小店的發展方向，亦都不停練習去設計產品。

今日收到你的回覆，我下決心會大步向前行。

老師，我想話你知，有人因為你的說話而改變，而努力去生活。你做緊的事好偉大。

多謝你啊！

龔成老師：

多謝！我希望對社會有點貢獻，我過住睇左好多成功人士的書，都受到他們的正面影響，從而相信自己，完成一個又一個的目標，所以我今天算是有點成就，都希望幫到別人！

你有目標及方向，就要努力進行，你要明白，過程中一定有困難，這是正常的考驗，你要加油！保持一團火！不要忘記你今天對自己的期望！

------------------------------------------------

Q15428：

老師，我們應該什麼時候止賺？

龔成老師：

如果是優質股，我地可以永遠持有。
當然，都可能有賣出的時候。

第一，市況處於狂熱期。

第二，股價已遠超其合理值。

第三，有另一個更優質、增長力更強的資產，將資金轉去。

第四，這企業的質素轉差，已不再是優質股。這時無論賺蝕都要賣出。

------------------------------------------------

Q15429：

老師，德昌電機控股(179) 如何？

龔成老師：

德昌電機控股（0179）本身有一定的技術，佢係全球最大的驅動系統及驅動部件供應商之一，其驅動系統及部件用於汽車、家居用具、辦公室設備、工業產品、消費產品及醫療儀器。

佢產品系列包括驅動子系統、馬達、螺線管、微開關、軟性印刷電路板、基建自動化及機械控制系統等。業務遍布二十個國家。

這企業有一定的質素，近年生意都有增長，但就不是高增長，只能視為平穩增長，往後發展都正面，但不要預期會爆得好勁。現時估值合理。

------------------------------------------------

Q15430：

龔老師，珠海的投資房子沒有任何裝修，若要出租，必須投入15萬裝修費用，租金收入約2500-3000,是否應該投入15萬裝修出租？

龔成老師：

可以。

預期回報為$2500，一年為$30000，投入資金$15萬，回報率就是20%，這是一個值得投資的回報率。

當然，如果可以投資更少錢，只做表面的裝修就能出租，當然更好，因為同時要考慮賣出時，是否能將裝修金額加到樓價裡。

如果$15萬是最基本的數，就投入。

------------------------------------------------

Q15431：

龔成你好，我準備月供以下股票，各$2500, 3,12,66,1928

請問3同270邊隻好啲？定加上270，每隻各月供$2000好啲？謝謝

龔成老師：

上述都是優質股，的確難選擇。

由於本身打算供恆基（0012），即是當中已包了煤氣（0003），那你就唔需要供煤氣。

你5隻，各供$2000是可以的。

------------------------------------------------

Q15432：

老師，其實我都好想參加你嘅課程呀，不過要等我搬左先，9月。希望到時可以當面同你哋學嘢。

月供股票：每間3千，共1.8萬/月

2800 盈富
12 恆基
27 銀娛
388 港交
386 中石化
2777 富力地產

希望年中睇吓個市點樣，可以再月供多5千其他嘢

另外 打算用流動資金買以下，我set嘅價位是否太理想？

1211 比亞迪 1000股 @45
1177 中生 1000股@10
1448 福壽園 10000股@6.8

總共$123000

我share你嘅文章俾我細佬，希望佢（廿歲尾）生活上可以更有動力！打算俾少少錢佢學習投資，令佢學習生活不只是幸運及

龔成老師：

中石化（0386）及富力地產（2777）無另外幾隻咁強，你可以每隻只供$2000，盈富（2800）就供$5000。

至於比亞迪（1211）、中生製藥（1177）、福壽園（1448），你可以等這些價位。不過，這3股都是潛力股，而潛力股始終有風險，合共佔你組合的比例不能太多。

你細佬是黃金年齡，加油，要佢有夢想，有目標，你可以送本《80後2百萬富翁》比佢。

------------------------------------------------

Q15433：

龔sir，想問下內地嘅航空股如何？國航、東航、南航宜家都好似係低位。唔該！

龔成老師：

航空股一向的投資價值都不算高，風險高，賺錢能力不強，增長也只是一般。

唯一的賣野是現價唔貴，但考慮佢地的質素，只能推算現價是合理區，投資價值中等，如果回多1成會較好。

------------------------------------------------

Q15434：

你好, 我當時$54 持有地鐵, 但現在眾多不利因素都影響它未來賺錢能力, 雖然基本面仍不錯, 但這些負面因素, 在未來數月仍存在

我有打算把港鐡現價賣走換成其他有朁力的公用股, 例中移動, 想問問你的意見, 謝謝.

龔成老師：

雖然港鐵（0066）在中短期仍會弱，但長遠來說，佢是有一定的質素，唔建議賣出。

我地投資一定是長線，中短期不利因素，只會對股價有短期影響，只要唔理佢就得。如果你將資金轉其他，當香港回到正常後，港鐵的反彈可能比其他大，其實對你會無著數。

------------------------------------------------

Q15435：

老師，想請教下你對0694等看法，以下是我的想法：

0694優點：航空業中負債比率低，盈利穩定，經營現金流年年正數，現時受限於貿易戰及疫症影響PE較低，息率較過往高。

缺點：流動負債較高，ETNET各大行盈利預測是年年遞減。

到底是這股票過往兩年一直被低估，抑或是兩年前一直被高估而現在均值回歸？

這股票是否仍有投資價值與值博率？感覺上同行業中這隻已經是較穩健的公司。如有機會可否對這公司作出詳細分析。

龔成老師：

你都講出了部分要點，其實最主要是機場定位。

北京首都機場股份（0694），近年質素有下跌情況，受到北京大興國際機場轉場方案，令航空及客運量下跌，而這企業會採取新措拖去減低影響。

當中的轉場，以及新機場費用，會令這股的盈利減少而這因素都反映在股價上，所以你見佢近年的股價表現較弱。

整體來說，首都機場仍有佢地位，但質素的確有少少跌左，賺錢能力減，整體只屬中等的質素。

現價已反映新機場等不利因素，現時的估值合理，但由於本身有風險，因此不建議太大注。

------------------------------------------------

Q15436：

老師你好。其實我依家有一層村屋， 自住中， 買既時候都唔算平 ， 依家一直供緊 ， 供13000， 仲有28 年還款期

年齡：33
月收入：39000， bonus 大約一年十一萬
因之前理財不善， 要還16000蚊， 仲有24 個月還款期
每月供hsbc 2500蚊 , 因公司有折供hsbc , 三送一
月供 00012 2000蚊
月供 823 2000蚊
洗費大約 4000 蚊
唔洗比家用

stock holding :
00005 - 3200 股
02778 - 10000 股
00778 - 10000 股

cash hkd 200,000

想4-5 年之年換番另一層樓齡較新既村屋， 係咪唔可行？
大約心儀一d 500萬-600 萬村屋

龔成老師：

上述月供及持股，都是有質素的，雖然中短期企業業務較一般，但長線無問題的。

但要留意，匯豐（0005）增長力不強，只是收息股，不過由於你有折供，所以保持進行都得。

另外，留意翻房託比較會否較多。

由於你這刻要還款，儲錢較難，只可以話這刻保持過還款，到還完後可立刻加大投資。

目標5年後換樓，唔係唔得，但暫時仍要加大努力先得，因為你這刻本金不算多，令滾存財富不多，而你要2年後才可有更大現金流。

你這刻先從加大儲蓄開始。同時，集中投資一些平穩增長股，小注潛力股，提高組合增長力。

------------------------------------------------

Q15437：

老師，之前一直都有留意領展，但始終覺得股價太貴，但近期因疫情影響，令到股價下跌了唔少，於是在78元入了少量，希望若股價再落以分段方式吸納。

我想問問，黎緊未來幾年領展的租金收入有機會因零售不景而減少，而且也覺得領展在內地的物業投資也屬較高風險

想問問老師領展是否已到高速發展的頂位，未來只是一個收息股，或是我可以視領展為平穩增長股呢？我本身都打算長線持有，謝謝老師

龔成老師：

領展（0823）是平穩增長股，佢早幾年已過了最高的增長期。

佢中短期會較弱，香港情況對佢一定有影響，但只要是長線投資，根本不用理會。

這是優質股，質素無變，有長線持有的價值，你可以分注投資，但由於這刻仍未算平，因此，唔好用盡現金。

------------------------------------------------

Q15438：

龔成老師，如果我每月可以有25K投資，請問3年內點樣做到150萬？

還是月儲30K，機會會較大？謝謝

龔成老師：

每月投資$25000，一年就是$30萬，3年就是$90萬。

$90萬增加到$150萬，不是不能，只是3年時間，存有較大的不確定性，因為企業成長往往要較多時間。因此，你加大投資到$30000是較好。

至於投資方向，你可選擇平穩增長股，唔建議太過進取，因為增值的時間唔算多，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

另外，以你的情況，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15439：

成哥,本人今年20歲大學生,自問可以承受較高風險,以下是我的月供計劃: 0027 $1000, 1177 $500, 1211 $500, 2800 $1500 請問這個組合可以嗎?有什麼建議可以令他更優質?

還有請問你月供使用中銀戶口嗎?想問那個月供平均買入價是如何設定較好?

本人現在兼職月入大約3500元,股票現金每月大約可以儲到五千元,這個數量可以接受嗎?

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股不用太多。

不過，你話你可以承受風險，因此，將部分資金投資潛力股，可以。

你上述的月供計劃，可以進行。

我自己無做月供的，因為當你掌握到企業平貴及捕捉到大市冷熱時機，就可以唔做月供。不過，對98%的散戶來說，利用月供是較好的做法。

你可以在中銀做。

月供不是設定買入價，而是設定金額，你唔好理中短期股價，保持月供就得。

至於你現時的儲蓄投資金額，可以，你保持進行就得。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15440：

老師，之前高位買入左2388，11同12
現價跌左3成
請問你覺得我好唔好止蝕

換其實更平宜的好股
另外我1038係$68高位重注左
你覺得我好唔好溝淡 定 再睇定先？

龔成老師：

首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

恆生（0011）、中銀香港（2388）都是有質素的，不過同一行業唔能夠太集中。恆基（0012）有質素。全部可以持有。

長建（1038）是有質素的股票，不過，中短期會較一般，要長線先得。要耐心，歐洲要時間先可以好轉。

至於是否加注，要睇翻這股佔你組合的比例，以及你持有現金的情況。如果這股已佔了一定的數量，就唔好再加，否則有集中風險。

簡單來講，唔好比過往的買入價限死左自己，要睇翻財富與組合的比例。

------------------------------------------------

Q15441：

龔SIR,你好, 我近來報讀你的投資倍升股課程, 亦有看你的著作, 例如80後百萬富翁, 選股勝經, 很有啟發性, 相信對我未來投資發展很有幫助。近來人生到了另一個轉向，希望老師了解本人的現狀和投資策略，給予意見。

本人現年44歲, 是海外原材料中介貿易公司東主, 由於與供應商約滿, 而近來營商環境難以維持, 決定結束生意, 計劃與家人搬到馬來西亞生活, 減低日常開支。以下是我目前財務狀況,

想了解現時部署能否安全到達財務自由狀態, 畢竟過去馬來西亞生活短期內沒有實際工作收入，而每月生活開支預計是HK$25,000 , 所以希望使本金隨年月增長下仍可以利息租金來支持生活。

請老師看看我的投資組合是否理想，或有什麼改善地方，有否需耍變賣現有資產去換一些更高回報的項目?

資產表:

物業
1) 元朗村屋地下 (現時市值HK$6.7M / 按揭3.2M ) 自住 供12,500
2) 天水圍村屋中層 (現時市值HK$4.8M / 按揭2M ) 每月收租11,800 供8,050
3) 流浮山村屋天台 (現時市值HK$4.5M / 按揭1.6M ) 每月收租10,500 供7,300
每月所有物業實際總支出HK$5,550 (未計差餉)

匯豐債券基金 (風險2號, 屬保守平穩型)
HK$4M (年息約4.5%, 每月派息) HK$15,000

股票 (約1.45M)
0345 (HK$300K @$30)
1177 (HK$200K @$10.
2800 (HK$300K @$27)
0005 (HK$500k @$64)
2018 (HK$150K @61)

現金 (約HK$3M)

龔成老師：

以現時的財富比例分配，你物業較多，之後基金、現金，之後是股票組合。

暫時睇，物業方面佔比較多，但由於香港買賣物業成本高，因此，你保持這幾個物業就得，唔需要變動，雖然賣出後投資其他收息項目，會增加到現金流，但賣左你日後又買翻，成本太高，因此，唔建議變動。同時，你中短期都唔好增加物業的比例。

所以，資金的運用會偏向其他的工具。就算固定資產，如車位，暫時都唔考慮。

至於基金，現時都有4%、5%，其實都不差，可以持有作收息。

比較好的分配，是善用你手上的$300萬現金，將當中$200萬投資收息股。$100萬現金作備用。

$200萬投資6%股息的股票，平均每月收息$10000，連同你本身的基金收息$15000，大約為$25000。

例如港燈（2638）、深高速（0548）、香港電訊（6823）、工行（1398）、置富（0778）、陽光（0435）等收息股都可以。

雖然都有考慮過年金，但你年齡唔算大，這刻投資又唔太適合。至於債券，本身你又有債券基金。所以，相信在平衡與現金流上，將資金分配到收息股，是最好的選擇。

------------------------------------------------

Q15442：

龔成老師，我係你投資班既學生，嘗試分析1257，希望你比d意見。辛苦你啦！

1257 中國光大綠色環保

中國光大綠色環保是中國光大國際17年分拆出來上市的企業，以生物質利用供熱供電、危險固體廢物處理、土地修復、光伏發電和風力發電為業務。

5年業績
年度：2017／2018／2019
收益（億）：4581／7002／9280
盈利（億）：957／1331／1647
每股盈利：0.51／0.64／0.78
每股股息：0.09／0.125／0.16
ROE：14.8／14.7／16.5

中國光大綠色環保屬於環保行業，近年受惠於政策補貼。中國的政策支持發展新能源，也加速對每年危險廢物（包括醫療廢物）的處理。

中國本身作為農業大國，為利用生物質能源提供了有利條件。至於每年工業/醫院製造的危險廢物，過往少有無害化的處理措施，因此這市場也算是新的市場。

近年中國推‘無害城市’，加快發牌給處理這類廢物的企業，加大扶植。

中國光大綠色環保雖不是壟斷企業，但也是生物質利用業務中規模較大的行業，而且無論是生物質利用/危險廢物處理都需要較大的資本投資在設備建設，因此競爭者入行門欖高。

中國光大綠色環保收入和盈利保持相當升幅，19年有32%增長，而毛利率三年維持在30%水平，純利率則稍有下跌趨勢，由17年20.9%跌至19年17.8%。

主要業務為生物質利用，佔主要收入的75%，其次為危險廢物處理，佔收入15%。企業19年和來年都有新的項目，包括已落成、在建和正在籌建的項目，同時部分項目能納入政府的補貼範圍，反映企業正值增長快速的時期。

企業近年調整產業結構，加大對毛利率較高的危險廢物處理的投入，對沖生物質能源方面政府補貼延遲所對現金流造成的影響，各分部對EBITDA的貢獻中可見危險廢物處理部分由18年16.4%上升到19年的19%。

同時企業積極優化生物質利用的產能，由直燃發電供轉變為電熱聯供，提升產能。

而危險廢物處理仍較多處於建設階段，相信後續營運時能帶來更大增長。另外，土地修復業務雖然佔比不大，但發展迅速，同比增長145%，也是企業加大發展的項目。

中國土地污染嚴重，為此項目發展提供了較大的空間。

財務數據上，企業EBITDA利潤率維持在30%附近，營業額增長不錯。

但三年的經營活動現金流為負數，這是因為盈利中合約資產比例大，而合約資產即現在預先墊支建設，到營運期才可得到的利潤，因而未有即時的現金流入。

證明企業一直墊支建設，及融資製造正現金流。企業建設投入大，導致負債水平偏高，流動比率在19年為149%，負債權益比率為151%。

雖ROE大於15%，但財務槓桿也逐年增加，19年的槓桿為2.54。高負債造成的融資成本也較高，利息覆蓋率為4.1%。

風險因素方面，企業的負債水平偏高；受中國政策影響較大（如補貼延遲，或政策改變減少補貼以整合行業結構，供電行業可能會被政策限制價格）。

在有危險廢物處理的業務的其他企業中，海螺創業的水泥窖協同模式下的成本相對能控制的更低，長遠來說光大綠色環保這方面的競爭力或許不足。

估值方面，若市盈率估值法，每股盈利假設有12%增長，行業市盈率（參考東江環保，海螺創業，綠色動力環保）為8-12. 但現時PE為4.14，可能因為生物質能企業面對更高的成本（原材料回收和運輸，且先墊支的營運模式）（？）。

因此調低此行業的市盈率為5-8， 再加10%緩衝，計得4.21-7.69。

投資策略：此股有一定質素，現價處於便宜區，但有一定風險要注意注碼。

問題：

1. 因為哩個行業較新，企業數據少，比較難分析，估值較難。請問咁樣分析合理嗎？

2. 文中有（？）既地方都是較不確定的推斷，唔知啱唔啱？

3. 企業負債高，而母公司光大國際財力雄厚，應否納入考慮範圍，令風險相對減少一點？謝謝！

龔成老師：

首先，我見你分析得不錯，能講出影響這企業的重點，這些因素會對企業發展，盈利，以及估值上都有影響，你上堂學很不錯，同時自己努力過。

1）推算模式是合理的，但我們分析時，要多考慮將來的情況，例如市場現時比佢較低的市盈率，除了考慮佢的項目外，同時擔心這企業的可持續發展，擔心中國將較多資源投放在其他行業，對這個行業的利好因素減，這就影響佢將來發展的持續性，因為佢的生意模式，部分並不是一穩穩定性的項目，這會為將來帶來風險。

因此，要多考慮將來的情況，如果考慮有風險，就要調低估值，不過你估值方面大致正確的，但我建議再保守少少。

2）其本上是對的，但佢都有不同的營運模式，不是只得一種。

3）會加少少分，但一般來說，凡見到負債較高的企業，扣分的程度一定會高過加分，分析一般以保守為主。只是扣分的程度會減。

這企業負債雖然未到危險水平，但近年增加的速度有點快，令風險增加，因此投資時不宜大注。

------------------------------------------------

Q15443：

老師，想請教。先分享少少自己既Background

小弟今年29歲，從事保險業，年薪大約$240萬。
在投資方面小弟現有一層物業，樓花未收樓。同埋有約$20萬股票。另外約有$150萬現金存放在按歇户口，息率大概2.3%。仲有一系列既保險和儲蓄產品。

小弟想請教成哥既係，我一路以來都好希望可以為自己創造事業以外既被動收入(每年約5%左右回報)。暫時淨係得月供股票既概念，大概都係買煤氣、領展、港鐵等等既idea，不過未開始。另外之前睇書見到有買債券和REITs的概念，不知道是否適合自己。

所以好想請教一下我呢個profile可以有咩創造被動收入既意見？同埋如果係月供股票因為我沒相關經驗亦想請教應如何選擇？

多謝成哥指教

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你未有選潛力股的能力，未有掌握投資時機的能力，就可以簡單地投資盈富基金（2800），利用月供模式都得。

另外，銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

所以，你這刻唔需要心急追求現金流，反而要集中「增值」先。

如果你每月能投資$50000到月供股票，盈富及其他平穩增長股，目標是10%回報的類別，15年後，你都有$1860萬，到時再轉投資現金流項目，對你現金流最大。

------------------------------------------------

Q15444：

龔成老師你好， 若有時間能否指點一下我的理財方向：

以下是我基本資料：
年齡：27
理財：工作4年共約有現金存款$300000，無投資習慣
收入： ＄18000 /月
儲蓄 ： ＄10000/月
欠債 ： 無，卡數即刻找

每月支出：
(A)家用 : $2000
(B)車費 ： $1000
(C)膳食：$3000
(D) 娛樂：$1000

目標：
兩年內連現時存款達至80萬

現時打算計劃 ：
＄10000 作月供股票 ，因無投資經驗 ， 故打算月供$5000一隻較穩陣的，匯豐/港燈/盈富。另外$5000想選一隻較進取或風險中等的， 請問有何建議？

而現時本身的存款，又可以如何打理？
而我將會開外幣戶口，有閒錢會買外幣，如日圓等等。

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你現時只集中在現金，這會浪費了資金的機會成本，因此，你點都要學下基本投資，唔需要進取，但起碼要幫資金有基本的增值。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以做月供股票，每月$10000。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於匯豐（0005）與港燈（2638），雖然本質穩陣，但增長力弱，只是收息股，而你這個年齡應該是增值的黃金時期，因此，不太建議投資這兩股。

至於外幣，因為原理始終是貨幣，長遠會貶值，因此，如本身無特別需要，唔太建議投資。

------------------------------------------------

Q15445：

成哥你好，小弟睇左你既post好耐。想問下你308，1333及336

308，而家黎講好似算處於低位，而且負債好似唔多。

1333，之前被美國起訴而令股價下滑，但公司話未收到起訴文件，而家好似算便宜。

336，集團本質好似唔錯，但股價不斷下滑，現好似在合理區。

成哥請問這3隻股如何，邊隻會較好?另外想請教如何計算股價及內在價值?

龔成老師：

香港中旅（0308）佢有好多業務：旅行社及相關業務、酒店業務、景區業務、客運服務等。近期情況對佢的業務與股價有影響。

以佢現時的估值，都算合理，這企業都會增長，但就不是高速，而是平穩。

由於佢業務比較波動，賺錢能力又不算好強，因此優質度一般。這刻都有投資值博率，但不建議大注。

中國忠旺（1333）業務都算有增長，但賺錢能力唔強，股本回報率只是中等，整體價值一般，加上有起訴等風險因素，波動會較大。不是不可投資，但O你要明白都有風險。

華寶國際（0336）主要在中國從事研究及發展、生產、分銷及銷售食用香精香料、煙草薄片、新材料及日用香精香料。業務不差的，現價算是合理，但企業質素不是好高之列，投資價值中等。

你選股方向，有少少偏向「貪平」，但我地投資，應該以「質素」行先，然後再分析平貴。

如果要較有質素的，可考慮：盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於估值，並不是三言兩語能講到的，因為在我的股票班中，都要講約5小時先講得明。

------------------------------------------------

Q15446：

你好, 最近幫 65歲的母親整理股票, 有以下疑問, 希望你抽空解答. 謝謝!

背景: 自住樓已供完, 每月退休金可 cover 大半日常開支. 另有定期存款, 基本住院保險. 股票收入無短期用途.

5 匯豐 佔整個股票組合 ~35% (買入價: $100 以上)
3 煤氣, 66 港鐵 各 11-12%
6 電能, 823 領展, 2800 盈富, 3328 交通銀行 各 6-8%
941 中移動 4% (買入價: $90)
11 恒生, 3988 中國銀行, 3968 招商銀行 各 2%
945 宏利 2% (買入價: $259)
2628 中人壽, 2388 中銀香港, 2638 港燈, 939 建行, 1398 工行, 1186 中鐵建 各少於 1%

1. 銀行股佔整個股票組合 50%, 行業風險集中. 如要賣出部份匯豐會有不捨 (因買入價太高); 賣出其他銀行股由於佔比太少, 又似乎於事無補. 請問應用甚麼策略處理?

2. 現打算動用部份到期的定期存款, 趁這 1-2個月大巿較合理時, 加注電能 / 領展 / 盈富 / 港燈 / 買入置富 (視乎哪 1-2 隻跌得較低). 未來 1-2 年大巿上升時, 逐步賣出匯豐, 賣出的錢就回歸定存. 你怎麼看?

3. 中移動及宏利因買入價偏高, 所以賬面蝕本. 這兩個企業質素不過不失, 要回到原來買入價有困難, 但派息不差有 3-5%, 請問應繼續持有嗎?

4. 雖然有大量佔比少於 5%的股票, 看似眼花瞭亂, 但因已全部提取實貨, 收息沒有手續費的支出. 企業質素又似乎不差, 應維持現況嗎?

龔成老師：

以佢的年齡情況，應該選擇較低風險的組合，以平衡、收息為主。

1）要賣出其他銀行股，以減少集中風險先，至於匯豐（0005），大方向是要減持，但相信佢唔會一次過賣，所以可以收住息先，遲D先減少少。

匯豐不是劣質，但只是收息股，增長力有限，所以佢預左去唔翻高位，只是想留多少的問題。

2）可以用部分的定期，買入收息股，如房託、港燈（2638）、香港電訊（6823），這是長線或永遠持有的。匯豐可以逐步減持。

3）因為持貨不算多，因此可以持有，要上翻去的確難，但收息都可以。

4）大致可以。暫時未算好亂。

------------------------------------------------

Q15447：

Hello 龔 Sir,你好！ 想請教一下你， 由2019年反修例風波開始， 香港經濟前景似乎比較悲觀， 本身我月供股票組合當中包括了: 煤氣，恆地，港鐵， 領展， 長建。

長建我已經供咗四/五年，另外四隻供咗一年左右。 另外亦有一些中資股票， 例如: 平保，中生製藥， 比亞迪，華夏滬深300。

我在考慮是否需要取消部分香港股票或者減低供款。

我有興趣中國物管股, 中銀可以月供 碧桂園服務, 如果我減少月供港股, 改為月供碧桂園服務, 你認為值得考慮嗎?

想聽聽你的意見。
感謝你的時間！

龔成老師：

香港中短期一定會弱，貿戰、社運、肺炎，都是對香港有相當的影響，現時一次過出現，對香港影響好大，但這些影響並不是「核心減去香港的優勢」，只是經濟層面，在週期中令香港弱。

有好多香港的獨有優勢仍在，例如低稅、金融人材、法規等。

因此，香港唔會玩完，但就會面對一段時間的弱。

當然，香港及中國最高經濟增長的年代已過，就算肺炎等不利因素過去，香港慢慢好轉，也不是高增長，只是平穩型。

至於港股，當中仍有好多有質素的股票，睇下識唔識得選股。

因此，港股仍有投資價值，你唔需要太負面。當然，你將部分資金轉供物管股，可以的。但建議港股都要留部分。

------------------------------------------------

Q15448：

你好，發現左1928金沙2019年的數據入面佢每股盈利增長好小，但roe為45.73，可否講解一下？

龔成老師：

這主要由於折舊等因素，因為佢近年投入的新資產不算多，而由於過往已持有好大量的資產項，所以會由於折舊因素，令持有資產在會計上的價值減少左。

就算盈利無明顯上升，只要股東權益部分減少，都可以拉高ROE，所以，當我地分析時，要深入分析當中的結構。

------------------------------------------------

Q15449：

老師你好。本人有一朋友，現年60歲，有些資產配置的問題想請教，由於他剛退休。與前妻有一物業市值約700萬(已供滿)，由於現時沒有收入，考慮想將物業賣出

與前妻平分約每人350萬，再運用資金作一些穩定的投資以製造現金流，但亦有想過加按物業(物業是以女兒作業主)

將加按的金錢給回前妻，當買回前妻那部份業權，再將物業出租，因不知那種安排對他較好，他自己投資的知識亦不足，應如何決定?另，他自己與女兒已有地方自住。

龔成老師：

其實好睇佢有幾想將物業留比個女。

由於佢60歲，退休無收入，從財富角度，賣出物業，得到資金後投資收息資產，每月有現金流是最好的。

例如有$300萬現金，投資5%收息資產，每月$12500，對生活費都有一定的幫助。

如果加按，將現金分別給前妻，然後將物業出租同時供樓，雖然都會每月有現金流，但數目不會多。從財富角度，這對現時退休人士不是最好，但好處是能夠保住物業，可以留比個女。

所以，好睇佢與個女的想法。如果女兒已出來做野，每月能提供比你朋友一些生活費，而佢想咁樣保留個物業，都是可行的方法。

------------------------------------------------

Q15450：

龔成老師，我是股票新手

25歲，月入$26000 ，每月儲1萬，現有45萬儲蓄，打算將5萬用作股票投資。

最近屋企人買入1手匯控00005 $56作收息，我都買一手好嗎？雖然老師講過中銀仲好

唔打算月供股票，唔想每月扣$50手續費，同埋喜好一有錢就買一手。

如果喺 盈富、港鐵、港交所、匯控、煤氣、入邊揀幾個
老師會揀邊幾個？同埋點樣分配每隻買幾多手？
先多謝你

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

匯豐（0005）是收息股，因此對你來說，未必最適合。

如果你係新手，建議你只動用$15萬，餘下唔好心急用。你買入時可以分注投資。

你可以以盈富（2800）為重心，再加上港鐵（0066）、港交所（0388），現時大市在合理區，你已經可以分注投資（分注即是慢慢入，唔好一次過用盡資金）。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15451：

中手遊月供2千好？

龔成老師：

中手游（0302）主要透過合約安排於中國從事手遊發行及遊戲開發業務。

例如提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。

業務發展不差，但行業變化大，不確定性高，同時估值難，因此不建議投資太多。

你可以月供，但就不建議金額多，所以，$2000是否合適，要視乎你本身的資金情況。

------------------------------------------------

Q15452：

龔成老師您好！
本人係朋友介紹之下認識到您既page
先自我介紹一下

本人27歲 住英國 有一子
同老公共同儲到既現金 約一萬英鎊左右
由於仲放產假當中 暫時只靠老公收入 約£1800/月 每月儲幾百鎊左右

本人就冇擁有物業或其他資產
老公就係羅馬尼亞擁有一個單位 如賣岀去 都係£20000左右
本人亦結束左香港既銀行户口

我地兩個對股票投資一啲認識都冇 但因為已移居英國 無緣參加老師既股票班 加上冇親人係呢邊 黎緊有機會唔再工作 自己湊bb (倫敦childcare太貴 唔想浪費呢個錢 小朋友要2歲以上先有free hours)

所以真係好希望開始學習下股票投資 而唔洗打死一世工咁被動 我地亦想快啲儲到首期 係英國呢邊買樓

但最大問題係我地完全唔知道應該由邊度入手好 就算上網揾投資既課程都太多而唔知點揀 所以向老師求助

請問老師 我地應該先從邊度入手？

要學到邊啲最基本既知識先可以應用到英國呢邊既股票市場？老師岀既posts有邊啲一定唔可以miss?老師對我地現況有冇咩建議或指教？

感謝老師既時間同回答！

龔成老師：

我地理財，就是建立一個平衡的組合，這是一個財富分配的過程，由現金（貶值），轉為資產（升值）。最常用的基中一種方法就是股樓平衡，記住，投資唔係炒炒賣賣，而係合理爭取回報，長線配置資產。

你可以多認識歐洲的物業，尋找一些租合回報率較高，有增長潛力的地區。

同時，你可以多留意歐美的股票市場，如果未認識，最好就是投資一些指數基金，ETF，這是最適合入門。你可以利用「月供」的做法，一步步幫你地累積財富。

你可以上網找下我的書，又或睇下有無途徑在你果邊買到，書是你好重要的得到知識來源。以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（初版）

------------------------------------------------

Q15453：

龔成老師你好，其實Facebook一直都有like你的page，但未有時間去看你的作品。

最近因疫情的關係所以有空看你的作品，最近完成了80後百萬富翁，看到令我充滿希望，好像我也有機會做到一樣。而第二本80後2百萬富翁亦在開始閱讀，亦有信心能從中獲益良多。

我對於自己的狀況其實也有點迷惘，在看完你的書及facebook的分享後，對於現時持有的股票雖有方向，但沒有信心去做，故想詢問下你的意見求指引。

本人月入20k，暫未有月供股票。手持1478 2手12元入，2858 2手8元入，1829 2手 4.5元入，3309 2手2.6元入。

想問問以上股票是否都是非優質？是否可以全數放掉？但就是因為蝕錢的心理因素問題，一直持有至今⋯⋯

未來亦想月供5000元供票，希望可以長遠增值財富，而風險承受能力屬中上程度。

5000元的分配計劃為2000元1211，1000元2800，1500元405，未知上述組合是否夠全面？或請問老師有何推介或建議？謝謝。

龔成老師：

我地理財，就是建立一個財富組合，當中宜集中在較有質素的股票。

丘鈦科技（1478）有增長力，但業務太過波動，風險高，這股唔建議太過大注。

易鑫集團（2858）質素只是一般，持有價值不算好高。

中國機械工程（1829）質素算是中等，唔算強，這類股不宜持有太多。

希瑪眼科（3309）有增長力，但炒作多，風險較高，加上規模不算好大，這股唔建議太過大注。

至於月供方面，你可以盈富（2800）$2000、越秀房產（0405）、比亞迪（1211）各$1500。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15454：

老師你好。本人40歲，已婚。最近先開始認識股票，已開始閱讀你的80後，之後會睇埋其他書。

我有10萬流動現金，想買收息組合俾自己退休，應該如何選擇，預計55-60歲退下來；另有儲蓄保險（7年後到期），每月可儲$6000

打算月供$3000盈富，$1000煤氣，$1000港鐵，$1000領展/港交所，用黎留給子女將來讀大學用（我有3個仔女，預8-15年後用）

龔成老師：

你這刻離退休仍有一段時間，可以投資「平穩增長股」（但不是進取），而這刻唔需要投資太多收息股。

至於你上述選的股，已經是「平穩增長股」，方向正確。

你利用月供模式進行，可以。$3000盈富（2800），$1000煤氣（0003），$1000港鐵（0066），$1000領展（0823）。

你基本上保持進行就得。

至於$10萬，建議這刻只動用$5萬，餘下留現金等機會。比較好的做法是投資盈富，等你組合有基本增長。

------------------------------------------------

Q15455：

Hello 龔成老師
大慨1年前上左你既堂 令我獲益良多 謝謝你的教導！

最近睇緊《50值博倍升股》想問問 285 354 同埋 6869 如果要係呢3隻中揀一隻 你會揀邊隻投資呢？

同埋大慨邊個價位入比較合適？
謝謝

龔成老師：

3隻都是潛力股，如果我較睇好的，是比亞迪電子（0285），之後是中國軟件國際（0354）。

但你預潛力股的業務比較波動，因此，佔組合的比例要控制。

其實現價都合理，但就最好分注入，以平衡風險。

------------------------------------------------

Q15456：

龔老師：我今年28，想問下如果我本身要供樓（月供2萬，佔我收入1/3），咁我是否應該避免投資地產股？例如14，1972等等既股票。唔該。

龔成老師：

其實都可以投資地產類，但比例一定唔會多。

持有物業與投資地產股，雖然不是完全一樣，但都有一定的相關性，所以你可以投資一些地產股，但比例唔好過多，同時，最好等佢跌多少少先入，即是比起其他類股，這一類要跌較多先可以出手。

------------------------------------------------

Q15457：

老師，我覺得自己很沒用 工作多年都是白果，點可以令自己有成就？

龔成老師：

這刻開始，每日都要自己進步，每日用一小時，睇書、學野、建立一些事業等，總之每日要自己進步，一年後，你會完全唔同！

恆心是決定的關鍵因素！

------------------------------------------------

Q15458：

龔sir你好，我今年29歲，穩定工作，但吾係自己想做嘅野，但叫穩定， 月入23000。

之前少量買過中銀同匯豐收息，但早前已經賣曬， 目前存款60萬 ，近1年睇左你嘅Page想認真學投資理財，但又好想出國讀書

我想讀的科最少都會讀個四年⋯就會用曬所有存款甚至要負學債， 讀書時又會無收入⋯想問下你有咩睇法建議？萬分感謝

龔成老師：

你要計下，去讀書對你長遠發展，有幾大的好處？收入提高的確定程度如何？前景點樣？

除非你好確定，讀完書後的前途等因素，對你來說是好明顯利好。否則，如果只是「應該會好」，「唔太清楚會幾好」，就唔好讀。

為讀而讀不是好策略。

你最好用張紙，寫低你讀書後，預期的前途、收入、利好因素，比較一下讀與唔讀的利弊，相信會更加清楚。

------------------------------------------------

Q15459：

龔成老師你好，謝謝你一無私分享投資資訊及心得。

本人36歲有固定收入，三年前開始月供股票，但當時的金額並不多，所以現時倉位並不算多，現時總倉位約20萬，只持有及月供1177，1299，2800及上月開始供1810。

考慮現時環境，想請問是否需要調整月供選擇及金額。現時月供$7500，最高可調整至$8000-9000，有40萬現金。目標是月供組合能提供8-10%回報，謝謝。

龔成老師：

你現時月供的，都是有質素及增長力的股票，以你的年齡，適合。

現時大市合理區，由於你現金較多，可以加大至$9000，無問題。

同時，如果$40萬中短期無特別用途，可考慮將部分資金，投資在股票，長線。

最簡單是投資盈富（2800）等，平穩增長的類別，長線持有。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15460：

龔sir你好，我30歲持有大約70萬現金，睇咗你好多以前嘅Post都介紹新手投資者月供股票，我係零投資經驗，月薪大約30,000想用12,000做月供股票，$4000 盈富, $2000 港鐵, $2000 金沙, $2000 hsbc, $2000置富

1. 呢個投資組合正確嗎? 月供股票係咪都有得收息㗎？

2. 供四五年之後如何睇返自己嘅賺蝕情況？

3. 點為止係一個好嘅時機去放晒啲股票？

4. 係呢個時候月供算係一個好時機嗎？我當呢，$12000 係儲錢心態正確嗎？無限感激！

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，匯豐（0005）未必是你最好的選擇。

置富（0778）雖然是收息股，但由於都有基本增長力，因此金都可投資。

你可以供盈富（2800）$6000。港鐵（0066）、金沙（1928）、置富（0778）各$2000。

另外，月供股票有得收息，派息是以，你有幾多「股」去計，所以要睇下你到時供到累積有多少股。

2）你計翻自己每隻的投入成本，再計翻現價，以及你收了多少股息。

3）當股價已到了貴的水平（這要經過學習，因為平貴要計算企業價值），另外，當你見到大市進行狂熱期的時候，就是一個機會，賣出。

4）已經可以開始月供，$12000正確。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，你有一定的知識與經驗後，就要好好運用$70萬現金。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15461：

龔老師你好，我持有西王特鋼
跌幅6-7成，應否繼續溝淡？

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，唔好因為想拉低「買入價」，而不斷溝貨，這是錯的！

你要睇翻這股的質素，以及你想這股佔你組合的比例，我地要設計一個平衡、優質股的組合，長線投資。

西王特鋼（1266）業務十分波動，有時好賺錢，有錢無錢賺，這類企業質素不會太高。

佢業務只是商品企業，產品沒有差異性，只能賺取合理的利潤，不算是最高質的類別。

佢會比較受國際原材料價格影響，自主能力不強，這就會令盈利波動，佢會處於一個被動狀態。

建議你唔好再加注，原有貨，如不算過量，就暫時持有先，始終這股又不是零質素。

------------------------------------------------

Q15462：

你好龔先生，我想買美股，有咩建議

我有點心動想買可口可樂 ，卡夫（本人比較鍾意穩陣）

龔成老師：

美股都有好多有質素的股票，大型，有質素的，都是選股的方向，可口可樂 ，卡夫都是可以投資之選。

另外，你可以投資一追美股的指數基金，都是一個簡單的方法，例如領航標普五百（3140），就是追蹤標普500指數之表現，在港交所上市，買賣好方便。

------------------------------------------------

Q15463：

龔Sir ! 你好！ 好想向你請教下！我同先生沒有子女！ 年齡45歲 ！ 2019年年尾我「女方」失去工作、至今還未找到工做！

當時對香港的這地方已失去信心！ 再加上不想給丈夫有供樓壓力及眼見樓市一路會落！ 所以年尾決定賣樓！現在我們剛剛租住同屋苑的屋！

手上持有現金約350萬 ! 但我們都不懂投資！ 所以只好放在銀行開了3個月的定期食息！

經朋友介紹之下開始在Facebook看你地資訊! 所以好想請教一下你我們應該怎樣做！ 才可將這現金滾大！

還有、 想指教一下！ 如果將現金一次過去馬來西亞買樓又如何？是否將這些現金這樣用？

龔成老師：

以你的年齡，可以慢慢為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$350萬，暫時只能動用$150萬，因為大市在合理區，未到平宜區，加上你地經驗不算多，你要分注投資，同時留下一半資金。長線投資。

同時，你可以做月供股票，供「平穩增值股」+「收息股」，但就隨著年齡增加，慢慢增加收息股的比例。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

至於馬來西亞樓，要睇你地的熟識程度，只要是市區，租金回報率不差，而你又對當地的發展及租務市場有了解，都可以考慮。

其實海外樓，不少回報都比香港樓高，投資價值是有的，但當中一個關鍵位，就是「你熟識程度」，因此當地的法例、租務市場等因素，都與香港不同，你要先了解好，才可進行。

------------------------------------------------

Q15464：

Sir,想請教下,345長線揸可以嗎？謝謝
現價買入

龔成老師：

維他奶國際（0345）有質素的，只是這股之前升得太多，貴，現時回翻較合理水平。這刻大約處合理區頂，分注可以，但仍不能投資太多。

這股有前景，但不是高增長類別，長線投資可以。

------------------------------------------------

Q15465：

龔sir你好！我今年27歲，我無進行月供，因不想給太多手續費，只由day 1 睇你個page 開始，大概係呢一年一路儲蓄到10萬後，然後用黎入左以下股票-

386 @ 4.68 x 8000股
12 @35.5 x 1000股
823 @79.1 x 100股
11 @161.2 x 100股

想問下-

1. 386本身諗住用黎收息...但而家坐緊艇，雖然無咁快會放，但想問前景值得繼續持有嗎？如無，有無邊住收息股可推介？

2. 另外想重點投資係11號同12號呢兩隻股，每年大概用14萬投資，5年滾到120萬有可能嗎？分別用係2手11號，3手12號，假設股價同而家入手價差不遠。

3. 同埋想問下有無邊隻潛力股適合我呢個年紀投資？

謝謝！祝生活愉快，身體健康！

龔成老師：

1）中國石油化工（0386）本質不差的，但就預佢無增長力，因此，只是收息股。其實，以你的年齡，收息股唔應該太多，因此我地進行人生財富積，應該以「先增值，後現金流」作策略。

建議你轉其他。

2）唔建議太集中在某些個別股，這會增加了你的風險。另外，你增長力角度分析，恆基（0012）可以，但恆生（0011）增長力只是中等，不算好強。

3）比亞迪（1211）、中生製藥（1177）、福壽園（1448）、小米（1810）可以考慮。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15466：

老師 小弟在15年入左隻1816 平均2.7先到本金 而家1.9應唔應該走再入手匯豐好

龔成老師：

中廣核電力（1816）質素算是中等，並不是全無質責，不過，這股的增長力不強。

其實轉匯豐（0005）同樣是轉去增長力不強的股票，匯豐只是收息股。所以你轉匯豐其實意義不大。

如果你想提高翻組合的增長力，可考慮轉其他，例如盈富（2800），你可以考慮分2次賣出轉過去。

------------------------------------------------

Q15467：

老師，會唔會有機會介紹月供美股？

龔成老師：

因為美股不是我強項，所以唔會講得太多，我希望我所講的、推介的，都是我真的了解，有信心先講，唔希望自己亂講野。

最簡單的方法，就是投資追美股的指數基金ETF。例如在香港上市的領航標普五百（3140），基金之投資目標為追蹤標普500指數之表現，已經是一個簡單的投資工具，可月供，長線投資。

------------------------------------------------

Q15468：

你好，最近多看你的文章。本人月入16K. 要還學生貸款17萬。每月儲5千。剛開始月供股票。買了005 和2628。各500元。

你還建議買什麼股票？

有什麼方法能從投資來還清學生貸款？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」。收息股如匯豐（0005）、港燈（2638）未算適合你的年齡。

另外，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$3000。

你可以考慮盈富（2800）$2000。

另外再加1隻（每隻$1000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$3000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15469：

龔Sir ,你好 終於上你的股票班 好開心見到你

想問下 152 或 659 的投資質素如何？ 我已持股659 3000股 （10.2價）

龔成老師：

深圳國際（0152）本質不差的，但中短期受中國情況影響，相信都會弱，現價合理，分注投資可以。

至於新創建集團（0659）都有質素的，你預佢中短期較弱，現價合理，你持有可以，但唔需要太心急增持，預期股價都會波動。

（我鼓勵你多D上堂問我，互動的效果點都會較好）

------------------------------------------------

Q15470：

老師，你好
我係澳門人，30歲公務員，在澳門及內地都有置業，但除左磚頭，想開拓股票市場投資，依家先開始學習理財投資會遲嗎？

留意左老師一段時間，感謝你網上慷慨解答大家問題。
我想知澳門買吾買到你的書籍呢？
因為我完全初哥，無從入手。

我應該如何起步呢？
期待你的答覆
祝百毒不侵、好人一生平安

龔成老師：

30歲仍是財富增長的黃金時期，唔會遲。你可以睇《80後百萬富翁》、《股票勝經》。

你可以去水坑尾宏達買，若你見唔到，問下職員就得（又或向職員訂都可以）。

以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（初版）

你30歲，基本上可以好好利用股票作為財富增值。你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q15471：

龔成老師你好，本人今年38歲，結婚2年，並沒打算生小孩。

由於家庭經濟背景原因以及從小欠缺儲蓄概念，導致未能成功儲蓄，雖知現在開始已晚但也不想再擔誤。

我倆扣除所有家庭開支及日常洗費，每月約可儲$13000, 手持現金只有15萬，舊年開始月供媒氣每月$2000 。請問老師可建議一下資金分配及哪些月供股票或投資組合較適合我們。

以及這樣的儲蓄金額能有機會滾至100萬嗎？謝謝抽空解答！

龔成老師：

你這年齡，財富仍有增長力，但就不會太進取，會偏向追求平穩增長類的工具。

你可以做月供股票，集中供平穩增長股，每月$8000。

你可以考慮盈富（2800）$4000。煤氣（0003）$2000、希慎（0014）$2000。

單靠月供，仍未可以累積到$100萬，你應該在月供同時，努力儲現金。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15472：

龔老師，你好！小弟28歲，月入3萬，每月供緊$2000期金，扣除支出每月可剩$9000，0投資經驗，近期開始睇你既page！

我希望令自己既財富增值，希望35歲能夠擁有100萬以上，計劃下月開始月供股票，想問下我係咪應該攻多啲？唔好太保守？

如果月供股票$5000，打算$2000盈富、$1000領展/港鐵、$1000粵海、 $1000比亞迪，這樣可以嗎？請問有咩建議？

龔成老師：

黃金雖然是可持有的工具，但不用持有得太過多。

你這個年齡，是財富增值的時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只可以小注。做月供股票，每月$5000。

你上述都是有質素的股票，可月供，分配可以，已經可以進行。

但如果你想35歲有$100萬，單單月供$5000未夠，你最好月供都儲到一定的現金。現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15473：

老師，3333
中國恆大
點睇？

龔成老師：

中國恆大（3333）於中國從事房地產開發、物業投資、物業管理、酒店運營，另外，佢亦有你金融業務、互聯網業務及健康業務。

2018年，佢總共有約600個項目，完全或部分竣工，分布於中國各地，根據佢公布的資料，合共有計7225萬平方米。這反映佢業務龐大。

佢生意不差，企業有賺錢能力，但負債情況不理想，處於極高水平，令這企業存有風險。

整體來說，這股都有質素，但就有風險，因此若投資只能小注。

------------------------------------------------

Q15474：

你好，龔成老師。我想問國泰（293）長期有沒有甚麼風險

龔成老師：

國泰（0293）其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

------------------------------------------------

Q15475：

龔老師，之前睇過你教以租養樓。我係住澳門。一般細唐樓首期大約100萬，月供1000-15000。

收租6-8千。每月重要比一筆供樓。咁係咪達唔到以租養樓既效果了？謝謝你解答先

龔成老師：

對，無法達到效果。

主要原因是「租金回報率」太過低，令你難以得到息差的正面效果，這就無法有效利用借貸去創造財富的目的。

最好尋找一些租金回報率較高的樓，又或等回翻少少先考慮。

------------------------------------------------

Q15476：

你好，老師。我現年23歲，剛就業，月入$25500，每月儲蓄$10000，現有$70000現金，希望財富穩健增長。

剛剛開始了解投資，想問以月供方式還是一手買入較好？以長揸而言，恒生銀行（00011）及希慎（00014）建議嗎？謝謝。

龔成老師：

如果你本身知識與經驗不多，月供是較好的做法，因為可以有效減少風險。

你可以每月供$8000，盈富（2800）$4000、恆生（0011）$2000、希慎（0014）$2000，這些都是可以長期月供的優質股。

至於$7萬現金，暫時唔好用住，你要盡快在這段時間學更多投資知識，到時先用。

同時，現時大市處合理區，可以一邊月供一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15477：

你好，我同太太唔係好識儲錢增值，投資經驗淺，只抽過幾次IPO失敗收場多及做定期收息，睇過你啲文章後引發左投資興趣，覺得只係打工都唔掂，現希望有更好的投資回報。

資料背景如下：
我們都係35歲，月入共5萬，無任何物業，租緊村屋住，月租$12000，每月約餘有8千至1萬可投資，另有現金50萬及30萬做緊定期，今年6月到期。其次強積金每人約35-40萬。

問題1：
我都聽過你成日講咩叫月供股票概念，但實際操作如何?去銀行每月設定係自己自己每月過錢較好?每月係指定日子/都可以睇價位邊日低先手動買入?

問題2：
鐘意住村屋，但唔想長時間幫人供樓，現時應否買樓?村屋及私樓的投資價值分別係?

問題3：
強積金方面，每人約有35萬又如何部署?揀咩投資類別可以增值?應否定期轉換，例如價高賣港股去保本，價低賣保本去港股呢?

問題4：
根據我們現時狀況，有咩策略可以盡快做到財務自由呢?，約每月2萬。

希望你能盡力解答我們，多謝你啊。

龔成老師：

抽新股一向都不建議，因為大部分公司，都要先整靚盤數上市，之後就慢慢見真章，所以，要好小心。

1）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

2）香港經濟將轉弱，這會帶動樓價向下，不過只是中短期，唔好預跌得太多。而長遠由於供應不足，香港樓仍會向上，你可以留意下，會否中短期下跌，而你能夠把握到時機。

村屋做到的按揭，有機會比一般的私樓少，但具體情況，你最好問下有做開村屋買賣的經紀。

3）以你的年齡，其實可以進取D，強積金是超長線投資，可以大部分進取，小部分平穩型。到你年齡漸漸大時，才轉到平穩及保守類別。

4）如果你想財務自由，可以運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你要好好想清楚，自己會否買樓，如果買樓，現金就要留。如果唔買樓，就要將現金投資股票，令財富有效增值。

------------------------------------------------

Q15478：

老師，想請教領展（823)近期回落，是否合理價位呢？

龔成老師：

領展（0823）是有質素的股票，兩大原因令佢跌左，第一，之前升得太多，估值貴，現時慢慢回到合理水平。

第二，肺炎事件的令佢收入受影響，但這只是中短期問題，並不是長期的不利因素。這令佢股價受壓，不過只是中短期。

長遠來說，仍是有質素，現價在合理區，已可以分注投資，不過預佢中短期股價較弱。

------------------------------------------------

Q15479：

成哥你好，我今年27，之前買咗頗多儲蓄保險，有份30萬，同每月供緊3500，但上完你堂發覺買保險太多，這時候該買潛力優質股更升值。

但30萬保險的仲有二年先回本，現拎出來會虧3萬， 我不想錯過這刻的入市時機， 如我將這筆錢轉買優質股，是否不理智呢？

龔成老師：

虧損，只是一個心理因素。

你要分析，如果你這刻取回，有$27萬。

如果你繼續持有，2年後有$30萬。

你就要分析，你將$27萬投資股票，2年後能否大過$30萬，成功增值到的機會率是否高？

以現時的市況，大市約在合理區，你做到的機會率約一半半。

如果大市24000，可以將資金2年後增值到$30萬以上的機會率會有8成以上，相信值博率較高。

因此，如果大市去到24000，你就做，否則，就不變。

------------------------------------------------

Q15480：

嗨 龔sir 我是澳門人 投資新手 想問小注入是甚麼意思？

每次買時不是有最低入手價嗎？

龔成老師：

由於我地進行理財，是建立一個長期的財富，所以，你的方向是長期的比例如果。一般來說，小注即是佔比不多，每個人不同，例如佔股票組合5%以下。

買股票最少要一手手買，因此，上述所講的，是長期的比例。

另外，你可以利用月供股票，去更有效分配財富比例。不過，澳門好似手續費較貴，因此要自己衡量。

------------------------------------------------

Q15481：

龔Sir, 你好！上完你的課！感概良多！

自己還有幾年便退休，所以在為退休之後生活做準備。

眼見不少你的學生都是年輕人，真的感激你能正面地啟發他們，為自己將來而努力。去年的社會運動，令我很擔憂香港已失去一群為香港經濟發展的年輕人。見到你有這麽多年輕人fans, 希望你能繼續正面地啟發他們！其實要改變將來，是要靠自己努力。

正如我年輕時，也是努力不斷儲錢買樓。回想，我也希望能早點遇到你的啟發……

希望你繼續努力！我會遲些才報進階班，因近日工作太忙！

龔成老師：

香港其實仍有好多有質素的年輕人，只是大環境與過往不同，有部分人會失望，有部分人反而更加努力。

如果你有幾年便退休，要開始好好準備了，做好配置，得到過往努力的成果。大家加油啦，遲D進階班見！

------------------------------------------------

Q15482：

阿sir, 請問金沙，長建幾時先到便宜區？

另外我跟據你建議有以下持倉

100股恆生銀行@171
2000股置富@9.275
1000股香港電訊@12.32

另外有大約25萬現金，請問可唔可以俾啲建議？

如果我不大方便上股票班，有甚麼方法可以上你堂？（因為本人係返通宵的，所以時間好難就）

謝謝

龔成老師：

金沙（1928）你預去到$30以下先平。至於長建（1038），跌多15%左右。

至於你現時的持股，基本上都是有質素的，可持有。不過，就有點保守，都是偏向收息的類別。

如果你年齡唔算大，其實之後投資更多較有增長力的股票。部分平穩增長股，部分潛力股。

現時大市處合理區，已經可以分注投資一些股票，暫時可動用$12萬。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於股票班，有時會開星期六下午的時間，你都可以留意下。

------------------------------------------------

Q15483：

hello. 上年買左你本財務自由，好正

想請教下，我買左小注買左小米，平均價11.05,是否可keep 住買D？thanks

龔成老師：

小米（1810）本質不差，業務正面，有發展力，只是估值方面較難，股價變化大，但從前景睇是可投資的。

你原有的價可持有，現價就算比之前上左，仍是合理價，小注分注買入可以，只要合共不過多就無問題。

------------------------------------------------

Q15484：

龔老師，想問下中國石油857有投資價值嗎？會吾會刪除藍籌？謝謝

龔成老師：

中石油（0857）都算有質素，但這始終是商品企業，產品沒有差異性，只能賺取合理的利潤，不算是最高質的類別。

佢會比較受油價影響，自主能力不強，油價長期仍會向上，而中短期可以較波動。長遠增長力只屬中等，現價合理，小注投資可以。

至於有無機會無左藍籌，暫時睇，仍有價值的。

------------------------------------------------

Q15485：

老師，386，2628，3
以上3間公司見投資價值未?

龔成老師：

都有投資價值的，但以質素來說，煤氣（0003）較好。

中人壽（2628）的質素有少少減左，平安（2318）反而更好。

中石化（0386）增長力不強，只是收息股。

3間公司現價都合理。

------------------------------------------------

Q15486：

老師，我睇到一些網上報導，相信隻1211會長遠好強，你認同嗎？

巴郡副主席芒格（Charlie Munger）對近期股價大上大落的特斯拉股票大潑冷水，稱自己永遠不會買入，也不會沽空特斯拉。

96歲的芒格在出席洛杉磯的出版社每日期刊公司（Daily Journal Corporation）股東大會時，形容馬斯克很「奇特」（peculiar），認為他可能高估了自己，不過他也不是一直錯，特斯拉股價上揚是因為馬斯克可令人認為他可挑戰不可能。

值得注意的是，巴菲特和芒格執掌的巴郡，自2008年持有中國電動車公司比亞迪（1211）的股票。

除了談特斯拉，芒格又談論正應對疫情的中國。長期看好中國經濟的芒格稱，目前最強的公司不是在美國，「中國的企業比美國的強大，且發展速度也更快」。

不過他認為中國投資者把投資股市當作賭博非常不智。
蒙格咁睇好比亞迪，會唔會上到1000$？

龔成老師：

特斯拉股票我認為有潛力的，不過，當中都有一定的風險。

至於比亞迪（1211），我自己都有貨，一定正面的，但要耐心，中短期仍未得，但長遠，如5年後，相信會好唔同。至於目標價，我不知道，只知是一隻唔錯的潛力倍升股。

------------------------------------------------

Q15487：

老師你好,我手持00823約4000股 平均買入價約$87,呢幾日比大行唱淡,跌到入肉 想請教係咪都係唔需要理

以老師高見幾時先會回勇 繼續買入可以嗎?因為我覺得好平 謝謝抽空回覆

其實仲有樣野想請教,例如領展$75蚊,買100股不是應該7500嗎,為什麼會扣戶口7700的 查左好耐都查唔到 謝謝

龔成老師：

領展（0823）有質素，長遠有價值，唔需要擔心。

不過，佢中短期一定會弱，所以，你要平常心面對股價，長遠會慢慢好轉。不過，現時的股價只是合理，未到平宜，就算你買入，都唔好入得太急，要慢慢分注。

另外你要睇翻這股佔你組合的比例是否過多，單一股票佔整體組合，不能過多的。

至於扣戶口，相信是手續費及雜費等，一向都好貴的。

------------------------------------------------

Q15488：

老師，你對financial planner呢個行業點睇啊?

龔成老師：

本質是不差的，但不少銀行或理財機構，開始將這個職位變左質，集中在銷售方面，而不是真誠幫客戶分析財務情況及正確建議。

如果講整個financial planner行業，是不差的。

------------------------------------------------

Q15489：

老師，想問如果60萬咁樣分怖是否理想？重申29歲

20萬銀行定期
20萬股票，其中月供5000盈富，一手恒基，一手長和，一手匯豐，2手比亞迪/中生

18萬現金
2萬保險

同想問月供$5000盈富一年回報率點計？想知大約一年會有幾多錢連埋息

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你29歲，唔需要太多現金，除非有特別用途。

否則，可以再加多D在股票都無問題。

上述方向是可以的，選股都正確，只是比例的問題，可以加多D在股票。另外，匯豐（0005）只是收息股，未必最適合你投資。

至於盈富（2800），你預一年升幅連股息8%-10%（長期計）。月供初期並不明顯，要長期先有複利息的效果。

------------------------------------------------

Q15490：

老師，我算是冷靜入市的人，現時手上所有股都係在52週低或貼近52週低入，包括：2800，823，878，11，12。

這也是我的投資策略，看中優質股，等52週低，入市。老師覺得我這個操作有問題嗎？

我相信老師的一套，即價值投資，買股票係買企業，今日跌了400幾點，我入市買入823一手，相信此股優質

但疫情漫延，身邊許多朋友恐慌情緒升溫，我本不受影響，但聽得多了也覺得是否自己過份自信。。。。請教老師應如何自處。。。謝謝老師。

整個組合，即使今日跌了這麼多，暫時仍然帳面賺1%，曾經高峰時賺4%。但短期升升跌跌我都不作理會。

龔成老師：

有些地方要改正翻的。

首先，你的大方向正確，目標是優質股，買股票如買企業，耐心等低才買。

不過，52週高低不一定反映平貴，因為我地最重要分析的，是企業的價值，例如一間只值$100億的企業，佢市值由$500億跌至$400億，平嗎？當然不平。

所以，你要從企業的價值層面去分析，這是最重要比較平貴的因素。

另外，唔好理會中短期的賺蝕，無意義。

金朝陽集團（0878）質素則只是中等。

------------------------------------------------

Q15491：

老師，想問現時月供以下股票:
$4500 盈富
$1500 港鐵
$1500 比亞迪
$1500 恆地

想問如果股市下跌至24000/25000，應該用現金首先買入邊隻股票比較好？分注買入是指每一手一手咁買嗎？

仲有想問如果每隻供$1000-$2000會否太少，太分散？因為有啲一手萬幾蚊，甚至三萬幾蚊，可能要供兩年先有一手。謝謝

龔成老師：

如果落到24000，到時都要睇翻邊隻股跌得較多，從平貴度邊隻最平，最簡單當然是買入盈富（2800）。

到時會動用你之前儲起的現金，以一手手模式去入貨。

如果你認為現時月供太少，可加少少，但你要平衡月供股票與儲現金的比例。

------------------------------------------------

Q15492：

請問現價可入楓葉教育,領展,呷哺呷哺,友邦保險嗎?股市都跌不少

龔成老師：

上述股票，都有長線投資的價值，不過，部分不能入得太多。

領展（0823）、友邦（1299）會比較穩健，現價合理，已經可以分注投資。

至於另外兩股，都有投資值博率，不過注碼方面會比較少，同時你預中短期會弱。

------------------------------------------------

Q15493：

老師你好，看了你的page一段時間，都開始實戰投資，想做到部份收息股+部份潛力股的平均增值組合！但不想月供，想在價低時買入。現持有以下股票

建行（939）$6@2000股
中國電力（2380）$1.6@20000股
ETF（2840）$1079@20股
阿里巴巴 （9988）$205@20股

在收息股方面想增加港鐵（0066）和煤氣（0003），請問老師點睇？同埋咩價位入是便宜區及現市入可以嗎？

潛力股方面就想加入中生（1177），請問是否$10樓下先好分注入？便宜區又係幾多？

若現持有加上想買入的，是否做到一個平均投注組合？希望老師給少許意見，謝謝

龔成老師：

上述持有的，都是有質素的股票，基本上可以持有。中國電力（2380）的質素有少少向下情況，唔建議增持太多，現時已夠。

ＳＰＤＲ金ＥＴＦ（2840）是追黃金的ETF。黃金是貴金屬，都可以在財富組合中佔一員，但由於黃金無現金流，因此，唔建議投資得太多。

港鐵（0066）和煤氣（0003）是優質股，可投資，現價合理，都可以分注，但你要同時留有一定的資金，等平宜先動用。

中生（1177）$10以下先合理，你預先起碼跌3成先平。

整個組合來說，基本上都能平均的，但最好加上盈富（2800），對平衡風險有更大的作用。

------------------------------------------------

Q15494：

你好成哥， 有問題想向您指教，本人今年28歲，因為家中兩老長期病患接近退休年齡，希望父母可以安心退休後有能力讓他們安享晚年，自知本人如要靠每月只有萬6的月薪，這個愿望很難實現。

上年無意中認識了您所以開始嘗試接觸股票，很欣賞您的為人（雖然只是從你的文字上認識您）也很信任您的投資建議。

一年過去了，眼見自己的戶口並沒有什麼變化，很膽心也很徬徨，不知道自己現在的投資方向到底是否正確，希望您有空時可以給到些建議我

我手上現有的股票有
匯豐@2 ，$64.x 入； 新世界@2 ，平均$10入； 信德集團@2 ，約$3入； 比亞迪@2，約48入； 東陽光藥@5， $47入。

現金留有約十萬，和家人住公屋沒有任何資產。
所有股票加現金大約30萬

我希望2年後資產可以有一百萬，如果我接下來兩年每個月儲8千，2年後資產有機會到一百萬或更多嗎？

以上的股票組合要怎樣作改動會更好呢？ 有需要增加或減少哪些股嗎？ 或是你有什麼方法可以建議我去做嗎？

我知道投資股票要長線睇，不好意思，我有點心急，希望可以有機會盡快改善到家人的生活環境

希望老師您可以給我一個方向或建議，讓我可以有些信心繼續，麻煩您了
祝 身體健康！

龔成老師：

投資要長線，你愈心愈就易出錯，要平常心面對上落，集中企業的長期價值，而不是當刻的股票。

股價向下，有危有機的。只要你持有是優質股，就不用擔心。

現時持有的，基本上都不差，但部分增長力不強，例如匯豐（0005），只是收息股，對你來說並不是最適合，不要增持。

如果你想2年內累積到$100萬，以現時的情況，並不易做到，除非你集中投資潛力股，但這又會太高風險，因此不建議。

但如果有較長時間，例如以5年做目標，反而$100萬-$150萬是有機會的。因為有較長的時間去做增值，但你的選股方向，要投資平穩增長股+潛力股，你要再加大儲錢力度，然後努力選股，比市場快一步找到有倍升能力的股票。

大市有可能在中短期出現波動，這可能是一個難得的機會，要好好把握。

------------------------------------------------

Q15495：

hi 成哥, 你呢幾個月覺得大快活如何?
我覺得近幾個月反修例肯定對大快活好大影響
但我而家覺得佢都好抵下.

龔成老師：

大快活（0052）其實本質不差，業務穩定，不過，增長力一向都不強，但收息理想的。

近一年，佢主要受兩大因素影響，第一是員工成本，因為佢無法將成本全部轉嫁比消費者，這會影響佢的賺錢能力。不過，賺錢能力不會永遠差，會慢慢有調節。

第二，就是千港的社會影響，對佢都有影響，不過，這只是中短期因素，而我地分析企業，一定要集中在長期的分析。

不過，現價未能稱平宜，只能說是合理區。這股有長線投資價值。

------------------------------------------------

Q15496：

你好龔成老師：本人33歲， 月入30K，每個月可儲萬五蚊，上年開始做月供股要，每月6000，是否太少？

過兩年想組織家庭，生小朋友， 希望呢兩年可以滾大啲錢，現有儲蓄350k,冇做定期，有興趣買隻268，但現在要10蚊以上會否太貴，或是等佢回落到8蚊水平？呢隻股票前景如何？

2000/港鐵
3000/盈富
1000/煤氣公司

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

如果你本身無股票，你可以加大月供，做月供股票，每月$10000。

你上述選的企業已可以，盈富（2800）$5000，餘下兩隻各$2500。因為你現時太多現金，要加強翻股票組合。

金蝶國際（0268）本質是不差的，潛力股，但現價的確貴，要跌2成（起碼）先開始合理。

------------------------------------------------

Q15497：

Hello 龔sir,
我想問下關於領展

我上年中開始月供領展，嗰陣己知領展唔會再好高速咁增長，但佢屋邨商場抗逆力強，佢嘅盈利應該可以帶動股價同派息平穩增長。

但佢近來開始收購海外物業，咁會唔會令佢長遠增長有改變可能？會唔會對佢估值有影響？

謝謝。

龔成老師：

領展（0823）是優質股，佢近年開始有買大陸物業，最近又收購海外物業，其實會提高左佢的增長的，當然，這同樣會增加左佢的風險。

之前股價略貴，現時合理區，長遠仍是正面。但相信只是平穩增長型。

------------------------------------------------

Q15498：

我最近一直留意你出post
起你身上學到好多野

見成哥大多數介紹係港股為主
以長期投資為出發點

不過有個問題煩惱緊
以我一個無咩投資經驗既人

長期回報率來睇 買美股etf回報高過港股好多
其實係咪應該買美股etf保障啲同回報高好啲？

龔成老師：

其實美國都是成熟的經濟體，當中的企業未必會高增長，平穩增長可以，因此，不一定長遠比香港及中國好。

中國的潛力仍是存在，只是中短期會較差。

唔好只睇近幾年的回報就推算長期回報，因為這只是一些基本數據。

當然，你建立一個平衡組合，是可以的，當中包括港股與美股，例如盈富（2800）+領航標普五百（3140），是可以的。

------------------------------------------------

Q15499：

龔成老師, 您好, 最近開始看你的書本, 但因為是初學, 仍在努力中. 由於之前不太懂, 在高位買入了股票, 以致現在不知道應該止蝕好還是繼續等. 已經是2018年1月買入

因為最近都聽到好多市場恐慌消息, 雖然這兩隻都算是有質素的股票, 但由於現時對我來說跌得較多, 好像再等一年都不會等到回家鄉

所以有想過不要再等, 想把錢拿出, 好等待來臨時機投入其他股票或取回現金. 在此想請教你意見, 覺得止蝕離場好嗎?

另外, 想問其實止蝕有沒有指標? 還是根據你講法, 如果選了一隻有質素的股票不用理會中間起跌, 是不需要止蝕?

光大證券 (6178) 買入4000 @$10.68
北控水務 (371) 買入 4000 @$6.05

想順帶一問, 因為本人有意今年買入單位自住 450萬左右, , 現在是租樓中,因此才會考慮到資金問題. 但最近朋友都叫我今年不要買, 說年尾或明年有大跌市(股票, 樓市亦然) 你覺得這類消息應不應該作考慮因素?

十分感謝你的意見, 一直有留意你在Facebook及專欄, 你很有見地, 而且是很努力學習, 不教人炒股, 希望你一直成功下去, 謝謝!

龔成老師：

首先你要明白，股價高低同平貴、同質素，無關。另外，我地不會因為入場費多與少，而決定投資某股。

投資某股最大的主因，是這股質素好，有前景，同時的平與貴。如果企業質素無大改變，而佔你組合不過多，就可以持有。

光大證券（6178）不差的，但業務波動是佢的特性，因此這類股不應持有太多，當股市較弱時，好多時佢會比大市更弱。如果這股佔你組合較多，可賣出一半。

北控水務集團（0371）有質素，不過負債在近年有所增加，這點令市場對佢估值受壓，現價合理，不過略有風險，持有無問題。但預佢中短期較弱。如果持貨過多，賣少少可以。

至於年尾大跌市，唔好信，無人知的。我投資股票20年，每年都有人講類似的說話。

------------------------------------------------

Q15500：

龔成老師你好：
有點財務及資產問題想你給點意見。

30歲，現與先生有三個物業，未供完，每個月大概$73000供樓，有買月供股票，分別0003同2800，共$6000。另每年供危疾2份大概3萬。有一份5年儲蓄保險，每月供$3000。

手上基本只有$30000左右的現金，我地發現我地都將大部分錢放係資產上，手上基本無咩現金，係咪相當危險？我地每月人工都係大部分拎來供樓，基本上無咩現金儲蓄。
另外，月供股票諗住遲d改改組合

希望你可以比dd意見，改成
0003:$2000
2800:$2000
823:$1000
2388: $1000

現在最頭痛係好似唔應該擺太多錢係樓宇上面，應該多草現金對嗎？謝謝龔成老師！

龔成老師：

對，你地的資產，太過著重在物業部分，我地理財，應該建議平衡的分配。

因此，你應該加大儲蓄，你要有一定的現金作支持。同時，股票的部分都要增加，你暫時月供$6000股票是可以的，你供4隻是可以的，這4隻都是有質素的股票，保持進行就得，不過，當你之後有較多現金時，就要增加月供金額。

你應該減少消費，盡力儲多D現金先，以減低整體的財富風險。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。