【龔成問答信箱】（Q22001-Q22020）

Q22001：

龔sir你好，有啲問題想問你，我依加28歲，曾經讀大學嗰陣時完全唔識投資但又亂咁嚟，當時買咗幾隻股票，如果而家放出去都蝕好多錢，

唔知要唔要繼續放喺度等奇蹟好，定係呢啲股票都係冇得救不如放出去？然後將啲錢用黎投資盈富基金？因為我係初學者 都吾敢投資其他股票住

以下係當初大學戈陣買嘅股票：

33安山金控購入價10.975 現價1.46
2389北京健康購入價0.8250 現價0.1110
8193亞太金融投資購入價0.9371 現價0.056
8269富譽控股 購入價3.6998 現價0.16
08310大豐港購入價1.21 現價0.2030

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你重點要放係佢地質素上，唔好諗有奇蹟，令佢地無端端去翻買入價，比你清貨。

如果佢係劣質股，出現而個機會率係極細，更常見係越跌越深，迫住你放。

你買的股票，我睇唔到有明顯投資價值，甚至有部份，有機會係財技股。我建議你沽出這些股票，換至其他優質股，咁會較好。

以你28歲，可以選擇一些「平穩增值股」+「潛力股」作投資目標。

你現時無太多投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

而你沽出的股票，我建議先用來集中投資盈富(2800)，會對你較有利。

------------------------------------------------

Q22002：

1.呀sir我想問進階班第二課慨網站巿盈率通道合理區範圍參考價值高唔高？

2.有代表性每股盈利的平均數為5年慨平均數，想問如果我用3、4年去作平均數會否失去代表性？

3.雅生活（3319）過往巿盈率13.31～25.92。行業巿盈率平均17.72～34.91。我應該自行調整過往巿盈率高低，還是採用行業巿盈率先比較合理，因為物管股大部分都是近幾年才上巿。感謝老師指點

龔成老師：

1）有參考價值，有D大行報告都會有這通道，原理有少少似我地課堂教的10年市盈率中間4年合理區

當然，最後都要自己做一些調整，因為只是程式化，網站是比一個參考方向你，你要自行調整及配合實際情況。

2）利用5年平均數，只是其中一個找「有代表」盈利的方法，絕對不是唯一方法。

最重要是「代表性」，因此，幾多年，並不是核心，如果該數據的經營環境同現時完全不同，就一年都不會用。

3）兩個數我地都會同，對於這股，用佢自己的較好，同時，我地估值時會較保守。你可以好佢自己過往數據作基礎，然後再作調整。

------------------------------------------------

Q22003：

老師，另外想代朋友問問，如果佢有200萬現金，應該點投資喺股票度？

背景：39歲，已有多項物業，有固定收入

龔成老師︰

我地財富組合除左要有增長力和質素外，平衡性都好重要。你朋友現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你朋友這筆資金，最好優先投入股市，去令成個組合更平衡。

以你朋友39歲，可以選擇一些「平穩增值股」+「潛力股」作投資目標。

若你朋友無太多投資經驗，潛力股這類風險較高的股票，就不要持有過多，最多維持2-3成好了，甚至先集中係平穏增長股類。

若有一定投資經驗﹐潛力股比重可以相應調高，佔組合約3-5成，視乎佢投資經驗多寡和了解這些股票程度而定。

現時大市只是合理區，你朋友的200萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

------------------------------------------------

Q22004：

成哥，我見市場預測黎緊通脹會來臨。 請問應該如何處理？會對市場有點樣既間接/直接影響呢？想請教下

龔成老師︰

其實一個正常經濟環境，係應該存在若干通脹，才算健康。但當通脹過高，就會影響日常生活，以至企業營運成本，繼而影響企業盈利能力。

如果政府以加息去對抗通賬，利息就會上升，一般會對股市、樓市都有影響，但我地要考慮當中的因果，如果背後是因為經濟利好而加息，就有可能對企業反而是利好的。

至於我地投資時，你就要考慮，通脹對企業盈利，造成什麼樣的影響。

若政府透過加息手段，去調控通脹問題，企業融資會有什麼事情發生。

當然，我地投資時，唔好估個走勢。無人知係唔係好快會有高通脹，都唔會有人知，政府會唔會出手干預。

因此，我地投資時，主要都係要根據現行估值，再用平貴，去制定買賣策略，咁會較好。

------------------------------------------------

Q22005：

成老師，我今年52，成老師我希望可以在55後半退休，轉做半職工作！

我遇到麻煩.... 不過先先多謝您，參考咗您建議同喺您嘅專業吸收，透過月供，我股票喺大巿升升跌跌都維持17至20％回報....

拉上補下，計埋現金終於第一個百萬。

未來會將大部分錢借比細佬比首期，佢兩年後會還返比我。未來，我只會留返20萬股票左右，10萬現金...

我手上有︰
車：比亞迪1211，175
賭：銀娛0027，金沙
內銀：建行
地產：恒基0012
公用：煤氣，港鐵，長建
指數：盈富
零售：1212利福

1。請問我留返邊啲好呢？

2。如我喺呢兩年間重可以每月儲1萬，我想供5千股票，定喺等到股價理想再入巿呢？

多謝，您一路以來悉心解答，助我哋理財... 因為您，我先可以借錢比細佬比首期，我哋都好多謝您

龔成老師︰

不用客氣，能幫到你就好了。

1) 你持有的股票，全部都係有質素。但你現時52歲，並打算3年後半退休。

因此，我會建議優先將一些波動性較高的股票沽出，咁會較好。

比亞迪(1211)和吉利(0175)會係較波性較高，可以優先沽少少。其次會係持股較多的恆基(0012)。

餘下的股票，你按比例沽出就可以。但留意，這些股票有投資價值。如果只係得1手，我就建議一直持有，唔好沽出。

2) 現時大市在合理區，你可以用一半資金月供，其餘一半才留起，等大跌市機會。

月供目標，會係盈富(2800)和一些收息股。用$2000至$3000月供盈富，餘下供2,3隻收息股。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22006：

老師，我想問一個問題，我想聽聽你意見。

關於購買今期居屋，我想問應該買鑽石山，樓價高，交通方便，每月供款有一點壓力，但日後轉讓比較好

還是買粉嶺，樓價低，上班距離遠，花時間，但供樓沒有壓力，還可以有餘錢作儲蓄或投資？

請問在累積財富方面如何考慮？

龔成老師︰

從投資角度，如果粉嶺居屋整體條件，唔係好差。你係應該選擇佢，因為長線才可以有更多資金，進行財富增值。

但從自住用家角度，選擇邊間，較難有一個明確答案。因為自住樓，除左考慮投資層面問題，也要考慮佢是否適合未來5-10年(甚至更長)的生活所需。

而且，你而一刻供款較吃力，但未來收入有可能改變，令供款變輕鬆。(當然，如果你係無信心，長線供得起，咁鑽石山就可以直接不考慮)

同埋你所講，如果你將來會換樓，物業的地區優勢，都係你要考慮的地方。

因此，你要係這些因素中，找個平衡點，去作出決定。

------------------------------------------------

Q22007：

龔成老師你好！我是一位單親媽媽，今年38歲有一位12歲女兒，每個月收入2萬蚊，每月可儲蓄1萬手上現金有二十五萬，手上股票如下：

1183：8OOO/5.3
3O67 :3000/17.012
939 :5000/6.2
1177:15000/8.14
1357:4000/2

請問龔成老師以上股票質素如何是否可以長線?

龔成老師︰

你持有的股票，質素上算可以。

但以你年紀，應先集中係增長上面。建行(0939)係收息股，增長唔高，現貨可持有，但唔好再加注。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，你小注持有可以，唔建議太大注。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時好集中係中生(1177)，雖然佢高質素，但持有過多，始終都會拉高左你組合風險。你中生(1177)現貨可保留，但新資金就唔好再放落中生住，等佢比重平衡翻先再考慮。

以你38歲，可以選擇一些「平穩增值股」+「潛力股」作投資目標。但開始投資前，我建議你先儲起半年開支，以備不時之需。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有資金(扣除半年開支後)，可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22008：

龔Sir你好，想問我媽媽所持的股票策略，她持有941中國移動 成本$55，5,000股

這股票一直跌到$47，本身的目的都係想收息長楂，其實佢嘅趨勢係咪一路都會跌？如果係不如放咗佢？

謝謝你

有幸有睇你寫的書，千萬富翁嗰本。雖然只係睇咗頭一個兩個chapter都得著啟發

我現在正在睇得你在書中推介的《秘密》，講關於吸引力法則。所以我都學用有錢人的方式/態度投資

龔成老師︰

若你媽媽目標係為左收息，你係唔洗理個股價升跌，照長線持有去收息，咁就可以。因為我股價波動，係唔會影響到你收息部份。

除非，企業長線質素明顯轉差，又或者派息政策有變。或者，此股你媽媽長線持有就可以了。

至於佢會唔會一直跌，中短期我估唔到。因為會受很多因素影響，有些因素其至跟企業本質無關。

但長線計，中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

佢增長力不算強，但作為一隻收息股，佢有合格，這股有長線投資價值。

係投資增值上，知識和正確思維，都係同樣重要。《秘密》這本書，很值得睇，你可以慢慢研究。

------------------------------------------------

Q22009：

龔成老師您好，我係澳門的讀者。因為疫情關係我還沒有機會上老師的堂，但我已在WhatsApp報名，現待港澳通關後報讀老師的課。

但現在有2隻股票想找老師先行指點一下，雖然我已閱讀了老師的書本，但仍味掌握估值方法，所以只從外部分析，但不知道他們現在價位是否合理。

1. 第一隻股票是巴郡（BRK.B），他所投資的公司都是老師在書中所說的好公司。它應是屬於水桶二的股票嗎？還有他現價是否合理？

2. 另外第二隻股票是台積電（TSM）。我看好晶片業的未來發展，因需要晶片的行業實在太多了，它既是龍頭，也有不斷進行研發體積更少的晶片。

它應是屬於水桶一的股票嗎？還有他現價是否合理？

3. 我有興趣進行這2隻股票的月供，所以想老師幫忙評估一下合理價範圍。問題有點多。勞煩老師。感謝

龔成老師︰

估值方法，書中略有介紹。但因為實際操作，係比較複雜，你到時在課堂上，我會用幾小時再具體解釋，相信你會較易掌握要點。

1) 巴郡（BRK.B）係一間成熟大型綜合企業，增長力係有，但唔會係最強的類型。

這類大綜合企業，估值係較難。因為佢包含了不同行業的公司在內。投資這類企業，你可以用分注模式，慢慢儲貨，會較適合。

2) 台積電係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

由於佢已有一定規模，所以算係水桶1至2之間。初步睇佢現價算係合理區頂，你可以考慮慢慢分注，或用月供儲貨，並長線持有。

3) 這2隻現價計，做月供係無問題。但緊記月供係長線計劃，最少做3年，並持有5年，才會有較理想效果。

希望疫情盡快過去，到時澳門見！

------------------------------------------------

Q22010：

龔sir, 我有個好消息講您知。自從聽您講及上咗堂重新部署自己投資，加入潛力股，近幾個月由賺五位數變賺六位數，有很大進步，真的多謝您。

我更買了您本80後千萬富翁，我都要進入瘋狂狀態，而且要做多些有意義的事。

而且，還債後仲有五位數字淨

龔sir, 本來我好驚 轉換環境，但受你影響。我勇敢行出第一步，不斷寄自薦信務求搵份高人工的工作。希望成功。為了成功，我越黎越厚面皮及積極

謝謝賜教

龔成老師︰

恭喜你，記住優質股要長線持有，才會有最佳增值效果。餘下持股，唔好見升唔少，就忍唔住去沽貨。

記住，除非真係去到好貴、大市好狂熱、或者企業質素變差，我地才會考慮沽出。

你開始願意去突破，跳出自己舒適圈，已經係向前行左一大步。相信成功，只係時間問題，努力。

------------------------------------------------

Q22011：

你好啊 大師傅，上年睇完你本80後既書後開始調整左投資心態 由短視轉成長遠目光 睇既係公司發展同將來及價值，感激。

本人30歲，之前儲落一筆錢，宜家人工19000，手上有︰

500股(75.3) 中電(2)，
70000股(11.24) 煤氣(3)，
2000股(43.35) 電能實業(6)
21000股(26.1) 中銀香港(2388),
10000股(12.26) 深圳國際(152),
3230股(43 匯豐(5)

然後都跟左你d意見月供左2800, 823, 66 各3,000，共9,000，現金大約20萬，有時騰訊600蚊會入 升少少就會賣左去賺千零蚊。

每年36000買宏利壽險計劃供15年 (已供5年)，另有基金每月派3000蚊息， 家用同日常開支約9,000,月供股9,000，餘下1,000，想35歲前被動收入20,000 有冇可能性?

對股票無咩技術 都係每日睇你d post 同書籍擴闊視野, 個倉有冇需要執一執?

感激不盡 希望有運你抽中指點一下

龔成老師︰

首先，你唔好再用短炒模式，去做投資策略。你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

如果你希望5年後每月有2萬蚊現金流，以股息率6%計，你需要本金400萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現有持股，質素上係無問題。但選股和配置比重上，都有問題。

首先，中電(0002)、電能(0006)、深圳國際（0152）、匯控(0005)只是收息股，增長力好一般。以你年紀，持有太多，會拖慢財富增長進度。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

而盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時持股中，公用股、銀行股、煤氣(0003)、中銀香港(2388)都明顯超標，你要慢慢調整翻個比重。

而月供方面，你都太過偏重物業類。領展(0823)當然是物業類，從港鐵(0066)業務性質而言，佢都算係半隻物業相關股票。

建議你減少這2隻股票月供金額，而抽出來的月供資金和每月餘下$1000，你可以先儲起，等大跌市才動用。

以下是一些適合你年紀的股票，由於你投資知識不高，可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

我假設投資回報有10%（連股息再投資），你每月投資$10000 + 現有持股(約170萬)，5年後大約會增值至340萬。

若你相達至400萬目標，你要加大每月投資至$18000。或將累積年期，加長至8-9年，才可以做到。

------------------------------------------------

Q22012：

龔Sir，你好，我有置業嘅問題想你指教。

小弟今年25歲， 即將結婚。我入息平均$20000，未婚妻入息$14000，銀行現金約有190萬多

我同未婚妻都想生小朋友，我應該去買樓/ 生小朋友，未婚妻辭職，收埋d錢租樓排公屋好呢？

我嘅擔心地方係買嘅樓必定舊樓，而2人學歷能力難以係工作上有大發展，怕背負債項多年到老，而居屋又好困難抽。

但排公屋，要生左小朋友先一家三口排得，擔心地方係等上樓起碼8年時間，未來要排幾耐都係未知之數，可能更多。

請龔老師比意見指教下我

龔成老師︰

首先，係給你理財建議前，我希望你先改變一下人生"消極"的想法。

你現在25歲，事業和人生才剛起步，不要這麼快就斷定自己，只能當個"普通的窮人"。

想當年我跟你相若年紀，人工不到你一半，憑自己努力，可以儲到100萬，現在更增值至1000萬以上。我學歷都不高，公屋出世。

相比之下，你現時客觀優勢，比我還明顯。我建議你唔好咁快只想公屋，要努力學好投資，去為自已財富增值，其實要自己買入一個自住物業，不是想像中咁難。

而且，物業如果有質素，其實係一個資產(而唔係負債)。因為你好似每個月都比錢落去，但其實你有部份資金，係買緊物業。

當物業升值，你就會從中獲益。

現時要成功輪侯到公屋，都起碼等5-6年。若你善用這時間，去投資優質股，為財富增值，很大機會已累積出一筆置業資金。

故建議你唔好只係一心諗住公屋，應該努力增值，去為自己將來增加更多可能性。

你25歲，可以用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有190萬資金可以先投入40-60萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

假設投資回報有10%（連股息再投資），你每月投資$10000 + 本金190萬，5年後大約會增值至370萬，相信對你置業和日後累積更多財富，都起到一定作用。

至於居屋，你可以照去抽。雖然投資價值不及私樓，但自住係可以。

另外，若你計劃短期內生小朋友，記得投資前先扣起相關開支。最好多留起半年開支作應急用，才開始這個投資計劃，成件事就會相對穏當。

------------------------------------------------

Q22013：

你好，龔老師！請問美股輝瑞同蘋果可作長楂和現在再買入？

龔成老師︰

Apple（AAPL）有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。

近年大部分時間在合理區中上部至略貴的水平，如投資要分注，長線持有。

輝瑞公司 (PFE)是一家全球研究型生物製藥公司。集團主要從事醫療產品的發現、開發及生產業務，其全球產品組合包括藥品和疫苗。

此股有一定投資價值，但礙於業務性質關係，盈利方面會較為波動。現價算合理水平，可分注或月供儲貨，並長線持有。

但由於業務上都有一定不確定性，令投資風險增加，故不宜太大注。

------------------------------------------------

Q22014：

你好龔成先生，本人今年34歲，月入3萬6千，太太任職護士，月入5萬，有一名2歲女兒，將會生多一個小朋友。

現在有一間居屋已補地價，太太名，市價600萬，還有300萬按未供。兩年後將會有宿舍，現時有現金130萬。

想請問好唔好買多間樓收租或佢其他投資？如果買樓，可以買邊類型物業比較好？唔該曬，希望收到你回覆

還有扣除供樓，養車，俾家用，請工人，家庭開支，每月可儲2萬

龔成老師︰

我地財富組合除左要有增長力和質素外，平衡性都好重要。

由於你已經有一間物業，現時資產組合，算係較偏重於物業類。因此，新資金我建議先用優質股增值，以免過於集中個別資產類別，而產生風險。

到你用優質股累積到一定金額，才再考慮第二個物業，這樣會較為穏當。

投資優質股方面，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時34歲去計，應先做好財富增值部份。策略上，你可以投資「平穏增長股」和「潛力股」。

你每月5成儲蓄，即是用$10000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那130萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22015：

成哥, 想請教一下, 港鐵(66)一直聽你說是優質股, 但點解佢股價總是浮游在$44左右, 無明顯既大增長?

明白佢有業務既獨特性同埋長遠都仲有發展空間, 但價位就反映唔到..? 還是當年社會運動令佢既負面形象大受影響? 呢隻股票之後會唔會升返高D?

利息方面, 是否應該選擇以股代息呢? 謝謝你呀~

龔成老師：

港鐵（0066）有質素，可長線。

佢無大升的原因，第一，佢過往一直都唔平，部分升值已透支了增長力。第二，近年對佢有不少事件都影響了中短期盈利，例如社會運動、疫情等，第三，佢發展最快的情況過去左，之後雖然仍有增長力，但不是高增長類。

長遠而言，佢始終有質素，佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的。這股可長線投資。現價大約在合理區中上部。如果要以股代息，可以選股。

------------------------------------------------

Q22016：

前陣子感覺到迷惘，感到投資好難，但其實好似你所講建立左個組合再慢慢擴大，等時間讓企業增長就可以了。希望自己可以做得到

老師你點睇加息？好多人話加息股價會跌，我都想這是入貨時機，但現在的貨要怎樣部署呢？定係都係長遠持有就冇問題？

龔成老師：

其實最重要是投資優質股，然後建立一個平衡的組合，長線持有。你要學識「唔好理短期股價」。

加息，一般會對股市、樓市都有影響，但我地要考慮當中的因果，如果背後是因為經濟利好而加息，就有可能對企業反而是利好的。

因此，我地分析時，最重要睇「企業基本面」，以及長遠因素。

你可以尋找一些質素較好，企業有獨特性，長遠有發展的企業，同時該企業風險度適合你的。

------------------------------------------------

Q22017：

龔sir ，想問下房託怎去分辨成長性？

為什麼領展可以有錢不斷去買物業，但其他房託如置富，陽光只能靠本身物業租金提升，但很少去買物業？

想問下順豐房託能否歸類為領展那一類有成長性的房託？

龔成老師：

每間房託的營運政策都唔同，領展（0823）較進取，想自己有較大的增長，因此會不斷去投資物業，但這動作都有風險的，業務不確定性會比其他房託為高。

而一般的房託，大多數只以翻身物業去提高價值，相對會穩健少少。

投資者可以按自己的投資目標，以及風險承受能力，去決定投資那些房託。

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的，但又不算好強的增長及賺錢能力。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

------------------------------------------------

Q22018：

龔sir你好！由上年股市開始升，就令我越買越多股，我想知我既投資組合入面有咩要賣出，麻煩你啦！

0001
2319
0175
1810

2689
0363
9988
1170

0883
1873
0831

龔成老師︰

從質素上，你持有股票，唔見有明顯問題。是一個潛力股和平穏增長股，有增長力，適合年青至中年人士。

但部份股票，質素上較弱。若你持貨係比較多，你可以考慮沽出部份，換至其他更優質的股票，咁會較理想。

玖龍紙業（2689）、信星鞋業(1170)、上海實業控股（0363）質素算一般﹐增長力唔會太高，不宜大注。

利亞零售（0831）出售香港「ＯＫ便利店」業務，預期未來發展只會一般，同樣不宜持有太多。

維亞生物（1873）雖然業務有發展，但有風險。

佢主要就臨床前藥物開發提供基於結構的藥物發現服務，例如基因到蛋白質（Ｇ２Ｐ）及基因到結構（Ｇ２Ｓ）。

睇翻佢主要客戶，主要包括位於美國、中國、歐洲等地的製藥及生物科技公司。

生意都有不差的增長，但毛利變化大，企業賺錢能力仍有不確定性，以估值計，現價唔算平。

業務是有發展的，但仍有好多不確定性，故暫時不宜佔組合比重太高。

另外，我想提多你一點。投資股票，唔好受大市氣氛影響，見個市係咁升，你就不停去入更多貨。

我地投資一隻股票，除左係要有質素外，定價都好重要。當市場氣氛較為高漲時，好多股票個價都會比人炒高。

若你這時候入貨，就好大機會會買貴左，影響長線回報。我唔係話大市較熱時，就不要買股票。但必需小心謹慎地做好估值，確保價格合理，才好出手。

------------------------------------------------

Q22019：

龔sir 你好，你點睇
香港寫字樓未來走勢
謝謝

龔成老師：

寫字樓同經濟有較大相關性，中短期會有少少上落（但不會大跌），長遠會平穩向上。

首先要睇經濟基本面，如果經濟持續地差，失業率上升，寫字樓向下，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

但我會認為經濟不會太差，因此，有可能向上。

在長遠計，香港始終土地有限，對寫字樓一定有需求，因此偏向上。雖然在家工作因素，會對需求有影響，但不是核心性，可能會影響了增長力，但需求仍在，因此長遠會平穩增長。

------------------------------------------------

Q22020：

龔成老師你好，剛剛經朋友介紹而去看老師的‘80後千萬富翁’，未看完，但已獲益不少。思想成有錢人已準備好...多謝老師！

亦想直此請教老師，我在$820買入了9626,現仲跌緊，要可繼續持有？

另外一883, 是否值得現在入市？
麻煩老師指點

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

嗶哩嗶哩（9626）有質素，有長線投資價值。

佢可以話係一個綜合性的視頻社區，在當中，用戶同埋內容創作者能夠有好多元的內容，並進行互動，內容包含生活、遊戲、娛樂、動漫、科技和知識等眾多領域。

另外，佢亦能夠支持廣泛的視頻內容消費場景，以專業 用戶生成視頻（PUGV）為中心，輔以直播、專業機構生成視頻（OGV）等。

根據報告，35歲及以下的用戶佔佢的月活用戶比例超過86%，月活用戶達到2.02億人，每年增長5成以上。業務正高增長。

佢收入主要來自移動遊戲、增值服務、廣告、電商及其他；收入成本包括收入分成成本、內容成本、服務器及帶寬服務成本以及電商及其他成本。

過往的生意高增長，這刻雖然未有盈利，但前景正面，這股有潛力，有長線投資價值，不過估值就較難，股價變化大，市場對這股的股值較分歧。

此股係有投資價值，若你只係投資小注，長線持有就可以，但要預股價上落較大。若佔組合較重比例，建議你最好沽少少，去平衡風險。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

現價合理，可以分注入貨。這類商品企業，都可投資，但就要明白不是最高質的企業，故不建議持有太多。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

#歐美系超質感親子家居服開團 🌿
下單➡️ https://gbf.tw/iqszg
日期📅 7/15-7/22 24:00止

推薦一個Anya平常超愛買的家居服品牌！
Here’s to Love💕💕💕
超喜歡它們家啞光緞面質感面料、
穿著睡覺真的好舒適～

特別要介紹，
Here’s to Love還可以客製名字唷！
快點來擁有一件自己專屬的睡衣吧！

除了有大人款、還可以和我妹妹們穿親子睡衣🥰
布料超舒服好穿～
太感謝廠商在洽談下願意和Anya配合開團！
這次團購有超棒優惠價唷！
趕緊點進下單連結看看吧～

/
下單前必看詳細資訊ℹ️
【配送方式及地區】
台灣本島及香港、澳門、中國大陸、馬來西亞、新加坡、韓國、日本、美國地區統一使用順豐宅配寄送
台灣外島使用中華郵政寄送（目前因疫情關係，外島僅有船運需等待較長時間）
其餘海外地區目前皆無配送

【出貨天數】
＊＊目前由於疫情關係，公司分流上班人手較不足，包裹非常多各家物流都非常壅塞，包裹可能會比原定時間有所延遲，無法確切掌握到貨日，請務必請可以接受的顧客再下單！也請不要催單唷！
快遞們真的很辛苦的盡力配送中，再請大家互相體諒一起共體時艱。
⚠️下單後14-30個工作天內出貨(不含物流配送日）
客製化製作較繁雜，為維持品質需要較長的時間製作，可以接受的粉絲們再下單!

【退換貨政策】
消保會有特別條例指出貼身衣物類及客製化商品皆不適用於七天鑑賞期的規範內，購買後除非寄錯顏色尺寸或瑕疵因素，不論有無拆封為維護大眾安全衛生及所有顧客權益皆無法退換貨，疫情關係更嚴格執行，請可以接受再下單喲！
※瑕疵／錯誤商品：請於簽收包裹隔天起三日內，提供錯誤商品或瑕疵細部照片至客服信箱（service@herestolove.com)，並於信件內留下姓名／訂單資訊／手機號碼，待收到信件後，我們會有專人回覆並盡快協助您處理。若超過鑑賞期，恕無法受理瑕疵退貨。需退換貨之商品也請將所有收到的內容物及外包裝保持完整無損壞的寄回，待我們收到若有缺少商品及任何損壞也無法受理退換貨唷！還請收到商品時先做檢查，確認沒有問題再下水洗滌喔！

【客服聯絡窗口】
Here's to love
客服信箱: service@herestolove.com

【龔成問答信箱】（Q19561-Q19580）

Q19561：

龔sir，上堂講過：增長率大過折現率冇得計。
增長率如何計算？

增長率要用平均數嗎？

水桶1 預期高增長是不適合用現金折流模式對嗎？

龔成老師：

要用「二段或更多段的折現模式」，即是頭一個年期，如10年，就比佢高增長，之後就會進入中低增長時期，後段由於會去到無限大，所以增長率要細過折現率。

最後將兩個數目相加。

水桶1都可以用現金流折現模式，不過你在推算增長率時，要較小心。而現金流折現模式由於敏感度較高，因此好易出錯，所以建議你只作為輔助，不能成為整個估值的核心。

------------------------------------------------

Q19562：

龔老師，你好，本人38歲，未婚，是個月入25000的打工族，因為生活上的各種原因，導致3,4年前戶口完全清零，後來靠每月固定存款並投資股票（10000～15000不等）

回到現時的存款水平，本人現時有現金28萬，並持有以下股票（@為平均買入價）：

175 3000股 @14.3
700 500股 @368
981 4000股 @18
1810 2000股 @10.6
1951 4000股 @9.88
2013 3000股 @11.3
2018 1000股 @42
2282 10000股 @10.11
3908 2000股 @13.92
9988 1000股 @219

我覺得我的投資組合的股票數量有點多，但我又是一個會想很多的人，實在不知道該如何精簡投資組合，所以想將情況表明一下，請教一下老師的意見：

1. 2018是我很久以前就買入的股票，當初是在2382和它之間作選擇，最後選擇了他是因為當時2382股價升幅已經不少

所以才買入2018希望它能追落後，但直至現在2382已經突破歷史高位，但2018還原地踏步，請問它的質素是否真的完全不行？還有可能回到當初的歷史高位嗎？

2. 2282是我在疫情後買入的股票，我本身是澳門人，一直覺得在澳門的酒店賭場來說，美高梅都算間不錯的公司

買入目的是等待疫情緩和後旅遊業復甦，而相對金沙銀河這類比較大隻的公司，2282從高位回落的幅度相對較大，所以我才選擇買入2282作等待，希望當濠賭股回升時

即使大家回到之前的水平，我能從中得到較大的回報，這個投資想法是否錯誤？我應該把它賣出換到其它投票上嗎？

3. 1951是我於疫情期間留意到的一隻股票，原先只打算作短炒，後來因為一直維持著正數，又沒有可以換馬的心水

所以就一直持有至今，近期看到不停有資金流入該隻股票把股價炒起，我應該順勢繼續持有嗎？長遠來看它的潛力如何？

4. 以上三隻股票是我現在比較困惑應否留在投資組合內的，至於其它所持有的股票，龔老師有沒有什麼建議能給我一下呢？

5. 1211曾經是我很喜歡的一隻股票，經過對它的一些分析和了解後，我認為它是一間很有潛力的公司，當時曾經在40幾蚊買入過，即使跌到30幾也沒有太擔心，知道它總會回升，及後升至將近1倍時剛好遇上螞蟻招股

而當時1211的股價也在70幾至90幾之間徘徊，所以當時我決定先放了這隻股票用來抽螞蟻，打算等之後再看情況買回1211，但後來發生的事都知道，螞蟻上市觸礁

而1211也因為刀片電池的研發以及公司條件被大家看好而突然從悶局中爆升上去，之後股價也沒怎麼再回頭過了，雖然不無遺憾，但也是無可奈何的事，不過卻令到現在的我對於已賺錢的股票產生一種困惑，到底我應該什麼時候放掉所購入的股票？

我明白錢是很難賺盡的，摸頂和估底都不是件容易的事，但我應該怎麼給自己設定套現股票的時機呢？請問龔老師有什麼建議？

6. 恆指30000點水平，是否應該減持部份股票？

問題有點太多又太長氣，希望龔老師不會介意，靜候你的回覆，衷心感謝你

龔成老師：

你現時的股票並算過多，如果一個成熟的組合（$100萬以上），去到10隻-15隻是可以的。而$100以下組合，5-10隻可以。

1）瑞聲科技（2018）並不是無質素，但一定不及舜宇光學科技（2382），前者強項是聲學技術，後者是光學技術，長遠計，鏡頭的應用只會更廣，所以2382增長力一定較好。

現時你可持有瑞聲，不過預佢增長是平穩型。如果你想提高增長力，可以2382月供或等跌買入。

2）美高梅中國（2282）不差的，但增長力未必及銀娛（0027）。我地分析時，最重要是睇翻企業的長遠發展力，以及現價平貴。

3）錦欣生殖（1951）本質不差的，長遠有增長力。

佢主要係中國及美國，透過合約安排從事經營及管理輔助生殖醫療機構，以提供輔助生殖服務、管理服務，以及輔助醫療服務。

佢的自有輔助生殖醫療機構，包括位於中國的成都西囡婦科醫院及深圳中山泌尿外科醫院，以及位於美國加利福尼亞州的３間ＨＲＣ　Ｍｅｄｉｃａｌ手術中心以及ＮｅｘＧｅｎｏｍｉｃｓ　ＰＧＳ實驗室。

佢過往的財務數據不差，生意與盈利都有不差的增長。

不過，佢盈利不算多，加上佢現時市值去到$300億，就算佢盈利增長快速，相信佢接下來幾年，每年盈利都只會有幾億，以這作假設推算，佢現時的估值都唔算平，略貴。

如果你持貨不過多，就長線。

4）整個組合其實無大大問題，都是可以長線持有的股。

我建議你些優質股，該算倍升都能長線持有，做法正確。

5）你以「賣出」股票作思維基礎，是錯的，因為優質股是真財富，現金不是財富，你賣出真財富變成非財富，目的可在？

（具體你可睇《財務自由行》）

所以，當企業優質時，我地可以長線，或永遠持有，至於股價，只是一個成交價，上茫可以好大，我地唔理佢就得。

當然，有時潛力企業，你都可以收成期，例如比亞迪（1211），我會等佢的車，進一步普及時，才可能賣出。（當然，可能永遠持有）。

我賣出與否，唔太理股價，因為這只是市場情緒，最重要睇企業。買潛力股，就如同買入公司等佢成長。

6）如果該股貴，你可以賣部分，但原則上，優質股是長線的。

------------------------------------------------

Q19563：

老師你好，正式報左你既班，好期待：）

一星期前開始讀你既百萬富翁致富藍圖，令我對買股票既想法有所改變。

你成日都唔建議短炒，我咁岩上個月都學左睇盤學短炒，點知係輸多贏少。

可能係自己能力問題，但玩左股票兩年多，不過第一隻接觸既股票竟然係騰訊。

剛剛踏進三十歲，已儲到100萬，但都係靠以前死慳死抵同博命工作。

好希望將來生活再可以改善，我係基層出身，但睇完你既書，覺得同你想法好接近，我由細個已經無貧窮思想，好清楚知道自己係會有能力達到自己既理想：） 好感謝你，我仍然覺得自己可以再進步，希望可以從你身上學到更多。

有時面對持有既股票大跌，心態上點樣調整好？如果係潛力股，應該加注嗎？謝謝你

現持有
700 * 200股
6618* 200股
3690* 200股
9988* 100股

龔成老師：

我20年前都學過短炒，學左幾年，都是同你一樣，輸多贏少，之後做銀行同證券行，見D客短炒，都是輸多贏少。

我相信贏的人，是極少數。

至於大市上落，其實好正常，唔好因為短期的波動，而影響了長期的策略，你最重要是配合翻長期策略進行就得。你要建立一個優質股組合，長期持有，以優質去衡量，不用理會中短期股價上落及賺蝕。

你持有的都是有質素的股票，不過太集中在新經濟股類，建立你之後加翻其他類別的股票。

股票班見！

------------------------------------------------

Q19564：

請問四大地產股現在邊一隻處於合理區,最值得長線投資?

龔成老師：

其實都可以投資的，都是有質素的。

恆基（0012）長遠增長力會好少少，雖然不是潛力型，但都有增長。主要來自佢是持有最多農地的發展商，長遠會釋放當中的價值。

------------------------------------------------

Q19565：

老師 我現時 供 2800 $4000
2 $1500
0823 $1500

會唔會太低增長力

老師比點意見 對於我26歲 會唔會太保守
823 係收息股定平穩增長？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你26歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此小注好了。

你現時月供的，都是平穩增長股，可長線，領展（0823）是平穩增長股。你應該加入少少潛力股。

最簡單可考慮安碩恆生科技ETF（3067），月供$1000-$2000。

------------------------------------------------

Q19566：

你好，本人今年年中開始留意及閲讀你文章，亦在大市合理或以下水平吸納了一些平穩增長及潛力股作長缐投資組合。

真的謝謝你。想請教一下現時投資車位的看法。現想買一車位在東九龍自用或租出，應注意什麼？

因知道車位按揭一般只可按50%，跟售買商舖一樣做法。回報是否可以有5至6％一年？現時市況合理定再等一，兩年經濟下跌才入？

龔成老師：

車位是投資工具的一種，最土地的變化模式，不過現時租金回報率未算吸引，但如果找到高少少租金回報的車位，都可考慮，但現時不是大手投資時機。

利用按揭是否能提高回報，其中一樣要睇就是按揭利率，車位按揭會比物業按揭利率會高少少，因此息差的效果並不明顯。

如果車位再回多少少，又或你能找到更高租金回報率的車位，會較吸引。

------------------------------------------------

Q19567：

請問點睇1810、2269、9988？

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平。這股如果你有貨，不過多，可長線。

阿里（9988）面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區中上部，這股可長線。不過，中短期會波動。

------------------------------------------------

Q19568：

Sir 請問有咩實力估可以買？
咩價位比較好？

龔成老師：

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）。（當然不能太大注，要慢慢分注入）

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19569：

龔成老師你好！想請教如何資產配置，假設在大市偏低時，我在便宜區買入優質股，當大市偏高時，應持有較多的現金佢以預備，所以應該變賣一些優質股嗎？

假設那些優質股仍未價值完全回歸，仍有一定折讓，我仍要賣出部分優質股作現金準備嗎？

龔成老師：

如果大市偏高時，優質股貴，的確可以適度賣出股票，令你現金比例增加翻，當然，我會建議點都要有優質股在手，只賣部分好了。

如果到時優質股只是「合理」，未算貴，那應該繼續持有。

------------------------------------------------

Q19570：

我目前都有睇股票勝經，未看完，明白系投資企業，但如何找到這些優質？

龔成老師：

要用選股方法，這個真的有排講，因為在我股票班，會教5種方法，每種都要花一定的時間去解釋，例如利用生活選股，去找到優質企業。

------------------------------------------------

Q19571：

想問下288有冇潛力，佢係平穩增長股，但今年中國業務有很大轉變，收入增加，美國業務因為疫情大大減少，但如果不是疫情，今年288的業績是漂亮的，謝謝老師

龔成老師：

我地分析股票，要睇長期因素，疫情對佢有影響，但只是中短期，長遠佢會向好，這企業始終有一定的規模及銷售網絡。

不過，佢的成本等因素，始終處於一個較被動的狀態，因此又唔能夠稱為好高質，長遠能平穩增長的。

------------------------------------------------

Q19572：

黎緊2021，我想每月再固定買多一手小米，可行嗎？但我見越來越貴，怕會大跌。

另外我想固定每月用$300左右買少少新科技既ETF，有無咩建議？

隻煤氣毫無起色，如果唔等錢用係咪繼續長揸收息？

多謝你，希望努力幾年後我都儲到第一個100萬。
現有股票：

0003 21000@$13
2800 [email protected]
9988 100@280
2382 100@$154
1810 [email protected]

最後，請問會唔會有weekend股票班？工作關係平日上唔到

龔成老師：

其實最重要是建立一個平穩的組合，現時不是集中博一隻股，而是每一隻股票，在組合內都有不同的角色作用，同時視點要長期性的。

要適合你，同時要長期。

煤氣（0003）是平穩型股，在你組合有防守性作用，你長線收息就得，同時，小米（1810）就是潛力類股，你要睇翻自己這股應該佔的比例，以及恆生科技ETF（3067）保持每月買入可以，即是可以久不久買一手，但就要留意平貴，如果太高要減少買入金額或停一停。

同時，你不要太著重中短期股價，要建立一個長期的組合。

我間中都會開星期六班的，通常一年開1、2次，星期六下午時間。

下次可能在2021年第二季。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

------------------------------------------------

Q19573:

龔sir,有啲關於基金既問題想問下你,我5年前係XX買左個儲蓄基金,每年供3萬左近,總期數係5年

我啲朋友同我講,呢啲基金會收唔返畢錢,搞到我有啲驚,請問這是事實嗎?謝謝

龔成老師：

基金有好多類的，有D係保本，有D則有風險，你要問清楚。同埋，基金久不久都會寄D單比你，你可以睇翻自己的權益有多少。

大部分基金，都唔會出現收唔翻錢的情況，你不用太過擔心，但都可以問清楚。不過，有D基金就唔能夠中途取錢的，要過一個年期先可以。

------------------------------------------------

Q19574：

老師！我剛剛到台灣，o係隔離14日，我一邊工作，一邊試短炒，呢個體驗話我知，成日咁樣睇住個市係好幼稚，雖然有賺少少錢，但輸左係時間同精神。我應該係搵潛力股而係stable，睇3－6個月o既growth咁囉。

我睇完你兩本書，你講左一句好o岩就係: 講左咁多，就係唔行動，結果我就行動左，呢一個月體驗左好多高高低低，亦有從錯誤學習！謝謝你

龔成老師：

你最重要睇翻企業的長期業務發展與價值，唔好太著重中短期因素、中短期股價上落。

京都健康是潛力股，不過股價就較波動。

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

加油！保持學習與進步！

------------------------------------------------

Q19575：

老師，多謝你之前既解答。

本來手上持有的股好多都跌左唔少，不過最近舊經濟股升返，證明不理短期價格波動係啱既，但講就容易，面對跌價時真係好難控制自己既心理

希望可以慢慢訓練自己的心理質素，我好多時一見到股票跌左就對佢無信心，驚佢再跌

有時反而錯失左加注既機會，但我經驗唔夠，唔識睇股票既價值，又會驚如果隻股票已經前景唔樂觀，再加注只會倒錢落海，好矛盾。

好似京信通信2342，我3.25有一手，而家股價都跌左唔少，我應唔應該買多一手呢？

但5G設備股既高速增長期始乎已經過左，機站既興建速度應該會比之前慢，𣎴過我相信5G仍然有不少發展空間，所以唔知點算好

龔成老師：

最重要是建立一個平衡的組合，唔好著重股價，而是睇翻企業的業務、前景、價值。

你要克服心理因素，以「長期組合、配置、企業質素」為重點。

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

此股唔值得太大比重，投資時要注意注碼。暫時唔建議你加注。

------------------------------------------------

Q19576：

龔成老師，你好。本人40歲。月入7萬。年前一場大病。自感體力大不如前，但又誤打誤撞在九龍塘區買了層一房新樓，月供2萬5。

以為可以即放租，幫補供樓洗費，但因我樓按借多過600萬，要先聲名自住，所以3年內也不能放租，令我大失預算。

現在現金只剩15萬，之前買落的股票（如附圖）又以為可以財息兼收，如煤氣（平均價：$15）滙豐（平均價：$60） 和建行（平均價：$6.1）怎料呢一年大縮水，而9988 高見$300又唔捨得放，依家又跌。。。唉，仲有其他零零星星，有排都好似返唔到家鄉。。

究竟我應該點調配我的投資組合才好？起碼平手唔使輸得咁甘。而那層樓我仲應唔應該長揸，定等三年後無論賺蝕都即放呢？

補充。每月平均有五千元投資，希望盡快供完層樓，減少負債

另外。把005換馬入吉利又是明智？現吉利買入又是否合理水平？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

我地最重要是建立「長期的組合」。以你的年齡，其實應該投資較多平穩增長股，而你較多則在收息股，會出現配置上的問題。

你唔好太著重中短期股價，要睇整個組合長期的配置與回報。

其實你現時現金水平，比例不算多，可以留現金先，不用心急買貨。

你之後應慢慢投資平穩增長股，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。吉利（0715）現時小小注仍可。

如果想增長力高少少，可考慮：安碩恆生科技ETF（3067）、分注投資，慢慢入（因為唔算平）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19577：

阿sir 我1266有貨蝕緊，其實係咪應該沽出換貨？

因為佢連續兩年都派唔到前年的息，我擔心佢cashflow 有問題

龔成老師：

你最重要睇翻企業的長期發展，而買入價只是一個心理因素。

西王特鋼（1266）主要從事製造特鋼，產品包括主要用於建築及基建項目的普通鋼產品，以及特鋼產品，亦從事鐵礦粉、球團礦、鋼坯及焦炭等商品貿易，以及銷售鋼渣、蒸汽及電力等副產品。

業務有點波動，過往盈利的上落較大，有時會出現虧損，反映企業對成本較敏感，未能將成本有效轉嫁比買家。企業質素唔算高。

這股長遠的投資價值不高，你可以考慮先賣一部分，餘下就等全球經濟好轉後再賣。

------------------------------------------------

Q19578：

如果想長線持有d股票，但中途突然想用錢買樓，咁點呢

假話想呢2年買樓，但d股票要長線先有先賺，咁點算？

龔成老師：

買股票就是買入企業，原理就是「投入資金等企業成長」，而成長要較長時間，3年往往是基本的投資年期。

因此，如果你的資金打算2年內要買樓，最好持有現金。最多只能小部分投資股票。

因為優質股長期會向上，但中短期，可能只受市況影響，無人知到你買樓的一刻大市升與跌。

------------------------------------------------

Q19579：

龔sir你好！睇左你既5年買樓4步曲好有用!!! 想請教一下你：

1. 現時同屋企人租樓，住開將軍澳區，打算買樓自住，但亦想搵個升值潛力高既屋苑，將軍澳中心/ 維景灣畔/ 日出康城/ 新都城，你會比較建議邊個?

2. 除左將軍澳以外，都有考慮觀塘區好似仲有升值潛力? 應該選擇藍籌麗港城，抑或較舊既淘大？

3. 又或者最近新樓(蔚藍東岸/ sea to sky)升值等揀唔抽唔抽得過? 謝謝你

龔成老師：

1）新都城會較正路，而日出康城的配置改善中，加上交通慢慢會改善，都是加分位，都可考慮的。

2）觀塘或九龍灣的質素會比將軍澳略好，始終更近市區，例如淘大是可以考慮的。不過，如果你本身住開將軍澳，其實都可以考慮將軍澳，始終配套改善中，不過供應多，人口密，是扣分位。

3）不是不可，但最重要是睇呎價，預期的租金回報率。唔好單單以「易上車」去衡量是否值得投資，要以質素及平貴去衡量。

------------------------------------------------

Q19580：

你好龔sir, 睇咗你 fb post 一段時間，有啲想問，我依家33歲，之前投資多數都是輸多

所以依家投資多數是定期外幣掛勾定期同一啲藍籌股例如中銀滙豐等，所以想問依家先學會吾會太遲而且應該點做？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，其實應該投資平穩增長股+潛力股，當然，你投資實力不強，潛力股不能太多。

要留意，我地不是炒賣，是建立一個長期的財富組合，你要從基本的知識開始學，並建立一個適合你的長期組合。你現時持有的銀行股，只是收息股，未必最適合你，另外，太集中在同一行業，會出現集中風險。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。