喺頻道就嚟踏入開台三周年之際，我哋突破咗二十萬訂閱喇！🤩🥳 多謝大家三年以嚟嘅欣賞、支持同鼓勵，每逢星期二、五就準時擔定凳仔睇我哋6點鐘出片，陪伴住我哋一齊成長、見證住我哋每一次嘅achievement unlocked！喺呢226條影片嘅旅程之中，我越拍就越覺得：香港，真係好靚！香港，真係好有味道！ 喺一個講求速食嘅世代，感恩有各位唔嫌我長氣，鍾意聽我講故仔。正如我之前喺某條片中都有講過：與其話我係個鍾意食嘢嘅人，不如話我係個鍾意講故事嘅人。 呢個小小嘅頻道，最原始嘅初衷純粹只係想紀錄低我同老婆(當時仲係女朋友嘅多多)嘅一啲生活點滴。紀錄一下食咗咩好食餐廳，去咗咩好地方玩等等。慢慢咁似乎有啲觀眾唔嫌棄我，鐘意我呢種咁悶嘅風格。 咁既然開始有少少人睇喇，都想盡綿薄之力，介紹一下香港一啲被忽略咗嘅美，所以有咗「尋味老香港」呢個系列，去發掘返呢個城市嘅歷史底蘊。我認為一個有歷史、有過去嘅城市，先會有將來。 而既然作為一個享譽全球嘅美食天堂，除咗有引人入勝嘅街頭小食之外，其實都有華麗典雅嘅fine dining呢一面，但似乎冇乜人好系統咁去介紹，咁我嚟試下做第一個啦，所以有咗「摘星之旅」系列。 一個頂尖廚師幾十年嘅功力，一道傳統餸菜承繼咗幾代人嘅歷史智慧，最後上到枱變成我地眼中平淡，但入口一啲都唔平凡嘅美食。呢啲背後不為人知嘅努力，我都想紀錄一下，所以有咗「入得廚房」系列。 好感恩我哋嘅仲有其他好多例如酒店片系列、下午茶系列、海鮮片系列、camping片系列等等，你哋都enjoy睇，令我越嚟越敢去探索多啲新嘅題材，令我同多多真正意義上嘅「成長咗好多」！ 唔知呢個頻道可以行得有幾遠，但眼見香港嘅文化逐啲逐啲咁被侵蝕、同化、磨滅，我諗我可以做嘅，就係用我嘅角度，盡量保留返少少。各位嘅支持、祝福、乃至於好熱情咁專門direct message、email搵我講多謝講鼓勵說話，每一句每一篇我都screen cap留低好好保存。老土啲都要講句，大家對我嘅愛，我真係無以為報🙌🏻希望喺下一個里程碑繼續同大家一齊有啖好食！ 「我哋下條片再見👋🏻」