［音無響子］（＊）又一個欣榮花園商場。唔怪得張栢芝都變張百知。我頓時覺得小米改Logo好有誠意好大分別！

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

耶L勿睇，費事你覺得好冒犯。咁亦可能，係我會寫錯嘅，有幾出奇？

TLDR：Aberdeen改名，變做Abrdn．點讀？「就係讀Aberdeen」

1. 繼福士汽車Volkswagen話改名做Voltswagen以突顯自己專注電動車後，估唔到英國人都咁幽默。今次Abrdn話係趕上新時代，個名潮好多喎，係咪好潮先！

2. 不過福士係愚人節玩嘢，而唔好笑，亦提早外泄咗，Abrdn就唔係講笑啦。

3. 官方真係咁講架：The new Abrdn name (pronounced "Aberdeen") will be part of a modern, agile, digitally-enabled brand that will also be used for all the Company's client-facing businesses globally.

4. 又，係咪潮啲？雖然近年唔少樂隊都改啲冇響音嘅名（https://bityl.co/6Yvv），但我覺得係復古。點古？希伯來化！耶L化！

5. 憑我細個返主日學有限嘅耶L知識（好出奇？我返過基督徒團契添，主要因為有個好大胸嘅師姐。願主赦免我），神的名字叫乜先？叫「耶和華」嘛（你可以叫「雅威」，但我諗起艾威）。但耶和華英文係乜？Jehovah？好似話唔多準，其實都冇乜人知，都有好多寫法。大佬，耶穌又會講英文啦？

6. 咁應該好多人知，原文就係四個希伯來字母，יהוה‬（當然係抄維基的）。咁都話耶穌唔係講英文亦唔講意大利文亦唔講以色列文（＊＊），所以「拉丁化」就變咗……其實任你寫，可以係IHVH，YHVH，YHWH，JHVH或JHWH（＊＊＊）

7. 見唔見到個特點係乜？特點係，「都唔知點發音」，因為全部係consonant（子音），冇vowel（母音，或叫響音，AEIOU之類）。當然耶穌唔係啞嘅，以色列人猶太人都唔係啞嘅，希伯來文都有響音，但關於呢個JHVH嘅 vowel係乜，就失傳咗。

8. 亦因為，古希伯來文獻，就係全部冇響音嘅。任你質入去。

9. 既然唔係耶L，做乜又講呢啲？因為關係就大。

10. 唔係耶L，大約都聽過「聖經密碼」，暗示晒所有宇宙會發生嘅事咁喎。諾查丹馬斯或者推背圖燒餅歌或者六合彩藏寶圖啲朋友，話2020肺炎疫情都早有預言咁喎。你問我就當然係偽科學，即係好似薯仔又見到媽祖 多士又有聖母個樣咁。但反正信者恒信

11. 但我想講「聖經密碼」一個好大嘅flaw係，用古希伯來聖經，而係冇響音嘅。咁就大檸樂，因為啲響音任你填，然後你拎返嚟對現代嘅人名地名，就實可以中的。加埋啲IJ又亂咁轉，VU又任你揀

12. 仲有個插曲係，「聖經密碼」個作者，當然堅稱自己係啱，話你用第本書搵唔到呢啲嘢，仲話「你拎本無比敵Moby Dick搵到有呢啲訊息我就話你叻」。都唔好講話古希伯來文呢啲嘢，好大彈性，亦應該長過Moby Dick好多（你估有Dick就長咩），但結果都係被打面：就有人搵到甘地遇刺嘅「信息」

13. 無論如何，即使係「官方」，即係教廷，都唔認可呢個「聖經密碼」。不過諗真啲好合理，「教廷即係歐洲足協咁」，佢壟斷咗個解釋權嘛。其他當然係異端—咁即係，你唔鍾意嘅宗教咪邪教，未奪權成功嘅咪係異端。

14. 又，如果埃汾要走響音，就變咗….N。我是N仔。

15. 由金融講到相聚一刻講到希伯來文馬榮成史匹堡葉芳華，證明我都係狐狸唔係刺猬，a fox knows many things, but a hedgehog knows one big thing

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

（＊）其實原本個題想叫做「狂野三千響」，但應該冇乜人睇過套戲。巧震憾的說，特別係結局一幕，自己上網搵。又，當時葉芳華巧正的說。

（＊＊）以色列講咩文？講希伯來文咯。咁巴西講咩文？睇片咪知（https://ytube.io/3HDF）

（＊＊＊）呢個係「Indiana Jones and the Last Crusade」（聖戰奇兵）嘅一個機關（https://ytube.io/3HDI），四十歳以上嘅多數睇過。跟隨神嘅腳步，呀夏里遜福就係後生仔未夠爐火純青，諗住Jehovah，踩咗落去J度，幾乎跌死。都係老豆辛康納利醒，即使係拉丁文，都唔會有J！後來「風雲」嘅小說版照抄呢條橋，變咗步驚雲踩般若波羅蜜多心經