《無限斜楝有限公司》舊瓶新酒，靠演員撐起

～ 近排忙到睇劇時間到無，何況評劇。終於睇完《無限斜楝有限公司》，劇本的架構和大台的職業劇大同小異，都係一個行業，主角住埋一齊，一邊處理個案，一面搞三角戀，還有唔少倫理親情劇情，結局仲有綁架女主角添，這種設定，同大家目前睇緊的大台劇大同小異。

～ 瓶是舊的，但新在三角戀的三位主角，年齡加埋都係80出頭，真是有青春味道，而不是大台目前平均的120-150歲之間。另外，「無限斜楝」，即係「炒散」，乜都做這個情況，有揸唔定主意、周身刀冇張利、唔知想點的味道，其實很代表到部分年青人的情況，家晞不斷考證書，諾恆一日打幾份工，都係這種情況的反映，這種屬於年輕的不安，年輕的編劇較易掌握。

～ 另一個較有新味道的地方，是結局家晞選擇三人行，由愛人關係，變成親人關係，其實都唔知點收科，一三五諾恆，二四六展翹，星期日休息？又或者兩位男角變咗兵，等真命天子出現？這個結局的突破性暫時尚未接受到，老人家接受新事物load機係慢啲。

～ 整體上不及《男排女將》咁有追看性，從後期各媒體的討論唔太熱烈，大家也應該感受到。劇本創新度方面也不及《歎息橋》，中規中矩的製作，有點依靠Ian陳卓賢近期的魅力去吸引觀眾，不過諾恆的角色設計不及魚仔突出，而這段三角戀，到後半段愈睇愈煩，實在有點敗筆，結局突然指張建聲是殺人兇手，實在夾硬嚟，純粹想傳統地表達惡人有惡報，其實結局時張唔出埸真係冇乜問題，因為193都幾夠變態。

～ 只要唔犯法，乜都肯做的偵探社，這個概念和漫畫《銀魂》萬事屋，只要有錢乜都肯做相似，有參考味道。雖然有多個不同單元故事，實際卻跳唔出愛情和親情兩個範疇。第一同太保和葛民輝的故事，和愛情有關。第二周沈殷怡不認母，家晞失去表姨，都是親情線，然後三個主角正式開始同居和搞三角關係，之後撮合蘇麗珊和陳安立，都係愛情線。黃光亮搵仔又係玩親情，跟住吳家麗線又跳番去愛情，袁富華和葉童出場又玩番親情，之後主角三角戀大衝突，再加193，又係用愛情線去結局，比較新鮮偉是「三人行」結局。整體上案件的類型太集中了，唔夠豐富，驚喜也欠奉。

～ 雖然劇情比較平淡，不過，睇劇往往一半是看劇情，另一半是看演員。如果你是熱捧Ian才看這劇的，一定會留言說好好睇，各有喜好，這個沒有問題，正如有人睇到歐陽震華壁咚萬綺雯，會覺得非常浪漫，自己喜歡便好了。選角上成功是這劇最大優點，盧敏慧的戲仍然有大把進步空間，不過勝在有新鮮感，而黃定謙的演技，個人認為是三個主角中最好的。另外，第一個星期出場的太保，張建聲和葛民輝，他們的演出相當吸引觀眾，第二個星期的沈殷怡演技大躍進，相當有驚喜。之後蘇麗珊和陳安立的愛情故事，個人幾喜歡這故事言之有物，蘇麗珊亦可以一路帶着劇情推進，在黃光亮搵仔的故事中，飾演哈里王子的田宇軒，演技唔輸俾成年人，成為這個星期媒體話題之一。結局周才正式登場的吳家麗、高翰文和193，可算是結局周的亮點，近期上位的193做變態佬又幾ok，睇番他在《Error自肥企畫》的表現，癲佬又幾啱佢演。

～ViuTV 還是那個老問題，劇集產量不足，到目前還未有下一套港劇的播放時間，大家還是繼續睇住韓劇先吧。

#無限斜楝有限公司