小國寡民

有人話，冰島國家足球隊，有一個牙醫領隊，一個導演龍門，仲一個右閘其實係裝鹽工人，告大假至可以踢世界盃決賽周云云。

又有人話，冰島用咗兩年半，走出金融海嘯陰霾，絕處逢生，堅壁清野，毅力鬥志決心驚人云云。

亦有人話，冰島40%青少年吸毒，家長派出巡邏隊，𥄫實啲細路，軟硬兼施，誓要衝出困局云云。

更有人話，冰島自殺率全球最高，政府大舉興建室內室外運動場，等市民可以有地方發洩精力，徹底改變精神面貌云云。

云云中，都唔知道真定假，淨係知道冰島有名你叫，對住北大西洋，冰天雪地，面積雞膶咁大，人口33萬多啲啲，名副其實小國寡民，但最新足球排名22，每次開波前以Iceland Viking Clap打氣，HUH HUH 🙌，由緩至急，由急至激昂，一鼓作氣，眾志成城，屢敗屢戰，係幾咁振奮人心。

馬後炮咁話，冰島全隊無令人失望，第一次踢世界盃，第一場就有波入，第一次喺強隊阿根庭身上攞咗一分，全國一成人口去咗俄羅斯捧場，開心到直頭癲咗，舉國歡騰，不在話下。如果你問我，今屆世界盃捧邊隊，兩年前歐國盃就已經決定咗：冰島云云。

靠錢多，靠父幹，乜嘢都靠人幫，有乜咁馨香。相反，智勇雙全，有手有腳有樽鹽，好似大衞王戰勝哥利亞，張無忌喺光明頂打敗八大派掌門人，韋小寶都有八個老婆啦，係咪好勵志好羨慕呢云云。

突然之間，諗起香港，以前揚眉天下，點解𠵱家咁奄悶，心有戚戚然云云。

後記：
22.6.18，11pm，冰島會又會出場啦，對手尼日利亞，究竟邊隊強？邊隊弱？鍾意就得，無乜所謂云云。