【尚氣不負眾望】 老實說，之前睇《尚氣與十環傳奇》trailer，期望不高，甚至覺得似石堅粵語殘片格局，不過，近月在英美傳媒試片和首映後，口碑出奇地好，影評一致讚好，睇完後，確定本片的確屬於Marvel超級英雄solo片中最成功之一，總結成功如下： 1）完全適合西方口味喜歡的東方元素，即是香港電影以前未押注大陸市場（如今在偉大的黨整頓下已經無得玩了，押錯注了）之前最擅長的，今天荷里活都學懂了。還記得2013年《Iron Man 3》都有范冰冰出過幾個鏡頭吧？當年荷里活想吸引中國市場，如今有得上畫已經偷笑，荷里活片更不要預大陸演員了，無謂害他們被清算啦。但畢竟世界潮流和市場已更接受多元種族和文化元素，題外話，Marvel只會越玩越闊，例如下套十一月上畫的《Eternals》將會有英國華裔Gemma Chan（陳靜）擔正，加上韓國馬東石（Don Lee），印度超級英雄大跳Bollywood舞蹈，另外還有同性戀超級英雄，而在其他未來作品更會有穆斯林少女超級英雄等等.... 2）以動作場面而言，除了片頭已見，在電影初段的男主角巴士大戰比較屬於硬橋硬馬（令人想起 Keanu Reeves和Sandra Bullock的《Speed》），和末段一場以電腦特技CGI為主外，最令人印象深刻的，是梁朝偉/陳法拉（其實是兩人的love dance）和楊紫瓊/劉思慕的對打，雖然仍難與李安當年《臥虎藏龍》相比，但肯定喚起觀眾對那些經典武打場面的回憶。 3）《尚氣》大量中文對白，更添加真實感，也是Marvel電影甚至荷里活都少見，反映（可能在Netflix大量供應外語劇集包括韓劇下）美國市場觀眾真的開始習慣接受睇字幕了，不過可惜本片中文對白頗為生硬，有時看英文字幕反覺比較自然，如果編劇中能有懂中文的，執一執，會好些吧。 4）梁朝偉的演出，肯定最搶眼，而這個超級壞蛋的角色，是Marvel電影中少有地有層次感，是好是壞，結果是個「情癡」的悲劇反派角色，頗有經典武俠小說式東邪西毒的宿命感，由角色設定至他的演出，都能納入為Marvel最佳反派之一。 5）雖然有華人批評劉思慕不起眼（不過他有習武背景），Awkwafina更加唔靚，不過，他們角色本就是想做個普通人吧，並且兩人的幕前chemistry甚佳，Awkwafina為電影帶來的comic relief，也是Marvel電影鮮有的新元素。太靚仔，也未必好，就看不久前《Snake Eyes》的Harry Golding，夠形啦？結果，仆直。 6）近年Marvel電影喜歡找些新進年輕導演，並且不少是少數族裔或女性，本片導演Destin Daniel Cretton，是來自美國最多元種族的夏威夷州的日歐裔混血，雖不是華人，亦從未拍過以亞裔演員或主題的電影，但他在處理亞裔文化上，顯然比一般荷里活來得適當、尊重。Cretton上部電影2019年的《Just Mercy》，描述美國法律對黑人歧視的一段真實歷史，非常值得推薦（在Now的HBO Go或其他網上平台都有）。 不過，如果要指出一些不足之處，本片與不少超級英雄電影有一樣「通病」，開頭龍咁威，中段稍慢，到埋尾高潮要「谷」返起來不易，始終有點「未夠喉」。 而以《尚氣》這麼多的「破格」之處，最合適和接近可作比較的，應該是Marvel最經典的solo超級英雄電影《黑豹》。《尚氣》全華人（只有Razor Fist和「甘地」影帝Ben Kingsley飾演、曾經在《Iron Man 3》登場的假滿大人兩個配角不是華人），《黑豹》則全黑人，只有一個配角是白人；《黑豹》的Wakanda和《尚氣》的「大羅」（Ta Lo），都是與世隔絕、神秘而擅戰的國度，設定相似地方甚多。 然而，真的要比較的話，都是《黑豹》稍勝。《黑豹》中關於黑人的種族及社會訊息隱喻甚多，《尚氣》完全沒碰；如果要比較男主角，《尚氣》劉思慕當然遠不及《黑豹》已故的Chadwick Boseman，除了演技，甚至由他自創的獨特Wakanda口音至"Wakanda forever"口號，都是經典。至於反派方面，兩片的梁朝偉和Michael B. Jordan都有「因愛成恨」的複雜背景，兩人演出都有深度，接近平手吧。 導演大概都是Eagles迷吧，留低片尾聽Hotel California和睇彩蛋吧！最後，陳法拉好靚，相信不少觀眾包括老外都想她的角色可以「返生」。十二月的下集蜘蛛俠與Dr Strange將開始大玩平行時空multiverse，有什麼不可能？ #ShangChi #尚氣 #Marvel #MCU4 #劉思慕 #SimuLiu #Awkwafina #梁朝偉 #陳法拉 #楊紫瓊 #BenKingsley #DestinDanielCretton #光影評 #影評 #電影 #電影介紹

戀愛節目牽手後（上） . 我叫阿文，雖然我係男人，但我好鍾意睇戀愛節目。 . 睇住男女嘉賓喺台上講自己嘅生平、愛情觀念，遇到合適嘅對象，拖住手離開舞台，我覺得好感動。 . ， 哈哈，其實我都有報過名，想參加戀愛節目㗎，但節目組冇揀到我。 . 可能係因為我個人太平凡，講樣係唔錯嘅，但又未靚仔到明星水平；講職業，就係一個普通嘅銀行職員；講興趣，鍾意打吓機睇吓書咁囉。 . 唉，我自己講都覺得悶，怪唔知得人哋唔揀我，我都係專心做觀眾啦。 . ， 近排，節目嚟咗個新嘅女嘉賓，佢叫佳佳。 . 佳佳生得唔係好靚，但好有氣質，好有文化，最吸引我嘅，係佢對愛情嘅真誠。 . 佳佳話，佢好想要一段完美嘅愛情，但一直都搵唔到。 . 屋企人開始擔心佢嘅婚事，於是佢上咗呢個節目，希望搵到結婚對象。 . 佳佳知道完美嘅愛情好難搵，又唔想將就。 . ， 「揀我啦！」我喺電視機前大叫。 . 佳佳當然聽唔到，佢只聽到男嘉賓嘅說話。 . 終於，有一個高大嘅男嘉賓張先生出場。 . 張先生係一個商人，佢曾經患過絕症、破過產，憑住毅力東山再起，治好埋自己嘅病。 . ， 初時，張先生冇選擇佳佳，但佳佳堅持揀張先生。 . 佳佳咁樣講：「你病過、破過產，我知道你係一個識得珍惜嘅人。我想好好珍惜我生活中嘅每一日。無論貧窮富貴、疾病健康，都一齊去奮鬥。愛情係付出，唔係索取，我願意為你做任何嘢……」 . 我感動到眼都紅埋，張先生都好感動，最後佢揀咗佳佳，兩個拖住手，離開舞台。 . 聽講，佢哋會一齊去夏威夷旅行。 . ， 節目播出後，佳佳呢段說話喺網上瘋傳。 . 好多人都好感動，話佢係「史上最真誠女嘉賓」，只係有少部份人話，佳佳係貪張先生有錢先揀佢。 . 唏，網絡上一定有Hater，我嘅女神佳佳，唔係拜金女。 . ， 佳佳走咗之後，我有一段時間都冇心機睇戀愛節目。 . 不過，我成日睇佳佳嘅FB。 . 佢好唔開心，因為拍完節目之後，張先生就出國做生意，令佳佳忐忑不安，唔知張先生對佢係唔係認真。 . 我即刻私訊佳佳安慰佢，佳佳冇覆我。 . ， 我心諗，如果張先生冇同佳佳一齊，我咪有機會囉？ . 所以我冇放棄到，日日都諗啲笑話嚟鼓勵佳佳。 . 過咗一排，張先生喺外國返嚟，但佢同佳佳講，佢覺得大家唔係咁適合。 . 佳佳又嬲又傷心，我都好嬲，如果你唔鍾意佳佳，做咩要喺節目度揀佢，令佢冇得留喺節目度等白馬王子？ . ， 好彩，佳佳仲有我。 . 失戀嘅佳佳，開始同我交流。 . 我約佢出嚟食飯、行山，我將佢寫過嘅散文整合成小冊子，我要話畀佢知，佢係全世界最好嘅女仔。 . 我對佳佳好殷勤，時時刻刻都以佢為先。 . 喺我嘅努力下，佳佳接受咗我嘅追求，仲喺網上公開咗我哋嘅戀情。 . 我唔係咩富二代，佳佳都肯同我一齊，證明佢唔係咩拜金女啦。 . ， 我向佳佳求婚，佳佳好開心咁應承咗。 . 我之前已經買咗層樓，依加就開始裝修，我帶佳佳上去睇。 . 點知佳佳面有難色：「呢度……咁細嘅？」 . 我答：「唔細啦，六百幾呎，我啲同事都係買咁上下大。」 . 「買番嚟仲要供？」佳佳又問。 . 我笑咗：「邊個買樓唔駛供㗎？」 . 「人哋就唔駛供……」佳佳細細聲講。 . ， 邊個係人哋？我問咗好耐。 . 原來，戀愛節目嘅女嘉賓開咗個Whatsapp Group，分享生活。 . 佳佳發現，其他女嘉賓生活都過得好好，有人上完節目後紅咗，有得拍戲；有人出碟；有人同富二代拍拖…… . 「唔好同人哋比啦，我哋咪幾幸福。」我攬住佳佳，佳佳笑得勉強。 . ， 冇幾耐，佳佳就同我講，佢唔想結婚住。 . 我要結婚嘅消息，已經話晒畀親戚朋友知，突然終止婚禮，令我好尷尬。 . 待續... . #短故 #短篇 #小說 #陳美濤 #廣東話 #粵語 #tomatochan #戀愛節目牽手後

人生一條龍（下） . 我仔細一諗：「『人生一條龍』唔止係提供選擇，甚至幫人做埋選擇？」 . 兄弟神色凝重咁點頭。 . 我唔明：「佢哋到底想點？想控制大家生活？」 . 兄弟答：「可能係，『人生一條龍』引起太多跨國財團嘅注意，如果可以控制晒每個人嘅選擇，即係可以控制呢個世界。」 . 我更加唔明：「選擇少咗，使用者無發現唔妥？」 . 「有㗎，有人投訴。後來『人生一條龍』派咗一堆優惠券、現金券，就無乜人投訴啦。」 . ， 我突然諗起，幾年前，有人要收購我嘅股份嗰陣，我想退休，想去旅行。 . 但我點解想去旅行？好似係嗰段時間，我喺我嘅「人生一條龍」度，見到特別多靚嘅旅行相。 . 會唔會係收購嘅人，hack咗我嘅帳號，特登令我睇到咁多旅行嘢，勾起我退休嘅慾望，就賣晒啲股份？ . 我得唔到答案，甚至我做唔到咩改變，我年紀已經唔細，無幾耐，我就死咗。 . ， 死後，我變成咗一隻鬼，見證世事變更。 . 我見到，「人生一條龍」由「好少選擇」變成「無選擇」。 . 因為家長會用「人生一條龍」管理小朋友，所以小朋友自細就習慣咗無選擇嘅生活。 . ， 後來，「無選擇」變成「強制性」。 . 各國政府為咗方便控制人民，立例規管，大家要接受「人生一條龍」嘅安排，安排你讀邊間學校、做咩工，甚至同咩人做朋友。 . 隨住科技發達，到處都裝咗監控鏡頭同錄音機，監控設備亦同「人生一條龍」結合。 . 如果你唔按照「人生一條龍」嘅安排去行動，就會受到懲罰。 . ， 我好驚好後悔，我初初只係諗住賺錢，同改善大家嘅生活，點解會搞成咁？ . 不過，依加我係鬼，唔會再受到「人生一條龍」嘅監控。 . 我兒孫滿堂，佢哋都有燒冥鈔畀我，我就去地府嘅托夢部，交咗托夢費，同我個孫朗朗聯絡。 . ， 朗朗一直都知，我係「人生一條龍」嘅創始人。 . 但佢唔知道，「人生一條龍」一開始係點，甚至......個世界一開始係點。 . 我將事情嘅始末講晒畀朗朗知，佢好震驚：「即係話，我哋原本可以揀做咩工、中午食乜嘢、同咩人做朋友？」 . 我點頭，然後問：「你可唔可以幫我，令件事重歸正軌、令大家有番自己嘅選擇？」 . 「即係改變個世界？我點做到？」朗朗反問。 . 我答：「我都唔知，不過首先，你要唔被控制。」 . ， 我同朗朗商量，點樣脫離「人生一條龍」嘅控制，雖然法例規定要接受安排，但都主要係講大事，例如讀書搵工，並唔係所有嘢都強制性。 . 比如「人生一條龍」叫你今日著粉紅色衫，你著咗紫色，都唔會犯法。 . 我哋搵咗好多法律罅，打算先令朗朗習慣，唔被「人生一條龍」控制嘅生活。 . ， 過咗一個月，我再托夢畀朗朗，問吓佢咩情況。 . 點知佢好唔開心，佢話畀我聽，生活事事不順，女友同佢分手，好多朋友都同佢絕交。 . 原來，朗朗開始拒絕「人生一條龍」嘅選擇後，雖然未到違法，但「人生一條龍」都偵測到佢嘅抗拒，於是透過其他人嚟向朗朗施壓。 . 我問：「即係話，你啲朋友嘅Apps度，『人生一條龍』叫佢哋同你絕交？」 . 朗朗點頭：「一般人都唔會拒絕『人生一條龍』嘅建議，阿爺，不如算啦......」 . ， 朗朗承受唔住壓力，佢打算回復番被控制嘅生活，反正佢自細都被控制。 . 我好失望，我托夢去搵其他子孫，睇吓有邊個肯同我合作，做一番大事。 . 搵咗一段時間，有一次，我去地府銀行撳錢交「托夢費」，點知戶口無錢，原來好耐無子孫燒冥鈔畀我。 . ， 我輾轉打聽咗好耐，先知道，雖然「人生一條龍」監測唔到鬼魂，但朗朗曾經發開口夢，叫我「阿爺」。 . 「人生一條龍」偵測到，朗朗發夢叫過「阿爺」後，就企圖反抗「人生一條龍」。 . 查一查出生記錄，就知道朗朗嘅阿爺係我，已經死咗嘅我。 . ， 掃墓、燒冥鈔呢啲嘢，一向都係「人生一條龍」安排。 . 「人生一條龍」透過更改我啲子孫嘅時間表，令佢哋唔再幫我掃墓、唔再燒冥鈔畀我。 . 所以，我由一隻鬼，變成一隻窮鬼。 . 無錢，我亦無辦法再托夢畀任何人。 . ， 呢個世界，好多嘢嘅發展，都同初衷唔一樣。 . 你以為可以令世界變得更好，點知反而令事情變成更壞。 . 但即使有再多唔如你所願嘅事情發生，你總要記得，你嘅初衷係乜嘢， . 唔好被世界改變，成為一個你自己都唔鍾意嘅人。 . －完－ . #短故 #短篇 #小說 #陳美濤 #廣東話 #粵語 #tomatochan #人生一條龍