【龔成問答信箱】（Q21901-21920）

Q21901：

你好龔sir，多謝你無私既教導，係2019年6月我只月供股票，多謝你不停叫我們一定要留有資金等大市跌入貨，

終於我係疫情期間買了比較便的股票，有部分合理價，由賺第一個10萬，到而家賺到$70萬，離100萬差小小，開心到不得了，

有個2問題想請教龔sir, 因黎緊諗住同女朋友買樓投資，可能要賣出部份股票先夠，手頭上資金大約10萬，及我持有以下股票：

2手1211 @34.9
3手1830 @2.4
2手9988 @218
10手1177 @7.8
2手3319 @29

8手3067 @16.5
6手1928 @29
12手 1972 @19
1手270 @11.5

1）潛力股同平穩增股差唔多5:5，我在考慮如果需要買樓我應那種隻股票較好？請教老師幫忙

2）我睇過龔sir 既買樓4部曲，所以想將股票投資細物業，等將來換有能力再換Dream house,我們睇左2個細單位

佐敦$570萬 250呎 15年樓齡 2分鐘行到地鐵站，附近多食肆交通方便 / 西九龍 $530萬 280呎 4年樓齡，地區旺中帶靜，行8分鐘到地鐵站，附近食肆林立

兩個單位都係一房一廳

如果以投資角度是否佐敦升值會好啲？

龔成老師︰

1) 其實你最重要的分析點，是「餘下的組合，之後的長遠發展情況，怎樣配置對你最有利」。

這些股票都有質素，最理想係長線持有。但若真的要動用，可以從估值著手，先沽出較貴，變相無咁高值博率的股票。

比亞迪(1211)和完美醫療(1830)現價都偏貴，由於佢地升左唔少，令佢地佔你組合比重都偏高，你可以優先沽少少。記住，一定要留部分在手，不能無貨。

其餘股票，你按比例沽就可以。但緊記只係沽出部份，唔好沽晒，必需留有一定持股，去維持股票類的增值。

如果你想組合增長力較強，就賣出一些增長力相對無咁強的，例如太古地產（1972）。

2) 初步睇，2個物業投資價值都相若。佐敦較接近旺角，人口較密集，感覺會比較迫和雜，會扣少少分。（因為從自住的角度考慮）。

而且，西九龍呎數較高，同時較新，整體投資價值，可能會好少少。

------------------------------------------------

Q21902：

啊sir 我想請問你點解可以咁厲害。咁多人問你咁多唔同行業股票 你都可以講到咁多評論同深度分析

龔成老師：

因為我每日就係花時間，研究企業及行業，這是我的全職工作。

我幾年前職去銀行工，做全職投資者，所謂的全職投資者，並不是日日睇住個市睇股價，真正專業的投資者，是花時間研究企業，睇企業年報，大行報告，行業研究，我的工作就是「研究企業」。

我未必比人叻，但我每一間企業、每一個行業，研究的時間都比人多，自然對企業有更深入的了解，投資成續都較好。

------------------------------------------------

Q21903：

早晨呀！龔Sir, 我有2隻股票想請教你呀！

1. 快手(01024): $315時入左一手, 衰貪心高位時無放, 跌緊時又無止蝕, 請問我現在應否止蝕 或 再持有等高位再放呀？若等, 大概咩價位放？

2. 華泰(06886): 抽新股時$24.8抽中一手, 到現在一直回不到招股價, 請問我應該止蝕呢？

希望得到你回覆寶貴意見. 謝謝！

龔成老師︰

1) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。你現貨可以長線持有，但你預佢短期股仍會十分波動。

2) ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強。若你只有一手，你可守住先，等下次大市狂熱期才沽出。

------------------------------------------------

Q21904：

你好！龔成老師，我今年27歲，月入$25k，三年前睇左你既著作，就開始月供股票，一開始都係$1-2千咁供。最後悔係大概$60既時候放左比亞迪！

依家我都有維持月供既習慣，以下係我既股票組合，想請你比少少意見

股票/持股數/月供金額

2800 盈富/1757/ $1000
1928 金沙/999/ $2000
9988阿里巴巴/47/ $2000
1299 友邦/77/ $1000

0052大快活/1000/- -
1310 香港寬頻/2000/ - -
3067安碩恆生科技/200/ - -
1297 中國擎天軟件/ 2000/ - -

暫時手頭上現金不多，9成儲蓄都用作投資股票市場

黎緊我會加大儲錢力度，每月大概可儲$15000，如果我希望5年內滾存到120萬或更多，請問我可以如何部署？

我已經錯過左比亞迪呢隻潛力股，龔老師，可以請你再推薦一隻潛力股給我嗎？

另外我想提升自己選股能力，由其是企業估值方面的能力，可以為我推薦一些學習途徑嗎？

龔成老師︰

緊記，一間企業再優質都好，成長係要時間。所以，當你持有一隻優質股，就要比時間佢慢慢成長。唔好急於為左10-20%回報，就急住放。我地要長線，爭取係以倍計的回報。

比亞迪(1211)現時依然係有質素的潛力股，有長線投資價值。但現價已經偏貴，要回到$135才算合理少少。如果月供，最好再等回少少先，或者只宜月供好小注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲年紀，應集中在財富增值部份。你現時持股，大致都適合你，長線持有就可以。

當中中國擎天軟件（1297）本質不差的，但規模較細，以及行業存有風險，唔建議太過大注。

香港寬頻（1310）則只係收息股，增長力欠奉，唔適合你。

你還很年青，應該好好把握時間優勢，去盡力做好財富增值。你現時月供組合係可以，但以你年紀，有少少保守。建議你加入一些潛力股，去增升增長力。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

若你目標係5年增值至120萬，我假設年增長率為10%，你就需要每個月投入$16000，才可以做到。

而學習方面，你可以多讀投資相關書本、年報，新聞和課程。

你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21905：

龔sir,（1）請問龔sir，＃1988 民行還是＃1658 郵儲銀行好？

（2）另外，其實我一直想入9988，聽龔sir 教阿里都好正面，請問應該咩價位入好？近期都升了不少了

＃823 一直响$70邊，想佢跌少少再入，但又唔跌
＃1810已經揸住差不多10萬蚊，均價都係$28左右，想溝（現價$24邊），但會唔會重倉左？

我持有 823 好少貨，如果想入173 嘉華，會唔會有重覆呢？173 既前景如何？龔sir 建議入嗎？

龔成老師：

1）民行（1988）及郵儲（1658）都不差的，而郵儲略好。

郵儲銀行（1658）有質素，佢業務包括公司銀行、零售銀行及資金業務，以「自營＋代理」的營運模式。

佢共有4萬個營業網點，有一定的規模及網絡，過往發展正面，都有增長力，但就未必是高增長型。

現價合理，有收息及增長，都有投資價值。

2）阿里（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中上部。

領展（0823）現價合理，如果你本身持貨不多，現價加注可以。

小米（1810）雖然有質素，但如果你已有一定的持貨%，就不要再加了。

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

佢同領展，算是有部分重覆左類別，因此合共的比例不能太多。

------------------------------------------------

Q21906：

老師你好，看過你的書及網頁後，明白行動重要性，感謝你的分享，現想請教關於置業及財務自由問題，先簡單講一下我們情況

家庭成員：我41歲，丈夫43歲，兩名小朋友3歲半及10個月

每月家庭收入：$64,000
每月家庭支出：$40,000
流動現金：$2,600,000
股票：$80,000
物業：已供滿荃灣2房單位，約值450萬

現想購買第二物業作投資，樓價預算400-500萬左右，3-5年後希望換同區3房單位作自住，現有物業放租，老師建議應該如何步處，選樓時又應該注意甚麼地方？

理財一向過於保守，近一年才開始月供股票，每月$6,000，以盈富基金及比亞迪為主，長遠希望可以製造每月2萬現金流，獲得財務自由，應如何投資比較好？謝謝

龔成老師︰

如果你希望長遠會有每月2萬蚊現金流，以股息率6%計，你需要本金400萬。

現時，你可以利用月供股票和現有資金，去累積這筆資產。以你41歲年紀，你現時月供組合係可以。

但比亞迪(1211)這類潛力股，波動性較大，不宜持有太多。潛力股，佔組合4成左右好了。若你投資經驗較少，最好下調至2成大右。

而且，比亞迪(1211)現價略貴，月供係可以，但小小注好了。以下是其他適合你的股票，供你參考。

現時大市只在合理區，每月你可以用儲蓄一半，去做月供﹐另一半儲起。而現有現金，都可以用部份，去分注買入上述股票。餘下資金，就用來等大跌市機會。

至於買收租樓，係可以。但我地財富組合除左要有增長力和質素外，平衡性都好重要。

你現時已有一個物業，若再加一個，會令你組合有少少偏重左係物業類，會產生過度集中性風險。

而且，現時香港樓市唔平，若從投資角度計，股市值博率會較高。除非你找到一個增長潛力不錯、租金回報率理想的旬盤，否則你先用優質股去做增值，會較有效率。

因此，買樓收租這一步，方向可以伴，但未必一定要太急進行。

------------------------------------------------

Q21907：

龔成老師你好，我今年32歲，今年開始偶然間留意到老師個Facebook page，認識到長期投資嘅威力，之前多數都係短炒，蝕左唔少錢，

宜家想好好設計自己長期投資組合，想問下老師如何改善同部署。多謝老師！

基本資料：

32歲，月入22K，有一自住物業，一個小朋友，月供連家用13K，每月可儲5K。

股票本金$148,000

水桶1 $69913 ：47.24%
1177 $7.56 中生製藥 1手 藥品 $7560 ：5.11%
9928 $7.13 時代鄰里 1手 物業管理$7130 ：4.82%（打算$7放）
3067 $18.28安碩恒生科技 6手 ETF$10968：7.41%
6690 $30.8 海爾智家 1手 家用電器$6160 ：4.16%
981 $22.65 中芯國際 1手 半導體$11325 ：7.65%
658 $5.08 中國高速傳動 1手 環保$5080 ：3.43%
2618 $45 京東物流 1手 倉儲物流$4500 ：3.04%
6060 $38.65 眾安在線 2手 線上保險$7730 ：5.22%
6618 $103.2 京東健康 1手 線上醫療$5160 ：3.49%
1773 $4.3 天立教育 1手 教育$4300 ：2.91%

水桶2 $78090 ：52.76%
1313 $8.9 華潤水泥 1手 建築材料$17800 ：12.03%
688 $18.5 中國海外1手 地產發展$9250 ：6.25%
3868 $3.7 信義能源 1手 替代能源$7400 ：5%（打算$4放）
270 $11.5 粵海投資 1手 水務供應$23000 ：15.54%
3718 $1.29 北控城市 4手 環保$20640 ：13.95%（打算$1.3放2手）

1.唔係好識分咩係潛力股咩係平穩，唔知有冇分錯，覺得增長好似有啲慢，應該投資多啲優質股嗎？將來想集中投資係電動車/環保/再生能源/京東/阿里/小米。

2.會太過分散嗎？如果會老師建議賣邊隻？本人可以接受風險！

3.三年後有機會增值到50萬嗎？因想再投資物業自住，原物業放租，及計劃會再生多個小朋友。

龔成老師︰

1) 我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你現時水桶分類，大致都正確。除了海爾智家(6690)和天立教育(1773)算係水桶1至2之間。

而你持有的股票，都有投資價值。你唔好太過在意中短期回報，我地要睇長線。這企業都有質素，你只要長線持有，就自然會有唔錯架回報。

至於你將來集中投資的行業和股票，都係偏向潛力股類別。佢地有較高增長潛力，但同時間風險都唔細。

以你32歲計，潛力股佔最多5成左右好了，否則會令成個組合風險過高。若你投資經驗較一般，你更要將比重進一步下調。

其餘部份，你應該配置在平穏增長股，組合才算平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

2) 你現時組合的確有點散亂，以你組合金額來計，大約持有5-10隻會較理想，會比較易於管理。

但由於佢地都有投資價值，我唔建議你沽出任何一隻。但將來時間，你最好集中翻係5-10隻較有質素的股票，會相對較好。

中國高速傳動(0658)質素較中等，而眾安在線(6060)和京東健康(6618)不確定性較大，這3隻股票，都不宜持有過多。

3) 我假設投資回報有10%（連股息再投資），若你每月能投資$10000 + 現有持股約15萬，3年後大約會增值至60萬。

但3年只係一個中短期時間，最終回報的波動性會較大，你要明白這個風險。

而且，你現時已有一個物業，若你勉強再去買多一個物業收租，你會令成個財富組合，偏重晒係物業類，會有過度集中性風險。

因此，我建議你先用優質股做增值。到你財富累積到一定水平，係足以買入新物業之餘，都有一定優質股留底作增值，你才出手會較好。

------------------------------------------------

Q21908：

龔成老師你好，自從上年同你第一次對話之後已經開始月供計劃，明白財富需要時間去累積，所以我都學識唔好成日望住個市，多謝你無私教導！

現時開始緊每月供款如下:

$2000 @ 盈富 (2800)
$1000 @ 新鴻基地產 (00016)
$1000 @ 比亞迪 (1211)

想問如果想加0388港交所，其實月供係咪唔使太在意現價？1211依家咁貴係咪應該停一停？謝謝你！

龔成老師︰

以你30歲計，現時月供組合係適合的。

其實月供，我地同樣都要用平貴去定策略。只係月供有平均價格的效果，相對直接買貨，風險會較細，所以個價格可接受空間，會稍稍較大。

但若果佢價格水平，係太貴，我都會需要控制月供注碼，甚至係停供。

比亞迪 (1211)現價偏貴，月供勉強可以，但只可小小注，故你維持住$1000先。但佢再升，你就可能要減供款，甚至停供。

至於港交所(0388)現價略貴，但無比亞迪咁嚴重，你現時做月供係無問題。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21909：

我每年大概要給9萬保費（連家人），我唔想草係銀行到，近一年都有月供股票，月供2800@6千，9988@4千，另外每月1手3067

剛剛草10萬現金，以家想草多5-8千，做月供股票for每年繳9萬保費，保費要供20年。當中有2份醫療，3份危疾供20年，1份年金供10年

龔成老師︰

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時要支付的年金保單，如果係你較年長家人持有，係可以。但若你係這類3X歲的偏年青人士，就不太適合。

另外，你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔諗住年頭不停月供去儲股票，之後年尾就沽晒佢，去交保費。因為優質股係要長線持有，才會有理想效果，長線係講緊3-5年，甚至更長。

短期投資回報，會好波動，如果你用這個模式去操作，好易會失預算。

我建議你維持現時月供習慣，並將這些股票長線持有。而交保費部份，你另外以現金模式儲起就好了。

你現時月供計劃係可以，現時大市只在合理區，每資金唔好盡用。最好留有部份，等大跌市出現時，可以用來掃貨。

至於現有10萬資金，可先動用一半入，餘下一半同樣等大跌的機會。

------------------------------------------------

Q21910：

老師我想月供股票，但我間證券行無提供月供股票服務，如果我將自己的資金自動分配，
e.g. A, B, C, D 股票，
一月 A
二月 B
三月 C, D
四月 A
五月 B
六月 C, D
如此類推，請問可以嗎？

龔成老師：

可以。

月供股票的目的，就是將買入價平均，減少一次過在高位買入的風險，你上述的投資策略，都有類似的作用，因此可以進行。

------------------------------------------------

Q21911：

請問6969有前景嗎
請問北水流出流入什麼意思？

龔成老師︰

思摩爾國際（6969）係霧化科技解決方案提供商。近期國家衛健委表示電子煙並不健康，相信對佢會有影響。

先講佢業務，第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

相信，中國將加強行業監管，對佢有核心不利，這點都會影響企業估值，加上這股一向唔平。

基本上業務不算差，有當中的獨特性，以及長遠有增長力。不過，現價唔算平，加上監管風險，如投資，要小心控制注碼，真的小注好了，而這股有長線投資價值的。

北水流出流入，是坊間指內地投資資金，進出"滬深港股通"的意思。

------------------------------------------------

Q21912：

你好龔成，現正拜讀您的新書-千萬富翁，因剛剛已成為了百萬富翁！haha!

多謝您！我好感恩有您教導香港人正確投資方法，而不是炒炒賣賣。您真的影響左好多香港人，而家多左甘多百萬千萬富翁一定有人係因為受您影響！包括在下。

除了多謝您都不知說什麼好，同埋我好tang您開心，深信愛股比亞迪長遠有高增長，擁抱價值投資法，不理坊間閒言閒語，經過多年努力投資，今日成為千萬富翁，吐氣揚眉，恭喜您！

您將會成為億萬富翁，只是時間問題。

大家香港人一起努力

龔成老師︰

多謝你的支持

我都係希望透過自己知識分享，去幫助更多人，去真正理解投資理財這件事。

看到你能成功成為百萬富翁，真係好開心。但緊記，長線投資要做得好，除左用正確方法之外，必需要保持學習，令自己一直進步，這點是很重要的。

我相信，不久將來，你都會和我一樣，成為千萬富翁，甚至走得更遠，加油。

------------------------------------------------

Q21913：

龔sir，唔好意思呀，又想問問小米1810, 我30.5買， 2000股，早前升到最高去番30.45 但我冇放到，下星期我係咪應該蝕放，等佢跌番落去先再入番呢？ 謝謝解答

龔成老師︰

你係投資理解上，存在一些好核心性的問題。

首先，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔會係做短炒，去賺差價。

另外，我地投資唔好去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

我地投資應該係先了解企業質素和前景，當確認係有優質，就再審視佢平貴，去定入市策略。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線持有，但你預佢股價會較波動。

------------------------------------------------

Q21914：

你好，龔sir, 現有276萬現金，但1年後要比200萬我家姐，請問呢1年內買咩可要賺取高息又保本

龔成老師︰

坦白講，只有1年時間，要保本和收息，那200萬部份最穏當選擇就係做定期。

因為，就算係再保守的收息股，都會有機會出現價格波動，令你出現賺息蝕價的情況。

至於餘下76萬，你可以因應你人生階段、投資經驗和風險承受能力，去作出配置。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

大市現處於合理水平，那76萬資金，可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21915：

我其實是你的學生，但我於上年開始follow你的post，從中學到很多投資股票上面或人生的導向的知識，真的獲益良多，希望你介意我稱呼你為老師！

我在幾年前因被公司遣散，之後適逢社運之係又疫情，所以順理成章專心做家庭主婦照顧家人。我一向有投資股票的。

但過往買的真是一些垃圾股，過去的就不再提了，當是一個教訓。 自上年我在fb認識到你。我都買了你的一本著作[股票勝經], 仍在努力中，希望盡快睇完這本再睇第二本。

你常常提醒我們{買股票不是買佢的股價，是買佢的企業，若是優質有質素的企業，就算跌市也不用怯}，同時買股票都要有耐性不能心急，要長期不是短視。

我之前就是中哂這些錯誤的方法。1、2月時幾次大跌市，我手上有2382，175，2333，3690，因跌好多，好驚越跌越蝕得多，所以忍痛蝕走。但之後市回返就升返上來。

可能你睇到依度都會話我蠢、傻！。 依家我會時時刻刻都記住你的真言。若是優質的企業就不用怕。

sorry, 好長篇。想借此機會多謝你。 同時有幾點想請教你

1. 怎樣知道是股票是優質不優質？

2. 我現有3993，358，是優質股嗎？ 3993 > 6.28 算高位入358 > 21.5 算高位入，兩隻可繼續持有嗎？

3. 另外，想幫我仔（剛成年）月供股票，心目中想供1810或1211，兩者邊隻較適合？但兩者現價又升返上來！同時不知道怎樣月供股票？可否賜教？非常感激!

龔成老師︰

你過往所經歷的，絕對唔係你個人問題。其實很多初階投資者，都會經歷的，係一件平常事。重點係，你有無從中吸取到教訓，之後再重新上路。

1) 要分析一間企業，有無質素。過程比較複雜，好難三言兩語就講到，就算在我的股票班，都要講數小時。

簡單來說，你要考慮企業本身質素、行業發展、財務狀況等，去分析一個結論出來。

2) 洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較難分析。

另外，這股的股價較為波動，這股不是不能投資，但不宜大注。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

這2隻股票，若佔你組合比重不高，可以守。但若果係較高，我建議你沽少少，去平衡個風險。

3) 月供其實好簡單，你去銀行或者證券行開個可月供的投資戶口。你睇下個月供費用，同埋邊個方便你自己，就可以。

你仔仔較年青，投資可以進取少少。你所選的2隻股票，都係適合的。

但現時比亞迪(1211)偏貴，要月供的話，只宜小小注。而小米(1810)現價開始月供，係無問題。

另外，我建議都加入一些平穏增長力股，在月供組合。因為畢竟潛力股(1810, 1211)風險都係較高，佔組合比重太多，唔係咁理想。

你仔仔在潛力股和平穏增長股，最好約各佔一半，就算得上平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市算在合理水平，每月資金唔好盡用，大約可以動用一半做月供。餘下一半就等大跌市出現時，可以用來掃貨。

------------------------------------------------

Q21916：

上完你堂， 特別係最後一堂，覺得好有意思。

原來會將間屋當wallpaper唔係得自己，不過我係自己間鐵皮屋，日日提醒自己連普通人都算唔上。

好記得你27歲果陣就有一百萬，我都岩岩到數，不過行的路同實現的方法同你都唔同。我過去係靠基金都努力甘捱到宜家33K人工。

來緊會多用你方法，希望你我最後都可以有自己想要的物業，對你來講可能果個係自己的一個小天地，對我來講物業反而係代表我的存在價值。

共勉之。多謝你搞呢D Course比我地。

龔成老師︰

你無需要這樣想，在這個世界，每個人都是一個獨立個體，無得定義話邊D係普通人，邊D係唔普通人。

我地做人，最重要係對自己內心負責。你唔需要同別人比較，因為你就是你。只要找一條自己合適的路走下去，咁就可以。

你27歲，相當之年青。只要你好好學習，用正確投資方法(記得溫書)，持之以恆。我好有信心，你一定可以擁有自己理想中的物業。

加油，保持努力!!!

------------------------------------------------

Q21917：

想問問中國白銀集團00815 前景點睇

中國海洋石油00883。10.18@17000，中國鐵塔1.23@64000，呢2隻止蝕離場定可以長揸..？Thanks

龔成老師︰

中國白銀集團（0815）的質素不太好，因為佢的業務較為波動，之前亦出現了虧損，佢主要於中國從事製造及銷售白銀及其他有色金屬；黃金、白銀及珠寶產品的零售及批發等。

這股又不是完全無價值，現價合理，但只宜好小注。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。若佔你組合不多，可持有。但若佔你組合較多，建議沽出部份。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線持有。不過，潛力度比過往略減。

------------------------------------------------

Q21918：

老師你好， 想問一問如果我還是投資初學者，但準備下年到加拿大移民， 當我移民後，應該繼續研究香港股票市場，還是美股？ 繼續研究香港上市公司買港股投資應該較易掌握？

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

而你投資那一個市場，就要視乎你對相關市場的了解。基本上，研究2個市場的企業方法，都係好接近，無話邊個較易掌握。當然，你本身係香港人，相信會較了解香港和內地文化，在分析港股行業時，會有優勢。

如果你想投資港/美股，但現時對港/美股又唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

盈富(2800)係包括58間質素不錯上市公司股票的組合，有長線投資價值。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21919：

龔sir，本人現56歲，月入19,000（近乎月光族）, 每月供樓約6,000作自住（最後供款期為小弟73歲），流動資金40,000，現想開始月供股票，每月投放約1,000-1,500。

小弟有以下問題想請教：

1. 以我現時情況，如開始月供股票，應否選擇增長型股票，還是選擇穩健型股票？ 以下股票合適可選嗎？

0016 新鴻基地產
0066 港鐵
1211 比亞迪
1810 小米
9988 阿里巴巴
2382 舜宇光學科技

2. 因樓按要供至73歲，應否於加息週期開始時，將樓按改為最後供款期為65歲，這樣更改去減小利息開支，做法是否明智？ 還是將月供股票財富，到最後幾年才提早贖回按揭？

龔成老師︰

1) 以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

你選擇的股票，係有質素。但組合過於進取，除了新地(0016)和港鐵(0066)是平穏增長股，較合適外。其餘都係潛力股，對你而言，風險太高，我都太建議。

而且，你現時每月可以資金好了，供太多隻，會令個股月供成本過高，咁係唔理想。

你可以暫時先隻中供新地(0016)和港鐵(0066)，到你有再多資金，才月供以下股票。至於現有資金，可以先用一半。餘下一半，就等大跌市時，才動用。

但由於你已近退休之年，這2隻「平穩增值股」唔適合一直供落去。你要隨著年齡增加，慢慢換碼，去增加收息股的比例。到退休時，收息股應佔100%。

2) 這個要視乎加息多少，因為只要你長期平均回報率和借貸息率，係存在一個明顯息差，你係應該維持現有還款計劃。

但若果加息比較多，可能息差以收窄(不足2%)，你就可以考慮用較多新資金，去做還款。

不過，我唔建議沽貨去清還貨款。因為我地無人知個市場環境會點走，你一次過清晒成個股票組合，其實係好高風險。

------------------------------------------------

Q21920：

老師好，最近很迷失，想問以下幾隻股票應該怎安排好。

136,
369,
769,
1029,

1705,
1830
3800,
6988

龔成老師︰

完美醫療（1830）和樂享互動（6988）有一定的質素，現貨照長線持有。但現價偏貴，不宜加注。

恒騰網絡（0136）都算有質素，但不確定性高。而賓仕國際（1705）質素較一般，2者都不宜持有太多。

永泰地產(0369)、中國稀土（0769）投資價值好一般，長線換至其他優質股，會較好。

鐵貨(1029)無乜投資價值，建議沽出。

保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

我地投資一隻股票，就等同投資一間企業，我地必須認真分析佢的質素、行業前景、財務狀況等，才好做投資。

我見你過往選股，大部份質素都唔係太理想。如果你選股能力較弱，我建議你買一些ETF，好似盈富(2800)。

它是包括58間質素不錯上市公司股票的組合，這些股票有升有跌，但長期計，都有不錯的回報。買入盈富主要有兩個回報(分別是股價升幅，加上股息回報)，股息不多，大約只有3%。

而股價升幅，其實有升有跌，每年都會波動，但長期平均計，都有5%-10%，當然，這是不一定的。若你以月供股票，買入的價格就能平均，不用擔心一次過在高位買入的風險。

雖然盈富(2800)增長力，唔算十分高。但佢係一籃子優質企業的組合，對於選股能力較弱的初學者，絕對係一個唔錯的選擇。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18281-Q18300）

Q18281：

你好，我係股市新手，一直唔知點樣投資，直到睇左你嘅文章，覺得獲益良多，所以都忍唔住好想問吓你嘅意見。

我30歲

月入一萬五，每用比五千家用，保險二千，每月日常開支三千，得五千可以儲或投資
儲蓄得三萬

我之前試過一年月供2800同823，但覺得每個月蝕咗手續費，派息又派得唔多，又補唔番啲手續費，好似只係有出冇入，所以就賣晒。

覺得不如唔睇股票，努力儲錢就算，但係我覺得只係儲錢係銀行，財富係唔會增值，同埋我唔想為咗錢而日日都咁煩惱，成日影響自己心情。

我想請教吓你，
點樣先可以做到財務自由？
點解買2800係好？

點解啲人買幾隻股幾年之後，就可以每個月多幾萬蚊，係咪因為靠收息就可以？

我睇完晒你啲文章之後，我覺得有啲股票係要長期持有先有回報嘅，所以我而家買咗兩手823，但係我想問仲應該買啲乜嘢組合？

823應該算係平穩增長嘅收息股？

月供1211係咪好？我打算月供一千
我真係理解能力比較差，睇左你好多文章都仲咁多問題，希望你可以花少少時間幫下我，thanks

龔成老師：

我見你好多財務上的疑問，其實你應該先增加知識，睇：

《80後百萬富翁》
《股票勝經》
《財務自由行》

你會有好大的得著，投資前，一定要提高知識！

我過往，都經歷過好努力的時期，我最初做野，$8000人工，我第一個目標就要自己5年累積$100萬，因為我知道窮者愈窮，富者愈富，所以，我幾辛苦都好，都要自己盡快有第一個$100萬。

好彩我最後4年半成功做到，但這幾年我平均一星期工作6天半，不過換來的，是之後的財富能自動增長。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你現時應該做3樣野。

第一，增加知識。

第二，提高收入，唔好比自己永遠$15000人工。

第三，投資，利用月供，或自己分注投資都得，總之唔好只儲現金。

------------------------------------------------

Q18282：

你好，我想問嚟緊我準備移民台灣

我與女友會各有公積金約$200萬，另外我們亦在賣樓中，預計扣除還款會有約$500-$600萬盈餘， 我們打算用一份公積金作投資移民及什費

另外的作投資作我們在台灣的退休生活費，我們今年未夠50歲，希望每月約有$3-4萬港元收入。

我們諗過在香港買樓收租，但又擔心香港前景問題；但又不會股票投資

想問在台灣可以怎樣投資呢？
謝謝你啊

龔成老師：

你可以設計一個平衡組合，香港與台灣都有資產，由於物業較多限制，如果你地真的移民台灣，就未必在香港買物業，反而可以考慮台灣買收租樓。

至於香港方面，你可以投資股票，股票的流動性強，問題相對較少，你投資一些穩健類股就得。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

另外，加上台灣的收租樓，以及暫時持有一定的現金。之後可以再慢慢投資一些較穩健，現金流類別的工具，例如債券、銀行較穩陣的投資產口等。

如果到時在台灣開證券戶口，可投資一些指數基金，都是穩健的選擇。

------------------------------------------------

Q18283：

老師你好，現在一個月扣起支出大概一個月儲到15000
現金大概25萬

現在月供 盈富二千元
手上有一手 恆生 二手渣打（入的價錢同現在差不多）
仲有2手毛記 ＄2入 諗住短炒 點知冇咗一半 （未放）， 放唔放好？

想再做多d投資 有咩suggestion呢?
只有＄2000月供會唔會太保留？
我應該月供好啲定係一手手買？ （唔識玩股票 多數蝕錢）

因為小朋友下年開始讀書 所以唔想投資曬全部錢落股票 講指教 感謝感謝

龔成老師：

你每月的股票，可保持。或者你可以增加金額至$4000。

恆生（0011）質素無問題，但你預佢中短期較一般，以收息為意。渣打（2888）質素唔算強，投資價值不算高。

至於毛記（1716），投資價值只是一般，同時唔建議短炒。

至於現金$25萬，你都可以動用少少投資，例如$5-8萬，餘下做家庭的防守資金。銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

我建議你多增加投資知識，無知識去投資是危險的。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18284：

龔成老師你好！

我係一個投資新手，因為朋友嘅介紹，認識老師你。開始留意老師你的Facebook問答、YouTube片同投資分享文章來學習及認識投資。多謝你的無私分享！

我今年27歲，目標想3年內可以有一百萬
每月月供
煤氣 $500 (現時有287股)
港鐵 $1000 (現時有223股)
比亞迪 $500 (現時有126股)
盈富 $3000 (現時有1046股)
每月儲$5000現金(現時約有四萬)

持有股票
2手 煤氣
1手 港鐵
1手 比亞迪
5手 太古地產
4手 盈富

想請教老師：
1. 現時投資組合有咩可以改善？能不能3年內增長至一百萬？

2. 月供會唔會過度分散？應該加大比亞迪數目？定月供其他潛力股？

3. 0788 中國鐵塔 值得投資嗎？
感謝！

龔成老師：

1）方向大致正確，現時月供的，以及手持的，都是有質素的股票，同時都是適合你投資的。

以你的年齡，可以加多少少潛力股，但你就要明白風險會高左。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

2）你可以考慮加多一隻潛力股去月供：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。

3）值得，現價合理。

------------------------------------------------

Q18285：

龔成老師你好:買了你3本著作, 80後百萬富翁,股票勝經和財務自由行, 獲益良多. 現有投資相關的方向與策略問題, 希望你能赐教指點. 先謝.

本人今年35歲, 月入4萬8, 扣除家用,供樓及個人開支, 大概剩餘1萬作儲蓄. 另外銀行戶口有現金80萬, 及20萬在期指戶口為投資期權所用.

讀過其著作, 了解到持之以恆的供股對複式回報有重大影響, 所以亦想盡快跟從此策略, 目標希望3年內有100萬回報.

見過你給其他人的建議, 我應該可以選擇投資「平穩增值股」+「潛力股」.

選股方面,本人不懂股, 常見你指導可以供 2800. 另外亦對一些中資股如阿里巴巴(9988), 京東(9618)及中國鐵塔(788)有興趣.

敢問我現在應動用戶口的80萬分注入場, 加1萬月供, 還是只做1萬月供的安排比較實在可行?

非常感謝.

龔成老師：

現時大市不是特別平，你唔應該這刻動用太多資金，$80萬最多只用$20萬-$40萬，然後同時進行月供，$1萬-$15000都得，餘下的資金就等機會投資朱

至於期指期權你就自己衡量風險，我自己就唔算好建議。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18286：

老師你好 我啱啱畢業搵左工,有一d 選股的問題想請教:
可投資現金有$40000

現在我持有同買入價:
以下是我持有：

大家樂(341) @ 2000股 平均價14.1。
置富產業信託(778) @500 股 平均價 6.7
中信國際電訊(1883)@2000股 平均價2.5
五谷磨房(1837)@ 6000股 平均價 0.78

想問下我好唔好等341個價落返d再買?(之前係$16.9放左一手, 跟住佢係咁升…) 或者留返呢手收息?

778我係睇你最新個本(50優質潛力股)買的, 現價6.7我想加注

1883 我係睇佢遲d會因為5G發展同獨市生意 會升值?
1837 佢呢幾個月好似係咁跌, 係唔係應該離場,佢個前景係唔係唔太好?

想問下老師點睇?
Thanks!

龔成老師：

大家樂（0341）都有質素的，但你預佢中短期會較一般，要耐心持有先得，同時這股不是高增長股。

置富（0778）可作長期收息，雖然現價可加注，但你年輕，唔應該持有太多收息型股票。

中信國際電訊（1883）正面，但增長力未算好強。

五谷磨房（1837）不是零質素的，但業績的確弱，整體質素算是中等，如果你想組合增長力較強，可考慮轉其他。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18287：

你好，我三十三歲，月入三萬
今年三月見個市好平，人生第一次買股票基金，之前從未試過投資。

而家有
900股9988@186
400股3690@221
5000股[email protected]
3000股[email protected]
1000股[email protected]

另有100k係投資美國基金
暫時加埋值大約800k

另有150k 現金

請問，目標係兩年內買樓（約六百萬），我應該如何部署，達成首期目標？

謝謝

龔成老師：

現時你持有的股票，都是有質素的，可以長線持有，至於美國基金，你要睇翻當中的投資策略及持有資產，先知有無實質的投資價值。

如果你想2年內買樓，可以利用這段時間，作基本的財富增值，但由於2年時間唔長，因此，你投資唔能夠太進取，你應該留一定的現金唔好動用。餘下部分就作投資。

你可以考慮較穩健的股，如盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18288：

老師你好，小弟係疫情前買左1128當時18蚊買左4000股。依家觀察左好耐都係14.5-15.5左右。

我應該等佢升高少少放左佢定係Keep住？麻煩老師你

龔成老師：

永利澳門（1128）有質素的，但肺炎對澳門情況影響大，加上中國經濟轉弱，會對之後的收入有影響，因此會令這股中短期都較弱，但長遠來說，這股是不差的。

你有貨可以守，只要不是過多就得，慢慢會上翻去的。

------------------------------------------------

Q18289：

龔Sir,本人今年52歲，沒有結婚跟媽媽住公屋，月入18K, 現有100萬元儲蓄，MPF 户口內有45萬，及20萬流動資金買賣股票，平均每年可獲利10%。

扣除生活費及年供保險後（包括自願醫保，危疾，人壽）每月可儲蓄8000，希望60歲退休後有500萬現金，可以怎樣運用現有金錢達成目標儲蓄。謝謝！龔Sir,

龔成老師：

如果想完全60歲累積$500萬，你要更進取先能夠做到，要投資較多潛力股先有機會得，但你現時52歲，未必適合進取，因為要開始以保本為重點，只能考慮基本的增長力。

你可以有幾個方向盡力做，但都唔好過份追求$500萬。

第一，加大投入，你要睇下有無方法增加收入，減少支出。

第二，你投資平穩增長股就好了不要太進取，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你可以利用手持有的$100萬，分注去入，同時月供股票。

第三，可以遲少少先退休。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18290：

你好，龔sir，睇左你一排，想分享吓同問吓你財務/股票分析意見

本人30歲，月入3萬中，流動資金約20萬左右，上年與太太置業600萬單位，月供2萬，與太太共同分擔

投資股票有10年經驗，但一直都係屬於短炒為主，一般都係5-10%升幅就會走貨，有時跌幅大就會放低等見家鄉

近年主要投資股票有 3333, 1810, 763, 9618, 700, 1177, 1310

唔知嚟幾類股票有無潛力，同埋有無咩建議可以增進流動資金，因為置業後投資金額大幅減少，想放多嘅資源係投資市場

龔成老師：

短炒根本賺唔到錢，之後唔好再做。

現時你持有的股票，基本上都有質素的，可以長線持有，中國恒大（3333）負債太高，要小心。

你30歲，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

上述股票都有增長力的，你可以持有。

你可以從不同的角度，去增加收入，兼職、小生意，都可以考慮。另外，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18291：

你好成哥！想講下我嘅個案，唔知有冇機會可以解答到，謝謝你！

我與老公沒有物業，有一個歲半女兒，想下年左右買樓自住，該如何部署投資

本人加老公月入約$90000，同是公務員
兩個股票加戶口約$180萬左右
現時租緊親戚屋企，$10000一個月

股票方面有賺有蝕，現時仍在學習中
本人36歲

想補充少少，按8-9成左右

希望下年樓價跌返少少就鬆動d
另外老公下年已41歲，所以希望盡早置業
喺退休前供完

龔成老師：

由於你短期內會置業，因此資金大部分不宜投資，因為買樓做按揭等因素，始終都有不確定性，等你完全買樓後先投資，會較好。

如果你做高成數按揭，到時應該只動用$100萬。

你這刻如果真的想投資，最多只能用$30萬-$60萬，如果見到大市有明顯回落，把握機會入市買股票，但在現時的市況，就唔太建議動用資金。

香港經濟轉弱，未來1、2年樓價可能向下，但這可能只是中短期調整，因為香港樓長期供應仍唔夠，因此，長遠仍向上。

以你現時的財富情況，其實已經可以開始睇樓，只要見到樓價有多少少下跌，同時遇到一個心急業主，就是買平貨的機會。

------------------------------------------------

Q18292：

老師：你好！
本人48歲，在澳門做賭場，月入$33K，有1物業出租，現持有

1. 金沙(1928) 4400股$26.5，期間升到$32.7、$34.85，心情忐忑，最終沒有賣出。

2. 澳博(880) 15000股$9.25，由於疫情股價不斷下跌。

3. 南航(1055)10000股$3.8。

我知道持有賭股比例太多，請您給予我意見，謝謝

龔成老師：

金沙（1928）與澳博（0880）都是有質素的股票，但佔你組合比例的確較多，如果你現時現金不多，可能要賣少少。

如果你現時仍有現金，可以唔賣住。之後就睇時機，慢慢增持其他類別的股票，以這方法來減少翻這兩股的比例。

兩隻都是可長線投資的股票。

至於南航（1055），質素中等，行業的變數較大，賺錢能力唔算高，這股就唔建議持有太多，暫時持有無問題，但就唔值得增持。

------------------------------------------------

Q18293：

你好，龔成老師，又以下問題想問你：

1.本人公務員,33歲，供左6年公積金供款，我組合係60％主動型股票,30％債券，10％银行存款，這個組合可以嗎？有另一項是被動型股票，應否刪除銀行存款？

2.本人有惠理（806）35000股，均價6.25,今年都派了7000幾息，我應否蝕放好，用予投資其他 優質股 ，因套住了10幾萬，变左無資金，好困擾，又五知可否上返个價，謝謝老師。祝工作順利，身體健康

龔成老師：

1）組合大致可以，不過你33歲，其實可以進取少少，你可以8成股票，2成債券。

2）惠理集團（0806）的質素只屬中等，相信你持有，都只會平穩，唔好預期有太大的增長。不過這股始終不是無質素，因此，在方向上，你可暫時持有，但就可等機會，分注賣出。

------------------------------------------------

Q18294：

你好，龔成老師，本人買了你的新書-5年買樓4部曲，主要原因是真的想3~5年間儲錢買樓，預計首期約60~70萬。

先簡單介紹一下自己，本人是公務員，每月人工是18k, 每月儲8k現金，現持有主要資產約15萬的股票

0005 1200股
0823 200股
0066 500股
2800 1000股
2388 1000股
0011 200股

請教一下，本人是否應儲備一下手上現金，停止買股票，然後在買樓前約1年賣出股票套現而停止風險? 或是買一些風險較低的投資產品以加大資金買樓呢? 謝謝。

龔成老師：

你現時仍可以投資股票，只要你不是太進取，不是太集中在潛力股就得。另外，要同時留有一定的現金，除非出現好大型的跌市，否則，唔會動用。

現時你可以投資平穩增長股，令財富有基本的增長，到買樓前的約12-18個月，就開始賣出股票，等你資金準備。

至於你上述的股票，太集中在銀行股，這就會出現集中風險。

你可以考慮盈富（2800）恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18295：

老師你好, 本人現時27歲, 月入16000, 冇投資經驗
月入其中10000會儲起, 有5000供緊儲蓄保, 而家大概有50000存款
正在打算月供

盈富（2800）$2000
港鐵（0066）$2000
粵海（0270）$1000

另外諗緊入手2股Tesla

請問我咁樣分配岩唔岩啊???

龔成老師：

"保險"只係理財中防守部份，買足夠保障就可以，增值可以留比優質資產（如優質股、物業等）去做。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。策略上，你可以投資"平穏增長股" 和 "潛力股"。你現時持有的都是"平穏增長股"，是適合的。未來，要加入翻一些潛力股，如比亞迪（1211），中生（1177）或福壽園（1448），去提作增長力。

現時，你每月可用$5000做月供，其餘先儲起，用一邊月供一邊儲蓄的策略。但由於你經驗不多，現時你的5萬和每月儲到的$5000，就等你累積一定經驗，才動用入市長線投資。

如果你睇好電動車，我會比較推薦比亞迪（1211）。因為電動車最重要的是配套，所以國家支持相當重要，而中國對電動車的支持是正面，公共交通的訂單亦不斷給比亞迪。

比亞迪先在公車市場打穩陣腳，然後保持進攻私人市場，這是理想的策略。另外，Tesla2019年第3季才首次出現盈利，但比亞迪己有盈利很長時間，因此這方面比亞迪較穩健。

不過，Tesla的增長快，會令佢當業務由虧轉盈時，股價向上好勁。不過穩健度，比亞迪就會較好。

另外，Tesla過去要不斷在市場各途徑集資，以維持營運及研發，但比亞迪已有正現金流，可以憑以戰養戰的模式，去穩健地發展新項目，資金鏈斷裂的問題較少，這是一個很有利的因素。

這兩間公司是全球電動車市佔率最大的兩間，但電動車始終是新興的產品，到真正全面普及仍有一段時間，當中總會存有不確定性，所以我在選股時，選了資金鏈較佳的比亞迪。

------------------------------------------------

Q18296：

老師你好，我目前35歲，現在有一層約600萬的樓自住，希望45歲前能買多間800萬樓自住，現有樓放租。

之前投入50萬私人投資，現在差不多現值95萬，這部份本金動不了，每年大概可以派5%利息，其餘大部份都是存現金

前幾個月看了老師的FB專頁後開始投資股市，大約在大市23000左右進場，現在約40萬在股市，大多是老師推薦的優質股，大多一手一手買試試手感

一部份新經濟股，雖然我知道應該長線持有，但面對國安法對未來很迷惘，且沒什麼回報還是有點灰心，請問如何調整心態?

我目前的組合:
編號 買入價 股數
0011 137 200
0012 30.05 2000
0066 41.8 500
0823 64.25 600
1398 4.85 2000
1810 14.44 1000
1928 29.75 1600
2800 24.2 2000
3690 171.4 100
3988 2.87 5000
9618 226 50
9988 188.9 100
0027 52.35 1000
0003 12.1 1000
2388 24 1000

目前我還有現金約160萬，我該投入多少在股市? 現在適合繼續投入還是要等香港國安法情勢明朗點再投入? 現在組合是否太雜亂了? 謝謝老師。

目前正在閱讀 3百萬富翁及50隻優質潛力股

龔成老師：

我地最重要是建立一個平衡的組合，新舊經濟，不同增長類別的股票都可以在其中。如果你想組合有較高增長，可投資較多在新經濟，當然，你都要明白這會增加了你的風險度。

你要按自己的情況去平衡。

國安法因素已經在股市上反映，基本上已不太大影響。

至於你現時持股，其本上都不差的，如果因為回報少就唔開心，這是好大的心理問題（雖然不少散戶都有）。其實就算全球最強的投資者，一年回報都只是20%，一般散戶就是為了追求更高回報，而無面更大風險。

正正因為這因素，根據統計，10個散戶在長線計，有8、9個以上都是輸錢的，就是佢地貪心，人炒佢又炒，無股票知識。

現時的組合，基本上都是有質素，但唔建議增加大多隻數。我地投資，最重要是長線持有，以及建立平衡組合，唔好著重短期因素。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18297：

成哥, 想問下買樓的野, 如果我依家有HKD1M左右, 家庭收入5萬8千左右, 未有小朋友

如果買6.5M 的樓,借9成, 每月要供大約24K
你覺得我應該儲多D先, 儲到可以比2成首期, 到時借8成
定依家都可以買, 借9成好呢?

龔成老師︰

其實個重點，係睇翻你個單位，現時值唔值得（係一個理想或平宜價?），或者係唔係有必要現時（如家庭實際需要）去購買。

若果你目標只係投資，現時股票值博率會較高。所以，你可以將資金放在股票上增值，再等機會。

現時香港情況，有機會在中短期出現調整，到時你再用增值倒的錢去置業會較好。

反之，你要現時買的話，只要堅守"供得起"這個大原則就可以。

------------------------------------------------

Q18298：

龔sir ,我本來持有20 萬既股票，但係分得太散，分別有恒生銀行，阿里巴巴，太陽城，中芯，吉利。

現在想沽出其他只集中一隻，請問你嘅建議會係邊隻呢？2018 同小米 都係選擇當中

龔成老師︰

你可以優先考慮沽出太陽城集團（1383）。

佢近年的財務數據，核數師報告都出現「修定」報告，即是核數師對一些賬目有疑問，最後與這公司算是處理並無事，但這已反映當中有一些「古怪」的地方，在我地投資者角度，已經要小心。

同時，這企業的盈利十分波動，有時會出現大額的虧損，都是令人擔心的地方。整體質素上，佢都係5隻中最弱。

瑞聲科技（2018）質素不差的，手機行業的增長比過往年代弱，相信佢只會進入平穩期。

佢本身有一定的規模與技術，整體前景不算差，但就要多點時間去轉好。

長遠發展正面，不過，佢增長力不是好強，只能視為平穩增長類別。現價合理，可以分注投資，長線持有。

小米集團（1810）有質素，因為佢的產品的確受歡迎，同時處於增長狀態中。

此股係有佢潛力，前景都算正面，只是有較多不確定因素。

加上現價計，此股已經處貴的水平。要回調4成進入合理區才分注入貨，同時要控制注碼。

------------------------------------------------

Q18299：

龔sir 你好,我8月頭買左6969 $39入 入左1萬股 已經睇左佢幾日 都可以維持係呢個$39位置,點知 我1買就急跌到最低$33.4,

我當初買咁重係因為 就住佢升到$43左右就放, 點知到佢出業績 之類都沖唔上 最高$41 我都無放 之後又跌

我依家驚佢升唔返 會繼續跌 今次如果升返 平手我都會走 ! 龔sir 想你比d 意見我🙏🏻 6969 還有機會升返嗎？

龔成老師：

你犯了三個錯誤。

第一，你唔應該做短期的股價走勢分析，因為根本無人做到。

第二，同一隻股你唔好太集中。

第三，你集中睇之前的股價，而不是睇企業。

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價已上市時升了不少，現價唔算平，你如果持貨太多，宜減部分，餘下先守，無人知佢中短期能否上翻去，但佢點都會有一定的波動。

------------------------------------------------

Q18300：

你好，我之前有買左你既書，5年買樓4步曲，我依家每月俾保險費5千，有一份儲蓄危疾US286.74一個月，但買左剛剛好一年（要供20年）

另外有一份基金US 130一個月，仲有3年多就供完，另有一份人壽連儲蓄就US 65一個月都係仲有3年多就供完， 另外仲有一份住保既意外

人壽，住院 US72.06一個月, 最後有一份 人壽連儲蓄每月HKD340, 仲有17年先供完，已經供左8年，但依家cut只拎得萬5，

想請教一下，我現在應該點安排，十分感謝你

龔成老師：

我地理財，要做好攻守兼備，風險平衡。

你買了保險儲蓄等產品，這已經做好了防守的部分，但你這部分投入的資金較多，而這些產品，最重要是「適合」。

你之後要加強翻「進攻」方面。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

例如，你可以做月供股票，或自己分注買入，例如可投資每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。