【#Nj評:: 生仔二部曲〈Baby復仇記〉〈BB駕到〉】 好有趣，同一時間兩套題材可以話撞到應一應嘅片上。〈Baby復仇記〉早排優先場俾人鬧得好緊要，我當然調教好心態入場，又覺得無乜野，當代港產片質素咁囉，慣咗接受咗。〈BB駕到〉男主角我本身就勁鍾意，對上兩套〈M巾英雄〉〈奇蹟火星夢〉都勁爆正，又調教好心態入場，點知睇到我想走… 唉，我痴咗線。 . 〈Baby復仇記〉就點都唔係話好睇喇，衰在兩個主角都非常唔討好，成日因無聊野鬧交，尤其DaDa全程西口西面，點叫人鍾意。其實班演員陣容都算幾正，余香凝係套套戲嘅台柱，佢今次有啲戲呀都，王敏奕仲正睇得出佢落咗啲心機演個師奶仔。男家嗰邊余安安最多戲，但就辛苦張繼聰、肥腸，驚搞笑得濟搶過男主角風頭所以都無得俾佢兩個盡情發揮。呢套戲嘅創作思路，擺明就列一大堆孕婦辛酸出來之後塞晒落去，我肯定編導認為躁底係生仔前最大鑊嘅事，所以瘋狂俾男女主角揾交嗌。唔好話照顧BB啦，兩公婆感情差到咁要離婚添啦。全套戲我似睇緊資訊性節目，知道原來生仔前會咁咁咁，戲劇上故事性就係唔夠，最多都係鬧交然後出走然後和好，普通野，轉個頭唔記得晒。好爛好失望？咁又無，味道係無乜但未至於嬲，預咗啦，而家啲港產片唔係咁先正常咩。都叫好睇過〈棟篤特工〉啦，sor又拎出黎鞭屍。 . 〈BB駕到〉只係免強好過上一套印度爛片〈喂？寶珍先生〉，我通常都覺得印度片好睇不過近期呢兩套勁憎。兩者最相同之處係每廿秒就硬加滑稽音效，可能呢種係印度笑片特色掛… 姐係你以前睇〈歡樂今宵〉〈笑聲救地球〉嗰啲罐頭音效，兩個幾鐘都係咁真係勁辛苦，加咗我唔覺好笑咗囉。仲有套戲太長，跟本無咁多內容，然後超密集鬥嘴對白，播放聲量又大，嘈到我好辛苦要花勁多精神去睇，所以sorry我訓著咗。其實條大橋講兩對夫婦人工受孕點知撈亂咗係幾好的，絕對有拍成笑片嘅潛質，不過拍出黎好單調好揼波鐘，無2個幾鐘嘅內容又要夾硬拍咁長，睇到好唔耐煩好嬲。反而其他睇過既印度片更長都好，我會睇到一個又一個內容有新意的段落去發展更多故事，呢套係絕對做唔到，淨係得幾段拿手歌舞帶得起我情緒。印度片勁在佢重點去講一個認真故事之間，可以加到好多自然流暢不兀突嘅笑位，〈M巾〉〈火星〉〈三父女〉都做到。但呢兩套主力想搞笑嘅印度片，反而得少少好笑，諗到唔知有乜好加就求其講啲人生道理，錯晒。以後都係揀戲睇好。 . 加入狂友fb群組【 #狂氏電影綜合症候群 】 *// http://bit.ly/32xJWLp // 直接交流 × 討論電影由你起頭！ . *追蹤instagram【 madman.movie 】有你著數！ *// https://www.instagram.com/madman.movie/ // * *緊貼【 電影狂人-影評情報交流平台 】獲得最新電影資訊！*** －－－－－－－－－－－－－－－－－－ ░電影資訊 ░獨家影評 ░幕後製作 ░戲院優惠 Fb專頁【 電影狂人-影評情報交流平台 】