//支持本Page請Click入內文比Clap，已為Medium收費會員請直接Click入內文閱讀，謝謝！//

12月28日星期六，再次有人號召市民發動「和你Shop」，主戰場分成兩邊，前半日就上水廣場、後半晚就德福廣場，最終兩個地方都有唔少抗爭者地步，結果響網上就掀起咗對「和你Shop」路線嘅嚴厲批判，認為佢係户效低而風險高嘅自殺式行動、甚至一度出現「搞手其實就係警察等你送頭」嘅疑雲。究竟「和你Shop」係咪等於送頭？響度請循其本，同大家再回顧一下佢嘅源頭、目標同風險，然後先能夠答倒呢個問題。

「和你Shop」之前，其實經已有唔少抗爭者選擇響商場以唔同方式聲援抗爭，之但係自從715防暴公然無視私有產權、踩入沙田新城市廣場範圍亂拉人之後，一方面等若宣佈商場（加埋港鐵站）經已唔再係受私有產權保護嘅「休戰之地」；另一方面抗爭者亦憤怒於港鐵同部份商場管理層為虎作倀，於是就開始以商場（尤其係港鐵營運商場）為抗爭地點之一，同時亦開始以打擊商場盈利為報復目標。

簡單黎講，「和你Shop」有以下優勢：

1. 商場有冷氣、臨近車站、又有廁所同售賣各種補給嘅商店，參加門檻相對低；而且空間比較細，好容易就可以透過聚人營造聲勢；

2. 商場佈局通常比較開揚，比較少難以監察嘅暗角；而且好多一般市民會進行消費，警方執法相對會比較投鼠忌器。只要警方一亂黎，場面一定會變得極之醜陋，所有濫打濫捕、造成恐慌亦會直接令市民對警察更加仇視；

3. 相比起街頭抗爭，「和你Shop」目標清晰：就係要打擊消費，撕破政府粉飾太平面具，換言之只要令到商場店舖拉閘你就贏；

4. 商場衝突好少會被告暴動罪（可能考慮到保險賠償問題），擲唔倒汽油彈同磚，可告罪名相比起街頭抗爭應該會輕少少（雖然都只係輕少少）；

但亦因為「和你Shop」局限於商場，亦會有相應劣勢：

一、商場為一相對封閉空間，只有有限出入口，一旦被警方圍堵就好難走得甩；

二、只要警方唔知醜，一樣係可以濫打濫捕：尤其係自從上星期起安插大量臥底便衣警之後，基本上就算你完全無作出任何破壞行為，差佬都會先挑釁抗爭者製造事端，然後再響防暴支援下一湧而上為所欲為，結果當然造成好多義士被捕。

響整理好嘅優缺點後，你會發現「和你Shop」三大戰略目標，響效益風險比例上面係有明顯差異：

A. 令商舖落閘：只要防暴全線出動全日即刻唔駛做生意，高效益低風險

B. 顯露警暴醜態：撚下狗基本上已發癲，跟住大把鏡頭影低；但發起惡黎可能會亂噴胡椒亂打人，同埋如果一還手就襲警，中效益中風險

C. 商場內進行裝修：以而家便衣警多撚到幾乎多過抗爭者嘅情況下，至少響呢一刻，響商場裝修、走去圍堵水貨客踢下喼、甚至只係入去做下啲奧客行為，係極之容易比人黎個甕中捉鱉，產生唔倒快閃效果，中效益高風險

純粹理性分析，「和你Shop」抗爭者好應該鎖定令針對商場落閘放狗係首要目標，甚至乎只要達成呢個目標就可宣佈行動成功，然後將精力集中響利用文宣將責任歸咎於政府遲遲拒絕回應群眾訴求。

有關次要目標，其實係同首要目標相輔相承，因為通常都係便衣警發狂，防暴先會踩入商場製造恐慌；但從學術討論，「和你Shop」參與者必須明白無必要冒鉅大風險響商場同暴警硬碰，保持適當「挑釁距離」、以不被捕為先決條件，應該係所有抗爭者嘅共識。

至於快閃裝修，由於我唔係呢方面嘅專家，就無謂做暖氣軍師指指點點。我只係想指出一個道理係：商場入面充滿各式各樣嘅閉路電視，要裝修就一定要Blackbloc；但而家好多網民都建議，往後和理Shop大家都唔戴口罩著普通衫，務求盡量減少被捕風險，甚至乎反而令到蒙面臥底便衣更加七──然而掉番轉，剩番落黎仍然堅持Blackbloc嘅抗爭者，就被置於更危險境地。

同街頭抗爭唔同，「和你Shop」始終係一種相對強度低嘅抗爭，所以我係唔會怒屌果啲叫人除Gear除口罩嘅建議；問題係究竟「和你Shop」個共識係咩，就算無大台都要大致上傾倒個方向出黎，否則呢頭你街坊裝撚完狗，果頭Blackbloc就當災被拉被打；又或者Blackbloc走去裝修完先發覺完全無人掩護一網成擒，都係溝通不足嘅悲劇結局，希望大家集思廣益，盡量避免。

不過同時間我亦唔認同「和你Shop=送頭」、「跟日程表=比警方設局陷害你」：首先除非你係搞孤狼式快閃裝修，否則聚人幾乎係所有抗爭嘅必要條件，而要聚人就係要文宣；再者，「和你Shop」響一個地方隨時搞半日，警方就算點樣遲鈍，一兩個鐘咩都部署好啦，同你事先張揚根本無分別。

所以除非你主張全面散水、又或者諗倒一個新嘅抗爭策略完全取代倒「和你Shop」，否則保留番呢條抗爭線，解決裝修勇武同撚狗和理非嘅溝通問題、盡量宣揚「商場落閘=成功」、「不被捕為首要目標」，再集思廣益點樣優先「和你Shop」細節，似乎就係最好嘅方法。

今日見倒上水原本有網民自發和你Shop，最尾卻係無哂影，似乎早前「警方設局」陰謀論同埋唔少市民被捕的確起倒阻嚇作用……唉，我都唔想咁悲觀，但be water，就係不停要郁，大家都因為驚停咗響度，就係一潭人地唔搞都會發臭嘅死水。所以1月1日民陣元旦大遊行，臨完果陣點都走出去望望有乜搞。