【龔成問答信箱】（Q22561-Q22680）

Q22561：

想請教如何分析物業是否有質素？是否從地點上分析？我手頭上兩個物業，一個在西營盤港鐵站附近，另一個在馬鞍山港鐵站附近，附近也有幾個大型商場和公園。

西營盤的樓齡比較高，而馬鞍山是新樓接近十年樓齡。

是否港島區的樓一定會比新界、九龍的樓優質呢？

謝謝！

龔成老師︰

最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論。

一般而言，港島區樓係會相關較有價值，因為長線土地供應有限，而且又有中環這個主要商區存在，會較睇高一線。

但當然，我地都要再仔細分析，持有物業有無其他優勢或問題。

西營盤始終算係接近中環一帶，地理上會有一定優勢，加上你近港鐵站，係加分位。而且將來明日大嶼計劃中，如果將有道路連接西環地區，都係一個潛力所在。

但由於你物業有一定樓齡、維修保養會係有一個考量。另外，較高樓齡的物業，按揭年期都會較短，有機會令新投資者郤步。

至於馬鞍山，同樣近港鐵站係加分位，加上港鐵站附近生活配套都較完善，都會令投資價值提升。

近年屯馬線通車﹐進一步令交通完善，有利於居民進出東九和中環這2個商區，故都有一定投資價值。

------------------------------------------------

Q22562：

點睇1022飛魚科技

我高價買，而家蝕左好多

龔成老師：

如果從過往的業務情況，飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。只可以話，不宜持貨太多。

------------------------------------------------

Q22563：

騰訊比高位跌唔少，已經無質素？

龔成老師：

騰訊（0700）仍有質素。但受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

------------------------------------------------

Q22564：

老師，想問如想長缐收息，中銀香港同工行比較，怎樣選擇？工行現價好似持續偏低，是否比中銀香港更抵買，或買了工行會否賺息蝕價？

龔成老師：

兩隻都是不差的優質股，而中銀香港（2388）在長遠發展及增長力上，會略好。

中銀香港（2388）係本地銀行股裡面，是較有質素的一隻，有長線投資價值。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

至於工行（1398），其實本身質素都不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

同時，佢前景算是不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。

------------------------------------------------

Q22565：

老師，我買了6666恆大物業，這股票急速下降，我7.x買現在跌到@@

是否應該加倉，我知道這股有一定質素，想問老師現在應怎麽操作、持有股份不多，大概6000股，感激！

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

恒大物業（6666）算是恆大系裡，較高質素的一隻。不過，現時整個系都有風險，要小心，小心。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

由於始終有風險，只建議你小注持有，原有貨就守，但不要加注，你預佢上落都大。

------------------------------------------------

Q22566：

老師，我最近考慮買居居自位，但20年後 居屋樓齡已達50年。

下手買家無法做9成按揭 只能做8成

市場範圍狹窄也不用怕嗎？

龔成老師：

居屋有自住價值，但始終投資價值，會比私樓差少少。但我相信，不會大幅貶值，日後賣出仍可。

但你首先應以自住角度去想，如果有自住需要，買居屋後每月可省去一些現金流，就算日後的售價不及私樓，只要能在這段時間，利用節省現金流的數目去進行投資，只要投資滾大到一定的財富，其實已經做到財富增長的效果，因此無問題。

------------------------------------------------

Q22567：

龔sir你好。我之前買左楓葉教育（1317）和睿見教育（6068）諗住作長期投資，前者買入價為1.87，後者為4.3。請問兩者既買入價，算不算是合理價

我見現在中央對教育行業既規管加強左好多，特別係K12教育呢方面，有人說直頭毀滅左呢個板塊。

學生想問下，現時既楓葉教育和睿見教育既本質是不是已經完全改變了？還有沒有投資價值呢😅學生我現在應該繼續持有好還是止蝕好

謝謝老師

龔成老師：

由於教育政策大方向是收緊，因此，建議減部分。但這兩股，又未去到劣質，因此，你餘下部分守都可以。

楓葉教育（1317）不是無質素的，但教育類股票增長力比過往減慢，加上政策因素，成為不確定性，始終市場都會擔心之後不少有甚麼政策。

佢的賺錢能力，確的有影響。

睇翻近幾年，教育行業的政策，中國政府都偏向收緊，無論在學費收費上及發展上。

由於市場擔心企業之後的增長力，令這股的股價較弱。

睿見（6068）都有類似情況。

始終政策風險難估，因此唔建議持有太多。

------------------------------------------------

Q22568：

老師你說的2845，現時價位合理嗎？現價每月逐步買入儲貨是嗎？

謝謝你！期待你來澳門教班

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22569：

請教老師有沒有其他具較增長力股票可推介？

龔成老師：

可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），如果有投資美股可考慮QQQ。

但就要明白波動性比一般的平穩增長股高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22570：

龔sir，你真係好勁，$14x叫人可以開始留意比亞迪，講完無耐真係開始升返！

當時因為我手上吉利佔我股票比例都算重，所以無買到同樣係車股的比亞迪，其實係咪應該轉股？

龔成老師：

其實這是大量分析的結果，無人能預測到股價走勢，但我地會分析企業質素，叫投資者多留意某一類股票。

同時，會盡力計算企業的價值，去分析投資值博率。

雖然比亞迪（1211）的長遠增長力會好過吉利（0175），但現價你將吉利轉去比亞迪，投資值博率又唔算好高，因此，你保持原有的狀態。

其實吉利本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

------------------------------------------------

Q22571：

老師，想問下你對銀娛的睇法，之前澳門有確診，股價下跌，係咪入市時機？謝謝你

龔成老師：

銀河娛樂（0027）可以分注。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22572：

龔 sir. 不明白你的問題。但我可簡述自己資料。我在台灣工作，零售管理，約100店，80-90k salary. 冇樓，

期待樓價回在港物色麗醫城供家人住慳租，只是以前經歷負資產，嚇怕了。剛申請IB account, 想找穩健ETF or ReIT 儲錢。

只係個人睇法覺得個市好狂，直覺有挺大調整，所以資金在過去一年都沒有動用。

龔成老師︰

我地唔好去用"感覺"或者"估"個市架走勢，我地要客觀分析，用企業價值，去判斷個大市平貴水平。

現時大市只在合理區，未算貴，不少優質股依然有投資價值。

若你不想選股，相直接投資一些ETF或者REIT，以下都是一些合適選擇，你可以參考下。

潛力股︰安碩恒生科技(3067)、ＧＸ中國電車基金（2845）、三星FANG ETF（2814）、QQQ

平穏增值股︰盈富（2800）、VOO、領展(0823)

收息股︰置富（0778）、陽光（0435）、收息基金(3110)

以你48歲年紀，最好以平穏增長股，作為組合主力。潛力股風險較高，不宜佔高於組合2成。而收息股增長力不算高，適量就可以。

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

------------------------------------------------

Q22573：

我29歲. 潛力股 將阿里巴巴 資金轉小米同其他板塊可唔可以？

9988 馬雲減持股 對公司業務有冇影響. 我怕返唔到我201

龔成老師︰

阿里(9988)近期受大市氣氛和中央政策等因素影響，有較明顯下滑。但本身企業有質素，相信會慢慢適應新政策，令業務重回正軌。

但你預佢中短期會較波動，馬雲減持，跟企業質素無關，長線投資價值依然存在。長線要回到$201，相信係可以。

雖然阿里隻股票無問題，但問題是佢佔你組合太大心重，接近一半。因此，你必需沽出部份，轉至其他股票去平衡風險。

小米(1810)係一個選擇，但現價偏貴，要回多1,2成才合理。而且佢同是科技股，單一行業唔好佔組合3成以上，否則都會有問題。

不少平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22574：

700,9988 股價都好差

想問收息股有什麼比較好

龔成老師︰

不要太著重短期股價，要睇長遠企業價值。

阿里(9988)和騰訊（0700）近期受大市氣氛和中央政策等因素影響，令股價大幅回調。但佢地本身係有質素，相信會慢慢適應新政策，令業務重回正軌。

但你預佢地中短期會較波動，長線投資價值依然存在。

至於收息股，你可以參考以下幾隻。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

若你係較年青，收息股就未必適合持有太多。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22575：

謝謝老師意見，但3067喺HSBC冇得供。如改為:金沙, 港鐵，港交所，中生製藥各$2000, 剩低的$2000儲現金，這樣好嗎？

其實我都唔知2800供到幾多為之夠，但以現在情況睇，就佔我的持股比例中最多。

還是把剩下來的$2000分別加大港交所及港鐵各$1000，這樣安排會否好啲？

龔成老師︰

3067每一手唔貴，你直接每個月自己買一手，咁就可以。

盈富(2800)是包括58間質素不錯上市公司股票的組合，由於佢唔係單一企業，就算佔組合幾大比重，其實都無問題。

但由於你比較年青，只有24歲，全部用晒盈富(2800)，個組合變相有少少保守。

因此，我建議你長遠計，盈富(2800)最多佔5成。餘下資金，你可以分散去供上述5隻股票。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q22576：

投資年金同埋股票 ETF 基金有咩分別？

目標係買千萬既樓 可以點做？

龔成老師︰

"年金"，純粹為你提供現金流收入，唔會有增值能力，主要係適合退休人士。

如果你係為增值買樓，就應選擇有增長力的ETF。

ETF都分好多種，有對應不同指數(如盈富2800 - 恆指 / VOO - 標普500指數)、不同行業(3067 - 科技股)、特定目的(3110 - 收息股份)等等。

而你選擇的，就是一些有質素的增長型ETF，例如盈富2800、安碩恒生科技(3067)、VOO、QQQ等等，都可以考慮。

但你要先了解這些股票，才好入市。當中QQQ和3067風險會較高，你要自己衡量。

------------------------------------------------

Q22577：

感謝大師百忙之中抽空回覆我這位投資小白，之前因有朋友分享了大師您對小米的睇法（24進取小倉、20-22加碼）

當時覺得30蚊的小米根本無可能跌咁低，自己高追後跌到27蚊就割了，然後其仍跌跌不休，仲見到20蚊。但現在看回去又對大師對小米的完整投資計劃很精準，心感敬佩

另因小弟係澳門人，無法參與大師您的課程。實言未來也只能白漂大師您的投資策略。但大師您一直慷慨解囊，深知大師為大好人，在此祝願大師在港股賺到家財萬貫！幸福美滿！

龔成老師︰

多謝你的支持，其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

另外，你可以睇我架《80後百萬富翁》、《財務自由行》和《股票勝經》，都適合初學者。

緊記，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

------------------------------------------------

Q22578：

老師你好，我現在上緊你的進階班！內容非常豐富！報左你初班及進階班係我今年做得其中一個最好的決定。我今次都係想問番隻788，中國鐵塔。

問題一：
係損益表入面，折舊及攤銷佔左營運開支入面好大部份，係分析時將它除去是否正確？

2020年報除去後的數字變化：
年度利潤（百萬人民幣）：6427》53942
ROE：3.45%》28.96%
純利率：7.92%》66.51%

調查後的ROE及純利率好似有少少誇張地好！係唔係正常？

問題二：
佢營業額5年複合增長大約7.69%，若減去折舊就變成大約14.29%。純利就27.03%（不計2016年，基數太細）。收入及純利近年都有少少減慢情況。

我應該用7.69%，14.29%定還是27.03%去總結鐵塔既複合增長率呢？

問題三：
另一方面，兩翼業務增長好強勁，特別係能源經營業務，最近出新聞指係換電網點係市場佔有率超過50%，鐵塔公司亦宣報同華為數字能源、比亞迪弗迪電池、百度智能雲、郵儲銀行等多家簽署協議。

能源經營業務對收入潛力會唔會加多d分？同埋呢方面的發展應該唔會比三大電訊商好似租塔咁樣壓制？

問題四：
我的持倉
1448（18.4%）
1177（17.5%）
788（17.1%）
3918（11.4%）
968（10.3%）
9988（9.4%）
1810（8.4%）
2318（5.6%）
1211（1.9%）

我今年就27，我真係好想做個倉平均回報有15%甚至係以上，我明白我潛力股佔左好大部份，我願意承受高風險！我會利用多d時間跟進持有股票的情況去平衡番集中風險。

我考慮緊將唔將鐵塔換馬去其他股票，暫時想等到有合理/平位再加去1810/1211，令組合回報更加有潛力！

鐵塔表面睇佢年增長做唔到15%，但佢新業務潛力好似很不錯，我唔知自己係唔係過份睇好788，佢未調整roe及純利率，負債比率等等雖然呢刻普通，

但我見佢5年中都係每年有慢慢改善中。我好掙扎究竟應唔應該留佢係我組合，謝謝老師見

龔成老師︰

1) 其實你唔洗特別去扣除這個數字，因為我地做估值時，都會同時審視經營現金流。這部份係會將折舊及攤銷加回去，以反映企業實際有多少資金係入帳。

因此，只要折舊及攤銷數字係合理，唔係有好大變動，咁就可以。

2) 如果你係用市場比較法，即係市盈率去做估值，你應該直接用營業額和純利個增長去做參考。去解佢有無增長之餘，佢賺錢能力，有無唔同到。

若以中國鐵塔(0788)計，你發現佢整體純利增長，係優於營業額增長，就可以大致估計到佢賺錢能力高左。但當然都要睇埋細節，當中有無其他問題。

但若果你係用現金流折現法，你就要在盈利之上，加回折舊及攤銷，並扣除資本開支去計算。(如果你覺得太複雜，同樣直接用盈利作參考，都可以。)

3) 會係利好，但會有多利好，暫時係未知之數。係能源部份，由於這些客戶並非完全壟斷市場，也非其大股東，故相對被壓價壓力較細。

但你要明白，現時能源相關收入，佔集團比重好少。就算利好，中短期對盈利相信唔會有太大影響，故不會特別去加分。但這部份暫時發展算正面，可以留意。

4) 中國鐵塔（0788）不是無質素的，但增長力係弱左，算係水桶1至2之間。如果你願意承受較高風險，將部份換至小米(1810)和比亞迪(1211)係可以。

但小米(1810)要回多1,2成才開始合理，而比亞迪(1211)係貴，就算月供都要回到近$200才可以考慮，而直接入的話，最好等回到$140以下。

另外，你要明白現時組合，係好進取。雖然潛力股增長潛力較大，但唔代表你最終回報，一定會係最高。

因為佢地發展係符合預期，回報上當然無問題。但如果佢地發展未如理想，就會有較大調整。所以，你要明白高風險，唔一定係有高回報。

係配置組合時，你明白這個風險，才作選股考量。

------------------------------------------------

Q22579：

碳中和有咩股票推介

龔成老師︰

你可以考慮一些跟綠色能源相關企業，例如信義光學(0968)、福萊特玻璃(6865)等。

但佢地現價唔平，前者要回多1,2成，才開始合理。後者更要有好明顯回調，才好考慮開始小注。

如果你無特別睇好邊隻企業，純粹係睇好行業發展，你可以考慮GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動，現價在合理區頂至略貴，如投資宜要慢慢分注，可長線。

------------------------------------------------

Q22580：

你好老師，一直持有的中生製藥價位一直下跌，請問你點睇呢隻股票的前景？

另外，現在現金持有約50萬，計劃在3年內增至90萬- 100萬，每月的人工大約2.5 K，在投資上應該怎樣計劃呢？感謝老師。

龔成老師︰

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

近期由於大市氣氛較弱，加上中央政策等不明朗因素，都令佢股價受壓。但暫時唔見佢長線質素，有明顯轉差，這股可以照長線持有的。

以你目標，可以選擇一些「平穩增值股」+「潛力股」作投資目標。

一般我地預期投資有增長力優質股，年增長約10-15%。要做到你的目標，除了50萬本金外，建議你每月投入$10000預算，去做月供增值。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$5000)，另一半就先儲起架策略。

若你投資知識不高，因此可較集中在平穩增長類股，至於潛力股，只宜小小注。

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

同時你要明白，3年唔係一個好長時間(一般建議最少5年以上)，就算再優質股票，都有機會出現價值波動，影響你最終回報，你要知道有這個風險存在。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20581-20600）

Q20581：

老師你好！我今年30歲，以往投資以收息為主。

現持有
4400股0005匯控（平均價$57)
5000股1398工行（買入價$6)

另有十萬元現金可作投資股票基金之用，
請問我需要如何重整投資組合？

感謝老師。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你這年齡不宜持有太多收息股，上述兩股都是收息股，同時你集中在銀行業，這都不是好的投資策略。

你應該慢慢減持上述股票，轉到「平穩增長股」及「潛力股」。

最簡單就是投資ETF，「平穩增長股」：可選盈富（2800），「潛力股」可選安碩恒生科技（3067）。暫時可以平穩增長股為主，到你有較多投資知識，可以慢慢增加潛力股比例。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20582：

龔sir你好！一年半前朋友介紹我睇你個page所以開始左月供，一路供下供下無咩點理，到最近股市升返咁多再睇，發現好多已經升左唔少，特別係銀娛計返已經升左近五成，要多謝呀sir你先。

但最近好多供緊既股都好似開始有D貴，係呢D情況下其實仲應唔應該繼續月供？

繼續供個成本又會慢慢變貴，但手頭上我又覺得未夠貨

而且我對手頭上揸緊既股票（1177，0027，0066，1928）前景都幾有信心

覺得會繼續慢慢升，呢種情況下我係應該小注供，停供定等股價落返D先再供返呢？

呀sir你覺得呢幾隻股票仲係咪係合理價區域呢？Thank you!

龔成老師︰

唔好客氣，幫到你就好。但記住，最理想架財富增值方法，係長線持有優質股。唔好因為一時架升勢，就去沽貨獲利。

我地當大市或者個別股票變得好貴時，係可以加大現金佔比例，即係減少，甚至停止月供。

但如果你對點定平貴，唔係好有經驗，我就唔建議你咁做，因為你調整錯左，會嚴重影響成個月供架效果。反而，一直由佢長線咁供，等佢自行拉平均個價，會更好。

你現時4隻股票都有質素，未見有好貴情況，你保持月供就可以。

但留意翻，銀娛（0027）和金沙（1928）都係博彩股，咁會令你組合太偏重單一行業，唔係咁理想，建議你稍作調整。

------------------------------------------------

Q20583：

你好龔成老師，想請教一下現在市況
本人對微盟 (2013)及舜宇光學 (2382)較有興趣

請問你認為哪一隻入市會較有上升能力及前景更好？
謝謝！

龔成老師：

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

舜宇光學科技（2382）有一定的質素，但現價略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

兩隻都不差，以投資潛力與值博率角度計，舜宇較好。

------------------------------------------------

Q20584：

老師，我3.2入左1258，依加好擔心，你有無咩意見，我睇好銅嘅發展

龔成老師：

中國有色礦業（1258）主要係非洲贊比亞經營銅開採、選礦、濕法冶煉、火法冶煉及銷售業務，主要產品為銅精礦、粗銅及陰極銅，以及粗銅冶煉工序中產生的副產品硫酸。

佢係中國有色礦業集團於銅及鈷資源開發的海外平台。

佢擁有四個營運中的礦山，即Ｃｈａｍｂｉｓｈｉ主礦、Ｃｈａｍｂｉｓｈｉ西礦、Ｂａｌｕｂａ中礦及　Ｍｕｌｉａｓｈｉ北礦。另外，Ｍｕｌｉａｓｈｉ濕法廠及剛果（金）項目亦已投產。

業務不是無質素的，見佢生意保持向上，不過，盈利就有點波動，有時盈利會大跌超過一半，相信好受成本及國際資源價值影響，反映佢有少少被動，企業質素未算最高。

過往股價上落大，要留意風險。企業質素算是中等，現價合理區中上部，都有長線投資價值，但就唔值得持有太多。

你如果持貨較多，宜減，這股風險較高。如果小注，就守住先。

------------------------------------------------

Q20585：

龔成老師 你好 收工返到去 ，同屋企人先知買左2手 心通(2160) 唔知呢個會唔會係老千股...

小弟都係剛玩股票唔耐 驚屋企人中招... 想知老師既睇法

龔成老師：

微創心通醫療科技（2160）有潛力的。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業有一定獨特性，同時長遠發展不差，不過估值方面就十分難，因為這刻仍未有似樣的盈利。只可以話現價唔算平，因此，這股可長線，等佢更大收成，但要留意控制注碼。

如果2手佔佢地組合比例不過多，無問題，可持有。

------------------------------------------------

Q20586：

老師你好 ，我今年21歲 ，嚟緊讀書 ，儲有20萬現金

入左1177及2013，想入手 9923 2800 788及2382 ，請問我需唔需要進取啲？

同想問下如果新手睇你嘅書，你推薦嘅次序係？謝謝

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你這年齡可以進取少少，不過，潛力股始終要求你有一定的投資，因此，如果投資實力未算好高，潛力股比例不宜多過一半。

你上述所選的，都是有質素的股票，可持有，準備買入的相是有質素的，不過，移卡（9923）不宜投資太多，業務有風險。

舜宇光學科技（2382）有一定的質素，但現價略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q20587：

老師你好
我係月光族
來緊呢年想儲錢

我想每個月買一手1833
但如果好約束自己其實可以一個月存3萬
因為之前就係玩股票輸左

之後銀行還款一個月3萬
上年就涯過左
我想今年開始儲到錢

而d錢又會升值
你可唔可以比d建議我thx

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你每月投資股票是好的，平安好醫生（1833）是有質素的股票，你久不久買一手可以，但就不能過度集中。

你方向正確，但宜建立一個更平衡的投資組合。

你可以投資盈富（2800）、安碩恒生ETF（3067），保持每月進行，再久不久入一手平安好醫生。

------------------------------------------------

Q20588：

老師能簡單講解一下什麼是fof基金嗎？

龔成老師：

FoF（Fund of Funds）係一種專門投資於其他投資基金的基金。

FoF並不直接投資股票或債券，佢的投資範圍僅限於其他基金，通過持有其他證券投資基金而間接持有股票、債券等證券資產，佢係結合基金產品創新和銷售渠道創新的基金新品種。

首先，FoF將多隻基金捆綁在一起，投資FoF等於同時投資多隻基金，但比分別投資的成本大大降低了。

另外，與基金超市和基金捆綁銷售等純銷售計劃不同的是，FoF完全採用基金的法律形式，按照基金的運作模式進行操作，FoF中包含對基金市場的長期投資策略，與其他基金一樣，是一種可長期投資的金融工具。

------------------------------------------------

Q20589：

老師，我有
1772 1800 股
2333 4000 股
3690 200 股

跌市該守還是走？
1772 125 買
2333 28 買
3690 427 買
謝謝你

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

我地最重要睇質素，不是買入價。

如果你只有上述3股，其實有集中風險。

贛鋒鋰業（1772）有潛力，但略貴，同時業務有風險。不宜持有太多。

長城汽車（2333）有質素，可長線。

美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值，不過，不能大注。你持有可以，但不宜比例太多。

------------------------------------------------

Q20590：

龔成老師，Follow咗你一段日子，十分欣賞你很樂觀積極的態度，又很願意幫助一些正在為財務自由掙扎的朋友。

我是在上年生了第二個小朋友之後，才意識到需要運用金錢去投資，才可以令到金錢不貶值，所以35歲人，只是上年才開始投資，然後認識到你。

我都有少少問題想問吓老師你的。如能得到老師的解答，實在非常感激！

本人現在35歲左右，已結婚，有兩個小朋友，最大嘅四歲，本人和先生月入大概13萬左右，住在前幾年買的居屋，月供大概2萬5。居屋雖然有升少少（比起我地買入時），但係不能按出嚟，所以感覺幫助不大

如我和老公的流動資金大概有一百萬，我哋應該買向銀行借九成，然後多買一層大約6百萬的私樓作投資嗎？

但和我和老公計算過，借九成買私樓，每個月如果租金是大概一萬蚊，自己都要比多一萬蚊出嚟，才可以還到借九成的供款。

請問老師，這樣的投資，如果博樓市升值才有價值，否則如果樓市不升值，淡增持，是否一個很差的投資？

因為老公和我，身邊的朋友，很多都是住在私樓，實在有一個很想買私樓的「香港人的糾結」，請問老師我和老公應該如何安排自己的投資？

如能得到老師的解答，實在非常感激，謝謝你

龔成老師：

如果從投資角度，當然私樓較好，西區正面的，有長線投資價值。如果從自住角度，居屋會較好，因為能減少每月現金流支出，但都可達至解決自住需要的作用。

所以，你最重要睇翻自己的實際情況，唔比「人有私樓你有私樓」，居屋自住的確不差的。

至於是否買樓投資，你地都要睇翻自己的情況，比起樓市升跌，你地是否在首期及供款方面無問題，都是重要的，如果有一段時間無租收，你地能夠有足夠的防守力。

如果資金投資私樓有點勉強，不如先投資其他工具，令財富增值，再過幾年有更多資金時，才投資私樓，這樣會更加穩健。

如果買私樓這動作對你地不是急，而現時樓市不是特別平，你就不用急於行這一步，但持其他方面儲錢增值，同時如果見到樓市跌到時把握機會，這樣會更好。

------------------------------------------------

Q20591：

你好，我的父母已到退休年齡，佢哋現金有120萬左右，本身冇做投資，我己經係上完你堂之後幫佢哋買收息股, 平均5-6%息

佢哋自住物業已供完

現時生活主要靠我同弟弟的家用，我自己本身亦要供樓(月入35000,當中約12000用於供樓)

但由於佢哋冇買任何保險，我擔心有任何extra 開支會無法應付

想問下你呢個情況下如何的資產配置會比較理想？
謝謝！

龔成老師：

佢地投資收息股，方向正確，最重要是投資一些「低風險，有現金流」的類別。

另外，唔好用盡佢地的現金投資，一定要同時留有部分現金，就算只做定期利息不多，都要有基本的現金。

至於保險，要睇佢地的需要，買保險原理就是將你不想面對的風險，轉嫁比保險公司。如果你地認為有需要，都可以去買，你可以買，你問下保險公司就得，記住，買「足夠」的得。

其實你地現時的分配已經大致完善，方向正確，如果太過追求高回報反而有風險。

------------------------------------------------

Q20592：

Sir,我今年33歲，2018年高位買左$618萬一房單位同太太自住 做8成按揭 ，
今年8月bb出世 要換樓，今年10月到3年 ，但係依家樓價跌左 我賣出去應該會蝕賣 ，定係我租屋 再租返自己間屋出去好d?

定如果我資產換資產？咁我蝕賣 其實唔係真正蝕左？

我同太太月薪5萬 股票大約$150萬 ，現金150萬 ，未來洗費將會大增。

150萬現金 現在買股票是否大風險？
但如果揸現金 又會包輸通脹
如何有效運用這資金呢？

現在又是否買舊經濟股比較好？
多謝老師

龔成老師：

如果你是換樓，根本就唔需要理你持有樓價的升跌，因為我地從資產角度，你換樓，基本上財富配置無太大改變，這是一個一賣一買的動力，你樓價跌，但買入另一物業時又平翻，因此數目一樣。

唔建議賣出租樓等跌再買，最好的做法，就是賣出買入接近同步，這是最好的換樓過程，你面對的風險都最少。

如果你打算換樓，建議你$150萬現金不要動用，等完成整個買樓過程先。之後，可以部分投資股票，舊經濟股現時仍合理，可分注投資，當然，你組合不能沒有新經濟股，要平衡配置，但買入時要較小心。

你慢慢先將現金，轉為股票，同時，都要留有一定的現金。

------------------------------------------------

Q20593：

龔SIR你好，我一直月供了恆基及長建兩年，雖然帳面上沒有增值很多，但每次派發的股息慢慢增加也很有成功感，而且起到很好的儲蓄效果。

另外，手上還持有新創建，買入價7元，以及中國鐵塔，買入價1.3元。

最近有一筆小錢想分注投入兩隻股票中擴大自己股票組合，現時選中楓葉教育，因為覺得它受疫情影響，正處於行業的低潮，等疫情好轉後它有很大的潛力

可趁現時低位吸納，另想投資科技類ETF，但現價覺得太貴，由於錢預算不多，不知要否等回落一些再買入，謝謝！

龔成老師：

你上述持有的，都是有質素的股票，主力是平穩增長類。所以你在之後的財富配置上，可以加翻少少潛力類的股票。

楓葉教育（1317）不是無質素的，但教育類股票增長力比過往略有減慢，加上政策因素，成為不確定性，始終市場都會擔心之後不少有甚麼政策。

佢的賺錢能力，確的有影響。

睇翻近幾年，教育行業的政策，中國政府都有少少偏向收緊，無論在學費收費上及發展上。

由於市場擔心企業之後的增長力，令這股的股價較弱。因為佢過往曾經增長不差，但在政策風險下，最影響的不是現時的業績，而是之後的發展，令增長力減慢。

以一間平穩增長的企業來計，近期都算合理價中下部，但就唔建議投資太多，始終政策風險難估，但都算有質素的。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

我建議你不要完全無3067，你可以現價入小小，之後等跌先正式買入，這策略會較好。

------------------------------------------------

Q20594：

龔Sir 你好。我今年40歲，有兩個三四歲嘅小朋友。我之前買的股票或者基金都係蝕錢。
現在我有嘅股票有

165 光大 6000 股 $17.0
241 阿里健康 8000股 $11.2
317 中船防務 4000股 $20.35
941 中移動 1500股 $51.1

1114 華晨 10000股 $12.0
1387 中國地利 15000股 $0.44
2328 中國財險 1000股 $10.18
2628 中人壽 1000股$31.0

請問我應該如何處理這些股票呢？是否應該放曬蝕左嘅股票呢？

如果想用平均成本法買邊隻1211比亞迪同700騰訊應該幾多錢入好呢？

同埋月供股票應該佔月入幾多%呢？

同埋美股你建議買嗎？如果唔想影響生活作息時間，可以買指數基金嗎？因為美股這十年overall 升嘅日子多於跌。謝謝你！

龔成老師：

光大（0165）只是中等，不宜持有太多，同時增長力不強。

阿里健康（0241）潛力股，可長線。

中船防務（0317）只是中等，不宜持有太多，同時增長力不強。

中移動（0941）收息類，可持有。

華晨（1114）不過不失，但增長力唔強。

中國地利 （1387）質素好普通，無乜長線投資價值。

中國財險（2328）不過不失，但增長力唔強。

中人壽（2628）增長力比過往減左。

你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

騰訊（0700）可月供，或小注分注。比亞迪（1211）現價貴，如真的想投資，月供好了。

美股可投資，你可以考慮VOO，這是最適合的指數基金。

------------------------------------------------

Q20595：

Hello老師，有事想請教下。最近睇返自己嘅資產分佈好似有啲唔平衡，所以想問一問我依家呢個情況合唔合理：

22歲
現金：~$16000
股票：~$167000
個股分別係

0823.HK: 415@$63.51
0066.HK: 1395@$44.37
1211.HK: 11@$146.47
2800.HK: 2243@$27.27
AAPL.US: 1@$139.3
AAL.US: 1@$16.7

現時月供：
0066.HK: $500
0823.HK: $1000
1211.HK: $1000
2800.HK: $500

另打算增加月供
AAPL.US: $500 HKD
AAL.US: $500 HKD
QQQ.US: $500 HKD

問題係我現時每月大概只有$6000-7000收入，如果以現時計劃，每個月將會用60-70%收入做月供，加上持有現金較少，係咪應該暫停或者減少月供呢？如果係又應該停供邊幾隻？

另外想問下你對於航空業有咩睇法？係咪應該趁現時大跌加注呢？預先講聲唔該晒

龔成老師：

現時所持有的，基本上都是有質素的股票，都可長線投資，無問題。除了航空股。

航空股，只算中等，不是最高質。我以國泰（0293）去說明，佢質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

至於AAL，我無特別研究，你可以進一步分析，不一定無質素的。

你現時的年齡，適合投資「平穩增長股」+「潛力股」，你大致都是這方向。

至於月供及新加月供，大致都是無問題的，方向正確。

不過，你現時的現金比例太多，宜留多少少現金，如果大跌市出現時，你現時太少現金會無法把握到機會。所以，你要減翻現時先隻的月供金額，或隔月去供。

其實我唔建議停供，如果停左某些股，擔心你會太集中在另一邊，所以，上述股是大方向，問題是怎樣買入時平衡翻。

------------------------------------------------

Q20596：

老師你好！經過半年時間，我現在手上有股票：

178 莎莎-2106股
1177 中生-2000股
1339 中國人民保險-1000股
823 領展-102股
3067 安碩 - 200股
1448福壽園-1000股
1810 小米 -400股

我仍等緊最好時機放出1339。

但我想買1隻穩定股票，如果港鐵、金沙、煤氣、長實、中銀，按我現有股票，老師，有咩提議比我買邊隻好？因我手頭已有是潛力股，所以，想買1隻穩定來平衡番我揸的股票。

謝謝老師解答

龔成老師：

你現時的持股，基本上都不差的，可以持有，中國人民保險集團（1339）增長力的確是當中較弱的。你等有少少反彈已可賣出，長期等都不是方法。

你可以考慮加入港鐵（0066），有質素，有獨特性，相信是適合你的。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20597：

老師，我而家手中有tesla阿里baba 吉利 比亞迪電子，最近回調，請問我手上的股票質素有沒有問題？ 是否睇長線就可以，唔好理短期股價？

有人提議買short call 但我記得老師話唔支持derivatives 所以我無買，請求老師的意見。

有時見到賬面無左幾成，都會思考 自己當天無投資股票 反而無睇到賬面輸錢 但如果係咁 拎住d 現金都係輸通棖。

還想問下老師會唔會考慮投資bitcoin

龔成老師：

你唔需要太理會中短期股價，最重要是睇翻長期的企業業務與價值。

現時你的持股，無問題，可長線，不過，較多在新經濟或近期熱炒類，要注意集中風險。日後應加翻其他類別，等你組合可以平衡翻。

衍生工具，始終好難玩的，唔建議，永遠都是睇就易，做就好難，心理壓力大。

另外，你要提高你的心理質素，你持有的股票無問題，但買入價與心理質素有問題，因為你停留在短期股價上落，你應該睇翻「企業」，你唔好同一般散戶一樣，建議你增加知識，《股票勝經》適合你的。

虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q20598：

請教龔sir，持股極度分散的etf應該如何估值？例如美股代號VT (Vanguard Total World Stock ETF)，佢分散投資全球股市，共持有8936隻股票。

我記得你有提過可以參考etf主要持股嘅估值，但VT嘅十大持股只佔整體的14%左右，會否不夠代表性？

簡單一點用VT嘅股息率作參考是否可行方法？

本來想好像恒指般參考市盈率，但找不到VT相關數據，謝謝！

龔成老師：

利用10大持股是當見的方法，如果佢太過散，就睇翻佢當中的持股，與全球那些指數的成份股，重覆較多。

例如佢當中的美股，是否不少都與標普500有關，歐洲股，是否與3大歐洲指數數份股有關。下一步就是分析翻這些指數的平貴。

這可以話係較接近的方法。

------------------------------------------------

Q20599：

老師多謝你，我是台灣的粉絲。

2年前有追蹤你的FB。持有2800，1928，這兩隻都有成長，另外2020年這兩隻大跌，我也有低價位入手，但想問問老師 我的組合能如何增進分配！？

有考慮必瘦站跟小米。

小米多少價位可以入手？還有升到幾%才要賣出？還是要繼續長線持有？如長線持有要持到多久才能賣出。我目前已經持有2-3年。

因為感覺沒有賣就是沒有賺。

所以抓不到停損點跟賣出點，希望老師指教。
謝謝老師。祝您事事順心

龔成老師：

如果你現時只有兩隻股票，最好增加翻其他股，以平衡翻整個投資組合的配置。如果你年輕，可以考慮加入一些潛力股。

小米（1810）可以，不過現價唔平，建議你小注好了，等跌先正式買入，例如$24成以下。

必瘦站（1830）都略貴，等跌先買入。

或者你可考慮恆生科指基金（3067），可長線，但現價略貴，要慢慢分注投資。

我地投資，一定要長線，最好5年以上，最少都3年，你不用心急賣出，長線持有就得。你要改變「賣出先有賺」的概念。

除非升到貴的水平，否則，不用心急賣出股票的。

------------------------------------------------

Q20600：

龔sir你好, 本人80後，10年前初次買入股票，見蝕咗之後就唔理，而家愈蝕愈多，但又唔知哩刻應該點做好，好無助。

近來睇你fb留言，發覺你教嘅都好正路，唔鼓吹短炒，仲無私咁幫人。。

希望你都可以指點一下我，感激！

本人有買醫療保險，持有現金70萬，同家人同住。

1138 中遠海能 28000股 平均價$7.1 （10年前$9.9買，一跌就溝）
941 中國移動 500股 $99.65
0005 滙豐 400股 $64.3
0008 PCCW 10000股 $4.45
1432 中國聖牧 30000股 $0.85
1093 石藥集團 4000股 $8.97

我打算買入領展，港鐵，中銀，中國生物，恒基，另外2800同3067應否等回番啲先入?

（因冇開基金戶口，唔打算月供，會每次用2萬元左右資金入貨） 另外資金比例應該點分配好?

係咪唔需要留太多cash?

1138係咪需要到某個位放一部份?
現時我持有嘅股票都可以繼續持有嗎?
謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增長為主。中國移動（0941）、匯控（0005）、PCCW（0008）這些收息股，增長力欠奉，不宜持有太多。

中國聖牧（1432）跟中遠海能（1138）一樣，質素較一般，就不至於差到要即刻放。你可以分幾次，慢慢換碼至其他優質股。

你現時打算購入架股票，都適合你。盈富（2800）現時係合理區，而安碩恒生科技（3067）係合理區頂至略貴，都係可入貨水平。

但你每次用2萬，其實好難有效去買入以上股票。如果你自問定平貴能力係無問題，你可以安佢地價格水平，去策略性入貨。

若你對定平貴無信心，咁我建議你都係用月供較好。現時大市只在合理區，資金唔好盡用，最好現金和股票大約各一半。留下來部份，等大跌市出現時，可以用來掃貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。