【龔成問答信箱】（Q22181-22200）

Q22181：

你好，想問怎樣判斷泡沫，例如美股市場? PE一直擴張，高於歷史長期水平，但係又有新解讀方法例如利率降低所以估值可以上升，

那麼要去到哪一個水平才屬於高，才需要沾貨呢?謝謝你的意見

龔成老師︰

其實泡沫，係無一個明確的準則，去到計算邊一個位，就算係好危險。

所謂的泡沫，就是「企業價值」與「現時股價」的相差，如果股價遠遠企業價值價值，就是泡沫的概念。

我地可以從大市和企業估值，去到調整我地投資策略(現金和持股比重)，去平衡風險。

就好以現時美股，大市算係合理區頂至略貴，係投資時就不宜太進取，要留有一定現金，去等佢回調，才慢慢加注。

而新解讀方法，的確利率下跌，某程度上係可以調升估值。但同時間，當利率倒轉回升，你估值都會馬上被下調，可能由而一刻合理，變相貴。

所以，我地做估值時，唔好單單睇利率，還要從企業和市場長線發展去著手，才會得出一個較穏當和立體的結論。

------------------------------------------------

Q22182：

龔sir 你好，小弟27歲 收入唔高 每月大約儲到 一千至二千蚊

一個約月前加入市場，希望為未來做個打算，但新手入場 做得少功課 攪到輸多贏少 （亂咁走去玩GME...)，E家就離左場啦

E家大約用三萬蚊拎黎投資，放左係1919(19蚊入，收左息），美股係 Apple 同 Biotech

想問下呢家咁有冇野要調整？

同埋因為儲得少，有冇機會仲做到月供股價？

如果有要點做，同埋有冇推薦？

多謝龔sir 回答

龔成老師︰

我投資股票，就等同投資企業，有一定要認真分析佢質素，例如點賺錢、行內有什麼優勢、長線發展方向、財務是否健康等等。

而且，我地目標一定要係長線，唔好做短炒，這都是經驗之談。

以你27歲年紀，投資上應以增值為主。Apple 同 Biotech 係可以，但Biotech這行業本質風險較高，要控制注碼。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

首先，此股係無派息。你收到是10送3的紅股，但係10送3只是一些財技，你係唔會從中得到益處。

另外，你買入價係貴。此股質素只係一般，現時環球貨運緊張，才令佢收入大升。當回復正常，有機會出現調整。

長線投資價值都有，但唔算好高。若佢佔你組合較多，建議沽出部份，換至其他優質股會較好。

由於你投資經驗不多，加上定平貴能力好弱，你未來都係先集中做月供，去減低風險。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$1000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

最後，你依然係好年青，應好好把握這個優勢，做好財富增值。你現時每月投入資金好少，最好可以增大至收入一半，咁會較理想。

------------------------------------------------

Q22183：

你好呀老師我係初次接觸股票我想問吓你嘅作品裏面我應該睇邊，或者應該係有冇推介邊一本會易明少少

你有時間先覆返我啊唔緊要㗎

龔成老師︰

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇以下幾本，會較為適合初學者：

《80後百萬富翁》
《股票勝經》
《財務自由行》

之後再睇其他。

------------------------------------------------

Q22184：

龔成老師你好 ，本人和女朋友一直有follow你的page和買你的百萬富翁系列著作，但今次想為自己父母發問 。

媽媽58歲， 全職主婦， 爸爸63歲，兩年後退休。兩老沒有投資經驗，現在擁有現金80萬。已供完自住樓，樓價現約450萬。

預計兩年退休後會有退休金有600萬。 請問可以如何分配資產，讓退休生活更有保障？ 需要分段購入收息股， 或者可以考慮年金等計劃嗎？感謝你！！

龔成老師︰

由於你佢地都已或接近退休之年，我地投資重點，會係點安排一系列可產出現金流的資產，為地退休生活作準備。

你可以將這$680萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$680萬資金，平衡地分配在上述的項目上，對你來說是最好平衡風險，同時有穩定的現金流。

上市收息股︳都在合理區。你現時可以先用40萬，慢慢分注買入收息股，餘下40萬就等個市有明顯回調，才慢慢加大入市力度。

------------------------------------------------

Q22185：

你好，請問⋯ 2318 1475 1909 是否還有質素？

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，現價合理，未算平，分注都得。這股可長線的。

火岩控股（1909）有質素的。

佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區中上部，未算平，投資值博率都有，但未算高。因此，：如果要投資，就要控制注碼。

------------------------------------------------

Q22186：

Sir 1177最近回了好多，我之前$8入了3手，我記得你話我太高入，現在跌到 $7可以再入小小嗎？還是等再回下先？

Sir 另外想請教你點睇 1798 大唐新能源?

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

如果你加注，要慢慢加，不要急。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。現價合理區中上部，未算貴。

------------------------------------------------

Q22187：

我想買隻709，我係1.7買左一手所以先留意，我相信佢疫情後復甦番所以一直都冇動作，係奇怪在佢同鱷魚恤呢幾日都好似俾人有心炒起但係又冇咩利好消息咁所以先好奇

老師我想問多兩樣野，我相信我買既都係優質股，但係如果我高追左的話我應該點做？

同埋如果touch wood 真係要放手上既股票套現，我地應該用咩準則去計算邊一隻可以放先？我諗唔明我應該放高增長力先定保守既先

龔成老師︰

若果你買的股票，係有質素，但係買入價較貴。由於企業係有質素，長線係會成長，令股價上升，所以你照長線持有就可以。

記住，買入左一隻股票後，我地唔好再用買入價，作為是否持有指標，而應該用佢質素，去做決定。

至於你現套現的話，可先集中沽出，較無質素的股票。

另外，你可以睇翻邊D股票，無咁配合你目標。好以你現時31歲，應集中在增長股上，一些增長力較弱的收息股，就可以先沽出。

最後，你可以睇埋佢地佔組合比重和現時平貴，將持股較多，或股價已經相對較貴的股票，優先沽出。

但緊記，有質素和適合你的股票，不要盡沽(就算略貴)。必需留有部份，去保持增值才算理想。

------------------------------------------------

Q22188：

你好，老師。希瑪眼科（3309）可以投資嗎？現在是合理價嗎？

仲有1隻歡喜傳媒（1003），可以投資嗎？

1660（兆邦基地產）可以投資嗎？

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

歡喜傳媒(1003)多年虧損，無投資價值。

兆邦基地產(1660)規模唔算好大，質素算係一般，不宜投資太多。加上現價偏貴，值博率不高。

------------------------------------------------

Q22189：

老師，我是你剛剛完成初階課程的學生，最近分析1717澳優。澳優算優質股 但行業比較時 發現6186中國飛鶴優質度更高

行業平均pe為19-24，兩隻均處於合理價低

1.如果現時兩隻值搏率那隻會比較高？

2.老師會比這類行業的pe太約是多小？

3.現是政策上對於這類奶粉股長期發展是有利，但在研究要主要那些不利因素？

龔成老師︰

1) 澳優（1717）和中國飛鶴（6186）都有質素，現價大約係合理區中間，值博率相約。

但由佢地過去股價都係較波動，投資時要控制注碼，去平衡風險。

2) 一般都係10-15倍，會係較合理。但較具潛力和規模，好以蒙牛(2319)，就會比高少少，大約可以去到15-20倍。

3) 你主要可以從成本和供求去分析，例如原料價格和成本、中國出生率、行業形象(出現毒奶事件風險)、國際奶價、競爭對手(國內外)等。

------------------------------------------------

Q22190：

你好,我已經睇了你本<80後的千萬富翁>, 比外國作家(有名的)寫的致富書都好.我買過好多致富書睇, 當中包括:

1) 有錢人想的和你不一樣 (我的最愛, 入面教的思維方法很好)

2) 致富的科學 (啟發<秘密>誕生的一本書, 看這更能感受到吸引力法則在錢或財富方面更深的思想)

3) 35歲開始，不再為錢工作：歐洲富爸爸教你賺錢之道 (這是<我11歲就很有錢>作家的大人版, 教人開始儲錢幾好)

4) 思考致富 (我覺得不錯, 但應用內容部份己見過時, 例如分享如何寫CV, 收音機發展那些...)

5) 窮爸爸富爸爸 (這本是借的, 看過一次)

以上的書, 我只留了1和2, 其他都斷捨離了, 因為覺得內容都重覆.

至於你的投資教科書, 我看了<年報勝經>, 覺得不錯, 很易明, 但內容不夠深入. 知道最好是上你的股票班, 但我真的抽不到時間, 因為我不定時工作, 有時要OT至夜深.

希望你可以寫更深入的書, 教更深的知識. 黎緊我會買埋你其他書.另外, 因為我開始做小生意了(兼職), 你會寫做生意, 同埋推薦一些實用性高的書嗎?謝謝你.

這次主要是想告訴你, <80後的千萬富翁>寫得很不錯, 真的, 比我看很多名作家的致富書好, 一來可能是你吸收了各人的大承, 二是你的文筆親切貼地, 令讀者喜歡.

期待你繼續創作寫書.

龔成老師︰

多謝支持，由於估值方法，真係要好長時間講解，你如果上過我堂就會明。所以，較難係書中詳述。

但你若對企業估值，想作進一步的認識，你可以睇《股票勝經》、《選股勝經》和《年報勝經》，會較詳細教你估值的基本概念。

至於實用性較高的投資書，你可以睇《證券分析》和《巴菲特給股東的信》

雖然不如上堂咁完整，但對初學者已經會有一定幫助。

至於創業有關的書，都可以考慮。但因為現時真係好忙，所以重心暫時只能放係股票上。未來有時間時，都可以考慮下。

------------------------------------------------

Q22191：

老師你好，我最近發現屋企人原來買咗幾隻水泥股，都唔少貨，現在蝕咗好多，想請教下應該點算，thanks

- 2233(買入價：1.32）
- 1313 （買入價：9.xx)
- 743(買入價：7.xx)

龔成老師︰

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。可以視為收息股。這類股唔建議太大注投資。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，現價合理，但就要留意股價上落會較大，自己要注碼上控制。

亞洲水泥（0743）質素只是一般。

佢母公司亞洲水泥集團於台灣成立，並於台灣證券交易所上市。而佢的水泥及預拌混凝土產品主要於上海市和江西、湖北、四川、浙江、安徽及福建省，以「洋房」品牌出售。

這企業的主要生產設施位於江西省、四川省及湖北省。於上海、四川省、湖北省、江蘇省及江西省亦有混凝土配料廠，可生產混凝土供應鄰近的用戶。

佢擁有及經營鄰近主要生產設施的石灰石礦場，供應集團生產熟料所需的全部石灰石。過往都有發展的，但盈利波動大，佢的賺錢能力較被動，整體質素只是一般。

這幾隻水泥股，係有投資價值，只係你買入價有少少高，又唔算好高。

但較大問題係佢地質素上，不宜持有過多。再加上組合太集中係水泥行業，令過度集中性風險增加(個別行業不宜佔組合30%以上)。

因此，你要進行減持，將部份持股，換碼至其他行業優質股，去令個組合回復平衡。

------------------------------------------------

Q22192：

龔成老師，您好。一直都好想報你的班，但係因工作時常出場，現在因為疫情更加被隔離在外不能回港。請問，有無機會有網上課程？

覺得港股越來越難玩，現在手上有 2039, 2866, 6666, 1810, 除了1810睇過老師介紹，

其他的股票越揸越無信心，唔知係咪優質股，睇PE又唔覺得貴，在想應該呢刻止賺或長揸。

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

近期環球經濟因素、疫情、中央近期政策等，都令最近市場比較波動。但我地唔好因為咁，就比市場氣氛影響左自己判斷。

我地持有一隻股票與否，都係要集中睇翻佢本身有無質素，唔好被個股價波動，影響左你左決定。

但留意，市盈率只係其中一個估值方法，未必適合所有企業。而且各個行業，市盈率的合理值，都會有所不同，唔可以用市盈率低，就判斷係唔貴。

我地仲要考慮埋企業本身質素，有時市盈率太低，反而未必係好事，可能係反映緊市場覺得這股票，係無投資價值。

中集集團(2039)和中遠海發（2866）投資價值都有，但唔算好高。若持貨較多，可以沽少少，去平衡風險。

恒大物業（6666）有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務，長線發展正面，可長線持有。。

小米(1810)都係一隻有質素的潛力股，你可以持有。

------------------------------------------------

Q22193：

老師，你好。想請教一下，24歲開始月供2800 快一年，每月$1000，今年增加供款2800 $3000,另加多一隻1177月供$1000 。

如果一直這樣供到50歲(供26年)，會有幾多錢呢？

龔成老師︰

我假設投資回報有10%（連股息再投資），你每月投資$4000，26年後大約會增值至520萬。

你24歲還很年青，你要把握好年青這個優勢，去盡力投資，加大複息效應。每月投資資金，最好係可以等同收入一半，咁就會較理想。

另外，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

你現時係年青，可以集中係「平穩增值股」+「潛力股」。到你接近中年時，就慢慢集中翻係"平穏增長股"。到你近退休之年，就應集中在「收息股」，去創造平穏現金流。你可以睇翻自已年紀，去作出配置。

所以，你唔好諗住一個組合供到老。以下是一些相關股票，供你參考。

潛力股︰、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

由於現時大市只在合理區，每月儲蓄唔好盡用，要留翻一半，等大市出現一定程度的下跌，才大力度掃貨，然後長線投資。

------------------------------------------------

Q22194：

本人30歲，每月收入4萬，現持10萬現金

以下持股比例想老師幫我分析一下：

收息股（水桶3, 總投資11萬）：
$70.25買（0005）匯豐1600股

平穩增值（水桶2,總投資12萬）：
$52買（66）港鐵500股，
$92買（823）領展500股，
$27.66（2800）盈富1436股，
$4.94買（3662）奧園健康2000股,

潛力股（水桶1，總投資10. 6萬）：
$6.78買（1448）福壽園1000股,
$1. 12買（788）中國鐵塔26000股，
$2. 1買（6068）睿見教育12000股，
$2.16買（1337）雷蛇9000股，
$0. 54買（860）力世紀48000股，

問題1：想問持股比例適合我嗎？同公司質素有冇問題？有部份股票都坐緊艇，有冇邊隻股係應該賣掉轉其他？

問題2：想再買入潛力股，老師最近有否推薦新的潛力股？

問題3：力世紀（860），見佢先前從事珠寶業，近年轉型做豪華電動跑車，覺得佢管理層都正面，佢收購左Apollo 條生產線，德國汽車工程服務外包提供商ideenion,

亦同上海金橋簽訂合作協議，並於今年下半年推出原型車型，可見佢唔係得個講字，而佢既股東陣容亦有雅居樂9％,李家誠9. 25 %,

與李氏關連的維港投資6.3%, TOM集團1. 9%支持，覺得亦有加分。睇過佢既現金流亦強勁，近期股價落至$0. 4, 想增持多40000股，是否有值博率？

佢已經轉型發展電動車，但有d網頁依然會將佢同六福，周大福等既珠寶業比較，其實點解？

問題4：上年與未婚妻聯名買入500萬私樓單位自住用，希望於8年內買入第2個私樓單位（預算約800萬），但感到十分困難，如果只靠投資股票，回報率要有多少才能使我買到第2個單位呢？

而方法係咪應該係儲夠首期，再將原本自住的單位甩名？再用單人名義購買新一單位，但單人又好難過到壓力測試，除非儲了3成或4成首期，感到十分迷妄，希望老師可以指點一下，感謝

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合。收息股，就不宜持有太多。而且個別企業和行業，不要佔組合15%和30%以上，否則會有過度集中性風險。

因此，你應該減持部份匯控(0005)，至其他有增長力的優質股，長線會較有利。

另外，你唔好用個買入價，作為判斷股票質素指標。我地著眼點，應該係睇企業長線質素。如果係有質素，中短期帳面數字虧損，唔需要太在意。

睿見（6068）政策風險較高，要時小注係可以，但不建議再加注。

雷蛇（1337）有潛力，但本質好波動，同樣不宜持有太多。

力世紀（0860）好難分析佢價值，只能說投資風險唔細。

2) 潛力股暫時都係推介以下幾隻，但現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

3) 力世紀（0860）佢一直處於虧損狀態，雖然已開始發展電動車，但只係好初期，未到賺錢階段。

現時主要盈利，都係來自珠寶產品及鐘錶分部。因此，坊間用佢同六福(0590)比較，都係合理。

最終新能車能否發展成功，都係未知之數，現時新能車方面估值，只係得個"估"字。整體而言，此股好難分析佢價值，加上佢過往有10送1之類動作，我對這類股票較有保留，投資風險唔細。

4) 我比較建議你甩名，因為可以變回首置，從而節省15%印花稅。但壓力測試會較難過，你要預留較多首期資金。

至於股票投資回報，你預10-15%左右，只要你係投資一些有質素的增長股，長線要做到這個回報率，係合理。

建議你用「平穏增長股」 + 「潛力股」作組合，去創造一個增值平台。

策略上，你現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金和現有10萬，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$15000 + 現有資產43萬(股票+現金)，8年後大約會增值至300萬。

你可以用這個結果作為參考，去計劃你每月供款金額和投資計劃。

------------------------------------------------

Q22195：

你好， 本人35歲，已婚，家庭月入3萬5至4萬，與家人同住，需供養4大長老，每月基本開支+2夫婦保險約3萬5，每月可儲蓄金額約5千，現有約15萬股票+15萬現金

完全唔識投資 ，朋友教我買入匯豐嘗試下投資。2019年第一次投資入0005，好快就跌咗4成，有入多一手溝貨平衡成本

幾個月前開始睇你嘅facebook及剛剛開始建倉

現有投資分佈：（平均入手價）
0005：800股 （49.35）
1310：1500股 （9.34）
0636：500股 （23.35）
0823：200股 （76.15）
0066：1000股 （43.8）
ibond : 3手（2024到期）

明白投資應該要分散風險，我想問下我現在剛剛建嘅呢個倉，比例可以嗎？

同類行業不超過30%，單一股票不超過15%， 想問下係咪用金額去計？

因四大長老，只有二人有工作，但即將步入退休之年，家庭開支將會進一步擴大，現在想儲多一點現金以備不時之需。我們能承受的風險不高，短期一年內暫不考慮月供股票

但如果手頭鬆動可能會考慮在大市調整時分注購入平穩增長的股票

請問下領展，港交所及港鐵適合我們投資嗎？ 到我們儲多一點現金後打算月供或分注購入

謝謝回覆及解答

龔成老師︰

我地配置一個組合，除了因應人生階段外，都要考慮到平衡性。同類行業不超過30%，單一股票不超過15%，是一個幫你達至平衡性的參考指標。

我地係會用當時市價，去計算比重。由於股價係會有波動，所以差少少都係可以接受。

以你現時35歲年紀，應以增值為主。匯控(0005)和香港寬頻(1310)有質素，但佢地係收息股，主要收下息，增長力唔會明顯。你可以沽少少，換至較有增長力股票。

而IBOND係收息產品，比較適合退休人士。建議你沽出，贖回資金作其他投資。其餘持股都適合你，可長線持有。

現時大市只在合理區，15萬現金用來等大跌市機會。而沽出部份收息股和IBOND資金，可以換碼至以下股票。

但潛力股增長潛力大，但風險會較高，你要自己平衡。以你年紀，最多可以佔5成。但由於你現時經驗較淺，最多佔3成好了。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

未來當你每月有較多空閒資金時，你都可以利用上述股票，作為月供目標，去進行財富增值。

------------------------------------------------

Q22196：

龔sir你好~本人近年才真正認真學習投資,增加知識, 同時近日在重新審視自己倉位/思考手上股票該如何部署. 其中2個問題有少少想不通,想向你請教

1.現時雖處於牛市階段, 但近日恆指走勢向下,再加上內地制定反壟斷政策/不同監管政策, 不利消息令新經濟股價下跌 ;

是否可視為趁低吸納機會,待企業適應這些政策後繼續增長? 我們可以如何理解現時市況&進行出入市部署?

2.當股市進入跌市階段時,是否有需要將資金進行調配, eg.由之前增長較高既股票轉到房地產/公用股當中? 抑或其實可以照樣保留現有股票,

同時靜待一些企業股價回落到合理/便宜位置時,再進行入市?

謝謝你!

龔成老師︰

1) 大市水平，係我地入市與否的其中一個參考。但更重要係睇企業本身，佢股價是處於什麼水平，才去決定入市。

近期中央政府，不斷推出一些反壟斷政策和監管，令很大大型企業股價受壓。現時不少由過往略貴，回至較合理水平。

表面上，因為咁樣出現左入市機會。但我地都要了解翻，這些政策對這些企業，有無造成長遠影響。如果有，我地估值可能要進一步調整，或者控制注碼，去平衡風險。

2) 當大市下跌，估值好似平時，我地就會加大持股比重，投入更多資金，去買入優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

不論大市在高定低位，都不會影響我們投資選項。市場平貴，純粹只會影響我們入市策略(即現金和持股比例)。但所投資的股票類別，係因應人生階段，所以係不變的。

只要現時持有股票，係適合你年紀，而長線質素又無變壞，就算跌市，你都應該一直持有。

至於入市時機，我地唔會等到佢平，先至開始入貨。因為我地唔會知，這些優質股，係唔係一定有機會，回到平宜水平。

因此，我地會因應自已資金多少，去分成多注咁入貨。係合理區頂，只會小注。回到合理，開始慢慢加大力度。到平宜區，才大力掃貨。

咁就可以平衡價值波動風險之餘，又不會出現完全入唔到貨的情況。

------------------------------------------------

Q22197：

成sir. 之前見你對40歲少股票，多現金的見解，實在擊中心房。

本人已48，冇樓，只是揸住200萬現金，有感樓及股都實實在太貴，故過去一直等跌市，結果錯哂。

求見解未來在房及股怎樣做打算比較好？現在應買樓嗎？同埋建一個約100萬的倉應怎規劃？實在困惑無比。希望賜教，謝謝！

龔成老師︰

由於香港樓房屋供應失衡，相信長線維持上升，機會係會較大。

而是否買樓，從投資角度，而時租金回報率不高，應先投資優質股會較好。但若從自住角度，只要物業係附合你長線生活需要，而你長線又＂供得起"，咁置業都無問題。

至於投資優質股方面，你可以投資優質，平穏增長股，作為投資目標。現價在合理水平，你可以將100萬分成多注，可慢慢入貨(唔好一次過去入貨)。

餘下100萬就等大跌市出現，才出手掃貨。或者此期間，你物悉到合適的自住樓，你就用來做置業基金，都係可以。

------------------------------------------------

Q22198：

龔老師你好，follow了你大半年，零經驗的我都好同意你長線持有嘅說法。

今年26歲，每月可儲$10000，最近都想入手,盈富，港鐵，領展，請問咩位入係最好的？如何分配？有什麼要注意， 謝謝～

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你26歲，應以增值為主。盈富(2800)、港鐵(0066)、領展(0823)都適合你，建議你以盈富作主力。

但你現時無投資知識和經驗，對企業估值，點去定平貴未必會太了解。所以你先利用月供模式(暫時唔好自行定平貴入貨)，去做增值，可以減低買貴貨風險，對你而言會較理想。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

由於你係較年青，長線可以加入一些潛力股，去增升組合增長力。以下都是一些有質素的潛力股，你可以參考下。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22199：

丫sir 唔好意思又麻煩你，我想為隻（1558）東陽光藥估值 ，但發覺現時醫藥行業股既pe 都好高，我試將市值由高至小，

pe 唔過50既6隻股票做一個平均數得出黎係31pe 請問呢個數據可相性高嗎？

另外我拎1558 （東陽光藥）5年平均pe 為25.6 ，最有代表性既eps 為1.18，但佢係20年發紅股1送1 令佢pe 大減 ，

所以我將佢平均pe 減半變成12.8 同時都將行業pe 減半變15.5。

估計合理pe 約12.8-15.5倍估算合理價為12.8x1.18-15.5x1.18

15-18加多10%緩衝=13.5-20

我計得啱唔啱。唔該丫sir

定我應該再減半多次 變成6.75-10呢個先係佢合埋價

龔成老師︰

你計算的基礎，基本上係正確。但數字判斷方法，有些地方係要修正。

首先，現時很多醫藥相關企業，好多都被炒到好貴，所以PE都偏高。加上這些企業，上市時間唔算長，參考價值會被打折扣。

行業本身係有發展潛力，但一般需要較長時間去投資。東陽光藥（1558）本身係有質素，但佢收入較集中在磷酸奧司他韋，考慮到專利到期時，會對佢造成不利等問題。

BOC網中每股盈利，已經考慮了這個1送1影響，所以你計算每股盈利時，唔洗再調整。

至於佢PE大跌，唔係因為1送1紅股。發送紅股，每股盈利和股價係會同時下調，因此唔會影響到PE。

你記翻上堂教你的PE架公式，係市價/每股盈利。即係PE大跌，主要原因應該來自股價大跌，或/和每股盈利上升所致。

於在2020年，受新型冠狀病毒肺炎疫情影響，中國國內人口流動性降低，醫院的診療活動數量、處方量及藥品銷量也隨之下降，因此集團收入有較大下滑。

因此，好明顯不是後者，而是因為前者，即股價大跌所造成。

由於這個是一次性問題，相信唔會長線影響企業，係我地計算每股盈利時，應排除2020年數字會較好。用過往4年平均，約為HKD1.276。

係估算合理PE時，因應企業產品種類、發展潛力和未來面對風險，我地要向下調，你預大約6-10倍。合理價，大約HKD7.7-12.8。

東陽光藥（1558）不是零質素，但業務有少少轉弱，加上業務都有少少風險。雖然現價係吸引，但某程度都係反映市場對佢睇法較淡。

因此，此股係可以投資，但唔可以太大注。

------------------------------------------------

Q22200：

想問下網上有講按揭存款掛鈎戶口可代替交息的概念？ 但睇左唔係太明, 想請教下你, thanks.

想問下如果自住的話, 其實青衣(藍澄灣/ 海欣花園)或者深井(浪翠園/碧提半島) 呢2區作為選擇，請問老師有咩建議? 覺得邊區會好D & 升值潛力好D呢?

唔好意思呀, 突然問幾條問題, 知道你好忙, 但仍細心解答我既問題, 萬分感謝!

龔成老師︰

其實簡單咁講，就係你可以存一筆錢落去個戶口，佢派息金額係足以和你按揭利息支出，作對沖。

但佢會限你存款金額，會係等同你按揭的一個百分比。至於多少，你可以問翻銀行。

從投資角度，青衣(藍澄灣/ 海欣花園)會係較好，始終交通較便利和較近市區。

但這是你自住樓，你要考慮埋你長線生活需要，你要諗佢地配唔配合到未來5-20年生活。若然係可以，又供得起的話，置業係無問題。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21041-Q21060）

Q21041：

老師，比亞迪電子
由幾個月38.8買入到而家冇放到
近期回到接近我買既價
我想知我應吾應該繼續持有

由60見到佢跌到而家
個心好累

係咪我太貪心以為佢會繼續升
定係e個就係價值投資要經歷既過程？

龔成老師：

其實買股票，是好正常的，我隻1211，10年前，都由$10上到$88，跌翻去$12，之後先慢慢上，睇住自己身家幾百萬上落（當時我仍打緊工，$1萬人工）

成功投資者，就要有好強的心理質素！

我是睇「長遠企業價值」，而你就睇「短期股價」，所以你要學懂唔睇短期股價。

285有潛力，你可長線，但如果你心理壓力太大，不如轉其他股價無咁波動的股。你預左買潛力股，一定會這樣的。

------------------------------------------------

Q21042：

龔sir,另外想問下你對2380的睇法，這股票有8厘息，但上年除淨後股價跌到1.4，應該繼續持有收息還是先賺錢呢？

龔成老師︰

中國電力（2380）有質素的，可以長線投資。但要留意，中國的電力市場與香港的不同，香港的，有利潤「保障」協議，助電力公司賺穩定的利潤，但中國的，電力價格由國家主導，電力公司處被動位。

受燃料成本，以及國家主導的因素影響，中國電力過往的收入略有波動，而盈利亦有不穩影響。國家會給電力公司「合理」的利潤，但不會過多。

你用佢收息係可以，但要留意佢股息率雖然高，但都會有一定波動性，故不宜持有過多。

------------------------------------------------

Q21043：

龔sir你好，留意左你專頁一段時間，亦開始讀你的著作，十分同意你的投資理念，作為投資新手唔想行咁多冤枉路，所以果斷報了你堂。

我現在28歲目標係若干年後，靠收息+工作每月有十萬蚊收入，唔知會唔會太大想頭呢？

另外我想請教你點睇用桿槓買REITs呢？我見坊間有導師會教學生襯現在低息環境，借槓桿買REITs買債等相對穩定和低風險的投資產品，回報可達10厘以上，唔知你又點睇呢？

謝謝你的回覆，期待上堂親眼目睹龔sir的廬山真面目

龔成老師︰

借錢槓杆這個方法，賺錢時候你會加倍，但損失架時候同樣會被放大。風險唔細，唔建議你用。

除非出現「明顯的投資機會」，才考慮利用借貸投資，否則，有機會出現賺息蝕價的情況，小心。

我地投資一般期望合理回報係每年10-15%，如果想做到收息+工作收入加起每月有10萬現金流（我先假設你每月收入有5萬來自工作 + 5萬來自股息）。以股息率5%計，你需要本金1200萬。

你可以用上面架計法，大約推算要達至這個目標，所需要架總資金和時間。

上堂見!!!

------------------------------------------------

Q21044：

Hi 龔Sir，有事想請你比意見

現在同另一半租屋12500，住東九龍
男友是公務員，可申請綠表資格
想買返東九龍嘅居屋自住

二人每月收入共$60000
之前有睇過私樓，但因為我從事美容行業，近年疫情影響，銀行對美容行業按揭比較嚴謹，
所以我哋都偏向買二手居屋有政府擔保
近日睇咗鑽石山
以下都系13,14年樓齡，同一條街，
步行3分鐘到，港鐵站需要搭多一程小巴，或步行15分鐘

1，嘉峰臺 私人參建居屋屋苑
422尺實用，兩房 叫538萬
需月供 $23000左右
間隔不能大改動，感覺不太實用

2，瓊軒苑 單幢居屋
398尺實用，一房 叫438萬
間隔實用四正
需月供$18500左右

基本開支每月二人合共$28000
包括保儉，水電煤雜費，卡數，交通，食飯，電話費，寬頻

我地手持大約流動資金有$65萬
股票有$30萬
所以會做95%按揭，25年供款

想睇下老師比d意見
會揀選屋苑定單幢

龔成老師︰

以你地的情況，買居屋的確是較好選擇。

2間物業位置好近，交通、生活配套、地區發展、落成年份、尺寸等條件都好相近。

屋苑的價值，雖然比單幢樓高，但見兩者呎價都有更段差距，因此要思考值唔值得。

嘉峰臺相對貴成100萬，除非有其他原因（例如預將來會有小朋友，要留定多間房），否則應該瓊軒苑較好。

因為大家質素相若，但瓊軒苑可令你節省近100萬，用作投資增值，長線會對你較有利。

------------------------------------------------

Q21045：

你好， 有問題想請教。
有一層自住樓，幾十年前買斷了。
我地一家三口 為照顧老人家搬咗返去同住。
我係一個從來無買過股票的年輕師奶，要照顧自己的小朋友 和照顧自己個妹的小朋友

也辭去護士的工作 做緊全職媽媽。
靠老公一份人工 生活普普通通。

可惜，自住樓日益老化，維修事項漸多，已投放幾十萬裝修，小朋友也漸漸大個，兩房樓也漸漸唔夠住

在這裡認識了你的專頁，想問問：

1. 想賣左層樓套現，利用套現的錢來增值財富。是否太進取？

2. 我為人穩陣，十分不喜歡炒炒賣賣，如何在這範疇中能平平穩穩地賺取回報，讓老人晚年生活得更舒適？

3.我喜歡文字，不怕閱讀大量資料，想認真地認識自己在進行什麼投資，不是人云亦云地買一兩個什麼號碼，有付出才有收穫 嘛！

4. 前路有點模糊， 請指點下。

註： 自住樓大約值 600萬
手拎零股票
有買 金粒的習慣 大約10萬值
買了兩份儲蓄保險單 給女兒 和年老的家父

龔成老師︰

1）唔建議賣樓。自住樓不應賣出。你換樓可以，但賣出自住樓就不建議。

其實，以你現時奬況，但長線計，你都要增值一筆錢，為換樓作準備。你可以用月供優質股，去做增值。

2） 投資股票，其實係希望買入一些優質企業，透過佢自然增長，達至財富增值目的。絕對唔係"短炒"，只你要選對股票，並長線持有，就會有唔錯架財富增值效果。

你要做架事，就係先睇下每個月扣除開支後，有無多餘錢可儲。無就要睇翻有無支出可以删減，重點係每月要空出一筆資金用來增值。

你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

但由於你家庭靠老公一份收入，開始投資前，必需儲起一半約為半年開支的應急錢，咁會較穏當。

3） 你這想法正確，我地唔好對企業毫無認知之下，做投資決定。你可以先睇我寫架"80後百萬富翁"、"財務自由行"和"股票勝經"，會適合你這類的初學者。

4）你現時每增加知識，並利用股票去進行財富增值，最簡單的方法是月供盈富。另外，如有需要就考慮換樓，但要視乎你地的資金、需要等。

至於金粒，都可以儲。但黃金主要係用來對沖突如其來架風險，所以唔洗多，佔總資產3%左右好了。

而"保險"只係理財中防守部份，只要買足夠保障就可以，增值可以留比優質資產（如優質股、物業等）去做，咁會較有效率。

------------------------------------------------

Q21046：

老師，我看到你的相“你是宇宙最大的奇蹟”
我都有留意 “吸引力”

入左一間公司做半年多， 同team兩個一開始共事既好同事都都走

一個辭職，另一個比人調組（調左一陣都辭職）

之後新來兩個同事 合作得暫時都一般，加野比我做
前日我又沖口而出話自己未必handle到咗多野，跟住佢地對的工作開始質疑，背後對我有微言

係咪我吸引左d負面野比自己
好擔心連份工都無埋
另外，前排可以左投資

買一手藍月亮，一手中國生物製藥

龔成老師：

吸引力法則是一個大方向，而在現實中，有好多變數的。

我地最重要就是自己有正面思維，往往會有好的事情發生，不過，現時仍是有野不是我地控制，你都要明白這點。

由於與你較友好的同事走左，所以你產生左一些負面想法，強加在新同事裡，不如你試下改變對新本同事的睇法，改善大家關係，否則會出現惡性循環。

至於你持有的兩股，有質素的，不用太擔心短期股價波動，持有一手無問題的。

------------------------------------------------

Q21047：

龔sir，你好，我都有啲概念野唔太明，股票係買賣，買/賣要有人接貨先叫成交，照計買賣既金額應該係一樣，咁點解D沽空既金額唔係成交既一半既？

龔成老師：

因為沽空不是正常的「賣出」，是一些無貨的人通過證券行借貨，先賣後買，因此要特別申報的。

------------------------------------------------

Q21048：

老師 我真係好迷茫 唔知應該點行 希望你能夠以過來人身份指點一下我

我27歲 無大學學位 只係普通DSE畢業
依家有份工作 admin 19k 返10:30 放6:30 無晉升機會 但好安穩 基本上都一定唔會踢我走 但19K已經係頂盡唔會再加

最近收到一個HSBC既teller offer , 人工少左, 15-16K左右, 我應唔應該轉去做teller? teller既晉升機會大唔大呢..唔係好清楚佢career path係點

希望你能夠解答一下我既難題

龔成老師：

其實好簡單，你從長遠角度去想就得。

你比較一下，5年後，10年後，這兩份工對你有那些分別。

從長遠角度去想，到時的收入、事業、生活、發展等因素，那個較好，那個較近你的長期目標。

你原有職業，突破唔高，除非你懂得善用餘下時間及利用資金投資有理想回報，否則發展唔高。至於銀行，teller的發展唔算高，不過，算是好過你原有職業，因為有機會再轉其他職位，以及有機會令你將來更有動力轉工，慢慢上。從突破角度，轉工會好少少。

你最重要問翻自己，長遠想點？有這個答案，就知選那份工。

------------------------------------------------

Q21049：

成哥，請問我買1177一手

1）甘我比一手價錢，啲錢係比1177間公司定比左邊個？

2）當我用1000投資，買左這股，升到1300蚊我放左，甘賺果300蚊係1177間公司比我定邊個比我?

我想了解運作，謝謝你

龔成老師：

1）交易所是一個二手市場，你是幫「另一個股東」買的。

你平時見到的股價上落及成交，就是每天不斷在買買賣賣，即是貨由投資者A轉給投資者B，不斷轉來轉去。

2）你可以當現時，你比$1000，在二手市場買了一部手機，然後過了一段時間，以$1300賣這手機賣給了另一位買家。

------------------------------------------------

Q21050：

老師，我知道你不建議借父母錢買樓。
不過我男朋友屋企人預備左1百萬(現時做緊定期)俾佢，係預備俾佢大約3-5年左右買樓付首期。

男朋友既父母話唔係好識投資，所以放左係定期。
雖然我覺得自己唔係太應該俾建議佢父母，但我都想問老師

1. 100萬應該拎出部分作投資嗎？

2. 應該拎多少作投資？

3. 應該投資係咩方面？係應該以佢哋既年齡而投資收息股嗎？謝謝。

龔成老師：

如果這筆錢會在中短期，例如1、2年內買樓，咁就最好持有現金，不要投資，因為投資始終有上落，無人知你買樓時的投資市況，萬一股市下跌，就會到時唔知賣唔賣股票去買樓好。

如果在3年後先買樓，就可以動用這筆資金，最好是投資「收息股」+「平穩增長股」，唔建議面對太多風險，同時，投資金額最好在$20萬-$50萬，不要太多。

------------------------------------------------

Q21051：

Sir，我Q19941見你早前的問答，我好想分享，我前後睇樓差唔多一年了，由6百幾萬睇到7百幾萬，又因為已經橫跨成年，可負擔的樓價已經就快可以去到8百萬

我由尖旺單幢20年左右的舊樓2房，睇到半新樓1房，再睇到黃埔細兩房，再愈睇愈貴睇到黃埔靚景中型兩房，已經去到8百幾萬

如果買去買800萬的樓，我就要用盡晒我啲錢同埋要賣晒啲股票，要賣晒股票，我會好唔捨得

後來我有一日本身已經睇左大半日樓，見仲未算好晏，就walk in去睇一個九龍上車屋苑，佢無我之前睇既樓咁近地鐵，但其實都叫walking distance

搭小巴去亦都好快，平均成交價講緊3百幾呎細兩房係6百尾至7百頭，頓時覺得好平，而且比起我之前睇既黃埔新好多好多

同埋一直以為呢個屋苑唔係咁好，但睇完實物又似乎都係一個唔錯的選擇

所以我會建議Q19941的讀者在考慮800萬dream house時，都去睇下啲細價樓，睇下自己感覺如何

就好似我咁，我睇完呢個上車屋苑後，感覺好ok，樓價低啲，唔需要套現晒我啲股票，供得輕鬆啲，可以繼續月供咁上下的股票，成個資產分配又唔會側重晒在住宅物業上面

最後我都想講下我近月的感受，我發現有啲同樣想買樓的朋友，與一年前的自己好似，就係好中意網上睇樓，而好少落場睇實物

親身睇樓真係好重要，而且唔係要買樓前至去睇，而係日後都會想買樓時，已經要早啲去睇下樓，到真係急住要買樓住時，至可以好快決定到。

龔成老師：

多謝你的意見，我都會同佢講聲。

這是一個好好的分享。

而你所講的「睇實物」，這點好認同，我相信網上只是輔助，並不能變成主力，我地一定要親手睇樓先得。

都恭喜你，你找到了你的目標物業！

------------------------------------------------

Q21052：

sir，1337雷蛇點解你睇好佢潛力？

龔成老師：

雷蛇（1337）有潛力的原因，主要係佢發展緊的業務，都是潛力類，加上見佢財務數據等資料，應該過了最差時機，因此可能有轉機。

當然，佢本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

------------------------------------------------

Q21053：

龔sir 你好
本人35歲
現時持有以下股票，請問組合ok 嗎？

0005 - 2手 平均買入價$42
0017 - 1 手 買入價$41
1177 - 2手平均買入價$7.9
0175 - 2手平均買入價$30

0017 買入後一直下跌，但個人認為企業有質素，但增長確實太慢，甚至不停下跌，很有衝動賣出，應如何是好？希望收到你的回覆，謝謝

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

中生（1177）和吉利（0175）都係適合你，可持有。

新世界發展（0017）不錯的，本身有一定的規模，業務廣泛，從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。

但這類綜合企業，一般的增長力都不會太強，佢近年的生意亦只是平穩，你可以持有這股，但不要預佢有好大的增長力。因此不建議持有太過多。你暫時可持有，但不要心急加注。

匯控（0005）增長力一般，主要係收息，以你年紀，不宜持有太多。

------------------------------------------------

Q21054：

成sir 1883和3988各有一手，係當年招股時買一直到而家。你見議應該點看待依兩隻股？

可長持嗎還是平手時放左佢好嗎？

龔成老師：

中信國際電訊（1883）業務穩定，整體質素算是不差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。

盈利就穩定並平穩增長，但始終生意無上升，點都會有扣分的地方。

相信佢能平穩發展，收息可以，但就不要對股價有太大期望。

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

所以，持有與否，要睇你本身投資目標，如果你想收息，就持有。想增值，就賣出。

------------------------------------------------

Q21055：

你好龔sir, 想問下，近期地產/物業企業既物業重估都系向下，是否可以代表香港物業其實系處於跌價方向，但似乎住宅物業冇乜跌價跡象。其實當中有冇關係呢？

龔成老師：

第一，這些物業重估只是一個「估」的數字，更只是一個會計上的因素，對企業無實際現金流的影響。

第二，我地分析時，會著重長期分析，唔需要太理會中短期情況。

所以當我地分析時，重業重估會影響盈利，但只是會計上，因此唔會太過著重的。

而佢地係重估時，不單考慮這刻的住宅樓價，仲要考慮租金，不同類的物業，以及將來發展情況等。

------------------------------------------------

Q21056：

你好老師，我係澳門人，早兩日去珠海金灣睇樓, 嗰度係 珠海新區 發展勢頭好勁但係依家 就係地盤多, 好多嘢都話會起好 將來點點點!

但係 現時比較荒蕪 但係都賣到兩萬五一方 不過有好多大品牌嘅地產商喺度都 喺度開盤 依家 15 16 唔知 買唔買好

因為我覺得個價錢都幾貴, 我覺得佢有啲潛力, 因為見佢之前啲新城區都 搞得幾好!

老師！中鐵建有投資價值嗎？
現價如何

龔成老師：

你最重要睇翻長遠的配置，該地區的交通及價值，以及，本身是否近商業地區。

如果有潛力，就時貴少少都是值得（當然不能過份地貴），建議你進一步分析該區的長遠城市規劃，以及發展等。

中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，但發展力不算強。

------------------------------------------------

Q21057：

想問下龔Sir對於
686 北京能源國際
668 東銀國際控股
1628 禹洲集團
3883 中國奧園

哩幾間公司嘅潛力，未來趨勢，現時股價值得持有嗎？

留意到近兩月內地房地產成交量急升，80，90後成家置業，可以從呢個方向同埋業績搵現價較平潛力股嗎？

龔成老師：

北京能源國際（0686）風險高。東銀國際控股（0668）賺錢能力唔強。

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，如果控制注碼都可考慮這股，長線投資價值都有，但未去到最高質類別。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，但風險較高，唔算好建議大注。

至於你從地房地產成交量急升，80，90後成家置業這方向，只能參考下，因為短期成交不一定反映真正的市況情況，而內地往往受政策等因素影響。年輕人成家這是需求，其實一直都有，你要確定是近期短期多左，還是長期核心需求的反映，我暫時未能確定一定是長期需求湧現。

------------------------------------------------

Q21058：

龔老師，我大陸有層樓
值439萬hkd

純粹問下

如果你攞左依439萬hkd
你會做d咩投資
如果做果個投資風險大唔大

龔成老師：

要睇翻你的年齡與風險程度，你可以考慮股票、基金、債券、銀行產品、車位等。

這是一個財富配置的過程，因此無話風險一定大，要視乎你怎樣配置。

就算股票，都有收息股、平穩增長股、潛力股等。

要睇你現時的配置，及將來的配置。

------------------------------------------------

Q21059：

老師，若我希望收息，哪些股票較合適？331豐盛服務可以嗎？659 新創建可以嗎？

龔成老師：

豐盛服務集團（0331）主要係於香港、中國內地及澳門，從事機電工程服務、建築材料買賣、環保產品貿易及提供相關工程諮詢，亦於香港從事清潔及廢物處置管理服務、回收及環保處置服務以及洗衣服務。

過往生意都有穩定的增長，而盈利都是，但企業的規模較細，因此風險較大，同時規模效益不高。但以佢現時的估值計算，價格是在合理區。

你可以投資這股，分注買入就得，長線持有，但就不建議投資得太多，始終這企業有點風險。

新創建集團（0659）都有質素的，佢係是新世界發展（0017）的基建及服務旗艦，業務遍及中國內地、香港、澳門。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務

整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。

企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，投資宜集中在股息多於股價回報。

另外，近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉，明白佢增長力不強。

------------------------------------------------

Q21060：

龔生你好，本人37歲，月入5萬左右，有一份穩定既收入，同先生財政獨立。現時自住樓先生名下，沒有很大固定開支，現家有大約80萬現金，十萬左右蟹貨股票。

平時無做其他投資，扣除生活開支後，每月大約可以儲2萬蚊。如果想投資，有咩選擇？

另外，如果想買樓投資，應該買咩價位既單位，同埋有無話咩地區比較好。

主要想10年內可以買2層細單位，想留比小朋友
謝謝你給予意見

龔成老師：

我地在財富配置上，最好是建立一個「平衡的組合」，如果太集中買樓，其實會出現集中風險。

當然，你不是不能這樣做，但就明白當中在風險，同時不是最好的配置模式。較好的做法是「股樓平衡」。

你可以先利用現時的$80萬，其中$40萬投資股票，再加上每月用$15000月供或分注買入股票。利用股票去進行財富增值，之後到適當時機先買入（這一步不用急）。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增長股：潛力股
8：2（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18301-Q18320）

Q18301：

龔sir，我最近有d迷茫？我想問下令你人生中最開心的事情是錢還是自己做到自己的事業，達到自己的理想？
因為有時候雖然也賺到了錢，感覺錢只是交易的工具，感覺身邊的人才是最重要，正念才是最重要的。

今年發生了太多事，肺炎，高比意外，覺得錢不是不重要，但不是最重要。

龔成老師：

我最唔開心的時候，應該係完成唔到目標的時候，無論事業、錢都是，因為我對自己有一定的期望，但當最後做唔到，都會有失望。

不過，我有一點較強的，就係心理質素，我好快會回復正常狀態。就算面對好大的挫敗，我都常會比個期限自己，例如最多1星期，就要自己正面翻，我會睇正面書、做運動，去增加自己的積極性。

同埋我好清楚，每次人生低谷，都係我的突破點，之後會變得更強。外在環境我地無得改變，但自己的心態則有得改。

你可以追求自己的目標，唔一定錢，你自己喜歡就得。同時要不斷進步。

------------------------------------------------

Q18302：

龔成老師你好

我看了你Facebook接近一年，也閱讀過你所有的書籍，其後更受你影響去閱讀了有關巴菲特及其他價值投資的書籍

吸收了很多有用的知識和理念，所以我除了覺得你是一個真正成功的投資者外，還覺得你是一個好心人，完全能感受到你發至內心地想幫助別人。

所以想跟你打個招呼並感謝你，能夠認識你並學習正確的投資知識， 為我將來投資致富之路立下了一個重要的基石

也想告訴你多年來的努力沒有白費，除了獲得財務自由外，也獲得我對你的佩服和尊敬，你是一個真正有影響力的人，因為你影響了我的一生。

我會以你作榜樣，繼續努力學習，一直穩步前進，長遠為我的家庭帶來一個更好的生活。

再一次說聲，多謝你！

龔成老師：

太好了！

有時當我每日答問題，都會有累的時候，因為現時每日都用3、4個小時都答問題。但見到幫到人，例如你有實質的知識與財富增長，都會有動力的提升！

你都要保持知識的增長，加油呀！

------------------------------------------------

Q18303：

成老師，我56歲，兩口之家沒兒女。聽你的頻道只有數月，我會重複地細心一聽再聽，希望從中領悟投資真理。

家住兩房私人屋苑現值800萬另有一同屋苑車位市值200萬。已經不用再按揭。現金約100萬。

我有揸開車，車位自用，也曾經租出，現時租金約3600-4000.

我有想過不揸車，把車位套現，現金變成250晚再投資。我比較喜歡郊區生活，也想過退休到離島居住。最近看到離島的小單位村屋300多呎價格約300 萬。

把車位換成村屋的想發萌生。

老師，可否給些意見？我和太太合共除去開支每月可儲2萬。謝謝

龔成老師：

如果你決定長遠會住離島，其實有二個方案。

第一，現時買離島樓，收租，等你同時持有2個物業，到你退休就將現時樓放租，住離島樓。不過這方案就較進取，你要動用現時的現金以及車位賣出。

同時會令你財富較集中在物業，風險會略高，你要睇翻自己能夠承受，但這方案不是不可的。

第二，第到你正式退休後，賣出現時樓，將資金到時買入離島樓，然後自住。

再將資金投資不同類別的收息資金，以得到現金流，車位則放租。

你在退休前的幾年，就努力儲蓄，投資收息股，開始為退休後的財富與現金流做準備。

------------------------------------------------

Q18304：

老師你好，係2.92 入左必瘦站12000股。想請教老師點衡量揀現金收息或以股代息？謝謝

龔成老師：

以股代息就是你收息時，唔要現金，要股票。

首先，你一定要長線投資的，因為佢會派碎股比你，所以你最好以不斷儲股，每次都收息的模式進行。如果你不怕有碎股，基本上可以進行的。

第二，只有優質股才可進行。這股可以的。

第三，換股價合理，這股現價合理，可以進行。

必瘦站（1830）現價唔貴，如果你打算長線或超長線持有，而又唔怕碎股，就可以股代息。

------------------------------------------------

Q18305：

你好龔成老師，我今年23歲，每月儲蓄$9000，我一直也有追蹤老師你的頻道，很感謝你讓我認識了財務自由的概念，知道及早理財的重要性。

但是我仍然不懂得如何有效投資理財，所以早前只買了一些相對穩健的股票及基金作投資。

現有資產組合：
股票:
匯豐 (800股)
建行 (10,000股)
中石化 (10,000股)
中國鐵塔 (10,000股)
置富 (5,000股)

基金:
瑞銀中國股債基金 HKD100,000 (今年年中買入，打算作收息用途）

儲蓄保險:
2019年年中買了純儲蓄保險，年供$45,000，供5年。2029年完保單，非保證+保證的金額大概有$330,000

本人絕大部分的現金也用作投資以上的股票及基金，因此流動現金只剩下$30000。

1. 我打算把每月$9000的儲蓄開始月供盈富$3000及領展$6000作長遠投資，合適嗎？

2. 我現時的投資組合屬於進取/正常/防守的類型？我現在的年齡應該採取甚麼類型才適合？

3. 作為投資股票的初學者，我應該閱讀甚麼書籍學習投資股票？謝謝你!

龔成老師：

1）你可以月供盈富（2800）$6000，領展（0823）$3000
，都是有質素的股，都可以長期月供。盈富是一個組合，而領展是個股，因此在風險比例上，盈富應該較多。

2）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、建行（0939）、中石化（0386），以你的年齡來說，並不適合。另外，同一行業唔好佔比太多。

另外，你現時流動現金唔多，宜留現金。

3）你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q18306：

老師你好 想問下我今年36歲有30萬現金但無工作同無收入可點投資好？同想問下供股系每個月供？

龔成老師：

由於你現時無收入，因此應該保守少少，現金要留大部分，作備用。

至於留多少現金，就要睇你日常的開支，以及預期多久會正式有收入。

簡單來說，唔好期望投資能好快產生收入，反而你應該用「閒錢」的心態，餘下資金才可以投。

你可以考慮一些較穩健的股，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

另外，「月供股票」就是指，每月投資相同的資金，去買某一隻股票，你要先同銀行定好計劃。

而「供股」是另一樣野。

------------------------------------------------

Q18307：

龔成哥，還有我老公諗咗一個晩上都唔係太明，1888 沒有咁多流動資產為何要派咁多股息俾股東？

我話可能控股公司148 等$ 用，至少$ 不是被大股東淘空先。只係佢怕1888 會很快會被私有化，或是佢應該買番啲148 。請指教此財技底藴。

龔成老師：

其實建滔積層板（1888）又不是無流動資金的，見佢都有幾十億現金，加上佢現金流唔差，近年每年的經營活動現金流都有30億左右正數，現金不算差。

當然，比起之前年度，現時的現金數字不是特別多，因此，大股東想收息，得到現金，這個可能性都可。

至於私有化，這個就唔知。不過，企業過常會在好平的情況在會私有化，而佢現時不是特別平。

我會建議你集中分析企業的業務、前景，多過這些財技，因為我地散戶，始終好難估管理層佢地玩緊乜。

------------------------------------------------

Q18308：

龔成老師，你好，我今年year 2 , 做parttime 儲左十萬，我想畢業前儲到40-50萬去外國讀master, 請問有咩方法？

我本身完全無投資概念，想開始買下股票/月供股票， 但係應該去邊間公司開股票戶口/ 去邊間公司買月供股票好？ 同埋應唔應該借loan 買月供股票？

龔成老師：

由於你現時投資實力不足，因此不建議借錢投資，加上現時股市不是特別平。

你可以好好利用這幾年，投資平穩增長股+潛力股，但由於你時間不算多，因此潛力股比例不宜太多（因為這些企業宜較長線投資，等較大的收成）。

你可以動用$5萬現金投資，餘下就等機會。另外，可以保持每月，慢慢分注入優質股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。（同時唔應該佔太多）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

銀行及證券行，其實兩者都可以，銀行就較方便，但手續費就較貴，證券行收費就較平。你可以先了解下不同的收費。

------------------------------------------------

Q18309：

你好！可否在這裡問問題？
投資新手！本人有現金4萬元。

入了內銀股做收息用途，原想擺幾年，如需買樓便沽，但現在內銀都看淡，我有點後悔...
1手939 (5.97)
4手998 (3.59)
4手3988 (2.88)
全部剛收到利息共$2000，如現在沽會蝕一千多元，請問我該沽貨，然後換馬到增長股，還是多放幾年收息？

另外，我購入的股票現價全蝕...

1手6185 (221)
2手005 (35.95)
2手1895 (4.32)
10手3033 (8.925)
1手9988 (280.4)

我應該止蝕換馬，還是繼續捱價？應如何分配？
本身我購入9922、2319、880的。

*本身我想購入9922、2319或880，換購入這些股份好嗎？
還是某些股票溝貨，待回升一點就離場，eg. 005/1895?

謝謝！

龔成老師：

你預內銀股中短期仍會較弱，長遠會好翻D，但都唔好對股價有太大的期望，主力是收息。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買價價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

你要分析翻，自己該筆資金，之後想增值還是收息，方向如何。

康希諾生物（6185）風險度高，要小心，股價上落大。

匯豐（0005）與內銀類似。

鑫苑服務（1895）、南方恒生科技（3033）、阿里（9988）可長線。

是否換馬，你首先設計一個長期的投資組合先，要明白「長期」，唔好只著重這刻，有大方向後，再仔細分析企業，慢慢調整至適當的配置。

------------------------------------------------

Q18310：

你好呀龔成老師，本人將踏入34，每月13000收入，但供完保險俾埋家用已冇錢剩，每月供分別$1000和$3500的儲蓄保險，1000嗰份已經供左15年

可以攞返20萬左右，但如果唔攞返繼續每月供每年就會多一萬蚊利息，因為供咗咁多年複式效應，可以冇年期地供，而3500嗰份只供了1年，要供8年期的

現時不供係冇錢攞返嚟的，請問我哩1000嗰份我應該繼續供，還是攞出嚟作投資，3500嗰份保繼續還是停供轉做供股票好

因為係哩半年先開始留意你FB原來月供股票好過月供儲蓄，但3500已供了一年，希望你俾意見我，謝謝。

另外，我有30萬的黃金現貨，大陸有個單位約值100萬。另買左:

788）7000 平均1.5
941） 1000 平均55.4
1193） 2000 平均 55.4
1299）600 平均 72.7
2382）200 平均135
3918）6000 平均 8.4

股票現時共約值三十幾萬，還有110萬的現金，我可以怎樣分配，我08年後就冇再投資過股票，因為在那一年出虧損了幾十萬就怕了。

但現在看老師的股票聖經之後，又對股票投資睇法不同了，之後都還會睇埋老師的書，因為哥哥已睇曬你的所有書，佢推介我睇的第一本就係(股票勝經)，真心覺得好好。

無論心態上，知識上都改變了不少。再等睇多啲書多啲知識時會去報讀老師的課程，呀哥亦都讀完你的2個課程，謝謝你。

龔成老師：

儲蓄保險產品，都有其存在的價值。

我地進行理財，是一個攻守兼備的配置，這些儲蓄保險產品，可以視為我地組合中防守的部分，如果你本身的財富組合無乜這類項目，就可以持有這些產品。

但要留意，這些產品你不用太多，只要「適量」就夠，餘下的財富比例，你應該集中進攻。

所以，你要從長期配置，防守與進攻的比例去想。你照留原有產品都可以，但之後的現金就要集中進攻。

你現時持有，質素不算差，但有些增長力較慢，例如中移動（0941）。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，仍算是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

如果你$110萬無買樓及特別用途，大部分可以投資及等投資，暫時你可以動用$30萬-$50萬，分注投資，餘下再等大市跌再入。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。同時，最好等回先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18311：

老師您好，終於購買了老師的《股票勝經》，已經開始去檢視及在了解企業、學習如何選股及看年報（已購買老師所著的另外兩本書）。

雖沒學行先學走，開始少量月供老師曾講解過的企業（盈富、比亞迪、港鐵、舜宇），希望開始儲股不是現金。

另外，這一個月下來看完80後三本書，財務自由行，致富藍圖，這個月會開始行動月供股。

老師的股票勝經應該很搶手，澳門宏達已要求調貨，4星期都沒有回音，中間按耐不住，3星期前花了點錢在香港書城下單，還在調貨。好書值得期待。

祝先生及家人身體安康，疫情嚴峻需小心。倘先生在澳門舉辦課程定必報讀。

龔成老師：

多謝提醒，會同出版社講講。

你可以保持月供股票，上述你所供的，都是有質素的，你長期進行就得。另外，澳門可以手續費較貴，你要計好數，如果手續費例你投資比例去到1%，就未必值得。

你保持進步就得，加油！澳門宏達已經是較多貨，我一般都會叫網友去宏達訂，當你們的訂單多，佢的貨都會較快。

要留意，現時大市只處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

疫情過後，一定會盡快來澳門！

------------------------------------------------

Q18312：

老師你好，本人的父親80歲，母親65歲，有一層樓齡54年，已供完的單橦舊樓，市值450萬，放租金大約1萬1千至1萬2左右。

因為他們年紀大，本人打算接他們到我家同住，請問他們的舊樓應放租，還是賣掉化為現金投資給他們安老好？
多謝老師

龔成老師：

如果該54年的單橦舊樓，維修較差，將會有持續的維修費等問題，就建議賣出，因為這會在長遠，出現「貶值」的問題。

你就應該賣出，轉其他更有質素，有增長力，或現金流較強的資產項。可以建立一個平衡的投資組合，利用現金流作被動收入。

------------------------------------------------

Q18313：

我全部卡數 都系XX銀行
主要系月單分期 合共20萬
而家已欠10萬 只還最低限額~

問題 我手上現金只有2萬
我需要破產 還是 每月從今每月還1萬

因疫情影響 停工好耐 剛剛復工
感激萬分

龔成老師：

盡可能都唔好破產，你將來會好煩的。

$20萬，其實不是大數目，不要因為這數而要承受較麻煩的後果。你首先要問銀行，現時的信用卡的實際年利息多少，如果好高息，就應該將負債轉到其他低息的地方。

之後的目標是每月還$5000-$10000，努力利用工作去增加收入，努力還錢，如有需要可能要找兼職去增加收入。

------------------------------------------------

Q18314：

龔sir，你好, 我想請教: 我月入18000, 手上儲蓄50萬, 38歲。希望可以係55歲財務自由同移民。

想知道可以點去用我手上嘅50萬, 我應該度留多少現金比自己呢?

我應該點度我嘅月供租合?我每月可以拎3000至3500供股。

之前有買啲收息股(6823), 但放左啦。
另手上有1手(0844), 冇咩起息, 想放。

成日都有睇你嘅文章, 多謝你教左我好多野!

龔成老師：

如果你無置業或其他較大的支出，$50萬，只要留下3-6個月的支出數，以及你認為需要的應急錢，餘下都可以進行投資。

當然，不是立刻投資，而是部分會分注開始投資，部分會「等機會」先投資。

你預現時可以動用$10萬-$20萬，開始分注投資優質股。

廣泰國際控股（0844）質素唔太好，宜賣出。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。好好利用這段時間，在55歲前滾大財富，因此，投資飾以「增值」行先。

可以分注，或慢慢月供的模式，去累積股票。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18315：

成哥，我係之前股票班的同學。有d野想請教你，3918我做左個基本分析，麻煩你睇睇同埋有幾個問題想問。

（附上企業評估表）

第一，你覺得我畀14分畀3918是否太高？

第二，關於估值。請問我計算出的估值正確嗎？

pe 估值 7.612,11.764
pb 估值 9.59,13.50
dcf 估值 7.74 9.36
平均 8.31 11.54

關於pb估值我有多d野想問，因為聽你上堂淨係講左＞1是貴。

最後想你畀d總括既評語畀我呢份功課，等我下次可以做好d。謝謝！

龔成老師：

金界（3918）14分大致合理。

我睇翻你整份報告，做得不差，你利用澳門賭業股作比較，都可以，但由於金界是新興市場，你在估值上，就要比澳門類的較低，因為始終風險較高。

至於估值，大致正確，始終估值沒有絕對的答案，你計得的各估值都有根據，並具無太大偏離實質價值，整體正確確。

pb估值，要考慮同過往比較，不能只睇「1」的。

------------------------------------------------

Q18316：

Hi 龔sir, 我有少少問題想請教下阿sir你，0997 之前由個幾幾分鐘內跌到0.16，跌幅達75%，此隻股票會否再升及點解會有咁嘅跌幅？

小弟不才，諗左好耐都不明白。請龔sir 可以講解一下嗎？謝謝你的指導

龔成老師：

普匯中金國際（0997），業務持續向下，加上出現虧損，投資價值不高。加上市值細，風險高。

佢在5年時已出現了「更換核數師」，反映盤數可能有D古怪，投資者見到這類情況，會比較小心。

通常這些公司出現股價急跌（特別是市值細），都有兩個可能。

你可以當為現時有一張$10紙幣，市場之前願意用$100做買賣，忽然跌到$10。第一個可能，之前過度樂觀，然後當發現有壞消息，打回原形。第二，這班人用左手交右手的方或造出成交價，當散戶買入時，就打回原形。

------------------------------------------------

Q18317：

龔sir，2382我$136入左，之後一直係甘跌，跌到得返$117左右

佢係咪有機會上返吧?!同埋隻981而家帳面蝕緊7萬几，好唔好放甘啲⋯⋯

龔成老師：

舜宇光學科技（2382）有一定的質素，不過之前股價處貴水平，其後手機市場疲弱，佢都回至合理水平。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

至於中芯國際（0981），就要小心，這股風險高，如持有太多，宜減。

------------------------------------------------

Q18318：

請問老師，公司年報有一項是已付股息，但股息不是 每股股息x總股數嗎? 為什麼兩個數會不同? 感謝

龔成老師：

因為發行股數是變數的，年頭發行100億股，如果中途有增發過股票，年尾可能是120億股。

所以，你要睇翻佢派息時的發行股數，而佢顯示的，又可能是最新的股數。

------------------------------------------------

Q18319：

老師你好！有少少股票問題想請教你，非常感謝你的耐心解答

我先生之前在較高位買入以下股票，不知是否賣出較好？

雷蛇(1337) @1,000 股
平安好醫生(1833) @100 股
凱知樂(2122) @2,000 股
眾安在線(6060) @300 股
永泰生物(6978) @1,000 股
海普瑞(9989) @1,000 股

我現在開始看老師你既書（股票聖經及年報聖經），希望能增加財務及股票上的知識。

再次多謝老師你的詳盡解答！！

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買價價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

平安好醫生（1833）有潛力。

雷蛇（1337）、眾安（6060）、海普瑞（9989）小注都可，但就有危有機。

凱知樂國際（2122）宜賣出。

永泰生物（6978）這類股較難玩，未有盈利，真係博博下，如果不是好了解，不如賣出。

保持進步啦！我地買股票是買企業，要經過仔細分析。

------------------------------------------------

Q18320：

Hello龔sir! 小弟又有問題想請教。

小弟正在閱讀你的推薦書清單，當中睇到富爸爸窮爸爸系列的《富爸爸投資指南（下）》，當中有以下呢一句：

富爸爸曾經說：「合格的投資者既要精通基礎分析又要擅長技術分析。」（見圖）

當中富爸爸指出，除了像價值投資者那樣分析企業基本面，亦可透過買賣期權，兩者並行，利用股市升或跌去賺取最大回報。

小弟係龔sir fans，知道龔sir唔buy呢種做法，因為冇人能準確估計股價升跌，而且企業質素上升下跌與歷史股價冇關。

咁龔sir覺得呢種方法，應該係犯左某種邏輯謬誤？

相對於價值投資，呢種雙向並行既方法，長線計會唔會增加投資回報呢？謝謝龔sir!!

龔成老師

《富爸爸》的作者，是靠炒樓及做生意起家的，這是佢最強的兩項能力。

巴菲特是最強投資股票的人，佢會建議價值投資法，但佢強調技術分析無用！

至於期權，佢不是完全無用的，但佢唔太建議散戶用，這是佢明白散戶好難利用期權賺錢。

我相信，有些投資方法的確有人會賺到錢，但只是少數，我地應該放自己在較有利的位置。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。