解答

—— 10/23 大家都乖乖不到處亂跑的話，新歌就可以順利上架 #🦚

所以，社交動物園裡，你是：
a. 麻雀Ma Que
群居，成群結隊壯大聲勢，利於獵食或禦敵，遇到資源有限時，則會因資源分配不均而起劇烈的鬥爭，另外，麻雀容易不忠。

b. 🦚 孔雀Kong Que 🦚
雄孔雀開屏除了求偶以外，遇危而無法逃跑時，也會開屏試圖嚇退敵人，孔雀屏的大小與其強壯程度成正比。而雌孔雀，為確定跟最強壯的雄孔雀交配，會耍各種心計去測試追求者的能力。

c. 烏鴉Wu Ya
懂得分享知識，團結，同仇敵愾，同類間鬥爭後懂得和解，成年烏鴉會自動照顧無血緣關係的老年與幼年烏鴉，也擁有哀悼的行為。

d. 鸚鵡Ying Wu
野生鸚鵡天生是社交動物，然而社會結構通過攻擊來確認，一直處在變動之中，敵人或朋友角色會一直切換。被豢養的鸚鵡只能一直重複人類的語言來確定穩定的主僕關係。

孔雀開屏記（下）
　　
上集：https://bit.ly/2Be4yzD
　　
我同小雯拍咗拖幾日，阿龍就好焦急咁搵我：「兄弟，你向小雯表白嗰條片，俾路過嘅女仔擺咗上網，喺網上瘋傳。」

「我知啊，女網民都好羨慕小雯。小雯成日碌留言，笑到Gap Gap聲。」我答。

阿龍嘆氣：「我女朋友都睇咗，佢好唔滿意，話我當日表白都冇咁浪漫，得我一個開屏。」

我問：「所以佢要你搵十幾隻孔雀一齊開屏，好似我向小雯表白咁浪漫？」
　　

阿龍話：「冇錯，可唔可以幫幫手？」

「我當然冇問題。」阿龍幫咗我咁多，我點可能拒絕佢：「只不過，其餘十幾個兄弟，唔知佢哋肯唔肯再嚟多次。」

阿龍去搵其他兄弟，出乎意料地，大家都冇嫌麻煩，爽快地應承咗。

除咗義氣之外，仲有一個原因，係大家嘅女友、老婆、追求對象，都睇咗小雯條片，紛紛要求嚟一場相似嘅浪漫，唯有互相幫助啦。
　　

聚集咗一班兄弟，我哋開會討論阿龍嘅浪漫場面。

其中一個兄弟講：「唔係照番上次咁做咩？只係中間位換做阿龍啫。」

「我女朋友話，唔要我照抄，我要做得更用心，更令佢難忘，先表達到我嘅愛。」阿龍尷尷尬尬咁講。

經過一輪商討後，我哋決定搵隻歌、排隻舞，類似音樂會，阿龍喺中間唱歌，十幾隻孔雀一路跳舞一路開屏，夠晒難忘。
　　

呢場浪漫好成功，但大家應該估到，如果連最靚仔嘅阿龍，都必須要「更用心」先可以滿足到女友，其他兄弟就更加要各出奇謀啦。

繼「音樂開屏會」後，我哋又搞咗「情詩朗誦開屏會」、「一雀一玫瑰開屏會」、「鑽石戒指開屏會」……

仲有幾次，女方覺得，十幾隻孔雀開屏實在唔夠壯觀，想要夠五十隻。

嗰個兄弟搵極都搵唔到咁多朋友，要出錢請臨時演員，先完成到女友嘅心願。
　　

呢啲影片擺晒上網，引來更多女仔嘅羨慕，一時間，大部份女仔都要另一半準備浪漫場景。

人情嘅嘢，爭咗就要還。

好似我搵咗十幾個兄弟幫手表白，當佢哋需要「浪漫」嗰陣，我都要幫手。

所以，呢排我係咁參加唔同嘅開屏會，疲於奔命。

我同自己講，好快就完㗎啦，只要每個兄弟都浪漫過一次，件事就完咗。
　　

點知，過咗一段時間，阿龍又嚟搵我：「又有嘢搵你幫手。下個月係我女朋友生日，佢希望過一個浪漫嘅……」

「咪住先。」我打斷佢嘅說話：「之前咪搞咗場浪漫音樂會囉，你換咗女朋友咩？」

「冇換到，上次係我哋嘅拍拖紀念日，今次係佢生日。」阿龍解釋。

我呆一呆：「咁麻煩㗎？」

「你估我想㗎？」阿龍個樣比我更苦惱。
　　

更糟糕嘅係，小雯向我提出分手。

佢話，佢當日同我一齊，只係俾氣氛沖昏頭腦，我哋根本唔適合。

我當然搞咗一場「挽回愛情開屏會」，但都冇辦法挽回小雯嘅心。

順帶一提，我當日向小雯表白嗰條片，依然擺喺網上，間中都有新留言話「好浪漫」。

只不過，從來冇一個留言，係關心我同小雯到底發展成點。
　　

以前雄性孔雀求偶，只需要喺心儀嘅雌性面前開屏，係兩隻孔雀之間嘅事。

依加你唔搵番十幾廿隻孔雀，一齊開屏，再唱歌跳舞送花……都唔好意思話自己求緊偶。

我以一己之力改變成個求偶生態，但我偏偏改變唔到自己。

因為，當全世界嘅要求都提高咗，我只係從「咩都唔做所以考最尾」，變成「拚盡全力都考第尾」。
　　
－完－
　　
將專頁設定為「搶先看」/ "See first"，最新故仔馬上睇！
　　
同女友交換身體：https://goo.gl/8EURBV
我聽到人哋講我壞話：http://bit.do/frcRd
　　
#短故 #短篇 #小說 #陳美濤 #廣東話 #粵語 #tomatochan #孔雀開屏記