浪漫月巴睇90s（41） ［Chotto等等，我是怎樣迷上鄭經理？］ 突然鍾意一個人，有時候，真係沒有原因。就像我對Sammi。 1.屈指一算，由90年代初至中，佔據我心的女星其實唔多，當中包括：周慧敏、王菲、蘇慧倫、王馨平、高橋由美子、淺香唯（爭兩個字的淺倉舞是90年代著名AV女優，亦我所冧也）、三浦理惠子（個名幾乎一樣的三浦惠理子則是現役AV女優，非我所欲也）、新島彌生、牧瀨里穗、Winona Ryder。冇呃你，兩隻手，數得晒。 2.Sammi未能擠身十大。不過，都排第十一吖。 3.由她一出道，我就有聽過吓她的歌睇過吓她的劇，但就是冇買過吓她的碟。唔知點解地，初出道的Sammi一直未能攻陷我（當然，能否攻陷我其實毫不重要）。 4.直至1992年，《火熱動感lalala》個廣告一出（有關呢隻堪稱香港開埠以來最好聽快歌的軼事，請參考番「浪漫月巴氏睇90s」第一篇《還記得我們曾經火熱動感地打開天空嗎？》），大鑊，從此便有把聲，Keep住在我腦裡迴盪：Sammi好好好好好正吖！然後我就像一個成功撞邪的人，由「對Sammi冇乜感覺」變成「對Sammi好有感覺」……這個轉變，再經《Chotto等等》催化，內化成一個我都唔知點去形容的概念，一個揮之不去的概念——我．鍾．意．Sammi。 5.於是，《鄭秀文的快樂迷宮》成為了我人生中首次用（捱餓多日辛辛苦苦慳慳埋埋的）零用錢購入的Sammi作品，而為隆重其事，仲專登買CD。順理成章《Chotto等等》是我最想聽的曲目，想聽到試過連Loop廿幾次都嫌未夠（但隔籬屋嫌夠，公屋單位，一家播歌，多戶受惠）；對我來說，成首歌最高潮位肯定是臨收尾時，當Sammi以極高音唱完「情話寧願你分批講給我聽聽」後連氣都未唞啖就立即以更高的音大嗌：「呀～～～～！」嘩我真係亢奮到猶如核爆！事隔多年，當我為了打這篇稿而專誠聽番呢隻歌，即使已經不再年少無知少不更事，但依然有種莫名亢奮，亢奮到想放開一切不再打稿…… 6.我可不是那種買一隻碟只會聽一隻歌的人，好彩地，《Chotto等等》以外，《快樂迷宮》收錄的其他歌都好聽（注：十首歌中，八首是改編歌），像《怎麼愛得這樣傻》、《痴心等待》以及《衝動點唱》等等。《快樂迷宮》是1993年6月的事，估唔到半年後的12月因為《大報復》呢隻「新曲 + 精選」，我再一次擁有《Chotto等等》……新歌方面，有《大報復》和《叮噹》，我偏好《叮噹》（後來才知《大報復》是本地製作《叮噹》是改編歌），尤其欣賞Sammi用其獨到的咬字將「叮噹」唱成「癲噹」，相當Crazy。精選的舊歌，有改編自陳淑樺《夢醒時份》而不比原版輸蝕的《思念》、哀怨背後潛伏激情的《Say U'll Be Mine》，還有我最最最最最鍾意的《娃娃看天下》。（「新曲 + 精選」絕對是香港樂壇最攞命和掠水的發明，結果一年未夠，1994年10月又推出《時間 地點 人物》新曲 + 精選） 7.《Say U'll Be Mine》和《娃娃看天下》都來自她的第三張專輯《Never Too Late》，一隻封套個Sammi被認為影得太成熟的專輯（當時的她才不過廿歲咋，卻被裝扮成一個將要去Ball的落寞貴婦），我後來買番，才發現這張專輯比起《快樂迷宮》更得我心。 8.而最得我心的90年代Sammi專輯其實是1995年《其後》，一張冇乜宣傳的專輯。當時Sammi已轉投華納，《其後》是她華星年代最後一張作品。內裡再沒有那些要你一聽就瞬間入腦的快歌，也沒有好張揚地要成為Hit歌的曲目；成隻碟，卻有著一份迷人的低調。壓軸一曲，《再見》，餘音裊裊，不絕如縷。 9.其後的事大家都好清楚，《捨不得你》和《放不低》讓她正式成為天后。我鍾意Sammi的時間也到此為止。原因？冇乜原因。 10.不過世事嘅嘢話唔埋，可能聽日我又鍾意番都未定。 （原文刊於am730） http://www.am730.com.hk/column-329773 #浪漫月巴睇90s #我仲係滿腦子Chotto等等