我嘅職業係：都市英雄（上） . 「對唔住，我希望我嘅另一半有上進心，咁先可以一齊為未來而努力，我哋都係分手啦。」女友晶晶咁樣同我講。 . 我好唔忿氣：「我無上進心咩？我都好努力㗎。」 . 「你照鏡望吓你個黑眼圈啦，尋晚係唔係又打通宵機啊？」晶晶翻白眼。 . 我仲想掙扎：「我唔係打機，我......」 . 晶晶非常決絕：「咁你去咗邊啊？ 呢個年紀，人人都諗進修投資，你就剩係返份一萬蚊工，成日攰到好似隻死狗咁。我睇唔到將來囉！」 . ， 唉，點解我攰到好似死狗咁？因為，我嘅真實身份係一個都市英雄。 . 十八歲嗰年，我遇到一個世外高人，教我一身絕世武功。 . 從此，我就戴住狗頭面具行俠仗義，慢慢闖出「狗頭俠」嘅名堂。 . 我曾經喺洪洪烈火中，救出被困火場嘅老婆婆； 曾經深夜登山，求助被困嘅登山者，當然都經常打敗窄巷嘅小毛賊。 . ， 但人嘅精力有限，好難話夜晚去拯救世界，日頭仲認真上進㗎嘛。 . 我忍唔住問晶晶：「如果我係『狗頭俠』，你會唔會覺得我唔夠上進？」 . 「到處幫人嗰個都市英雄？你係英雄？」晶晶用三個字嚟回應我：「傻的嗎？」 . 晶晶決絕離開。 . ， 我心情已經好低落，過幾日，舊同學聚會，我又成為被鄙視嘅對象。 . 人工低、無車、無樓。 . 有個同學扮晒好心咁問：「你依加份工無咩晉升空間喎，我公司呢排請緊Staff，你有無興趣？」 . 我強行打起精神：「都好啊，唔該晒你，大概係咩職位？」 . 佢一拍腦袋：「哎呀，差啲唔記得，公司要求要大學學歷，你無㗎可？唔好意思添。」 . 嗰一刻，好似所有同學都望住我，暗地裡嘲笑我，睇唔起我。 . ， 我係英雄，我救咗好多人，呢件事唔係比人工，比學歷更重要咩？ . 當年教我武功嘅師父同我講，真正嘅英雄就要低調，所以我先一直戴住面具同手套。 . 但係，無理由做英雄嘅同時，仲要俾人睇唔起㗎。 . 我決定，我要現出真身，我只想得到應有嘅尊重！ . ， 喺網絡時代，呢件事唔算太難實行。 . 平時救人，都有人會話：「係狗頭俠啊，可唔可以同你自拍？」 . 我以前會婉拒，依加我就爽快咁應承。 . 等咗無幾久，終於有人開Post：「發現狗頭俠真身！」 . 我不斷接到朋友嘅電話同訊息：「原來你係狗頭俠，好犀利啊。」 . 然後，有報紙雜誌訪問我，叫我講吓做英雄嘅經歷，展現吓絕世武功咁。 . 我出街食個飯，都有唔少人讚我，要求合照咁。 . ， 美中不足嘅係，我老闆炒咗我，佢話希望畀我多啲時間，去行俠仗義。 . 不過唔緊要啦，份工人工低又無前途，都開始有廣告商搵我，代言吓運動用品咁，我都唔駛擔心收入。 . 而且，晶晶都返嚟搵我，同我復合。 . 佢淚眼婆娑咁同我講，佢之前誤會咗我，唔知道我係一個咁善良嘅人，佢一直夢寐以求嘅，就係有一個咁正直嘅伴侶。 . 我唔係好明：「你唔係話要有上進心咩？」 . 晶晶答：「做英雄，就係為人類社會而上進囉。」 . 原來係咁，好人果然會有美滿嘅結局。 . ， 我以為，我會幸福快樂咁生活落去。 . 但幾個月後，突然有一日，我開始被公審。 . 原來有棟大廈發生火災，三死十一傷，大家哀悼嘅同時， 突然有人問：「咦，狗頭俠呢？佢又話係都市英雄，做咩唔嚟救人？」 . 更糟糕嘅係，有人爆料，火災發生嗰陣，我喺度拍緊廣告。 . 於是，所有人都攻擊我：「剩係想紅，連人命都唔顧！」 . 「咩狗頭俠啊？分明係狗嚟，話做英雄，都係想攞著數啫。」 . ， 火災發生嗰陣，我的確拍緊廣告，但係，我根本唔知道有火災，如果我知，我一定會去救人㗎。 . 講真，我以前救人，都係四處奔走，睇吓邊度有人救。 . 我都試過，有災禍發生，我遇唔到或者遲咗到，始終我係人，唔係神嘛。 . 但以前從來無人鬧我，點解依加大家好似發現新大陸咁？ . ， 件事愈演愈烈，有人提起往事。 . 我每次救人都盡晒力，但未必救得晒所有人，或者救到人，但送到醫院後不治而亡。 . 嗰啲死者家屬走晒出嚟，譴責我「故意唔救人」、「揀人嚟救」。 . 待續... . #短故 #短篇 #小說 #陳美濤 #廣東話 #粵語 #tomatochan #我嘅職業係都市英雄