啱啱我睇新聞見到新任青年事務委員會主席、華人置業主席劉鳴煒嘅新聞，佢講到青年人房屋問題嘅時候，佢問年青人：「當一個人15000元月薪，如果使盡晒，或者淨返1000元，你願唔願意作出一啲犧牲，睇少啲戲，去少啲日本？」
　
好多朋友仔喺FB鬧劉主席冇腦，其實佢唔係冇腦，佢根本唔使用腦架。你班窮人先要用腦，日日左諗右諗點樣可以買一間比骨灰龕大少少嘅屋仔。
　
好啦，來個冇獎問答環節：
小明一個月賺15000蚊，畀完車錢，飯錢，水電煤，電話費上網費，家用，大學loan，保險，稅，到底佢儲唔儲到任何錢呢？跪求答案。
　
我就重推舊文，講多次我點解想賣腎換首期啦。

《除左賣左個腎，我諗唔到有咩方法做6年野儲到首期…》

陳振彬個「做五六年野，儲首期有朝氣」theory 合唔合理，再討論落去我覺得冇意義。400萬窮人恩物，咩息都唔計，九成按揭，假設個世界冇印花稅律師費裝修費，首期係40萬。

直接D ，我自爆，我大學畢業做左3年半野，應該最少要有廿萬喺手。但「我沒有我沒有沒有...」，窮撚揮手區here，同我一樣做幾年野冇廿萬揮揮手呀？

我諗到我現有最值錢嘅資產就係我個腎，除左賣左一個腎，我諗唔到方法，再做3年野儲到首期。大陸人賣腎買iPhone ，咁賣腎換首期其實相對有大志。
--------------------------------------------------------------------------------------

不如我自己分析返自己點解咁廢...

我有冇輸喺起跑線上？

成日都話開左個靚頭就離成功不遠，我一直都係行為良好嘅細路。小學做班長，中學讀band one ，會考20 分，高考入3大，畢業入「大公司」。我自問有Q 嘜保證，係記錄良好嘅產品。
--------------------------------------------------------------------------------------

你呢D 廢青梗係及時行樂，冇錢剩…

--> 我慳，但又唔係好慳。買旗我最多入兩蚊，心情好都會豪豪地入個五蚊落去。

--> 我有買衫，但我都係類似卡通人物咁，即係大雄咁，咁多集都冇咩換新衫。

--> 我冇不良嗜好，冇食煙吸毒，冇打機買點數，冇買飛甩雞毛。

--> LUNCH 一個星期出去食一兩餐，間唔中會加十蚊，加個酥皮面喺我個午餐A 個湯度。

--> 返工會用廉價化妝品執返好5官。夏天會買支防曬，冬天買盒cream 抿下塊面唔好裂咁囉。

--> 出左double pay 交完稅，會比多少少錢呀媽過年，供埋我份保險之後，又打回完形。

--> 我仲有個家姐，爸爸生日，媽媽生日，爸爸節，媽媽節，過時過節出街食飯，家姐仲會「出手相助」請食飯，令我深深感受到有兄弟姊妹嘅好處。
--------------------------------------------------------------------------------------

你D 80 後係唔捱得？

公司升你就「買樓不是夢」。呀姐叫我OT 冇錢補，我冇「抗命不認命」。發配我去邊彊，叫我返大陸，我冇剪Q 爛張回鄉證。條team十幾人，得我呢粒塵冇master，讀個master 就洗埋我副身家，從新再由零開始儲首期。唔讀冇得升，讀又冇左副身家，呢個矛盾大對決我每日都思考幾次。
--------------------------------------------------------------------------------------

錢搵錢啦你...

平時睇完經濟版，買兩隻股票收息算唔算？「積極D 做功課投資先得架...」，咁返工係唔係要睇住個市？買部發發發股票機係唔係有用？有我買部囉。
--------------------------------------------------------------------------------------

「到底我什麼出錯」

入大學時申請左張「痕身」大學信用卡，迎新禮品係一個鈕計骰，鈕計骰個6個面分別係「痕身」logo，「痕身」logo，車仔，屋仔，老婆仔，BB 仔，即係傳說中嘅「4仔」。

而家我覺得好可笑，我冇行差踏錯，「到底我什麼出錯」，一個「屋仔」玩起我成世。「我係唔係冇鬼用？」，完全唔需要討論，我係呀。但個社會好似好多「無鬼用」，一個星期喺報紙鬧我地廢青個D 人，不如講兩句呀，教下我除左賣腎，點可以「有用」地完成買樓呢個「三峽工程」，我會虛心學習架，教我呀。