［倒轉了沙漏　不見得可改寫春秋］六四7年，香港地產股跑輸，咁乜股跑贏？

TLDR：中資股跑出，行業各有不同，但冇銀行份。而最重要係：你扑中一隻好股，夠你total loss幾隻垃圾股

1. 早幾日，六四，出過個post。7年前now 台玩藏頭詩嘅圖。

2. 朋友就留意返，當年張圖，入面嘅地產股，7年後如何？結果幾隻都係7年後股價仲低過當年，當年渣到而家，仲要輸兩三成。

3. 固然亦因為近期股市唔得，但至少恒指同7年相比都仲有少少升幅。亦即係，呢堆地產股大幅跑輸恒指，更加唔好講同A股美股比。而明明樓價7年升唔少，租金亦係，寫字樓呀商場呀一般租金都仲高過7年前

4. 當年正係「地產霸權」正旺之時，而家見到香港地產股呢幾年de-rate得幾咁緊要。而同時間，而家美團（3690）大過匯控友邦。隻阿里健康（241），就大過長和（1）同長實（1113），好似一度大過隻新地（16）

5. 當中寓意，相當明顯。地產霸權，借來的地方借來的時間，英資走人，中資未夠實力又未識玩，當中就有幾十年畀呢班華資玩。推而廣之，其實東亞（23）利豐（494）等等一樣。

6. 而家時間到，就要起身了。而家文明啲，唔使下下抄家誅九族，有錢萬事可談。甚至錢都可以繼續賺，但地產X大家族以後，當然不可能呼風喚雨了。搞清楚誰是莊誰是閒。正如香港鐵定回歸後（都未使等到97），英資甚麼匯豐渣甸太古，賺錢都仲可以，但政治影響力已經近乎零。

7. 前事講完，都話7年間，恒指其實近乎冇升過，升咗9%咁大把。大起大落最後得個吉。呢個非本文重點。亦提過香港地產股普遍都跌。咁，咩公司係贏家？請睇。

8. 呢張圖，2013嘅六四，至到2020年嘅六四。七年間，表現最好同最差嘅恒指成份股。你發現，指數就冇乜點郁，但入面啲成份股，跌大半嘅又有，升幾倍嘅又有。當然亦有啲係新入恒指，或當年未入，甚至未存在。

9. 先睇最差嘅，中石油（857）。古語有云，問君能有幾多愁，恰似滿倉中石油。7年跌剩三份一。當年A股都有話，願女網友似中石油，越活越年輕，去年48，今年18。而家？返老還童，3蚊都冇。

10. 街邊師奶都知負油價，中石油之類邊有運行（其實唔止呢個原因）。同樣地，排尾五你見到中石化（386），尾三有煤價神華（1088）。其實美股啲能源股都係咁上下。中資嘅，仲有尾二嘅聯通（762），原因不明，唔深究。仲有台資但主要做大陸生意嘅旺旺（151）

11. 但其他嘅，有趣了。首先係匯控（5），人人皆知不用多講。其他呢？唔少都係地產股。包括太古（19），恒隆（101）。仲有重組過嘅九倉同長江。都其實引證返，香港地產霸權，俏俏間已經……落落地幕。當然而家仲有幾斤釘，但亦唔使到全部被踢出成份股先知改朝換代（話時話，太古原本都嗰頭近）。正如東亞國泰之類，好早已經知道金槍不再。

12. 升幅十大呢？勁咯，其實咩公司都有。但差不多全部都係中資。留意，中資本身佔恒指越嚟越多好合理，因為好多都係巨無霸。例如中資銀行本身一上市就入恒指，因為本身市值大，並唔係因為做得好而由細變大打入去。但呢度你睇十大升幅，就真係要表現好先得。見到都仲係中資天下，不過唔係啲內銀內險或國企資源股。

13. 真係唔算中資嘅？創科（669），主要市場係美國，光宗耀祖，舊年先入恒指。另外？都好似冇了。港交所（388）都畀人覺得搵個大陸佬做CEO就係中資公司。放心，下一任CEO會更加大陸佬。

14. 升得最勁嘅，舜宇（2382），2017年尾入恒指。7年升10倍，神話，但大陸公司，手機鏡頭。新埃瘋三隻眼，聽講有幫到生意喎。

15. 第二嘅，人人都識，騰訊（700）。不用多介紹。又即係唔好話當年上市幾蚊你買到咁屈機。但2013年，公司應該都人人識（唔止金融人或投資者），但一樣可以7年7倍，機會總係有。當然事後講就易。但至少當年你質疑話，升咗咁多仲有得升？咁大隻仲有幾多空間？而家咪見到

16. 之後嘅，咩都有，藥股有兩隻。紡織股申州（2313）都有，早兩年先入恒指，但當然係大陸公司。

17. 另外仲有較為多人識嘅平保（2318），吉利（175），碧桂園（2007）。升升跌跌，但7年都升兩倍以上。算係咁。甚麼碧桂園嗰啲，真係上市開始（正係2007！）已經不停話內房爆煲，特別係碧桂園上市冇耐就雷曼爆煲（其實證明時間揀得好好，個市最癲時上市拎到錢，然後08年可以食花生）。

18. 最後都講講，講得太多啲乜乜　買中騰訊升幾多倍嘅故事，都又要講下，事後講就易。當年咪又講到中石油點無敵。你點知你買中嘅係騰訊唔係中油？又真係唔係咁易。

19. 不過the beauty is，我當你2013年六四，兩隻買晒，最勁（實係第二勁）同最廢嘅恒指成份股都畀你買中，咁而家你係賺緊錢定蝕緊錢？唔使計都知啦？我一隻騰訊升7倍，夠填我買錯幾隻垃圾股滔滔loss！呢個先係重點嘛！

20. 如果我冇計錯，當年我買晒呢十隻最佳成份股（五十隻扑十隻），應該1000蚊變4500蚊。但如果我當年買晒最差嗰十隻呢？都不過係1000蚊變520蚊。夾埋呢？2000蚊變5000蚊，喂，唔錯喎！而我講緊同時扑中最好十隻，同最差十隻藍籌，唔係啲咩事後揀隻最勁嗰隻出嚟（＊）。

21. 就當我好黑仔，最差嗰十隻，全部爆晒煲，變零。但我都仲可以2000蚊變4500蚊喎！

22. 見到啦，我揀中最好嘅十隻，夠頂最差嘅十隻有餘仲有好多剩。當然實際上你冇可能揀到最好嘅十隻，但想帶出嘅原理係：一隻好股，夠頂好多隻垃圾。德國股神科斯托蘭尼嘅名言：股票最多只可以跌100%，但可以升100萬甚至100億%。（之後我加嘅）所以長期沽空係必死的，長期做淡友亦係必死。

23. 而我都仲只係講港股，仲要係表現相當唔掂嘅呢個時期。你如果早期買中海外（688）嘅，05年到15年，真係1蚊升到30蚊，夠你同時輸好多垃圾股

24. 所以亦最後一個教訓：真係唔好輕易take profit，畀啲想像力。最慘唔係買垃圾股輸錢，而係買中好股，但賺得嗰幾成就急急腳走。

（＊）其實聰明嘅，會睇到有少少問題：有啲股票，仲要往往係表現最好嘅幾隻，當年根本未係成份股。所以我2013年對住個恒指揀，係唔會揀得中嘅。

———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。

請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。