致UA院線及Marvel的公開信 送復仇者紀念幣 關公災硬 不堪設想 望臨崖勒馬 @ua_cinemas 及 @marvelstudios 香港你好， 鬼哥睇乜戲 一向都抱住輕鬆好玩嘅態度同鬼友們一齊睇好戲，講好戲。實在好少發咁大牢騷。但係因為對Marvel同復仇者聯盟愛之深恨之切，今次來函，就算會影響將來合作機會，都希望你哋聽小鬼講一番肺言。 得悉你哋搞咗個活動。只要手持任何場次嘅《復仇者聯盟4: 終局之戰》IMAX戲飛，就何以喺4月24日開畫日開始，去任何一間UA戲院憑飛換紀念幣，而且換完即止。而換領時間係影院票房嘅開門時間，即係大概早上8點。 鬼哥喺呢度話俾UA同Marvel知，呢鑊一定關公災硬。 先同你計下數。假設去到4月24日開畫日，UA都仲係預售到5月8日。 我大概睇過賣飛情況，每個戲院每日大概上4.5至5.5場，而估計到開畫日每場平均可賣出130張飛。即係話: BEA IMAX @ UA Cine Moko 15日 X 5.5場 X 130人 = 10725人 BEA IMAX @ UA iSQUARE 15日 X 5.5場 X 130人 = 10725人 BEA IMAX @ UA MegaBox 15日 X 4.5場 X 130人 = 8775人 機場UA IMAX 影院 15日 X 4.5場 X 130人 = 8775人 換而言之，去到開畫當日，「已入手IMAX戲飛」嘅觀眾，一共有39000人!!! 鬼哥保守啲估計，呢三萬九人當中，有1/4肯專登喺4月24日開畫日朝早番工之前去UA院線換紀念幣。而我都未提到兩張IMAX戲飛成5舊幾水，唔想蝕底肯去換的觀眾，最後更有可能超過此數。即係話，當日將會有9750人湧去換紀念幣!! 成萬人呀!!!!!!!! 我真係好希望我計錯數。好喇，以UA iSQUARE為例，因為地點方便，鬼哥估計9750人當中會有大概4000人去呢度換紀念幣。而觀眾並唔係蠢的，當中絕大部份人都會喺8點開門之前到場排隊以防落空。朝早5,6點去到的人大有人在。 咁到底UA iSQUARE被獲分配幾多個紀念幣呢? 成萬人番工前專登早幾粒鐘嚟排隊，但係唔知最尾有定冇，亦唔知趕唔趕得切番工。等咗幾個鐘，換唔換到都好，到時一定必定鼓燥，一定大混亂。 要留意，有又死冇又死。 冇嘅，專登搭車出到嚟，又焗又多人排咗兩三粒鐘，竟然空手而回!你話爆唔爆嬲!?就算有截龍機制，唔少影迷都係搭晒長途車趕出嚟，去到你話已經截咗龍，仲衰! 假設真係淨係UA iSQUARE都夠4,5千個紀念幣派咧~ 一樣死。假設7:30去到，前面有2000人，而我番工番9點。咁我等唔等呢??? 90分鐘要處理2000人，你可以2.7秒處理到一位換領嗎? UA院線同Marvel呢次嘅合作，出事機會極高。四間戲院到時混亂嘅情況真係不堪設想。鬼哥唔肯定佢哋有冇考慮到以上風險，定係其實雙方都想利用真心愛復仇者聯盟觀嘅眾製造萬人空巷嘅效果呢? 唔會嘅~~~鬼哥點都唔信佢哋咁大間公司會咁黑心，為咗嗌口，為咗製造虛假氣勢，整蠱兼犧牲啲捧場客。 其實只要肯花多啲時間同心機，要觀眾憑票尾上網填表抽獎，連個人資料都唔洗填。只要遞交每張戲飛都有嘅獨立號碼，抽中咗就可以輕鬆慢慢憑票領獎。 鬼哥在此奉勸UA院線及Marvel，盡快臨崖勒馬，改變此項活動的換領方法。如果方法改得方便，真心為影迷著想，小鬼定必再發文力讚! 祝好運。 P.S. 唔想瀨嘢嘅復仇者迷，不妨多多分享，希望佢哋三思 另利申:冇買IMAX戲票 申延閱讀:復仇者聯盟：終局之戰 2億票房的雄心詭計 超越阿凡達 直搗香港史上No.1寶座 https://www.facebook.com/BroGhostMovie/posts/644026009365159 #復仇者聯盟 #終局之戰 #Marvel #Avengers #EndGame #UA #戲院

華麗制霸 打得爽皮 CG豪大大 以真人同CG動畫融合嘅電影嚟講，水行俠可以話係繼阿凡達之後，畫面做得最出色嘅作品。 DC今次透過水行俠話俾大家知呢鋪真係all or nothing，製作就是最豪最大最勁！電影中幾乎每個場景都有夠華麗壯闊，顏色運用斑爛兼大膽。尤其wide shot每個都靚到絕，一幕幕令觀眾屏息靜氣，充滿層次感立體感；全片風格統一得嚟，個別場次畫面都擁有自己嘅個性，充份配合劇情發展同埋箇中人物當時嘅心路歷程。 鉅就滿分啦，但係細亦無遺。水底世界嘅細緻度冇因為大wide shot或者因為三兩秒嘅過鏡鏡頭而妥協；一草一魚一絲不苟，畫面豐富到不行。鬼哥最欣賞嘅係電影中七個王國，大可慳番預算，透過分鏡呈現一兩個就算Q數。點知導演差唔多做晒出嚟，而且每個王國設計獨特有型，無論衣著外形、武器、坐騎等，都反映出唔同國度嘅背景同文明。 動畫製作組絕對有權提名奧斯卡最佳視覺效果同埋最佳藝術指導。 雞蛋裡挑一條骨頭: 頭段CG角色減齡特技有啲啲突兀，美圖美肌效果稍為影響投入感。以至重要嘅第一章，因此扣咗少少分數。 劇情方面中規中矩，攝政造王兄弟相殘，都不過係搵藉口開大片打個痛快。中段來來去去，各懷鬼胎玩拉攏嘅謀略戲軌古板平凡，搞到各個國王都流流地，張力力度難免不足。不過動作場面又真係好精彩，近年荷里活斷剪式打鬥嘅陋習喺水行俠並冇重犯；幾場武術設計有心機，連貫兼痛快。鬼哥入場前最擔心，咦喂海底開片，會唔會變成深海烏鴉大戰墨魚?點知完全冇問題。所有動作場面都亮麗清晰，爽到爆炸。 三位主要男角可能係本片較弱嘅一環。Jason Momoa大隻有型雙眼殺死人係堅，但係演技出現樽頸位，內心戲演得麻麻。不過選角實在太強，佢做番自己已經搞_掂食碗麵。大魔王哥哥角色平面乏味，外型亦老土欠霸氣。至於黑蝠鱝Black Manta，搞了大半天，原來蛇頭又蛇尾，流嘅。喺七國咁亂嘅大戰入面，黑蝠鱝就只有淪為一隻大少少嘅卒仔。 鬼哥提提你: DC漫畫電影都可以孕育出有深度有層次嘅角色。大家記得神級演員Heath Ledger的小丑嗎? 整體嚟講，水行俠劇情平穩，角色深度不足。不過淨係睇超豪華麗畫面同埋刺激爽快嘅動作場面，已經值得入場。建議鬼友們睇IMAX 3D，俾多幾十蚊都值。 鬼哥俾74分 --- 2018聖誕檔大片懶人包! 假期上映中電影逐部揀 https://www.facebook.com/BroGhostMovie/videos/1045727215607308 #水行俠 #Aquaman #JasonMomoa #DC #dccomics