我嘅職業係：陰媒（下） . 有無可能有咁多後生女暴斃，仲咁啱送晒嚟阿林負責嘅公共殮房？ . 我細思極恐，我開始跟蹤阿林，但無咩結果，阿林生活幾正常，得閒仲會去做義工。 . 於是，我故意向阿林提出要求，話有客人要買濕貨。 . 嗰晚，我就見到阿林將一個女仔，帶入殮房。 . 我偷偷爬窗入去，我就見到阿林拎住枕頭，捂住個女仔嘅口鼻。 . 我大叫：「停手！」 . ， 阿林嚇一跳，掉低枕頭。 . 「原來你咁多濕貨，都係靠殺人賣屍，你做埋呢啲陰質嘢？」 我捉住個女仔隻手：「小姐唔駛驚，我帶你去報警。」 . 個女仔用一種好迷茫嘅眼神望住我：「警？警警？」 . 阿林回過神來，從櫃桶拎出兩粒瑞士糖，微笑住講：「唔要警警，要糖糖。」 . 女仔好興奮咁接過瑞士糖：「要糖糖！」 . ， 我個心一涼，個女仔明顯智力有問題，佢根本唔理解啱啱發生咩事，可能仲以為阿林同佢玩。 . 就算個女仔講得出，喺無物證嘅情況下，佢嘅證供都好難被採信。 . 所以，阿林先會揀弱智人士落手，仲特登去做義工接近佢哋。 . 我忍唔住問：「弱智你都搞，你仲有無人性？」 . 阿林冷笑：「佢咁嘅情況，正常都嫁唔出啦，對個社會都唔會有貢獻。我幫佢搵個......好歸宿，唔好咩？」 . ， 我直接帶走個女仔，無再同阿林辯論，阿林已經無晒人性。 . 我之前接手嘅女仔，都可能係阿林殺嘅，即係我變相做咗幫凶，我好愧疚。 . 事到如今，只有將阿林繩之以法，先可以彌補我嘅過失。 . 雖然呢次無證據，但阿林之前殺咗咁多人，只要法醫驗屍，應該可以搵到阿林殺人嘅痕跡。 . ， 我聯絡楊生，同佢講呢件事。 . 楊生輕描淡寫咁答：「哦，我個新抱生前嘅事，我就唔干涉啦。」 . 我解釋：「佢係被謀殺㗎！我哋要起番條屍出嚟，搵法醫驗屍，先可以捉到凶手......」 . 楊生打斷我嘅說話：「我新抱已經同我個仔合葬，你想掘我個仔嘅墳，擾佢安寧？無可能。」 . ， 我搵咗好多個買家，無人同意我掘墳。 . 佢哋話我「打擾死者嘅安寧」、「破壞祖墳嘅風水」、「毀壞新抱嘅清白」（因為驗屍要除衫）。 . 我有諗過偷屍，但由於冥婚嘅需求太大，有過唔少掘墓偷女屍去賣嘅案例，所以墓地守衛都幾森嚴。 . 我都有諗過報警，但我喺阿林度接手屍體嘅時候，完全唔知啲女仔係咩身份。 . 唔通我同警察講，有個唔知叫咩名嘅女仔被殺，要掘人哋個墳嚟驗屍？警察點會睬我。 . ， 阿林當然無再同我合作，聽講佢搬咗去第個城市。 . 幾年後，我睇到阿林被拘捕嘅新聞。 . 原來阿林搬走後，依然賣屍賺錢，仲愈嚟愈猖狂。 . 佢會約妓女上門，亦經常去鄉下地方，話幫女仔做媒，畀少少禮金，就將女仔帶走。 . 殺得人多，天網恢恢，疏而不漏。 . ， 不過，我依然好愧疚，如果唔係我做陰媒，可能阿林就唔會行上呢條路。 . 我想改變呢個習俗，我開始同人講，冥婚嘅壞處。 . 但無人睬我，呢種「在天有靈、成家立室」嘅思想，喺呢個地方傳承咗一千年，我無辦法喺短時間內，令大家都變得唔迷信。 . ， 我諗咗好耐，既然我唔可以改變冥婚嘅習俗，我決定推廣我嫲嫲時代嘅冥婚儀式。 . 當有客話要冥婚，我就會講：「一定要做足三書六禮，新人先可以喺下面結合㗎。如果唔係，閻羅王點知佢哋係一對呢？」 . 或者講：「如果唔做足禮儀，就咁合葬。佢哋在天之靈會有不滿，分分鐘厲鬼纏身。」 . 要令迷信嘅人，變得唔迷信，好難； . 要令迷信嘅人，變得更迷信，就容易好多。 . ， 要做足冥婚儀式，一定要同對方嘅家人溝通，唔可以隨便搵條屍合葬。 . 咁樣一來，死者嘅身份背景死因都一清二楚。 . 雖然唔可以100%杜絕殺人，但至少唔會再有阿林咁樣嘅人，放膽殺人賣屍。 . ， 我討厭繁文縟節，點會諗到，我會重新推廣冥婚嘅禮節。 . 就好似我做陰媒，只係想賺錢，點估到會令阿林變成殺人犯。 . 事情嘅發展，同初衷往往都唔一樣， . 或者，每一個壞人，都曾經以為，自己會做一世好人。 . ， 註：為冥婚殺人一事，改編自「陝西山西冥婚風俗誘發殺人賣屍案」 . －完－ . #短故 #短篇 #小說 #陳美濤 #廣東話 #粵語 #tomatochan #我嘅職業係陰媒

讓梨一百次（下） . 第三次，我一手捉起大梨，迅雷不及掩耳間，就將個梨塞畀細佬。 . 細佬可能以為我同佢玩，靈巧咁閃開，但我已經放咗手，個梨就撞落佢幼小嘅身軀上。 . 阿媽大叫：「你做咩用梨擲細佬啊？」所有人都用譴責嘅眼神望住我。 . 雪上加霜嘅係，細佬拎起碟上嘅另一個梨：「哥哥想食梨梨？食呢個。」 . 我欲哭無淚。 . ， 我發現，掂到個梨之後，會產生太多變數。 . 所以第四次，趁阿媽拎碟梨出嚟，仲未行到檯邊，我就大叫：「細佬，一陣畀你食最甜嘅梨梨。」 . 我先下手為強，然後再拎起大梨，正想遞畀細佬， 點知細佬跑去阿爺身邊，攬住阿爺隻腳：「畀爺爺！」 . 阿爺好慈愛咁摸吓細佬個頭，大家紛紛讚佢乖。 . 喂，「孔融讓梨」唔係讓畀兄弟㗎咩？讓畀阿爺都得？ . ， 第五次，我跟住細佬嘅做法去做， 第六次、第七次......我諗我食咗一百次梨，無論點做都好，俾大家讚嗰個，永遠都係我細佬。 . 我改變唔到過去，亦改變唔到現在。 . 我開始意識到，「讓梨」只係一條導火線，無論有無呢件事，父母都係鍾意細佬多過我。 . 就好似愛情一樣，一切早已注定，如果唔屬於你嘅，付出再多都係徒勞無功。 . ， 於是我唔再穿越，好好哋過生活，都過得唔差。 . 但係偶爾喺電視上見到我細佬，佢係公司主席，人人都讚佢點樣經營得風生水起， 仲有大把囡囡話佢「package好」，我都有少少忿忿不平。 . ， 好多年後，我死咗。 . 去到地府，做完手續之後，閻羅王問：「你有無嘢要問，無就下一個。」 . 我即刻舉手：「我想問，點解我無論穿越幾多次，嗰日都係我去食嗰個梨？」 . 「穿越食梨？」閻羅王呆一呆。 . 我正想解釋事情嘅始末，閻羅王一拍手掌：「我識你，嗰陣地府有件寶貝，可以回到過去嘅，流落咗去凡間。」 . ， 「我幾擔心，有人用寶貝興風作浪，擾亂人間嘅秩序，但係一時半刻又無方法收番。」 . 閻羅王好高興咁望住我：「點知，我聽手下報告，你只係時光穿越番去八歲嗰陣，不斷食梨，真係心思純樸。」 . 呢啲就係傳說中嘅「以訛傳訛」？我咁努力想讓梨，鬼差就覺得我只係去食梨？ . 但係見到閻羅王對我咁讚賞，我又唔敢講個真相出嚟。 . ， 閻羅王十分好奇咁問：「你八歲嗰陣，嗰個梨係咪超好食？好食你念念不忘，特登穿越番去食。」 . 我真係唔知點答好。 . 「要你憑空形容，又真係唔容易嘅。」 閻羅王靈機一觸：「我就將地府嘅果園交畀你，你多啲試味，務求搵到......嗰種超好味嘅梨啦。」 . ， 於是，我搖身一變，變成地府果園嘅總管，手下有過萬隻鬼，古今中外都有。 . 我大手一揮，手下嘅鬼就會將最大最靚嘅梨，洗乾淨放喺我面前。 . 我終於唔駛再讓梨，有手下有地位，比我細佬喺人間更加威風。 . 但係午夜夢迴，我有時都會諗，其實，我唔係咁鍾意食梨，我真正想要嘅，係父母嘅認同。 . ， 你好執著想爭取嘅嘢，可能得唔到； . 但退後一步，無心插柳，或者有更好嘅嘢等緊你。 . 只不過，更好嘅嘢，未必係你想要嘅嘢。 . －完－ . #短故 #短篇 #小說 #陳美濤 #廣東話 #粵語 #tomatochan #讓梨一百次

你沒有好結果（下） . 只要我堅持落去，終有一日，我會見到萍姐得到報應！ . 呢個信念，令我有咗生存嘅欲望。 . 出院後，我唔止無同班舊同學疏遠，仲主動去接觸佢地。 . 當然，萍姐對我有戒心，我都無可能埋到佢身。 . 我只係想同啲同學混熟，第日萍姐有報應，我都可以收到消息。 . ， 我等啊等，一年又一年，我聽人講，萍姐去咗外國讀書，仲考到間好好嘅大學。 . 唔緊要，成績唔代表未來，不是不報，時辰未到。 . 萍姐番咗嚟做嘢，搵到份超級筍工，又高人工又輕鬆。 . 唔緊要，有錢都未必會快樂，不是不報，時辰未到。 . ， 萍姐識咗個靚仔富二代，結婚嗰陣，有請晒啲舊同學，包括我。 . 佢戴住名貴鑽飾，居高臨下咁望住坐輪椅嘅我，臉上掛住虛偽嘅笑容：「當年同你玩吓，點知玩出禍，依加諗番都覺得唔好意思。」 . 嗰一刻，我直情想撕爛佢塊臉，但我連企起身嘅能力都無。 . 我同自己講，嫁入豪門都未必會幸福，佢一定會淒慘收場， . 不是不報，時辰未到！ . ， 我一直留意住萍姐，我知道佢生咗一對仔女，而佢個有錢老公，就出名愛妻，從來無沾染任何緋聞。 . 到佢個孫出世、結婚，報紙上嘅萍姐年老而優雅，拖住老公隻手，笑容幸福。 . 一直鬱鬱寡歡嘅我，終於吐出一口鮮血，激死咗。 . 變咗鬼魂之後，我同自己講，話唔定我死咗之後，萍姐兒孫不孝，令佢老來晚景淒涼呢。 . ， 去到地府，閻羅王問我有咩心願，我話我想睇吓萍姐嘅下場。 . 閻羅王拎出一部iPad，播放萍姐嘅幸福生活，佢一直活到九十歲，同老公喺睡夢中雙雙死去，連喪禮都隆重而榮耀。 . 「點解會咁？佢嘅報應呢？」 我怒火中燒，指住閻羅王問：「又話善惡到頭終有報？你知唔知當年佢點樣蝦我？」 . 「你講呢一段嘛。」閻羅王撳一撳iPad， 畫面變成萍姐撳我個頭落廁所嗰一幕：「所有嘅行為，地府都有記錄，並會給予適當嘅報應，善惡有報。」 . ， 見我仲係唔明，閻王解釋：「你嘅仇人上一世係神醫，一世幫人義診，今世會享盡榮華，事事如意。」 . 「嗰個賤人會救人？」我完全唔信。 . 「飲咗孟婆湯，人嘅性格每一世都會唔同㗎嘛。」 . 我又問：「萍姐咁樣虐待我，呢份『惡』都要報，佢下一世會受好多苦？」 . 閻羅王翻查記錄：「佢上一世解決咗瘟疫，救人無數，會有三生三世嘅榮華富貴。」 . ， 「咁我嗰份呢？我剩係想知佢幾時有報應！」我就嚟發癲。 . 「報應，唔係『今日做壞事，聽日會跌親』咁簡單。」 閻羅王解釋：「舉個例，萍姐欺凌你，但佢前世積福，呢件壞事要到三世之後，先有報應，你根本見唔到。 或者佢今世幫過人，善惡相抵，『欺凌你』呢件事就唔使報應。」 . 「我無咗一隻腳，差啲連命都無埋......」咁樣公平咩？ . 「留意番，佢只係欺凌你，係你自己揀自殺。就算以人間界嘅法律，都唔可以告佢謀殺。」 閻羅王嘆氣：「你當然覺得佢十惡不赦，但佢可能之後對其他人好，整體都係一個好人。」 . ， 我一生嘅信念，就咁崩潰咗，我大喊：「咁我呢一世究竟有咩意義？」 . 「其實可以有好多意義。」閻羅王再撳吓部iPad，畫面嘅主角係我。 . 嗰個「我」一樣係被人欺凌，跳樓斷腳， 但「我」出院之後，無再執著於萍姐嘅事，而係努力讀書，做咗勵志作家，到處演講，教人珍惜生命、面對困境。 . 有人笑「我」虛偽，但更多人受到感動，生命從此有咗改變。 . 「我」一生都過得好幸福，喪禮雖然唔豪華，但世界各地都有人自發嚟送殯，真心懷念我。 . 「呢個係另一個平行時空嘅你，同樣嘅遭遇，但你有好多可能，只係你揀咗依加呢條路。」閻羅王熄咗部iPad。 . ， 善有善報，惡有惡報， 但做咗咩事，得到咩報應，都係上天嘅計算，凡人根本無法想像。 . 不是不報，時辰未到， . 就算時辰到，你都睇唔到。 . －完－ . #短故 #短篇 #小說 #陳美濤 #廣東話 #粵語 #tomatochan #你沒有好結果