【龔成問答信箱】（Q21121-Q21140）

Q21121：

老師，我上了四堂也明白你講解的，但返到屋企總有點記不起。再睇筆記時又好像似曾講，但印象不深，要多看幾次。

點樣可以加快學習？

龔成老師：

你最好落堂後或第二日，立刻溫習一次，因為這刻記憶最好，你可以好有效將所學的知識整理。

當一直溫書時，就要同時用筆計數、寫重點等，不斷這樣溫習，到明白後，就要應用，在市場上找一些股票，做分析，這樣會有更大的進步。

保持溫書、做功課、實戰分析企業。

------------------------------------------------

Q21122：

hello
龔sir
我想問

3738
2013

現價可以入嗎？

龔成老師︰

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這次中期虧損大部份來自"可換股債券的公平值變動"，簡單咁講，唔係佢業務上出左大問題。

長遠業務上係有一定潛力，但盈利和股價上佢都幾波動。你現時投資係可以，但同樣只可以小注。

------------------------------------------------

Q21123：

龔成老師，您好!本人四十多歲，最近半年才開始接觸股票，也開始閱讀關於您的書籍，現有兩隻股票想
問您的意見!

近排見股價回落了，以26.35入咗兩手175吉利汽車及以237.3入咗兩手9988阿里爸爸，但係買入

之後股價一真跌，尤其吉利越跌越多，而阿里爸爸也好像沒有回升反彈的勢，本人有留意你提

及過這兩隻股票都係有質素及適合長期持有的，但以我的買入價，請問我是否應該止蝕定還是，可以長期持有呢？

望請教，謝謝!

龔成老師︰

先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

阿里(9988)和吉利(0175)都有質素，只是你買入價略貴，現在股價只是回調至較合理水平。

佢地發展潛力係有，你照長線持有就可以。

------------------------------------------------

Q21124：

老師你好！睇完你書中介紹，我想問下有關788前景：

1. 上網見到有人分析話因為三大電訊商係中國鐵塔大股東，令到鐵塔公司失去議價能力

三大為左降低成本，佢地都會傾向維持支付低租金，呢個現象會否令塔類/室分業務收益增長有限？

2. 根據在2020年報，跨行業業務及新能源經營業務增長比較強勁，請問呢兩類業務發展空間是否很大，有無望發展成為其中一個收益主力？

3. Starlink開始進入試用階段，如未來幾年後發展完善，會否直接影響鐵塔收入？

我天真咁諗中國未必會比呢項技術用係中國......中國境內現有網絡用家比較細機會投入較大資金
使用類似starlink 既服務。

謝謝。現在平均價在1.22

龔成老師︰

1) 有機會，但畢竟佢有壟斷優勢。中國的3大電訊巨頭作為大股東，令到佢可以更受惠於5G發展，整體前景仍然正面。

因此，佢會賺到合理而不過多的利潤，投資價值有，但不是高增長類。

2) 這2個部份，的確有發展空間，不過見佢之前的數務數據，暫時比例唔算好大。但現時佢地佔集團收入好少，中短期內相信變成主力機會唔大。

3) 這個新技術會否在中國應用，中國本身會否發展這技術，暫時無人預計到。

其實這刻仍充滿未知數，根本好難話成唔成功。另外，中國鐵塔的母公司係中國的電訊，最終控股是中國政府，以這個角度分析，中國政府應該唔會比外資對中國的電訊行業有核心性的影響。

但此刻，中國鐵塔(0788)在整體條件上，依然係有投資價值。不過，潛力度比過往略減。如這刻買入，分注入係可以的。

------------------------------------------------

Q21125：

老師你好！多謝你無私力推比亞迪，令我同先生資產增值咗三倍！雖然數目都唔係多，但我哋早年唔多儲錢，
而家已經係一個好開始。

我32 歲，先生35 歲，有一個bb，自住未補地價公屋（家人名）

1. 我和先生有現金$170000，合計家庭收入$40000，扣除供養兩邊父母、工人人工、日常開支，每月只餘下$10000，現儲$5000，月供股票$5000，比例合適嗎？

2. 先生為自僱人士沒有公司保險，三人保險合計約$45000 一年，會否太多？

3. 現只有2800（ 3788股 $26@ ）及 1211 （527股 $44@）如果以一百萬為目標，應該再月供2800
還是3067？還是其他股？以我哋情況可再月供潛力股嗎？

4. 手上有約$150000 結婚金器，先保留還是換成現金再分段購入股票？

5. 長輩還有另一間自住的公屋，現在$1300 租金，售價為60 萬，三十年樓齡，應該買還是儲錢買私樓？

謝謝老師！

龔成老師︰

比亞迪（1211）有質素的，你可長線，一直持有就得，我都仍然持有。

1) 大市現在合理水平，這月供比例正確。

2) 算差不多，大前提係只需要買基本保障，儲蓄/增值成份係唔需要。

3) 你可以一半供盈富，一半供3067，已經是一個平衡組合，當然，同時要加上其他股作配置，以你年紀應用"平穏增長股"和"潛力股"作為組合，大約各一半。你先用每月5成儲蓄做月供，其餘先儲起，用一邊月供一邊儲蓄的策略。

現時大市只是合理區，你現有17萬和每月所儲倒的資金，就等大市出現一定程度的下跌，才大力度掃貨，然後長線投資。

以恆指過去年平均回報10%計(連股息再投資)，你每月投資$10000 + 35萬資產(現金+持股)，5年後大約會增值至120萬，故這樣安排相信很大機會達至5年100萬的目標。

4) 黃金主要係用來對沖突發性金融事件，佢唔會產生現金流，所以佔組合3%就好了。但由於係"結婚金器"，除了本身黃金價值外，也會其他額外意義，故你可以自行衡量。

5) 如果本身資金不多，買該公屋是一個不差的選擇。但如果你長遠用「投資」角度，其實可先用股票增值，再另覓私樓會都可考慮。

------------------------------------------------

Q21126：

Sir..一直都根據你的價值投資宗旨 慢慢吸納建立了一個組合 當中新舊經濟都有

但近期大市回調不少 希望你給點意見 看看其中有哪些該繼續持有哪些該放出..謝謝

6 電能實業
12 恒基
14 希慎
16 新地
293 國泰

688 中國海外
823 領展
880 澳博
883 中海油
1211 比亞迪
1299 友邦
1810 小米
1928 金沙

1997 九置
2018 瑞聲
2845 中國電車
6993 藍月亮
8069 縱橫遊
9618 京東
9988 阿里爸爸
9999 網易

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

而我地投資股時，會因應人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

你現時組合太雜亂，要維持10隻以內，會較易管理。

先講質素上，國泰(0293)、縱橫遊控股(8069)投資價值一般，建議你慢慢換至其他優質股。

縱橫遊控股（8069）風險較高。

業務非常波動，過往持續出理虧損，其實投資價值不高，因為佢就算疫情之前，都是虧損的。所以本身質素已唔高。

中海油(0883)質素較中等，而網易(9999-S)有一定波動性，2隻都不宜持有太多。

其餘股票都可以，他們都有增長力，若你係年青至中年人士，係合適。當中電能(0006)主要係收息，增長力會較弱。

最後，就是要留意唔好太集中單一行/企業，相同行業不可佔組合多於3成，而單一企業不要高過15%，否則會有過度集中風險。

我見你名單中有不少地產股，你要留意翻有無這個問題。

------------------------------------------------

Q21127：

現時我持有現金$150萬，到明年，可儲多$20萬。保險$108萬，未來三年需要供$44萬，強積金$52萬。

股票~$100萬，整體蝕緊。跌市前買入175，1211，981，3800。去年買2018，1787。~6年前一直持有

941，992，2628。去年不貪心，赚10幾%就賣左幾萬股992，真後悔! 赚少起碼20萬! 941，500股 $116買，
2628 ，6000股~$31

以现時持有以上組合，怎样部署可穩建每月~$ 12000 -15000收入?

債券利息低，年金，回報也不高，頭7年，不能取回供款。

是否將部分現金，投資收息股? 因現金不能增值
股票組合方面，可長線持有嗎?
謝謝回覆!

看了你的書"80後百萬富翁"，你寫的概念，同我以前看過医生謝其燊寫的"心想事成

秘笈'很相似! 要有正面樂觀態度，利用潛意識等等

龔成老師︰

如果你希望每月有1.5萬蚊現金流，以股息率5%計，你需要本金360萬。

現時你可以先用一些有增長力，股去累積這筆錢，之後再換成收息資產(如收息股、年金等)，咁就可以。

你現時保險類其實有點多，原本持有無問題，但之後就唔需要加得太多，可以將資金集中增值方面。

你現時持股，大體上都可以。但山東黃金（1787）、中芯國際（0981）、保利協鑫能源(3800)和中國人壽(2628)質素中等，但唔建議持有太多。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

大市現處於合理水平，那150萬現金，你可以用多30-40萬，以"分注"形式慢慢入貨。餘下部份和每月儲蓄，就等大跌市機會出現，才大力度掃貨，並長線投資。

------------------------------------------------

Q21128：

龔成老師你好，我之前上過你初階班，獲益良多，尤其是宜家大跌市，所有股票都坐艇，但我相信長期持有優質股，就可以度過中短期波動，多謝老師成日係fb 幫我地調整心態。

我呢問老師：

我今年35歲，手頭上有450萬cash, 係預備2022 年8月比柏傲莊首期，呢1年半可以為呢筆

錢做資產增值嗎？放係銀行蝕通脹好浪費，應該如果分配？感謝老師！

龔成老師︰

無錯，只要係優質股，就唔洗理中短期波動，一直持有就可以。

至於買樓資金方面，由於時間太短，最多只可以用部份資金，投資收息股收下息。

但你要明白，就算係收息股，都會有價值波動，有機會得不償失。以下收息股，會相對較穏陣，現價計都有5%、6%的股息率。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)。

你最多只可以用一半資金，慢慢分注入儲貨。餘下一半，就最多做定期好了。到動用前半年，就慢慢分注沽出，咁就可以。

------------------------------------------------

Q21129：

龔成老師你好呀，我已經退休沒收入了，之前80元買左好多5號仔

而家想轉去內銀股加中移動好唔好，現價轉是否合理?，請老師指教，

龔成老師︰

退休人士，應以收息資產為主。你投資好似匯控(0005)這樣收息股，透過佢架股息，為你退休生活提供穏定現金流，係可以的。

但問題是，我地唔可以過份集中係個別行業或企業。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

匯控(0005)你可以維持持有，但要將部份分到其他股票。

目標是5%、6%的股息率的收息股，例如港燈（2638）、深高速（0548）、香港電訊（6823）、中移動(0941)、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

這些收息股現價合理，現時換碼係可以。

------------------------------------------------

Q21130：

老師，我36歲，已婚，未有小朋友 ，每月可儲$10000，最近才開始月供3067，每月5000

有100000應急，手上有2013，4000股，$18.5，有3319，1000，$33.5，有857，10000，$7.2，可以5年後有100萬嗎？

睇了你的書，發生自己儲蓄有甘大問題

龔成老師︰

你現要時每月5成儲蓄做月供，其餘先儲起，用一邊月供一邊儲蓄的策略，係正確的。

但選股上，唔可以完全去晒安碩恒生科技(3067)這類潛力股身上。佢地雖然有增長潛力，但同時波動風險都唔細，故不宜持有太多。

未來，你可以將一半每月資金，放係平穏增長股上面，令組合更平衡。

至於持股方面，中石油(0857)都算有質素，但這始終是商品企業，產品沒有差異性。質素只屬中等，不宜大注。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平。同樣組合上，不宜持有過多。

現時大市只在合理區，餘下資金就等機會，若出現大跌市，你就可以大力入市。

我用翻恆指年度平均回報10%計(連股息再投資)，你每月投資$10000 + 資產約23萬(持股和現金)，5年後大約會增值至110萬，故這樣安排相信很大機會達至你的財務目標。

------------------------------------------------

Q21131：

愚昧一問
什麼是新／舊經濟股？

龔成老師：

新經濟股就是較為新興的經濟類別，例如科網類，美團（3690）這類新興的外賣模式，你會見到結合了一些新科技。

同時，現時好多科網的企業，應用了較新的科技，都可以稱為新經濟股。

至於舊經濟，就是傳統的經濟類別，例如地產、傳統零售、傳統餐飲就是這類。

------------------------------------------------

Q21132：

另外，我媽66歲，持2400股HSBC，約＄80買入
4000股1766，約＄8買入

400000股261，幾年前唔知幾錢買入，去年開始我幫佢沽極都沽唔到

我幫佢買左：
500股2800, ＄28.5買入
2000股83，＄13.1買入

龔成老師：

匯豐（0005）是收息股，其實都適合你媽，只是買入價貴，要耐心持有，同時唔建議太多，但其實都可以守，不過就唔好對股票有太大期望。

ＧＢＡ集團（0261）主要從事物業發展及金融業務，生意持續下跌，年年虧損，投資價值很低。

如果真的要賣，可以打去銀行，佢地可以有方法同你掛牌。

至於其他股票，其實可以持有，都有質素的。

------------------------------------------------

Q21133：

阿sir你好！琴日上完堂今日瞓醒覺時突然諗到一個問題

早幾個月啲新科技股就係市場熱炒狀態
依家開始見到依啲股慢慢跌返，同埋都會見到好多人話走貨

我明白依家雖然跌緊但都仲係偏貴，要學埋點樣估值先可以決定佢平貴，但想問下去到咩情況你先會覺得係買入嘅時機？

早幾個月個個衝去買嘅人依家都開始驚算唔算係一個開始？唔該晒阿sir

龔成老師：

首先要睇質素，唔好盲目去投資，另外要睇自己的財富配置及現金情況，如果你本身的年齡要投資水桶1類的股票，而你完全無這類，就可以以月供或分注的模式，去慢慢買入。

當然，要同時考慮佢的平貴情況，但有時就算少少貴，如果你無貨，月供都得。

現時部分水桶1類股，開始去翻合理區頂，其實可以考慮加翻。

其實，你話「早幾個月個個衝去買嘅人依家都開始驚算唔算係一個開始」，只要我地明白當時唔平，就算想入貨，都一定會控制注碼，同時只會慢慢分注。

------------------------------------------------

Q21134：

老師想請教一下如果平衡及重整到現有股票，原持有:

(00001) 1 手 73.95
(00005) 1手 63.4
(00788) 22手 1.721
(01177) 5手 9.92

最近慢慢草貨，新加入了:

(01810) 3手 25.079
(02382) 1手 170.283
(03319) 2手 31.494
(09988) 1手 223.547

原持有蝕得較嚴重，新加入了一些股票後好左少少，想請教如日後打算繼續增持新加入的股票

另打算再加入(03067)及 (01448)，此組合是否可以，(03067)$16.5或以下是否可以吸納?

至於原持有的股票打算不理，如升反去買入價再處理是否OK? 還是有更好的處理方法，可短期內改善到組合呢? 希望老師可以給我一些建議，謝謝!

龔成老師：

原本持有的，其實都是有質素的，只要你不是持有過多就得，不過不少買入價都唔平，因此之後要做好估值方面的功夫。

暫時可以守住先。

至於現時持有的股是否上翻買入價先處理，其實我地最重要不是睇買入價，最重要睇質素、組合比例。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

至於新加的，方向正確，可以平衡翻你整個組合。因此現時組合基本是無問題的。

而你加入了較有潛力的股票，只要你年齡不過大，就無問題。

另外的恆生科指etf（3067）、福壽園（1448），你都可以考慮，但就要留意現價唔算平，要注意風險，同時等有回落先考慮就更好。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21135：

你好, 老師
目前我持有

1810 1000股 @18.52
175 1000股 @23.6
9633 800股@56.45

6993 500股@15.28
9618 200股@324.7
823 100股@63.35
700 100股@604

由早前全數有盈利到目前虧損逐漸擴大

本人理解新科技股估值高,股價波動, 我都做到唔理短期升跌, 不過我女友知我買估票, 之前賺緊, 最近知我賺轉蝕好有意見, 開始令我感受壓力

我除咗等回升仲可以如何操作?謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

我見你持貨不是無質素，其實都可以持有，但市場可以好波動，你要平常心，別人的說話你唔需要太理會，最重要是方向正確。

------------------------------------------------

Q21136：

老師，多謝你花時間俾意見我
雖然我地素未謀面

而家我好努力咁搞網站，影靚相，希望可以宣傳得好啲。發覺自己真係好門外漢，所以都有上網睇下人講解點搞網店～

而家返工真係好攰，不過都想努力做好佢，工作如果有得忙裡偷閒，我都係搞緊網店。每日都好忙，好充實，時間真係過得好快，希望快啲可以儲到第一個一百萬。

老師，早排科技股熱嘅時候，我入咗啲小米、3067安碩，同埋第一次抽股，抽咗一手09888百度，又咁啱俾我抽到，但面家係咁跌，我係想長線投資，但見三隻股最近都升唔返去平均買入價，有啲啲不安。

以下是平均買入價：
09888 @$252 50股
1810@$27.86 1000股
3067@$22.023 1200股
0066@$39.0 1000股
2388@$21.45 1500股
2800@$26.26 2000股

請問我的組合還可以嗎？

安碩3067同百度，令我比較擔心，因為一買咗就係咁跌，上唔返去。

而小米知佢有潛力，但要啲時間增長，所以都唔係太擔心。

老師，如果我下次再入貨，應該用咩策略好？
多謝你

龔成老師：

你加油，我過往都是一邊打工，一邊並行發展其他事業，雖然當時會較為辛苦，但你一定會有回報的，加油！只要有第一個$100萬，之後就會好快有第2、3個。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

之前有少少貴，但只要你貨不過多，可以守。

至於你組合，無問題的，你耐心持有就得，唔好太著重短期股價。

但我見你之前所入的新經濟股，都有少少貴，所以你可能在掌握平貴度仍要進步，建議你可以之後，用慢慢分注或月供策略，現時新經濟股大多在合理區頂至略貴，如投資，要慢慢分注，同時留現金。

------------------------------------------------

Q21137：

無聽老師講，短炒左，30萬資金變左20萬，好後悔。

宜家月入10萬，剛剛買左樓，約3.5萬供樓，每月要還2萬卡數，大約1萬家庭支出。

當初短炒諗住希望2－3年可以有2－3百萬換樓. 短炒後發覺自己心理質素差，彈出彈入。同時因為開頭有賺，錢都洗大左。

宜家無貨係手，想重新投資，想問老師有無建議，現時我留意緊0175吉利同2013微盟，請問佢地現價可入？

龔成老師：

短炒好難賺錢的，建議你之後集中長線投資。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

建議你除左上述兩股，同時考慮其他股，建立一個平衡組合。

------------------------------------------------

Q21138：

有啲心聲想同老師分享，上年10月上完基礎班後就開始入市 都係小注進行 因為冇咩現金係手

不過最近個市真係有啲波動
見自己個組合由高位有15%回報到宜家得番4.6% 個心好似真係會患得患失咁 成日有種感覺係「早知當時高位放左佢算啦」

不過岩岩睇完老師個專訪 令我本來忐忑既情緒又穩定番 因為我希望長線係可以做到價值投資哩個方法 因為屋企人同身邊既人都係短炒多 我希望我可以做一個成功既例子話佢地知 價值投資法係有用

現時組合中佔比最大係1177同9988 （各佔25%）其次係3067同823 （各佔15%）

有啲問題希望老師可以俾啲意見我

1. 我每月會買2手3067 根據現況老師建議停一停 先儲現金 還是可以繼續長線進行買入動作？

2. 宜家28歲 所以組合多以新經濟股/水桶1為主 以上組合會過於進取嗎？（已經特登加左823係水桶2 分散風險）

3. 如果投資水桶2 投資823/1928 係咪差唔多？因1928現時值搏率好似冇咁高

4. 最後亦都係最重要，我希望趁年輕可以爭取多啲時間搵錢 雖然宜家有份office正職番星期一至五 星期六有幫4個學生補習 但都想再搵多啲外快

會繼續每日留意老師facebook update
多謝老師抽空睇完我打既野

龔成老師：

1）由於你無太多現金在手，所以，建議你先停一停。

2）你持有的股票，都是有質素的，不過，你較集中在新經濟股，同時，我地同一隻股票的比例不宜太多，15%已經是上限。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

3）都有質素，都可以考慮，現時值博率接近。

4）我建議你可以試下做小生意，以及做一些高時薪的兼職，以提高本金。

加油！

------------------------------------------------

Q21139：

阿sir 我之前問過你，雖然我有上堂，但我衣家既股票全部係打和，如果驚佢黎緊會繼續向下，係咪由佢放係到唔睇就算thanks

香港電訊6823 - 1000股
港鐵 66 - 500股
領展 823 - 200股
盈富2800 - 1000股
海豐1308 - 1000股

鐵塔 788 - 8000股
海爾智家6690 - 800股
阿里巴巴9988 - 100股
騰訊700 - 100股
恆生科技3033 - 4000股
中國潔能2809 - 150股

AAPL - 20股
TSM - 15股
SE - 6股

呢d係我衣家既股票, thanks 我都明上堂講要長線，但都仲係驚驚地 哈哈。謝謝你

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

基本上我見你持有的股，都是有質素的，你唔好太著重中短期股價，平常心。

上述的組合，各類別股票都有，只是你年齡不過大，其實無問題，你長線就得。

------------------------------------------------

Q21140：

你好, 我一直以來都無買過股票, 因為我父母炒股輸過好多錢, 甚至乎我覺得佢地輸埋自尊, 炒輸股票之後對自己失去信心

正職都做不好. 2008年金融海嘯我見匯豐$30都無錢買, 所以都決定儲錢, 下一次大跌市時入貨, 希望賺錢.
到2020年3月, 呢個機會終於來了, 所以我買左3手盈富, 到年尾已經賺左40%

但因為後來的升市, 好多隻股都大升, 所以我都加碼買左其他, 當中試過短炒賺少少.
長話短說, 我以家手上揸住:

小米3手@$29.7
阿里巴巴2手@$255.5
吉利汽車2手@$28.225
領展房產基金2手@$70

只係大約13萬貨, 所以即使依家跌左幾成, 心理都仲支持到.

我想問吉利你覺得有機會升返上$30嗎?

記得08年個陣, 我好多frd買了中人壽, 有D$30幾蚊入, 有frd歷史高位$50幾蚊入, $50幾蚊好似已經永遠唔會返到家鄉了.

吉利會唔會都係咁?

老師, 我已經受不住驚慌, 將個2手吉利今早19元賣左, 立即買返美團同小米, 呢次我一定會長揸. 另外, 我睇緊年報勝經, 之後會睇埋另外兩本, 之後股票班我要星期六日開的才可以來上堂, 我會等你供佈.

龔成老師：

其實你的持股都有質素的，又不用太過擔心。

其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

所以，你其實唔需要轉來轉去，建立一個組合，長期持有就得。

至於中人壽（2628）的例子，其實佢當時貴，同時增長力及質素有少少下跌，因此企業價值都向下，所以我地分析時，要懂得分析質素及估值，同時，不能太集中在單一股票。

我間中都會開星期六班的，通常一年開1、2次，星期六下午時間。

下次在今年年尾。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17801-Q17820）

Q17801：

龔成老師你好，本人今年40歲，有300萬現金，持有50萬股票，月入8萬元，每月可儲4-5萬，以前不懂投資

十年前買股票，輸了幾十萬，所以餘下的股票也十年冇再理，一路只放於戶口，本人近年比較傾向手持現金，但讀了老師的Facebook 後，明白這只會另我的錢不斷貶值

現想向老師請教，如果想要20年後退休，達到財務自由，現在開始做月供投資，2萬 盈富2800， 2 萬領展823，再分段入市，仍有希望20後達到財務自由嗎？謝謝你

龔成老師：

你只要行翻正確的路，一定可以在20年內財務自由。

最重要明白，買股票不是炒賣，是投資優質股，長線持有，令財富有效去增值。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

月供股票或自行分注都得，你現時可持有盈富（2800）、領展（0823），但唔能夠只集中兩隻，要建立組合（盈富集中無所謂，但個股不能太集中）。

你可同時考慮其他股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。最好等回翻D先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17802：

你好龔成老師：由於我同老公都係做XX業，由社運、疫情至今我哋每個月都放下no pay leave, 清大假咁，話共度時艱，講係咁講，但工返少咗，野就做多咗，因為人人自危

驚唔知幾時俾老細開刀，個個都話要爭取表現，要做好多無謂既野，亦有好多無理既要求，辦公室政治等等，真心覺得打工除咗為咗拎一份打咗折既糧

每日都好似行屍走肉，亦睇唔到有出路。如果我60歲退休，淨返呢20年，我唔想咁樣生活。

我記得你成日講唔好為其他人而忙，要為自己為夢

因為個個月反正都放no pay leave,多咗時間，所以今年5月中我同老公好衝動咁用咗幾萬開咗盤生意網上售賣

係一個死場用每月幾千蚊租左好細嘅地方放產品，呢2個月開始逐步都有d生意，每逢放假放no payleave, 就做鋪頭既野，收貨送貨搵sourcing。。。

雖然忙同攰，但好有滿足感，好開心，剛7月埋數，都有7000蚊net profit。但問題黎啦，其實呢7000蚊或者每逢收到錢返黎之後，都要繼續入貨，或者再買新既產品返黎先吸到客

網購生意競爭好大，要靠賣廣告先有生意，廣告停，生意就停，但對我哋嚟講，呢個支出好大。暫時都做唔到收支平衡，實際都係無錢入袋。

而家開始會有客俾意見我地，例如唔夠多貨品種類，因為真係唔多，得20幾款。有啲客又好有心，佢會話俾我知佢想要d咩貨，叫我可以考慮吓。我好想做好去，但我諗唔到可以點繼續維持落去

自問mark up個價錢都唔係特別高，但都唔平，同行家比較，我價格定位屬中位，但因地方細入唔到多貨，量少自然拎唔到靚價，好難同大品牌既鋪頭競爭，我都係sale service, 部分客路都算高檔。

我記得你講過一間公司開始都會係無錢入股東袋，d錢係會拎去繼續發展公司，到咗生意上軌道之後，先會慢慢有錢賺，我繼續做呢舊錢會變大嗎？

（係咪好阿Q精神）一路做一路懷疑自己有冇咁既實力，從中係學到野，但我驚自己既成長太慢，跟唔上市場既改變。因為商場租約只簽咗半年，老公就話11月睇下個情況，如果都係無錢賺就唔玩摺埋。

或者想改變少少方向，賣多些較貴價，同埋真正建立一個網上平台（而家只有facebook渠道）希望對生意有幫助。

短期目標係想可以靠生意維持收入，真正有net profit $20,000-30,000, 唔洗再靠打工賺錢。最終目標甚至可以養起埋老公。好大貪嗎？

今次寫黎唔關股票事，純分享自己野，如果11月都無錢賺，係咪應該真係摺埋？

其實你真係我人生導師，我數口差，無咩賺錢concept, 淨係知做人就係要打工賺錢為生活，我同老公2個都無點累積財富，由上年既下半年起至今年嘅疫情關係真係搵少咗錢（大概少咗1/3）但我哋都逼住多有多儲，少有少儲。唔敢放棄。

呢幾年開始睇你專欄，再睇書，再上堂，由唔識投資，到開始買股票，儲股票，慢慢累積財富，之前股市大升，我哋無賣出過任何股票

因為我哋唔特別需要現金，所以繼續長期持有，希望一路滾大，但計算數字上所賺到既錢，再加上本身既資產，我哋2個人終於都達到1百萬，雖然唔多，同埋只係數字上，但都覺得開心

而家個心情好複雜，今年環境令人覺得好難捱，亦無諗過自己會做生意，所以想同老師分享下，有冇意見提供下或者R下鼓勵既說話。希望可以另令我有動力繼續走落去。加油

龔成老師：

你地已經成功左一半，做生意，並不是個個人錢賺，你現時已能做到基本的盈利，同時能維持到生意，這已經是成功左！

做生意要投入時間，要守，這是好正常，你地可以係幾個月內做到這成績，已經不錯，我相信已行在成功的路。

你地可能現時賺錢唔多，但正建立一個重要的資產「品牌與客戶」，只要你這方面做得好，能做好「客戶會再買」「客戶會介紹其他人買」，你將來就有發展。

相反，如果你要不斷賣廣告去找新客，而舊客無再找你，你就好難長做。

你要聽不同客戶的意見（不要只聽一個），而是聽多個，了解市場，我自己做生意都是如此，最初都無法得知真正的市場，但「客戶會自然地話我知」，我只要順市場的需求，順勢而行就得。

另外，當發展落去，你就要有自己的獨特性，你一定要答到這些問題，點解客戶會買你的產品與唔買另一家的產品？點樣可以令顧客再買？點樣可以令人容易記得你？

加油呀！

------------------------------------------------

Q17803：

老師你好，我想請問一下我在42.5的價格買了兩手6969思摩爾，目標50

目標50有希望嗎，適合長揸嗎？

因我剛開始玩股票
所以不懂，請教你

因為不懂怎麼研究股票，所以最近蝕了很多錢，不管怎麼樣我當是在失敗中成長，謝謝老師

龔成老師：

思摩爾（6969）有當中的獨特性，企業本質不差的，不過，現價已經略貴，當然不是不能去到更貴（$50），但就要有市場炒作。

至於長線，則要視乎企業發展，雖然都有可能，但值博率不是好高。

你要注意兩點，第一，我相信你過往集中投資一些熱門股，這類股的股價好多時已上左，你投資當然風險高。

第二，你未仔細分析過企業，買股票就是買入一間企業，你應該仔細分析，睇下是平是貴。

建議你先從基本的投資知識開始，可以睇《股票勝經》。

------------------------------------------------

Q17804：

龔sir，你好，本人留意了一排 2202 想作長期投資，希望在$30以下長期買入作長線投資，因為見佢2014年開始每年派息也有增長，佢亦都係比較保守嘅內房股

你覺得我這個投資如何呢？如果轉做月供股票又如何呢？
我本身月供股票已經有66同2800 (各$4000), 敬希賜教，祝身體健康。

龔成老師：

萬科企業（2202）業務有質素的，本身有規模及有發展，不過負債是最大的風險。

這股都可以投資，現價是合理的，不過，唔建議太集中投資這股，月供全額會較少，始終這企業本身有風險。

至於你月供，可保持。如果日後有較多資金，可加大盈富（2800）。

------------------------------------------------

Q17805：

你好 老師 我想問置業投資 你覺得香港樓市，會否下跌？

但我的資金不多 ，選擇比較少，只可選擇不在市區，我最近在抽屯門新樓開放式單位，可否給我一點意見？

龔成老師：

香港樓市，長期仍會因供求問題，而向上。

至於中短期，有可能會下跌，這是由於經濟與疫情因素，不過，相信不會大跌的。

新樓你要計清楚，唔好單單因為「易上車」「首期少」，就買入，要考慮這物業預期的租金回報率，呎計是多少，比起同區會否貴左。

從投資角度，屯門不是好地點，開放式都不是好的投資物業，但如果你自住，認為自己適合，而你又「供得起」，加上唔算貴，就可以考慮。

------------------------------------------------

Q17806：

成哥，有人話 唔好再買 港鐵 領展。

我想聽聽成哥 嘅想法

龔成老師：

領展（0823）、港鐵（0066）仍有質素的，不過，增長力的確比過往年代略減，但並不是價值向下，而是價值仍會慢慢向上的。

地產市道，中短期因香港疫情，一定差，但長遠來說，地產點都有價值的，過2、3年後又會回到正常。這兩股現價合理，都可投資，只要唔好太大注就得。

------------------------------------------------

Q17807：

龔sir，我有個問題唔係好明

1. 假如我想買入住宅累積資產，但經過數年至十幾年，原本嘅住宅因為樓齡大，變得無咩增值力，咁我係咪到時要再將佢換成樓齡比較細嘅樓？

2. 如果每隔幾年要換一次樓，咁我係咪越換越細？因為一般嚟講同區樓齡較細嘅樓會比樓齡較大嘅樓貴（假設樓價保持平穩或者新舊樓同步上升）

3. 咁樣嘅情況下，係咪樓價要大升先至可以增值財富？

唔好意思，問題有少少多，係睇完呀sir嘅書之後有少少唔明

龔成老師：

1）要睇仲有無質素，一個資產的價值在於佢產生的現金流，如果佢出租難左，加上租金低左，同時要不斷有維修費支出，難做按揭，就反映質素向下，可考慮轉其他。

但有些樓，例如美孚新村，就算樓齡高，但價值仍在。

2）唔會每隔幾年，好多樓持有20年都得。

3）你可以睇翻美孚新村做例子，過往的樓價好平，多年來不斷升值，就算因樓齡因素，都無貶值過，這反映升值因素，大過樓齡令其貶值的因素。

------------------------------------------------

Q17808：

成老師，我目前用嚟做投資嘅銀行係匯豐，請問下呢間銀行仲穩唔穩陣呢？如果唔係咁好嘅話有冇比較好嘅選擇推薦呢？

如果現有嘅貨想轉去另一間投資銀行係咪只能夠喺舊嗰間先沽出轉現金再喺新嗰間買入？

唔好意思可能我條問題好低能，本人對投資非常菜鳥，正準備睇80後百萬富翁增長智識。

如果我現在有多餘的積蓄可以買1手0066/ 1手3918/ 1手9988/ 6手1972，請問老師會建議我買入邊隻先？

龔成老師：

匯豐穩陣，完全唔需要擔心，佢只是賺錢能力與股價近期較弱，以一間「銀行」去說，佢是好穩陣。

你唔需要擔心，你的錢及股票放左這裡無問題的。

如果你真係想轉，做一個叫「轉倉」的動作就得，唔需要先賣後買。

你可以考慮港鐵（0066）、太古地產（1972）先，再到金界（3918），再到阿里（9988），其實阿里好有質素，不過現價就唔平。

現時大市處合理區，未算平，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17809：

老師，今日我已買入第一注2000股越秀房產[email protected]。

在你的著作（五十穩健收息股）有介紹粵海投資270,該股已連續由高位跌至今日12.52低位，是否已跌入便宜區，可大手掃貨呢？謝謝

龔成老師：

越秀房產（0405）有質素的，中短期可能會較弱，但長線無問題，是不差的收息股。

粵海投資（0270）都是正面的，過往股價有少少貴，現時合理區，可以分注投資，長線持有。

------------------------------------------------

Q17810：

老師，如9988,1211,2382中，只能三選一做月供，邊隻最有投資價值及值博率？

龔成老師：

阿里（9988）與比亞迪（1211）是首選，如果你可以承受風險，就比亞迪。

------------------------------------------------

Q17811：

你好老師，我小朋友現在8歲，每月可以有2萬元儲蓄或月供股票，如果我想10年後有150萬左右比小朋友讀書，請問你覺得月供股票好定買份教育基金保險好？

龔成老師：

教育基金保險就會穩陣D，但回報就會低D（當然，具體的情況你要問翻經紀先知）。

你亦可以部分投資教育基金保險，部分就自己投資股票，建立一個平衡組合。係理財的角度，平衡風險都是重要的。

至於月供股票，如果想穩陣，你可以選握一些ETF，如盈富（2800）、南方Ａ５０（2822）、VOO，這些都是基金，但管理費就較低，同時有平穩增值的效果。

------------------------------------------------

Q17812：

龔sir 由於想財務自由所以先開始有睇你page 而且今日終於的起心肝買左書睇但都想你俾dd意見

我今年26歲岩岩升職叫終於捱到2萬零蚊人工 另外自己weekend 都有教下樂器外快 但返工實在太忙太攰好氣餒 到左weekend 又要教野 身心都好疲累

份工講真心唔鐘意做但有福利又穩定加上岩岩升左更加難走 唯一諗到就係點去增加財富令到自己可以自由d

教野方面其實自己都enjoy既 我既目標係可以做到自僱教野但又唔會擔心唔穩定

而家暫時最主要都係月供股價 要要買正股又無從入手
我仲有d咩可以做先可以加快到累積財富？

目標係35歲可以自由到

龔成老師：

你要從兩方面著手，第一，你正職能帶比你收入，你要善用，好好投資，這是累積財富的重要來源。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你要從「增值」方面著手。你可以加大學習潛力股的投資，這會幫你財富增值加速，但都要留意，要有知識基礎先，始終潛力股要求你的知識較多。

第二個方向，就是發展副業，你現時自僱教野，這方面可以想想點發展得好D，如果這方面穩定，就會成為你正職，而發展可以比你現時的工作更好。

好好思考任何這方面的發展方向。

------------------------------------------------

Q17813：

你好龔sir,本人想查問317及1138前景如何，317持有多年，平均21元購入；另一隻1138亦持有，平均6.6元購入，請指教

龔成老師︰

中船防務（0317）一般般，企業質素不強，加上增長力不強，投資價值只屬一般。

佢近年的生意都無增長，雖然是穩定，但賺錢能力就不足，近年更出現過虧損情況，情況不太好。投資價值不算高，前景亦不見得特別好。

中遠海能（1138）為一家跨國大型航運企業，其主要經營沿海、遠洋、長江貨物運輸、船舶租賃、貨物代理等。

此股整體而言，質素一般，建議你慢慢換碼至其他優質股會較好。

------------------------------------------------

Q17814：

你好老師想問下0303有長線投資價值嗎？

龔成老師︰

偉易達（0303）雖然近年的股價較一般，但本質都算不錯的，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

因此，這股以收息股看待，會較好。此股可投資，但不能太過大注。

------------------------------------------------

Q17815：

Hello龔成老師～朋友介紹我最近睇你fb，有少少問題想請教你：

1. 我出嚟做左一年野，儲左約10萬，想分注買入港鐵和盈富，你建議怎樣分配？一注是指一手嗎？如何決定買下一注的時機？

2. 中石化而加低位，值唔值得買一手？

3. 我屋企人嘅一筆退休金以美金放喺銀行，係咪應盡快幫佢轉返做港紙？

4. 另外都想問以下幾隻股票嘅合理區同埋便宜區係幾多？如現價先各買一手，其後再分注入可以嗎？
港鐵、 粵海、領展、恆基

唔該晒你～！

龔成老師︰

1） 一注並非指一手，要視乎你有多少資金。以你為例，有10萬本金，如果分開3注，每注就係約3.3萬。

至於時機，以你情況若分3注入市，每注約為2手盈富（2800）和1手港鐵（0066）。

現時大市在合理區底部，你可以現價先入一注。到出現10%至15%回調，再入第2注。再有較大回調，才入最後一注。

2） 中石化（0386），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

佢上年的股息理想，但翻查之前的幾年，股息都不是好高，佢由2014年-2018年的每股股息：0.25/0.18/0.28/0.60/0.5

以佢近兩年度計，的確是吸引的，但如果佢之後的業務，無之前度咁樣，股息就會下跌，而佢過往的股息亦唔算太高。加上佢的股息不太穩定。

所以，這股作為收息股，適合度只屬中等。現價投資都可以，但只宜小注。

3） 其實貨幣只係「政府借據」，唔係一樣資產，不宜用作財富增值。除非你有實際原因你用美元，否則轉回港元去買優質股會較。

4） 港鐵（0066）、 粵海（0270）、領展（0823）、恆基（0012）這幾隻股票要到平宜區，最少要回調2成。

但若你無貨，現價入首注可以。其後，要分多注慢慢再入。

------------------------------------------------

Q17816：

龔老師你好！平時都有睇老師的書 今年22歲剛畢業 有一份正職一份兼職 有20萬儲蓄

目前分配比例是一半現金和一半作投資 投資有三分一人民幣 三分一股票 三分一保險 想問老師這樣投資比例好嗎？

而我系股票新手 1299有两手 1928有一手 0769有五手 1299和1928都打算長期持有 見而家跌又想再入

但又怕壓太多錢 0769想問升值潛力大嗎？如果想靠投資短期內增值下財富有什麼推介？謝謝老師！祝身體健康

龔成老師︰

記住，我地投資股票，就等同投資一間企業。就算再優質資產，都要時間去升值，故投資一定係長線。

而我地做財富增值，買的一定要係優質資產。人民幣只係政府借據，長遠必然會貶值。而保險只需要買基本保障就可以，增值部份可以留比其他優質資產去做。

策略上，我地會用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。現在你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。

大市現時在合理區，你現有20萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

而你持有友邦（1299）和金沙（1928），都適合你，可長線持有。友邦現價已在合理區上部，可以等等。而金沙，現價在合理區，你可以分注入貨或月供都可以。

中國稀土（0769）的質素不太好，不過業務比之前好轉左D，2019年終於轉虧為盈。不過，整體而言，質素都係好一般。

長線你都係慢慢將佢換至其他優質股，效果會較好。

------------------------------------------------

Q17817：

你好成哥，我已經聯絡你助手留位上堂。謝謝！

另外有問題想請教你，我今年35歲，已婚，冇細路，租樓住，每月扣哂開支大慨有$10000可儲，但我積蓄只有十多萬「因之前太大洗冇錢剩」

我想5年內買到細單位「首選港島」有冇可能？我應該投資邊啲類型可達標？謝謝幫忙

另外想問一下隻恒大醫藥「708」，我見佢賺錢能力好似麻麻地，仲要最近蝕錢，但5年前買佢嘅話而家升左3千幾%，啱啱仲話出隻新能源汽車，好似同佢本質業務好冇關係，其實呢隻708值唔值得投資？

龔成老師︰

你可以用1萬做月供，去創造一個財富增值平台。你將每月儲到5成的資金去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。

由於現時大市只是合理區較底位置，你現有10萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。

以恆指過去年平均回報10%計（連股息再投資），你每月投資$10000 + 本金10萬，5年後大約會增值至90萬，對首期應該會有幫助。

恆大健康（0708）是有風險，有回報的類別。佢業務增長的確快速，加上母公司中國恆大（3333）可以在業務上支持佢同配合佢，我相信長遠是有發展的。

雖然前景正面，但係估值方面，就好困難。佢而家仲係燒銀紙的狀態，幾時先有較具體的盈利？無人知。往後的盈利，有幾大？又無人知，市場只是估估下。

而佢現時的市值去到成3000億，只是估出來，好難用具體的財務數據支持。加上佢自己同母公司，仍然處於高負債的水平，令人較難放心投資。

近期推出新能車，這部份會發展成點，尚係未知之數。

此股潛力雖然有，但風險並存，如果你是小注的話，都可以。

------------------------------------------------

Q17818：

龔成老師，你好！機緣巧合在書局買左你既書黎睇, 有股票問題想問下你意見, 小弟現時剛25歲，現時月薪26000, 扣除所有開支大約可以儲$10000, 現有股票：

吉利(175) - 6000股 均價約$14.00
睇好中長期汽車穩定需求及有新能源車概念

中石化(386) - 10000股 $3.45
預計美金因QE而眨值, 油價會持續上升及中國經濟疫情後復甦有利佢既業務, 而且股價在低位附近, 中期有望反映復甦既機遇

中通服(552) - 6000股 $5.30
小米(1810) 3800股 $10.60
瑞聲(2018) 2000股 均價約$42.50
京信(2342) 18000股 $2.15
長飛光纖(6869) 6000股 均價約$17.20

以上睇好5G對佢地既機遇

想問下老師你睇唔睇好黎緊5G既發展, 邊隻可以值得長期持有。我希望兩至三年可以儲到一百萬。唔知龔sir有咩睇法,謝謝。

龔成老師：

吉利（0175）有質素，可長線。

中石化（0386）雖然有質素，但只是收息股，你25歲，未必最適合你。

至於另外5股，都是質素的，前景正面，不過，你過份集中在5G及手機相關股，會出現集中風險，你最好平衡翻D，小米（1810）、瑞聲（2018）當中最優質。

如果你想3年有$100萬，除左投資上述的股，同時要有自行選股的能力，要比市場早一步找到潛力股（當然這部分可能風險高少少，因此唔建議太大注）。

你同時可留意：阿里（9988）、騰訊（0700）、港交所（0388）、比亞迪（1211）、中生製藥（1177），等佢地跌先考慮，要等機會。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17819：

你好 龔sir, 我今年27，女友26 兩人月入各25000左右，想問下你對我地現時既資產配置有咩改善或者睇唔到既risk

每月支出：
1. 供樓14500/月（上年年中買，借9成還30年）
2. 家用各5000，共10000/月
3. 管理費600/月
4. 差餉地租2500/年
5. 水電煤接近唔洗交住（因未結婚仲未搬入去）
6. 兩個人洗費約9000/月

資產如下：

1. 約六萬股票 （香港電訊，港燈，中石化，北控水務，電訊盈科，電能實業）各一手

2. 約五萬人民幣定期（大概兩厘）

3. 約十二萬港幣定期/活期 （暫時用緊最緊d虛擬銀行優惠，之後唔知可以用來做咩）

4. 約十萬擺係Mortgage Link (而家一厘六）

因為我都係最近（今年五月開始）先買股票，好驚股票會搞到我供樓有壓力，所以希望問下你意見，Many Thanks

龔成老師：

只要你收入穩定，同時有一定的現金在手，就唔需要擔心股票投資方面。

其實你留$15現金，已經好穩陣，足夠多個月的供樓及支出。我地做理財，要攻守兼備，做好了防守後，就要做進攻。

但要留意，投資不是炒賣，是長期增值，買入股票後長線持有，等企業成長，因此，要「閒錢」先用作投資，而投資，就不用過份保守，因為你地年輕。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，你現時持有的股，都是收息股，以你的年齡來說，並不適合，或不建議太集中，只能小部分。

建議你先增加投資知識，然後，慢慢將組合調整，如果你擔心風險，就集中在平穩增值股，加小部分收息股，潛力股唔好買住。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17621-Q17640）

Q17621：

1.龔SIR,我是你初階班的學生。上堂學到唔少野,學到有用的估值方法。我想學更多估值方法,去估值不同行業股票,如潛力股, 保險股。可否推介一些有效地教估值的書。謝謝。

2. 優質股票應長期持有, 或在估值高時賣出。我相信龔SIR大部分情況下,即使估值貴,也是不賣的。但可否分享一下你試過估值高而賣出股票的情景和心態, 什麼事令你判斷賣出優質股?(除了2800)

3. 另外,如大市過熱,想放部分優質股.是否先優先放水筒2/3的股票較好?潛力股如1211價值未完全釋放,不應優先放出?還是按估值同資產比例.貴的股就可放?

感謝你的回答

龔成老師：

1）你可以睇有問巴菲特的，當中有部有教估值方法，不過要仔細找。另外，我的進階班都會教。

2）中國人壽（2628）就是其中一個例子，這股我在$6買入，之後在$40賣出的。

因為當時我的估值，佢大約是$15-$25，所以我在股價比股價低時買入，在股價比估值高時賣出。保險股其中一個特點，就是當投資市況狂熱時，好易炒高左。

這是由於佢持有一些金融資產，佢會將收來的保費投資，當股市上升時，佢當中資產價值會上，但這個所謂的資產價值，只是由於短期股市向上，並不是業務的長期向上，所以，當時市場比佢好高的估值，但我認為佢總會回到合理價值，因此，當時在股市狂熱期，配置貴的時候，賣出這股。

你會見到我運用了第四堂所教的指標，將「賣出時機」指標，配合了「貴」的估值，作出賣出動作。

其實，佢回落翻，加上賺錢能力比過往略有減少，因此我無再買入。

3）其實要睇你自己的配置，如果你配置想持有較多水桶1，就唔好賣水桶1。

另外，要睇翻大市是熱炒那一類，例如近期，新經濟股有少少熱，但舊經濟股反而一點都唔貴。如果要優先賣出就會選新經濟。

------------------------------------------------

Q17622：

我想問北京控股392，見佢 股價不停下跌，但係睇佢嘅財務報表又唔係咁差，請問原因係乜？仲有冇長線投資價值？

龔成老師：

第一，盈利有所下跌，你睇翻佢中期業績都。第二，市場預期佢之後會更差，所以估值下跌，第三，融資成本高左，佢的利息盈利率跌左，去到近5倍的水平，反映利息支出情況有少少對佢不利。

質素不是無的，但唔算強，同時有少少轉弱，現價合理的。投資值博率就中等。

------------------------------------------------

Q17623：

你好,成哥,請問,我點樣憑"損益表, 資產負債表,負債總額, 股東應佔權益"黎分析E個企業現在價值,或合理平貴位置?

龔成老師：

要好長好長時間，先解釋到，這是一本書的內容。《年報勝經》正正是講這些。

你大約可以理解，損益表是記錄企業的生意情況，而資產負債表是記資產與財務情況。

當我地了解左一個企業現時的「情況」後，就可進行企業估值，主要考慮企業的「業務價值」、「資產價值」。

坦白講，要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，要考慮企業的生意、盈利、現金流等財務數據，同時要比較行業，考慮這企業的經營情況，之後的環境又會如何。這都是計算的基礎。

但如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17624：

老師，我係你舊生，嘗試分析另一隻股票
3306江南布衣。

基本數據是不俗，負債/ROE/來自主要生意的收入等都不錯，毛利率高於同行，數字上表現不差，於是連同年報一併分析。

近期股價受挫，因疫情令它要暫停部分店鋪，而造成盈警，但只是中短期影響。

根據年報資料:自己亦有投資發展，購買了不少不動產廠房，公司是有長凌發展目標。而且它的網上銷售有上昇趨勢(三年收入增加一倍)，長遠是一個正面信息。它的目標顧客以內地為主，相對不太受貿易制裁所影響。

護城河方面，它有一定品牌知名度及活躍會員三年間也增加了一倍，而會員貢獻零售占比在2019年多達70%。有見及此，雖然是易被取代的製衣業，但設計的品味及忠誠卻難以被複製。

當然未來會員增長未必會有這麼快，pe不能太進取。基於以上情形，3306的pe有點難推算，因為它設計為主的獨特性市場上沒有大公司是比較接近。

與李寧/安踏及申洲有一定分別(李寧/安踏的時裝收入佔比不大，申洲以製衣為主，設計較少)，而安踏李寧及申洲的pe都有20以上。

睇返3306的過往表現，及會有一定發展空間，但中期都不會像李寧這樣能發展至國際品牌。所以我認為pe有10-15，每股盈利$1港圓，加上10%buffer，所以價格為9-13.5。老師點睇，謝謝

龔成老師：

你的分析不差，不過估值要保守翻D，主要原因是賺錢能力唔算強。

江南布衣（3306）係一家位於中國的設計師品牌時尚集團，從事設計、推廣及銷售女士、男士、兒童及青少年時尚服裝、鞋類及配飾。

產品定位於中高層收入客戶，佢將所有產品生產外包予國內的供應商，分為成品供應商，即負責加工該等自行購買的原材料及面料，及加工供應商，負責加工集團所提供的原材料及面料。

過往的增長力不差，但業務開始有增長力減弱的情況，投資價值只是中等，加上中國經濟轉弱，唔算特別吸引，但不是無質素的，現價合理區中下部，暫時睇是平穩增長類。

------------------------------------------------

Q17625：

成哥，最近睇緊你本5年置業本書睇到按揭果度有少少野想請教下你。

目標30歲前儲到100萬，家人支助30萬，買4M樓投資用，每月供大約1萬2。現時人工22K，穩定。

因為計過人工如果冇升到3萬5一個月，咁樣就過唔到壓力測試。假使人工不變，我諗左兩個方案

1) 搵女朋友做擔保人
 可以借盡9成，有多D閒錢作投資。
2) 借按保8成
 首期要畀80萬+按保費約7萬到。

龔成老師：

如果從穩健度來說，（2）是較好，如果你用（1）的方法反映你每月供款方面較緊，而投資物業的重要原則，就是「供得起」，因此，（2）對你來說，始終是較穩健的。

------------------------------------------------

Q17626：

想請教一下 如果收息股 2777 3393 405 435 778 邊隻好？

2777 3393 相對高息 派息又穩定 唯獨股價唔穩定

龔成老師：

富力地產（2777）的優點是超高息，但缺點是業務本質，始終內房業務較為波動，這會令股價較波動，加上本身負債較高，有風險，因此，這股不是不能收息，但只能是收息組合「其中一員」，不能過多。

威勝控股（3393）質素一般，擔心出現賺息蝕價。

至於其餘3股，都是理想的收息股，無問題。

不過，上述大部分都是同地產有關的企業，這會出現行業集中風險，你要注意翻。

------------------------------------------------

Q17627：

成哥，我想問下有200萬/500萬/1000萬流動資產有乜嘢分別？

龔成老師：

首先要處理左自己的需要，例如住屋、生活、備用、負擔，同時考慮自己風險等，每個人要留的現金都不用。

另外，就是因應自己的年齡與風險，去進行配置，在比例上，配置分別唔大，但「能買到的工具」，就會不同，例如物業及一些入場費較大的工具，就要較大金額先較易配置。

------------------------------------------------

Q17628：

老師你好，看了你的文章決定想月供股盈富，我月薪22k，但我目前想每月供$2000先嘗試一下，請問這樣有問題嗎？

因為我的銀行要收50元手續費，這樣會不會很蝕？ 月供股有沒有最底的入場費會比較好一點？

（只想供一隻）另外想看你的股票入門學習書本，可否推薦，謝謝。

老師我忘了說，我每月有$8000元的可用閒錢。

龔成老師：

如果可以的話，建議你每月供多少少，$4000較好，或是找一間手續費較平的銀行或證券行進行，否則你手續費佔比太多，唔值得。

你可以這刻儲多少少現金先，之後先開始進行，每月供盈富（2800）$4000。

如果你有選股能力，有心水股，就可以月供盈富$2000，另外再加2隻股（每隻$1000）。

你可以睇《股票勝經》。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17629：

龔成老師你好，我是你的讀者。我緊排睇緊你財務自由行的書，學到好多嘢。

本人三十五歲，之前冇儲蓄，試過投資外匯，被偏下八十萬，今年頭先還完所有財務。我月入大嘅四萬，扣除家人支岀我還有$13000左右。

我想將來有被動收入財務自由，聽朋友介紹，我月供$4000（0005）依家有二手，另外每月買入一手（3899）二手，有三手小米，我睇完你平時寫盈富基金係好選擇，如果我想月供應該點分配，我另外對中銀香港有興趣，我是不是可以一齊月供。

我想做到你所說財務自由，不受「系統」控制，雖然我好遲有這個想法，但希望老師可以幫幫我，多謝。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你35歲，其實唔需要太保守，我見你好多收息類或增長類的股，這並不是好事

匯豐（0005）唔太建議月供，對你來說，小部分持有已得，這股增長力有限

中集安瑞科（3899）唔值得每月入一手。

中銀香港（2388），你都可以分注投資，但你唔應該過份集中在銀行股。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。（如果你本身較保守，就唔好投資這幾隻）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17630：

請問現在00019太古股份公司應該是入市好時機嗎？
因為太古按每年都有百分之十的增長

龔成老師：

太古股份公司Ａ（0019）的質素只是一般，佢業務裡包左國泰（0293）而這部分較弱。

整體上，0019增長力唔強，投資價值中等。

反而你考慮太古地產（1972），長遠增長力更好，中短期會較弱，但長遠無問題的。

------------------------------------------------

Q17631：

早晨龔Sir ，第一次上來請教。我想買匯豐股，宜家可以嗎?

但好多人對匯豐前景唔睇好，我猶豫不决，請指教，謝謝。

龔成老師：

匯豐（0005）並不是零質素，不過，賺錢能力、增長力，的確比過往年代弱左，所以估值都有所調低。

你要明白佢只是收息股，股價增長有限，你買入就是收息。現價是合理的，可以投資，但由於質素等問題，唔建議持有太多。

------------------------------------------------

Q17632：

龔Sir，想請教你點睇1157及3339？

龔成老師：

中聯重科（1157）主要從事研究、開發、生產與銷售工程機械、環衛機械和農業機械，提供環境解決方案，以及融資租賃服務。

企業早幾年的生意不太好，有持續下跌的情況，盈利亦比較波動，到近一年才好轉，而股價都升翻唔少。

這股現時估值算合理，但不算平宜，投資值博率只屬中等，如你想入，分注投資都可以的。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近一年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

------------------------------------------------

Q17633：

你好龔老師，本人40歲，經過多年投資儲蓄，終於儲蓄到有一百萬現金，希望可以得到指點一下未來投資策略，現在沒有任何股票持有，月入26,000。

龔成老師：

如果你無特別的資金需要，可以用這些資金來投資，股票是其中一個主力。

你可以動用$50萬（要分注慢慢用），餘下$50萬就等機會。

以你的年齡，平穩增長股是較合適的。你可以考慮盈富（2800）、南方Ａ５０（2822）、VOO作為重心。

另外再加一些個股，如銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。（以你的年齡，這部分唔應多過平穩增長類股）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17634：

你好龔Sir, 看完了股票勝經之後，現實行重整手上持有多年的股票，有些沒有質素的已經賣了，但其中3隻不知如何處理，請指教。

1. 中國重汽
2. 第一視頻
3. 中遠海發（之前想賣嘅時候見佢開始派番息，而且都不錯，但股價一直跌）

龔成老師：

決定繼續持有一隻股票與否，最重要是睇「質素」，買入價不是重點。

中國重汽（3808）有質素的，本身企業的定位清晰，持有無問題。

第一視頻（0082）無乜質素，賣出較好。

中遠海發（2866）質素中等，貿易類股票的賺錢能力，比過往減弱，這類股唔建議持有太多。可以等經濟好翻D，這類貿易相關股都會上翻，到時先賣出到得。

------------------------------------------------

Q17635：

老師，我喜歡寧靜的環境，昨天去深井睇樓，過去3年跑輸大市，大市升了十幾%，深井反而跌了5-10%，請問你點

希望可以買些小單位自住，跟大市同步升值；你本書介紹九龍東，我也有興趣，但真的太密集+樓齡40年

錯過了凱匯，又可能買唔起

龔成老師：

深井在環境、景觀上都不差，如果你喜歡，這都可以考慮。當然，這是從「自住角度」去分析。

佢跑輸大市，是「市場角度」，因為市場認為佢的價值，並不及其他的地區，自然會出現跑輸這情況。佢最大的問題就是「地點」，始終在交通上較煩，相信在可見將來，情況都是這樣。

香港人較忙碌，地點的因素會影響好大，無論是時間、方便、交通費上，因此，從投資角度，這區並不是很理想，但如果你想自住，你自己喜歡就最重要。

九龍東當然更有投資價值，但可能你在自住方面就較一般。

所以，你要考慮自住的因素較大，還是投資因素較大。

------------------------------------------------

Q17636：

老師，你好，看了你的《選股勝經》如獲至寶，不衹是教人選股，而且通過各行各業的分析，國家發展等。

把他推薦給剛畢業的大學，一來通過該書可以見到各行各業的發展前景，幫助自己擇業，二來可以在畢業生見工前，如果想進入書中介紹的公司

自己對該公司進行了比較準確的瞭解，對見工成功，我想也會大有幫助。

推薦給DSE考生也助於選擇大學專業。
真是太好了。

有時間我一定去上你的堂。

龔成老師：

《選股勝經》較多在大環境與行業面的方面。

你要保持進步，我相信知識對我地好重要，而財富與知識成正比。大家加油！

遲D課堂見！

------------------------------------------------

Q17637：

龔成，會唔會做有關6969 既初步分析睇法？

龔成老師：

思摩爾國際（6969）係霧化科技解決方案提供商，主要經營以下兩項業務。

第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ
　　Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

基本上業務是正面的，有當中的獨特性，以及長遠有增長力。不過，股價升了不少，現價唔算平，如投資真的小注好了，而這股有長線投資價值的。

------------------------------------------------

Q17638：

龔Sir你好！有關月供股既配搭想問吓龔sir你意見：我爸爸月入3萬；媽咪全職主婦，爸爸仲有7年退休，係月光族，得幾萬元積蓄。

我想每個月用大約6，7千蚊幫佢地月供股儲錢，等佢地第時退休每個月都最少有五千蚊生活費。

月供股方面例如月供盈富可以嗎？抑或揀一兩隻收息股做月供？

例如希慎/香港電訊/港燈？
麻煩晒，唔該你

龔成老師：

以佢地的年齡，可以供盈富（2800）$3000，然後有$4000就月供一些收息，這是較平衡的做法。你可以利用7年時間，保持月供就得。

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。你在這裡選股就得。

------------------------------------------------

Q17639：

龔老師,我想問下我而家啱啱拎左政府嗰1萬,自己又無現金積蓄

其實可唔可以試下投資,或者適合D咩投資呢?
我今年26既...唔該晒老師先

想大約兩年左右有35-40萬左右儲蓄去外國進修...唔知道可唔可行?

唔記得加返月入...而家月入係19000左右,儲錢習慣比較差可以等於無咁樣...唔好意思成日都加D加D咁樣...

龔成老師：

政府的$1萬，其實作用有限，反而你留做備用現金仲好。

如果你想完成見標，就要好好運用你的收入，你26歲，是財富增值的黃金時期，要好好把握，盡你一切的力量去儲蓄、投資、學投資知識。

如果可以的話，我會建議你每月儲$10000，其中$5000月供股票，$5000儲現金。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17640：

老師，我之前報讀了股票班，現在已經賺了學費的接近10倍。再此先謝謝老師。當本人真正賺到100萬時，定必會再次認真多謝老師。希望這個日子很就會來到。

龔成老師：

太好了！

理財是長期過程，要保持進步，保持理財與投資，同時要平常心，加油！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。