想分享今日去上門探訪嘅特別經歷。 話說今日參加咗一個基督教社區關懷組織嘅端午關懷探訪活動，我同朋友就被分派去探兩戶街坊，送啲食物口罩等物資，同埋關心佢地。 打電話約時間嘅時候，先知道名單上其中一個探訪對象（一位伯伯）原來由年初三入院到宜家都未出院，所以最後變咗探兩個現時都係獨居嘅婆婆。 上到去第一個婆婆（下稱笑婆婆，因為佢成日笑）屋企，見到屋企好企理，笑婆婆都好精神。一入到屋企（冇除過口罩，有帶酒精搓手液），佢已經好雀躍地同我地介紹全家福裡面嘅仔女孫仔女。睇住婆婆頭腦清晰，而且咁精靈，估唔到佢已經八十九歲，但更加估唔到嘅係，婆婆原來最近確診咗大腸癌。婆婆本來冇任何病徵，只係去身體檢查無意中照到。「醫生話未擴散，我宜家仲行得走得；不過之後擴散咗就好辛苦，醫生都話到時會好痛。我唔怕死，但我怕之後會好痛苦。」婆婆講起病情，雖然表面都好睇得開，話「既來之，則安之」，但佢不斷重複一句「我真係好唔捨得啲屋企人」。 望住笑婆婆滔滔不絕、好自豪地同我地分享佢嘅家庭照，聽住佢講佢啲仔女兒孫平時點樣愛錫佢，經常來探佢，車佢去食飯、睇出世一兩個月嘅「塞」（曾孫）⋯ 言談之間都感受到呢個家族深厚嘅感情。好多時聽到一啲冇温暖家庭、晚年孤獨生活嘅長者話渡日如年，患病對佢地而言彷彿係一種解脫；但當擁有一個咁温馨嘅家庭，我諗八十九年嘅人生永遠唔夠長，可以嘅話只會想再賺多啲同家人相聚嘅時間。我同朋友喺離開之前都為到笑婆婆祈禱，希望佢面對病情嘅轉變都可以有平安，少啲痛楚，好好珍惜最後可以同家人共享天倫之樂嘅時光。 笑婆婆因為有孫仔會來車佢去食飯同探bb，所以我地留咗半個幾鐘就離開。出發去探下一戶之前，笑婆婆講起另一個街坊嘅情況。「住我樓下嗰層有個阿伯大我兩年，又係大腸癌，年初三入院到宜家都未出院。不過佢唔戒口架，咁大年紀都仲係成日飲汽水啤酒，咪搞到咁嚴重⋯」嗰陣聽到覺得呢段內容好似有啲似曾相識嘅感覺，但都冇太深究就離開去到下一戶屋企。 落咗一層樓梯，我地去到第二個婆婆屋企（下稱喊婆婆）。佢成屋都係親戚（有成五六個人），有啲親戚咁啱要走，最後就有喊婆婆、佢兩個女、我同朋友一齊坐低傾計。一開始都係簡單問下婆婆嘅背景，原來佢又係咁啱同笑婆婆一樣係八十九歲！閒聊咗幾句，喊婆婆嘅女講起伯伯嘅情況。「阿爸年初三肚痛入院，發現係大腸癌，條腸穿咗，一住就住到宜家。咁耐以來因為疫情都冇得探病，剩係探過兩次咋！最近疫情冇咁嚴重探咗一次，佢插住喉都講唔到野，又要綁住手⋯」喊婆婆一講起伯伯住醫院有幾辛苦，佢就忍唔住開始喊。我聽到伯伯嘅病情，即刻聯想到笑婆婆提起嗰個伯伯，不過都唔敢肯定係同一個人。再聽佢地講多啲，原來伯伯本身行得走得，日日會帶住部收音機去公園行，冇任何唔舒服嘅徵兆，所以年初三佢突然好肚痛，全家人都冇諗過會係大腸癌咁嚴重，更加冇諗過佢嗰日入院就一直住到今天。 言談之間，都聽到阿女同喊婆婆不斷重複「我地都唔知會咁」、「如果我地知就一早叫佢入院」等等有種內疚、後悔，甚至有啲怪責自己嘅說話。「阿爸有咗糖尿病成三四十年，都從來唔戒口，日日飲汽水啤酒，餐餐都要飲一杯燒酒⋯」聽到呢度，我都幾肯定呢個伯伯真係笑婆婆口中講嗰個住樓下一層、同樣患咗大腸癌嘅伯伯。嗰刻心諗：有冇咁啱呀！！！又會咁啱探中呢兩戶有住咁微妙關係嘅長者嘅！ 喊婆婆中間講起自己身體嘅毛病（氣管收窄，抖氣唔順同腳痛），同埋以前嘅辛酸史（隱約聽到鬥地主，但其他聽唔明），都抽泣咗幾次。望住眼前呢個婆婆同笑婆婆有住截然不同嘅心境，我都好替佢覺得難過；但另一方面都慶幸喊婆婆同笑婆婆一樣，有一班好錫佢、好關心佢，彼此關係好密切嘅屋企人。我諗喺面對自己患病或者摯親患病嘅時候，呢兩個婆婆都一樣有着好多不安、難過嘅時候，而身邊家人嘅愛同關心對於佢地來講真係好重要，至少等佢地唔駛孤單面對，有家人與佢地同行。 臨走嘅時候，我地都為到喊婆婆祈禱，好想佢知道無論係病房裡面嘅伯伯，定係佢自己都唔係孤單一人，我信天父會一直陪住佢地，親自安慰佢地。喊婆婆聽住我禱告，求天父賜佢平安，俾佢少啲眼淚，佢都不時開聲講：「係呀，我想呀⋯」希望喊婆婆可以慢慢平伏心情，努力照顧好自己。 講到呢度，我諗起之前喺病房實習，有個五十歲嘅姨姨因為透過大腸癌篩查計劃，確診大腸癌，入院做手術切除腫瘤。嗰陣我好驚訝，因為嗰個姨姨keep得勁好，完全唔似50歲，仲要個樣好有活力，點睇都唔似有癌症。而佢都話佢冇任何病徵，真係只係好彩發現到。其實根據香港最近期嘅統計數據，大腸癌係最普遍嘅癌症，喺2018年佔咗癌症新症總數嘅16.6%。而大腸癌亦喺本港致命癌症中排第二位，喺2019年就導致2174人死亡。根據研究，大腸癌嘅成因仍然係未知之數，應該話有好多癌症其實都真係唔知點來。喺醫院見過好多唔煙唔酒，生活習慣又健康嘅人，但無啦啦有肺癌；平時飲食好清淡，都可以有大腸癌。真係好難捉摸！但好多研究指出就算大腸癌確實嘅成因未明，都有一啲高危嘅因素係值得我地注意，特別係同我地飲食習慣有關。高動物性脂肪、高蛋白質同低纖維嘅飲食習慣，都有可能增加患大腸癌嘅風險。另外肥胖、缺乏運動、吸煙、飲酒都係一啲高危嘅因素。 其實我都幾buy及時行樂，但同時都想提醒每一個人，及時行樂得來都要記得身體係我地嘅，你食咩落肚你啲腸就攪啲咩～食得健康啲，有時可以放縱下，但唔好習慣放縱自己❤️

人生五味，阿福早已嘗盡酸、苦、辣。前兩年因為工傷差點殘廢。失去工作。年紀開始大，但又未到拎長者咭，根本社區當中我看到實在有好多好似阿福呢類嘅人士唔上唔落露宿街頭。 不過阿福在神的眷顧下，一個善心人租住板間房願意晚上借房間的地板比阿福瞓覺，總算係有蓋遮頭。不過早上7:00就要離開因為呢個朋友要返工，要等晚上6:00後朋友放工才能回去。 所以每日佢會在榕樹頭呆坐。在一個機緣巧合我認識咗阿福，常常同佢一齊祈禱，亦教佢讀經，送咗教會小册子（滿福寶）比佢，佢話每晚都會讀一次之後就會瞓覺到天光😊 近排鼓勵佢上教會做義工幫手派飯，今日佢同我講因為天氣轉涼好想要一件外套，15分鐘後突然咁啱有個義工拎著一袋舊衣，而正正就係有一件阿福非常合身的外套。佢開心到仲話唔捨得著幾儍🤨 睇見佢今日幫手派飯，每派一盒飯就送上一句祝福：「耶穌祝福你！」 耶穌祝福我們，也讓我們自己成為別人的祝福 整個畫面好感人。 今日送咗收音機比無家者和獨居婆婆，以後佢哋就可以聽天氣報告啦。原來小小一部收音機就令佢哋咁開心😃⋯⋯感謝主🙏🏻 #耶穌祝福你

一起身已經8號風球，個心即刻記掛住佢哋，於是好忙咁逐個捉。 我：喂，婆婆，八號風球呀，唔好出街呀！ A婆婆：聽到電話響就知道我呢個好朋友打嚟搵我，你真乖！ B婆婆：玉呀，我冇出街呀，係呀打風呀，不過呢到又冇風又冇雨喎。不過我今日唔會出街呀！ C伯伯：係呀，打風呀，放心，我有飯食，有嘢食！ D婆婆：知道呀，打風呀，你好有心！你自己都要照顧自己呀！ 就係咁，講咗一個鐘電話🤪，又有婆婆話自己係芝麻綠豆都有人惦念，真係感謝耶穌！ 最緊要個個平平安安，健健康康！ 獨居老人的寂寞，來自於無人相伴。親人不在身邊，有啲更冇電視也冇收音機，人老了，容易疾病纏身，我哋可以透過電話關心佢哋，讓他們知道有人願意關心佢哋、聆聽他們的心事，輕輕一聲問候，已經暖在心頭呀！ 你打咗電話比你屋企的長者未呀？ Photo by Vincent