【毛城城影評🎞️】話咁快又嚟到暑假，一系列嘅合家歡電影都開始上映，寵物電影亦都係一個適合一家大細去睇嘅電影種類。今次介紹嘅係暑假頭炮家庭電影 -《比德兔2:走佬日記》。 . 城城小編係冇睇過第一集嘅情況下入場，所以電影頭段感覺會有點一頭霧水。不過好快就跟到個故仔嘅節奏入戲，同埋後續嘅發展同上集應該沒太大關聯，所以唔需要先睇咗第一集都可以睇得明。 . 電影搵咗森美同陳豪為廣東話版配音，主角比德兔一聽就聽得出係由森美配音，而森美亦有唔少香港人先會明嘅自抽Joke添。至於陳豪，城城要睇咗套戲接近十分鐘先知道佢配邊個角色，因為開頭聽佢把聲唔係好似佢，同時佢配音嘅聲線令我諗起《溏心風暴》嘅「得得地」，只係我諗唔到陳豪仲演過啲咩比較搞笑嘅角色咁解啫。 呢種卡通真人版電影再加廣東話配音，都頗有以前細個睇明珠台麗音西片嘅感覺，即係一開始聽會有啲遺和感，但聽聽下又會慢慢習慣咗個種feel。（題外話，唔知呢到有冇人睇過由陳奕迅同容祖兒配音嘅明珠台版《鐵達尼號》呢？不妨留言Say個Hi。） 戲情上主要分咗兩條主線：一條係人類女主角出書後迷失自我，從而需要尋找自我嘅故事；另一條係比德兔在書中被人誤會為害群之馬，然後正值反叛期嘅比德兔，決定去尋找自我。故事嘅中心思想都會由主角口中講出嚟，所以唔驚小朋友睇唔明。 電影其中一段係男主角喺未搞清楚情況下，就誤會咗比德兔搞破壞嘅情節（小編都唔明點解比德兔經常被誤會），但其實比德兔做嘅嘢係幫緊男主角。現實生活中，主人好多時會認為寵物做了些難以理解嘅百厭行為，但其實寵物只係想討我們歡心或注意，所以主人發火前就要諗諗喇，免得寵物變成現實中嘅比德兔被人誤會！ 故事發展上，人類主線相對地比較悶，有種睇緊電視台八點鐘辦公室處境喜劇嘅感覺，唯一比較深刻印象就係電影不斷自抽自己套戲情節橋段嘅水；但電影中兔仔條線就相對地比較有趣，幾隻兔仔之間嘅化學作用都唔錯。除咗兔仔之外，同場仲有其他動物，如貓貓、豬豬，仲有青蛙等，得唔得意就見仁見智，但至少都幾熱鬧嘅。 雖然係合家歡嘅家庭電影，但都含咗幾多唔同嘅元素，有汽車追逐、冇乜點打嘅擂台打戲、鬥大聲鬧交同正反派鬥智鬥力等情節，就算小編作為大人都唔覺得太悶，可說是一部輕輕鬆鬆入場睇、然後睇完輕輕鬆鬆離場嘅電影。如果以小朋友角度去睇，亦都有幾多輕鬆笑位㗎。 嚟緊仲有新一集嘅《太空也入樽》，同樣都係真人化嘅卡通電影，到時又睇下兩套戲有冇得比較下啦！ =================================== 記得Like 毛城城FB 💚【Link in Bio】 ⭐毛城城MEWE: MoCity 毛城城⭐ =================================== ✨想分享溫馨動人毛孩故事，或者得意相片影片？ 歡迎開心Share，DM #毛城城 #MoCityHK！ ===================================