《俾啲火我🔥》 今日好開心除咗可以脫離隔離泡泡外，亦都去咗劍擊場館睇花劍比賽。🤺 我相信大家都會覺得睇劍擊係一件好緊張刺激嘅事。就好似睇緊NBA最後一場季後賽嘅最後一分鐘。 教練Greg Koenig提到花劍隊上下一條心，雖然表現不似預期，好期待3年後巴黎奧運會有更好成績。亦多謝另外一位劍擊隊員楊子加，因為佢有份協助團隊入圍奧運🤺！ 小倫提到今次一定係最後一次參加奧運，提到花劍隊當年試過成績唔好，而被踢出精英項目要周圍搵地方練習。另外以前打劍嘅人少，競爭太細啦，要出去集訓；到依家睇住港隊可以躋身世界舞台，覺得好欣慰， 家朗講到對於奧運嘅團體賽有啲唔慣，因為其他世界賽由16強打起，第一圈對手較弱，有時間熱身 蔡俊彥Ryan提到今次奧運係一次好寶貴嘅經驗，怪責自己對俄羅斯奧委會嗰場表現唔好，了解自己弱點，之後會變得更強。 吳諾弘亦提到琴晚緊張，搞到有啲訓唔著，但今日落場又無預期咁大壓力，雖然最後一場對埃及後大腿拉傷，但無阻發揮，表現出色。佢亦好開心因為IG Followers 由四百幾去到萬幾。😄😂😂另外我還有問點解大家嗌Lawrence 做Kobe!原來因為佢都係Kobe 忠實粉絲，怪不得後大腿傷咗，都勇往直前，簡直打出黑曼巴精神！ 今次劍擊隊有張家朗創造歷史，攞到奧運金牌，但劍擊隊嘅發展唔係淨係圍繞住呢幾位運動員。小倫已經幾次提及過歷代嘅教練同前港隊成員嘅鑿石開路令劍擊隊有今日嘅成績。 要衝獎牌並非一朝一夕嘅事。體育係一種文化，需要時間培養。我希望透過今次奧運可以先培養大家鍾意睇運動，跟住都你自己去感受，慢慢再普及，再精英，不要只賴無資源、唔支持。If there’s a problem, you need to find the solution, you don’t just look at the problem itself. #張小倫 #蔡俊彥 #張家朗 #吳諾弘 #東京奧運 #港台電視 #TokyoOlympics #體壇無極限 #搏盡無悔 #香港運動員加油 #團結就是力量

近幾年的一月尾二月初，總會失聲幾天 - 就在Nike全港學界精英籃球比賽之後。沒辦法，投入就忘我、忘我就自然喊破喉嚨而不自覺了。 . 連續四年參與有關精英賽的工作，由前期宣傳、拍攝影片到現場主持都有；無論在哪個崗位都好，我都一樣享受。或許如今我正做著許多不同類型的工作，但是我依然會把同一句說話掛在嘴邊：#做體育最開心；而有關學界、有關籃球的，就格外上心。 . 對於學界籃球，我有著難以言喻的感情。一來自己也曾經是學生運動員；能令賽事受到更多關注、能成為有份改革精英賽的一份子，與有榮焉。工作求滿足，能著手改變一些事情的機會並不多；回想以前自己參加的學界精英賽並沒有太多人理會，再想到上週未新伊館內盛況，就知我們是真真切切的把一個比賽變得更好，那種滿足感大得無以復加。 . 二來，這實在是一件相當正面的事情。我常說，運動場是一個在班房以外的課室，在場內學到的東西，並不會比上課少；參加學界比賽的同學未來未必一定會成為職業球員，可是當中所學，超越運動，那是一些受用一生的東西。相信我，到多年後回望，你會非常感激那個曾經在場上努力渾灑汗水、為勝負笑過哭過的自己。籃球，不單止是競技，而是生命教育的一部分。 . 學生生涯是閃閃發亮的美好，美好的東西總是短暫 - 就只有那麼六年吧？過了這段歲月，縱然你未來打得再出色，都回不去學界舞台了；活在當下，也是一個人生的重要課題，也是一個能透過學界賽場了解的事情；一如往年，主辦方希望我能在男子組決賽前帶頭說番話，以下原文照錄。這是我想告訴同學們的一些話，也可算是我自己對學界籃球的感情投射吧。 . 一生只有一次 即係話嗰樣嘢喺你人生入面 唔會再發生 可惜 我哋往往都要到好多年之後先會知道 原來我哋已經錯過咗 先發覺有啲遺憾 而呢啲遺憾係冇法子彌補 籃球係咁 人生都係咁 即使你未來你打得再出色 甚至成為職業球員 但精英賽嘅熱血感動 就只有現在 甚至可能只有一次 所以活在當下 全力以赴 唔好畀自己留低遺憾 去年我問過大家 「你哋鍾唔鍾意籃球呀？」 今年我想話 「你光輝的時刻，就是現在」 一生只有一次精英 精英賽係一生嘅回憶 我係伍家謙 . #一生只有一次精英 #JingYingBasketball #Nike全港學界精英籃球比賽 #NikeBasketballHK

浪漫月巴睇90s（17） 分手總要在雨天，回憶總在失眠時，Crazy。 這一篇，是在失眠夜寫的。 1.人生在世，有些年份你會成世記得，有些年份你究竟做過乜？你唔多記得。 2.像張學友推出《真情流露》的1992年。除了被迫參與中五會考，我乜都唔記得。 3.直至這個失眠夜。窗外下著懨悶毛毛雨，喵在隔離房好夢正酣，我眼光光，望住天花板，突然諗起一啲嘢，一啲我以為自己已經忘記了的嘢。 4.1992年，卡啦OK流行到爆，就連我住嗰條邨樓下間青少年中心，都配備了一部具備唱K功能的LD機（其實不過是插支咪落去而已），好讓屋邨的苦悶青少年唱吓歌。正值青春末期的我，依然苦悶，而離奇地，當時我是那中心的義工，經常參與中心活動（主要是大食會）。某一晚，中心搞完一個（有大食會環節的）大型活動，成班精力過度旺盛的青少年唔想咁早返屋企（但又冇錢躝街），便留在中心，唱K。對愛情充滿期盼的我，（好揚地）暗戀緊一個在中心返part time、細我一年、住在另一條邨的女仔——友人獻計：一於唱首冧歌俾人哋聽啦笨。好笨的我，真的照做，但竟然沒有理所當然地唱《暗戀你》，而唱了《分手總要在雨天》——有原因的，個人認為《分手總要在雨天》難度比《暗戀仔》高出N倍，而呢個N倍之差距，正好就是我唱功的完美示範……結果，唱到臨入副歌前那一句「你說要走的一晚 / 連綿夜雨 / 也似這天」嗰個拖得頗長的「天」字時，走了音。妖，明明已經成日跟住隻碟唱…… 5.四大天王的碟我統統買過。買劉華碟，（身為Leon fans的）同學會質疑我，要我解釋；到我買Leon碟咯喎，（作為狂熱劉華迷的）同學又配戴有色眼鏡望我，我又不得不Explain……買城城碟？以上兩班人都向我投以怪異目光。唯獨買《真情流露》——嚴格來說是買學友的專輯，冇人會要求你交代原因。 6.因為實力派，唔係唔買吖。我不知道現在香港樂壇還有沒有分實力派偶像派，但90年代初，K歌盛行時，實力派 / 偶像派絕對是兩個派系，代表著兩種迥然的意識型態（80年代反而冇咁強烈，可能做到歌手的都普遍唱得）——好多人既癲晒咁支持一啲被判斷為偶像派的歌手，但同時，也會理性地支持一個實力派歌手。學友便成為了最佳選擇，因為他是——實力偶像派。而且請注意：實力行先，偶像次之。 7.學友早在80年代就紅，但低迷過，到90年初又紅番，紅到Crazy嗰種，而1992年的《真情流露》，就是那個「學友紅到Crazy年代」中最最最最最Crazy的代表作——Crazy在問親人，個個都話有買，而個個又的確隨口就唱得出碟內的歌……問心，我本人認為同年年底推出的《愛火花》，在歌曲選擇和整張碟的結構上更好，但《真情流露》就是首張被公認為最能把學友唱功真情流露的Crazy專輯，成隻碟，由頭到尾都好聽（在魚蛋K歌盛行年代，好多碟都只得嗰一兩首K歌叫做好聽啲）——OK，你可以話碟內大部分都是改編歌，先立於不敗之地啦……但曲還曲，歌還歌，曲需要人唱才可變成歌；一首再好聽的曲，若交由一個渣人唱，絕對可以唱成一首衰歌。 8.我明明十幾年冇聽《真情流露》，這一刻，為求懶係培養寫稿情緒而專誠聽番，當「這一刻 / 你若然 / 覺得孤單」響起，我立即可以跟住唱——由第一Cut《偷閒加油站I》到最尾嗰Cut《偷閒加油站II》12首歌由頭到尾都竟然識得跟住唱。Crazy！ 9.而更Crazy是，我連隨記番起好多1992年的事：我跟朋友去UA6睇學友Sammi的《飛虎精英之人間有情》，睇完，呆咗；中六開學冇耐，同一班同學去娛樂城睇《女黑俠黃鶯》，那一晚我唔知因乜事發晒脾氣，事後又冇講Sorry；還有《亞飛與亞基》與《妖獸都市》，也是約同學睇的……原來那一年我睇過咁多學友的戲。又原來，我曾經咁鍾意同人睇戲。 10.無聲的歲月漸流過。那些陪我度過1992年的人，有很多，已經多年冇見，餘生也應該不會再見。那個真情流露的90年代初，也不見了。 （原文刊於am730） #浪漫月巴睇90s