打橫嚟講：月娥，四個字：我撐你！

我實在唔知香港特區政府所有高官們的每月薪金，全部合埋係要用幾多千萬，但從方方面面、各種渠道所知悉的訊息和事實真相之一面，原則上只看到得一個「家在英國」的小女子那芳名月娥的林太包攬香港政府大小事務之工作於一身。（上述字句冗長兀突是因為我仿照投稿去那兩份無人睇的《阿公報》嘅「來論」風格，以示我的文筆遣詞造句有番咁上下低B，show show quali之嘛！無乜特別嘢！）

講番入正題，究竟，香港政府花巨大公帑，請咗咁多「能人」入局（做局長），何解，家陣，乜嘢都要林鄭一個女人仔做晒嘅呢？

尋日，特首臨危授命（嚴格來說，係梁振英台前宣布，幕後是阿爺臨危授命至真），要林太負責埋香港最惡搞的政制雙普選事宜，說乜乜成立專責小組「研究」政改喎！估唔到，忙到抽筋甩肺的月娥姐卻愛迎難而上，照單全收，由細囈嘅垃圾事務，到快將啟動（即依家未做嘅）的人口政策，以至燙手山芋嘅雙普選大鑊嘢，皆一攬上身，唔知博乜？

哼！林太咁勇，肯定係「見扑」啦！

差人紮職前，總要有番一兩單破大案嘅立功case！同樣，由阿二紮上去坐正，唔露兩手功架，點令阿爺放心交個帥印畀你呢？嗱！大家有無留意林鄭近日出嚟講嘢，句句都講「特首」係好用心做嘢、「特首」好盡責為市民的……

我有睇電視的，我見有人話：「公道自在人心」喎！係呀！全班唔係廢柴就係垃圾，人家雖然「孤身一人」在港，但可抵萬軍，贏晒班虧佬！月娥！四個字：我撐你！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府