遲來的市集後記/ 三日嘅市集終於完滿結束，雖然我唔係第一次擺市集，但今次係我第一次咁認真為一個市集預備唔同嘅產品，仲要擺足三日咁耐⋯所以真係人生一大突破。 首先要多謝 @poorguymarket 嘅用心籌備。其實我冇諗住人流會有咁多，但擺三日都keep住有人排隊，就知道搞手喺宣傳真係出咗好多力。無論係用旅遊巴流動宣傳定係邀請唔同嘉賓、安排特別節目（第一次見市集有舞獅咁好氣氛🤣），都需要好多時間同心機，所以衷心多謝窮L團隊嘅付出。雖然中間有啲小插曲，但睇到團隊都好努力想用最好嘅方法處理，令市集可以繼續順利run落去，辛苦晒你地喇。喺呢個市集，聽住榮光仲有其他香港人嘅歌做背景音樂，望住周圍都係同路人，聽到來行市集嘅人嘅每句「加油」⋯呢一切都令我感受到好耐冇感受到嘅温暖同香港人團結嘅力量。 之後緊係要多謝每個來探我、支持我嘅人，特別係我嘅忠粉。我知道排隊都要排唔少時間，但你地都特登過來支持我，我真係好滾動架！多謝買野飲買大枝水俾我嘅妳（支水我飲咗兩日），一見到妳我即刻可以盡情講野真係好開心。多謝妳咁錫我，仲驚我冇時間食飯堅持要買野食俾我，冇諗過我地會由客人變成好似朋友一樣。仲要多謝住粉嶺都來咗兩日嘅妳，多謝妳咁支持我買咗好多野🥺明明好趕時間第二日都準時一早過來買我啲簿，又帶埋上年上上年嘅簿來俾我簽名，又寫咗好温暖嘅信俾我，多謝妳。仲有多謝上次市集已經來捧場，今次都來探我嘅你，多謝你好supportive，無論喺ig定面對面都好主動同我分享你對我嘅畫嘅感受，又成日欣賞我，多謝。其實仲有多謝話只要係我畫嘅都鍾意嘅妳（多謝妳地兩姊妹都咁支持我），仲有啱啱上年staff特登來捧場嘅poly nursing朋友仔，同埋ig成日同我交流又親身來到市集嘅你地⋯其實有好多ig名我都真係記得架。 另外都好想多謝一啲本來冇follow我，但透過呢個市集認識我，又好欣賞我嘅人。其實我最開心唔係有人買我啲野，（當然當我見到人肯用錢買我啲作品，都會覺得好受寵若驚），我最開心係聽到你地話「好靚呀」，同埋見到你地企喺度默默睇我啲病房經歷分享卡。每次見到人攞上手睇，我都會話「唔一定要買架！！我最想都係同你地分享呢啲我覺得好深刻嘅經歷，你地可以企喺度慢慢睇❤️」見到你地認真去睇我嘅分享，去俾一啲回應，去肯定我⋯我都覺得好滿足。同埋呢次市集令我接觸到唔同年齡層嘅人，有叔叔姨姨銀髮族⋯有幾個姨姨好supportive，係咁話「畫得好靚呀，妳好有天份」、「妳啲字寫得好靚呀」，又或者有個銀髮族同路人讚我真係好叻，我都覺得好温暖，係同路人之間嗰份好真誠嘅支持。明明互不相識，但因着同一份信念就好似好親近一樣，我真係覺得成件事好美好。 Sorry發現我又開始長氣喇，我仲想多謝每個買我現貨手繪簿同手繪卡嘅人。其實我每畫完一本簿/一張卡，都會淆底驚冇人買，但好開心最後都有知音人帶走佢地。當我見到你地攞起本簿睇，然後決定要俾錢嗰下，我都會諗：佢一定好鍾意先會買喇！所以多謝真誠地鍾意我畫嘅野嘅你地。 話說連紅底阿爸藍藍肥媽都來咗撐我，明明我講到明係黃市集叫佢地唔駛過來，佢地肯聽住榮光bkgd music（純音樂咋冇歌詞架）行晒全場仲主動話坐低同我影相，唔係因為愛係因為咩，有啲感動。 好啦，我好長氣添。多謝每個來支持我嘅人，多謝每個欣賞我嘅人，多謝每個同我一齊堅持落去嘅香港人。有follower問我係唔係真係最後一次擺市集，我答佢80%，暫時真係唔會再做呢樣野住喇～幾個月之後，當我要真正投身社會，瘋狂返shift嘅時候，我都會盡力喺度繼續同大家分享我想分享嘅事，希望你地會繼續支持我啦❤️但ig個政策成日搞到我啲觸及率勁低，唔想miss咗我嘅post嘅快啲開啟貼文通知！（有啲我估到你開咗，因為長期都勁快like🤣）#staycutemarket2021 最後，想買postcard同貼紙嘅可以dm問我～郵費自付。多謝你。