【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。