【龔成問答信箱】（Q22681-Q22700）

Q22681：

龔老師，我一直同股票談戀愛, 聚咗唔少老婆。

煤氣9095股,
九倉2000股,
匯豐2514股,
恆地8700股,
港鐵5032股,

港交所1254股,
騰訊744股,
領展1500股,
建行69700股,
中移1333股,

友邦2200股,
九倉置業3000股,
平保3087股,
中銀香港9000股,
2382(300股),

9988(300股),
京東(100股),
2269(1000股),
981(1000股),
6060(500股),

2588(500股),
285(1000股)
241(4000股)

我想在收息同新經濟股中取得平衡，未來應該會到英國生活。打算多用約1-2球重新執好個倉。想多d股息

望指點迷津，打攪老師了。by the way. 請問老師有冇開班

龔成老師︰

最緊要分析「企業質素」，如果企業無質素，就要賣出，如果有質素，就可以長線，當然，如果個人需要，就有可能要賣出部分。

首先，你現時股票太多，你會好難定期管理。建議你長線集中翻係10-15隻，咁會較好。

我假設你短期內，都唔會去英國，或者就算去英國，現有資產都可以保留。(如果短期要走，又要清空香港資產，現時就不要投資，反而要開始分段沽貨。)

你現時48歲，投資要開始保守少少。

港交所(0388)、騰訊(0700)、舜宇光學科技（2382）、阿里(9988)、京東(9618)、藥明生物(2269)、中芯(0981)、眾安(6060)、中銀航空租賃（2588）、比亞迪電子(0285)、阿里健康（0241）這些股票，不確定性和風險較高，不宜持有太多。

你可以考慮將部份，慢慢換至以下股票。

如果你想收息之餘，維持一定平穏增長力，可較集中平穏增長股。如果想保守D，只係收下收就算，可以集中係收息股。

以下股票，現價都合理，可以分注。但由於大市未算平，你最多投入多30-50萬資金好了，餘下部份等大跌市才動用，會較理想。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

最後，我建議你定期審視組合，睇下有無出現過度集中情況。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

現時依然有開班，你可留意。

------------------------------------------------

Q22682：

阿sir 你好！本人41歲，本人嘅股票投資組合如下
( 現時市值約337萬)

股票No 買入股數 平均買入價
2 500 81
( 2 )月供 200 74.1 - 82.4
3 4515 14.94 - 15.56
12 7200 34.8 - 37.45
27 3000 44.1 - 51.1
66 9066 44.4 - 46

388 300 238.6 - 253.4
(388)月供 157 248.3 - 509.7
823 12000 59.1 - 70.2
1038 1500 51.3 - 57.4
(1038)月供 335 38.7 - 54.9
1211 1500 37.5 - 70.4

(1211)月供 776 42 - 235.6
1928 2800 32.8 - 36.7
(1928)月供 611 30.9 - 40.5
2388 2000 25.8 - 34.2
(2388)月供 625 21.9 - 27.4

2800 5500 26.1 - 30.95
(2800)月供 2119 24.5 - 28
3033 1400 7.8
9988 1400 176 - 206.2

我暫時每月可儲蓄$7000, 其中$4000係...喺今年8月份開始月供兩隻新加入嘅股票 , 分別係...1810 & 1177 各月供 $ 2000

另外4年後即係我45歲這年，便可增加儲蓄至每月2萬

我想問我選了以上這16隻股票作長線投資ok嗎 ?

資金比例合適嗎 ?

需要改變比例嗎 ?

我最想問現在這 337 萬嘅股票組合比例...及我 41 - 45 age 其間，每月可儲蓄 $7000 & 45 age 開始每月可以儲蓄 $ 20000 , 這種情況

其實我需要用幾多年嘅時間，才能增值至 1000 萬呢 ?因為本人想每月有 5 萬現金流

本人與另一半 2人一同於今年9月份，已成功報讀了成哥你嘅投資倍升股基礎班課程。

本人買了成哥你六本書
50優質潛力股 2017 - 2018
50優質潛力股 2020 - 2021
大富翁致富藍圖
80後3百萬富翁
80後千萬富翁
年報勝經

不過年報勝經好深，唔係太明白，還要多加研究

一直去閱讀成哥你嘅書獲益良多，現希望上完投資倍升股基礎班課程會有更多嘅得著

龔成老師︰

你現有持股，係適合你長線投資。但16隻其實有少少多，最好長線維持係10-15隻水平，否則你會好難定期管理。

月供股票中，比亞迪(1211)現價偏貴，建議回到$180左右，才重新開始月供。此期間，可以用GX中國電車(2845)暫時代替。

現時大市在合理區，你保留太約3-5成現金左右，去等大跌市機會出現，咁就可以。

我假設年均回報率有10%，以你現時計劃，大約50歲左右，就可以增值至1000萬，當然要視乎到時大市實況而定。

其實書本上，<<年報勝經>>係深少少。如果你係初學者，我比較建議先睇我架《80後百萬富翁》、《財務自由行》和《股票勝經》。這幾本書，對你吸收上堂知識，都會有幫助。課堂上見!

------------------------------------------------

Q22683：

我以前買了2888 和 698 揸了很久，跌左好多，都唔知點算好？
想請教下

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，如果持貨不多，就當守住先。

如果持貨多，我會建議考慮將部分貨，轉其他更有質素的銀行股，或其他優質股。

至於通達集團（0698），算是不過不失。

佢主要從事電器產品（包括手機、手提電腦及其他電器產品）零部件生產；為電子產品及電器提供金屬外殼及其他五金部件；及提供塑膠機頂盒及生產體育產品。

現價合理，勉強可長線。但就唔值得持有太多，始終質素唔算好高。如果持貨多，就減。

------------------------------------------------

Q22684：

老師，純收息，及有增長收息，邊個風險度會高啲？應該投資那一個？

龔成老師：

其實好睇你的投資目標，如果單是收息，佢股息一般會高d同股價穩定d。而增長，雖然佢潛在波動會高d，但股價增長，以及往後增長，長遠會好d

------------------------------------------------

Q22685：

龔成老師，我想請教你，之前放了大部分股票。 只剩下9988 200股 平均價$258， 3手ibond 。 另外手上還有一堆美股 市值大約5000美金。

對於9988 我應否耐心持有或在合理價位再加倉？ 謝謝老師

龔成老師︰

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。

因此，係你已沽出大部份股票前題下，阿里巴巴(9988)相信佔你組合比重唔細。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。所以，我建議你唔好再加持住，反而你加入其他不同行業股票，去進行平衡配置。

另外，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

如果你係年青至中年人士，阿里巴巴(9988)這類潛力股，係適合你。但如果你係退休人士，這股就風險太高，只宜好小注。

而ibond則是現金流產品，增長力唔高，同樣只適宜近退休人士。

你要因應自己人生階段，去作出相應的配置。

------------------------------------------------

Q22686：

龔Sir，你好！ 我現在52歲，剛剛賣走了一個車位，所以有一些現金在手，經過一輪的研究準備 買入以下的股票作長期持有，到退休時把這些股票轉再為收息股。

請問我選出來的股票組合對我這年齡的人來說是否風險過高？ 或者對以下的組合有什麼改善的建議。當然我唔會即刻買晒下面的股票，要等好價才會入貨。 謝謝！

招行(15%)，石藥(5%)，騰訊(15%)，港交所(15%)，比亞迪電子(10%)，完美醫療(15%)，信義玻璃(15%)，舜宇光學(15%)

龔成老師︰

先增值，到退休時慢慢換成收息資產，去幫自己創造現金流收入，支援退休生活。這個方法，係正確的。

但由於你年紀，係比較近退休之年，係增值組合的選股上，不宜過份進取。

你現時選股都有質素，但潛力股佔比重太高(0700,0388,0285,1830,2382)。佢地雖然有增長潛力，同時風險都較高，不宜持有過多，大約佔2成好了。

你應以平穏增長股，作為你組合主力。佢地增長力不及潛力股，但都有平穏增長，而且有若干股息，整體穏定性較強，相信會較適合你的情況。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)。如果有投資美股，可投資VOO。

------------------------------------------------

Q22687：

龔成老師你好，現時持有：

4400股 00005 平均$65
1100股 00012 @$47
100股 00700 @$505
900股 00939 平均$7.8

4000股 01177 @$7.5
7000股 02628 平均$27.7
200股 09988 平均$273

以前只懂買銀行股收息股,之後先開始買其他股票。最近打算買樓,想賣咁D股票,係咪應該賣5,939,2628

請指教一下,謝謝

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時組合，算係一個有偏向增長型組合，若你係年青至中年，係適合。但當中匯控(0005)、建行(0939)、港燈(2638)是收息股，無太大增長力，若你較年青，就不宜持有太多。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

你現時銀行股、匯控(0005)、中國人壽(2628)明顯係超標，你要調整一下個比例。其實中國人壽(2628)近年增長力都明顯弱左，本身都不宜持有太多。

若果你需要套現買樓，而你又係年青至中年人士，你可以優先沽出匯控(0005)、建行(0939)、港燈(2638)，順便調整埋個組合比例。

未來時間，你可以加入多一些平穏增長型股票，去令組合更平衡。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

------------------------------------------------

Q22688：

請問平保2318 仲有冇前景，收購方正之後股價一直跌

龔成老師︰

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

近期佢股價下跌，除了因為大市氣氛較弱外，其本身數據都唔係太理想。

但我地審視一間企業投資價值時，會睇長線。只要中短期因素，對佢長線投資價值無影響，這些中短期波動，我地就唔需要太在意。

這股有長線投資價值，是平穩增長型。現價算係合理區中間至中下位置，分注投資就可以。

------------------------------------------------

Q22689：

hi成哥，我打算在股災時動用15萬買這些股票.
A .3738[30%]
B. 2013[30%]
C. 708 [20%]
D.1585 [20%]
我不怕高風險，點睇這組合？

另外,等股票升晒之後打算用150萬購買這些收息股.
A.3988
B.1883
C.1382
D.2777
E.1628
Sir,這組合如何？應該點分配資金？

再另外想問下1628點解咁高息？高息既背後有咩風險？現價1.68,但PE有成1566,姐係好貴？再問下尼隻野收息穩定嗎？佢長期都係咁高息？幾錢是便宜區？

謝謝成哥解答！

龔成老師︰

我地投資，唔好盲目追求高增長，要先知風險，才想增值。

我明白你風險承受能力好高，但你這4隻股票，不確定性的確好大。特別係恆大汽車（0708）本身母公司財政有大問題，而佢本身到現在，一部汽車都無出產過，投資風險唔細。

我地唔好成個組合，只集中係3,4隻股票身上。最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

恆大汽車（0708）、雅迪控股（1585）同是汽車相關股份，我地就不要持有太多。

我建議你調整翻4隻股票比例，再加入適量平穏增長股，去將個風險拉低翻少少。

你要明白一點，高風險唔一定係高回報。若這些高風險企業發展理想，回報當然好。但發展不似預期，損失幅度會比一般平穏增長股高好多，你要明白這個風險。

你這個組合，會不會升到150萬，要多久才升到150萬，無人知，因為不確定性好大。如果升到150萬，你是否轉至收息股，你要再用你人生階段作考慮。

如果你依然係年青至中年，建議保持投資一些有增長力股票。若你已退近退休之年，換成收息股係可以。

你收息股組合中，大體上都有質素。

富力地產（2777）業務上是有質素的，股息好高。

佢本身負債高，相信會對佢有一定的影響。股價會因此較為波動，所以唔好只睇股息。你預佢中短期都會一般，但如果只是小注投資，都可以。

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，但不宜持有太多，長線投資價值都有，但未去到最高質類別。

佢PE去到過千，主要係因為過去一年，盈利大幅下跌所致。如果你用翻佢上一年盈利計，佢PE係個位數，所以係正常。

雖然佢上年收入下滑，相信主要係受疫情影響。疫情過後，會慢慢回復較正常水平。但始終佢質素唔係好高，唔建議大注。

最後，希望你記住財不入急門，一個平衡和合理風險的配置，增長潛力未必最高，但對你長線投資增值，相信會係最有利。

------------------------------------------------

Q22690：

龔成老師，我一直都是你的小粉絲，默默地跟住你的教導月供股票，最近家人強力推薦重資買入2448，請教老師對2448的前景分析如何？ 十分感謝

龔成老師︰

首先，好多謝你一直支持。

恆宇集團(2448)業務主要係在澳門，以承建商身分承接澳門私營物業項目的裝修工程及樓宇建造工程。

集團於上年年末，開始想發展金融服務業務，今年7月更與總資產逾千億的國企青島西海岸發展集團就「青澳數字經濟產業園」及相關基金項目簽訂戰略合作框架協議。

市場或預期集團未來，會因為加入金融服務業分部，對盈利起到極正面作用。

但我地作為理性投資者，要學識客觀分析事實。新分部和協議框架，的確係有佢發展潛力。但問題係，佢只是剛剛開始，會發展到幾大，會否成功創造盈利，幾時才有盈利，都係未知之數。

只能說，佢潛力股係提升左。但根據現有業務和過去業績，此刻係好貴。

這代表佢現時股票，很大程度係建基於"未來"新業務的發展。若新業務發展不似預期，股價很大機會出現較大幅回調。

而且，佢雖然多年來都係有盈利，係經營現金流欲維持負數，代表佢表面係有錢賺，但實際上落到公司袋架錢，係負數。

我無仔細研究佢財務數據，有機會係正常，但都有機會係有問題，我一般見到這個情況，都會較有保留。起碼要仔細分析過當中數年數據，真係無問題，才會考慮。

所以，你投資此股係可以，現價唔平，加上投資風險唔細，你要自己衡量。佢有一定不確定性，投資時要控制注碼。

------------------------------------------------

Q22691：

你好! 本人年50 有屋(供完) 铺(供完) 收租$6500 屋企人给每月$10000 零用 〈 一半用來交保險 〉尼一 。二年 在網上才真正認識股票

伹股齡有十几年(短炒 不分析公司 跌市心驚) 近尼一年 才把蝕去 有(30萬几) 慢慢 賺回來 约20萬 持有以下股票 有部分已持3年 有的3個月

現在見有錢赚 想沽出部分 請問 那些可以長楂 謝謝解答

3993 (平圴價$4.2) 2萬4千股
716 $0.8 4萬股
189 $6 2千股
1177 $7.08 2千股(打算月供)
788 $1.52 2萬股
728 $2.33 2萬股
2198 $3.68 1萬股
451 $0.28 5萬股
520 $8.69 4千股
1357 $2.82 1萬股
769 $0.9 2萬股
1787 $15.8 2千股
1250 $0.113 20萬股
6885 $3.68 1萬股
1024 $85 1百股

龔成老師︰

我地投資股票，係希望買入一些優質企業，透過佢自然增長，達至財富增值目的。重點係長線持有優質股﹐唔係去做短炒，因為中短期走勢無人知。但長線持有，企業質素一定會反映在股價當中。

所以，你首先要改變自己過往十多年錯誤的投資方法，改為以長線投資作為策略。

投資前，一定要知道該企業質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

同埋，你唔好停留係「賺差價」的想法。當你一直持有這股，企業長期價值向上，就會帶動我地的財富有最大增長。成個效果，一定比你經常出出入入好。

你現時財富組合當中，已有一個住宅物業和一個收租舖位，比重都幾偏重左係物業類。故未來時間，應較集中累積優質股，令財富組合更平衡。

以你50歲年紀，都可以進行適度增值，但由於較近退休之年，選股上要保守少少。

中國電信（0728）係有質素收息股，可持有。

洛陽鉬業（3993），中國三江化工(2198)、協鑫新能源（0451）、呷哺呷哺(0520)、美圖公司（1357）、山東黃金（1787）、北控清潔能源（1250）、金馬能源（6885）質素較中等或波動性太高，唔建議持有太多。

中生(1177)、中國鐵塔(0788)、快手(1024)都有質素，但係是潛力股類，你可以照持有。但這類潛力股風險較大，以你年紀計，佔組合最多2成好了。

其餘無提及之股票，建議沽出較好。

未來時間﹐你可以以「平穩增值股」+「收息股」作為投資目標。若你想保守些，或預期自己距離退休年期不遠(5年內)，可以較集中收息股。

相反，你依然有一定時間增值，想進取少少，可以集中在平穏增長股上。

但緊記，要隨著年齡增加，慢慢增加收息股的比例。到退休時，你收息股比例，應提升至100%。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22692：

老師9618 9988 長線仲值得投資嗎？ 感覺冇咩起色
手上冇咩貨 9618只得2手 均價$328

9988 4手 $240
要點應對宜家嘅情況？

龔成老師：

仍值得長線，有兩點你要注意，第一，唔好太著重短期股價，你預科網類仍政策影響，中短期仍弱，要平常心面對。第二，都唔好太集中在同一行業，因此，要睇你持貨佔組合比例%，如果不多，就無問題，可長線。

就以阿里（9988）來說，佢有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，預佢現價約合理區中間，長線持有就得。

------------------------------------------------

Q22693：

老師點睇隻百度同B站？
內地科網股 一直探底
應否換股投資？

龔成老師：

你預中短期因政策風險，股價表現仍會弱。但本身仍有質素，只要耐心持有就得，除非你持貨過多，否則不用減。

以百度（9888）來說，有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。如果持貨多，先要減，否則可守。

------------------------------------------------

Q22694：

想問下，维他奶的管理層令我失望，就是一間大企業，危機意識管理没理由那麼差，由於問題出自管理層，所以長遠好難返到身。

维他奶根據購股權計劃發行43萬股，每股發行14.792,較上一个營業日的每股收市价21.45,折讓约31.04%

另外，龔sir, 我好明白2800對散户最安全，出面啲人成日話你叫人買2800。

龔成老師︰

其實維他奶(0345)能否返身，都係言之尚早，要觀察。因為消費者，好多時都係好善忘。

至於佢發行新股，其實不少公司會發放一些購股權給員工作獎勵，如果該員工行洗權利，就會發行新股給該員工。

由於發行了新股，所以現有股東每股盈利會被分薄左。但這些購股權未必一定會行洗，所以你係年報會見到，每股盈利有2個。

一個係"基本"，另一個係"攤薄"。前者係當期的實際每股盈利，後者係假設這些購股權(除了購股權，都仲會有其他金融產品，會影響這個數)，全部被行洗後，每股盈利會分薄至那個水平，給投資者一個預算。

現時维他奶已發行10.6億股，43萬股只係一個小數目，對股東影響唔大。

而盈富(2800)係一個唔錯組合，所以我經常推介，特別係推比一些投資初學者。

因為如果你係一個數學教援，對著一個小學生，你會刻意教微積分嗎？有需要為表現自己的知識，教他不明白的方法嗎？

當我比理財意見時，最重要是「適合」，如果強行叫網友買風險過高或他不明白的工具，我認為有點不負責任。

其實好多年前已經有評論話我只懂叫人供盈富（2800），但我咁多年都照樣叫人買盈富。

其實我一直都明白，盈富（2800）並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。

至於我叫人月供，都是同樣道理，對於不懂掌握買賣時機的投資者來說，月供股票是最好的方法。

------------------------------------------------

Q22695：

Thank u!! How about 2828 vs 2800 le?

龔成老師︰

恒生中國企業ETF（2828）是追蹤恒生中國企業指數之表現，即是中國的企業，當中不少都有一定的質素。只要中國經濟長遠增長，而這些企業合理增長，就能帶動價格保持上升。

由於這些國企的股價較為波動，你最好以長期的模式去進行月供，每次供的金額不用太大，以較長時期去平均價格，自然能減少風險。

長遠來說，中國仍不差，你可以進行月供。但就要每月留些現金，因為這刻未到平宜區。

盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

同樣地，若你以月供股票，買入的價格就能平均，不用擔心一次過在高位買入的風險。

2隻ETF都係有質素，但風險度2828會高少少，你要自己衡量。

------------------------------------------------

Q22696：

你好，本人月可儲5-7萬，積蓄因買了可購公屋只剩30萬，沒有投資經驗，有可能在1年後買到樓嗎？因看見一個粉嶺心儀地盤，

想盡可能在建築完成前，即2022年底有可能上車，而穩定女友又可夾大約50萬，本人做貨運收現金的，女友開鋪的，又大概要預多少做首期可過壓測呢？謝謝

龔成老師︰

如果從投資角度，其實1年係一個好短時間，就算再優質股票，都會有波動，令最終回報不確定性大增。因此不宜做任何投資增值﹐最多只可以做定期。

以你現時可動用資金，1年後大約150萬。若以你7萬收入計，買800萬以下物業，做9成按揭，供30年的話，應該都可以。

但當然，這個只係好初步計算，實際按揭是否批出，要視乎相關銀行準則。加上你工作係收現金，而且可能相對不算穏定，銀行計算你供款能力時，或會有調整，你最好向銀行問清楚，以免失算。

------------------------------------------------

Q22697：

請老師看看先父的股票，有沒有兩三隻可保留，謝謝

00536 貿易通 20000 股
00687 泰昇集團 70000 股
00737 灣區發展 12500
00889 連達科技控股 20000
00927 富士高實業 70000

00987 中國再生能源投資 88000
01080 勝利管道 21000
01123 中港照相 50000
01165 順風清潔能源 10000
01222 WANG ON GROUP 300000
01265 天津津燃公用 20000

01395 強泰環保 50000
01560 星星集團 100000
01685 博耳電力 20000
01900 中國智能交通 30000
02014 浩澤淨水 30000

02389 北京健康 54000
03332 中生聯合 20000
03882 天彩控股 20000
06161 泰加保險 10000
00596 浪潮國際 8000

00723 信保環球控股 3125
01041 林達控股 1000 (停牌)
00261 ＧＢＡ集團 400000
00575 壽康集團 97379
00612 中國投資基金公司 8000

00831 利亞零售 10000
01142 西伯利亞礦業 50
02222 雷士國際 50000
87001 匯賢產業信託 15581

市值大約50萬

以上乃先父留下的股票，應該大部份是劣質股，我不知買入價位 ，現打算沽出，換入優質收息作媽媽養老之用，老師可否幫忙看－下 ，以上有沒有兩三隻可以留低不賣，謝謝你

龔成老師︰

其實買入價位，係你買入股票後，已經唔重要。持有與否，最重要係睇佢有無長線質素。

貿易通(0536)、灣區發展(0737)、匯賢產業(87001)、利亞零售（0831）係質素的收息股，適合你，你可以保留。

連達科技控股(0889)、富士高實業(0927)、中國再生(0987)、星星地產(1560)質素較一般，保留係可以，但最好只留下小注。

其餘股票，都係質素較弱，或者係不適合你這類退休人士持有，你可以沽出。

------------------------------------------------

Q22698：

日日已習慣係fb閱讀老師文章分析,遲來的學習。

我想入2800盈富,港燈,,價合理嗎？想各入5手,月供定現價入貨？用老師分析用1/5現金放入股票上,慢慢買入。勞煩老師百忙抽空教導。

另外開富途牛牛買賣,安全嗎？

龔成老師︰

富途牛牛做買賣，無問題。

除了盈富(2800)和港燈(2638)，其他我之前講的收息股，全部現價都合理。但由未到平，所以投資股票的1/5資金，都要再拆細。

現價先用大約一半，分注慢慢入貨。餘下一半，等大市有明顯回調，就再慢慢加大入貨力度。

另外，唔好只加這2隻股，可以再加入多少少不同行業收息股，去令組合更平衡。

只要個別企業和行業，不要佔組合15%和30%以上，銀行業更加不要高於組合20%，以免出現過度集中性風險，咁就可以。

------------------------------------------------

Q22699：

龔sir,想問下澳門規管賭業既政策(吾俾資金向外流)，對銀娛，金莎會係正/負/冇長遠影響？我地要點分析好呢？感謝老師

龔成老師︰

這個情況，相信主要係想限制一些人，利用貴賓廳便利，去轉移資金。

長線計，貴賓廳收入有機會因此而少左，但影響程度有多大，就要再觀察。

中短期，貴賓廳佔收入比重較高企業，會較受影響。銀娛(0027)和金沙(1928)都並非好集中係貴賓廳，故影響唔算係嚴重，同時近年已減少貴賓廳比重。

------------------------------------------------

Q22700：

老師，可以問下你對騰訊的睇法嗎？是否長遠來說都機會大升返$650左右呢？數碼人民幣會唔會取代它的電子錢包呢？

龔成老師︰

騰訊(0700)依然有投資價值，最近受中央政策和大市氣氛影響，出現較大回調，但整體質素唔見明顯轉差。

但集團已經好大隻，發展唔會好似以往咁快。要回至$650唔係無可能，但要點時間。

至於數碼人民幣會唔會取代它的電子錢包，係一個未知之數，2者有可能係並存。現時數碼人民幣都係試驗階段，好多野都未清楚。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21901-21920）

Q21901：

你好龔sir，多謝你無私既教導，係2019年6月我只月供股票，多謝你不停叫我們一定要留有資金等大市跌入貨，

終於我係疫情期間買了比較便的股票，有部分合理價，由賺第一個10萬，到而家賺到$70萬，離100萬差小小，開心到不得了，

有個2問題想請教龔sir, 因黎緊諗住同女朋友買樓投資，可能要賣出部份股票先夠，手頭上資金大約10萬，及我持有以下股票：

2手1211 @34.9
3手1830 @2.4
2手9988 @218
10手1177 @7.8
2手3319 @29

8手3067 @16.5
6手1928 @29
12手 1972 @19
1手270 @11.5

1）潛力股同平穩增股差唔多5:5，我在考慮如果需要買樓我應那種隻股票較好？請教老師幫忙

2）我睇過龔sir 既買樓4部曲，所以想將股票投資細物業，等將來換有能力再換Dream house,我們睇左2個細單位

佐敦$570萬 250呎 15年樓齡 2分鐘行到地鐵站，附近多食肆交通方便 / 西九龍 $530萬 280呎 4年樓齡，地區旺中帶靜，行8分鐘到地鐵站，附近食肆林立

兩個單位都係一房一廳

如果以投資角度是否佐敦升值會好啲？

龔成老師︰

1) 其實你最重要的分析點，是「餘下的組合，之後的長遠發展情況，怎樣配置對你最有利」。

這些股票都有質素，最理想係長線持有。但若真的要動用，可以從估值著手，先沽出較貴，變相無咁高值博率的股票。

比亞迪(1211)和完美醫療(1830)現價都偏貴，由於佢地升左唔少，令佢地佔你組合比重都偏高，你可以優先沽少少。記住，一定要留部分在手，不能無貨。

其餘股票，你按比例沽就可以。但緊記只係沽出部份，唔好沽晒，必需留有一定持股，去維持股票類的增值。

如果你想組合增長力較強，就賣出一些增長力相對無咁強的，例如太古地產（1972）。

2) 初步睇，2個物業投資價值都相若。佐敦較接近旺角，人口較密集，感覺會比較迫和雜，會扣少少分。（因為從自住的角度考慮）。

而且，西九龍呎數較高，同時較新，整體投資價值，可能會好少少。

------------------------------------------------

Q21902：

啊sir 我想請問你點解可以咁厲害。咁多人問你咁多唔同行業股票 你都可以講到咁多評論同深度分析

龔成老師：

因為我每日就係花時間，研究企業及行業，這是我的全職工作。

我幾年前職去銀行工，做全職投資者，所謂的全職投資者，並不是日日睇住個市睇股價，真正專業的投資者，是花時間研究企業，睇企業年報，大行報告，行業研究，我的工作就是「研究企業」。

我未必比人叻，但我每一間企業、每一個行業，研究的時間都比人多，自然對企業有更深入的了解，投資成續都較好。

------------------------------------------------

Q21903：

早晨呀！龔Sir, 我有2隻股票想請教你呀！

1. 快手(01024): $315時入左一手, 衰貪心高位時無放, 跌緊時又無止蝕, 請問我現在應否止蝕 或 再持有等高位再放呀？若等, 大概咩價位放？

2. 華泰(06886): 抽新股時$24.8抽中一手, 到現在一直回不到招股價, 請問我應該止蝕呢？

希望得到你回覆寶貴意見. 謝謝！

龔成老師︰

1) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。你現貨可以長線持有，但你預佢短期股仍會十分波動。

2) ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強。若你只有一手，你可守住先，等下次大市狂熱期才沽出。

------------------------------------------------

Q21904：

你好！龔成老師，我今年27歲，月入$25k，三年前睇左你既著作，就開始月供股票，一開始都係$1-2千咁供。最後悔係大概$60既時候放左比亞迪！

依家我都有維持月供既習慣，以下係我既股票組合，想請你比少少意見

股票/持股數/月供金額

2800 盈富/1757/ $1000
1928 金沙/999/ $2000
9988阿里巴巴/47/ $2000
1299 友邦/77/ $1000

0052大快活/1000/- -
1310 香港寬頻/2000/ - -
3067安碩恆生科技/200/ - -
1297 中國擎天軟件/ 2000/ - -

暫時手頭上現金不多，9成儲蓄都用作投資股票市場

黎緊我會加大儲錢力度，每月大概可儲$15000，如果我希望5年內滾存到120萬或更多，請問我可以如何部署？

我已經錯過左比亞迪呢隻潛力股，龔老師，可以請你再推薦一隻潛力股給我嗎？

另外我想提升自己選股能力，由其是企業估值方面的能力，可以為我推薦一些學習途徑嗎？

龔成老師︰

緊記，一間企業再優質都好，成長係要時間。所以，當你持有一隻優質股，就要比時間佢慢慢成長。唔好急於為左10-20%回報，就急住放。我地要長線，爭取係以倍計的回報。

比亞迪(1211)現時依然係有質素的潛力股，有長線投資價值。但現價已經偏貴，要回到$135才算合理少少。如果月供，最好再等回少少先，或者只宜月供好小注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲年紀，應集中在財富增值部份。你現時持股，大致都適合你，長線持有就可以。

當中中國擎天軟件（1297）本質不差的，但規模較細，以及行業存有風險，唔建議太過大注。

香港寬頻（1310）則只係收息股，增長力欠奉，唔適合你。

你還很年青，應該好好把握時間優勢，去盡力做好財富增值。你現時月供組合係可以，但以你年紀，有少少保守。建議你加入一些潛力股，去增升增長力。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

若你目標係5年增值至120萬，我假設年增長率為10%，你就需要每個月投入$16000，才可以做到。

而學習方面，你可以多讀投資相關書本、年報，新聞和課程。

你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21905：

龔sir,（1）請問龔sir，＃1988 民行還是＃1658 郵儲銀行好？

（2）另外，其實我一直想入9988，聽龔sir 教阿里都好正面，請問應該咩價位入好？近期都升了不少了

＃823 一直响$70邊，想佢跌少少再入，但又唔跌
＃1810已經揸住差不多10萬蚊，均價都係$28左右，想溝（現價$24邊），但會唔會重倉左？

我持有 823 好少貨，如果想入173 嘉華，會唔會有重覆呢？173 既前景如何？龔sir 建議入嗎？

龔成老師：

1）民行（1988）及郵儲（1658）都不差的，而郵儲略好。

郵儲銀行（1658）有質素，佢業務包括公司銀行、零售銀行及資金業務，以「自營＋代理」的營運模式。

佢共有4萬個營業網點，有一定的規模及網絡，過往發展正面，都有增長力，但就未必是高增長型。

現價合理，有收息及增長，都有投資價值。

2）阿里（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。這股可以長線投資的。預佢現價約合理區中上部。

領展（0823）現價合理，如果你本身持貨不多，現價加注可以。

小米（1810）雖然有質素，但如果你已有一定的持貨%，就不要再加了。

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

佢同領展，算是有部分重覆左類別，因此合共的比例不能太多。

------------------------------------------------

Q21906：

老師你好，看過你的書及網頁後，明白行動重要性，感謝你的分享，現想請教關於置業及財務自由問題，先簡單講一下我們情況

家庭成員：我41歲，丈夫43歲，兩名小朋友3歲半及10個月

每月家庭收入：$64,000
每月家庭支出：$40,000
流動現金：$2,600,000
股票：$80,000
物業：已供滿荃灣2房單位，約值450萬

現想購買第二物業作投資，樓價預算400-500萬左右，3-5年後希望換同區3房單位作自住，現有物業放租，老師建議應該如何步處，選樓時又應該注意甚麼地方？

理財一向過於保守，近一年才開始月供股票，每月$6,000，以盈富基金及比亞迪為主，長遠希望可以製造每月2萬現金流，獲得財務自由，應如何投資比較好？謝謝

龔成老師︰

如果你希望長遠會有每月2萬蚊現金流，以股息率6%計，你需要本金400萬。

現時，你可以利用月供股票和現有資金，去累積這筆資產。以你41歲年紀，你現時月供組合係可以。

但比亞迪(1211)這類潛力股，波動性較大，不宜持有太多。潛力股，佔組合4成左右好了。若你投資經驗較少，最好下調至2成大右。

而且，比亞迪(1211)現價略貴，月供係可以，但小小注好了。以下是其他適合你的股票，供你參考。

現時大市只在合理區，每月你可以用儲蓄一半，去做月供﹐另一半儲起。而現有現金，都可以用部份，去分注買入上述股票。餘下資金，就用來等大跌市機會。

至於買收租樓，係可以。但我地財富組合除左要有增長力和質素外，平衡性都好重要。

你現時已有一個物業，若再加一個，會令你組合有少少偏重左係物業類，會產生過度集中性風險。

而且，現時香港樓市唔平，若從投資角度計，股市值博率會較高。除非你找到一個增長潛力不錯、租金回報率理想的旬盤，否則你先用優質股去做增值，會較有效率。

因此，買樓收租這一步，方向可以伴，但未必一定要太急進行。

------------------------------------------------

Q21907：

龔成老師你好，我今年32歲，今年開始偶然間留意到老師個Facebook page，認識到長期投資嘅威力，之前多數都係短炒，蝕左唔少錢，

宜家想好好設計自己長期投資組合，想問下老師如何改善同部署。多謝老師！

基本資料：

32歲，月入22K，有一自住物業，一個小朋友，月供連家用13K，每月可儲5K。

股票本金$148,000

水桶1 $69913 ：47.24%
1177 $7.56 中生製藥 1手 藥品 $7560 ：5.11%
9928 $7.13 時代鄰里 1手 物業管理$7130 ：4.82%（打算$7放）
3067 $18.28安碩恒生科技 6手 ETF$10968：7.41%
6690 $30.8 海爾智家 1手 家用電器$6160 ：4.16%
981 $22.65 中芯國際 1手 半導體$11325 ：7.65%
658 $5.08 中國高速傳動 1手 環保$5080 ：3.43%
2618 $45 京東物流 1手 倉儲物流$4500 ：3.04%
6060 $38.65 眾安在線 2手 線上保險$7730 ：5.22%
6618 $103.2 京東健康 1手 線上醫療$5160 ：3.49%
1773 $4.3 天立教育 1手 教育$4300 ：2.91%

水桶2 $78090 ：52.76%
1313 $8.9 華潤水泥 1手 建築材料$17800 ：12.03%
688 $18.5 中國海外1手 地產發展$9250 ：6.25%
3868 $3.7 信義能源 1手 替代能源$7400 ：5%（打算$4放）
270 $11.5 粵海投資 1手 水務供應$23000 ：15.54%
3718 $1.29 北控城市 4手 環保$20640 ：13.95%（打算$1.3放2手）

1.唔係好識分咩係潛力股咩係平穩，唔知有冇分錯，覺得增長好似有啲慢，應該投資多啲優質股嗎？將來想集中投資係電動車/環保/再生能源/京東/阿里/小米。

2.會太過分散嗎？如果會老師建議賣邊隻？本人可以接受風險！

3.三年後有機會增值到50萬嗎？因想再投資物業自住，原物業放租，及計劃會再生多個小朋友。

龔成老師︰

1) 我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你現時水桶分類，大致都正確。除了海爾智家(6690)和天立教育(1773)算係水桶1至2之間。

而你持有的股票，都有投資價值。你唔好太過在意中短期回報，我地要睇長線。這企業都有質素，你只要長線持有，就自然會有唔錯架回報。

至於你將來集中投資的行業和股票，都係偏向潛力股類別。佢地有較高增長潛力，但同時間風險都唔細。

以你32歲計，潛力股佔最多5成左右好了，否則會令成個組合風險過高。若你投資經驗較一般，你更要將比重進一步下調。

其餘部份，你應該配置在平穏增長股，組合才算平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

2) 你現時組合的確有點散亂，以你組合金額來計，大約持有5-10隻會較理想，會比較易於管理。

但由於佢地都有投資價值，我唔建議你沽出任何一隻。但將來時間，你最好集中翻係5-10隻較有質素的股票，會相對較好。

中國高速傳動(0658)質素較中等，而眾安在線(6060)和京東健康(6618)不確定性較大，這3隻股票，都不宜持有過多。

3) 我假設投資回報有10%（連股息再投資），若你每月能投資$10000 + 現有持股約15萬，3年後大約會增值至60萬。

但3年只係一個中短期時間，最終回報的波動性會較大，你要明白這個風險。

而且，你現時已有一個物業，若你勉強再去買多一個物業收租，你會令成個財富組合，偏重晒係物業類，會有過度集中性風險。

因此，我建議你先用優質股做增值。到你財富累積到一定水平，係足以買入新物業之餘，都有一定優質股留底作增值，你才出手會較好。

------------------------------------------------

Q21908：

龔成老師你好，自從上年同你第一次對話之後已經開始月供計劃，明白財富需要時間去累積，所以我都學識唔好成日望住個市，多謝你無私教導！

現時開始緊每月供款如下:

$2000 @ 盈富 (2800)
$1000 @ 新鴻基地產 (00016)
$1000 @ 比亞迪 (1211)

想問如果想加0388港交所，其實月供係咪唔使太在意現價？1211依家咁貴係咪應該停一停？謝謝你！

龔成老師︰

以你30歲計，現時月供組合係適合的。

其實月供，我地同樣都要用平貴去定策略。只係月供有平均價格的效果，相對直接買貨，風險會較細，所以個價格可接受空間，會稍稍較大。

但若果佢價格水平，係太貴，我都會需要控制月供注碼，甚至係停供。

比亞迪 (1211)現價偏貴，月供勉強可以，但只可小小注，故你維持住$1000先。但佢再升，你就可能要減供款，甚至停供。

至於港交所(0388)現價略貴，但無比亞迪咁嚴重，你現時做月供係無問題。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21909：

我每年大概要給9萬保費（連家人），我唔想草係銀行到，近一年都有月供股票，月供2800@6千，9988@4千，另外每月1手3067

剛剛草10萬現金，以家想草多5-8千，做月供股票for每年繳9萬保費，保費要供20年。當中有2份醫療，3份危疾供20年，1份年金供10年

龔成老師︰

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時要支付的年金保單，如果係你較年長家人持有，係可以。但若你係這類3X歲的偏年青人士，就不太適合。

另外，你要明白一點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔諗住年頭不停月供去儲股票，之後年尾就沽晒佢，去交保費。因為優質股係要長線持有，才會有理想效果，長線係講緊3-5年，甚至更長。

短期投資回報，會好波動，如果你用這個模式去操作，好易會失預算。

我建議你維持現時月供習慣，並將這些股票長線持有。而交保費部份，你另外以現金模式儲起就好了。

你現時月供計劃係可以，現時大市只在合理區，每資金唔好盡用。最好留有部份，等大跌市出現時，可以用來掃貨。

至於現有10萬資金，可先動用一半入，餘下一半同樣等大跌的機會。

------------------------------------------------

Q21910：

老師我想月供股票，但我間證券行無提供月供股票服務，如果我將自己的資金自動分配，
e.g. A, B, C, D 股票，
一月 A
二月 B
三月 C, D
四月 A
五月 B
六月 C, D
如此類推，請問可以嗎？

龔成老師：

可以。

月供股票的目的，就是將買入價平均，減少一次過在高位買入的風險，你上述的投資策略，都有類似的作用，因此可以進行。

------------------------------------------------

Q21911：

請問6969有前景嗎
請問北水流出流入什麼意思？

龔成老師︰

思摩爾國際（6969）係霧化科技解決方案提供商。近期國家衛健委表示電子煙並不健康，相信對佢會有影響。

先講佢業務，第一，佢以ＯＤＭ模式為全球煙草公司及獨立電子霧化公司（如日本煙草、英美煙草、Ｒｅｙｎｏｌｄｓ Ａｓｉａ－Ｐａｃｉｆｉｃ、ＲＥＬＸ及ＮＪＯＹ）研究、設計及製造封閉式電子霧化設備及電子霧化組件。

第二，佢做研究、設計、製造及銷售自家品牌（包括「Ｖａｐｏｒｅｓｓｏ」、「Ｒｅｎｏｖａ」及「Ｒｅｖｅｎａｎｔ　Ｖａｐｅ」）開放式電子霧化設備或ＡＰＶ（高級進階私人電子煙設備）。

相信，中國將加強行業監管，對佢有核心不利，這點都會影響企業估值，加上這股一向唔平。

基本上業務不算差，有當中的獨特性，以及長遠有增長力。不過，現價唔算平，加上監管風險，如投資，要小心控制注碼，真的小注好了，而這股有長線投資價值的。

北水流出流入，是坊間指內地投資資金，進出"滬深港股通"的意思。

------------------------------------------------

Q21912：

你好龔成，現正拜讀您的新書-千萬富翁，因剛剛已成為了百萬富翁！haha!

多謝您！我好感恩有您教導香港人正確投資方法，而不是炒炒賣賣。您真的影響左好多香港人，而家多左甘多百萬千萬富翁一定有人係因為受您影響！包括在下。

除了多謝您都不知說什麼好，同埋我好tang您開心，深信愛股比亞迪長遠有高增長，擁抱價值投資法，不理坊間閒言閒語，經過多年努力投資，今日成為千萬富翁，吐氣揚眉，恭喜您！

您將會成為億萬富翁，只是時間問題。

大家香港人一起努力

龔成老師︰

多謝你的支持

我都係希望透過自己知識分享，去幫助更多人，去真正理解投資理財這件事。

看到你能成功成為百萬富翁，真係好開心。但緊記，長線投資要做得好，除左用正確方法之外，必需要保持學習，令自己一直進步，這點是很重要的。

我相信，不久將來，你都會和我一樣，成為千萬富翁，甚至走得更遠，加油。

------------------------------------------------

Q21913：

龔sir，唔好意思呀，又想問問小米1810, 我30.5買， 2000股，早前升到最高去番30.45 但我冇放到，下星期我係咪應該蝕放，等佢跌番落去先再入番呢？ 謝謝解答

龔成老師︰

你係投資理解上，存在一些好核心性的問題。

首先，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔會係做短炒，去賺差價。

另外，我地投資唔好去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

我地投資應該係先了解企業質素和前景，當確認係有優質，就再審視佢平貴，去定入市策略。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線持有，但你預佢股價會較波動。

------------------------------------------------

Q21914：

你好，龔sir, 現有276萬現金，但1年後要比200萬我家姐，請問呢1年內買咩可要賺取高息又保本

龔成老師︰

坦白講，只有1年時間，要保本和收息，那200萬部份最穏當選擇就係做定期。

因為，就算係再保守的收息股，都會有機會出現價格波動，令你出現賺息蝕價的情況。

至於餘下76萬，你可以因應你人生階段、投資經驗和風險承受能力，去作出配置。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

大市現處於合理水平，那76萬資金，可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21915：

我其實是你的學生，但我於上年開始follow你的post，從中學到很多投資股票上面或人生的導向的知識，真的獲益良多，希望你介意我稱呼你為老師！

我在幾年前因被公司遣散，之後適逢社運之係又疫情，所以順理成章專心做家庭主婦照顧家人。我一向有投資股票的。

但過往買的真是一些垃圾股，過去的就不再提了，當是一個教訓。 自上年我在fb認識到你。我都買了你的一本著作[股票勝經], 仍在努力中，希望盡快睇完這本再睇第二本。

你常常提醒我們{買股票不是買佢的股價，是買佢的企業，若是優質有質素的企業，就算跌市也不用怯}，同時買股票都要有耐性不能心急，要長期不是短視。

我之前就是中哂這些錯誤的方法。1、2月時幾次大跌市，我手上有2382，175，2333，3690，因跌好多，好驚越跌越蝕得多，所以忍痛蝕走。但之後市回返就升返上來。

可能你睇到依度都會話我蠢、傻！。 依家我會時時刻刻都記住你的真言。若是優質的企業就不用怕。

sorry, 好長篇。想借此機會多謝你。 同時有幾點想請教你

1. 怎樣知道是股票是優質不優質？

2. 我現有3993，358，是優質股嗎？ 3993 > 6.28 算高位入358 > 21.5 算高位入，兩隻可繼續持有嗎？

3. 另外，想幫我仔（剛成年）月供股票，心目中想供1810或1211，兩者邊隻較適合？但兩者現價又升返上來！同時不知道怎樣月供股票？可否賜教？非常感激!

龔成老師︰

你過往所經歷的，絕對唔係你個人問題。其實很多初階投資者，都會經歷的，係一件平常事。重點係，你有無從中吸取到教訓，之後再重新上路。

1) 要分析一間企業，有無質素。過程比較複雜，好難三言兩語就講到，就算在我的股票班，都要講數小時。

簡單來說，你要考慮企業本身質素、行業發展、財務狀況等，去分析一個結論出來。

2) 洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較難分析。

另外，這股的股價較為波動，這股不是不能投資，但不宜大注。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

這2隻股票，若佔你組合比重不高，可以守。但若果係較高，我建議你沽少少，去平衡個風險。

3) 月供其實好簡單，你去銀行或者證券行開個可月供的投資戶口。你睇下個月供費用，同埋邊個方便你自己，就可以。

你仔仔較年青，投資可以進取少少。你所選的2隻股票，都係適合的。

但現時比亞迪(1211)偏貴，要月供的話，只宜小小注。而小米(1810)現價開始月供，係無問題。

另外，我建議都加入一些平穏增長力股，在月供組合。因為畢竟潛力股(1810, 1211)風險都係較高，佔組合比重太多，唔係咁理想。

你仔仔在潛力股和平穏增長股，最好約各佔一半，就算得上平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市算在合理水平，每月資金唔好盡用，大約可以動用一半做月供。餘下一半就等大跌市出現時，可以用來掃貨。

------------------------------------------------

Q21916：

上完你堂， 特別係最後一堂，覺得好有意思。

原來會將間屋當wallpaper唔係得自己，不過我係自己間鐵皮屋，日日提醒自己連普通人都算唔上。

好記得你27歲果陣就有一百萬，我都岩岩到數，不過行的路同實現的方法同你都唔同。我過去係靠基金都努力甘捱到宜家33K人工。

來緊會多用你方法，希望你我最後都可以有自己想要的物業，對你來講可能果個係自己的一個小天地，對我來講物業反而係代表我的存在價值。

共勉之。多謝你搞呢D Course比我地。

龔成老師︰

你無需要這樣想，在這個世界，每個人都是一個獨立個體，無得定義話邊D係普通人，邊D係唔普通人。

我地做人，最重要係對自己內心負責。你唔需要同別人比較，因為你就是你。只要找一條自己合適的路走下去，咁就可以。

你27歲，相當之年青。只要你好好學習，用正確投資方法(記得溫書)，持之以恆。我好有信心，你一定可以擁有自己理想中的物業。

加油，保持努力!!!

------------------------------------------------

Q21917：

想問問中國白銀集團00815 前景點睇

中國海洋石油00883。10.18@17000，中國鐵塔1.23@64000，呢2隻止蝕離場定可以長揸..？Thanks

龔成老師︰

中國白銀集團（0815）的質素不太好，因為佢的業務較為波動，之前亦出現了虧損，佢主要於中國從事製造及銷售白銀及其他有色金屬；黃金、白銀及珠寶產品的零售及批發等。

這股又不是完全無價值，現價合理，但只宜好小注。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。若佔你組合不多，可持有。但若佔你組合較多，建議沽出部份。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線持有。不過，潛力度比過往略減。

------------------------------------------------

Q21918：

老師你好， 想問一問如果我還是投資初學者，但準備下年到加拿大移民， 當我移民後，應該繼續研究香港股票市場，還是美股？ 繼續研究香港上市公司買港股投資應該較易掌握？

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

而你投資那一個市場，就要視乎你對相關市場的了解。基本上，研究2個市場的企業方法，都係好接近，無話邊個較易掌握。當然，你本身係香港人，相信會較了解香港和內地文化，在分析港股行業時，會有優勢。

如果你想投資港/美股，但現時對港/美股又唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

盈富(2800)係包括58間質素不錯上市公司股票的組合，有長線投資價值。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21919：

龔sir，本人現56歲，月入19,000（近乎月光族）, 每月供樓約6,000作自住（最後供款期為小弟73歲），流動資金40,000，現想開始月供股票，每月投放約1,000-1,500。

小弟有以下問題想請教：

1. 以我現時情況，如開始月供股票，應否選擇增長型股票，還是選擇穩健型股票？ 以下股票合適可選嗎？

0016 新鴻基地產
0066 港鐵
1211 比亞迪
1810 小米
9988 阿里巴巴
2382 舜宇光學科技

2. 因樓按要供至73歲，應否於加息週期開始時，將樓按改為最後供款期為65歲，這樣更改去減小利息開支，做法是否明智？ 還是將月供股票財富，到最後幾年才提早贖回按揭？

龔成老師︰

1) 以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

你選擇的股票，係有質素。但組合過於進取，除了新地(0016)和港鐵(0066)是平穏增長股，較合適外。其餘都係潛力股，對你而言，風險太高，我都太建議。

而且，你現時每月可以資金好了，供太多隻，會令個股月供成本過高，咁係唔理想。

你可以暫時先隻中供新地(0016)和港鐵(0066)，到你有再多資金，才月供以下股票。至於現有資金，可以先用一半。餘下一半，就等大跌市時，才動用。

但由於你已近退休之年，這2隻「平穩增值股」唔適合一直供落去。你要隨著年齡增加，慢慢換碼，去增加收息股的比例。到退休時，收息股應佔100%。

2) 這個要視乎加息多少，因為只要你長期平均回報率和借貸息率，係存在一個明顯息差，你係應該維持現有還款計劃。

但若果加息比較多，可能息差以收窄(不足2%)，你就可以考慮用較多新資金，去做還款。

不過，我唔建議沽貨去清還貨款。因為我地無人知個市場環境會點走，你一次過清晒成個股票組合，其實係好高風險。

------------------------------------------------

Q21920：

老師好，最近很迷失，想問以下幾隻股票應該怎安排好。

136,
369,
769,
1029,

1705,
1830
3800,
6988

龔成老師︰

完美醫療（1830）和樂享互動（6988）有一定的質素，現貨照長線持有。但現價偏貴，不宜加注。

恒騰網絡（0136）都算有質素，但不確定性高。而賓仕國際（1705）質素較一般，2者都不宜持有太多。

永泰地產(0369)、中國稀土（0769）投資價值好一般，長線換至其他優質股，會較好。

鐵貨(1029)無乜投資價值，建議沽出。

保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

我地投資一隻股票，就等同投資一間企業，我地必須認真分析佢的質素、行業前景、財務狀況等，才好做投資。

我見你過往選股，大部份質素都唔係太理想。如果你選股能力較弱，我建議你買一些ETF，好似盈富(2800)。

它是包括58間質素不錯上市公司股票的組合，這些股票有升有跌，但長期計，都有不錯的回報。買入盈富主要有兩個回報(分別是股價升幅，加上股息回報)，股息不多，大約只有3%。

而股價升幅，其實有升有跌，每年都會波動，但長期平均計，都有5%-10%，當然，這是不一定的。若你以月供股票，買入的價格就能平均，不用擔心一次過在高位買入的風險。

雖然盈富(2800)增長力，唔算十分高。但佢係一籃子優質企業的組合，對於選股能力較弱的初學者，絕對係一個唔錯的選擇。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19941-Q19960）

Q19941：

你好龔成！我岩岩睇左你本買樓4步曲，關於整個流程有些問題想請教你。假設我想問買800萬既樓為最終目標。

第一步-開啟動基金及第二步-利用投資工具增值，這2步我認同。

但我可以直接去第4步買dream house 800萬？因為如果經第3步先買細樓，就有假設: 細樓價的升幅會高過其他投資工具（例如股票）

而且太早買樓可能錯過投資潛力股的回報

根據你既資料，香港樓價「平均」每年升10%，而投資增值股及潛力股應該遠高於這回報率？

龔成老師：

其實，這是一個資金「怎樣增值」得最好的問題。

你的目標是$800萬物業，當你完成第1步、第2步後，已經有一些資金，你下一步就要思考，怎樣利用這些資金，去追到$800萬物業。

主要有兩個方法，第一，買細價樓去追$800萬樓，因為兩者都是物業類，會出現「同向」的情況，即是相關系數高。

第二，利用潛力股等工具，去追$800萬樓。

其實，上述兩個方法，無話那一個絕對正確，而你$800萬樓，與細價樓相差不算大，所以，利用物業追物業，當中的買賣成本都有一定數目，而你利用潛力股去追，不是不可。

過往30年計香港物業，平均增長約9%，租金3%4%，但預期增長會減慢。

因此，投資潛力股的回報，的確會較物業好，但投資潛力股有兩大風險。

第一，變數始終較大，可以大升可以大跌，到時你不一定成功追到物業，永遠要記得，投資有風險，所以，好睇你自己的投資實力。

第二，並不與樓市同步，你不知道要買樓時，到時股市情況無人知，如果你持股跌但樓市升，你就無法追到物業（但利用細價樓追大價樓就無這情況）。

------------------------------------------------

Q19942：

龔sir, 想問下對3993同1772睇法，謝謝

龔成老師︰

洛陽鉬業（3993）業務波動比較大，你睇翻佢之前的財務數據，會見到盈利變化好大，這必定會令股價波動大，投資這類股要小心。

業務層面算是不差，都有投資價值。但現價略貴，要等有明顯回調，才可分注入貨，同時注碼就不能太大。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q19943：

老師，2018 好似升吾到多， 佢有前景持有嗎？
968 信義光能長遠睇嗎？ 謝謝你

龔成老師︰

瑞聲科技（2018）質素不差的，手機行業的增長比過往年代弱，相信佢只會進入平穩期。

佢本身有一定的規模與技術，整體前景不算差，但就要多點時間去轉好。

長遠發展正面，不過，佢增長力不是好強，只能視為平穩增長類別。現價合理，可以分注投資，長線持有。

信義光能（0968）有質素，環保能源會係大勢所趨，未來光伏行業，在中國以至全球發展都係正面。

業務上保持一定增長，股本回報率處高水平，加上現金流強勁，是有一定質素。

現價計略略貴，如果想入，要回翻D先可以慢慢分注。這股上落比較大，故投資時要控制注碼。

------------------------------------------------

Q19944：

你好 龔Sir ，我今年30歲，每月可用$6000做月供，現時每月月供股票如下：
1211 比亞迪 $2000
2800 盈富基金 $1000

打算每月增加$3000月供，如下：
3067 安碩恆生科技
3319 雅生服務
1177 中生製藥

新加的$3000應如何分布？？？應集中在現時2個月供股票內，還是適宜購買新月供股票？？？謝謝

龔成老師︰

現時大市在合理區，每月資金宜先用一半去月供，其餘儲起等大跌市機會。

你月供選股有2個問題，首先比亞迪（1211）已經偏貴，要回到$120才適合再月供。

第二，你太集中潛力股類，除了盈富（2800）外，全部都係潛力股。咁個組合波動性風險會太高，最多係"平穏增長股"和"潛力股"大約各一半。

我建議你轉成$2000盈富（2800） + $1000 安碩恆生科技（3067）、雅生服務（3319）、或中生製藥（1177），餘下$3000儲起，咁會較好。

------------------------------------------------

Q19945：

龔Sir 有幾條問題：

1）你覺得港股既增長力及潛力係咪不及美股？

2） 我最近都有買美股 其中一個原因係入場費低 我本金唔多 一股股咁買賣較彈性

容易做到分注既效果 但往往有時頭幾注金額太少（HKD 2000） 然後股價升到唔理想既情況
我個人又比較謹慎（或者係細膽） 分注既技巧應該點？

3） 有時選股時會先入為主左，可能會有種諗法係「龔Sir有持貨，應該冇錯」

自己再用返上堂教既方法去confirm多次就覺得ok，「龔Sir冇買就應該麻麻地」

好容易有種抄功課既心態 我可以點樣改善呢樣野

4）我終於決定左報進階班了，我本身個憂慮係課程唔用美股做例子，感覺港股較難

但越難既野越少人識，希望學完就應該對港股更加了解，畢竟我唔會移民。7月見!

龔成老師︰

1） 港股加入了不少內地有潛力企業，增長力未必不如美股。

我好相信，10年後，20後，中國及美國，都是全球最強的兩大經濟體。

2） 我地買入股票，一定係用平貴做策略。價格合理時，就分注慢慢入。到平宜區，就大力掃貨。

但要留意這個平貴，唔係指入場費多與少，而係指企業本身質素所計出來的估值。

3） 你可以試下當自已係一個唔識我架第三者，去重新睇一次自已架分析。盡力去試下去推倒自已架分析，如果都係發現好堅實，咁你架判斷就好大機會係正確。

就等我無貨，都可以是有質素的，我多年來只持有5-10隻股，因此你不能否定其他股的。

4） 其實投資方法和企業估值模式大同小異，只要你掌握到個要決，用來投資港股和美股都可以。因為我是教「價值投資法」，即是巴菲特用的方法。

7月見！

------------------------------------------------

Q19946：

謝謝老師，另外剛剛媽媽給我5萬想我幫她買收息股，請問現價中電，恒生和中銀香港可以嗎？哪一隻較好？

龔成老師︰

中電（0002）、恒生（0011）和中銀香港（2388）現價都合理。

當中中銀香港（2388）股息率最高，但由於佢有一定增長潛力，故有一定波動性，若只想收息，唔算太合適。

你可以選另外2隻，恒生（0011）現價可入1手。而中電（0002）現價入都可以，但等到有5%左右會較理想。

------------------------------------------------

Q19947：

龔Sir您好：三個月以前我還是個對股票零概念的新手，現在慢慢根據老師的資訊逐步開始認識當中。

我現時三十初，過去也是月光族，但現在覺悟了。既沒有財力，青春也過了一部分，

所以理財投資想重頭開始，可能比較遲，但還是想開始。現時月入一萬中，
每月存錢加投資股票金額可在七千元左右，想問：

1. 對新手有什麼建議和方向？

2. 在金額不多的情況下，應該如何開始和設定股票比例？

3. 若選騰訊（700）和比亞迪（1211）作為月供股票，另加中國銀行（3988）覺得適合嗎？

龔成老師︰

1） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應用"平穏增長股" + "潛力股"的組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2） 如果金額不多，供得太散會令成本過高，你可以集中供盈富（2800）先。

3） 騰訊（700）和比亞迪（1211）可以，但比亞迪現時太貴，要回到$120才適宜做月供。而且佢地都係潛力股，最多只宜佔你組合一半，太多會風險過高。

中國銀行（3988）是收息股，無乜增長力，唔適合你年紀。

------------------------------------------------

Q19948：

龔Sir, 你好，註冊護士。都入左行幾年，自已希望除護理技術及知識上有進步外，希望可在投資上進一步多些。

我係投資新手，剛剛先多留意股巿及今年目標要強化自已投資眼光及擴大自已投資版圖。

我主要都係藍籌為主，我主要長線投資，未必成日睇到個巿。以下D股票，都係最近先買。

1. 盈富（1手）18.5（好多年前買落，第一隻股票）
2. 煤氣（1手）11.7
3. 港華燃氣（1手）3.5
4. 中國中車（1手）2.76
5. 中國海外發展（1手）15.36
6. 中移動（1手）44.85
7. 中聯通（1手）4.91
8. 中石油（1手）2.47
9. 中國生物製藥（1手）7.0
10. 醫渡科技（成功抽到1手）

ii. 我都有一個旺角物業4.1m, 333呎，30年樓，裝修好就會出租。

a. 希望龔Sir 可為我的投資組合提供少少意見。

b. 作為初學者＜股票勝經＞和＜選股勝經＞最大分別是？
我應先睇哪一本？

（我買左＜財務自由行＞及＜大富翁致富藍圖＞）
希望唔好介意太多問題，祝龔Sir 你身體健康。

龔成老師︰

a）股票係優質的話，就會自然慢慢升值，只要長線持有就可以。我地唔需要好似坊間個種炒賣模式，成日睇住個市。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

我相信係較年輕人士，因此你應以增值為主。中移動（0941）主要係收息，無乜增長力，唔好持有太多。

中石油（0857）都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股都不宜大注。

你現時組合略欠增長力，你可以慢慢加入一些潛力股，令個增長潛力增升翻。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時只有安碩恒生科技（3067）、阿里（9988）、中生製藥（1177）、福壽園（1448）算係在合理區頂部，可分注入貨，其餘都略貴，想買就要等一等。

b）《股票勝經》是入門，你睇這本先，《選股勝經》會更集中講選股。

------------------------------------------------

Q19949：

龔老師，我之前月供了0012，0027，0066，1177，2388，2800，每隻月供$2000，供了2年

但上年生了BB,開支大了很多，現在只能每月供$3000，應該如何分配？繼續每隻供$500？

龔成老師︰

你要睇翻手續費，如果每隻供$500，會令個股月供成本太高，就會影響你長線回報。

那你就要你可以用$2000去供盈富（2800），佢係包括52間質素不錯上市公司股票的組合，已包括好多優質企業。

另外再用$1000供中生（1177）這隻潛力股，以保持你組合有一定增長力。至於現有持股，一直持有就可以。

但如果手續費佔比不大，你保持原有，每隻$500月供都得。

------------------------------------------------

Q19950：

Hi 龔Sir您好, 有朋友建議多參考及請教您對投資的看法。看您是否方便給一下意見?

中國鐵塔（788）, 想請教下您對這股份/公司在1年, 3年, 5年的看法

個人比較傾向投資此公司, 基於:

A. 5G技術或可大規模被智能化城市運用, 不止是電訊業;

B. 未來基站建成長期收租之現金流保障;

C. 未來派息增加成為公用股前之增幅;

D. BONUS: 中國突破封鎖（中歐投資協定/亞太經合組織）, 鐵塔業務或有機會在5年後至10年間進軍中國大陸以外之市場。謝謝您的指教

龔成老師︰

我分析一間企業，通常都會用長線去睇，講緊係未來數年後發展，去衡量佢投資價值。

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

行業上，佢係有壟斷優勢，而且中國5G和未來發展成數字大國架策略，都會對佢有利。

此股係有發展力的，不過就比過往增長力略減，現價合理，可分注入貨，並長線持有。

------------------------------------------------

Q19951：

老師你好！想請教一下，我老公將退休，而我份工不算穩定，前排已買收息股，我手頭上有：

- 股票$200萬，大概每年收息$9萬
- 現金$180萬
- 樓按欠：$180萬

想再將$100萬增值，什麼途徑比較好？
謝謝

龔成老師︰

由於你先生將退休，投資上要保守些。

現有收息股不用變動，我地利用180萬，去投資"平穏增長股"來進行增值。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

另外，可投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

現時大市只是合理區，你現有180萬資金可以先投入80萬，用"分注"形式，慢慢買貨。餘下100萬就等大市出現一定程度的下跌，才大力度掃貨，然後長線投資。

------------------------------------------------

Q19952：

亞sir, 你好，我也是80後，現在正上你堂的學生，真係好精彩。

我在3個月前才認識你，開始睇你的書並開始買股票，買下買下，就發現把可投資的現金差不多買晒股票，我想問我應該放一部分股票，定唔好賣股票再慢慢儲現金?
但我每月能儲的現金大概只有$2000。
如果要賣股票，應該賣哪一些?我現有的股票：

股數 成本
亞里巴巴 200 248.5
必瘦站 12000 3.35
小米 600 31
新意網 4000 6.94
中國擎天軟件 3000 1.26
中國生物製藥 5000 7.61
領展 817 59.6
中國鐵塔 14000 1.15

龔成老師︰

現時大市只是合理區，現金和股票最好各佔一半。但由於你買架都係有質素，我唔建議沽貨。

現在你再有新資金，就先儲起等大跌市，才入貨。

但你現時持股中，除了領展（0823）外，其餘都係波動性較高架股票。這幾隻股增長潛力大，但不確定性都高，以你年紀最多只宜持有5成，當然，如果你認為自己有實力，佔組合比例可以過半。

未來新資金，建議你集中係平穏增長股，去令個組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

------------------------------------------------

Q19953：

本人 現時24歲剛畢業 未婚 欲置業
為自僱人士 收入並不完全穩定

平均月薪大約10萬（疫情失去8-9成收入） 手持70萬現金 50萬派息基金 派息率約8%每年

保險：已買基本保障 大約15000$一年

請問龔sir有什麼建議
*每月支出為5000-6000$ 與家人同住

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"，來累積置業用資金。但由於你收入不穏，最好先留下半年基本開支，才開始投資計劃。

你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只是合理區，你現有70萬資金（扣除半年開支後）可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。

另外派息基金有8%算可以，但你要留意翻佢係唔係保證，同埋基本本身投資什麼資產。因為佢有機會係投資一些高風險產品或債券，會令你有潛在的風險。

------------------------------------------------

Q19954：

你好龔sir 想叫你比小小意見， 我今年33 歲， 做左十年野， 收入幾穩定。 今年儲左大約5 百萬入市買左樓。

而家儲蓄大嘅仲有2百幾萬
儲左幾份基金大幾一百萬。

仲有一年就供曬
成世人都未做過其他投資， 但而家買完樓想利用手上資金試吓入市， 計劃用一半左右儲蓄， 想問問以下

目標係四十歲前流動資產可以有一千萬

1。 如果長線投資但手上有資金你建議一次入手定月供？

2。 有冇邊幾隻推介？

感謝

龔成老師︰

現時手上資金，可以先用一半，以"分注"模式慢慢入市，目標係"平穏增長股" 和 "潛力股"。

餘下不半，，就等大市出現，才去大力儲貨。

以恆指過去年平均回報10%計（連股息再投資），你投資$200萬資金，7年後大約會增值至390萬。

若你想達提升增值能力，可以將每月空閒資金，都去做月供。同樣先用一半，其餘儲起等大跌市。以下股票，都適合你投資和月供。以你年紀，大約比例各一半都可以。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

基金方面，你都要了解翻佢質素和升值能力。你可以用盈富（2800）作比較，佢年平均增長約10%（連股息再投資），去決定維持這基金，還是轉投至其他優質股。

------------------------------------------------

Q19955：

老師，你好。請問你點睇醫渡科技前景（2158）？有潛力嗎？

仲有1658（郵儲銀行），1772（贛鋒鋰業）同埋3993？這三個前景如何呢？

龔成老師︰

醫渡科技（2158）提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據安永報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

整體係有質素，但要注意風險，唔建議大注。

郵儲銀行（1658）有質素，但只是收息股，增長力不強，不要對股價太有期望。

贛鋒鋰業（1772）上市時間唔算長，這類企業數據較少，好難分析。

只見佢的盈利略有波動，業務上有點潛力。但現時市盈率超過300倍，點都係貴，現時入貨風險會高。

洛陽鉬業（3993）業務波動比較大，你睇翻佢之前的財務數據，會見到盈利變化好大，這必定會令股價波動大，投資這類股要小心。

此股都有投資價值，但現價偏貴，要等有明顯回調，才可分注入貨，同時要控制注碼。

------------------------------------------------

Q19956：

龔Sir hello! 早排睇左你既《大富翁致富藍圖》同《50優質潛力股》後想認真地理財！有d理財既問題想請教下你的：

1. 5年前同屋企人買左間居屋自住，升左唔少，但都重爭150萬按揭。依家樓價都有400萬左右

應唔應換間私樓呢？屋企人想，因為樓齡就夠20年，怕之後會跌價。但係依家住既環境同方便程度都唔錯，換左有d反而擔心私樓冇住得咁舒服

2.之前聽你講都有做月供，暫時供左
2800盈富 1500股
0004煤氣 3000股
1128永利 800股

已經30，終於的起心肝認真想投資優質股。儲左大約30萬，暫時心水有

1810 小米
1299 友邦
0388 港交所
0823 領展
0016 新地
1211 比亞迪

但係個價格好高，明白個買入價可以做成好大影響所以一路都唔敢買，但一路睇住佢地升………
係唔係應該點都要買d先呢？但心態好難平衡

3.龔sir你睇好香港科技股走勢嗎？3088 同3067都似都幾新，你覺得依家重係唔係合理區呢？

好多問題，雖然遲左d先起步，但希望唔太遲！早幾日睇完你d書後直情好熱血，好想快d搵到多d既資產，建立自己既組合，但同時對之前錯過既機會感到好好好好可惜而唔開心。先多謝你抽空去睇同解答！

龔成老師︰

1） 由於係自往房屋，應從自住角度去考慮。現時居所，對你日常生活都方便，而且20年唔算好舊。

如果換成私樓反而令生活水平有明顯下跌，我建議你住住先。

2） 你現時月供股票都可以，如果你睇好澳門博彩股，我建議月供金沙（1928）或銀娛（0027），長線會較永利（1128）好。

我建議你加入一些潛力股，好似中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700），去提升你月供組合的增長力。

而你心水股票，除了領展（0823）和新地（0016）算係合理區外，其他都偏貴。如果你怕一路都買唔倒，你可以用月供，去到儲貨。

但留意比亞迪（1211）偏貴得較嚴重，要回到$120才適宜月供。

現時大市只在合理區，資金唔好盡用。最好留有部份，等大跌市出現時，可以用來掃貨。

3） 安碩恒生科技（3067）和華夏恒生科技（3088）是追蹤恆生科技指數的ETF。指數由三十隻恒指科技成份股組合，當中包括不少有質素股票，如阿里巴巴（9988）、騰訊（0700）、比亞迪電子（0285）等。

現時大約在合理區頂部，因此，現時不宜太大注投資。最好你用月供、或自行分注咁慢慢入貨，去拉平均個價格，從而減少風險。

這股建議長線持有，最好5年以後考慮沽出。


------------------------------------------------

Q19957：

龔sir，你好，我未試過投資，每月收入約3萬，現金約有7萬，有一層樓，每月供款約$11000，小朋友開支約$5000。

少少錢唔想淨係擺係銀行，但又無乜時間緊貼股市走勢，請問適合做邊類型投資？

另外，保險基金適唔適合我？thank you
另外而家係咪唔係入市好時候？

龔成老師：

由於你要供樓及有小朋友，唔算好高風險承受能力，坦白講，建議留翻多少少現金，建議你最少留$7萬-$10萬，餘下就投資。

你可以考慮將每月餘下的資金，以月供方法投資，就算每月$4000，長期都是一個數。同時，這種平均入市法，不用太考慮現時平貴，長期進行就得。

你考慮保險公司的產品，可以。

又或考慮月供股票，供盈富（2800）。

------------------------------------------------

Q19958：

龔sir你好， 我係一個30歲嘅澳門人， 望到同年紀嘅人都比自己有能力賺更多嘅錢， 覺得人生唔可以再咁落去。

我亦唔知自己有咩長處， 淨係知打工賺錢草錢買樓結婚生仔， 走緊人地走嘅路， 或者係屋企人想你走嘅路。

我後悔由做野到2020年頭都5，6年， 錢全部都係草住係銀行， 浪費時間通脹， 今年先係第1年開始買股票， 由亂買跌錢等到好彩賺錢，雖然係執到少少都開心， 但係失去嘅更加多

我賺嘅係100％， 但係賺少左可能係300％ ，600％，甚至更加多。

我完全唔識股票平貴概念， 淨係知諗落有前景嘅市值唔低嘅就買， 但係今年做錯嘅事同決定好多， 重點就係無耐性等到公司真係成長

例如信義光能， 比亞迪，吉利，贛鋒鋰業等等都係平位持有過， 但係都等唔到佢成長， 坐唔定就走左， 現有嘅倍升股淨低微盟， 我繼續持有

我認為30而立好緊要， 唔係賺10萬20萬就滿足。 我現持有嘅股票有：9988， 1093， 2826， 2013， 6808， 6820， 6060， 6618， 6078， 9698。

有賺緊亦都有跌緊幾多嘅股，總數都係贏。暫時我都會繼續持有，希望你可以俾意見我。 謝謝你

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

第一，你要長線持有，這樣先可以賺大錢。

第二，唔好太著重股價，要睇長遠價值。

第三，如果你想賺大錢，就要學真正能賺大錢的方法，例如巴菲特，否則你的結果只會與一般散戶一樣。

第四，你上述股不是無質素，但大多是漸潛力類股，這樣會有較大風險，建議你平衡翻個組合

------------------------------------------------

Q19959：

你好，請問1787 山東黃金長遠值得投資嗎？

仲有想問下636 嘉里物流，現價可入？

龔成老師：

山東黃金（1787）主要於中國從事黃金採礦及加工，以及銷售黃金產品。

佢係於中國合共控制及經營十幾座礦山，大部分位於山東省，並於中國擁有多個選礦設施及冶煉及精煉設施；當中，持有一定數量的黃金。

佢雖然有一定的資產價值，個都要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

至於嘉里物流（0636）這股不差的，佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區中上，以長線投資的角度，有值博率的，可分注。

------------------------------------------------

Q19960：

暫時有8萬可投資，有無建議買咩？1211、9988、9618有考慮，但價係咪太貴？謝謝

龔成老師：

安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

至於上述3隻，比亞迪（1211）貴。暫時不建議。

另外2隻勉強可小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。