【#童話摧毀系列｜#未婚懷孕的長髮公主】 「長髮公主被女巫困咗喺一座高塔上，多年來不得外出，最後王子透過公主嘅長髮成功拯救公主，從此幸福快活咁生活落去」。格林童話中嘅長髮公主擁有一個幸福快樂嘅故事。然而，原版中嘅女主角根本並唔係公主，當中嘅故事又係點架呢？如果你唔怕童年被毀，不妨睇落去。 - 長髮姑娘源於德國童話，有一對夫婦住喺女巫隔離，女巫有一個花園，當中種滿生菜。有一日，懷孕中嘅老婆突然想食萵苣，仲同老公講如果食唔到萵苣就會死，愛妻心切嘅老公就闖入咗女巫嘅花園，偷咗唔少萵苣。頭兩晚，老公相安無事，但第三晚女巫發現老公偷野，指責佢盜竊嘅行為，老公向女巫求情，女巫就同佢講：「如果你老婆真係唔食我嘅萵苣會死，咁以後你想食幾多就食幾多。不過，你老婆生嘅孩子要交比我，否則我將會告發你」，由於老公太過驚，於是答應咗女巫嘅要求。 - 當老婆生咗一個女嬰之後，女巫就接走咗佢，將佢改名為萵苣(Rapunzel)。喺女孩12歲嘅時候，女巫將佢困咗喺一個森林中無樓梯﹑無門嘅高塔，塔頂得一個好細嘅窗。每當女巫想見女孩就會大叫：「Rapunzel，Rapunzel，放低你嘅長髮，等我可以爬上金色嘅梯子。」(Rapunzel, Rapunzel, let down your hair, so that I may climb the golden stair.) ，女孩亦會將佢金色秀髮下放，令女巫可以沿住長髮爬上去。 - 日復一日，女孩依舊喺塔上生活，閒時無野做就會唱歌解悶。有一日，王子騎馬經過森林，被女孩嘅歌聲深深吸引，喺塔底之下，佢見到女巫上塔嘅做法，於是王子照版煮碗咁上咗塔頂。雙方一見鍾情，互生情愫，更發生肉體關係，王子亦計劃製造長梯，幫女孩逃出高塔。當長梯就嚟起好，不知情嘅女巫照舊探訪女孩，女孩問女巫點解自己嘅衣服愈嚟愈緊，原來，女孩已經懷孕，一切比女巫發現。一怒之下，女巫將女孩長髮剪走仲將女孩丟到荒野自生自滅。 - 當王子再次喺塔下呼叫嘅時候，女巫將剪下嘅辮子拋比王子，王子上塔後見到女巫，女巫同王子講：「佢已經比貓妖捉走咗，你唔洗指擬會再見到佢，貓妖亦會將你對眼挖出嚟」。絕望之際，王子從塔上跳落去，被塔下嘅荊棘刺盲咗。此後王子四處流浪，女孩亦生咗一對龍鳳胎，有日女孩喺河邊提水嘅時候再次唱歌，王子聽到歌聲後同女孩相遇，女孩感動嘅眼淚亦令王子重見光明，兩個人幸福快樂咁生活落去。 - 雖然呢個故事都係Happy Ending，不過對比返而家嘅尺度，應該都稱唔上係童話掛！？ - ------------------------ ◆ 每日分享知識、每月提供課程 ◆ Beginneros網站: https://www.beginneros.com/ ◆ Youtube：https://goo.gl/OEJrGt ◆ Instagram：@beginneros ------------------------ #Beginneros #冷知識 #hk #hkig #童話 #公主 #王子 #長髮公主