［今日寫呢啲］係喎，紅日都有文。一向都年中無休，之前聖誕除夕年初一都有文的。星期六都有！係咪抵睇先！

1. 雷曼時刻，冇噃。定只係未到？今日唔爆聽日爆，下年唔爆十年後爆？當然做末日淡龜呢，把口一定無敵的，唔會有得輸，講到中為止。真係中咗又先知，可以講足幾十年，不過依然係咁撚窮（或者更差嘅：講中嗰次自己根本都冇買）。

2. 現實十分簡單，世界係屬於樂觀者嘅，悲觀嘅基因一早淘汰晒（但謹慎唔同悲觀）。你見有錢人都係樂觀者，有幾多個可以長淡發達？ 一個都冇。係一撚個都冇。你做到Big Short 單眼醫生 或 John Paulson 之類（一樣係中一次講十幾年然後衰足十幾年），最盡架啦，但都只係一次淡，唔係長淡。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

3. 講返，先睇美股，當然都唔多靚仔。但舊年3月講到而家話「升市脫離經濟」（CLS，經濟不知幾好，企業盈利不知幾勁，居然仲有讀者PM我問我美國點解決濟脹問題），「等調整我就買」嗰班友，恨到啦，你計intra day 標普指數卒之回調咗5%，等足一年！咁又係咪買？定都係唔敢買？「跌定先」。幾時先知「跌定」？咪就係升咗幾倍你先信舊年跌定。「確認見底先」。如果你同我知幾時「確認見底」，應該齊齊發咗達十世。

4. 不過，本人倒係整理咗啲高位回調近20%嘅美股，一般都係大名，咁有興趣嘅咪睇下。但唔代表我全部叫你買（咁多點買？），即係買完即跌10%然後又話「嘩聽咗個財演點我呀 輸咗10% 呀點算」，嗰啲就返屋企磨墨算啦，慢慢have fun

5. 又，呢輪見到，標普指數大約20%成份股高位跌咗兩成（「熊市」，哈哈），但你見mid cap 或者 small cap多好多！S&P small cap index 講緊過一半都回咗20%。我唔明點解好多人「覺得」買small cap 「平啲」（佢老味真係覺得A公司股價10蚊就平過B公司股價500蚊）。

6. 另外，週末寫咗篇財務自由文，自問十分精彩，可惜星期一股災冇乜人埋。但，你又唔係今日跳樓，又唔係今日退休，所以都係要繼續架啦，聽日記得準時返工。冇計架喎，馬拉松

7. 不過，我都接到啲PM，咁順手澄清埋。古語有云，戰爭即和平，自由即奴役，無知即力量！

8. 咁我彷作話你知，投資就係儲蓄，交稅就係開支，MPF當然係儲蓄

9. 因為上次篇文都唔少人問我，咁咁咁又點計，呢啲又點。咁有啲情況的確複雜嘅，你啲乜乜保單我就唔知點計（雖然好大部份係變咗做退休儲備—你個保險經紀嘅儲備）。

10. 但簡單啲嘅，我話計收入，咁有人問做乜唔計交稅。咁就梗係計稅後啦，我以為係常識。或者你當係開支減咗佢咯。

11. 另外仲有人問，「咁你係咪叫人唔使儲錢全部投資」。差矣！完全理解錯！投資咪就係儲錢！根本係同一樣嘢，你見人地啲網都係 收入= 開支+ 投資/儲蓄。兩樣係同一樣嘢！反過來說儲錢一樣係投資！咁你咪用個可恥嘅銀行存款利息計，或者曲奇餅罐嘅咪當零，咁你發現你永世都唔使財務自由。

12. 最後，強積金，當然係儲蓄（！），亦即係投資。當然你唔順超嘅，可以扣返個基金開支費嘅。

13. 好啦，玩完個財務自由大計算（Patreon週末寫咗，長文），好多人見到，嘩，有排喎。點可以快啲。嘻。

14. 現實就係咁，當然唔易，易嘅個個都做到啦，個個都做到仲有乜咁特別？

15. 但，想加快？好簡單，不外乎三個方法嘅啫。一係舊錢碌得快啲，一係舊錢大啲！亦即係，一係投資回報率高啲！一係你就放多啲錢！有幾難明？

16. 如何投資提升回報嘅？「咪睇我Patreon」，但提提你，講緊係十幾甚至幾十年嘅回報，好難出術求速成。你去買場波梗係可以一晚幾倍，但你可以連買幾多場而唔輸錢？

17. 放多啲錢落去嘅，即係一係開源，一係節流。

18. 好多傳統智慧（即係你啲濕鳩網友）話你知，開源有用過節流。我都想，我都以為係，可惜唔係。殘酷嘅現實係，「節流有用過開源」

19. 但此話何解？咁具體啲，每個月拎多5000蚊（或者5萬，隨你）投資，肯定可以早啲上岸啦。但你嗰5000蚊點嚟？係嚟自收入高咗，定開支細咗？

20. 照計都唔難明，但我計埋數你睇，你嗰5000蚊，嚟自減少開支，對你提早上岸嘅幫助大好多。呢度都仲可能唔少人估到，但有幾大幫助？可以睇Patreon！

21. 不過，本人唔係冷氣軍師紙上談兵，亦唔係日日食白麵包儲錢上車嘅人。開支要減，係好難的。中國人講由奢入儉難，充滿智慧。你食開百人一朱好地地，但到你食過嗰啲 鮨乜鮨物，甚至只係MK仔餓媽卡些，仲點返去食爭鮮？好難的

22. 加咗人工，梗係對自己好啲啦，老到X都鬆晒，有錢都冇力享。全部係事實。所以我篇文都教你拎個中庸之道。唔會好離地地咁你 搵3萬儲2萬5

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

《笑傲江湖》

♂：早晨

♀：早晨，我剛剛見完客，之後應該有段時間忙

♂：忙咪即係搵到錢囉，咁唔好咩？

♀：係啊，你既目標又愈黎愈遠，我擔心你追唔上我

♂：我希望係追到你，而唔係你等我

♀：唔錯喎，感覺到少少男子氣概，係呢，點解你會寫野既？

♂：其實我一開始既夢想係做演員

♀：如果係既話，你應該係非主流系列

♂：我知自己咩料，我做既角色應該係好唔顯眼既路人甲之類

♀：咁點解你想做演員呢？

♂：因為演員可以係唔同角色入面過唔同既人生，好似做美國隊長咁，就好似真係做左英雄，做落難既人就會感受到絕望，做情人角色又可以好似談過一段刻骨鉻心既戀愛咁

♀：所以你做唔成演員就寫野，用寫野去滿足你做主角既慾望？

♂：可以咁講，有時我都會幻想自己係男主角，幻想自己係大奸角會點去做到自己既目的

♀：咁你寫既野有幾多係真先？

♂：好多人都會問呢條問題，一個人可以有幾多經歷先？現實其實係好悶好無聊，就算偶爾有好深刻既野，一篇文都已經寫完，所以我幾時都話，一個差既作家會寫自己野，一個好既作家係會愈寫愈假，但感覺係愈寫愈真

♀：我覺得見識係好緊要，有好多野都係你親眼見過聽過先可以感受到，最起碼你要好認真代入過先可以令個角色有靈魂

♂：寫殺人個陣，我真係會諗我點解要殺佢，我有幾憎佢，我要點殺佢我先至會覺得最完美

♀：睇黎我要報定警

♂：我最近有個新打算，我想去試下唔同既職業

♀：之前都聽你講要搵工，其實你搵成點？

♂：都有幾個選擇，但都係我一向都有做開既野，我都可以預計到自己黎緊幾個月會做乜

♀：事業就係咁，你一定係不停地做你擅長既事，因為擅長既先係最有金錢價值，令你可以搵到最多錢

♂：我將寫作當成事業，講真，做野對我講，只係為左我想搵多過你呢個目標，但呢個目標我如果打份工又好似無可能會做到，所以諗黎諗去，我都係好好寫野，咁都叫有一線生機

♀：唔同職業令你有唔同體驗？

♂：係，一開始我諗住用寫作去體驗唔同既生活，但依家我諗返，有好多生活，我係可以親身咁去體驗，當然……例如做富翁啊，做律師醫生之類係唔得啦

♀：但你可以試既野都係好簡單同表面，你想做幾耐先？

♂：我覺得真係唔會長，但我去旅行個陣發現，當你行出一段路時，行行下就會發覺愈黎愈多新路，我信命之餘都幾信緣份，人生遇到既事都係緣份

♀：緣份係重要，但我更相信要識得去把握

♂：我把握左喇，其餘既，就睇個天啦

♀：你知唔知我地呢一行，可以出名既搵到錢既只係少數，人人條命都唔同，有人遇貴人一下子就出名，亦有人去到老先叫捱出頭，好多人要轉行去做司儀，去賣保險，去做飲食

♂：我知啊，我地呢行算係藝術類別既，基本上都係一將功成萬骨枯

♀：我教你一個秘訣啦，係我咁多年既心得，就係堅持，只有堅持落黎既人先會成功

♂：呢個都應該係公開既秘訣喎

♀：係我心目中，葵花寶典係最強既武功，而呢個名應該都有無數人聽過，但真正練成既人有幾多？知唔知點解唯獨係佢咁出名？因為係要付出代價，揮刀自宮喎，寫得真係好，要得到幾多就要有心理準備失去幾多

♂：堅持呢樣野要付出既代價都真係唔少

♀：每個人要練都要自宮，點解有人肯，點解有人唔肯？重點就係，佢練成呢套武功對佢講係有咩意義，有人係血海深仇，有人係為名為利，有人係追求極致，你需要搵出你真正想要既原因，咁你先有機會成功，唔係你永遠都唔會堅持到

♂：依家既我只係想好好既享受生命，唔係吃喝玩樂既個種享受，正確講係感受先係

♀：你既感受要睇下係咪同你目標一致，人最難受就係言行思想不一，口講一句，心諗一樣，做又一套

♂：我依家好一致

♀：咁就得，一致既人一定會成功，你再思考下啦，我做野先，晚安

♂：我掛住你，晚安

#長傾不見 #蔣薇 #小說 #故事 #好久不見

未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at

【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

00:00 拆解痛症
00:18 盆骨痛問題
00:59 行山跌倒膝蓋後痛，數月亦未有好轉
01:56 膝蓋退化發炎，痛到走路也難
03:18 中指痹痛、腳趾刺痛無力、膝蓋及髖關節痛
04:17 拇指食指偶爾痺痛，痛楚有時延伸至手臂，拿杯子都沒力
05:45 生完小朋友，開始出現媽媽手
07:02 右手掌偶爾麻痺，下巴亦不時麻痺，靜止後不到兩分鐘就覺得麻痺
08:26 瑜伽導師下腰痛，痛楚時有時無
10:04 平日落巴士時右膝會痛，晚上躺臥時大幅屈曲右膝會發出聲音
11:03 運動時右足阿基里斯筋鍵斷裂，術後右足內腳眼位置仍持續痛楚
12:37 乳癌後完成化療開始服荷爾蒙藥，卻受骨痛折磨
14:06 腰痛治療了三個多月也未痊癒
15:05 右上背痛持續一年
16:28 頸腰背痛持續幾年，近一年多經常頭痛，要不斷食止痛藥
17:44 兒子經常垂低頭打機，頸部發出「咯咯」聲


｜痛症｜長期骨痛或因神經線受壓 X光易走漏眼建議磁力共振助診斷
由早到晚用電腦，肩頸疲倦不堪甚至刺痛，是頸椎關節退化？年紀大行兩條街已覺得膝蓋痛、髖關節痛，是關節退化的症狀？運動過後手踭或膝蓋屈曲時感覺疼痛、不能施力，是受了傷而不自知？今集醫Sun信箱特別請來三位骨科專科醫生黃永強、梁建豪及袁智斌，為讀者拆解關節、上肢及運動痛症問題。

問題（0:18-0:58）：有盆骨痛的問題，坐着站起來會痛，晚上躺下床更痛，有時痛到天光，用止痛貼無效，有時要服兩粒止痛藥才勉強減痛。X光檢查骨骼沒大礙，是甚麼原因引致？

https://hk.appledaily.com/lifestyle/20210530/N652G4TKPBG3HDWAQQGGSDM7AQ/

影片:
【我是南丫島人】23歲仔獲cafe免費借位擺一人咖啡檔 $6,000租住350呎村屋：愛這裏互助關係 (果籽 Apple Daily) (https://youtu.be/XSugNPyaXFQ)
【香港蠔 足本版】流浮山白蠔收成要等三年半 天然生曬肥美金蠔日產僅50斤 即撈即食中環名人坊蜜餞金蠔 西貢六福酥炸生蠔 (果籽 Apple Daily) (https://youtu.be/Fw653R1aQ6s)
【這夜給惡人基一封信】大佬茅躉華日夜思念 回憶從8歲開始：兄弟有今生沒來世 (壹週刊 Next) (https://youtu.be/t06qjQbRIpY)
【太子餃子店】新移民唔怕蝕底自薦包餃子 粗重功夫一腳踢 老闆刮目相看邀開店：呢個女人唔係女人(飲食男女 Apple Daily) https://youtu.be/7CUTg7LXQ4M)
【娛樂人物】情願市民留家唔好出街聚餐 鄧一君兩麵舖執笠蝕200萬 (蘋果日報 Apple Daily) (https://youtu.be/e3agbTOdfoY)

果籽 ：http://as.appledaily.com
籽想旅行：http://travelseed.hk
健康蘋台： http://applehealth.com.hk
動物蘋台： http://applepetform.com

#痛症 #骨痛 #神經線受壓 #X光 #磁力共振
#果籽 #StayHome #WithMe #跟我一樣 #宅在家

20191126 黃偉民易經講堂

麥美娟是先知！

早在今年六月，她在林鄭的辦公室，對著這位特首怒吼：

「小你老味！
我地以後仲駛選舉嘅？」

對，她的動物本能對，林鄭政府的施政邏輯和方式，建制派唔駛選了，以後都唔駛選了。

林鄭將共產黨在香港幾十年的統戰經營，完全清袋了。

香港人大勝，親共無著數！

只要七成投票率，三百萬人出來投票，西環那些古零精怪的種票老人掌心雷，就全無作用。

在未來日子，登記的選民會愈來愈多，因為這半年林鄭政府的暴政，教育了全港中小學生，他們未成年，今次不能投票，但他們正在長大，青春，正義，是邪惡政權的剋星。

做了選民，他們不會躲在家中裝睡，只顧旅行供樓自助餐。今日未成年，他們都不怕警棍濫捕催淚煙，他們願走上街頭，被黑警暴打。他們都不怕；做了選民，他們更不惜排隊一小時投票了。

反共反暴政的力量在增長，那些骯髒下三流的做假種票大陸旅遊車的，就是這麼多。

歷史的巨輪在動，世界的反共狂潮已現，不論在那個領域，凡掛著中共旗號的人，選舉都失敗。

你看那個北京政協，魔鬼牧羊人管浩鳴，企圖問鼎聖公會港島區主教寶座，輸了。

禿鷹曾偉雄，被北京推薦，出任聯合國毒品辦公室總幹事，輸了。

這是國際政治外交實力的寒暑表，本來北京推薦，一定手到拿來，好似陳馮富珍那些，誰理你什麼工作能力。禿鷹慘敗，傷的，是中共的國際地位，一葉知秋了。

還有在香港，那批掛著北京招牌，毛主席好學生的政治惡棍，梁美芬、何君堯、周浩鼎、陳振斌、麥美娟、張國鈞、陳家珮、鄭泳舜、李梓敬、田北辰……等等等等，全輸了。單靠西環插喉輸鐵票的，政治死亡了。

林鄭政府最強的催票劑，催動七成選民出來的，是那一萬枚國產催淚彈。

香港的上空毒煙瀰漫，醫學界憂心市民的健康，要求按國際慣例，公佈警方發射催淚彈的成份，好對症下藥；化學專家警告，這些含極高濃度二噁英和山埃等致癌物質的化學成份，會污染環境，食水，和透過衣物，進入人體，留存體內，影響一生。

前線記者，在樓下玩耍的小孩，飽受催淚毒煙的主婦，不同工作而聞到催淚毒煙的市民，在示威集會做後勤支援的義工，都出現不同程度的不適和病徵。但林鄭政府，專責市民食物及衛生的問責局長陳肇始卻說：

不宜公開國產催淚彈成分，免影響警方部署云。

她年薪四百多萬元，本來是專責市民健康的，現卻擔心警方的部署來。

林鄭政府擔心的是什麼？

六個月內，發放了過萬枚催淚彈，吸入這些毒煙的，首批便是那些放彈的前線警員。

醫生和化學專家一再說，警員的豬嘴和制服，隔絕不了二噁英和山埃，前線警員不但會吸入，還會跟衣物帶回家，衣服在家中清洗，毒物會殘留在洗衣機內，全家人都會觸及。

不公開成份，大家博博吓當唔知；公開了，最恐慌的，未必是醫生和市民，應該是前線警員。

陳肇始怕前線警員兵變，影響警方部署，但卻間接實現了坊間“黑警死全家”的詛咒。不如一不做二不休，放風出去，上深圳食「海底撈可解二噁英」好了。反正，警員的夢想生活，也不過是，下班上深圳食海底撈，退休住肇慶七星岩而已。

世界看著香港，香港人憤怒了！

星期日的區議會選舉，全港的大街小巷，都排著人龍，從早上七時，投票站都未開門，到晚上十點半，人龍仍在。

有親戚朋友在多倫多坐十六小時飛機回港，為的，就是投這一票，區議會的一票！

香港人憤怒了！

選前心中忐忑，西環經營選舉幾十年，專業種票鐵票如山，香港人能拿下一半議席否？二百三十席是否痴人說夢？

終於，452個議席中，民主派共取得388席，事前無人敢想過的數字。

以388取卦，得《周易》第三十五卦火地晉卦二爻動，變卦為第六十四卦火水未濟卦。

火地晉卦二爻動，變卦為第六十四卦火水未濟卦。

晉卦，上卦離為火，象徵曰，下卦坤為地，象徵大地，卦象成了一幅日出大地的畫象。太陽從大地升起，為旭日東升之象。

這個月初，十一月五日的節目，才講過這個卦，火地晉卦是屬於政治改革的卦。

當晉卦的錯卦，六爻全變，水天需卦，象徵的基本需要，完全解決後，即經濟改革成熟後，到無可避免的政治改革便會來臨。

一個城市，人民努力的總目標，是依附光明。所以火地晉，內卦的地，即民眾，還追求上卦離火的火明的。

柔進而上行，指晉卦的主爻，第五爻，六五陰爻，君位，無論誰做領袖，他都是從民眾而來的，即使大權在握，都是來自民間，要了解民間疾苦。

任何的領袖，責任只有一個，要做人民喉舌，要替人民謀福利，要改善民生。

晉卦在今日社會而言，就是要發展民主，爭取人民政治參與權的象徵。

柔進而上行，大眾可以「進而上行」不是只能在基層生活，任由權勢擺佈，因為君位六五的陰爻，都是由下卦坤代表的民眾而來。

任何人，都可以晉而上行，健康的社會，一定要保留這樣的空間。

388個議席這組數，得火地晉卦二爻動，所以變卦為火水未濟卦。未濟，未解決。

上卦離為火，下卦坎為水，火性上揚，水性向下，各走極端。

未濟卦六爻統統失位，君不君，臣不臣，父不父，子不子。

這個卦象，沒有一個位置是對的，人人都未能發揮功能。

未濟，未解決，既然是未解決就必須繼續努力，奮鬥前進。因此，火水未濟，就含有生生不息之象。

《周易》六十四卦，將未濟卦列於最後一卦，在既濟卦之後，含義很深，有終而復始之義。搞掂一件事，引發萬件事的開始，宇宙循環，往來無窮無盡，人世間的人和事，發展永無終結。

既濟，只是一個階段，之後，又要開始一個新的循環。所以，《周易》的用心，是說明既濟一事，未濟又起。

既濟，是開始的終結；未濟，是終結之後的開始。

我們拿到了388席，表面上是火地晉卦，日出大地，旭日東升之象；但因二爻動，變為火水未濟的結果。

未濟，每爻都失位，大家都在抱怨。買麵包的抱怨，賣麵包的也在抱怨。每個人都不安其位，完全沒有凝聚力。

六十四卦中，只有火水未濟卦是如此。

但未濟卦的綜卦、錯卦、互卦都是水火既濟卦，即是說，既濟中有未濟，未濟中又有既濟，《周易》要說的，所有事物，都不是死局，一定有活路。

因為有既濟才有未濟，有未濟，便有既濟。你中有我，我中有你。未濟雖然未渡河，未達彼岸，仍在輪迴苦海，但有無窮希望。

就卦的結構看來，既濟未濟之間，隱藏很多可能性，成功失敗，往往只在一念之間。

未濟卦卦辭：

未濟。亨。
小狐汔濟，濡其尾，無攸利。

既然未濟，為十麼卦辭一開始就說亨？

先說亨，再列出具體自然現象。

卦辭強調「小孤」，不是老狐狸。

小孤經驗不足，但始終是狐，有點小聰明。用渡河象徵考驗。

汔濟，差少少，就遇到了。濡其尾，象徵風險。身子重了，不拘氣力游到彼岸。

人生很多無奈，就是這個「汔」字，差少少。差少少就搞掂，就是差少少。

小狐狸差少少就遇到河了，又唔想中途而棄，想著彼岸，但水太深，差少少。

濡其尾，尾已濕了，負擔愈來重，狼狽地返回岸邊。有些唔肯回頭的，「濡其首」，滅頂了。

無論游到那裡，只要未上到彼岸，就是未濟。

從來無想過渡河，根本無遺憾，想渡河，差少少成功，未做到，那種不甘心，就是小狐汔濟。

《周易》用小狐為象，因為狐狸性格狐疑，沒有真正的信心，所以是不容易得到解脫的。

風澤中孚卦教我們，必須要有真正信心，才能利涉大川。

信及豚魚，連最蠢的小豬和魚都受你感動，即靠信仰就可渡過難關。小狐狸有狐疑，沒有真正信心，就是過不了這一關人間考驗的。

小狐狸不經挫折，是不會長智慧的，人生失敗多幾次，見識就自然廣了，未來還有機會成功。要知難而退，不要到「濡其首」的絕境。

濡其尾，當然無攸利，但懂得回頭，未來還是會亨通的。

濡其尾，無攸利，因為小狐狸道行未夠，就想過河。苦海無邊，回頭是岸，此岸還在，還有希望。該回頭的時候回頭，將來才有亨的權利。

林鄭發表聲明，回應今次選舉結果，說政府會虛心聆聽市民意見，並認真反思。

全港市民用選票，說了意見，政府又反思了什麼？五大訴求，最易立即實行的「獨立調查委員會」，都未見起步，你的反思，只是虛應其事。

苦海無邊，回頭是岸。歷史巨輪已起動，林鄭這狐狸只能回到香港人身邊，此岸仍在。

上水粉錦公路蓮塘尾村，村口有家茶座綠色環抱，暴烈艷陽也被樹葉篩出溫柔閃閃。

1952年，林霆豐的爺爺從惠州來此落腳，開了間雜貨鋪賣糧油茶水。店旁翠竹，正是當年種下來的；側門對聯也是爺爺題字：「坐片刻無限爽快　飲幾杯何等清涼」。

那時上水盡是農田，過路人買碗茶水送清風，如得半日閒；現在販夫明星一樣愛來透透氣，歎幾味。

昔日小茶店，今天馳名茶餐廳，轉捩點始於20多年前，林父病重，霆豐和家姐回歸老巢陪伴母親守店。

年年月月，兩姊弟循環磨擦、合作，都為店好，店也愈做愈好。
更重要是能承歡膝下，無慮樹欲靜而風不息。

「這裏雖然距離市區好似很遠，但短短只是十分鐘車程，已是兩個完全不同的世界。」榮昌茶座負責人林霆豐說。就算盛夏，午市、周末必定爆滿。常客有附近學校的老師、出入馬會會所的顯貴、打高爾夫球的明星、北區醫院的醫生護士，也有車房、地盤工人；假日更是區外一家大細、山友、電單車發燒友……無分階層，全是專程自駕或坐小巴而來。

Helen第一次光顧，點了豬扒包，發現麵包軟熟、豬扒有肉汁又不油，連從不吃的洋葱也覺「好味」，盛讚「好食過澳門豬扒包」。　

住在加州花園的朱總，十幾年天天來，打風也來。「心癮！塌樹、馬路水浸都要來，不來不舒服。」這裏出名的有被蘇施黃稱為最好食的豬扒包、滑嫩多汁BB鴿，而鑊氣十足的炒牛河他也鍾愛。
限量的原盅陳皮鴨湯飯，還有煎雞尾包都是名物，Eric和Connie每周必吃，有時帶上小狗，一坐就是半天。

來的人慢慢歎，做的人就要手快快。霆豐上一刻在修理洗碗碟機，下一秒已獨臂架着三碟飯從廚房衝出來。

茶座是家庭式經營：他是家中老六，乳名興仔，和排第五的家姐林麗金（乳名金仔）主力管理；細佬廚房、電器工具維修；家姐水吧、樓面招呼。母親收銀；排第三的家姐林麗星（嘉菲）帶位；太太Sara、姐夫也會幫手，假日必定總動員。

「話事人當然就是我媽，她控制整個局面。她說一我們沒人說二。」興仔笑言母親好精靈，在背後看得仔細，不時教大家走位，「令到我們打醒十二分精神去做事，不敢蛇王。」

歸巢伴母　守家業
母親楊錦雲，雖然七十有八，但神采飛揚，每朝飲完茶就出來幫手收銀，和客人打牙骹。「細細個見他們讀書挽書包，現在做工了，或者帶孫來探我，當見下老朋友。」事頭婆有個「四萬」笑容，很有親和力。

她20歲嫁給同村的林泉，「以前幾十年無得揀㗎！老實啩……」又笑不攏嘴，「他同老竇開鋪仔，賣油鹽糖仔餅乾。上水黑麻麻無電燈，亦賣火水蚊香。」那是1960年。婚後前鋪後居，生了兩男五女，她主力養豬養雞，丈夫幫忙看店。80年代，茶水雜貨外，榮昌兼賣簡單飯麵。

「老公走了（離世）二十幾年。他有長期病，那時細路仔細，這頭煮飯，那頭沖茶招呼客人。要供細路仔讀書，養雞養豬又要買材料，樣樣都要賒，但無欠人錢嘅，賣到雞賣到豬有錢就即刻還。」她教仔女做生意，要「講信用，有借有還」。

那是刻苦的年代，「仔仔女女都要幫手，細細個就餵雞，企櫈仔煮麵。」排第二的大女讀完小學就回店幫手兼帶弟妹，「金仔、興仔讀到中學，其他四個都出國，兩個英國兩個加拿大，你話辛唔辛苦？」她日頭打理農場、榮昌，夜晚就穿膠花幫補家計，捱到金睛火眼。

結果，養大的仔女一個個往外飛，尋找自己的人生；只有金仔和興仔在91年先後回巢。

50歲的金仔，伶俐爽朗，年少時很倔強，「對家裏有很多不滿，覺得阿媽管我太嚴，我的同學都很自由。」放學她去打排球而非回家看店，激到阿媽生蝦咁跳；曾經有幾次離家出走，好快被人捉回來；讀完書拍拖、揸電單車，母親愈是耽驚她愈痛快。「以前店鋪有爸爸媽媽撐住，我是一個可有可無的人。」後來父親病重，店交外人打理，母親鬱鬱寡歡，於她如當頭棒喝：「自己玩夠了，肩上有個擔子，不可再像以前般任性。」當了母親的金仔，自言當年「很幼稚」。

小她兩歲的興仔，溫和沉穩，不善辭令。當年讀完書也渴望外出長見識，去北角打工，有兩年做過廚房，但漸覺市區生活太壓迫，「返回新界舒服很多，切合自己多些。」想到蓮塘尾有榮昌有母親在，一個心有了清晰的歸向。

那時顧客除了村民工友，主要是貨車司機，「人家過路泊車，要碟茄子飯、排骨飯。有時金仔煮，有時興仔煮。」事頭婆說兩姊弟夾手夾腳，無分你我。今天店中熱賣豬扒，就是她傳授的在家製作：拍得鬆、醃得夠，不用食粉味精。


一家人　難關共渡　
仔女接棒，並不代表就此順遂。那時榮昌一直在賣粉麵飯，但未有食肆牌照（食牌），「我們座落在綠化地帶，申請食牌阻難重重。」金仔記得，食環署不斷來巡查、發告票，她和細佬上庭又上庭，罰款愈來愈多；後來一次，法官警告再犯就要封鋪。「我惟有向法官求情，榮昌不斷申請但都不獲批。法官同情我們，發還所有罰款，又教我如果證明到店鋪在鄉郊條例實施前已在做生意，就可以申請司法覆核。」

「鄉村人好支持，榮昌做了幾十年，大家食了好多年，樣樣有證據。」事頭婆那些日子夜夜失眠。

興仔和金仔四處奔走，找人證物證。「因為這個是我自己的家，也是我的祖業，怎樣我也會做到最後。」興仔說。終於打贏了官司，前後爭取了8年才獲發食牌。

「最大塊的石頭已經移開了，但路一直都是崎嶇的。」興仔指，榮昌主要做熟客，人家吃多了會悶，所以要不斷去找新食物。2000年取得食牌後，客人更多，他們請廚師、水吧，諗到就做，食物款式愈做愈多。入行50年的大廚基哥，做過馬會、酒樓，來榮昌掌勺16年，客家炆豬肉、陳皮鴨湯飯、咖喱牛腩、炸乳鴿……樣樣拿手。
另一方面，興仔坦言跟家姐金仔拍檔不容易。「廿七八年都是繼續磨合：磨擦與合作。」譬如最近，家姐建議用手機取代唯一放在收銀處的電腦落單，省力省時；細佬認為食物款式組合複雜，手機畫面太小不適用。

若在從前，家姐一定激烈行動，像當年她建議電腦入單取代人手，細佬沒立刻贊同，她就黑面三個月。今天，她覺得「細佬未消化」，願意笑着等。

遇上分歧，興仔說一人讓一步，「始終是一家人，（爭拗）大家好多時都是淡忘了。」

「大家都要想住一樣東西：目的都是想鋪頭好。」金仔說。
母親是個聰明人，就算各自跟她說，也當聽唔到，「仔仔女女做生意，各有各方法。有商有量最好，有時拗少少。嬲完，兄弟姊妹一陣一齊食飯又忘記了。」

點點滴滴　都在心
從前為口奔馳，事頭婆嘮叨仔女幫家，放學就要淥麵沖茶餵雞，營役過日，為母者溫柔無從。4年前，眼見三子之父的興仔和兩孩之母的金仔完全困身茶座，她悄悄說服老三嘉菲回來幫手，替補二人管店，讓他們一個返早，一個返晏，多點時間「陪下細路仔」。當年遺憾，她不想仔女重蹈。

趁中午飯市未到，金仔偷空到店前庭院淋花修枝，黃的、橙的、粉紅的小花迎風搖曳，給茶座生色又添生氣。原來當年打贏官司，母親拿出幾十萬給她和細佬翻新榮昌。自此庭院圍了木柵攀了綠藤架了鞦韆，也有了「蓮塘」為誌的英文名Lotus Café。

很多客人喜歡庭院的花，不時拍照，令金仔心花怒放：「放些心機下去，每日少少每日少少，你就見到成果了。」她說，每日堅持打理一下，花自然生得美麗。

店旁竹樹叢、生鏽鐵絲網，金仔曾看不順眼，想除之而後快。可是，母親下令動不得，理由是阿爺年代種下來置下來。「到現在自己年紀大了些，就明白為甚麼阿媽甚麼都不想動。因為每一樣東西都是她的點點滴滴。」水珠澆落她種下的柏樹、萬年青，風一吹，閃閃舞動。

「好似我們經營榮昌一樣，包括客人呀，食物的質素，都是一點一滴的積聚。」

母子親情，手足情誼，何嘗不是？！

採訪：韓潔瑤 拍攝：陳瑞華、關永浩

榮昌茶座
地址：上水粉錦公路蓮塘尾村1號
電話：2670 3388
詳情： http://bit.ly/2NdRYRx

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)