《忘不了》中的斷捨離 — 萍水相逢嘅兩個人，因為各自嘅過去而愈走愈近，無以前嘅經歷，永遠成就唔到現在嘅自己。 — 分手好容易，但如果要真真正正咁放低一段關係，其實好難。由劉青雲飾演嘅大輝，因為過去嘅好賭成性，因為過去嘅忘恩負義，所以當佢見到阿文(古天樂)遇到車禍嘅時候，佢即刻停車去幫手，跟埋去醫院，打比由張栢芝演嘅小慧，然後佢遇到佢一生中另外一個好愛嘅女人。 — 大輝曾經結過婚，而小慧同未婚夫阿文都去到談婚論嫁嘅地步，係咪真係可以咁容易忘記到一個人？你仲有佢嘅舊電話號碼，會忍唔住打過去，會忍唔住聽留言，你仲住緊喺果間屋，連搬都唔夠膽搬，唔敢轉行，唔敢改電話，因為你仲未放低你嘅過去。 — 《忘不了》入面嘅樂樂(原島大地)，就成為咗連結大輝同小慧嘅一道橋。一個男人向女人大獻殷勤，一定會受人非議，女嘅發姣，男嘅就咸濕，而小朋友需要人幫，就令兩個人嘅關係可以順理成章。有一幕戲講小慧頂唔住財政同其他壓力，要送樂樂去孤兒院，然後大輝話佢會養個小朋友。小慧因為愛未婚夫，所以願意照顧樂樂；同一道理，大輝因為愛小慧，所以願意養樂。 — 兩個人之所以會相遇相知，係因為「忘不了」。小慧要個師傅翻新到架小巴似足以前一樣，作為對丈夫嘅懷緬；而大輝就因為想證明自己可以照顧到女人同小朋友，而進入咗小慧嘅世界。人嘅行為總會受過去負面嘅經歷影響，例如如果你以前比人呃過，你會無咁容易信任人；如果你曾經比人喺感情上狠狠咁傷害過，就會驚重新開始一段新嘅關係。 — 但經歷同時會為人帶嚟正面嘅影響，正如如果小慧無堅持到揸小巴，佢就唔會遇到肯袋錢入佢袋，教佢揸二波搶食嘅大輝；大輝亦因為自己嘅爛賭，最後學識咗執屋煮飯同做家務。 — 結局入面兩個主角都賣咗自己嘅小巴，象徵開始新嘅生活。無過去嘅經歷，就唔會有今日嘅自己，與其忘記，不如釋懷，將苦楚化為未來奮發嘅動力。