【肥皂泡】

喺夜空默默閃耀廿一年，我曾見過無數嘅肥皂泡！

十四年前，我喺一間認知障礙症機構工作.....

陳婆婆，78歲，中度認知障礙，失去溝通說話能力；四肢活動能力尚可，能拖住佢隻手一齊慢慢行。

婆婆同囡囡同住，但因囡囡要返工，所以請咗個外傭照顧佢。

婆婆逢星期一、三、五早上九點由外傭湊返到嚟中心，傍晚四點由外傭接返屋企。

一日，同事帶婆婆去厠所時發現，婆婆大髀有兩撻瘀青嘅地方！

同事通知我，我即時入厠所幫婆婆檢查；發現佢除咗大髀之外，手臂同樣有兩撻瘀青；因婆婆當時著長袖衫，唔刻意檢查係唔會發現！

我問婆婆痛唔痛？佢如常凝神望住我，完全冇任何反應！

我即時致電告知囡囡有關婆婆身體有瘀傷一事，叫佢留意婆婆喺屋企有冇撞親？同時留意外傭照顧婆婆嘅情況！

兩星期後，囡囡打俾我，話炒咗個外傭！

原來外傭承認因婆婆動作太慢，有時唔耐煩用手搣佢！

婆婆身體瘀青嘅原因終於真相大白！慶幸能及早發現，否則佢只能繼續默默承受痛楚，因為佢根本完全唔識講！

2009年9月7日，我加入宜家呢間機構工作，擔任外展隊隊長。

事情發生喺五年前嘅冬天.....

星期六，返工同事唔多，我朝早負責當值。

下晝四點幾，距離放工時間尚餘半個鐘，一位中年女士突然神色慌張上嚟中心求助，帶住個十六七歲嘅男仔。

「我奶奶俾佢個大女禁錮咗喺屋企，發緊燒、食唔到嘢，但佢大女唔俾佢去睇醫生，你哋可唔可以幫吓我？」

接待處同事：「妳打電話叫白車送佢去醫院啦！」

女士十分焦急：「佢大女唔俾！佢大女有精神病！我頭先同我個仔一齊上去，佢只係不停喺度鬧，連門都唔肯開，話自己攪得掂！」

我，立即出去介入！

經了解後，原來婆婆住喺我哋服務範圍！

眼見情況危急，我同同事講，我宜家會即時出去家訪！

黃婆婆，80歲，同未婚嘅大女同住，彼此相依為命。

婆婆於兩年多前中風，自此行動不便，大小便失禁，由大女照顧。

大女，58歲，以前喺醫院做護士，自十年前開始患上精神病再冇返工，近呢兩年變得越嚟越多疑煩躁，經常對家人(包括同住媽媽)破口大罵！

婆婆幾日前開始發燒唔舒服，但大女話只係小事，唔需要睇醫生！

噚日，新抱跟佢老公(婆婆個細仔)一齊上去探奶奶，發現婆婆情況好差，燒到102度，但勸咗大女好耐，大女依然唔肯俾婆婆去醫院！

廿分鐘後，我跟住新抱，去到婆婆屋企。

我同大女隔住鐵閘傾咗近十分鐘，先氹到佢開門俾我。

入到屋，雜物好多；全屋閂哂窗，一啲新鮮空氣都冇；空氣中彌漫住一股難聞嘅排泄物氣味！

我入到房，見婆婆側身瞓喺床，下身只包住尿片，並冇著褲。

屁股同腳跟有幾個傷口，用紗布片冚住，紗布片有滲液！

原本白色嘅紗布片啡啡黃黃，明顯好唔乾淨；大女手中正拎住一卷紗布，應該幫婆婆處理緊傷口！

前護士、精神病、過去嘅專業、此刻嘅堅持、同媽媽相依為命嘅感情、多疑倔強煩躁嘅性格.....

我同大女講每一句說話，都要十分小心謹慎！

婆婆側身瞓喺床上，發緊燒嘅佢，不停喺度痛苦呻吟！

我彎低身向婆婆自我介紹：「婆婆，我係阿肥姑娘，我特登上嚟探妳，妳宜家係咪好辛苦？」

婆婆無力地點點頭.....

我游說大女送婆婆去醫院，大女情緒開始高漲，立即堅決反對！

於是，我改變策略，話只叫救護員上嚟幫婆婆檢查，但大女仍然反對，仲叫我哋盡快離開！

眼見再糾纏落去唔係辦法，為咗婆婆生命安全，我得到新抱同意，即時電召白車；同時通知救護call台，我可能需要警察幫忙！

十多分鐘後，救護員同警察一齊上嚟！

我喺升降機口迎接救援同事，同佢哋講述內裡情況；大女見到警察，竟然變得異常鎮靜；警察同大女傾談，我就陪同救護員一齊入屋，成功將婆婆抬上白車。

星期一，新抱打嚟中心，多謝我前日仗義相助！

醫生話：婆婆肺炎、傷口嚴重潰爛，如果再遲少少送嚟，送到嚟都冇用！

我同新抱講：唔需要客氣！我，只係盡一個有心人嘅本份；我，只係盡一個社工嘅職責，正因為婆婆唔能夠保護自己，我哋更加需要盡能力保護佢！

最終，婆婆喺醫院留醫三個多星期，我同仔仔同新抱商議後，同醫務社工合作，送咗佢去一間私營護老院！

肥皂泡，可以好漂亮，但亦好脆弱！

可以吹到好大，映照四周繽紛嘅景色！

但亦可以好快爆破，連飄浮一秒嘅機會都冇！

我，希望能夠見到好多肥皂泡喺空中飄浮；而每個肥皂泡，都能映照唔同人同動物燦爛嘅笑臉！

呢個係我做人嘅宗旨，亦係我做社工嘅願望！

願與大家共勉之～