做緊 BAFS (Elective Part) 筆記
的確唔少野要讀，但好多都係好生活化。
例如當中有讀到 leverage ratio 槓桿比例
以公司為例就有 debt ratio = total debt / total asset
ratio 愈高，公司就愈危險
其實呢個 leverage ratio 槓桿比例 亦可用於形容投資股票
而家買股票可以唔係全部係自己資本
呢個買法叫 "孖展"，即係英文的 "margin" 讀音叫過黎
簡單一句，你可能有 $1，但買到值 $4 的股票
(即係有 $3 係借的)，你的買法就叫槓桿4倍
因為你買左 $4 的股票時，如果股價升 10%
即係變成 $4.4，如果你即時賣左，還翻本來的 $3 (當無利息)
你就可以 $1 變 $1.4，即係升左 40%
比起佢原本的 10% 多左 4 倍，亦即係槓桿4倍
但係相反，股價係跌 25%，即係 $4 變 $3
你果陣賣就得 $3，還埋錢就係 $0
即係你的損失亦係 4 倍 (由 25% 變成 100%)
如果再大獲d，跌左 30%，即係 $4 變 $2.8
你就賣左都唔夠還錢，即係負資產
所以公司槓桿高、同炒股票槓桿高都係好危險。
但槓桿極高的樓宇市場大家就好似習以為常
香港地買樓就大多數有按揭
一般買樓都會做 7 成按揭
但新樓係可以做到 9 成、甚至 9 成半按揭
如果以 9 成半按揭為例
即係 $5 本，買 $100 貨，槓桿 20 倍
升會快 20 倍，所以不時都會聽到有人炒樓至富
樓價升 3 成，相當於佢升 30%x20 = 6倍
所以差唔多就會有報紙虛擬一個人物
聲稱佢用以上的方法 6倍又6倍、6倍又6倍
幾萬起家、炒炒下就身家過億
但有幾多係演員、幾多係炒家就真係得佢地先知
而且通常呢d少年英雄，出完報紙之後就永久潛水
所以我都係講下下跌的情況會實際d
如果槓桿20倍，就即係樓價跌超過5%，你的物業就係負資產
負資產的情況，銀行有機會要業主補差價
否則會用你的物業以銀主盤形式賤賣
差價會變成你的私人債務
所以買樓同孖展炒股票相比，其實風險更高
因為斷估你持有的物業價值會比你買的股票價值高
槓桿大、價值高，的確係一個好高風險的投資
當然，俗語有云︰成功靠父幹，
如果你老豆有個大水塘 backup 你就除外。