【龔成問答信箱】（Q17921-Q17940）

Q17921：

老師，我上完初班，宜家用緊啊Sir你既選股6頁紙去分析雅生活同埋鐵塔。

1. 雅生活
見到佢ROE最近5年都高於20%，同時派息比率又唔高。另外，營業額、盈利同毛利率都穩定向上。其次就係資產負債比率都好理想。再加上有雅居樂同綠地兩間公司比生意佢。另外，上堂聽啊sir你講，物管既收入又高，又持續。

想問其實雅生活係咪算一間好優質既公司呢？
佢係算水桶一嗎？

我$入左$35.3一手，諗住再係$31-$32再入，到$28就大手掃貨。這策略可以嗎？

2. 中國鐵塔

最近5年既ROE都好低，平均得1.5。收益同盈利係有增長。負債高，而且流動負債又大過流動資產。再加上有政府限制佢賺錢既幅度。

其實鐵塔質素係咪唔算太高呢？

另外，我宜家有40,000股平均$1.44。之後既策略應該係點呢？有少少後悔未做好分析買入此股，因為分析完覺得唔太優質。

龔成老師：

1）你的分析正確，雅生活服務（3319）不錯的，是一隻有質素，有前景的企業，現價合理區中上部。

佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

當然，行業有時會有較大的炒作，股價上落大，要注意風險，而整體是有長線投資價值的。

2）中國鐵塔（0788）本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價，但分注入較好。

由於這股有發展力，可長線。

其實，「企業評估表」的第6頁，有「投資策略」一項要你寫的，如果買入前能寫完整的策略，會較好。

------------------------------------------------

Q17922：

老師！我一直揸住1211，系未上你堂之前，自己買左2本你的書，應該系2019年，我係10月買左比亞迪，當時只系睇餸食飯，因為自己失業

42歲強積金都拎埋出嚟，諗住同朋友系国內投資運動用品生意，可惜諸事不順又遇到COVID-19 。。。

我當時大慨平均39.25（連手續費）入咗2500股1211，之後上左堂才發現，「升一倍放一半」的理解，現在我內心糾纏，因為已經升左2倍，我又待業中

現在在嶺南進修MBA,希望明年畢業可以搵到工，我之前升個段都一直冇貨，近期升到過百，內心想放3手，留2手

希望用個3手的$再投資，但又怕自己早放左，我在內地生活超過13年，也算了解比亞迪，當初只單純因為對它的公共交通工具（的士/巴士）

覺得系環保車，比亞迪在國內算成熟，同領頭，單看深圳政府從政策到落實用1-2年時間（2018-2020）將成個深圳變成全部藍白色的士

加上閱讀你的書之后便膽粗粗入左市，我現在的心情確實有點爭扎。可能我失業，現在每天也是吃積蓄吧

龔成老師：

無人知佢會唔會再升，又或回落。

潛力股經常都有這類情況：股價大升，升到基一點，大跌，但如果你太早放，又會錯過佢長遠企業發展，大升的一段。

你要假設，你賣出這股後，有可能買唔翻，無人知的。

當然，有時你高位唔賣，佢跌翻後你又會後悔，長線投資者要有很好的心理質素。所以，我先提出「升一倍，賣一半」，這是一個較平衡的策略，你可收回本金之餘，如果企業發展理想，股價再向上，你之後都是淨賺。

因為潛力股股價波動，無人有絕對答案的。

如果你有資金需要，我會建議你賣出2手，餘下的就唔好理，長線持有。

------------------------------------------------

Q17923：

請問可以講下安X收益及增長基金嗎?最近愈來愈多人sell, 而睇翻幾年走勢都係不停升

因為喱幾年聽過好多人sell, 講到喱個基金好吸引。除左係咁升, 仲月月派息, "年回報有8-9%, 但就每年收2.5%管理費.咁實際回報仲值唔值得投資

龔成老師：

我無特別研究這基金，因此無太多意見。

你要了解說，該基金的投資策略，以及過往的回報情況（要睇長期，如5-10年），而所謂的保證回報，是點得多，有些基金是將部分本金派出，而不是出面有獲利派出。

管理費當然是扣分的地方，長遠都有一定的影響。

------------------------------------------------

Q17924：

hello, 龔sir, 我最返買左你本 《5年買樓》一書，亦都因咁開始想學下投資，買入資產咁。3年後我爸爸媽媽退休，我要開始供樓，每月$19000

我自己都想同女朋友買樓，不過我而家工作收入唔穩定，儲蓄存款有$70000左右，我可以點做？求指教

龔成老師：

先要累積多D財富，你有3年時間去好好把握，因為3年後你資金就會集中供樓，你就好難再利用股票等投資增值。

這3年是財富增值的黃金時期，要好好把握，盡你一切的力量去儲蓄、投資、學投資知識。

第一，你要盡力加大儲蓄，第二，你要做投資，第三，你要盡力增加知識，以提高回報率。

你可投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。遲些有更多知識，先考慮潛力股。

你可以考慮盈富（2800）。

另外再加其他股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。你可以等股價回落先，暫時唔好心急投資。

現時大市處合理區，可以一邊投資一邊留現金，而餘下現金的運用，就是等大跌市時出手。

你可以動用$3萬，餘下就留現金。同時，努力儲蓄投資，利用自行分注或月供股票都得。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17925：

老師有冇買濠賭股
0.96 太陽城有貨

不過有信心開返關自由行會好

龔成老師：

我自己持有金沙（1928），之前都有在$2X增持。

太陽城（1383）這股你要較小心，核數師意見出現了「保留」意見，反映盤數「有古怪」。

加上過往經常出現虧損，股價上落大，你要小心。

------------------------------------------------

Q17926：

龔Sir，若不以月供形式投資，想問在5年內放$240000投資，個回報是否都可以累積$30萬？

能累積$30萬？因為股票有升有跌丫嘛！

龔成老師：

利用月供股票，預期當中有基本的回報，你預大約是能累積到$30萬。

這是考慮股票的增值+股息。

當然，這只是一個「預期」回報，實際情況是無人知的，但我地從過往的經驗得知，股市中短期會波動，而長期則會慢慢增值，因此，只要你投資一些有質素，能平穩增長的股票，基本上就能預期有這回報。

------------------------------------------------

Q17927：

您好，龔成老師，有件事想你俾D意見

我係澳門人，33y, 有家庭，有2套物業，A物業，欠銀行300萬，月供約1萬多D，30年期，15年買hk485萬，現24年樓齡，自住中，建築面積750呎。

B物業 ，今年買入的，下年6月收樓，Hk738萬，到時月供22000.建議面積：730呎，打算放租，我希望可租保守一萬，因應當時經濟

A物業近市中心，易放租，可租埋車位，單位放租約8000,而B物業較遠離社區，因新樓，有會所，管理費都會相應多d

現有个問題，2个物業需3年後才可放出，因本人希望換间大D三房自住，一定要賣走一間，賣A物業，會套到多d錢出黎，約套到300萬，但賣A，若買一间三房，月供會多D，再加埋B月供，壓力會大D

我同先生人工每月可有8萬甘，公務員，我想于哩3年內希望可儲到一百萬，每月保守儲2萬

及投資股票（有66港鐵38入500股，2800盈富平均25.13入1000股，285比亞迪電子平均16.68入1500股，354中國軟件國際5.75入6000股，1349復旦張江5.5入股，788中國鐵塔1.55入6000，806惠理平均6.5入35000股,）

最失敗是幾年前投入太多惠理，套住左D錢）,希望可以增加到時可以換到心目中樓

如果係你，你會如何選擇，並怎樣做3年有100萬，謝謝，知你忙碌，有時間才覆我吧，謝謝

補充少少，A單位缺點低層4樓

如果賣B，回報較少，因才開始供幾年，而保留B，缺點係月供較多，係A一倍

龔成老師：

我地決定持有那一間物業，賣出那一間，最重要是睇「質素、前景」，其次就是睇你的按揭等供款情況，至於買入價，往往只是心理因素。

因此，你重點要分析，那個物業易出租，長遠的租金升值較好。

初步睇，B的質素會較好，但賣出A保留B，你的負擔會較高，因此，你要計翻自己的負擔能力，是否能順利進行，以及風險程度如何，如計算後可承受這風險，就進行。

另外，你盡力在這幾年累積財富，提高儲蓄部分。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

另外，由於3年時間唔算多，因此盡量在這時期把握買賣時機，但唔好心急。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另外，你睇《5年買樓4部曲》，幫到你的。

------------------------------------------------

Q17928：

老師，想問下置富778 有冇潛質成為倍升股？個人係佢每次浪既低位都幾手幾手買(eg $6.5)，希望博佢有100%增長，合理嗎？

另外以前都問過老師你 莎莎0178 如何，呢隻股仲有將來嗎？

最後一樣就係我已經睇左你大部分書籍，依然吾明白點樣計算一隻股票既價值，例如某隻股票是否處於合理區或者便宜區，以及點判斷某股票是否倍升股

龔成老師：

置富（0778）是不差的房託，有質素，但這只是收息股，增長力不算強。你要明佢原理，持有房託如買樓收租，佢長遠租金會穩定，但不是大升模式，因此，你都好難預佢股價會倍升。

莎莎（0178）中短期當然好弱，但我地投資，要有長遠的眼光，當疫情過去，佢又會回復正常，當然具體的情況無人知，但始終不是無質素。不過由於當中有變數，所以就算投資這股，也不能太大注。

由於企業價值，會涉及一些較難解釋，以及要以較新的大環境去計算，所以好難在書講述，這些都只會在我的股票班教。

------------------------------------------------

Q17929：

龔sir, 1)想問金碟，因之前已認為這股有潛力，但一直都係合理區以上水平約7，8元,所以就沒有買入想等佢跌到平先買，但到現在已升近幾倍

而哂咗投資機會，請問如果你係當時會作出點樣的投資決定，會照買入嗎？

2)考慮到潛力股特性，你認為應該點建立一套平衡策略？
謝謝！

龔成老師：

如果一隻股是優質，有潛力的，我就算有合理區都會買入，有時在合理區頂，都會小注投資，之後等跌先正式入，等自己有少少貨。

因此，當你見到一間公司好有潛力，而這類潛力股估值又較困難的話，只要不是太貴，你都可以買入少少先，等自己有貨，之後就等跌先入。

投資無一套完美的方法，我地只有利用策略，分注等方法，去盡量平衡風險與回報。

------------------------------------------------

Q17930：

成哥你好啊
我月供已經有1年
月供（平均價）
2（74）
3（15.3）
66 （44.5）
0823（79.5）
2388（27.5）
2800（25.85）

另外有6 （71）2手 ，23（1手）

之前有月供1211（39）見佢升到7X就賣咗，想等佢到返40-55先月供返

最近發現有幾隻質素無以前咁好我應唔應該停2，3，2388改去供1810 / 9988/0981，美股科技股google / 微軟 +visa/Master？

同埋見油價都低咗好耐而架值唔值得入定係油已經俾新能源取代咗已經唔值得入？

我買入6同23號已經有2年..但個價一直都跌係吾係要止蝕先岩？

龔成老師：

你現時月供的股票，雖然都有質素，不過增長力不強，你可能要建立一個更平衡的組合。

所以，你部分轉其他無問題的，你最緊要「設計一個長期的組合」。小米（1810）、阿里（9988），可月供，中芯（0981）風險較高，要自己衡量。而上述的美股，都是有質素的。

至於比亞迪（1211），無人知能否去翻$4X，因此，你其實可以在$60，已開始月供，這已是合理價。

油方面，投資價值一般。

電能（0006）你可以持有，長遠仍是有質素至於東亞（0023）則相對較一般。

------------------------------------------------

Q17931：

老師在書中推介的比亞迪電子最近已突破早兩年的高位，如冇記錯應該是27.5水平附近。請問此股份是否值得長線持有？年初至今升福不少，應在什麼價錢考慮止賺離場？

另外想請教襲成老師，應如何決定短線/中線/長線的止蝕價？是取決自身的風險承受能力嗎？謝謝你

龔成老師：

比亞迪電子（0285）是潛力股，可長線投資，你預佢$25以下會較合理，因此，如果你貨較多，你在$3X可以賣部分，餘下就長線。

至於短線/中線/長線。

首先，唔建議短炒，但如果你短炒，一見唔對路就要走，跌15%要止蝕。至於中線，就要睇翻當時的投資情況，如大環境改變，都要走。

不過，我始終唔太建議短、中線，因為好難玩。

長線投資則最好的，如果要止蝕，就是「企業的質素」改變。

------------------------------------------------

Q17932：

龔sir你好，本人25歲，由1年半前開始月供以下股票
2800 -$2000
2388 -$1500
66 - $2000
1211 -$500 (因現價有點高，所以呢兩個月由$1500下調到$500）

（1)考慮到銀行業盈利能力冇以前咁強，同埋香港風險問題，停供2388，轉供其他可以嗎？

（2) 27，788呢兩隻股票適合長級月供嗎？注碼大約$1500-$2000/月

（3）另外手持
1200股 1972 @ $21.05
2000股 788 @ $1.53
6000股 178 @ $2.21
2000股 1212 @ $9.58
400股 1928 @ $28.3
1000股 1257@ $ 3.79

以上股票優質、適合持有/繼續增持嗎？

（4） 2800可以繼續長期月供？

（5）今年仲會出新書嗎？

麻煩哂呀sir

龔成老師：

1）銀行業的經營情況，的確比過往年代弱左，不過我地所有野都要睇長期，長遠又不是太差（當然，最賺錢的年代已過）。

因此，如果你想轉的話，可以的。

2）適合。

3）都可以長線，不過零售類就唔好心急加注。

地產及賭業，如果這類股佔你組合比例未算過多，可考慮加。

4）可以。

5）《80後千萬富翁》，預期在年底。

------------------------------------------------

Q17933：

老師，想請教一個派息問題，例如金沙/銀娛，兩者都是澳門賭業龍頭，過往金沙業務雖同樣有增長但派息一直保持在一定水平，而銀娛派息卻一直增加。

這些不同的派息政策背後一般是什麼原因？是否意味金沙發展力度較少，所以直接派錢？

龔成老師：

當我地分析時，要考慮企業的業務與發展情況，金沙（1928）在過往一直發展，但到近年，增長力已減慢，我地見到金沙會偏向收息，但增長力就不算好強。

至於銀娛（0027），過往由於不斷發展（其實現時仍發展中），所以大量投入資金，令派息較少，到近年才慢慢增加，由於預期發展持續，因此預期往後現金流增加，股息也會向上。

所以，這是一個發展的問題，從股息的數目，金沙是較多，但由於佢往後發展不及銀娛，因此如果你想增長多少少，就銀娛。

------------------------------------------------

Q17934：

老師，你好。想問下你點睇45？我大約$10時買入4手，你覺得呢次疫情會唔會影響長遠嘅發展？係咪應該賣出？謝謝

龔成老師：

大酒店（0045）有質素的，不過中短期一定會好弱，至於長遠，仍是有質素的，本身的品牌始終有價值，但當疫情持續，就會不斷消耗現金，企業價值都會因此而減少。

你原有貨如果佔組合比例不過多，可以持有。

------------------------------------------------

Q17935：

老師，想問下中國平安，見佢個價都有回落，自己以前做恒基，恒基國內物業都係用中國平安保險，感覺發展良好。想問問老師分析點睇？

龔成老師：

平安（2318），本身有質素，長遠仍有發展力，市場仍在發展中，因此有長線投資價值。不過中短期就會有少少波動，這是由於佢都會受投資市場影響。

------------------------------------------------

Q17936：

老師，我見285已得突破咗新高，50天線也在250天線之上，也高出52週低位有200%之多

加上所以平均也是上升趨勢，所以我覺得將會是爆升股，龔老師，你覺得我這樣分析正確嗎

龔成老師：

你唔應該用「過往股價」去預測將來股價發展，或推斷這企業的類別。

我地最重要是睇「企業的業務了展與前景」。這才能分析到這股是那類別。

同時，我地要以企業的價值去分析。

------------------------------------------------

Q17937：

你好龔Sir, 多謝你的課堂！

本人30歲,於2013年8月開始月供港鐵,約每月二千月。2018年開始月供AIA, 2020年月供恒基和比亞迪。

現時月供股票組合：
AIA HKD3000
MTR HKD1000
比亞迪 HKD2000
恆基 HKD2000

請問這組合有什麼可以改善的地方？怎樣可以加快錢生錢的速度和增加錢生錢的力度?

想請教一下,比亞迪同恒大健康現在都生產電能車,如果在長期持有的前提下,你會比較推薦哪一隻？
原因何在？
感激

龔成老師：

你的組合不差，基本上可以保持月供，只要長線就得，如果想組合更平衡，可以加上盈富（2800）。

如果你想組合增長力增加，可以加入一些較有潛力的股去月供，：阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。

長遠來說，比亞迪（1211）較好。因為已經有技術及產品，而恆大（0708）只得廣告。

------------------------------------------------

Q17938：

你好成sir,留意左隻788好耐,請問咩位買?
另外想問埋隻1038同6066？

想問吓中長線邊隻較為值博?
麻煩可以俾個買入價參考嗎？
多謝你

龔成老師：

中國鐵塔（0788）有質素的，現價合理，分注都可。你預$1.2以下開始平。

長建（1038）有質素，但中短期較一般，長遠慢慢會好轉的。現價合理區中下部。

中信建投証券（6066）質素都算有，但業務有點波動，加上之前升左好多，因此投資要較注意風險。

------------------------------------------------

Q17939：

老師，你的《財務自由行》睇完長知識！

除咗知道偷錢系統外, 第十章舉咗3個例子原職業成就財務自由幾有啟法性, 就算冇學歷只要有心有行動力捉緊機會一樣可突破自己！千祈唔好看輕自己, 平凡人都可有成就! 我現在開始睇80後2百萬富翁！

另外, 7.89入咗3918, 請問是否合理價可長揸嗎？

龔成老師：

我出書，就是想大家明白到，好多野我地都能做到，只要去試，相信自己就得！

金界（3918）有質素的，你預中短期會較弱，但長線無問題，可長線持有。

------------------------------------------------

Q17940：

龔sir 你好! 我現在每個月預算月供 ＄20,000. 我想請問以下組合會否太過分散嗎? 謝謝!

2800 - $4000
700 - $2000
9988 - $2000
823 - $2000
12 - $2000
914 - $2000
270 - $2000
384 - $2000
2318 - $2000

龔成老師：

上述的組合，都是一些有質素的股票，唔算好散，不過就唔建議再增加其他隻數。

適當的分散，能減少集中風險，因此，只要當中是優質股，而你有管理得到，其實都可以。不過，你就要供較長的時間才有一定數量的貨，如果你是以長線月供，就無問題。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15081-Q15100）

Q15081：

阿sir!唔好意思，想請教下睇年報問題，上堂學過要睇負債比率，總負債除總資產。

想問下account payable, account receivable都要計入嗎?

我見經濟通的財務比率全部都計曬，但account receivable可能收唔到變壞帳，定係計算時應該剔除佢地?因為計唔計會影響個比率

龔成老師：

其實負債比率有兩個：

總負債除總資產
總負債除股東權益

至於你上述所講的項目，都要計算的。其實每項資產都有佢當中的風險，例如存貨，都會擔心唔值錢，賣唔出，所以，這些財務比率，只是一個入門給投資者了解企業的財務指標，令我地可以好快知道企業的情況。

但當我地進一步分析企業時，就要睇翻財務報表，仔細了解資產與負債的問題，這時就要關心你上述所講的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15082：

請問月供股票是長線投資，但人生每個階段都可能要突然需要一筆錢，例如買樓，結婚，醫病，留學，生BB等，所以實有機會中途需要沽出部份股票套現，但問題是如果要錢時遇正股災，最後多年既投資咪化為污有？

龔成老師：

一般會建議月供部分，是假設你中短期都唔用的，即是說，你應該月供，同時儲現金（以供特別用途）。

所以，月供可以話是用作閒錢去供，一般是3-5年，甚至更長。

如果要動用資金，最好預早計劃，例如打算月供5年後買樓，當你準備買樓的前一年，如果要動用到月供裡的股票套現，就要開始準備，不要在買樓需要的一刻才賣股票，要預早，在貴的位置，又或分注模式去賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15083：

老師！ 身體健康 ！心想事成！ 百毒不侵 ！

想請問下恒生 ，中銀香港， 那一隻較佳， 佢哋合理區便宜區喺邊度！ 領展，恆基 又在邊度？ 盈富基金？

致富， 莎莎， 中石化 邊隻收息會好啲 佢哋個區域又係點區分！ 銀河同金沙 佢哋個區就係幾時到位？

依家返工每日見到啲客人只有平時嘅一兩成， 比海嘯嗰陣時影響更大， 公司 緊縮政策 開始， 真係有啲擔心， 不過我都會相信老師呢啲係中短期影響！

老師！香港經過呢兩次 重大事件重創 ， 會唔會本質已經有變！ 你會唔會轉 而投資其他地方嘅股票！ 最後 感謝老師 百忙之中 回覆我咁多嘅問題

龔成老師：

恆生（0011）收息較好，中銀香港（2388）增長力略高。

現價都合理，可以分注，你預跌多1、2成先平宜。

只外，如果你想投資收息股，可以考慮建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

零售、旅遊是今次的重災區，預期中短期都會好弱，但如果從長線投資的角度，以3年後的業務情況如何？作為分析點，就有機會是長線投資者的機會。當然，我不建議這類股大注，始終中短期風險相對較高。

至於香港，貿戰、反送中、肺炎，對香港影響好大，但未去到核心性。只要以「3年作為分析點」，預期香港是回復正常的，但中短期一定會好傷。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15084：

龔老師，請問999 I.T現價好似好便宜？

你認為值得買入長期放係度嗎?佢pe 5都未到，息率10%，謝謝

龔成老師：

I.T（999）雖然市盈率好低，但佢的數據，是上年度的，即是上年的盈利計，市盈率只有5倍，但如果計及最新一個年度的情況，預期盈利大跌，情況就會不同，因為佢最新公布的中期業績，已經出現了虧損。

如果以近年較弱一年的經營環境作參考，2016年，因為當年中國經濟轉弱，香港市道較一般，算是較反映未來1、2年香港的市道，當時佢賺$2億，以這數據推算，市盈率為10倍。初步睇，只是合理區，並不能視為特別平宜。

整體上，這股都質素算是中等，如果不太大注，都有長線投資價值，但就要預佢中短期會較弱。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15085：

老師，你覺得大眾銀行626, 可買作長線收息？

見他的市盈，及市脹率都偏低，但收息7厘

龔成老師：

大眾金融控股（0626）規模細，同時業務風險會比一般的銀行略高，我先簡單講佢的業務分類：

（1）零售及商業銀行和借貸業務：主要包括提供存款戶口服務、樓宇按揭和消費信貸、租購及租賃、提供融資予有牌照公共車輛。

（2）財富管理服務、股票經紀及證券管理業務：包括債務及股本證券投資管理、證券買賣及收取佣金收入

（3）其他業務：包括的士買賣和租賃及投資物業的租賃。

業務都穩定的，但市值是大銀行的10份之1以下，規模細，同時業務類別比傳統銀行，會偏向較高風險類。

整體上，這股收息可以，因為股息率吸引，可長線投資。但不建議太過大注投資，始終本質有風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15086：

我想問為何澳門幣、港幣、美金，多年來仍能繼續掛勾？ 三地經濟體差別很大，經過多年供求應該愈差愈大，應該不能單靠金管局就能維持匯率。

龔成老師：

因為美元是全球貨幣的核心，無論經濟上是否有好大的聯擊，在全球的貨幣制度體系，都會同美元直接或間接掛勾，這是一個保持匯率穩定的方法。

全球都會相信美元，但未必信其他貨幣，就算歐羅，信任度都遠不及美元，加上美元是多國的貨幣儲備，所以從基本的貨幣信心及結構來講，與美元掛勾是基本。

至於具體的運作，以港幣來說，如果銀行要發行一張港幣，就要有對等的美元，才可以發行得到，你可以上金管局的網，有詳細講整個發行過程的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15087：

龔老師你好!想請教一下，美团及阿里巴巴这2股票多了個符號，這個改動會有含意嗎？

"SW"同"W"？？

龔成老師：

小米集團W（1810）及阿里巴巴SW（1830）都是特別類型的股票，所以多了一些代號以供投資者明白。

「W」即是同股不同權，即是大股東持有的1股，與一般小股東持有的1股，投票權是不一樣的。大股東的投票權是小股東的10倍。

這的確是一個不公平的制度，因此在投資時，會在估值裡減少少，以反映當中的風險。

至於「SW」，即是阿里巴巴除了行同股不同權外，這股在香港是「第二市場」上市，因為佢在美國第一市場上市的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15088：

老師， 其實你經常說潛力股風險比較大，是否由於：1.因股價波動影響買家情緒 從而令買家做出非理性行為 2. 公司內在價值要在一段比較長的時間才能反映在股價上 所以對年老者而言可能「等吾切」3. 行業前景和公司發展有不確定性

龔成老師：

潛力股的風險比較高，有兩大原因。

第一，潛力企業發展的業務，往往是較高增長的類別，這反映行業皓結權未完整，這刻可以是王者，但過2年可以不是。

這是一個有危有機的局面，正正造就了潛力股，但同時對企業存有較大的不確定性。

同時，企業見到這是一個很好的發展時機，因此投入了一定的資金，但這不一定有回報，這同樣會令企業的風險較高。

第二，市場對潛力股的期望會較大，同時由於潛力企業的財務數據變化大，令估值難，這就好易令投資者在貴的時期買入，股價上落大，風險高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15089：

老師 見你有提到0012現在是合理價位
請問你點睇3333恆大？

想兩者選1作為收息
或者兩者一起購買均可

龔成 24000以下，平宜，用現金掃，如果再跌，可能21000，借錢 - 請問呢個指的是買恆指嗎？

龔成老師：

恆大（3333）業務本質不差的，之前的業務增長理性，不過，中國經濟轉弱，加上這企業負債極高，都增加了投資這股的風險。

恆基（0012）可以安心投資，恆大則只能小注投資。

另外24000、以下是平宜區，但記住，無人知到唔到，現時大市在合理區，最好的方法就是分注投資，同時留現金，這是最平衡的。

如果到了20000，可惜錢，到時要睇那些股跌得最多，投資值博率最高。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15090：

龔 Sir, 我有兩份以美元為單位的基金相連保險，期間都有轉換過不同基金，但大部分時間現金額總是低於投資額。現時基金大部分係投資於中國、東南亞的。保單資料如下：

保單一：2006年開始投資，現時退保金額，約USD 41k，投資總額約USD 44k
保單二：2011年開始投資，現時退保金額，約USD46k，投資總額約 USD48k

問題如下：
1. 想保留美元，作為投資組合嘅部份，應該嗎？
2. 以美元為單位，可有什麼投資工具？
3. 要等佢返到投資金額水平先斷單？

已花了10年以上時間，但係成績強差人意
請指教

龔成老師：

1）你可以將這些產品，視為財富組合的一充分，因為我地進行理財，攻守兼備是需要的，但你預這部分的增長力不會強。因此，都可以保留。

2）你可以考慮美國股票的指數基金，例如追蹤標普五百指數，又或類似的基金，我相信回報會更好。

3）你可以等佢上翻先，因為差額不算多，相信有機會做到。

你最好只當這些產品是財富其中一部分，唔好有太大期望，自己要將部分資金，利用其他方法去進行增值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15091：

老師，以下文章點睇：
「美國等國家將香港及中國大陸列為一個危險的疫區，所有中國航班停飛美國及好多西方國家。

港幣將會大跌，早幾日港幣兌美元場外大宗交易已經去到9:1。嚟緊港幣和人民幣將會停止交易，香港交易所、上海交易所、深圳交易所，好快將會休市。

南中國海將會發生戰爭。

請您盡快安排您的股票，保全財產。

以上係我近期聽到的消息及分享俾我朋友。

我唔係預言家，但以上事情會係今年年中之前發生。

今年，除咗黃金大漲，其他資產價格都會大跌。

你今日唔信，當我痴人說夢，刪左佢，當我冇講過就好了。

局勢只會越來越差。」

我一直都覺得你講得好啱，要睇價值，唔好睇格價呢個諗法，所以收到一啲長輩呢段文章，想同你分享下

龔成老師：

香港有聯匯，根本唔會出現大跌情況。
另外，完全睇唔到股市有可能停止。
另外，完全睇唔到會南中國海將會發生戰爭。

如果上述的不利消息出現，作為價值投資者，是改變一生難得的掃貨時機，絕對是好時機！超級好機會！

我見你都有理性睇這些訊息，這是投資者好重要的！

成功投資者，就是理性分析所有資訊，然後把握機會。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15092：

龔Sir,你好！本人31歲，月入57k，目前有現金85萬，留作大跌市入貨或上車首期，每月可儲5萬。

以下是我目前的股票投資組合，懇請提供一下意見：2、12、405、460、778、2388、3988。非常感謝

龔成老師：

你現時的持有，大致都是有質素的。

要留意，四環醫藥（0460）這股，2015年、2016年，曾經出現了核數師有「保留意見」的情況，反映盤數有問題，小心這股。

另外，銀行股的比例要控制翻，不能過多。

如果你有買樓的可能，建議你現時持有的現金，繼續持現金先，另外，要計算一下自己想買的目標物業，大約要多少資金，如果現金已足夠支付首期的話，可以好好利用現時每月儲到的$5萬。

可以將其中的$2萬，用作月供股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$10000
。

你可以考慮盈富（2800）$5000。

另外再加3隻（每隻$3000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$20000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15093：

龔sir 請問：
1）最近市況低迷，如何判斷何時放售那些吾ok的股票？應該立刻放雖然蝕多ｄ但更快投入2800,還是待之後市況回升才售？

2）如果樓市中短期會跌，會否2年內便會需要動用資金作首期？

如果股市也持續低迷，現時還應該每月投入一萬在月供股票嗎？會否在要買樓時不能及時套現？

龔成老師：

1）記住，唔好用股價短期表現，大市情況，去判斷股票質素。買股票就是買企業，企業的業務質素、前景，是最重要的因素。

你賣出那些股，不是睇股價與賺蝕，是睇「質素」。

2）我相信香港經濟會轉弱，樓市中短期會向下，但不會跌得多，始終香港樓供不應求的情況嚴重。

所以，如果你打算中短期買物業，要預留多少少現金。我地月供股票、投資股票，都會以長期進行，因此，盡可能是買樓以外的資金，最多只能小部分投資股市。

因為無人知你買樓的一刻，股市的情況如何。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15094：

Hi龔sir
報了你股票班，遲啲見！

小弟22歲，月入17000，儲到8000左右。黎緊份工有補水，預計去到22000，可以儲到11-12k。諗住番多份pt，每個月多6-7k，但就要讀一個約20k既course先做到。但考慮到呢排跌市係入市好時機，我應唔應該儲起呢筆錢，等機會入市？

另外呢個月開始月供，組合如下
領展 $1000
盈富 $1000
中銀香港 $1000
比亞迪股份 $2000

請問組合ok嗎？

龔成老師：

所以有野，都從長遠的角度去想。

如果這個課程，對你將來的發展有利，就要讀，因為這個正面影響，是長遠性的，投資在自己身上的知識，永遠好過投資在股市。

我相信，你這刻的資金不多，就算大跌市，最終的財富回報未算多，這是正常的，但你要想長遠，只要你好好投資自己，集中長遠，相信30歲前有$150萬以上是有可能，你要想一些大的，長遠的，這刻好好增值自己。

你保持月供股票，同時在這年齡，努力將資金投資在自己身上。

因此，我會建議你報這課程，只要對你長遠有利就得。

同時，你報股票班都是正確的決定，因為對你長遠財富增長好有利，遲D見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15095：

你好 龔成老師
我28歲 美容行業 月入3萬左右
以前我系月光族 錯過咗好多時間
之前拍拖男朋友經常同我分享你嘅理念
我由上年起慢慢實行 令我2018終於儲到13萬 多謝你..

最近 拍拖2.5年 男朋友同我分手 認為我28歲太老 轉愛上18歲小妹妹（佢25歲）
令我好沮喪 搵唔到自己嘅價值嫌棄自己
我呢幾日一直睇你啲片 成日聽到你分享讀者來信 話：28歲 仲系好後生 .. 令我感覺好番啲..
多謝你 不知不覺默默支持住我

正題
老師 呢幾日受到你影片鼓勵
我決定要 36歲前做到財務自由 31歲前擁有首個個人物業 請問如何做到

我月入2.6-3萬（最近生意不景氣 人工有d浮動）
同家人住公屋 每月必需開支8千左右
每月 儲蓄12000-15000（包括月供在內）

月供緊比亞迪 $2000
3月起會加入 月供盈富 $4000 及 港鐵 $3000 .. 請問呢個組合可以嗎？

現在持有
盈富及匯豐各1手，恆生2手，3988中國銀行 10000股.. 現金9萬（打算恆指跌穿25,000之後 分注買入優質股 請問有推介嗎? 我心水 1177跌穿10後入1手）

請問老師對我呢個模式有沒有其他建議？
按住呢個模式嘅話請問幾多年之後可以達到財務自由？

再次感謝老師閱讀長文
感謝老師在黑暗傷心日子默默支持
當初認識你係因為男朋友10分認同你.. 現在已經人面全非了 十分諷刺

龔成老師：

好多野，我地改變唔好，唔好因為看不到你的優點，而令到你自己否定自己，你一定有自己的價值，只是別人不懂珍惜，這點十分重要！

28歲，仍是好年輕的時期，在這時期可以及早睇清楚你前男友，反而更好，相信自己，你會有更好的。

至於你的財務情況，月供部分無問題，這是適合長線的，你只要保持進行就得。至於持股方面，都是有質素的，可長線。

你現金部分，可以在大市跌少少的情況下，先動用3成，餘下再留現金，等再大的跌市才出手，你可以考慮：盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

如果你要在10年內財務自由，除了保持月供外，仍要增長知識，因為你要學懂分析企業、投資時機、平貴，先可以有更大的回報。

最後，過去的已經過去，唔好比過去的人和事，影響左你將來，記住，28歲好年輕，將來絕對有更好的等緊你！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15096：

老師你好，最近要注意身體
有幾個問題想問問：
中生制藥同金沙，幾多錢先算便宜？

龔成老師：

中生製藥（1177）是有質素，有潛力的股，由於市場都見到佢的質素，因此在估值裡，經常都唔平，你預$10以上是略貴的水平，如果要去到平，相信要$6、$7以下。

至於金沙（1928），你預$30以下先開始進入平宜區。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15097：

成哥，你好，請問用現金流折現率方法(已經計好公司價值)。

1)計好公司價值，你會唔會比多5%至比少5%來做計好公司總價值範圍。（這問題，來當做範圍方便自己黎睇或用這方法平衡下假設自己計錯）

2)你教我計好公司總價值之后除公司已發行股份，就會知這股合理價幾多，下一步就是比較現價，（若計好每股幾多）假設係$10，現價$20。。

甘果10$是合理價，甘10蚊跌幾多先叫平宜，10蚊升幾多叫合理中上，或貴，學生不明每股的意思。要唔要再計10$的範圍?。。只明白成哥教我（若公司總值20蚊，現市價10蚊，長遠計10蚊會慢向20蚊）

龔成老師：

1）這個沒有絕對的範圍，如果是巴菲特，佢會運用一個叫安全邊際，即是計出一點範圍後，要一半以下，先算平宜區。

2）由於現金流折現法，計出的是一點，我地可以用一個上下加%的模式，去定義平貴。例如30%，作為一個區（這個無絕對）（具體會在進階班講），但原理就是希望，將過往股價分區，合理、平、貴。

股價在中短期，可以與價值無關，但長遠來說，一定會趨向價值，因此，若果是計算價值正確（這是大前題），你在平宜區買到，之後股價會慢慢上翻合理價位的。

計算估值要多練習的，同時，現金流折現法比較深，初學時唔好只依靠這方法去投資。最好同時同多種方法估值，會更立體。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15098：

老師你好，本人每年約投放30萬在股票市場，
現持貨大約5萬股中華煤氣

但因應現在零售業和經濟低迷，
未來應該繼續買煤氣還是趁低買入希慎、恒地這類公司，謝謝回覆

龔成老師：

煤氣（0003）本身有質素的，我一般建議長線持有，唔太建議轉來轉去。

從投資值博率的角度，希慎（0014）正受中短期不利情況影響，對長線投資者來說，這刻的確較吸引。如果你持有煤氣的比例，佔財富組合較多，你可以減部分，將資金投資在這刻值博率較高的企業。

恆基（0012）都不差的，但這刻的希慎會較有值博率。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15099：

成哥你好，我今年25歲月入25K。2019年尾問家人借首期買左新界私樓420萬250呎放緊租一萬/月，想利用層樓轉按加按投資目標係兩層。望住依家個市好似不斷跌，有無咩意見可以俾到我？

龔成老師：

你的方向是可以的，但唔建議你太心急進行這事。

首先，你首期問家人借，如果你填寫個人的資產負債表（《財務自由行》有教），你會見到你的負債比率好高，當然，你年輕，可以承受風險。但如果你再增持物業，而模式是利用加按進行，其實會令你負債進一步增加，風險高。

另外，你要以長遠作計劃，如果你2019年買完樓，在這麼近的時間，又再買一層，就會令你買入時期集中在同一經濟週期，這會令你的風險增加。

樓市中短期上落好正常，反而更重要的，是你的長期配置模式。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15100：

你好 成哥
我岩岩畢業冇耐 做得3個月野 每個月(16k) 又資產唔多(~40k) 又要個個月還學債(1.8k), 可以點投資?

暫時組合(股數)
00097 恆基發展 3000
00823 領展 100
00987 中國再生能源 2000
01222 宏安集團 20000
01310 香港寛頻 500
01373 國際家居零售 2000
01929 周大福 400
02888 渣打集團 50
03988 中國銀行 1000
06882 東瀛遊 2000
08265 中國之信 12000

同埋諗住今個月開始慢慢月供港股同美股 ($/月)
長和 500
電能實業 500
新世界發展 500
恆隆地產 1000
香港交易所 500
AIA 500
港燈 1000
盈富 1000
香港電訊 1000
disney, apple, adobe, amd, brk B, JNJ, google, QQQ, FINX. VT,XBI 各100USD/month

會唔會太過分散同太多?我覺得自己供得辛苦。。。。

我跟證劵行供 咁岩免月供計劃佣金 港股500起跳 美股100美金起跳

拜託大師指點一二
個個股都想買 又唔知點揀好
想30歲之前有100萬
仲要每年供緊11k既儲蓄人壽加危疾保險

龔成老師：

以你現時的財富規模，5-10隻股票是較適合的，你現時組合開始有點散，你最好集中翻少少。你應該分析每一間企業的質素、前景，以評估最有投資價值的股票。

月供方面，亦有類似的情況。

你上述所選股的，很多都是有質素，但你都要學懂，那些質素較好，長遠發展較佳，無論你現時是資金多，還是資金少，你都要學懂處理這個問題。

買股票就是買企業，你要仔細睇企業的業務、財務數據、產品、企業估值、現時平貴。買入後，要持續跟進企業的業務發展（不是跟股價）。

如果你想在30歲前有$100萬，首先有大量增加投資知識，同時努力儲蓄、投資，這才可以做到（但我相信你可以做到！）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13461-Q13480）

Q13461：

其實你介紹既tencent/美團/阿里巴巴，呢D科網公司冇咩資產值，會唔會好危險?

龔成老師

騰訊（0700）與阿里（9988）不是無價值的。至於
美團點評（3690），我應該無正式分析過，最多只是網友問我，我做簡單分析。

美團的業務增長不能睇少，但估值十分難，所以我都無法定義現價平貴，只可以話市場只憑「前景」去分析，不過佢最近由虧轉盈，這是利好消息。

至於騰訊與阿里，資產價值的確不高，但我地分析企業，不能只限於資產，因為一間企業的價值，主要由「業務價值」與「資產價值」組成。

巴菲特早年投資，跟佢師父一樣，好著重資產、平，但佢後來發現，如果一間企業有質素、前景，就算貴過資產去買都無問題，因為業務價值值錢的。

就是現金流折現法來講，這方法都不是考慮企業的資市價值，而當我地進行估值時，好多時都會配合不同的估值法去計算的。你見港交所（0388）的賬面值不足$30，但現價卻長期在$200以上，可見資產價值並不是唯一的分析點。

另外，騰訊與阿里，都已經有正現金流，有實在盈利，所以唔會話危險（當然，我地都不能盲目高追投資）。

------------------------------------------------

Q13462：

想問下用十萬元買越秀房地產信托可以一年可以收多少息

龔成老師：

如果你用$10萬買越秀房產（0405），你預一年收$6000息。

現時佢股息6%，你可以好簡單，用投入本金乘一乘，就是每年預期得到的股息回報。

------------------------------------------------

Q13463：

老師，我賣了5万澳元和10万加元，買了中山一個物業和一個車位用了大概150万港元，剩下203万人民幣現金。
我想張這些現金5年滾至600万港元，請問有可能嗎？ 我應該如何組合才做到？

因為我希望日後每月有3-4万現金流，而之前見你教過别人要有這個現金流數字就要有600-800万資產才可以做到。

龔成老師：

外幣始終是「產品」，持有價值不高，轉為物業、優質股等真財富會更好。

如果你要將這$200萬滾存到$600萬，不是話唔得，只是這是一個好高的回報，你背後一定承受著相當的風險，因此，我不太建議這樣進取。

反而以更長時期，以更合理的模式，增長至$600萬，這會更穩健。

如果你真的要將$200萬在5年滾上$600萬，就要用以下進取方法：

可集中投資潛力股，可以建立一個進取的潛力，但你要比市場早一步找到這些潛力股，因此你要不斷進行選股的動作，同時要大量增加投資知識，先可以找到這些潛力股。

但要注意，這方法始終是高風險，唔太建議。

------------------------------------------------

Q13464：

老師，我一直遇上財政困難，之前工作不穩定，現在面對人工無法上升很多。眼看激烈的工作競爭，實在有點灰心。

現在年紀愈大，愈來愈擔心工作前景的問題！不過，眼看您由一個月8000上升到成為百萬富翁，實在是一件令人鼓舞及很勵志的故事！

多謝有您這個榜樣及詳細解答！未來我會努力儲錢，投資及增值自己！多謝晒！

老師，另外，想問下面對現在的香港亂局，還適宜月供股票嗎？

龔成老師：

其實好多野，我地根本可以做到的，只是由於自己「以為做唔到」，所以唔去試，但其實只要肯做，定目標，落實計劃，其實可以做到的。

你保持理財，儲錢，合理投資增值，增加知識，都可以一步步完成目標。

至於香港的情況，我仍相信只是中短期的問題，雖然對香港經濟一定會影響，但長遠的價值仍在，因此，這反而是保持入貨的時候，只要你長期進行月供就得。

------------------------------------------------

Q13465：

老師，我想創業，計劃儲錢5年後，開台式飲品店，我而家應該點做好？

龔成老師：

做生意要不斷學習的，你預當中一定會有好多困難，但你都要想方法克服佢。如果你打算開店，我建議你先到類似的店打工，要完全了解當中的流程，風險，了解各區的生意情況，找到市場的缺口，先可以進行。

同埋，有時唔一定要預開店好大成本，可以由細做起，然後成功後再投資變大，這方法會更加好。

你這刻可以利用股票，保持平穩增值，將財富滾大，一邊儲錢，一邊投資優質、穩健股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388），都是適合你的。

同時，你要在這幾年，好好提升生意及行業的相關知識。

------------------------------------------------

Q13466：

龔sir你好，小弟28歲剛剛開設左美股戶口，打想分注買入 Google, 巴郡, 百事可樂 , johnson & johnson 作長線投資，請問龔sir呢幾隻股票質素如何？

龔成老師︰

我自己無特別深入研究美股，但巴郡這類企業當然可以投資，是長遠投資之選，不過巴菲特年紀大，是風險因素，雖然我認為佢團隊都能用佢的方法投資，令長遠有增長力，但始終巴菲特無人能及。

其實美股一向都有不少好公司，但我地投資股票，最重要是「投資自己熟識的公司」，所以，投資與否，要睇你是否真正了解該企業。

這幾隻都是好公司，你可以考慮投資。要睇你是否了解美國公司，還是香港公司，如果兩邊都能了解，你可以講到大家的財務數據，企業資料，就可兩邊都投資，這就會增加了你的「可投資範圍」。你要比較這些企業的優質度、前景、發展、估值。

關鍵位就是你認識的程度，而你上述所講的，都是長遠有增長力的股票。另外你也可以考慮投資美股相關基金，如領航標普五百（3140）。

------------------------------------------------

Q13467：

老師你好，最近收看你的著作《財務自由行》，獲益良多。

我想用20萬分注買入12, 405, 778, 1038, 6823作長線收息組合，請問這個組合可以嗎?另外，可以提供合適價位買入以上股票嗎?感謝。

龔成老師：

上述所選的，都是有質素的股票，你都可以投資，但上述大部分，都是偏向收息的類別，增長力不算強，因此，組合本身無問題，但就要睇翻你的投資目標，是否適合你。

至於合理價，全部都在區內，香港電訊（6823）與
越秀房產（0405）則在合理區中上部。

現價都可以投資，只要分注就可以，同時要留有現金。

------------------------------------------------

Q81346：

你好, 在年前的新股熱潮下買入左幾隻股票, 現想重整一些潛力股或者平衡增長的股票。

請問以下股票應否繼續持有, 636 嘉里物流 1833 平安好醫生, 2226 老恆和, 6886 華泰證券

龔成老師：

總之記住，我地繼續持有一隻股票與否，最重要是企業的質素、前景。買入價只是一個心理因素。

嘉里物流（0636）質素都算有，都有投資價值，但增長力不算好強，只要貨不太多，持有無問題的。

平安好醫生（1833）有質素，可持有。

老恒和釀造（2226）質素只是一般，如果有較大的反彈，可考慮賣出。

ＨＴＳＣ（6886）質素算是中等，業務雖然有，但賺錢能力不強，唔好預佢有太大的增長力，如投資不多，都可以持有的。

------------------------------------------------

Q13469：

你好龔成老師，我家有兩個很舊的物業，在西環。

一個為樓齡50幾年(估值5M)，另一個都有38年樓齡(估值5M),沒有按揭。

50年樓在數年前XX話收購，但當時有老人家住，不打算搬，現在老人家已住在老人院，只有我媽一人住。此物業是我爸及祖母聯名，長命契。

38年樓現是我和父親住，是我和弟弟聯名的。

我常想我和爸媽搬在一起住，那可把一個物業出租，但家母認為房子是嫲嫲有份，暫時不想改變現狀。

因為兩房子都很舊，如要租出，都一定要大裝修。

其實這兩個房子都不太適合老人家住，一間是附近要行上大斜路，另一間要上二十多級樓梯才到電梯大堂。

剛放寬9成按揭，我在想是否可樓換樓，把38年樓換掉，因為50多年樓，我們在想希望有人收購。

老師，請問我應如何好好處理，令財務可改善些，因為我從事貿易，工作不太穩定，收入亦有限。加上年紀不少，長遠來說都可能要轉行。

感謝你的寶貴時間!

龔成老師：

先說50年樓物業，這物業之前有人想收購，加上不適合你地自住，最好的方法是賣給想收購的該公司，佢地收購會持續一段長時期，之前收唔到你的單位，如果佢其他單位都仍收緊的話，即是收你的單位是遲早的事，你應該打探一下最新的情況，賣給他們是一個方向。

雖說物業的名是你爸及祖母，但這類單位已50年，就算要租出都要裝修，加上要保持維修，因此將單位賣出，得到現金，仍然再同公平的模式分現金，又或轉為其他資產項，產生持續的現金流，這是最好的方法。

至於賣掉38年樓，如果這物業真的不適合你地自住的話，都是可以的，但賣出後建議買入另一物業，但你就要計好按揭部分。

雖然政府放寬左成數，但唔代表你一定要去到盡，所有野都要以「供得起」作原則。

如果你賣樓後，會有一定的現金，可以作首期，你可以買另一層樓時，做7、8成按揭，希望你買樓後，仍然有現金剩，同時，要以「供得起」為大前題。

------------------------------------------------

Q13470：

成兄，我看中1883，因在澳門有籠斷電訊地位;想買來收息,成兄有何意見，十分感謝。

龔成老師：

中信國際電訊（1883）業務穩定，整體質素算是可差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。

盈利就穩定並平穩增長，但始終生意無上升，點都會有扣分的地方。

相信佢能平穩發展，收息可以，但就不要對股價有太大期望。

------------------------------------------------

Q13471：

你好，一直有看你的投資影片，現在有這個情況，想問一下建議應該如何是好。

我現在持有760000股（0871），想問返應該繼續持有/止瀉。

另外，還持有240000股（0627），早前價位到1.8蚊以為價位有升幅空間，但現在下跌了連續好幾日。
平均價位：0.164

本人資料：19歲 第一次炒股，期望短炒所以冇用你youtube推薦的價值投資法:(

Thanks！

龔成老師：

我地繼續持有一隻股票與否，最重要是分析企業的業務、前景，買入價只是一個心理因素。

中國疏浚環保（0871），業務不佳，5年有3年處於虧損狀態，投資價值不高，加上核數師意見中，曾經出現了修定報告，這反映當中有少少問題，但其後算是調整翻，但這都反映，這企業有些地方有古怪，要小心。

近期股價大幅波動，炒多過實際，風險高，因此對這股有保留，賣出會比較好。

至於福晟國際（0627），業務同樣不太好，規模細，風險高，賣出較好。

你要改變你的投資模式，唔好著重股價的走勢分析，而是著重企業的質素，你要當自己「收購」企業一樣。

------------------------------------------------

Q13472：

Hello 成哥
如果第一間物業你認為 買新樓 是個好選擇嗎？

因為資金唔夠
見到呢類新樓 首期好似比較容易接受
同埋有好多優惠 如果投資這類新樓
算是高風險定係低風險 的投資呢？

現時 有約現金80萬

每月可儲約5萬 有一半拎左去月供股票
我都認為一半現金一半股票 較理智
但係d現金愈黎愈多既時候 就想買野（意思是資產）
我希望快d可以儲多d資產

係唔係應該用宜家既現金買左樓會更有效令我既資產增值得更快
我沒有自住需求 純粹以投資角度出發

龔成老師：

坦白講，我一向對新盤都有保留，因為新盤有機會定價較貴，投資者較易買貴貨。

因為新樓無過往的租金情況，我地無得計租金回報率，加上發展商會用好多付款方法，等你覺得易上車，但其實的平貴並不如你所想，所以要小心。同埋，近年香港樓市向上，但久不久有蝕的個案，絕大部分就是當時買新樓的。

而你打算投資，這刻的香港樓，自住價值仍在，投資價值就不算高，加上你買新樓，對手是發展商，若是二手樓，對手是業主，而你好難在發展商這個對手中找到著數的。

另外，你可以保持月供股票，以現時的市況平貴來說，一半月供，一半儲現金，是較好的做法。

------------------------------------------------

Q13473：

龔成老師你好，我見到你下面的文字，但有不明白的地方，想請教下：

【假設你每月投資$6000，月供盈富，假設15%複息回報，20年後，的確可以滾存到$730萬（但就要每年的平均回報，即是股價上升，加股息，合共有15%）。

然後20年後，再進行資產配置，因為「先增後，後現金流」，尾段時期著重保本，追求現金流，這是可投資收息股，目標是5%以上的股息，以$730萬計，一年收息$365000，每月以息約$30000。】

龔sir，我已45歲，兒子剛滿20歲，我月入14000元，想儲錢養老，又想存點錢給兒子，但是我這樣低收入人士根本不可能實現到，看龔sir的文章又好似對未來又充滿了希望

我打算去兼職，計劃月供3000元盈富，供20年，這樣的話，20年後可以滾存到多少錢本金呢？

我唔識計，想知道供完20後，一年收息大約有幾多？想了解下到時可否夠我自己年老時的生活開支。請龔sir抽出寶貴時間回覆 指點我，謝謝你

20年x12=240個月x3000=72萬元，以現價大約27.5元左右來計算的話，72萬元大約可以買入26200股盈富
如果我不月供，而是選擇在低位時買入，在20年之內買入3萬股盈富。

龔sir，請問如果我這樣理解，咁同穩定月供3000供足20年之後，兩者收息會相差幾多呢？

龔成老師：

如果你在低位是買入盈富（2800），得到的盈富股數，的確會比你月供的為多。

例如盈富股價在$20-$40，你月供，就會得到平均的買入價，假設為$30，如果你低位買，就會在$20，你最終能買到的股數，可以多幾十%。

不過，這是假設你成功「捉到低位」，這是有90%的散戶都想做的，但可惜，我過往做了十年銀工及證券行，見佢地絕大部分都是失敗的。

好多野表面做到，但實際就好難做，因此，我反而建議你簡單去做月供，這會更加好。

如果你每月投資盈富，複息15%的話，20年後會滾存到$360萬。不過，近年中港經濟弱左，回報率可能會減，但要滾存到$250萬-$300萬，仍是合理的，我相信你可以做到。

到時，我會建議你轉到其他收息股，因為盈富的股息不算強，你到時轉去有6%的收息股，一年就可以收到$18萬息，都算是一個不差的數目。

不過題外話，你個子都20歲，應該要佢學習為自己負責，如果你比佢「太過照顧」的景象，只會令佢更加依靠你。

------------------------------------------------

Q13474：

成哥 最新按揭放寬上限 ，咁我應該用一成借盡9成按揭定2成 借8成？

根據你邏輯，應該有得借盡借，只要自己供得起 ，而且有多筆錢用

成哥，早前你提及的投資平穩增值股，應該投資港鐵 066或是領展（0823）？

龔成老師：

由於現時低息環境，因此借多D，的確是有著數的，但你都要留意，高成數按揭要買揭保，這會增加成本，你最好先計算下。

另外，「供得起」是最大的原則，我會偏向建議借多D，留更多現金在手，但如果因為「可以借得多，而買太高金額的物業」，這我就不建議。

因此，只要計過數，供得起方面無問題，你就可以借多D的。

港鐵（0066）、領展（0823）都是有質素的股，都是可以投資的，現時港鐵值博率會略高。

------------------------------------------------

Q13475：

龔成老師，我剛上完你嘅堂，到宜家都未做第7課年報份功課，之前啲功課好快做完，但呢份每次攞起手就睇唔入腦，都有去書局睇過本年報勝經，都唔似你其他書咁容易睇得明，好似睇到有啲混亂，點算，再唔做真係怕將學嘅野還返俾你，除咗上多次有無解決方法呀

上咗你堂真係獲益良多，應該一早上，宜家睇多咗股票嘅野，又明多咗，發現有啲熱炒股市盈率超高依然有人博佢有得升，因為有啲股真係可以升到不合符常理，例如0986，推算翻10年前個價3000幾蚊，真係好恐怖。

我用上堂學嘅野分析晒我媽買嘅股票，全部都係不宜沾手股票，0986係其中一隻。

以前我見到媽媽每日俾股票嘅上上落落影響，曾經對股票有啲反感，但我宜家好明白點解佢要買股票，亦好希望用正確嘅方法投資。

想問問，影響一隻股票嘅升跌簡單黎講係咪企業經營狀況同集資金額兩個因素？

btw，第一次見你真人覺得同個卡通有出入XD，可能因為髮型嘅唔同，哈哈

龔成老師：

年報的確是有點深的，如果你之前無會計底，可能有點吃力，但你可以溫翻上堂的筆記，加上《年報勝經》，睇多幾次，我已經用較淺的文字及圖表，在書中表達，但我都知有D係要消化，所以要慢慢睇。

我相信你上完堂後，好明白有知識與無知識的分別，一般散戶知識上的缺乏，其實你已經掌握到不少知識，但仍要再打好基礎，你要多睇書及年報，進步要時間的。

至於影響股價的升跌，在中短期，只會同買賣供求、市場情緒、資金流向、企業短期因素有關。但如果講長期股價，就會睇翻企業的長期經營面，發展。

我成日覺得髮型都唔算好大分別，哈哈~~~

------------------------------------------------

Q13476：

老師，之前見你話港交所30倍的市盈率，仍然算是合理區，點理解？30倍不是好貴嗎？

龔成老師：

當一間企業比其他企業更優質時，可以承受到更高的市盈率，同時你睇翻佢的派息比率，就會明白佢就算唔需要再投資，都可以有一定的增長力，這是佢的獨特性，所以在計算時都會考慮這一點。

如果只考慮市盈率表面數字的分析，往往會出現盲點，因為「企業A的市盈率比企業B為高，但不代表一定貴」，所以投資者要明白數字背後的概念，如果只集中一個數字去解讀，好易會出錯。

而市盈率本身就無絕對的平貴定義，根本不能得出「某個市盈率就一定是貴」這個推論。同時我地在估值時，仍會配合其他估值方法去計算。

------------------------------------------------

Q13477：

HELLO 好耐冇見 想問下美股同買港股你會點睇@@ 最近想買美銀同波音

龔成老師：

無論投資港股還是美股，原理都是一樣，就是要投資有質素的公司，長期持有，因此，美股都有投資價值，但前題是「真正了解該公司」。

美銀同波音都是有質素的公司，本身都有相當的獨特性，但波音本身的風險略高，盈利略有不利，因此如投資不建議注碼太大。

------------------------------------------------

Q13478：

請問點先知該股票係合理價位

龔成老師：

如果要知道這刻是否平貴，合理區在那裡，就一定要計算企業的價值。因為每間企業都有其價值，當中主要由業務價值以及資產價值組成，我地就是計算這些的價值。

但要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，要考慮企業的生意、盈利、現金流等財務數據，同時要比較行業，考慮這企業的經營情況，之後的環境又會如何。這都是計算的基礎。

但如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q13479：

成哥你好。想問下恆地合理價係幾多？ 我用你上堂既方法計到係33-42
唔知正確與否

同埋我想問下股東大會小股東有資格參加嗎？

龔成老師：

要留意翻，恆基（0012）由於是地產企業，因此每年的盈利數字上，都會包左「物業重估數目」，所以數字會因此而谷大左。

正因為這原因，過往市盈率的數字都會受影響，而我地在計算估值時，需要自己調整翻。

你上述計算的估值，基本上合理，大致是正確的。

至於你想參加股東大會，只要你持有股票，就可以參加，但你一定要預先同銀行或證券行講，要同你登記左先先至可以。

------------------------------------------------

Q13480：

龔成老師你好, 我今年28歲, 現時月入3萬, 每月儲1.4萬, 有40萬資產, 其中包括6手匯豐（平均買入價$66）、10萬元人民幣（在0.85時兌換的）, 其餘用作流動資金。

想請教老師我是否應該繼續持有匯豐? 如果想學習投資應如何開始? 謝謝!

龔成老師︰

匯豐（0005）這企業的賺錢能力比過往年代已減，這刻只是一隻收息股，不要對股價增長有太大的期望。

在人民幣這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目。由於你年輕，匯豐這些收息股對你唔太適合，而且佢佔你整個組合太多，有過度集中風險。

長遠建議你將部份你可以將部份匯豐和人民幣轉至一些平穏增長股︰盈富（2800）、金沙（1928）、恆基（0012）、中銀（2388）、港鐵（0066）、長建（1038），這些真資產才對你財富增長有幫助。

在學習方面，你可以多閱讀理財類別的工具書，以及多接觸財經新聞，而進修相關課程亦是重要的知識來源。

我18歲時開始買股票，都初甚麼都唔識，於是不斷睇書、上堂去學習，自己慢慢睇年報，咁樣去累積知識。

你可以睇《股票勝經》，裡會有教你點樣有系統地選股。而我的股票班，都會講5種選股的方法，教你點樣由2000間上市公司中，選取有質素的股票。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。