講下歧視。前排睇左一套輕鬆又高汁紀錄片，大概講一位在美國著名的白人女演員，名成利就，嘗試放低自己既有身份和認知，探討種族歧視問題。除左與黑人對談，她也與很多跟她相似的白人傾談，結果其實好多白人心底裡並不認同種族歧視的存在，覺得社會好開明，甚至有少數認為白人反被黑人「逆向歧視」。（事實是可以透過收入、工作待遇、犯罪率、被槍擊機率等指標，或一些社會實驗証實此等歧視仍然存在） 是的，擁有優勢的人其實要明白被邊緣化和遭受剝削的人，一點也不容易。衰啲，直接否認/無視歧視的存在，但仲有唔少人，係自以為明白、以大愛自居，卻是在abuse自己的優勢而不自知。 上流社會不體會基層的困苦，佢地以為只要努力工作就可以捱出一片天，捐錢上下電視節目就叫幫助社會。 男士不太理解男女不平等的情況，佢地以為現代社會邊有分？佢地可能覺得自己尊重女性，但係對職場上的機會不均視而不見。有啲對於受到性侵犯的情況，會有果啲「係佢著得太性感姐」、「有事點解唔講出來」果啲怪罪受害人的心態。 基督徒唔明白性小眾的困境，口説愛和接納，但係心裡面都覺得佢地係要”Fix”既對象，好有問題。有啲會天真到以為幫佢地祈下禱、認下罪就可以「回復正常」，無對話同尊重，連一啲保障對方基本權利的法律、教育，都唔願意傾。 種族歧視係香港都一樣存在，對於少數族裔、外地來港工作的家庭傭工，有好多難聽既花名，莫名奇妙的刻板印象。歧視可能不説口，但是在許多日常和態度看得出來。白人至上也一樣，你看看國際學校的廣告就知道。都唔好講以前做社區中心，家長連番查詢，要求幼兒英文班轉走印度藉老師，要白人。 要數更多例子，精神病/情緒病患者、Sen小朋友，等可謂多不勝數，唔數啦。歧視，某程度上係人類的劣根性，的確由於我們的認知和價值觀也只主觀經驗所限制，有時難以理解他人的處境。因此我地更加要有一個開放的胸襟、謙卑態度、積極聆聽。唔好知少少懶醒，以為自己真係明，不如多啲設身處地，投入下別人的世界，才不會變成壓迫者而不自知。 (Btw，開頭講套野叫，Hello, Privilege! It’s me, Chelsea!，netflix有)